Pijen ko An Jon

Ke rijjilõk Jon ear kalbuuj ilo ãneo etan Patmõs, Jesus ear kwal̦o̦kl̦o̦k ñane 16 pijen ak pija ko kõn kobban ilju im jekl̦aj. Pijen kein rej kwal̦o̦k kõn wãween an naaj kwõjarjar etan Jeova, wãween an Aelõñ eo an naaj itok, im kõn an naaj jejjet ankilaan ijin ioon lal̦ ãinwõt an bar jejjet ilañ.

Ilo juon pijen, Jon ear lo an Jeova jijet ioon tũroon eo an eaiboojoj ilañ. Ipel̦aakin tũroon in an, ewõr 24 elder ro rej nuknuk mouj im ioon bõraer kajjojo ewõr juon crown gold. Ear ejjaromrom im wõr ainikien jourur jãn tũroon eo an Jeova. Elder ro 24 rar bukwelõlõ im̦aan Jeova im kabuñ ñane. Ilo bar juon pijen, Jon ej loe juon jar el̦ap rej kabuñ ñan Jeova im rej itok jãn aolep aelõñ, bwij, im kajin. Im L̦aam̦ eo Jesus, ej lale er im ãñinl̦o̦k er ñan dãnnin mour eo. Tokãlik ilo bar juon pijen, Jon ej lo an Jesus jino irooj ãinwõt Kiiñ ilañ ippãn elder ro 24. Im ilo pijen eo tok juon, ear lo an Jesus tarin̦aeik dragon eo Setan im enjel̦ ro an renana, im an jolal̦tak er jãn lañ ñan ijin ioon lal̦.

Innem Jon ear lo juon pijen eaiboojoj kõn L̦aam̦ eo im ro 144,000 rej jutak ippãn doon ilo Tol̦ Zaion. Ear bar lo an juon enjel̦ kãlo̦k imejatoto im ba ñan armej ro bwe ren mijak Anij im lel̦o̦k nõbar im aiboojoj ñan E.

Ãlikin men in, ear bar lo juon pijen kõn tarin̦ae in Armagedon. Ilo tarin̦ae in, Jesus im kumi in tarin̦ae eo an rej ko̦kkure im anjo̦ ioon jukjukun pãd in enana an Setan. Innem ilo pijen eo ãliktata, Jon ej lo an aolep ro ilañ im ijin ioon lal̦ lukkuun aenõm̦m̦an kõnke em̦õj jol̦o̦ke Setan im ro rar l̦oor e. Aolep ro ilañ im ioon lal̦ renaaj kokkwõjarjare etan Jeova im kabuñ ñan e wõt.