Rejtak Ilo Tiljek Nan In Kakõrmol Eo An Anij

“Kim ar illok jen men ko retino men in kajok, im jab etetal ilo mon, im jab kariõp nan in Anij.”​—2 KORINT 4:2.

1. (a) Ta eo ej aikwiji ñõn kõtõbrak jerbal eo ilo Matthew 24:14 im 28:19, 20? (b) Ñõn joñan et eo rar ukõt Bible eo ilo kajin ko an armij ke ran ko eliktata ear jinoe?

ILO KANAN eo an elap ikijen bed in iroij eo an im kin jemlokin jukjuk im bed in emor, Jesus Christ ear kanan: “Im naj kwalok gospel in an ailiñ in lõñ i aolepen lõl kin men in kennan ñõn ailiñ otemjelok; ilo ien eo e naj itok jemlokõn.” Bareinwõt ear kaiñi ri kalor ro an: “Komin ilok, im kõmõn dri ailiñ ko otemjej bwe ren dri kalora, . . . katakin ir bwe ren bokake nan ko otemjej I ar jiroñ kom.” (Matthew 24:14; 28:19, 20) An jejjet kitien nan in kanan kein ej kitibuj elap jerbal ñõn ukõt im jei Bible eo, im ilo katakin armij ro kin ta melelen, im jibañ ir ñõn jerbali ilo mour ko air. Ej juõn jerammõn elap ñõn bõk kwunad ilo jerbal in! Tok ñõn 1914 rar ukõt elañe jab aolepen Bible eo inem jet mõttan ko ñõn 570 kajin ko. Ak jen ien eo mantak rar bar ukõte ñõn elõñ buki kajin ko im dialect ko, im ilo elõñ kajin ko ewor elõñlok jen juõn wõt ukok in Bible.a

2. Ta un ko rekajjo jen don kar unin an ri ukok in Bible ro im ri jerbal ro jet ukõt Bible eo?

² Ej juõn jerbal elap ñe juõn ri ukok ej bõk katak eo ilo juõn kajin im ukõte ñõn bar juõn kajin ñõn kabidodolok air konono im melele kaki. Jet ian ri ukok in Bible ro rar kõmmõne jerbal eo air ilo air lukkun melele bwe men eo rar ukõte kar Nan in Anij. Ro jet rar baj mõnõnõ wõt kin eddo eo rar bõk jen jerbal in elap. Rar baj watõk kobban Bible eo einwõt juõn men in jolet eo ewor tokjen. Ñõn jet armij, kabuñ ej business eo air, im kõmmõne juõn book me ewor etair iloan einwõt ri ukok ak ri jeje ej mõttan business eo air ñõn mour. Unin air kõmmõn jerbal in ej jelet wãwen air jerbal.

3. Kar ewi lemnak eo an jar in New World Bible Translation Committee kin jerbal eo air?

³ Ewor tokjen ñõn kalmenlokjen kin nan eo kumi in New World Bible Translation Committee ear ba: “Ukõt Jeje Ko Rekwojarjar ej melelen ukõte lemnak ko im nan ko an Jehovah Anij ñõn bar juõn kajin . . . Ej juõn eddo elap. Ri ukok ro ñõn jerbal in, ro rej mijak im yokwe Ri Kõmõnmõn eo an Jeje Ko Rekwojarjar, rej watõk bwe ej juõn eddo elap im einjuõn ñõn kamãt air maroñ ñõn ukõt lemnak ko im nan in kaiñi ko an ilo jimwe. Rej bareinwõt kile eddo eo ñõn jibañ ri konono Bible ro rej atartar ion juõn ukok in Nan in kakõrmol eo an Anij Eutiejtata ñõn bõk mour indio. Kin air bõk kain lemnak rot in juõn committee in armij ro emwij wujleplok air mour iumin elõñ yiõ ko rar kõmmõne Bible eo etan New World Translation of the Holy Scriptures.” Kar mejenkajjik eo an committee eo ñõn ukõt juõn Bible eo ealikar im wor melele ie im debij wõt melele eo ekkar ñõn kajin ko moktata kajin Hebrew im Greek bwe en einwõt bedbed eo ñõn kalaplok wõt jelalokjen eo ejejjet im jimwe.

