Kwonaj Tiljek Ke Einwõt Elijah?

“Ij jilkinwõj ñõn kom Elijah ri kanan eo mokta jen an itok ran eo elap im kalelñoñ an Jehovah.”​—MALACHI 4:5.

1. Ta jorrãn eo ear walok elikin an kar Israel bed ilo Enen Kallimur eo iumin enañin 500 yiõ ko?

“JUÕN ENE e bwijliplip kin milk im honey.” (Exodus 3:7, 8) Eñin men eo Jehovah Anij ear lelok ñõn ri Israel ro elikin an kanemkwoj ir jen air kamakoko ñõn ri Egypt ilo ebeben eo kein ka 16 B.C.E. Ak lo! Lalim ebeben ko rar ellã, im kiõ bwij ko joñoul an ailiñ in Israel ej bed ilo juõn ñitta ekanuij in lap. Ekanuij in bin ellolo ujoj maroro. Menin mour ko rej mijlok, im ejelok wut ej wõtlok iumin jilu im jimettan yiõ ko. (1 Kings 18:5; Luke 4:25) Ta eo ej bõk eddon jorrãn in?

2. Ta eo ej kõmmõn jorrãn eo ñõn ailiñ in Israel?

² Buñ jen tõmak ej men eo ear kõmmõne jorrãn in. Ilo kõtõrãik Kien eo an Anij, Kings Ahab ear belek leroij in Canaan eo Jezebel im ear kõtlok an kadeloñ kabuñ in Baal ñõn loan Israel. Ak men eo elaplok an nana, ear kalek juõn temple ñõn anij wan in ilo Samaria, capital in jikin kwelok eo. Eokwe, kar karel ri Israel ro ñõn air tõmak bwe kabuñ ñõn Baal enaj bõktok elap jonikõn! Bõtab, einwõt an kar Jehovah kakkil, rar kiõ bed ilo kauatata in ‘joko mõkõj jen eneo emõn Jeova ej lewoj.’​—Deuteronomy 7:3, 4; 11:16, 17; 1 Kings 16:30-33.

Juõn Melejoñ kin Wõn Anij eo Emol

3. Ewi wãwen an Elijah kareilok armij ro ñõn abañ eo emol an Israel?

³ Ke ear ijjino ñitta eo, ri kanan eo an Anij etiljek Elijah ej jiroñ Kings Ahab: “Einwõt Jeova Anij in Israel e mour, eo ña ij jutak iman, e naj ejelok molawi ak wut iumin yiõ kein, a ekar ñõn nan ko aõ!” (1 Kings 17:1) Elikin an lo mol in kitien nan in kõjela in, Kings eo ej naruen Elijah kin an bõktok menin jorrãn in ion Israel. Ak Elijah ej uak bwe Ahab im mweo imõn eo ren naruir kin buñ jen tõmak eo air kin air kabuñ ñõn Baal. Ñõn kajemlok menin konono in, ri kanan eo an Jehovah ej jiroñ Kings Ahab bwe en kokweloktok aolepen Israel ñõn Tol Carmel koba 450 ri kanan ro an Baal im 400 ri kanan ro an joor kwojarjar eo. Ahab im armij ro an rar kwelok lok ijo, bõlen rar kejatdikdik bwe ien eo enaj kar bõktok juõn jemlok ñõn det eo. Ak Elijah ear jitõñlok ir ñõn menin konono eo elaplok an aorõk. “Ietoõn,” ej kajitõk, “ami ajkub ikõtan ruo lemnok? elañe Jeova ej Anij, komin lor E; a elañe Beal, inem komin lor e.” Ri Israel ro rar jaje ta eo ren ba.​—1 Kings 18:18-21.

4. Ñõn kajemlok menin konono eo kin wõn Anij eo emol, ta eo Elijah ej kwalok an lemnak kake?

⁴ Iumin elõñ yiõ ko ri Israel ro rar kajeoñ kãreiki kabuñ eo an Jehovah ibben kabuñ in Baal. Ñõn kajemlok menin konono eo kin wõn Anij eo emol, Elijah ej kiõ kwalok an lemnak kin juõn jiae. Enaj keboj juõn cow koman edik ñõn katok, im eo juõn ri kanan ro an Baal renaj keboje. Inem Elijah ej ba: “Im komin kir etan anij eo ami, im ña, I naj kir etan Jeova, im Anij eo ej uak kin kijeek, eñeo en Anij.” (1 Kings 18:23, 24) Lemnakelok mõk kin kijeek eo ej wõnlõltak jen lõñ ñõn uak juõn jar!

