KATAK 55
Rejetake im Jipañ Eklejia eo Am̦
Ipel̦aakin lal̦ in, elõñ milien armej rej m̦õn̦õn̦õ ilo aer kabuñ ñan Jeova ilo elõñ to̦ujin eklejia ko. Rej kam̦m̦oolol kõn katak ko im naanin tõl ko rej bũki, im rej m̦õn̦õn̦õ in rejetake im jipañ eklejia ko aer ilo elõñ wãween ko. Eñin ke wãween am̦ bar eñjake kõn eklejia eo am̦?
1. Ta jet iaan wãween ko kwõmaroñ kõm̦m̦ani ñan kõjerbal iien im maroñ ko am̦ ñan rejetake im jipañ eklejia eo?
Kõj aolep jemaroñ jipañ im rejetake eklejia eo. Ñan waanjoñak, ewõr ke jet ilo eklejia eo am̦ me rerũtto ak renañinmej? Kwõmaroñ ke jipañ er bwe ren pãd ilo iien kweilo̦k ko? Ak kwõmaroñ ke jipañ er ilo wãween ko jet, ãinwõt etal im kaikujkuj ak jipañ er ilo m̦õko im̦weer? (Riit Jemes 1:27.) Jemaroñ bar volunteer ñan jipañ karreo im kõjparok im̦õn kweilo̦k eo ad. Ejjel̦o̦k juon armej ej iuuni kõj ñan kõm̦m̦ani men kein. Yokwe eo ad ñan Anij im ñan ro jeid im jatid ej kõm̦m̦akũt kõj ñan ‘m̦õn̦õn̦õ im lel̦o̦k [kõj] make.’—Sam 110:3.
Ro em̦õj aer peptaij remaroñ bar jipañ im rejetake eklejia eo ilo wãween ko jet. Likao im em̦m̦aan ro me rekkar ñan bõk eddo ko ekkar ñan laajrak ko ilo Baibõl̦, remaroñ jerbal ãinwõt ri-jipañ ro im tokãlik ãinwõt em̦m̦aan ro rej lale eklejia. Aolep ro jeid im jatid em̦m̦aan im kõrã jim̦or, remaroñ lukkuun rejetake jerbalin kwal̦o̦k naan ikijjeen aer bõk jerbalin bainier. Jet jeid im jatid remaroñ jipañ ilo aer kalõk im̦õn kweilo̦k ko ak ilo aer em̦m̦akũt ñan juon eklejia ej aikuj jipañ ilo wãween ko jet.
2. Ewi wãween ad maroñ kõjerbal jããn ko ad im men ko m̦weied ñan rejetake eklejia eo ad?
Jemaroñ ‘kaiboojoj Jeova kõn men ko m̦weied.’ (Jabõn Kõnnaan 3:9) Jej watõk bwe ej juon jeraam̦m̦an ñan jabawõt kõn jããn ko ad im men ko m̦weied ñan rejetake eklejia eo ad im ñan rejetake jerbalin kwal̦o̦k naan eo ipel̦aakin lal̦. (Riit 2 Korint 9:7.) Jabawõt ko ad rej bar jipañ ilo iien jorrããn ko rel̦l̦ap (disaster relief). Elõñ rej pepe ñan ekkeini aer “kõjenolo̦k jet jããn” ñan aer jabawõt. (Riit 1 Korint 16:2.) Jemaroñ jabawõt ilo ad likũt jããn ko ilo bo̦o̦k in jabawõt ko ilo im̦õn kweilo̦k ko ad ak jemaroñ jabawõt ilo online ilo donate.jw.org. Jeova ej letok iien ko repel̦l̦o̦k ñan ad kwal̦o̦k ad yokwe e ilo wãween ad kããlõt ñan kõjerbal jããn ko ad im men ko m̦weied.
KAM̦WILAL̦L̦O̦K AM̦ MEL̦EL̦E
Lale jet iaan wãween ko kwõmaroñ rejetake im jipañ eklejia eo.
3. Jemaroñ kõjerbal jããn ko ad im men ko m̦weied
Jeova im Jesus rej yokwe ro rej m̦õn̦õn̦õ in lel̦o̦k. Ñan waanjoñak, Jesus ear kile im nõbar juon kõrã ejeram̦õl im emej l̦eo pãleen kõn an kar kate ñan lel̦o̦k jabawõt eo an. Riit Luk 21:1-4, innem bwebwenato kake kajjitõk kein:
Ej aikuj ke l̦ap jabawõt ko ad bwe jen maroñ kabuñbũruon Jeova?
Ewi wãween an Jeova im Jesus eñjake ñe jej jabawõt jãn bũruod?
Ñan lale wãween an doulul in kõjerbal jabawõt ko ad, kõjo̦e PIJAIN ALWÕJ eo. Innem bwebwenato kake kajjitõk in:
Ewi wãween an doulul in kõjerbale jabawõt ko ad ñan jipañ eklejia ko ipel̦aakin lal̦ in?