Ta eo Ear Walok ñõn Ãt eo Etan Anij?

4. Ewi aorõkin ãt eo etan Anij ilo Bible eo?

⁴ Juõn ian mejenkajjik ko relap an Bible ej ñõn jibañ armij ro bwe ren jela Anij eo emol. (Exodus 20:2-7; 34:1-7; Isaiah 52:6) Jesus Christ ear katakin ri kalor ro an ñõn jar bwe en “kwojarjar” etan Jemen, im armij ren watõk e einwõt erreo. (Matthew 6:9) Anij ear kobaik etan ilo Bible eo elõñlok jen 7,000 alen. Ekõnan bwe armij ren jela ãt in etan im kadkad ko kadkadin eo ej belok ãt in.​—Malachi 1:11.

5. Ewi wãwen elõñ ri ukok ro rar kwalok kin ãt eo ekwojarjar?

⁵ Elõñ ri ukok ro rar kwalok kautiej eo emol kin ãt eo ekwojarjar etan im ekkeini air kar kajerbali ilo jerbal ko air. Jet ri ukok ro rar mõnõnõ in kajerbal Yahweh. Ro jet rar ukõt ãt eo etan ekkar ñõn kajin ko air im ilo ejja ien eo wõt kalikare ekkar ñõn ta eo ear walok ilo eon eo ilo kajin Hebrew, bõlen ilo juõn wãwen ebuñbuñ im etto an kajerbale. Bible eo etan New World Translation of the Holy Scriptures ej kajerbal ãt eo Jehovah 7,210 alen ilo katak eo an elap.

6. (a) Ilo yiõ ko rej kab motlok, ta eo ri ukok ro rar kõmmõne ikijen ãt eo ekwojarjar? (b) Ewi joñan an lap manit in?

⁶ Ilo yiõ ko rej kab motlok, meñe ri ukok in Bible ro rar debij wõt ãt ko etan anij wan ko einwõt Baal im Molech, emakijkij air jolok etan Anij eo emol jen Nan in kakõrmol eo an. (Exodus 3:15; Jeremiah 32:35) Ilo eon ko einwõt Matthew 6:9 im John 17:6, 26, ilo ukok eo ekkã air kajerbale ilo kajin Albania nan in kajin Greek eo “etõm” rar baj ba “kwe,” einwõt ñe ejelok etan Anij. Ilo Psalm 83:18, ukok in Bible ko The New English Bible im Today’s English Version rar jimor jolok ãt eo etan Anij im jabdewõt kein kamol ko rej kalikar bwe ekar wor ãt eo etan Anij. Meñe ãt eo ekwojarjar ear walok ilo ukok ko mokta ilo Jeje ko ilo kajin Hebrew ilo enañin aolep kajin ko, ukok ko rekãl ekkã air jolok e ak baj kamelele wõt kin ãt eo ekwojarjar tõrerein peij in Bible eo. Kar eindein ilo kajin English, im elõñ kajin ko ilo Europe, Africa, South America, India, im ene ko ilo Pacific.

7. (a) Ta eo ri ukok in Bible ro kin jet kajin Africa ko rej kõmmõne kin ãt eo ekwojarjar? (b) Ewi lemnak eo am kin men in?

