“Buruõm E Jime, Einwõt Buruõ Iben Buruõm Ke?”
“Kwon itok iba, im lo aõ kijejeto kin Jeova.”—2 KINGS 10:16.
1, 2. (a) Ewi wãwen wãwen kabuñ eo an Israel ear wõnmanlok im nanalok?? (b) Ilo 905 B.C.E., ta oktak ko relap renañin kar walok ilo Israel?
YIÕ eo 905 B.C.E. kar juõn ien elap oktak ilo Israel. Enañin 100 yiõ ko lok iman, Jehovah ear kõmmõn bwe ailiñ in Israel eo eburukuk en jibel kin an kar Solomon buñ jen tõmak. (1 Kings 11:9-13) Ailiñ eo itu-rak, Judah, ear bed iumin iroij eo an leo nejin Solomon Rehoboam ke ailiñ eo itu-eañ, Israel, ear itok iumin iroij eo an King Jeroboam, juõn ri Ephraim. Ilo buromõj, ailiñ eo itu-eañ ear wor juõn ijjino enana. Jeroboam ear jab kõnan bwe armij ro an ren etal ñõn ailiñ eo itu-rak ñõn kabuñ ilo temple eo, ilo mijak bwe renaj bõk lemnak eo ñõn bar jeblak ñõn imõn David. Inem ear kajutak kabuñ ñõn kon in cow eo ilo Israel im ilo wãwen in kõmmõn juõn joñok kin kabuñ ñõn ekjap eo ear bed ilo juõn joñan iaolepen bwebwenato in ailiñ eo itu-eañ.—1 Kings 12:26-33.
2 Wãwen eo ear nanalok ke Ahab, nejin Omri, ear erom king. Kõra ruamaijet eo belen, Jezebel, ear kowõnmanlok kabuñ in Baal im ear man ri kanan ro an Jehovah. Jekdon nan in kakkil ko rekajju an ri kanan eo Elijah, Ahab ear jab kabõjrak e. Bõtap, ilo 905 B.C.E., Ahab ear mij, im Jehoram, eo nejin, ear iroij. Ear ien kiõ ñõn karreo ene eo. Ri bõk jikin Elijah, Elisha, ear kõjelaik ri tel in jarin tarinae eo, Jehu, bwe Jehovah ear kabit e bwe enaj king eo tok juõn an Israel. Jerbal eo an? Ñõn man ro ri imõn Ahab ejerawiwi im idenwõne kin bõtõktõkin ri kanan ro me Jezebel ear katorloke!—2 Kings 9:1-10.
3, 4. Ewi wãwen Jehonadab ear kwalok bwe buruen ear ‘jime ibben buruen Jehu’?
3 Ilo bokake kien eo an Anij, Jehu ear kõmmõn bwe ren man ri nana eo Jezebel, im elikin ear etal in karreo Israel ilo an man ro ri imõn Ahab. (2 Kings 9:15–10:14, 17) Inem ear iion juõn ri rejtak e. “E ar lo Jihonadab nejin Rikab, ej iten wõnmae e, im e ar yokyokwe e, im ba ñõn e, ‘Buruõm e jime, einwõt buruõ iben buruõm ke?’ Im Jihonadab e ar uak, ‘Aet.’ ‘Elañe ein drein kwon letok peõm.’ Im e ar lelok pein ñõn e, im e ar kwotõkliñtok e ñõn iben ilo jariot eo. Im e ar ba, ‘Kwon itok iba, im lo aõ kijejeto kin Jeova.’ Ein drein rar kõmõn bwe en uwe ilo jariot eo an.”—2 Kings 10:15, 16.
4 Jehonadab (ak, Jonadab) ear jab juõn ian ri Israel ro. Mekarta, ekkar ñõn ãt eo etan (melelen “Jehovah Ej Mõnõnõ,” “Jehovah Ej Bwioeo,” “Jehovah Ej Emmol”) ear juõn ri kabuñ ñõn Jehovah. (Jeremiah 35:6) Emol, ear wor juõn an itoklimo eo einjuõn in lo an Jehu “kijejeto kin Jehovah.” Ewi wãwen ad jela? Eokwe, an iion king eo ri kabit an Israel ear jab juõn men ear jirullok im walok. Jehonadab “e ar iten wõnmae e,” im men in ilo juõn ien ke Jehu ededelok an kar man Jezebel im ro jet ilo imõn Ahab. Jehonadab ear jela ta eo ear walok ke ear bõk nan in kir eo an Jehu ñõn deloñ ilo chariot eo an. Ilo alikar ear jeb ibben Jehu—im ibben Jehovah—ilo aitwerõk in ikõtan kabuñ eo ewan im eo emol.
