Jerbal Eo Am Enaj Ke Kajumej Kijeek?

“A jabrewõt armij en lale ekijkan ej kalek na ion [foundation eo].”​—1 DRI KORINT 3:10.

1. Ta kejatdikdik eo Christian ro retiljek rej lemnak kake ikijen ro remaroñ erom ri kalor ro?

RUO CHRISTIAN ri belele ro rej kalimjek nejiir ajiri ej kab lotak. Juõn ri kwalok kin Ailiñ eo ej lo kijerjer im itoklimo iturin ion mejen juõn ri katak Bible. Juõn Christian elder eo ej katakin jen iman ej lo ibwiljin ri kwelok ro juõn armij ekãl e itoklimo ej kijejeto ilo an kabukõt eon ko ilo Bible eo an. Ri karejar rein retiljek an Jehovah eobrak burueir kin kejatdikdik. Ekkã air lemnak, ‘Armij in enaj yokwe im karejar ñan Jehovah ke​—im tiljek wõt?’ Emol, juõn tokjen rot in ejjab make walok. Ej aikwij wõr jerbal.

2. Ewi wãwen ri jilek Paul ear kakememej Christian Ri Hebrew ro kin aorõkin jerbal in katakin, im men in en kamakit kij ñan kõmman etale et eo kin kij make?

² Juõn ri katakin ewejepedik bareinwõt, ri jilek Paul ear kalikar aorõkin jerbal in katakin im kõmman ri kalor ke ear je: “Bwe ke, kin ien eo, emõn komin dri kaki.” (Dri Hibru 5:12) Christian ro ear konono ñan ir rar kõmman jidik wõt wõnmanlok ko, ñe lemnak kin ewi toan air kar ri tõmak ro. Jen air bojak ñan katakin ro jet, rar aikwij kakememej ir kin irinekatak ko kin mol eo. Rainin, kij aolep aikwij etale jen ien ñan ien maroñ ko ad einwõt ri katakin ro im lale ewi wãwen jemaroñ kakõmõnmõnlok kabel ko ad. Ej jelet mour ko an armij. Ta eo jemaroñ kõmmane?

3. (a) Ñan ta eo ri jilek Paul ear keidi wãwen eo ñan kõmman juõn Christian ri kalor? (b) Einwõt Christian ri ekkal ro, ta jerammõn eo elap ewõr ibbed?

³ Ilo juõn wanjoñok, Paul ear keidi jerbal in kõmman ri kalor ñan wãwen kalek juõn em. Ear jino ilo an ba: “Bwe kim dri jerbal iben Anij: kom jikin kallip an Anij, kom men in kalek an Anij.” (1 Dri Korint 3:9) Inem jej bõk kunad ilo juõn jerbal in ekkal me ej kitibuj armij; jej jibañ in kalek ir ñan erom ri kalor ro an Christ. Jej kõmman einwõt ri jerbal ro mõttan Eo “e ar kalek men otemjej.” (Dri Hibru 3:4) Ej juõn jerammõn elap! Jen lale ewi wãwen nan in kakabilek ekakõrmol an Paul ñan Ri Korint ro emaroñ jibañ kij ñan kabel lok ilo jerbal eo ad. Jenaj lemnak kin “maroñ in katakin” eo ad.​—2 Timote 4:2.

Likit Foundation eo Ejimwe

4. (a) Kar ta jerbal eo an Paul ilo jerbal in ekkal in Christian? (b) Etke jemaroñ ba bwe Jesus im armij ro rar jokwe ilo Israel jimor rar jelã kin aorõkin foundation ko remõn?

