Jehovah Ej Kaorõk Jerbal Eo Am Kwoj Kõmmõne Kin Aolepen Buruõm

“Jabrewõt men eo komij kõmõne, komin kõmõne kin buru, einwõt ñõn Iroij, im jab ñõn armij.”​—KOLOSSE 3:23.

1, 2. (a) Ta jerammõn eo elaptata emaroñ wor ibbed? (b) Etke jet ien jejjab maroñ kõmmõn men otemjej jekõnan kõmmõni ñõn karejar ñõn Anij?

KAREJAR ñõn Jehovah ej jerammõn eo elaptata jemaroñ bõke. Kin juõn un emõn, jen etto magazine in ear rejañ ri Christian ro ñõn bõk kwunair ilo jerbal in kwalok nan, im “lõñlok wõt” ñe ewor maroñ. (1 Tessalonika 4:1) Bõtab, ejjab aolep ien jemaroñ kõmmõn men otemjej ilo burued ñõn karejar ñõn Anij. “Ekkar ñõn wãwen ko aõ Ij aikwij jerbal full-time ilo jikin jerbal eo,” juõn sister ejañin belele im ear baptais 40 yiõ ko remotlok ear kamelele. “Unin aõ jerbal ejjab ñõn wiaik nuknuk ko elap wõnair ak jolok elap wõnãn ñõn ito-itak im kakije, ak jen men in ej ñõn kabwe aikwij ko aõ, ekoba wõnãn doctor. Eñjake eo aõ ej einwõt ij lelok ñõn Jehovah jidik wõt ien im kajur eo aõ.

² Yokwe Anij ej kamakit kij ñõn kamãt ad maroñ ñõn kwalok nan. Ak ekkã an walok bwe wãwen mour ko ad rej kadiklok joñan men ko jemaroñ kõmmõni. Lale eddo ko jet ekkar ñõn Bible, ekoba eddo ko an family, remaroñ bõk elap ien im kajur ko ad. (1 Timothy 5:4, 8) “Ien kein renana,” ej laplok an juõn ien melejoñ ñõn mour. (2 Timothy 3:1) Ñe jejjab maroñ kõmmõn men otemjej jekõnan kõmmõni ilo jerbal in kwalok nan, burued emaroñ kainebataik kij ñõn juõn joñan. Jemaroñ jino lemnak elañe Anij ej buñburuen kake wãwen kabuñ eo ad ak jab.

Aibujuij in Jerbal kin Aolepen Burued

3. Ta eo Jehovah ekõnan jen kij aolep?

³ Ilo Psalm 103:14, Bible eo ej kakememej kij bwe Jehovah “e jela wãwen kõmõnmõn kij; E kememej bwe kij bõñõlñõl.” Elaplok jen jabdewõt armij, ej jela kin joñan maroñ ko ad. Ejjab aikwij men eo elle jen joñan ad maroñ in lelok e. Ta eo ekõnan? Juõn men me jabdewõt armij emaroñ lelok, jekdon ta wãwen eo ej walok ilo mour eo an: “Jabrewõt men eo komij kõmõne, komin kõmõne kin buru, einwõt ñõn Iroij, im jab ñõn armij.” (Kolosse 3:23) Aet, Jehovah ekõnan bwe kij​—kij aolep​—jen karejar ñõn e kin aolepen burued.

4. Ta melelen ñõn karejar ñõn Jehovah kin aolepen burued?

⁴ Ta melelen ñõn karejar ñõn Jehovah kin aolepen burued? Nan in Greek eo “buru” ej melelen “jen ad.” “Ad” ej jerbal ñõn aolepen armij eo, ekoba maroñ ko an ilo kanniek im lemnak. Karejar kin aolepen burued ej melelen lelok kij make, kajerbal maroñ im kajur ko ad ñõn mãt joñan ilo jerbal eo an Anij. Ilo tubidodoõn, ej melelen ñõn kõmmõn men otemjej ad emaroñ kõmmõni.​—Mark 12:29, 30.