5. Ewi wãwen an kar jedmatmat kabuñ eo ejelok tokjen an Baal?

⁵ Elijah ej kir ri kanan ro an Baal bwe ren jinoe. Rej keboj juõn cow koman ñõn katok im likiti ion lokatok eo. Inem rej ajkuk iturin lokatok eo, im jar: “O Beal, kwon eoroñ kim!” Menin ear ijjino “jen ke ej jibboñ lok ñõn raelep.” “Komin kanuij lamij,” Elijah ej kajirere. Bõlen Baal eboub kin juõn menin ekaiuriur, ak “bwelen ej kiki, im emõn kworuj e!” Ejjabto ri kanan ro an Baal rejaje ren et. Lo! Rej kakinejnej ir make kin bakbõk ekkañ, im bõtõktõk ej torlok jen kinej ko kenjeir. Im ear lap keroro ke aolepen 450 ro rar lamõj kin elap ainikeir! Ak ejelok uak.​—1 Kings 18:26-29.

6. Ta kabojak eo Elijah ej kõmmõne ñõn melejoñ eo kin wõn Anij eo emol?

⁶ Kiõ eien ñõn Elijah. Ej bar kalek lokatok eo an Jehovah, kũpij juõn jukur im kabol lokatok eo, im likit menin katok eo ie im karõke. Inem ear kõtlok bwe ren lutõk den ion kane eo im menin katok eo. Joñoul ruo jãbi in den ko rar lutõki ion lokatok eo mae ien jukur eo ear bool. Kalmenlokjen kin joñan air ikũmkũm ke Elijah ej jar: “O Jeova, Anij an Ebream, an Aisak, im an Israel, ren jela ranin, bwe Kwe Anij ilo Israel, im ña dri korijerõm, im bwe I ar kõmõn men kein otemjej kin Am in nan. Kwon eoroñ iõ, O Jeova, kwon eoroñ iõ, bwe armij rein ren jela bwe Kwe, Jeova, Kwoj Anij, im bwe Kwar bar ukõttok burueir.”​—1 Kings 18:30-37.

7, 8. (a) Ewi wãwen an kar Jehovah uake jar eo an Elijah? (b) Ta eo kar kõtõbrake jen wãwen ko rar walok ion Tol Carmel?

⁷ Ilo uak jar eo an Elijah, ‘kijeek eo an Jeova ear buñ im tili men in katok kijeek eo, im kani, im dreka ko, im bõñõlñõl, im jorme dren ilo jukur eo.’ Armij rar buñbero im ba: “Jeova, ej Anij! Jeova, ej Anij!” (1 Kings 18:38, 39) Kiõ Elijah ej kõmmõn emmakit. Ej keañ “Komin jibwe ro dri kanan an Beal, ejelok juõn en dreor!” Elikin air man ir ilo komlõl in Kishon, kõdo ko remarok rar kobrak lõñ. Im juõn wutleplep ear bõktok jemlok in det eo!​—1 Kings 18:40-45; keiri Deuteronomy 13:1-5.

⁸ Juõn ran elap! Jehovah ej anjo ilo melejoñ in ekabwilõñlõñ kin wõn Anij eo emol. Bareinwõt, men kein rar walok rar ukõt buruen elõñ ri Israel ro ñõn Anij. Ilo menin im ilo wãwen ko jet, Elijah ej kamol an tiljek einwõt juõn ri kanan, im e make ej jerbal einwõt juõn men in kanan.

“Ri Kanan eo Elijah” Ejañin Itok?

9. Ta eo kar kanan kake ilo Malachi 4:5, 6?

⁹ Tokelik, ikijen Malachi, Anij ear kanan: “Lo! ij jilkinwõj ñõn kom Elijah ri kanan eo mokta jen an itok ran eo elap im kalelñoñ an Jehovah. Im ej aikwij ukõt buruen ro jemeir ñõn ro nejiir, im buruen ro nejiir ñõn ro jemeir; bwe in jab aikwij iwõj im lukkun kokkure lõl in.” (Malachi 4:5, 6) Elijah ear mour enañin 500 yiõ ko mokta jen an kar nan kein walok. Ke menin kar juõn kanan, ri Jew ro ilo ebeben eo kein kajuõn C.E. rar bed ilo air kõtmene kin itok eo an Elijah ñõn kajejjet kitien.​—Matthew 17:10.

