KATAK 12
Ta eo Enaaj Jipañ Eok ñan Wõnm̦aanl̦o̦k Wõt im Katak Baibõl̦?
Katak Baibõl̦ ej juon men ej bõktok ñan kõj elõñ jeraam̦m̦an im tokjãn ko. Bõtab ewõr iien emaroñ pen. Jet iien, kwõmaroñ l̦õmn̦ak el̦aññe kwõmaroñ wõnm̦aanl̦o̦k wõt im katak Baibõl̦. Etke ewõr tokjãn am̦ kate eok ñan jab bõjrak jãn am̦ katak? Ta eo emaroñ jipañ eok ñan kijenmej im wõnm̦aanl̦o̦k wõt meñe ewõr apañ ko?
1. Etke elukkuun aorõk ñan katak Baibõl̦?
“Naanin Anij emour im ekajoor.” (Hibru 4:12) Elukkuun aorõk Baibõl̦ eo kõnke ej kwal̦o̦k l̦õmn̦ak im eñjake ko an Anij kõn kwe. Ejjab jipañ wõt eok ñan kal̦apl̦o̦k am̦ jel̦ãl̦o̦kjen̦ ak ej bar lewaj m̦oolin mãlõtlõt im juon kõjatdikdik. Men eo el̦aptata Baibõl̦ eo ej jipañ eok kake ej ñan erom jeran Jeova. Ilo am̦ katak Baibõl̦, kwõj kõtl̦o̦k bwe ennaan eo ie en jipañ eok ñan kõm̦m̦an oktak ko rem̦m̦an ilo mour eo am̦ im bwe en l̦apl̦o̦k am̦ lo m̦õn̦õn̦õ.
2. Etke eaorõk ñan kile joñan aorõkin katak ko rem̦ool ilo Baibõl̦?
Katak ko rem̦ool ilo Baibõl̦ rej ãinwõt m̦weiuk ko raorõk. Eñin unin Baibõl̦ eo ej rõjañ kõj ñan “wiaik . . . m̦ool, im jab wiakake.” (Jabõn Kõnnaan 23:23) Ñe jej keememej joñan aorõkin katak ko rem̦ool ilo Baibõl̦ eo, jenaaj kate kõj ñan wõnm̦aanl̦o̦k wõt im katak, meñe jej iioon wãween ko reppen.—Riit Jabõn Kõnnaan 2:4, 5.
3. Ewi wãween an Jeova maroñ jipañ eok ñan wõnm̦aanl̦o̦k wõt im katak?
Ãinwõt ri-Kõm̦anm̦an eo am̦ eutiejtata im eo Jeram̦, Jeova ekõn̦aan jipañ eok ñan katak kõn e. Emaroñ lewaj ñan eok “kõn̦aan im kajoor eo ñan em̦m̦akũt.” (Riit Pilippai 2:13.) Kõn men in, ñe ewõr iien kwõj aikuj jipañ ñan kõn̦aan katak ak jerbali men ko kwõj katak kaki, emaroñ jipañ eok. El̦aññe kwõj aikuj kajoor ñan anjo̦ ioon jum̦ae ak wãween ko reppen, emaroñ lewaj kajoor eo kwõj aikuji. Ekkeini am̦ jar ñan Jeova im kajjitõk bwe en jipañ eok ñan jab bõjrak jãn am̦ katak.—1 Tessalonika 5:17.
KAM̦WILAL̦L̦O̦K AM̦ MEL̦EL̦E
Lale ewi wãween am̦ maroñ wõnm̦aanl̦o̦k wõt im katak Baibõl̦ meñe kwõpoub ak kwõj iioon jum̦ae jãn ro jet. Innem lale ewi wãween an Jeova naaj jipañ eok ñan kijenmej wõt im jab bõjrak jãn am̦ katak.
4. Kõm̦m̦an bwe am̦ katak Baibõl̦ en juon men kwõj lukkuun kaorõke
Jet iien joñan ad lukkuun poub, jemaroñ l̦õmn̦ak bwe ejjel̦o̦k ad iien ñan katak Baibõl̦. Ta eo emaroñ jipañ? Riit Pilippai 1:10, innem bwebwenato kake kajjitõk kein:
Ilo am̦ l̦õmn̦ak, ta jet iaan men ko “raorõkl̦o̦k” ilo mour?
Ewi wãween am̦ maroñ kõm̦m̦an bwe am̦ katak Baibõl̦ en juon men eaorõk ilo mour eo am̦?