⁷ Ri ukok Bible ro ilo jet kajin Africa ko rej kõmmõn bar juõn wãwen. Jen air baj ukõt ãt eo ekwojarjar ñõn juõn lãjrak ak title wõt, einwõt Anij ak Iroij, rej likit ãt ko etan anij ko ekkar ñõn kabuñ ko ilo ailiñ ko air. Ilo ukok eo The New Testament and Psalms in Zulu (1986 version), title eo Anij (uNkulunkulu) rar watõk e joñan wõt juõn ibben ãt in (uMvelinqangi) me bwij eo Zulu rar kajerbale ñõn jitõñlok ñõn ‘jimmair elap im ro nukun rar kabuñ ñõn e jen etto.’ Juõn katak ilo magazine eo The Bible Translator, ilo October 1992, rar report bwe ilo air keboj Bible in Chichewa eo rar naetan Buku Loyera, ri ukok ro rar kajerbal ãt eo etan Chauta ñõn bõk jikin etan Jehovah. Chauta, katak eo ear kamelele, ej “Anij eo rar jela kajjen im kabuñ ñõn e jen etto.” Bõtab, elõñ ian armij rein rej kabuñ ñõn ro remij bareinwõt. Emol ke bwe elañe rej jar ñõn eo “Ekajur Bõtata,” jekdon ta ãt eo rej kajerbale ej joñan wõt juõn ibben ãt eo etan Jehovah, jekdon bar ta eo kabuñ eo air ej kitibuj e? Jaab ñõn jidik! (Isaiah 42:8; 1 Korint 10:20) Jolok ãt eo etan Anij im likit bar juõn ãt ñõn rejtak katak in tõmak ko air ejjab jibañ ir ñõn kebak Anij eo emol.

8. Etke karõk eo an Anij ñõn kajerbal etan ear jab bõjrak?

⁸ Aolep men kein rar jab ukõt ak bwokwoj karõk eo an Jehovah ñõn kalikar etan. Ilo kajin ko ilo ailiñ in Europe, Africa, ailiñ in America ko, Ailiñ ko itu-rear, im ene ko jet, elõñ Bible ko rej kajerbale wõt ãt eo ekwojarjar. Elõñlok jen 5,400,000 Ri Kennan ro an Jehovah ilo 233 ailiñ ko rej jerbal ibben don im kwalok ñõn ro jet kin karõk im ãt eo etan Anij iumin elõñlok jen juõn billion hour ko ilo juõn yiõ. Rej print im lelok Bible ko​—me ewor ãt eo ekwojarjar iloan​—ilo kajin ko me 3,600,000,000 armij ro ion lõl rej melele kaki, ekoba, kajin English, Chinese, Russian, Spanish, Portuguese, French, im Dutch. Bareinwõt rej kõmmõn book in Bible ko ilo kajin ko enañin aolep armij ibelakin lõl rej melele kaki. Ejjabto tokelik Anij enaj jerbal ilo juõn wãwen ealikar ñõn kajejjet kitien nan ko an bwe ailiñ otemjej ren “jela bwe [e] Jehovah.”​—Ezekiel 38:23.

Ñe Tõmak Ko Ad Make Rej Kine Ukok Eo

9. Ewi wãwen Bible eo ej kalikar eddo eo ro rej kajerbal Nan in Anij rej ineke?

⁹ Juõn eddo elap ej bed ibben ro rej ukõt Nan in Anij im bareinwõt ro rej katakin armij kake. Ri jilek Paul ear ba ikijen jerbal eo an im ri jerbal ro mõttan: “A kim ar illok jen men ko retino men in kajok, im jab etetal ilo mon, im jab kariõp nan in Anij.” (2 Korint 4:2) Kariap ej melelen ñõn kokkure juõn men erreo ilo am kãre juõn men ejjab erreo ibben. Ri jilek Paul ear jab einwõt shepherd ro rejjab tiljek ilo ailiñ in Israel ilo ran ko an Jeremiah im ro me Jehovah ear kajeik ir kin air kwalok nan kin lemnak ko air make im jab kin men eo Anij ear ba. (Jeremiah 23:16, 22) Ak ta eo ear walok ilo ran kein?

10. (a) Ta un ko ijellokin tiljek eo ñõn Anij kar unin an jet ri ukok ro ukõt Bible eo ilo ran kein? (b) Ta jerbal eo rar bõk eddon ilo jab jimwe?