5. Ewi wãwen joñok eo an ri jilek ro rej kwalok bwe kij aolep jejjab aikwij joñan wõt juõn ilo jerbal eo ad?

⁵ Jerbal kin aolepen burued ej melelen ke bwe joñan jerbal eo ad ej aikwij joñan wõt juõn ibben armij ro jet? Ilo mol jaab, kinke wãwen im maroñ ko an armij rej einjuõn jen don. Kalmenlokjen kin ri jilek ro retiljek an Jesus. Ir aolep rar jab joñair wõt juõn ilo air jerbal. Ñõn wanjoñok, jidik wõt ad jela kin jet ian ri jilek ro, einwõt Simon ri Cananaean eo im James nejin Alphaeus. Bõlen jerbal ko air einwõt ri jilek ro ear wor juõn joñan. (Matthew 10:2-4) Keiri ibben men in, Peter ear maroñ bõk elap jerbal ko​—emol, Jesus ear lelok ñõn e “ki ko ki in ailiñ in lõñ”! (Matthew 16:19) Ak, Peter ear jab utiej jen ro jet. Ke John ear lo vision eo kin Jerusalem eo Ekãl ilo Revelation (ilo 96 C.E.), ear lo 12 dekã in foundation ko im emwij jeje ion “etan joñoul im ruo dri jilik an Lam eo.”a (Revelation 21:14) Jehovah ear kaorõk jerbal ko an ri jilek ro aolep, meñe jet iair rar kõmmõn jerbal ko relaplok jen ro jet.

6. Ilo wanjoñok eo an Jesus kin ri kallip eo, ta eo enaj walok ñõn ine eo ej wõtlok ion “brij eo emõn,” im ta kajitõk ko rej walok?

⁶ Eindeinlok wõt, Jehovah ejjab kajitõk bwe joñan jerbal in kwalok nan eo ad en joñan wõt juõn. Jesus ear kalikar melele in ilo wanjoñok eo ikijen ri kallip eo, im ear keiri jerbal in kwalok nan eo ñõn jeore ine ko. Ine eo ear wõtlok ion elõñ kain bũdej, im men in ear wanjoñok kin elõñ wãwen buruen armij ro rej eoroñ ennan eo. “Eo ar jeor e na ilo brij emõn,” Jesus ear kamelele, “e in eo ej roñjake, im jela kake; im ej jebar im elle, jet jibuki kin juõn, jet jiljinoñoul kin juõn, jet jilñoul kin juõn.” (Matthew 13:3-8, 18-23) Ta leen in, im etke joñan jebar le ko rej kajjo jen don?

7. Ta in leen ine eo emwij jeore, im etke joñan leen ko rej jebar rej kajjo jen don?

⁷ Kinke ine in emwij jeore ej “nan in ailiñ eo,” elle in ine ko ej jitõñlok ñõn kajededlok ennan eo, kennan kake ñõn armij ro jet. (Matthew 13:19) Joñan jebar le ko rej kajjo jen don​—jen jilñoul ñõn jibuki. Juõn armij emõn an mour im kajur emaroñ jolok elap ien ñõn kwalok nan jen ro remõjnolok kin air nañinmij aolep ien ak rittolok. Juõn armij ejañin mare im ejelok an inebata kin eddo ko kin family emaroñ kalaplok an jerbal in kwalok nan jen juõn eo ej aikwij jerbal full-time ilo juõn jikin jerbal ñõn kabwe aikwij ko an family eo an.​—Keiri Jabõn Kennan 20:29.