Juõn Jehu ilo Ran Kein im juõn Jehonadab ilo Ran Kein
5. (a) Ta oktak ko mõttan wõt jidik renaj walok ñõn armij otemjej? (b) Wõn eo ej Jehu eo Elaplok, im wõn ro rej jutak ikijen ijin ion lõl?
5 Rainin, men ko ejjabto renaj oktak ilo juõn wãwen elap ñõn armij otemjej einwõt ear walok ñõn Israel ilo 905 B.C.E. Ien eo ej ebak kiõ ñe Jehovah enaj karreoik lõl in jen men in walok ko renana rej itok jen kilan Satan, ekoba kabuñ ko rewan. Wõn eo ej Jehu ilo ran kein? Ejelok bar juõn ijellokin Jesus Christ, ñõn eo rej ba nan in kanan kein ñõn e: “Kwon kañõrñõr am jãji ion ibim, O Kwe eutiejtata; Am wuj im Am utiej. Im ilo Am utiej Kwon uwemanlok im jeban, kin Am mol im inemõn im wãnik.” (Psalm 45:3, 4) Jesus rej binej jenkwon ikijen “Israel an Anij,” ri kabit Christian ro “rej kejbãrok kien ko an Anij, im kennan an Jisõs ibeir.” (Galetia 6:16; Revelation 12:17) Jen 1922 ri kabit jimjen jimjatin Jesus rar ilo beran kakkil kin jerbal in ekajet an Jehovah ej itok.—Isaiah 61:1, 2; Revelation 8:7–9:21; 16:2-21.
6. Wõn ro rar itok jen ailiñ ko ñõn jurake Christian ri kabit ro, im ewi wãwen rar deloñ ilo chariot eo, einwõt ilo nan in kõkkar, an Jehu eo Elaplok?
6 Christian ri kabit ro rar jab make lok iair. Einwõt Jehonadab ear itok in wõnmaek Jehu, elõñ jen ri ailiñ ko rar itok in rejtak Jesus, Jehu eo elaplok, im ro rej binej jenkwon ion lõl ilo jutak eo air kin kabuñ eo emol. (Zechariah 8:23) An kar Jesus ãñiñin ir “sheep ro jet” an, ilo 1932 kar kile ir ilo ran kein einlok wõt Jehonadab eo etto im kar kirtok ir ñõn ‘deloñ ilo chariot’ eo an Jehu ilo ran kein. (John 10:16) Ewi wãwen? Ilo air ‘kejbãrok kien ko an Anij’ im bõk kwunair ibben ri kabit ro ilo air “kwalok nan kin Jesus.” Ilo ran kein, men in ej kobaik kwalok nan kin news eo emõn kin Ailiñ eo emwij an jutak iumin Jesus einwõt King. (Mark 13:10) Ilo 1935 “Jonadab” rein kar kile ir einwõt “jar eo elap” ilo Revelation 7:9-17.
7. Ewi wãwen Christian ro rainin rar kwalok bwe ‘burueir rejimwe’ ibben buruen Jesus?
7 Jen yiõ ko ilo 1930, jar eo elap im ri kabit ro jeir im jatiir rar ilo beran kamol air jurake kabuñ eo emol. Ilo jet ene ko ilo Eastern im Western Europe, Far East eo, im Africa, elõñ iair rar mij kin tõmak eo air. (Luke 9:23, 24) Ilo ene ko jet, kar kalbuj ir, man ir, ak matõrtõr ir. (2 Timothy 3:12) Rar kõmmõn juõn record elap kin tõmak! Im ilo 1997 Service Year Report eo ej kwalok bwe rej bin wõt ilo bebe eo air ñõn karejar ñõn Anij, jekdon ta eo enaj walok. ‘Burueir e jime’ ibben buruen Jesus. Men in ear alikar ilo 1997, ke 5,599,931 ri kwalok ro kin Ailiñ eo, enañin aolepeir rar “Jonadab” ro, rar kajerbal joñan in 1,179,735,841 awa ko ilo jerbal in kwalok nan kin Jesus.