⁴ Bwe juõn em en bin im etto an bed, ej aikwiji juõn foundation emõn. Kin men in, Paul ear je: “Ekar ñõn joij an Anij emwij letok ñõn iõ, einwõt dri kabel e meletlet, I ar likit foundes̃õn.” (1 Dri Korint 3:10) Ilo an kajerbal juõn wanjoñok einlok wõt in, Jesus Christ ear konono kin juõn em eo im ear ellã jen juõn lañ kinke ri ekkal eo ear kãlet juõn foundation ebin. (Luk 6:47-49) Jesus ear jelã kin aorõkin foundation ko remõn. Ear bed ke Jehovah ear kõmmane lal in.a (Jabõn Kennan Ko 8:29-31) Armij ro rar jokwe ilo Israel rar bareinwõt melele kin aorõkin foundation ko remõn. Moko im emõn bedbed ko air wõt rar maroñ ellã jen ibwijleplep ko im makitkit lal ko me jet ien rej walok ilo Palestine. Ak, ta kar foundation eo me Paul ear lemnak kake?

5. Wõn eo ej foundation eo an congregation in Christian, im ewi wãwen kar kanan kake men in?

⁵ Paul ear je: “Bwe ejelok armij e maroñ in likit bar juõn foundes̃õn jen eo emwij likite, eo Jisõs Kraist.” (1 Dri Korint 3:11) Ien in ejjab ien eo moktata kar keidi Jesus ñan juõn foundation. Ilo mol, Aiseia 28:16 ear kanan: “Ein drein Iroij Jeova ej ba, Lo, Ij likit ilo Zaion juõn dreka ñõn loñtõk dreka emwij melejoñwe, dreka in dremõn im e aurõk ñõn loñtõk ebin.” Jehovah ear karõk jen etto bwe Nejin en erom foundation eo an congregation in Christian.​—Sam 118:22; Dri Epesõs 2:19-22; 1 Piter 2:4-6.

6. Ewi wãwen Paul ear likit foundation eo ejimwe ilo Christian ro ilo Korint?

⁶ Ta foundation eo ñan Christian ro kajjojo? Einwõt Paul ear ba, ejelok bar juõn foundation ñan juõn Christian emol ak eo kar likite ilo Nan in Anij​—Jesus Christ. Emol Paul ear likit juõn foundation einwõt in. Ilo Korint, ijo ear lap air kautiej lemnak ko an armij ie, ear jab bukõt an kabwilõñ armij kin meletlet in lal. Jen an eindein, Paul ear kwalok “Christ eo emwij dilaik e,” eo ri ailiñ ko rar kajekdone einwõt e “bwebwe.” (1 Korint 1:23, New World Translation) Paul ear katakin bwe Jesus ej armij eo iolaplapin karõk ko an Jehovah.​—2 Dri Korint 1:20; Dri Kolosse 2:2, 3.

7. Ta eo jemaroñ katak jen an Paul jitõñlok ñan e make einwõt “dri kabel e meletlet”?

⁷ Paul ear kwalok bwe ear kõmman jerbal in katakin “einwõt dri kabel e meletlet.” Nan kein ear jab nan in kemjãje. Ear baj kamole men in letok eo emmanmõn Jehovah ear lelok ñan e​—jerbal in kõmman karõk ak tel. (1 Dri Korint 12:28) Emol, kij rainin ejelok men in letok ko rekabwilõñlõñ me kar liloki ñan Christian ro ilo ebeben eo kein kajuõn. Im jemaroñ jab watõk kij make einwõt ri katakin ro rekabel. Ak ilo juõn wãwen eaorõk, jej. Lemnak: Jehovah ej letok ñan kij jitõb kwojarjar eo an ñan jibañ kij. (Keidi Luk 12:11, 12.) Im ibbed yokwe eo an Jehovah im juõn jelãlokjen kin irinekatak ko kin Nan eo an. Men kein emol rej men in letok ko remmanmõn jemaroñ kajerbali ñan katakin ro jet. Jen bebe ibbed ñan kajerbali ñan likit foundation eo ekkar.