10. Wõn kar Elijah eo kar kanan kake, im ewi wãwen ad jela?

¹⁰ Inem, wõn, kar Elijah in ej itok? Armij eo Jesus Christ ear kalikare ke ear ba: “Jen ran ko an Jon dri baptais ñõn ien in, rej kaiur ir ñõn ailiñ in lõñ, im ro dri kaiur rej kate ir im tõbar e. Bwe dri kanan otemjej im kien r’ar drikanij ñõn ien Jon. Im elañe kom kõnan bõk e, e in ‘Elaija eo ej itok.’” Aet, John ri Baptais kar kanan kake bwe e eo ej einwõt Elijah. (Matthew 11:12-14; Mark 9:11-13) Juõn enjel ear jiroñlok jemen John, Zechariah, bwe John enaj bõk “jitõb im kajur an Elaija” im enaj “kapojõk ñõn Iroij armij ro rerelok ñõn E.” (Luke 1:17) Baptais eo John ear kõmmõne kar juõn kakõlle iman mejen armij kin ukwelok an juõn armij jen jerawiwi ko an nae Kien eo, eo enaj kar tel ri Jew ro ñõn Christ. (Luke 3:3-6; Galetia 3:24) Kin menin jerbal eo an John ‘ear kapojõk ñõn Iroij armij ro rerelok ñõn E.’

11. Ilo Pentecost eo, ta eo Peter ear ba kake kin “ran eo an Jehovah,” im ñãt eo ear walok?

¹¹ Jerbal eo an John ri Baptais einwõt “Elijah” ear kwalok bwe juõn “ran eo an Jehovah” ear ebaktok. Ebaktok in ran eo ñe Anij enaj emmakit nae ri kijirat ro an im kejbarok armij ro an ri jilek Peter ear bareinwõt kwalok kake. Ear kwalok bwe men ko rekabwilõñlõñ rar walok ilo Pentecost eo ilo 33 C.E. rar kajejjet kitien kanan eo an Joel kin lutõklok in jitõb eo an Anij. Peter ear kwalok bwe menin enaj kar walok mokta jen “ran in Iroij ej itok, ran eo elap im men in bwilõñ.” (Jerbal 2:16-21; Joel 2:28-32) Kar ilo 70 C.E. eo ke Jehovah ear kajejjet kitien Nan eo an ke ear nawãwen bwe jar in tarinae ko an Rome ren jerbale ekajet eo an ion ailiñ eo ear kajekdon Nejin.​—Daniel 9:24-27; John 19:15.

12. (a) Ta eo Paul im Peter rar ba kake kin itok eo an “ran eo an Jehovah”? (b) Etke emol bwe juõn wãwen enaj kar walok einwõt jerbal eo an Elijah ear annañelok?

¹² Bõtab, ear lõñ wõt men ko rar bojak in walok elikin 70 C.E. eo. Ri jilek Paul ear kobaiklok itok eo an “ran eo an Jehovah ibben bed eo an Jesus Christ. Bareinwõt, ri jilek Peter ear konono kin ran eo ilo an kobaiklok ibben “lõñ ko rekãl im lõl ekãl” ilo ran ko rej itok wõt. (2 Tessalonika 2:1, 2; 2 Peter 3:10-13) Likit ilo am lemnak bwe John ri Baptais ear kõmmõne juõn jerbal einlok wõt eo an Elijah mokta jen “ran eo an Jehovah” ear itok ilo 70 C.E. eo. Aolep men kein ibben don rar kalikar bwe juõn wãwen ej itok wõt enaj walok einwõt an alikar ikijen jerbal eo Elijah ear kõtõbrake. Ta wãwen in?

Ewor Ibbeir Jitõb eo an Elijah

13, 14. (a) Ta wãwen eo einlok wõt ebed ikõtan makitkit ko an Elijah im ko an Christian ri kabit ro ilo ran kein? (b) Ta eo ro rar buñ jen tõmak ilo Christendom rar kõmmõne?

