Etetal Ibben Anij​—Buñten Nee Ko Jinointata

“Komin druaklok ñõn Anij, im E naj druakwoj ñõn kom.”​—JEMES 4:8.

1, 2. Etke kwoj ba bwe ej juõn jerammõn elap ñan karejar ñan Jehovah?

EMAAN eo ear eñtan ilo kalbuj iumin elõñ yiõ ko. Inem kar kir e ñan walok iman iroij in ene eo. Oktak ko rar walok ilo mõkaj. Ilo idiñ, ri kalbuj eo ear jino jerbal ñan iroij eo eutiejtata ion lal ilo ien eo. Kar ri kalbuj eo mokta kar likit e ilo juõn jerbal eo ear bõk elap eddo im kautiej. Joseph​—emaan eo ilo juõn ien rar lukwoje neen kin kein lukluk ko​—kiõ ear etetal ibben juõn king!​—Jenesis 41:14, 39-43; Sam 105:17, 18.

² Rainin, armij ewõr juõn ien emõn ñan air karejar ñan juõn armij eutiejlok jen Pharaoh in Egypt. Eo Ekajur Bõtata ijoko otemjej ej kir kij aolep ñan karejar ñan e. Ej juõn jerammõn elap an kabwilõñlõñ ñan ad kõmmane im ñan kaddek juõn kõtan ebak ibben Jehovah, Anij Laplap eo! Ilo Jeje ko, kajur im emõn bõtata im bareinwõt inemõn, aibujuij, im joij rej bed ibben. (Ezekiel 1:26-28, New World Translation; Reveles̃õn 4:1-3) Yokwe ej jelet aolep makitkit ko an. (1 Jon 4:8) Anij eban riap. (Bwinbwin 23:19) Jehovah ejamin kaburomõj ro rej tiljek ñan e. (Sam 18:25) Ilo ad bokake men in aikwij ko an rewãnik, jemaroñ lañliñ kin mour ko rekamõnõnõ im ewõr meleleir kiõ, im kin mour indio ilo ran ko renaj itok. (Jon 17:3) Ejelok juõn iroij ion lal emaroñ tilmaake jabdewõt men me emaroñ keidi ñan jerammõn rot kein.

3. Ilo wãwen et eo Noah ear ‘etetal iben Anij’?

³ Elõñ yiõ ko remotlok, ri patriarch Noah ear beek ñan mour ekkar ñan ankil im karõk ko an Anij. Kin e, Bible ej ba: “Noa e dru wãnik im e jime ilo ebeben eo an: im Noa ej etetal iben Anij.” (Jenesis 6:9) Emol, Noah ear jab lukkun etetal ibben Jehovah, bwe ejelok armij “e ar lo Anij jabrewõt ien.” (Jon 1:18) Jen an eindein, Noah ear etetal ibben Anij ilo an kõmman ta eo Anij ear jiroñ e bwe en kõmmane. Kin an Noah kajerbal mour eo an ñan kõmanmõn ankil an Jehovah, ear lañliñ kin juõn kõtan emãnãn im ebak ibben Anij Laplap. Einwõt Noah, elõñ million armij ro rainin rej ‘etetal iben Anij’ ilo air mour ekkar ñan nan in kakabilek im nan in kaiñi ko an Jehovah. Ewi wãwen juõn armij ej ijjino juõn ial rot in?

Jelãlokjen eo Ejimwe Eaorõk

4. Ewi wãwen Jehovah ej katakin armij ro an?

⁴ Ñan etetal ibben Jehovah, jej aikwij jelã kajjen mokta. Ri kanan eo Isaiah ear kanan: “Im ilo ran ko eliktata, tol in imõn Jeova naj kabin e ilo jabõn tol ko, im naj koutiej e ilõñin tol ko redrik; im ro dri ailiñ ko re naj ibweptok ñõn e. Im elõñ dri ailiñ re naj ilen ba, Komin itok, im jen wõnliñlok ñõn tol an Jeova, ñõn imõn Anij an Jekob; im E naj katakin kij kin ial ko An, im je naj etetal ilo ial ko An: bwe jen Zaion kien eo e naj drioijlok, im nan an Jeova jen Jerusalem.” (Aiseia 2:2, 3) Aet, jemaroñ liki bwe Jehovah enaj katakin aolep ro rej bukõt ñan etetal ilo ial ko an. Jehovah ear letok Nan eo an, Bible eo, im ej jibañ kij ñan melele kake. Juõn wãwen ej kõmmane men in ej ikijen “dri korijer e tiljek im meletlet.” (Matu 24:45-47) Jehovah ej kajerbal ‘dri korijer in e tiljek’ ñan letok nan in kibel ko ilo jitõb ikijen book ko rej wawa ion Bible, kwelok ko an Christian, im karõk in kõmman Bible study ilo ejelok wõnãn. Anij ej bareinwõt jibañ armij ro an ñan melele Nan eo an ikijen jitõb kwojarjar eo an.​—1 Dri Korint 2:10-16.

