Ewi Wãwen Ad Aikwij Jar ñõn Anij?

KE juõn ri kalor ear kajitõk kin melele ikijen jar, Jesus ear jab makoko in lelok ñõn e. Ekkar ñõn Luke 11:2-4, ear uak: “Ñe kom jar, komin ba: Jememuij, en kwojarjar Etõm. En itok am ailiñ. Letok ñõn kim ilo jabrewõt ran kijim ekar ñõn ran eo. Im jeorlok amuij jerawiwi, bwe kimij bareinwõt jeorlok an armij otemjej muri ibem. Im jab kadeloñ kim ilo kabo.” (Catholic Douay Version) Men in ekkã jela kake einwõt Jar eo an Iroij. Ej kwalok juõn melele eo elap.

Juõn men, ilo nan eo jinointata ej jiroñ kij wõn eo jen jar ñõn e​—ñõn Jemed. Lale bwe Jesus ear jab najikin jabdewõt jar bwe en ilok ñõn juõn armij, ekjap, “saint,” ak meñe ñõn e. Bwe Anij ear keañ: “Aõ wuj I jamin lelok ñõn bar juõn, ak Aõ nebar ñõn men ko men in e ko jekjek.” (Isaiah 42:8, Dy) Jar ko rej kajjulok ñõn jabdewõt men ak jabdewõt armij ijellokin Jemed ilõñ ejjab roñjaki, jekdon ewi joñan an ri kabuñ eo kõttãiki. Ilo Bible eo, Jehovah Anij wõt rej naetan “Ri Roñjake jar.”​—Psalm 65:2.

Jet remaroñ ba bwe “saint ro” rej baj jerbal wõt ñõn emõn eo an bar juõn armij ibben Anij. Ak Jesus make ear kaiñ: “Ña ial, im mol, im mour: ejelok armij ej itok ñõn Jema, elañe jab kin Iõ. Im jabrewõt men eo kom naj kajitõk ilo eta, men in I naj kõmõnmõne, bwe Jema en aibujuij ilo Nejin.” (John 14:6, 13) Kin men in Jesus ear jolok lemnak in bwe jabdewõt eo ear kir juõn saint emaroñ jerbal einwõt ñõn jibañ eo juõn. Lale bareinwõt men eo ri jilek Paul ear ba kake kin Christ: “Ear jab mij wõt kin kij​—ear jerkakbiji jen mij, im ijo ej bed ianbwijmaroñõn Anij im ej bareinwõt akwelap kin kij.” “Ej mour in drio im akwelap ñõn E kin ir.”​—Rome 8:34; Hebrew 7:25, Catholic Jerusalem Bible.

Ãt Eo Ej Aikwij KwoKwojarjare

Nan ko tok jet ilo jar eo an Jesus kar: “En kwojarjar Etõm.” Ewi wãwen an juõn maroñ kwokwojarjar, einwõt ba, kajenolok, etan Anij elañe armij eo ear jab jela kake im kajerbale? Elõñlok jen 6,000 alen ilo “Kallimur Mokta,” ej kile Anij kin ãt eo etan Jehovah.

Juõn footnote ilo Exodus 6:3 ilo book eo the Catholic Douay Version ej ba kin etan Anij: “Jet ilo ran kein rej kõmmõn ãt eo Jehovah . . . , bwe wãwen eo emol ilo ba ãt eo etan [Anij] eo ej bed ilo eon ko ilo Hebrew, kin an to jab kajerbale ej kiõ etal im ejelok jela kake.” Kin men in book eo The Catholic New Jerusalem Bible ej kajerbal ãt in Yahweh. Meñe jet scholar (ri meletlet) emõnlok ibbeir ãt en, “Jehovah” ej ãt eo etto kajerbale ilo wãwen ba ãt in ilo English. Kajin ko jet ewor wãwen ko air make ñõn ba etan ãt in ekwojajar. Men eo elap tokjen ej bwe jen kajerbal ãt in ñõn kwokwojarjare. Kabuñ eo am ear katakin ke yuk ñõn am kajerbal ãt in Jehovah ilo jar?

Men ko Rekkar ñõn Jar Kake

Jeltokin Jesus ear katakin ri kalor ro an bwe ren jar: “En itok Am ailiñ.” Gospel eo an Matthew ej kobaiktok nan kein: “Ren kõmõnmõn ankil Am ion lõl einwõt ilõñ.” (Matthew 6:10, Dy) Ailiñ eo an Anij ej juõn kien ilo pein Jesus Christ. (Isaiah 9:6, 7) Ekkar ñõn kanan eo ilo Bible, ejabto enaj bõk jikin aolep kien ko an armij im bõktok juõn tõreãn ainemõn ibelakin lõl. (Psalm 72:1-7; Daniel 2:44; Revelation 21:3-5) Kin men in Christian ro remol rej kõmmõne itok eo an Ailiñ eo juõn unintel eo rej elijinmen ilo air jar kake ilo jar ko air. Kabuñ eo am ear katakin ke yuk bwe kwon kõmmõn eindein?