¹³ Jerbal eo an Elijah ear jab uanlok makitkit ko an John ri Baptais wõt ak ear bareinwõt wor juõn eo einlok wõt eo ibben Christian ri kabit ro ilo tõre in ebin im ej tellok ñõn itok eo an “ran eo an Jehovah.” (2 Timothy 3:1-5) Kin jitõb im kajur eo an Elijah, rej ri jurake ro retiljek kin kabuñ eo emol. Im menin kar juõn menin aikwij! Elikin an mij ri jilek ro an Christ, ear wor juõn buñ jen tõmak jen mour in Christian eo emol, einlok wõt kabuñ in Baal ear eddeklok ilo Israel ilo ran ko an Elijah. (2 Peter 2:1) Armij ro rar ba rej Christian rar jino kãreiki mour in Christian ibben katak im manit ko an kabuñ wan. Ñõn wanjoñok, rar bõk katak in pagan eo im ejelok ilo jeje ko bwe armij ewor juõn aan eo ejjab mij. (Ecclesiastes 9:5, 10; Ezekiel 18:4) Ri buñ jen tõmak ro ilo Christendom rar bõjrak jen air kajerbal ãt eo etan juõn wõt Anij eo emol, Jehovah. Ijellokin men in, rej kabuñ ñõn juõn Trinity (Jilu anij ilo juõn). Rar bareinwõt bõk manit eo an Baal kin badikdik ñõn annañin Jesus im jinen, Mary. (Rome 1:23; 1 John 5:21) Ak ejjab men eo dein.

¹⁴ Jen ebeben eo kein ka 19 manlok, ri tel ro an kabuñ in Christendom rar jino kwalok air bere ilo elõñ mõttan ko ilo Bible. Ñõn wanjoñok, rar kajekdon bwebwenato eo ilo Genesis kin kõmõnmõn im bõk lemnak eo kin evolution, (armij rar walok jen menin mour), im kalikar bwe ej ekkar ñõn “science.” Menin ear idaptok ibben katak ko an Jesus Christ im ri jilek ro an. (Matthew 19:4, 5; 1 Korint 15:47) Bõtab, einwõt Jesus im ri kalor ro an jinoin, Christian ri kabit ro ilo jitõb rainin rej debij bwebwenato eo ilo Bible kin kõmõnmõn.​—Genesis 1:27.

15, 16. Ilo keiri ibben Christendom, wõn ro rej lõñliñ kin air ekkeini bõk menin letok in mõñã ko ilo jitõb, im rej bõke ikijen ta?

¹⁵ Ke lõl in ej deloñelok ien in “ien jemlokin,” juõn ñitta ilo jitõb ej jelet Christendom. (Daniel 12:4; Amos 8:11, 12) Ak jar eo edik in Christian ri kabit ro rej lõñliñ kin menin letok in mõñã ko ilo jitõb Anij ej ekkeini an litok “ilo ien ekkar,” ejja einwõt an kar Jehovah lale bwe ren kar najidik Elijah ilo ien ñitta eo ilo ran ko an. (Matthew 24:45; 1 Kings 17:6, 13-16) Einwõt kar jela kake ir juõn ien einwõt International Bible Student ro, ri karejar rein retiljek an Anij tokelik rar bõk ãt in ilo Jeje ko Ri Kennan ro an Jehovah.​—Isaiah 43:10.

¹⁶ Elijah ear mour ekkar ñõn etan, ke ej melelen “Jehovah Ej Aõ Anij.” Einwõt magazine eo an ro ri karejaran Jehovah ion lõl, The Watchtower (Imõniaroñroñ eo) ekkã an kajerbal ãt eo etan Anij. Ilo mol, issue eo an kein karuo (August 1879) ear kwalok an liki kin magazine in bwe Jehovah eo ej jutak ilikin. Magazine in im book ko jet an Watch Tower Society rej kajedmatmat katak ko rewan an Christendom im kabuñ ko jet an Babylon Elap, jukjuk im bed eo an kabuñ wan eo an lõl bwe rejjab ekkar ñõn jeje ko, ke ej debij wõt mol in Nan eo an Anij, Bible eo.​—2 Timothy 3:16, 17; Revelation 18:1-5.

Tiljek Iumin Melejoñ

17, 18. Ewi wãwen an kar Jezebel emmakit kin air kar man ri kanan ro an Baal, ak ewi wãwen an kar Elijah bõk jibañ?