8. Ewi wãwen jej likit Christ einwõt juõn foundation ilo ro remaroñ erom ri kalor ro?

⁸ Ñe jej likit Christ einwõt foundation eo, jejjab kwalok kin e einwõt juõn niñniñ ilo juõn manger, im jab joñan wõt juõn ibben Jehovah ilo katak in Trinity (jilu anij ilo juõn) eo. Jab, lemnak rot kein ejelok bedbediir ilo Bible rej ejaake juõn foundation kin Christian ro rewan. Jen men in, jej katakin bwe ear emaan eo elaptata ear mour, ear lelok mour eo an ewãppen ñan tokjen eo ad, im bwe rainin ej Kiiñ eo ijjitõñ in Jehovah eo ej iroij ilañ. (Dri Rom 5:8; Reveles̃õn 11:15) Jej bareinwõt jibadõk ad kamakit ri katak ro ad ñan etetal ilo buñten neen Jesus im ñan anõk kadkad ko kadkadin. (1 Piter 2:21) Jekõnan bwe ren lukkun emmakit kin kijejeto eo an Jesus kin jerbal in kwalok nan, yokwe eo an kin ro rettã im rej bed iumin ijjibed ko, tiriamo eo ear kwaloke ñan ri jerawiwi ro rej buromõj kin rueir make, im beran eo ekajur ear kwalok ke ear jelmae melejoñ ko. Emol, Jesus ej foundation eo emõntata. Ak ta eo ej itok jeltokin?

Ekkal Kin Kõbwebweien ko Rejimwe

9. Meñe Paul elaptata ear kõmman jerbal eo ñan likit foundation eo, ta eo ear inebata kake kin ro rar bõk mol eo kin an kar katakin ir?

⁹ Paul ear je: “A elañe jabrewõt armij ej kalek ion foundes̃õn in, gold, silver, dreka aurõk, wijki, ujoj emõra, kãn; Jerbal an jabrewõt armij e naj alikar: bwe ran eo e naj kwalok e, bwe e naj walok ilo kijeek; im kijeek en e naj melejoñ jerbal an jabrewõt armij ie ein.” (1 Dri Korint 3:12, 13) Kar ta melelen nan ko an Paul? Lemnak kin wãwen ko ilikin men in. Jerbal eo an Paul elaptata kar ñan likit foundation eo. Ilo trip in missionary ko an, ear ito-itak jen jikin kwelok ñan jikin kwelok, im kwalok nan ñan elõñ armij ro rejañin kar roñ kin Christ. (Dri Rom 15:20) Ke armij ro ear katakin ir rar bõk mol eo, ear ejaak elõñ congregation ko. Emũlal an kar Paul lemnak kin rein retiljek. (2 Dri Korint 11:28, 29) Bõtab, jerbal eo an ear aikwij an emmakit wõt. Inem elikin an jolok 18 alliñ ko ñan likit foundation eo ilo Korint, ear ilok ñan jikin kwelok ko jet ñan kwalok nan ie. Meñe eindein, emol an kar itoklimo kin ewi wãwen ro jet rar bar lale jerbal eo ear kõmmane ijo.​—Jerbal 18:8-11; 1 Dri Korint 3:6.

10, 11. (a) Ewi wãwen Paul ear keidi kõbwebweien em ko reoktak jen don? (b) Kain em rot remaroñ kar bed ilo Korint eo etto? (c) Kain em rot rar maroñ joor jen juõn kijeek, im ta eo ro rar kõmman jerbal in kõmman Christian ri kalor ro rar maroñ katak jen men in?

¹⁰ Einwõt ej alikar bwe jet ro rar kalek ion foundation eo me Paul ear likiti ilo Korint rar jab kõmman juõn jerbal emõn. Ñan kajedmatmat abañ eo, Paul ear keidi ruo kain kõbwebweien ekkal ko: gold, silver, im dekã aorõk ilo rãjet; wijki, ujoj emõra, im kãn ilo ijo tu-rãjet. Remaroñ kalek juõn em jen kõbwebweien ko remõn, bin, im ejjab maroñ bwil; ak remaroñ kajutak ilo mõkaj juõn em kõmman jen kõbwebweien ko rebidodo, jadkaju, im emõkaj air bwil. Ilo juõn jikin kwelok elap einwõt Korint ejelok bere ekar wõr em ko kõmman jen kõbwebweien kein jimor. Kar wõr temple ko relap kõmman jen block in dekã ko rekilep im elap wõnair, bõlen kar kainõknõke kin gold im silver.b Em kein rebin bõlen rar jutak liñlok ilo aibujuij ilõñin em aj ko, ajjuur ko, im mõn wia ko redik kõmman jen alal im aj.