¹⁰ Ilo Bata eo an Lõl Kein Ka II, juõn jar in ri kaki ro an kabuñ im pastor ro rar jerbal ibben kien Nazi ilo Germany ñõn kõkãl “Kallimur eo Ekãl” me ear jolok aolep kamelele ko remõn kin ri Jew ro im line in family eo an Jesus Christ. Ilo ien ko rej kab motlok, ri ukok ro me rar kõmmõn The New Testament and Psalms: An Inclusive Version rar bõk juõn lemnak einjuõn jen ir, ilo air jolok aolep melele ko rar kalikar bwe ri Jew ro rar man Christ. Ri ukok rein rar bareinwõt eñjake bwe kõra ro im rej read Bible renaj kar mõnõnõ lok elañe rar jitõñlok ñõn Anij, jab einwõt Jemen, ak einwõt Jemen-Jinen im elañe rar naetan Jesus, jab Likao eo Nejin Anij, ak ajiri eo Nejin. (Matthew 11:27) Ilo ejja ien eo wõt, rar jolok kien eo bwe limaro ren kõttãik ir ñõn lõmaro beleir im ajiri ro ren bokake jemeir im jineir. (Kolosse 3:18, 20) Alikar bwe ri ukok rein rar jab rejtak bebe eo an Paul ñõn jab ‘kariõp nan in Anij.’ Rar meloklok jerbal eo an juõn ri ukok, ak rar watõk ir make einwõt ri kine Bible eo, im kõmmõn book ko me rar kajerbal etan Bible eo ñõn kowõnmanlok lemnak ko air make.

11. Ewi wãwen katak ko an Christendom ikijen aan armij im mij rej idaptok nae ta eo Bible ej ba?

¹¹ Kabuñ ko an Christendom rekin katakin armij bwe aan armij ej juõn jitõb, ej illok jen enbwinen ilo ien mij, im eban mij. Ilo oktan, ukok in Bible ko mokta rar kalikar bwe aan armij ej armij make, im aan armij emaroñ mij. (Genesis 12:5; 36:6; Bwinbwin 31:28; James 5:20) Kamelele in ear kajook ri utiej ro an kabuñ.

12. Ilo wãwen et eo jet ukok in Bible ko ilo ran kein rej noje katak ko remol ilo Bible eo?

¹² Kiõ ukok ko rekãl rej noje katak kein remol. Ewi wãwen? Rejjab ukõte ilo jejjet in nan in Hebrew eo neʹphesh (aan armij) ilo jet eon ko. Ilo Genesis 2:7, remaroñ ba bwe emaan eo moktata “ear mour” (jen air ba bwe “ear erom juõn aan emour”). Ak remaroñ ba “men in kõmõnmõn” jen air ba “aan ” ñe rej kennan kin men in mour ko. (Genesis 1:21) Ilo eon ko einwõt Ezekiel 18:4, 20, rej ba “armij eo” (jen air ba “aan armij”) ej mij. Bõlen, nan rot kein rejimwe ekkar ñõn lemnak eo an ri ukok eo. Ak ewi joñan an lap jibañ kain kamelele rot in emaroñ lelok ñõn eo emol an kabukõt mol eo ak ej iminene kin katak ko rewan an Christendom?b

13. Jet ukok in Bible ko kar noje karõk eo an Anij kin lõl in ilo wãwen et eo?

¹³ Ñõn rejtak katak eo air bwe armij ro remõn otemjej rej etal ñõn lõñ, ri ukok ro​—ak ri kaki in kabuñ ko me rej etale jerbal eo air​—remaroñ bareinwõt kate wõt ñõn noje ta eo Bible ej ba kin karõk eo an Anij kin lõl in. Ilo Psalm 37:11, elõñ ukok ko rej ba bwe ro ettã burueir renaj jolet “ene eo.” “Ene eo” emaroñ kar walok jen nan eo (ʼeʹrets) ilo kajin Hebrew. Bõtab, ukok eo Today’s English Version (me elõñ ukok in Bible ko ilo kajin ko rekajjo jen don kar bedbed ion) elaplok an kõmmõn oktak ko. Meñe ukok in ej kajerbal nan in kajin Greek eo ge einwõt “lõl” 17 alen ilo Gospel in Matthew, ilo Matthew 5:5 ej jolok nan eo “lõl” im ej kajerbal nan kein “men eo Anij ear kallimur kake.” Ri kabuñ ro rekin lemnak bwe “men eo Anij ear kallimur kake” ej mour ilõñ. Rejjab bõk katakin eo emol bwe, ilo Katak eo an ion Tol eo, Jesus Christ ear ba bwe ro emol burueir, ak etta burueir renaj “jolit lõl.”