¹⁷ Emmakit eo an ri tel in kabuñ ko ñõn kajedmatmat eo kar einlok wõt eo an Jezebel ke ear etal im jela bwe Elijah ear man ri kanan ro an Baal. Ear jilkinlok juõn ennan ñõn ri kanan eo etiljek an Jehovah, im kallimur bwe renaj mane. Menin ear jab baj ñõn kamijak e wõt, kinke Jezebel ededelok an kar man elõñ wõt ian ri kanan ro an Anij. Ilo lelñoñ, Elijah ear ko rõkeañlok tolok ñõn Beer-sheba. Ear likit leo karejaran ijo im etal wõt ñõn loan ene jemaden eo im jar bwe en mij. Ak Jehovah ear jab ellok jen ri kanan eo an. Juõn enjel ear weaktok ñõn ibben Elijah im keboj e ñõn ial eo eaetok ñõn Tol Horeb. Kin men in ear bõk men in kakajur kin juõn ial eo 40 ran aetokin im aetoklok jen 190 mile. Ilo Horeb, Anij ear konono ñõn e elikin an walok juõn kõto eo ekajur im kamijak, juõn makitkit lõl, im juõn kijeek. Jehovah ear jab bed ilo men kein rar walok. Rar kakõlle ko kakõllan jitõb kwojarjar eo an, ak kajur eo ej jerbal. Inem Jehovah ear konono ñõn ri kanan eo an. Baj kalmenlokjen kin ewi wãwen men in ear kakajurlok Elijah. (1 Kings 19:1-12) Ta elañe kij, einwõt Elijah, jej etal im lelñoñ ñe ri kijirat ro an kabuñ eo emol rej kamijak kij? Men eo ear loe ej aikwij jibañ kij kile bwe Jehovah ejjab ellok jen armij ro an.​—1 Samuel 12:22.

¹⁸ Anij ear kalikar bwe Elijah ear wor wõt jerbal ñõn an kõmmõne einwõt juõn ri kanan. Bareinwõt, meñe Elijah ear lemnak bwe kar e wõt eo ilo Israel ear kabuñ ñõn Anij eo emol, Jehovah ear kwalok ñõn e bwe 7,000 rar jab badikdik ñõn Baal. Inem Anij ear jilkinlok Elijah im kajeblaklok e ñõn jerbal eo kar kabbeiki ñõn e. (1 Kings 19:13-18) Einwõt Elijah, ri kijirat ro an kabuñ eo emol remaroñ abãde kij. Jemaroñ oktak im bed ilo elap matõrtõr, einwõt an kar Jesus kanan. (John 15:17-20) Jet ien, jemaroñ oktak im lelñoñ. Bõtab, jemaroñ einwõt Elijah, eo ear bõk menin kamol ko jen Anij inem ilo tiljek ear niknik ilo jerbal eo an Jehovah.

19. Ta eo Christian ri kabit ro rar iione ilo ien Tarinae eo an Lõl Kein Ka I?

¹⁹ Kin an kar lap matõrtõr ilo ien Bata eo an Lõl Kein Ka I, jet Christian ri kabit ro rar ebwer kin mijak im bõjrak jen air kwalok nan. Rar bwid ilo lemnak bwe jerbal eo air ion lõl ear jemlok. Ak Anij ear jab kajekdon ir. Ak, ilo tiriamokake ear kejbarok wõt ir, ejja einwõt an kar lelok mõñã ñõn Elijah. Einwõt Elijah, ri kabit ro retiljek rar bõk kajimwe eo ekwojarjar im rar bar jino air jerbal. Mejeir ear bellok ñõn jerammõn eo elap kin kwalok nan kin ennan eo an Ailiñ eo.

20. Rainin, jerammõn et eo rej lelok ñõn ro rej tiljek einwõt Elijah?

²⁰ Ilo kanan eo kin an bed, Jesus ear kalãjrake jerbal eo ibelakin lõl me enaj dedelok mokta jen an itok jemlokin jukjuk im bed in enana. (Matthew 24:14) Rainin, Christian ri kabit ro im million ro mõttair me rej reimanlok ñõn mour ilo juõn paradise ion lõl rej bõkmanlok jerbal in. Kõmmõne jerbal in kwalok nan kin Ailiñ eo mae ien eo ededelok ej juõn jerammõn elap emwij kamelimi ñõn ro wõt im rej tiljek einwõt Elijah.

Kwon Tiljek Einwõt Elijah

21, 22. (a) Ta jerbal eo Christian ri kabit ro rej etal imanlok kake rainin? (b) Jerbal in kwalok nan eo ej maroñ tõbrak kin jibañ et eo, im etke ej menin aikwij?