8. Ewi lemnak eo an Jehovah kin ro rej lelok men ko remõntata kin aolepen burueir?

⁸ Ekkar ñõn lemnak an Anij, armij eo ej jebar le ko jilñoul ediklok ke tõmak eo an jen eo juõn ej jebar jibuki leen? Jaab ñõn jidik! Joñan le ko remaroñ kajjo jen don, ak Jehovah ej buñburuen kake toõn wõt an juõn armij lelok aolepen an ñõn jerbal ñõn e. Kememej wõt bwe, joñan le ko rekajjo jen don rej aolep waloktok jen buru ko rej “brij emõn.” Nan in Greek eo (ka·losʹ) rej ukõte “emõn” ej kalikar kin juõn men “eaibujuij” im ej “kalõñliñ buruen armij, im kamõnõnõik mejen armij.” Ej juõn men in kainemõn ibbed ñõn jela bwe ñe jej jerbal kin aolepen ad, burued enaj aibujuij iman mejen Anij!

Jab Keiri Kij Ibben Ro Jet

9, 10. (a) Burued emaroñ tel kij ñõn bõk kain lemnak rot enana? (b) Ewi wãwen wanjoñok eo ilo 1 Korint 12:14-26 ej kwalok bwe Jehovah ejjab keiri men ko jej kõmmõni ibben ro jet?

⁹ Bõtab, burued ejjab wãppen emaroñ ekajete men ko ilo kajjo wãwen. Emaroñ keiri jerbal ko ad ibben jerbal ko an ro jet. Emaroñ kammanwa, ‘Elaplok an armij ro jet kwalok nan jen ña. Ewi wãwen Jehovah emaroñ buñburuen kake jerbal eo aõ?’​—Keiri 1 John 3:19, 20.

¹⁰ Lemnak im wãwen ko an Jehovah reutiej jen lemnak im wãwen ko ad. (Isaiah 55:9) Jemaroñ bõk jet melele ko kin wãwen an Jehovah jããle jerbal ko ad kajjojo ilo 1 Korint 12:14-26, ijo ear keiri congregation eo ñõn juõn enbwin im elõñ ra ko ibben​—mej, pã, ne, lojiliñi, im men ko eirlok wõt. Elap an bwebwe ñõn keiri mejõm ibben peiõm ak neõm ibben lojiliñõm! Jerbal ko an kajjojo ian ra kein rej kajjo, ak aolep ra kein ewor tokjeir im reaorõk. Eindeinlok wõt, Jehovah ej kaorõk jerbal eo am kwoj kõmmõne kin aolepen am jekdon elañe armij ro jet elaplok air jerbal jen kwe ak jab.​—Galetia 6:4.

11, 12. (a) Etke jet armij remaroñ lemnak bwe rej “mõjnolok” ak “rejjab kanuij aorõk”? (b) Ewi lemnak eo an Jehovah kin jerbal eo ad?

¹¹ Kinke enana ejmour eo ad, jej rittolok, ak abañ ko jet, jet ien jet iad jemaroñ watõk kij make einwõt “ro remõjnolok” ak “ediklok an aorõk.” Ak ejjab wãwen dein an Jehovah watõk kij. Bible eo ej jiroñ kij: “Elaplok r’an enbwin, ko einwõt remõjno emõn ren jab joko . . . ko jej lemnok eriklok air aibujuij, jej koorlok air aibujuij . . . a Anij e ar kobaik enbwin, im lelok elaplok aibuijij ñõn ra eo ej aikwij.” (1 Korint 12:22-24) Inem armij otemjej remaroñ aorõk ñõn Jehovah. Ej kaorõk jerbal eo ad ñõn e ekkar ñõn joñan maroñ eo ad. Buruõm ejjab ke kamakit yuk ñõn karejar ñõn juõn Anij eo ej yokwe im melele kake kij?

¹² Inem, men eo eaorõk ibben Jehovah, ejjab bwe kwon jerbal joñan wõt an bar juõn armij maroñ kõmmõne ak jen men in ej joñan men eo kwe​—am make​—kwomaroñ kõmmõne. An Jehovah kaorõk jerbal ko an kajjojo armij kar kalikare ilo wãwen eo ejoij Jesus ear jerbal ibben ruo kõra ilo ran ko eliktata in an mour ion lõl.