14. Ta un eo ekibbon ej alikar ilo jet ukok in Bible ko?

¹⁴ Jet ukok in Bible ko rar ukõt nan ko ñõn jibañ ri kaki ro ñõn bõk juõn wõnãn elap. Emol an Bible ba bwe: “Dri jerbal ej tellokõn wõnãn.” (1 Timothy 5:18) Ak ilo 1 Timothy 5:17, ijo ej ba bwe elder ro rej iroij ilo jimwe ren “kanuij koutiej ir,” jet iair rej ba bwe men eo wõt rej watõke men in kautiej ej money. (Keiri 1 Peter 5:2.) Kin men in, ukok eo The New English Bible ej ba bwe elder rein rej “tellokin double wõnair,” im ukok eo Contemporary English Version ej ba bwe “joñan wõnair en ruo alen.”

Rejtak ilo Tiljek Nan in Anij

15. Ewi wãwen jemaroñ beek kin ta ukok in Bible eo jekõnan kajerbale?

¹⁵ Ta melelen men in ñõn kajjojo ro rej konono Bible eo im ro rej kajerbal Bible eo ñõn katakin armij ro jet? Ilo enañin aolep kajin ko relap, ewor elõñlok jen juõn ukok in Bible eo remaroñ kajerbali. Kwon meletlet wõt ñe kwoj kãlet ta ukok in Bible eo kwo kõnan kajerbale. (Jabõn Kennan 19:8) Elañe juõn ukok ejjab mol kin wãwen an kwalok ãt eo etan Anij​—ilo an jolok etan jen Nan in kakõrmol eo an kin jabdewõt un​—ri ukok ro remaroñ ke kar ukõte nan ko jet ilo Bible eo ilo jab jimwe bareinwõt? Ñe jej bere kin joñan mol in ukok eo, kajeoñ in keiri ibben ukok ko jet mokta. Elañe kwoj juõn ri katakin armij kin Nan in Anij, kwon kãlet ukok ko rej bedbed ion ta eo ej ba ilo kajin ko moktata kajin Hebrew im Greek.

16. Ewi wãwen kij kajjojo jemaroñ kwalok ad tiljek ñe jej kajerbal Nan in kakõrmol an Anij?

¹⁶ Kij aolep jej aikwij tiljek ñõn Nan in Anij. Jej kõmmõne men in ilo ad lale ta eo ej bed iloan bwe, elañe emaroñ, jen kalãjrak jet ien ñõn konono Bible eo ran otemjej. (Psalm 1:1-3) Jej kõmmõne men in ilo ad jerbale ilo eyu ilo mour eo ad kin ta eo ej ba, katak ñõn kajerbal nan in kaiñi ko im wanjoñok ko iloan einwõt bedbed eo ñõn kõmmõn bebe ko rejimwe. (Rome 12:2; Hebrew 5:14) Jej kwalok ad tiljek ñõn Nan in Anij ilo ad kwalok kake ilo kijejeto ñõn ro jet. Jej bareinwõt kõmmõn men in einwõt ri kaki ro ilo ad kajerbal Bible eo ilo jimwe, im jab ukõt nan ko an ñõn rejtak lemnak ko ad make. (2 Timothy 2:15) Men eo Anij ear kanan kake enaj walok ilo ejelok likjap. Ej tiljek ñõn kajejjet kitien Nan eo an. Jen tiljek wõt im kejbarok e.

[Kamelele ko itulal]

Kwoj Kememej Wõt Ke?

◻ Ta un ko kar jelet jerbal eo an ri ukok in Bible ro ilo ran kein?

◻ Etke ukok ko ilo ran kein rar jab kabõjrak karõk eo an Anij ikijen etan?

◻ Ewi wãwen jet ukok in Bible ko rar noje katak ko remol ilo Bible kin aan armij, mij, im lõl?

◻ Ilo wãwen et ko jemaroñ kwalok ad tiljek ñõn Nan in Anij?

[Pija eo ilo peij 26]

Ukok in Bible et eo kwon kar kajerbale?