El̦aññe kwõnaaj kanne juon bakõj kõn bok innem kajjioñ kanne kõn dekã, eban maroñ del̦o̦ñ aolepen dekã ko ie
El̦aññe kwõnaaj kanne bakõj eo kõn dekã ko m̦okta, enaaj wõr jikin am̦ kanne enañin aolepen bok ko. Ejja ãindeinl̦o̦k wõt, el̦aññe kwõnaaj likũt men ko “raorõkl̦o̦k” m̦oktata ilo mour eo am̦, kwõnaaj maroñ katõpraki men kein im enaaj wõr wõt iien ñan kõm̦m̦ani men ko jet
Kar kõm̦anm̦an armej bwe en wõr aer kõn̦aan im aikuj ñan jel̦ã kõn Anij im kabuñ ñane. Im ñan kõm̦m̦ane men in, ej juon menin aikuj ñan katak Baibõl̦. Riit Matu 5:3, innem bwebwenato kake kajjitõk in:
Ewi wãween ad bõk tokjãn ñe jej kõm̦m̦an bwe ad katak Baibõl̦ en juon iaan men ko raorõk ilo mour eo ad?
5. Kijenmej im wõnm̦aanl̦o̦k wõt ñe kwõj iioon jum̦ae
Jet iien ro jet remaroñ kajjioñ kabbweer eok jãn am̦ katak Baibõl̦. Lale joñak eo an Francesco. Kõjoe PIJAIN ALWÕJ eo, innem bwebwenato kake kajjitõk kein:
Ilo pijain alwõj eo, ta kar l̦õmn̦ak eo an ro m̦õttan im baam̦le eo an Francesco ke ear ba ñan er kõn men ko ej katak kaki?
Ta jeraam̦m̦an ko ear loi kõn an kar kijenmej wõt im jab bõjrak jãn an katak?
Riit 2 Timote 2:24, 25, innem bwebwenato kake kajjitõk kein:
Ta l̦õmn̦ak eo an baam̦le eo am̦ im ro m̦õttam kõn men ko kwõj katak kaki?
Ekkar ñan eoon kein, ewi wãween am̦ aikuj uwaak ak em̦m̦akũt ñe juon ejjab m̦õn̦õn̦õ kõn am̦ katak Baibõl̦? Im etke kwõj ba men in?
6. Atartar ioon Jeova bwe en jipañ eok
Jel̦ak epaakel̦o̦k Jeova, el̦apl̦o̦k ad kõn̦aan kabuñbũruon. Meñe ãindein, ak emaroñ pen ñan kõm̦m̦an oktak ko bwe jen maroñ mour ilo juon wãween ej kabuñbũruon Jeova. El̦aññe kwõj bõk eñjake in, jab ebbweer. Jeova enaaj jipañ eok. Kõjoe PIJAIN ALWÕJ eo, innem bwebwenato kake kajjitõk kein:
Ilo pijain alwõj eo, ta oktak ko Jim ear kõm̦m̦ani ñan kabuñbũruon Jeova?
Ta eo em̦m̦an ippam̦ kõn joñak eo an?
Riit Hibru 11:6, innem bwebwenato kake kajjitõk kein:
Ta eo Jeova enaaj kõm̦m̦ane ñan ro rej “kanooj kappukote,” mel̦el̦ein ro me rej lukkuun kate er ñan jel̦ã kajjien im kabuñbũruon?
Ta eo men in ej kaalikkar ñan eok ikijjeen wãween an Jeova eñjake ñe ej lo am̦ kate eok ñan wõnm̦aanl̦o̦k wõt im katak Baibõl̦?
JUON EMAROÑ KAJJITÕK: “Etke kwõj katak Baibõl̦?”
Enaaj kar ewi wãween am̦ uwaak?
TARLEP IN KATAK EO ILO TUKADU
Meñe ejjab pidodo aolep iien ñan katak Baibõl̦, ak men in emaroñ jipañ eok ñan lo m̦õn̦õn̦õ kõn mour ñan indeeo. Wõnm̦aanl̦o̦k wõt im atartar ioon Jeova, im enaaj kõjeraam̦m̦an eok.
Ãlij
Etke eaorõk ippam̦ katak ko rem̦ool ilo Baibõl̦?
Ewi wãween am̦ maroñ “lukkuun lale ta ko raorõkl̦o̦k”?
Etke em̦m̦an ñan kajjitõk ippãn Jeova bwe en jipañ eok ñan jab bõjrak jãn am̦ katak Baibõl̦?
KAL̦APL̦O̦K AM̦ MEL̦EL̦E
Etale emãn wãween ko rar jipañ elõñ armej ro ñan kõjerbale iien ko aer ilo mãlõtlõt.
Lale ewi wãween an kar Jeova jipañ juon kõrã me l̦eo ippãn ear jab mel̦el̦e kõn an kate ñan kabuñbũruon Anij.
Lale ewi wãween an kar juon em̦m̦aan bõk tokjãn jãn an kar lio ippãn kijenmej im wõnm̦aanl̦o̦k wõt im katak.
Ewõr jet iien armej rej n̦aruon Ri-Kõnnaan ro an Jeova im ba bwe rej ko̦kkure baam̦le ko. Bõtab em̦ool ke men in?
“Do Jehovah’s Witnesses Break Up Families or Build Them Up?” (Katak eo ilo online)