Men in Lelok eo “Elap Wõnan” An Juõn Kõra Elap An Wor Kamolol

13. (a) Ta makitkit ko kar walok ilo ien eo Mary ear kabit bõran im neen Jesus kin den in kabit eo? (b) Kar jete wõnãn den in kabit eo an Mary?

¹³ Ilo joten Friday ilo Nisan 8, Jesus ear tõbarlok Bethany, juõn bukwon edik iturear in Tol Oliv, enañin ruo mile jen Jerusalem. Ro jeran rejitenburu ibben Jesus rar jokwe ilo bukwon in​—Mary, Martha, im jeiir im jatiir, Lazarus. Jesus ear juõn ri lolok ilo mweo imwiir, im bõlen ear eindein elõñ alen. Ak ilo joten Saturday, Jesus im ro jeran rar kijota ilo mweo imõn Simon, juõn ri leper mokta eo Jesus emaroñ kar kejmour e. Ke Jesus ear babu iturin table eo, Mary ear kõmmõn juõn men in joij im ear kwalok yokwe eo an emwilõl kin an kar kajerkakbijik jein im jatin. Ear kabellok juõn bottle in oil eo eñõj, “elap wõnan.” Emol, elap wõnãn! Wõnãn eo kar 300 denarii, jõnan wõt wõnãn jerbal iumin juõn yiõ. Ear lutõk oil eo eñõj ion bõran im neen Jesus. Bareinwõt ear kameraik neen kin kol in bõran.​—Mark 14:3; Luke 10:38-42; John 11:38-44; 12:1-3.

14. (a) Kar ewi lemnak eo an ri kalor ro kin ta eo Mary ear kõmmõne? (b) Ewi wãwen Jesus ear jojomade Mary?

¹⁴ Ri kalor ro an rar illu! ‘Etke ej jeroane dren in kabit in?’ rar kajitõk. Judas, eo ej noje kõnan eo an ñõn kwot ilikin nan ko an ñõn jibañ ro rejeramel ear ba: “Etke ar jab wiakake men in kabit in kin jilubuki s̃illiñ, im lelok ñõn ro dri jeramel?” Mary ear jab keroro. Bõtab, Jesus ear jiroñ ri kalor ro: “Komin likit e, etke komij añte e? e ar jerbal ñõn Iõ jerbal emõn [juõn wãwen ka·losʹ]. . . . Lio e ar kõmõn einwõt an maroñwe, e ar kabit enwbiniõ mokta ñõn kalibwin Iõ. Emol Ij ba ñõn kom, Ijo jabrewõt re naj kwalok gospel in i aolepen lõl, men in lio e ar kõmõne re naj konono kake bwe ren kememej e.” Nan kein an Jesus ear lap an kainemõn buruen Mary!​—Mark 14:4-9; John 12:4-8.

15. Etke Jesus ear lukkun mõnõnõ kin men eo Mary ear kõmmõne, im ta eo jej katak kake kin jerbal eo kin aolepen buru?

¹⁵ Jesus ear lap an mõnõnõ kin ta eo Mary ear kõmmõne. Ekkar ñõn lemnak eo an, ear kõmmõn juõn jerbal ear tellokin an bõk nebar. Wõnãn men in lelok eo ear jab men eo eaorok ibben Jesus ak kin an kar “kõmõn einwõt an maroñwe” men in ear kaorõk e. Ear bõk ien eo emõn im lelok men eo ear maroñ in lelok. Ukok ko jet kar kajerbal nan ko einwõt, “Ear kõmmõn men otemjej ear maroñ in kõmmõne,” ak “Ear kõmmõn men eo ilo kajur eo an ñõn kõmmõne.” (An American Translation; The Jerusalem Bible) Mary ear lelok kin aolepen an kinke ear lelok men eo elaptata ibben. Eñin melelen jerbal kin aolepen ad.

