Ta in Aelõñ eo an Anij?

Men eo el̦aptata an Baibõl̦ eo kõnono kake ej Aelõñ eo an Anij. Jeova enaaj kõjerbale Aelõñ in ñan kajejjete karõk eo an kõn lal̦ in jãn kar jinoin. Ta in Aelõñ eo an Anij? Etke jejel̦ã bwe ej tõl kiiõ? Ta ko em̦õj an katõpraki? Ta ko enaaj kõm̦m̦ani ilju im jekl̦aj? Katak in im katak ko ruo tokãlik renaaj uwaaki kajjitõk kein.

1. Ta in Aelõñ eo an Anij, im wõn eo ej Kiiñ ñan Aelõñ in?

Aelõñ in ej juon kien me Jeova Anij ear kajutake. Kiiñ eo an Aelõñ in ej Jesus Christ, eo im ej tõl jãn lañ. (Matu 4:17; Jon 18:36) Baibõl̦ ej ba kõn Jesus: “Enaaj Kiiñ . . . ñan indeeo.” (Luk 1:32, 33) Ãinwõt Kiiñ eo an Aelõñ eo an Anij, Jesus enaaj irooj ioon aolep armej ro rej pãd ioon lal̦ in.

2. Wõn ro renaaj irooj im tõl ippãn Jesus?

Jesus ejjab tõl make iaan. Armej ro jãn “bwij otemjej, kajin, im jãn armej otemjej im aelõñ otemjej . . . renaaj kiiñ im tõl lal̦ in.” (Revelesõn 5:9, 10) Jete armej renaaj irooj im tõl ippãn Christ? Jãn ke Jesus ear itok ñan lal̦ in, elõñ milien Kũrjin ro rar erom ri-kal̦ooran. Bõtab 144,000 wõt iaaer renaaj etal ñan lañ bwe ren tõl ippãn Jesus. (Riit Revelesõn 14:1-4.) Aolep Kũrjin ro jet ijin ioon lal̦ renaaj erom jitijen in Aelõñ eo an Anij.​—Sam 37:29.

3. Ewi wãween an Aelõñ eo an Anij utiejl̦o̦k im em̦m̦anl̦o̦k jãn kien ko an armej?

Meñe ewõr ri-tõl ro ilo lal̦ in me rej kajjioñ in kõm̦m̦ani men ko rem̦m̦an, ak ejjel̦o̦k aer maroñ ñan kõm̦m̦ani aolep men ko rekõn̦aan. Im tokãlik enaaj wõr ri-tõl ro jet me rej bõk jikier, im rein remaroñ l̦õmn̦ak wõt kõn kõn̦aan ko aer make im jab kõn̦aan jipañ armej ro. Bõtab ejjel̦o̦k en̦ enaaj bõk jikin ri-Tõl eo an Aelõñ eo an Anij, Jesus. Anij ear “kajutak juon aelõñ eo eban jako indeeo.” (Daniel 2:44) Jesus enaaj tõl ioon aolepen lal̦ in, im eban kwal̦o̦k kalijekl̦o̦k. Ej juon eo el̦ap yokwe ippãn, ejouj, im ej ekajet jim̦we, im enaaj katakin armej ro ñan kõm̦m̦an ñan doon ilo ejja wãween in wõt​—kõn yokwe, jouj, im ekajet jim̦we.​—Riit Aiseia 11:9.

4. Juon kien ekajoor enaaj irooj ioon aolepen lal̦ in

El̦apl̦o̦k kajoor im maroñ eo ippãn Jesus ñan irooj jãn jabdewõt ri-tõl. Riit Matu 28:18, innem bwebwenato kake kajjitõk in:

• Ewi wãween an l̦apl̦o̦k maroñ eo ippãn Jesus jãn jabdewõt armej me ej tõl?

Kien ko an armej ekkã aer oktak, im ri-tõl ro kajjojo rej irooj ioon jet wõt jikin ilo lal̦ in. Ak ta kõn Aelõñ eo an Anij? Riit Daniel 7:14, innem bwebwenato kake kajjitõk kein:

• Etke ej juon men em̦m̦an bwe Aelõñ eo an Anij “eban jorrããn”?