²¹ Kin kijejeto einwõt eo an Elijah, bwen Christian ri kabit ro remol rar jerbale eddo eo air ñõn kejbarok tokjen ko ion lõl an Jesus Christ, Kings eo emwij likit ilo throne. (Matthew 24:47) Im iumin elõñlok jen 60 yiõ ko kiõ, Anij ear kajerbal ri kabit rein ñõn air tel ilo jerbal in ñõn kõmmõn ri kalor ro in armij ro ear lelok ñõn ir kejatdikdik eo eaibujuij kin mour indio ion juõn paradise ilõl. (Matthew 28:19, 20) Million armij rein elap air kamolol bwe bwen ri kabit rein reiet rej ilo kijejeto im tiljek kejbarok eddo ko air!

²² Jerbal in kwalok nan in kin Ailiñ eo armij jab wãppen ro rej maroñ kõmmõne kin wõt kajur eo Jehovah ej lelok ñõn ro rej atartar ion ilo air jar. “Elaija ej juõn armij e kanuij einwõt kij,” ri jilek James ej ba ke ear elij wanjoñok in jar eo an ri kanan eo ñõn kwalok kajur in jar an juõn armij eo ewãnik. (James 5:16-18) Elijah ear jab ien otemjej kanan ak kõmmõn menin bwilõñ ko. Ear wor ibben ejja eñjake im mõjno ko an armij me ewor ibbed, ak ear karejar ñõn Anij ilo tiljek. Ke kij bareinwõt ewor ibbed jibañ eo an Anij im ej kakajur kij, jemaroñ tiljek einwõt Elijah.

23. Etke ewor un eo emõn ibbed ñõn tiljek im tõmak?

²³ Ewor un eo emõn ibbed ñõn ad tiljek im tõmak. Kememej bwe John ri Baptais ear kõmmõne juõn jerbal einwõt jerbal eo an Elijah mokta jen “ran eo an Jehovah” kar bõktok jorrãn eo ilo 70 C.E. eo. Kin jitõb im kajur eo an Elijah, Christian ri kabit ro rar kõmmõne juõn jerbal eo einlok wõt eletok in Anij ñõn kõmmõne ibelakin lõl. Menin ej lukkun kamol bwe “ran eo an Jehovah” elap ebaktok.

Ewi Wãwen Am Naj Kar Uak?

◻ Ion Tol Carmel ewi wãwen an Jehovah kar kamol an Iroij?

◻ Wõn eo kar ‘Elijah eo enaj kar itok,’ im ta eo ear kõmmõne?

◻ Ewi wãwen an Christian ri kabit ro ran kein kwalok bwe ewor jitibõn Elijah ibbeir?

◻ Etke jemaroñ tiljek einwõt Elijah?

[Bo̦o̦k eo ilo peij 14]

Lõñ Et Ko Elijah ear Wõnliñlok Ñõni?

“IM KE rejro [Elijah im Elisha] etal wõt, im konono, lo, e ar walok juõn jariot kijeek, im ors ko kijeek, ko rar kijbil ir jen don; im Ilaija e ar wõnliñlok ilo juõn aire ñõn lõñ.”​—2 Kings 2:11.

Ta melelen nan in “lõñ ko” ilo case in? Kajin in jet ien ej jerbal ñõn jikin jokwe eo an Anij im enjel ro nejin. (Matthew 6:9; 18:10) “Lõñ ko” emaroñ bareinwõt jitõñlok ñõn mejatoto in melan lõñ. (Deuteronomy 4:19) Im Bible ej kajerbal kajin in ñõn jitõñlok ñõn mejatoto in melan lõl, ijo bao ko rej kãke im kõto ko rej ekkõtoto.​—Psalm 78:26; Matthew 6:26.

Lõñ et eo ian lõñ kein Elijah ear wõnliñlok ñõn e? Alikar, kar bõklok e ilujen mejatoto eo an lõl in im kar likiti ilo bar juõn mõttan in lõl in. Elijah ear bed wõt ion lõl in ilo yiõ ko tokelik, bwe ear je juõn letter ñõn King Jehoram in Judah. (2 Chronicles 21:1, 12-15) An Elijah kar jab wõnliñlok ñõn jikin eo ilo jitõb an Jehovah Anij menin tokelik Jesus Christ ear kamole, ke ear keañ: “Im ejelok armij e ar wõnliñlok ñõn lõñ, a Eo e ar wõnlõltak jen lõñ, Nejin armij,” e, Jesus make. (John 3:13) Ial eo ñõn mour ilõñ ear bellok mokta ñõn armij jab wãppen elikin mij, jerkakbiji, im wõnliñlok eo an Jesus Christ.​—John 14:2, 3; Hebrew 9:24; 10:19, 20.