¹¹ Ta eo enaj walok ñan em kein ñe ej itok juõn kijeek? Uak eo ear alikar ilo ran ko an Paul einwõt ej alikar ilo ran kein ad. Ilo mol, Roman General eo Mummius ear anjo ion jikin kwelok in Korint im tile ilo 146 B.C.E. Elõñ em ko kõmman jen alal, ujoj emõrã, ak aj emol rar lukkun jorrãn. Ta kin em ko kõmman jen dekã ko rebin, im kainõknõke kin silver im gold? Ejelok bere, em kein rar bed wõt. Ri katak ro an Paul remaroñ kar kijone mõkein aolep ran​—em dekã ko rar ellã jen jorrãn ko me rar kokkure em ko rebidodo ituriir. Inem, elap an alikar wãwen eo Paul ear kalikar point eo an! Ñe jej katakin, jej aikwij watõk kij make einwõt ri ekkal ro. Je kõnan kajerbal kõbwebweien ko remõntata im enaj to air bed. Ilo wãwen in jerbal eo ad enaj to an bed. Ta kõbwebweien kein, im etke jej aikwij kajerbali?

Jerbal Eo Am Enaj Kajumej Kijeek eo ke?

12. Ilo wãwen et ko jet Christian ro ilo Korint rar kõmman juõn jerbal in kalek e jabde?

¹² Alikar, Paul ear eñjake bwe jet Christian ro ilo Korint ear jab emõn jerbal in ekkal eo air. Ta eo ear nana? Einwõt eon ko jet rej kwalok, congregation eo ear obrak kin abañ kin jitõb in jebel, kautiej eo kin armij meñe ear maroñ kokkure burukuk eo an congregation eo. Jet rar ba, “Ña dron Paul,” ak ro jet rar ba, “Ña dron Apollõs.” Alikar jet ear le jen joñan air lemnak kin meletlet eo air. Tokjen eo, ilo ejelok bwilõñ, ear walok juõn jitõb in lemnak in kanniek, niñniñ ilo jitõb, im “junmar im akwail” ear jededlok. (1 Dri Korint 1:12; 3:1-4, 18) Lemnak kein kar walok ilo jerbal in katakin eo rar kõmmane ilo congregation eo im ilo jerbal in kwalok nan. Tokjen men in jerbal in kõmman ri kalor eo air ear jabde, einwõt jerbal in ekkal eo ñe rej kajerbal kõbwebweien ko renana. Ejamin le jen “kijeek” eo. Ta kijeek eo Paul ear konono kake?

13. Kijeek eo ilo wanjoñok eo an Paul ear jutak kin ta, im ta eo Christian ro otemjej rej aikwij jelã kake?

¹³ Ewõr juõn kijeek kij aolep jej aikwij jelmaiki​—melejoñ ko kin tõmak eo ad. (Jon 15:20; Jemes 1:2, 3) Christian ro ilo Korint rar aikwij jelã, einwõt jej aikwij jelã rainin, bwe aolep ro jej katakin ir mol eo naj bõk melejoñ. Elañe ejjab emõn ad katakin, emaroñ wõr tokjen ko rekaburomõjmõj. Paul ear kakkõl: “Elañe jerbal an jabrewõt armij, im e ar kalek na ion, e naj berwõt, e naj bõk jenekjij. Elañe jerbal an juõn armij e naj urur, e naj jorran: a naj lomoren e; a einwõt kin kijeek.”c​—1 Dri Korint 3:14, 15.

14. (a) Ewi wãwen Christian ri kalor ro remaroñ “jorran,” ak ewi wãwen remaroñ bõk lomor einwõt kin kijeek? (b) Ewi wãwen jemaroñ kadiklok ad maroñ jorrãn?