Kwalok Wõt Nan Ilo Kijejeto
8. Ewi wãwen Ri Kennan ro an Jehovah rar kwalok air kijejeto kin kabuñ eo emol?
8 Jehu kar jela kajjen kin an iim an kattõr chariot eo an—juõn men in kamol kin kijejeto eo an ñõn kõtõbrak jerbal eo an. (2 Kings 9:20) Jesus, Jehu eo Elaplok, rej kwalok kake e einwõt kijejeto ear ‘kãñiõ.’ (Psalm 69:9) Inem, ilo ejelok bwilõñ, Christian ro remol rainin rej jela kajjeir kin kijejeto eo air. Ilo congregation eo im ilobwilij jimor, rej “kwalok nan . . . ilo ien emõn im enana.” (2 Timothy 4:2) Kijejeto eo air ear alikar elaptata ilo mõttan eo jinoin ilo 1997 elikin an juõn katak ilo Ad Jerbal Ñõn Ailiñ Eo rejañ elõñ ro remaroñ ñõn bõk kwunair ilo jerbal in auxiliary pioneer. Ilo kajjojo ailiñ ko rar kõmmõn juõn mejenkajjik kin joñan oran auxiliary pioneer ro. Ta kar uak eo? Ekabwilõñlõñ! Elõñ ra ko rar le jen mejenkajjik eo air. Ecuador ear likit juõn mejenkajjik kin 4,000 ak ilo March rar report kin 6,936 auxiliary pioneer ro. Japan ear report juõn joñan in 104,215 ilo alliñ ko jilu. Ilo Zambia, ijo rar jibadõk 6,000, 6,414 rar report ilo March; 6,532 ilo April; im 7,695 ilo May.—Rome 10:10.
9. Ijellokin jerbal eo jen em ñõn em, ilo wãwen et ko jet Ri Kennan ro an Jehovah rej lo armij ñõn jiroñ ir kin news eo emõn?
9 Ri jilek Paul ear jiroñ elder ro jen Epesõs: “Im ekijkan I ar jab drebij jen kom jabrewõt men in kakajuror, a I ar kwalok ñõn kom, im katakin kom ilo bwilij im jen mweo ñõn mweo.” (Jerbal 20:20) Ri Kennan ro an Jehovah rainin rej kajeoñwe joñok eo an Paul im kwalok ilo kijejeto news eo emõn jen em ñõn em. Bõtab, emaroñ jab bidodo in lo armij ilo moko imweir. Kin men in, “dri korijer e tiljek im meletlet” ej rejañ ri kwalok ro kin Ailiñ eo ñõn kebak armij ilo jikin business ko, iturin ial ko, ilo beach ko, ilo jikin kallip ko—jabdewõt jikin jemaroñ lo armij ro ie. (Matthew 24:45-47) Tokjen ko rar emõntata.
10, 11. Ewi wãwen ri kwalok ro jen ruo ailiñ ko rar kwalok lemnak ko remõn ñõn bukõt armij ro rej itoklimo ro ekkã air jab lo ir ilo moko imweir?
10 Ilo Copenhagen, Denmark, juõn kumi edik in ri kwalok ro rar kwalok nan iturin ial ko inabõj in railway station ko. Jen January ñõn June, rar lelok 4,733 magazine ko, rar maroñ konono ibben elõñ armij ro, im rar kõmmõn elõñ bar jeblak ko. Jet ri kwalok ro ilo ene in rar kajutak magazine route (karõk in bar jeblak ñõn lelok magazine ko rekãl) ko ilo jikin business ko. Ilo juõn bukwon ilo kajjojo Friday ewor juõn market elukkun kilep, im elõñ thousand ri lotok ro. Inem congregation eo ear karõk ñõn an keini air kwalok nan ilo jikin market in. Ilo juõn jikin rej lolok school ko kin juõn package in kamelele im ewor book ko me relukkun jejjet ñõn ri kaki ro.
11 Ilo Hawaii bareinwõt rar kõmmõn jibadbad ko ñõn jibadõk ro rejjab maroñ lo ir ilo moko imweir. Special territory ko ekoba jikin ko ilobwilij (ial ko, jikin kallip ko, jikin park wa ko, im bus stop ko), jikin ko ilo town, jikin kaikujkuj ko, im airport ko, kwalok nan ikijen kajerbal telephone, public transportation (kwalok nan ilo bus ko), im college campus (jikin school) ko. Rej kejbarok bwe en jejjet oran ri Kennan ro rej assign i ñõn kajjojo territory ko im bwe ro rej assign ir kar jejjet air kamineneik ir. Jibadbad ko rekwon einlok wõt men kein rej report kaki ilo elõñ ene ko. Tokjen men in, rej iion armij ro rej itoklimo me reban kar iion ir ilo jerbal in jen em ñõn em.