4. Jemaroñ volunteer ñan jipañ
Ilo tõre ko etto ilo Baibõl̦, ri-karejar ro an Jeova rar kijejeto ilo aer jerbal ñan kõjparok im̦õn kabuñ ko aer. Bõtab, el̦apl̦o̦k men ko rar aikuj kõm̦m̦ani ijello̦kun aer baj jabawõt kõn jããn. Riit 2 Kronikel 34:9-11, innem bwebwenato kake kajjitõk in:
Ewi wãween an kar aolep ri-Israel ro jipañ ñan kõjparok m̦weo im̦õn Jeova ak im̦õn kabuñ eo aer?
Ñan lale wãween an Ri-Kõnnaan ro an Jeova l̦oore waanjoñak in jãn tõre ko etto ilo Baibõl̦, kõjo̦e PIJAIN ALWÕJ eo. Innem bwebwenato kake kajjitõk kein:
Etke elukkuun aorõk bwe jen kõjparok wõt im kõm̦m̦an bwe en erreo Im̦õn Kweilo̦k ko ad?
Ta jet iaan wãween ko kwõmaroñ jipañ ie?
5. Likao im em̦m̦aan ro em̦õj aer peptaij remaroñ kate er ñan kal̦apl̦o̦k ijo kun̦aaer
Baibõl̦ eo ej rõjañ em̦m̦aan ro rej Kũrjin ñan kate er kal̦apl̦o̦k ijo kun̦aaer ñan jipañ im rejetake eklejia eo. Ñan lale juon waanjoñak kõn men in, kõjo̦e PIJAIN ALWÕJ eo. Innem bwebwenato kake kajjitõk in:
Ilo pija eo, ewi wãween an kar Ryan lukkuun kate e ñan kal̦apl̦o̦k ijo kun̦aan ñan jipañ im rejetake eklejia eo?
Baibõl̦ eo ej kõmel̦el̦eiki ta ko likao im em̦m̦aan ro me em̦õj aer peptaij rej aikuj kõm̦m̦ani bwe ren maroñ bõk jerbalin ri-jipañ im juon eo ej lale eklejia. Riit 1 Timote 3:1-13, innem bwebwenato kake kajjitõk kein:
Ta ko likao im em̦m̦aan ro me rekõn̦aan kal̦apl̦o̦k ijo kun̦aaer, rej aikuj kõm̦m̦ani bwe ren maroñ jerbal ãinwõt juon ri-jipañ ilo eklejia eo ak juon eo ej lale eklejia?
Ta ko baam̦le ko aer rej aikuj bar kõm̦m̦ani?—Lale eoon 4 im 11.
Ñe likao im em̦m̦aan ro rej kate er ñan tõpar men kein em̦õj kõlaajraki ilo Baibõl̦ eo, ewi wãween an aolep ro ilo eklejia eo bõk tokjãn?
JUON EMAROÑ KAJJITÕK: “Ri-Kõnnaan ro an Jeova rej bõk jãn ia jããn ko ñan kõm̦m̦ane jerbal ko aer?”
Ewi wãween am̦ naaj uwaak?
TARLEP IN KATAK EO ILO TUKADU
El̦ap an Jeova kam̦m̦oolol kõn ad kate kõj ñan rejetake im jipañ eklejia eo ikijjeen iien ko ad, maroñ ko ad, jããn ko ad, im men ko m̦weied.
Ãlij
Ewi wãween jemaroñ kõjerbal iien im maroñ ko ad ñan jipañ im rejetake eklejia eo?
Ewi wãween jemaroñ kõjerbal jããn ko ad im men ko m̦weied ñan jipañ im rejetake eklejia eo?
Ilo wãween et ko kokõn̦aan jipañ im rejetake eklejia eo?
KAL̦APL̦O̦K AM̦ MEL̦EL̦E
Lale etke Anij ejjab kiiõ kõtmãne bwe ri-karejar ro an ren jabawõt kõn juon m̦õttan joñoul (tithe).
“What Does the Bible Say About Tithing?” (Katak eo ilo online)
Baibõl̦ eo ej lel̦o̦k jet jerbal ko ñan em̦m̦aan ro me em̦õj aer peptaij. Bõtab ta el̦aññe juon kõrã me em̦õj an peptaij ej aikuj kõm̦m̦ani jerbal kein?
“Mel̦el̦e kõn Laajrak eo kõn Bar ilo Eklejia Eo” (Naan in Keeañ, Pãpode 2021)
Alwõje juon pija me ej kwal̦o̦k kõn jet em̦m̦aan ro jeid im jatid reperan me rar lukkuun kaarmejjeteik er make ñan bõkto-bõktak bok ko ñan ro jeid im jatid.
Lale wãween an lukkuun oktak ad kõjerbal jããn ñan kõm̦m̦ane jerbal eo ad jãn doulul in kabuñ ko jet.
“How Is the Work of Jehovah’s Witnesses Financed?” (Katak eo ilo online)