¹⁴ Emol rej nan ko reddo! Emaroñ lap an kõmetak ñe juõn armij ej kate e ñan jibañ bar juõn ñan erom juõn ri kalor, im tokelik lo an ebwer iumin juõn men in kabo ak matõrtõr im tokelik ilok jen mol eo. Paul ej kamole men in ke ear ba bwe ilo wãwen rot in jenaj jorrãn. Men eo jej iione joñan an kõmetak ej kwalok e einwõt lomor eo ej itok “kin kijeek”​—einwõt juõn emaan eo ear luji men otemjej ibben ilo juõn kijeek im e wõt ear maroñ joor. Ñan kij, ewi wãwen jemaroñ kadiklok ad maroñ jorrãn? Kalek kin kõbwebweien ko rebin! Elañe jej katakin ri katak ro ad ilo juõn wãwen ej tõbar burueir, ñan kamakit ir ñan kaorõk kadkad ko kadkadin Christian einwõt meletlet, lolokjen, mijak Jehovah, im tõmak eo emol, inem jej kalek kin kõbwebweien ko rebin im rejjab maroñ bwil. (Sam 19:9, 10; Jabõn Kennan Ko 3:13-15; 1 Piter 1:6, 7) Ro rej kaddek kadkad kein renaj wõnmanlok in kõmanmõn ankil an Anij; ibbeir ej kejatdikdik eo emol ñan mour indio. (1 Jon 2:17) Ak, ewi wãwen jemaroñ jerbale wanjoñok in an Paul? Lemnak kin jet wanjoñok ko.

15. Ilo wãwen et ko jemaroñ kõmman bwe jen bõprae ad kõmman jerbal in ekkal e jabde ikijen ri katak Bible ro ad?

¹⁵ Ñe jej katakin ri katak Bible ro, jen jab kautiej armij ilõñin Jehovah Anij. Mejenkajjik eo ad ejjab ñan katakin ir ñan watõk kij einwõt unjen meletlet. Jekõnan bwe ren reilok ñan Jehovah, Nan eo an, im dolul eo an ñan bõk tel. Ñan jemlok in, jejjab kwalok lemnak ko ad make ñe jej uak kajitõk ko air. Jen men in, jej katakin ir ñan bukõt uak ko, ilo air kajerbal Bible eo im book ko me “dri korijer e tiljek im meletlet” ear litoki. (Matu 24:45-47) Kin un ko einlok wõt, jej kejbãrok bwe jen jab kamo kin ri katak Bible ro ad. Jen ad illu ñe ro jet rej kwalok air itoklimo ilo ir, jen rejañ ri katak ro bwe ren “laplok” ilo yokwe eo air, ñan jelã kajjen im kaorõk joñan eo remaroñ ilo congregation eo.​—2 Dri Korint 6:12, 13.

16. Ewi wãwen elder ro remaroñ kalek kin kõbwebweien ko rejjab maroñ bwil?

¹⁶ Christian elder ro bareinwõt rej kõmman juõn jerbal eaorõk ilo kalek ri kalor ro. Ñe rej katakin iman congregation eo, rej jibadõk air kalek kin kõbwebweien ko rejjab maroñ bwil. Maroñ in katakin eo air, iminene ko, im kadkad ko kadkadiir remaroñ oktak jen don, ak rejjab kajerbal oktak kein ñan kareel armij ñan ir. (Keidi Jerbal 20:29, 30.) Jejjab jelã etke jet ilo Korint rar ba, “Ña dron Paul” ak, “Ña dron Apollõs.” Ak jemaroñ liki bwe elder rein retiljek rar jab kowõnmanlok jitõb in jebel rot in. Paul ear jab utiej buru kin nan rot kein; ear lap an jumae ir. (1 Dri Korint 3:5-7) Eindein rainin, elder ro rej kememej bwe rej shepherde “bwijin Anij.” (1 Piter 5:2) Ejjab an jabdewõt armij. Inem elder ro rej jutak bin nae jabdewõt kõnan an juõn emaan ñan iroij ion bwij eo ak kumi in elder ro. Ñe elder ro rej emmakit kin juõn kõnan ilo ettã buru ñan karejar ñan congregation eo, tõbar buruen armij, im ñan jibañ ro einwõt sheep ñan karejar ñan Jehovah kin aolepen burueir, rej kalek kin kõbwebweien ko rejjab maroñ bwil.