Jutak Bin
12, 13. (a) Ta kil ko Satan ear kajerbali nae Ri Kennan ro an Jehovah ilo 1997? (b) Ilo wãwen et eo nan in karelel ko rewan kar jeblak nae eo ear kwaloki ilo juõn ailiñ?
12 Ilo elõñ ene ko ilo 1997, Ri Kennan ro an Jehovah rar bõk jorrãn kin nan ko rewan im lej ko rar kõmmoni kin mejenkajjik eo ñõn kõmmõn case nae ir. Ak rar jab jenliklok! (Psalm 112:7, 8) Rar kememej jar eo an ri jeje psalm: “Ro dri jua r’ar kine riõp nae iõ; kin aolepen buruõ I naj kejbãrok nan in katak ko Am.” (Psalm 119:69) Nan in karelel rot in eriap ej men in kamol bwe rej dike Christian ro remol einwõt Jesus ear kanan kake. (Matthew 24:9) Im jet ien ej bar jeblak nae ir. Juõn emaan ilo Belgium ear konono juõn katak ear kananaik Ri Kennan ro an Jehovah ilo juõn newspaper ebuñbuñ. Ilo an ilbõk kin nan in ruruwe ko, ear bed ilo juõn kwelok ilo Kingdom Hall eo ilo Sunday eo tok juõn. Ear karõk ñõn katak Bible ibben Ri Kennan ro im ear mõkaj an kõmmõn wõnmanlok. Mokta, lein ear uan juõn kumi in ri nana. Katak kin Bible eo an ear jibañ e ñõn karreoik mour eo an, juõn men elõñ armij ibelakin rar loe. Emol, ri jeje kin katak in ruruwe in ear jab lemnak kin juõn tokjen rot in!
13 Jet armij ro emol burueir ilo Belgium rar konono nae nan in karelel riap eo. Ibwiljin rein kar juõn armij ear juõn prime minister mokta eo ear nebar Ri Kennan ro an Jehovah kin tõbrak ko air. Im juõn deputy ear je: “Ilo oktan nan in ñiremij ko rar kajededlok jet ien, ñõn ña einwõt [Ri Kennan ro an Jehovah] rejjab juõn men in kauatata ñõn Kien eo. Rej citizen (ri ailiñ eo) ro rej yokwe ainemõn, remol, im rej kwalok air kautiej ñõn ri utiej ro.” Emol, emeletlet nan ko an ri jilek Peter: “Im en ekar ami ber im kõmõn ilo bwiljin dri ailiñ ko; bwe, ilo men eo rej konono nae kom kake einwõt dri kõmõn nana, ren kaibujuij Anij ilo ran eo ran in joij, kin ami jerbal ko remõn rej loi.”—1 Peter 2:12.
Juõn Kwojkwoj in Kijota Ekabwilõñlõñ
14. Ta kar jet report ko rekabwilõñlõñ kin oran ri kwelok ro ilo ien Kwojkwoj eo ilo 1997?
14 Ekkar bwe ro rej kwalok kin Jesus ren watõk Kwojkwoj in mij eo an einwõt men eo elaptata ilo yiõ eo. Ilo 1997, 14,322,226 rar bed ilo March 23 ñõn kememe ien eo. (Luke 22:14-20) Ilo elõñ ene ko ri kwelok ro ilo ien Kwojkwoj in Kijota eo ear lukkun le jen oran ri kwalok ro kin Ailiñ eo, eo ej kwalok juõn kejatdikdik emõn kin juõn laplok ilo ran ko rej itok. Ilo Haiti, 1997 ear lo juõn laplok kin 10,621 ri kwalok ro, ke 67,259 rar bed ilo Kwojkwoj in Kijota eo. Kwo maroñ lale report in yiõ eo ilo peij ko 18 ñõn 21 im lale jete ailiñ ko jet kar wor juõn joñan elap kin ri kwelok ro ñe keiri ibben oran ri kwalok ro.