Ekaitoktoklimo, bwe Jesus ear bareinwõt kwalok bwe jar ko ad remaroñ kobaik men ko rej jelet kij. Ear ba: “Kwon letok ñõn kim rainin mõñã eo kijim ran otemjej. Im jeorlok jerawiwi ko am, bwe kimij bareinwõt jeorlok an jabdewõt eo ej muri ñõn kim. Im jab tellok kim ñõn kabo.” (Luke 11:3, 4, Dy) Nan ko an Jesus rej kalikar bwe jemaroñ bukõt ankil an Anij ilo men ko rej walok ran otemjej, bwe jemaroñ kebak Jehovah kin men otemjej ko remaroñ kainebataik kij ak kabõnõnõik ainemõn in lemnak eo ad. Ekeini ad eowor ñõn Anij ilo wãwen in ej jibañ kij ñõn kamolol kin ad atartarlok ion. Ilo wãwen in ej oktak im laplok ad kile tokjen eo an ilo mour ko ad. Kajitõk ibben Anij ran otemjej bwe en jeorlok ad bwid ej bareinwõt wor tokjen. Ilo wãwen in jej oktak im laplok ad kile mõjno ko ad​—im laplok ad jab watõk likjap ko an ro jet. Nan in rejañ eo an Jesus bwe jen jar ñõn ad rõlok jen kabo ebareinwõt jejjet, elaptata ilo ad lemnak kin an diklok mour erreo ilo lõl in. Ilo errã ibben jar in, jej kanuij kejbarok ñõn bõprae wãwen ko im men ko rej maroñ tellok kij ñõn ad kõmmõn bwid.

Inem, ejelok kajitõk, bwe Jar eo an Iroij elap ijo ej jiroñ kij kake kin jar ko rej kamõnõnõik Anij. Ak kar karõk eo an Jesus in ke bwe jen baj bõk wõt jar in im ekeini ad eliji?

Kakabilek ko jet kin Jar

Jesus ear etal wõt im letok nan in jiroñ ko jet kin jar. Ilo Matthew 6:5, 6, jej konono: “Im ñe komij jar, komin jab einwõt ro dri jela mon; bwe re kõnan jutõk im jar iloan imõn kwelok ko im i kãbon in ial ko, bwe armij ren lo ir. . . . A kwe, ñe kwoj jar, kwon dreloñ iloan jikõm etino, im ñe emwij kil am aur, kwon jar ñõn Jemõm ej bed ijo etino; im Jemõm ej lo ijo etino, E naj nawõnãm.” Nan kein rej katakin kij bwe jar ejjab aikwij ilo wãwen mantin wõt ñõn kabwilõñ bar juõn armij. Kwoj lutõklok ke buruõm ñõn Jehovah ilo am makelok iam, einwõt an Bible rejañ?​—Psalm 62:8.

Jesus ear letok nan in kakkil in: “Im ñe komij jar, komin jab elij bata einwõt ro dri pegan: bwe rej lemnak naj roñjake ir kin an lõñ air konono.” (Matthew 6:7, JB) Ealikar, Jesus ear jab kamelim jar ko jej elijinmen ilo konono ​—ear jab bar kamelim konono kaki jen bar jet book. Nan ko an rej bareinwõt jolok kajerbal rosary.

Juõn book in Catholic ej kwalok ennan in kamol in: “Jar eo am emõntata emaroñ lemnak ko am rej jiktok ñe kimij oktaklok ñõn e ilo kamolol ak ilo aikwij, ilo ien buromõj, ak ilo jar ko am ran otemjej ñõn e.” Jar ko an Jesus make rar itok jen buruen im jab ilo an kememej nan ko. Ñõn wanjoñok, konono jar eo an Jesus emwij je ilo John jebta 17. Ej eddeb wõt ñõn joñok in jar eo, im kalikar kõnan eo an Jesus ñõn an lo air kwokwojarjar ãt eo etan Jehovah. Jar eo an Jesus ear walok jen e make im ear eñjake jen tu-mwilõl in buruen.

Jar ko Me Anij ej Roñjaki

Elañe emwij kar katakin yuk bwe kwon jar kin jar ko kwoj kili, bwe kwon jar ñõn “saint ro” ak ñõn ekjap ko, ak kajerbal men in kabuñ ko, einwõt rosary, lemnak eo ñõn jar ilo wãwen eo Jesus ear karõke emaroñ ilo jinoin einwõt ekamijak. Ak, key eo ej ñõn itok im jela Anij​—ãt eo etan, karõk ko an, im kadkad ko kadkadin. Kwomaroñ kõtõbrak men in ikijen juõn katak kin Bible eo elet. (John 17:3) Ri Kennan ro an Jehovah rej bojak im mõnõnõ in jibañ yuk ilo men in. Eokwe, emwij air jibañ million armij ro ibelakin lõl in ñõn air “edjoñ im lo bwe Jehovah e joij.”! (Psalm 34:8) Elak laplok am itok im jela kin Anij, enaj laplok am emakit ñõn am wijtake e ilo jar. Im elak laplok am ebakelok Jehovah ilo jar ilo wijtak im nebar, enaj laplok an ebakelok kõtan eo am ibben.

Kin men in aolep ri kabuñ ro remol an Anij rej rejañ ir bwe en “jab jokwõr ami jar.” (1 Tessalonika 5:17) Kanuij lale bwe jar ko am en mol air errã ibben Bible eo, ekoba nan in jiroñ ko an Jesus Christ. Ilo wãwen in kwomaroñ liki bwe jar ko am renaj emõn ibben Anij.

[Pija eo ilo peij 7]

Elak laplok ad katak kin Jehovah, enaj laplok ad emakit im jar ñõn e jen buru