17. Ewi wãwen Christian ro jemen im jinen rej kajeoñ in kalek kin kõbwebweien ko rejjab maroñ bwil?

¹⁷ Christian ro jemen im jinen rej bareinwõt itoklimo kin men in. Elap air kõnan lo ro nejiir mour ñan indio! Eñin unin rej kate ir ñan “katakin” ro nejiir bwe nan in kakabilek ko ilo Nan in Anij en deloñ ilo burueir. (Duteronomi 6:6, 7) Rekõnan bwe ro nejiir ren jelã mol eo, jab einwõt juõn lajrak in kien ko ak mol ko, ak einwõt juõn wãwen mour ewõr jinekjej ie im emõnõnõ. (1 Timote 1:11) Ñan kalek ro nejiir ñan erom ri kalor ro retiljek an Christ, ro jemen im jinen rej yokwe rej kate ir ñan kajerbal kõbwebweien ko rejjab maroñ bwil. Rej jerbal ilo meanwõd ibben ro nejiir, im jibañ ir ñan jolok kadkad ko me Jehovah ej dike im kaddek kadkad ko ej yokwe.​—Dri Galetia 5:22, 23.

Wõn eo Ej Bõk Eddon?

18. Ñe juõn ri kalor ej karmijete katak emõn, etke emaroñ jab ruõn ro rej kajeoñ in katakin im kamineneik e?

¹⁸ Katak in ej bõkmantak juõn kajitõk eaorõk. Elañe juõn armij eo jar kate kij ñan jibañ e ej ilok jen mol eo, ej melelen ke bwe jar likjap einwõt ri kaki ro​—bwe jar kajerbal kõbwebweien ko renana? Ejjab aikwij. Nan ko an Paul ej kakememej kij bwe ej juõn eddo elap ñan bõk kunad ilo jerbal in kalek ri kalor ro. Jekõnan kõmman joñan wõt ad maroñ ñan kalek ilo juõn wãwen emõn. Ak Nan in Anij ejjab ba bwe jej aikwij inek aolepen eddo eo im bwe jej bõk ruõn ñe ro jekõnan jibañ ir rej ilok jen mol eo. Jerbal eo ad einwõt ri ekkal ro ej kitibuj men ko jet. Ñan wanjoñok, lale ta eo Paul ear ba ikijen ri kaki eo ear kõmman juõn jerbal enana ilo jerbal in ekkal in: “E naj jorran, a naj lomoren e.” (1 Dri Korint 3:15) Elañe ri kaki in emaroñ bõk lomor​—ak kadkad in Christian ear kajeoñ in kaleke ilo ri katak eo an rej pijaiki einwõt ear “urur” ilo juõn melejoñ ekakijeekek—ta eo jej aikwij kajemlok? Bwe Jehovah ej kwalok bwe ri katak eo ej bõk eddon bebe ko an make elañe enaj tiljek ak jab.

19. Ta eo jenaj etale ilo katak in tok?

¹⁹ Eddo eo an kajjojo armij ej juõn men elap an aorõk. Ej jelet kij kajjojo. Ilo jejjet, ta eo Bible ej katakin kin men in? Katak in tok enaj etale kake.

[Kamelele ko itulal]

Ewi Wãwen Kwonaj Uak?

◻ Ta eo ej “foundation” eo an juõn Christian emol, im ewi wãwen emaroñ likiti?

◻ Ta eo jemaroñ katak jen kõbwebweien em ko reoktak jen don?

◻ “Kijeek” eo ej jutak kin ta, im ewi wãwen emaroñ kõmman bwe jet ren “jorran”?

◻ Ewi wãwen ri katakin Bible ro, elder ro, im ro jemen im jinen remaroñ kalek kin kõbwebweien ko rejjab maroñ bwil?

[Pija eo ilo peij 22]

Ilo elõñ jikin kwelok ko etto, em dekã ko rejjab maroñ bwil rar jutak ibben em ko rebidodolok