15. Ilo jet ene ko, ewi wãwen ro jeid im jatid rar anjo ion abañ ko relap ñõn kememe Kwojkwoj eõ?
15 Ñõn jet, bed ilo Kwojkwoj eo ear jab juõn men ebidodo. Ilo Albania ear wor juõn 7:00 p.m. curfew (awa eo rar karõke ñe jabdewõt eo ejelok an melim en jab bed inabõj) kin an wor ire. Ilo 115 kumi ko redik ibelakin ailiñ eo, Kwojkwoj eo ear ijjino ilo 5:45 p.m. Al ear tulok ilo 6:08 p.m., eo ear kakõllan jinoin Nisan 14 ran. Bread im wine eo rar leto-letak ilo 6:15 p.m. Ilo enañin aolep case ko jar in kajemlok eo kar walok ilo 6:30 p.m., im ro rar bed rar mõkaj im rol mokta jen curfew eo. Ak, ro rar bed ilo Kwojkwoj eo kar 3,154, ñe keiri ibben juõn laplap in 1,090 ri kwalok ro. Ilo juõn ailiñ ilo Africa, ire ear kõmmõn bwe ren jab maroñ etal ñõn Kingdom Hall eo, inem ruo elder ro rar bebe ñõn iion don ilo mweo imõn elder eo kein kajilu ñõn kõmmõn karõk ko ñõn kõmmõn kwojkwoj ko ilo kumi ko rediklok. Bwe ren tõbar mween, elder ro ruo rar aikwij kijone juõn jikur. Bõtab, kar wor ire ilo jikin eo, im sniper (ri bu) ro rar buuk jabdewõt armij ro rar kajeoñ in kijone jikur eo. Juõn elder ear ettõr ñõn ijo tu-rãjet ilo ejelok jabdewõt men ear walok. Eo kein karuo ke ear kijone jikur eo ear roñ juõn joot. Ear kãlok ñõn lõl im tõbalbal lok ñõn jikin eo ejelok uata ie ke joot ko rar kãlok ilõñ in bõran. Kwelok eo an elder ro ear wor tõbrak, im rar maroñ kabwe aikwij ko an congregation eo.
“Jen Ailiñ Otemjej, Ian Bwij Otemjej . . . im Konono Otemjej”
16. Ewi wãwen class in ri karejar eo etiljek im meletlet rar karõk bwe news eo emõn en jededlok ibwiljin kumi ko redik in kajin ko?
16 Ri jilek John ear ba bwe jar eo elap enaj kar itok “jen ailiñ otemjej, im ian bwij otemjej, im driloabjen otemjej, im konono otemjej.” (Revelation 7:9) Kin men in, Governing Body eo ear karõk bwe ren kõmmõn book ko ilo elõñlok kajin ko—ekoba kajin ko an bwij ko rettolok im kumi ko redik in armij. Ilo Mozambique, ñõn wanjoñok, tract eo Mour ilo Ainemõn ilo Juõn Lõl Ekãl kar kõmmõne ilo bar lalim kajin ko. Ilo Nicaragua, brochure eo Mõnõnõ Kin Mour Indio ion Lõl! kar kõmmõne ilo kajin Miskito eo—book eo moktata an Watch Tower Society ilo kajin eo. Ra eo an Watch Tower Society ear report bwe elõñ Miskito Indian ro rar bõk brochure eo ilo mõnõnõ kin air lo juõn men ilo kajin eo air make. Ilo 1997 Society eo ear kõmmõn book ko ilo bar 25 kajin ko.
17. Ta kumi in kajin eo rar jibañ ir ilo Korea, im ewi wãwen cassette in aluij ko ear lap an jibañ armij rein?
17 Ilo Korea rar jibañ juõn kumi in bar juõn kajin. Yiõ eo 1997 rar lo convention eo moktata ilo Korean sign language eo. Ewor 15 sign language congregation ko ilo Korea ibben 543 ri kwalok ro, ak 1,174 rar bed ilo convention eo, im 21 rar baptais. Ñõn jibañ ro rej jaroñroñ ro rejjab maroñ melele nan ko rej ba ak jeje, book ko rar kõmmõni ilo cassette in aluij ilo 13 sign language ko reoktak jen don. Ilo wãwen in, ro rejaroñroñ kar jibañ ir ñõn “konono” im meñe katak news eo emõn, kin tokjen ko remõn. Ilo United States, mokta kar aikwiji enañin lalim yiõ ko ñõn an juõn armij eo ej jaroñroñ wõnmanlok ñõn baptais. Kiõ, kin an wor elõñ cassette in aluij ko ilo American Sign Language, ñõn jet ro rej jaroñroñ, men in kar kadiklok e ñõn tarrin juõn yiõ.