“Ruo Mõnni Reniñ” an Juõn Kõra Ejako Belen

16. (a) Ewi wãwen Jesus ear jããle money ko an kõra eo ejako belen? (b) Kar jete money ko an kõra eo ejako belen?

¹⁶ Jejjo wõt ran ko tokelik, ilo Nisan 11, Jesus ear bed ilo temple eo aolepen ran eo, im armij ro ijo rar bere kin maroñ eo an im kajitõkin e kin elõñ kajitõk ko kin owõj, jerkakbiji eo, im men ko eirlok wõt. Ear ekajete scribe im Pharisee ro kin, air “kõñi imõn kõra ro ejoko beleir.” (Mark 12:40) Inem Jesus ear jijet, ilo Imõn kõra eo, ijo, ekkar ñõn mantin ri Jew, nien money ko 13 kar bed ie. Iumin jidik wõt ien ear jijet, im lale armij ro rar ãti money ko na iloair. Elõñ ri mweie rar itok, bõlen ilo juõn buru eutiej. (Keiri Matthew 6:2.) Jesus ear kalimjek juõn kõra. Armij ro bajjek rar jab maroñ lo jabdewõt men einjuõn kin e ak kin men in lelok eo an kõra in ejeramel. Ak Jesus, eo emaroñ jela kin buruen armij ro jet, ear jela bwe ear “juõn kõra ejeramel im ejoko belen.” Bareinwõt ear jela kin joñan men in lelok eo an​—“ruo mõnni reniñ, rej einwõt juõn farthiñ.”b​—Mark 12:41, 42.

17. Kar ewi watwat eo an Jesus kin money eo an kõra eo ejako belen, im ta eo jej katak kake ikijen lelok ñõn Anij?

¹⁷ Jesus ear añiñintok ri kalor ro an, kinke ear kõnan bwe ren lo kin mejeir men eo ear bojak in katakin ir kake. Kõra in “e ar ãti elap jen ir otemjej r’ar ãti na iloan nien mõnni, “ Jesus ear ba. Ekkar ñõn watwat eo an Jesus kõra in ear ãti elaplok money jen armij ro jet. Ear lelok “men ko an otemjej”​—money ko an eliktata. Ilo an kõmmõn men in, ear lelok mour eo an ilo lobedin pein Jehovah. Armij eo ear juõn joñok emõn kin lelok ñõn Anij kar armij eo me men in lelok eo an kar einwõt jettokjen ilo kanniek. Bõtab, iman mejen Anij, ear lap an aorõk!​—Mark 12:43, 44; James 1:27.

Katak Jen Lemnak eo an Jehovah Ikijen Jerbal kin Aolepen Ad

18. Ta eo jej katak kake jen wãwen an kar Jesus jerbal ibben kõra rein ruo?

¹⁸ Jen wãwen an kar Jesus kajerbal kõra rein ruo, jej katak kin jet wãwen ko Jehovah ej watõk jerbal eo ad kin aolepen burued. (John 5:19) Jesus ear jab keiri kõra eo ejako belen ibben Mary. Ear watõk money ko ruo an kõra eo ejako belen joñan wõt juõn ibben den in kabit eo “elap wõnan” an Mary. Kinke kajjojo ian kõra rein rar lelok kin aolepen air, iman mejen Anij men in lelok ko air kar lap tokjeir. Inem elañe kwoj watõk jerbal ko am einwõt ejelok tokjen kin an jab lap am karejar ñõn Anij ekkar ñõn joñan am kõnan, jab inebata. Jehovah ej buñburu wõt kin am jerbal kin aolepen am. Kememej wõt, Jehovah ej “lale buru,” inem ej jela kin ta kõnan eo ilo burued.​—1 Samuel 16:7.