• Etke ej juon men em̦m̦an bwe enaaj irooj ioon aolepen lal̦ in?

5. Bar juon kien ej aikuj bõk jikin kien ko an armej

Etke Aelõñ eo an Anij ej aikuj bõk jikin kien ko an armej? Kõjo̦e PIJAIN ALWÕJ eo, innem bwebwenato kake kajjitõk in:

PIJAIN ALWÕJ: Ta in Aelõñ eo an Anij?​—Jidikin (1:41)

• Ta ko rej wal̦o̦k itok wõt jãn an armej tõl?

Riit Ekklisiastis 8:9, innem bwebwenato kake kajjitõk kein:

• Ilo am̦ l̦õmn̦ak, ekkar im jim̦we ke bwe Aelõñ eo an Anij en bõk jikin kien ko an armej? Etke kwõj ba men in?

6. Ri-tõl ro ilo Aelõñ eo an Anij remel̦el̦e kõn kõj

Kõnke Kiiñ eo ad, Jesus, ear mour ãinwõt juon armej, emaroñ “mel̦el̦e kõn m̦õjn̦o̦ ko ad.” (Hibru 4:15) Em̦m̦aan im kõrã ro me renaaj tõl ippãn Jesus me 144,000 uwaaer, rej ro Jeova ear kããlõt er “jãn bwij otemjej, kajin, im jãn armej otemjej im aelõñ otemjej.”​—Revelesõn 5:9.

• Kwõj ke bõk kaenõm̦m̦an ilo am̦ jel̦ã bwe Jesus im aolep ro renaaj tõl ippãn el̦ap aer jel̦ã im mel̦el̦e kõn wãween mour ko an armej? Etke kwõj ba men in?

7. Em̦m̦anl̦o̦k kien ko an Aelõñ eo an Anij

Kien ko an armej rej kõm̦m̦ani kakien ko ñan jipañ im kõjparok jitijen ak armej ro ium̦win kien eo aer. Ejja ãindeinl̦o̦k wõt, ewõr kien ko an Aelõñ eo an Anij me jitijen ro an rej aikuj in l̦oori. Riit 1 Korint 6:9-11, innem bwebwenato kake kajjitõk kein:

• Kwõl̦ak lale enaaj ewi wãween lal̦ in ñe aolep renaaj l̦oori kakien ko an Anij?a

• Kwõl̦ak lale ekkar ke bwe Jeova en kõtmãne bwe jitijen ro ium̦win Aelõñ eo an ren l̦oori kien ko an? Etke kwõj ba men in?

• Ta eo ej kaalikkar bwe armej ro me rejjab l̦oori kien kein remaroñ kõm̦m̦an oktak?​—Lale eoon 11.

TARLEP IN KATAK EO ILO TUKADU

Aelõñ eo an Anij ej juon m̦oolin kien ilañ me enaaj irooj ioon aolepen lal̦ in.

Ãlij

• Wõn ro rej ri-tõlin Aelõñ eo an Anij?

• Ewi wãween an utiejl̦o̦k im em̦m̦anl̦o̦k Aelõñ eo an Anij jãn jabdewõt kien an armej?

• Ta jet iaan men ko Jeova ej kõtmãne jãn jitijen ro ium̦win Aelõñ eo an?

KAL̦APL̦O̦K AM̦ MEL̦EL̦E

Lale ta eo Jesus ear katakin ikijjeen ia eo Aelõñ eo ej pãd ie.

“Is the Kingdom of God in Your Heart?” (Katak eo ilo online)

Etke Ri-Kõnnaan ro an Jeova rej kããlõt ñan tiljek wõt ñan Aelõñ eo an Anij im jab ñan kien ko an armej?

Devoted to God’s Kingdom (1:43)

Etale ta eo Baibõl̦ ej ba kõn ro 144,000 me Jeova ej kããlõt er ñan tõl ippãn Jesus.

“Who Go to Heaven?” (Katak eo ilo online)

Ta eo ear kõm̦m̦an an juon kõrã ilo jikin kalbuuj tõmak bwe Anij wõt emaroñ bõktok ekajet jim̦we ñan lal̦ in?

“How I Found the Answer to Injustice” (Awake!, November 2011)