‘Bedwõt ilo Chariot eo’
18. Elikin an kar iion Jehonadab, ta eo Jehu ear karõk ñõn an kõmmõne?
18 Ilo 905 B.C.E., elikin an Jehonadab koba ibben, Jehu ear etal in kokkure kabuñ eo ewan. Ear lelok juõn nan in kir ñõn aolep ri kabuñ ro an Baal: “Kokwojarjar juõn kwelok in kabuñ ñõn Baal.” Inem ear jilkinlok ilujen aolepen ene eo ñõn kõmmõn bwe en ejelok juõn ri kabuñ ñõn Baal en jako. Ke jar ko rar deloñ ilo temple eo elap an anij wan in, Jehu ear kõmmõn bwe en ejelok ian ro ri kabuñ ñõn Jehovah ear bed ijo. Eliktata, Jehu im jar in tarinae eo an rar man aolep ri kabuñ ñõn Baal. “Ein drein Jihu e ar kokkure Baal jen Israel.”—2 Kings 10:20-28.
19. Ilo lemnak kin ta eo ej bed iman armij, ta jitõb eo jen kwaloke, im jerbal et eo jen boub kake?
19 Rainin, ekajet eo eliktata kin aolep kabuñ ko rewan ej bed iman. Iumin tel eo an enjel ro Christian ro rej keañ kin news eo emõn ñõn armij otemjej, rejañ ir ñõn mijak Anij im ñõn kajenolok ir make jen kabuñ ko rewan. (Revelation 14:6-8; 18:2, 4) Ro ettã buru rej rejañ ir ñõn kõtaik ir make ñõn Ailiñ eo an Anij iumin King eo Jehovah ear kajijete, Jesus Christ. (Revelation 12:10) Ilo ien in ekairujruj, jej aikwij jab kõtlok bwe kijejeto eo ad en mõjnolok ñe jej jutak kin kabuñ eo emol.
20. Ta eo kwonaj bebe in kõmmõne ilo yiõ in jerbal eo ilo 1998?
20 Juõn ien, ke King David ear bed iumin ijjibed elap, ear jar: “Buruõ ebin O Anij, buruõ ebin; I naj al, aet I naj al im nebar. I naj al im nebar Yuk iben ro dri ailiñ ko.” (Psalm 57:7, 9) Jen bareinwõt bin ilo burued. Ilo 1997 yiõ in jerbal eo, jekdon elõñ abañ ko rar aikwij jelmaeki, juõn ainikien elap kin nebar ear walok liñtak ñõn aibujuij an Jehovah Anij. Juõn ainikien einlok wõt, ak meñe elaplok, ren roñ kake ilo yiõ in jerbal in. Im men in en mol jekdon ta eo Satan emaroñ kajeoñ in kõmmõni ñõn kabwer kij ak jumae kij. Ilo wãwen in, jenaj kwalok bwe burued e jimwe wõt ibben buruen Jehu Elaplok, Jesus Christ, im jenaj emmakit kin aolepen burued ñõn nan in kauwe eo ekakõrmol: “Komin mõnõnõ ilo Jeova, im lõñliñ, komeo dri’mõn im lamij kin lõñliñ, kom otemjej im ejime buruemi.”—Psalm 32:11.
Kwomaroñ ke Kamelele?
◻ Ta oktak ko rar walok ilo Israel ilo 905 B.C.E.?
◻ Wõn eo ej Jehu ilo ran kein, im ewi wãwen “jar eo elap” ear kwalok bwe ‘burueir e jime’ ibben buruen?
◻ Ta oran ko jen report in yiõ eo rej kalikar kijejeto eo me Ri Kennan ro an Jehovah rar kwaloke ilo 1997 yiõ in jerbal eo?
◻ Jekdon ta eo Satan emaroñ kõmmõne nae kij, ta jitõb eo jenaj kwaloke ilo 1998 yiõ in jerbal eo?
[Jaat ilo peij 18-21]
1997 SERVICE YEAR REPORT OF JEHOVAH’S WITNESSES WORLDWIDE
(Lale bok in)
[Pija eo ilo peij 15]
Oran eo elap kin ri kwelok ro ilo ien Kwojkwoj eo ej kwalok juõn kejatdikdik emõn kin laplok ko ilo ran ko rej itok
[Pija eo ilo peij 16]
Einwõt Jehonadab ear jurake Jehu, eindein “jar eo elap” rainin ej jurake Jehu eo Elaplok, Jesus Christ, im ri kabit ro jein im jatin