19. Etke jejjab kõnan beek kadede ilo burued kin ta eo armij ro jet remaroñ kõmmõne ñõn karejar ñõn Anij?

¹⁹ Wãwen an Jehovah watõk jerbal eo jej kõmmõne kin aolepen burued en kar jelet wãwen eo jej lemnak im jerbal ibben don. Ejjab juõn men in yokwe ñõn enoik jibadbad ko an armij ro jet ak keiri jerbal eo an juõn armij ibben eo juõn! Ekaburomõjmõj, juõn ri Christian ear je: “Jet ien einwõt jet armij rej ba bwe kwoj aikwij jerbal einwõt juõn pioneer ak enaj ejelok tokjen am jerbal. Kij ian ro rej iñtan ñõn ‘baj’ etal wõt einwõt ri kwalok ro an Ailiñ eo jej aikwiji nan in kamolol bareinwõt.” Jej aikwij kememej bwe ejelok ad maroñ ñõn beek kin ta eo ej jerbal eo kin aolepen buru an juõn ri Christian eo mõttad. (Rome 14:10-12) Jehovah ej kaorõk jerbal eo an kajjojo ian million ri kwalok ro an Ailiñ eo rej jerbal kin aolepen burueir, inem kij bareinwõt jej aikwij kõmmõn eindein.

20. Ekkã an emõntata bwe jen bõk lemnak et eo kin ri kabuñ ro mõttad?

²⁰ Bõtab, ta elañe ej einwõt ediklok an jet jerbal ilo jerbal in kwalok nan jen remaroñ kõmmõne? Juõn diklok in jerbal an juõn ri tõmak eo mõttad emaroñ kalikar ñõn elder ro bwe ej aikwij bõk jibañ ak nan in rejañ. Ilo ejja ien eo wõt, jen jab meloklok bwe ñõn jet ri kwalok ro jerbal in kwalok nan kin aolepen buru emaroñ einlok wõt money eo an kõra eo ejako belen jen den in kabit eo an Mary elap wõnãn. Ekkã an emõnlok ñõn bõk lemnak eo bwe ro jeid im jatid rej yokwe Jehovah im bwe yokwe in ej kamakit ir bwe ren jerbal ñõn mãt joñan​—im jab joñan eo ediktata​—air maroñ. Emol bwe ejelok juõn ri karejar eo an Jehovah eo bõklikit eo an ej tel e enaj kadiklok jerbal eo an ñõn Anij!​—1 Korint 13:4, 7.

21. Ta jerbal eo elap tokjen elõñ armij rej jibadõki, im ta kajitõk ko rej bõkmantak?

²¹ Bõtab, ñõn elõñ ian armij ro an Anij, jerbal kin aolepen air ear melelen air jibadõk juõn jerbal elap an wor jerammõn ibben​—jerbal in pioneer. Ta jerammõn ko rej bõki? Im ta kin ro iad jejjab maroñ pioneer? Kajitõk kein renaj uaki ilo katak in tok.

[Kamelele ko itulal]

Ewi Wãwen Kwonaj Kar Uak?

◻ Ta melelen ñõn karejar ñõn Jehovah kin aolepen burued?

◻ Ewi wãwen wanjoñok eo ilo 1 Korint 12:14-26 ej kwalok bwe Jehovah ejjab keiri men ko jej kõmmõni ibben ro jet?

◻ Ta eo jej katak jen nan ko an Jesus kin den in kabit eo elap wõnãn an Mary im money ko ruo edik wõnãn an kõra eo ejako belen ikijen lelok kin aolepen burued?

◻ Ewi wãwen lemnak eo an Jehovah kin jerbal kin aolepen buru en jelet lemnak eo ad kin ro jet?

[Pija eo ilo peij 10]

Mary ear lelok men eo an emõntata, im kabit enbwinin Jesus kin den in kabit eo “elap wõnãn”

[Pija eo ilo peij 11]

Money ko an kõra eo ejako belen​—enañin ejelok tokjen ilo kanniek ak elap wõnãn iman mejen Jehovah