5. Etke mol eo ilo Jeje ko eaorõk?

⁵ Meñe jejjab kõllã money kin mol ko ilo Bible, ej aorõk. Ñe jej katak Nan in Anij, jej katak kin Anij make​—etan, kadkad ko kadkadin, karõk eo an, im wãwen eo ej jerbal ibben armij. Jej bareinwõt katak kin uak ko ñan kajitõk ko kin mour: Etke jej bed? Etke Anij ej kõtlok eñtan? Ta eo ej bed ilo ran ko renaj itok? Etke jej rittolok im mij? Ewõr ke mour elikin mij? Bareinwõt, jej katak kin ta eo ej ankil an Anij ñan kij, melelen, ewi wãwen jej aikwij etetal bwe jen kabuñburuen. Jej katak bwe men in aikwij ko an rekõmmanwa im elap an wõr tokjeir ñe jej lor i. Elañe ejelok nan in kibel ko an Anij, jejamin melele men rot kein.

6. Ta ial eo jelãlokjen eo ejimwe ilo Bible ej kamaroñ kij ñan jibadõke?

⁶ Mol eo ilo Bible ekajur im ej kamakit kij ñan kõmman oktak ko ilo ad mour. (Dri Hibru 4:12) Mokta jen bõk jelãlokjen jen Jeje ko, jaar maroñ etetal wõt ekkar ñan “ial in lõl in.” (Dri Epesõs 2:2) Ak jelãlokjen eo ejejjet kin Nan in Anij ej kwalok juõn ial eoktak ñan kij bwe wãwen ad “etetal en tellokõn Iroij im kabuñburuen ilo men otemjej.” (Dri Kolosse 1:10) Ej juõn lañliñ elap ñan bõk buñten nee ko moktata ilo ad etetal ibben Jehovah, Eo elaptata ilo aolepen lañ im lal!​—Luk 11:28.

Buñten Nee ko Ruo Raorõk​—Wujleplok im Baptais

7. Ñe jej katak Nan in Anij, ta mol eo ikijen iroij eo an armij enaj alikar?

⁷ Ñe melele eo ad kin Bible eo ej laplok, jenaj jino etale makitkit ko an armij im mour ko ad make ekkar ñan meram eo ilo jitõb an Nan in Anij. Juõn mol eaorõk ej alikarlok. Elõñ yiõ ko remotlok ri kanan eo Jeremiah ear kwalok kin mol in, ear je: “Emõn aõ jelã, O Jehovah, bwe ñan armij ial eo an ejjab an. Ejjab an armij ñan tel buñten neen.” (Jeremiah 10:23, NW) Armij ro​—kij aolep​—jej aikwiji nan in tel an Anij.

8. (a) Ta eo ej kamakit armij ñan wujleplok air mour ñan Anij? (b) Ta eo ej wujleplok in Christian?

⁸ Melele kin mol in eaorõk ej kamakit kij ñan bukõt tel eo jen Jehovah. Im yokwe Anij ej kamakit kij ñan wujleplok ad mour ñan e. Ñan wujleplok ad mour ñan Anij ej melelen ñan kebak e ilo jar im kallimur ñan kajerbal mour eo ad ñan karejar ñan e im ñan etetal ilo ial ko an ilo tiljek. Ilo ad kõmman men in, jenaj lor joñok eo an Jesus, eo ear lelok e make ñan Jehovah kin bebe eo ebin ñan kajejjet ankil an ekwojarjar.​—Dri Hibru 10:7.

9. Etke armij ro kajjojo rej wujleplok air mour ñan Jehovah?

⁹ Jehovah Anij ejjab jibed ak kamijak armij ñan wujleplok air mour ñan e. (Keidi 2 Dri Korint 9:7.) Bareinwõt, Anij ejjab kõtmene bwe jabdewõt armij en wujleplok an mour ñan E kin wõt juõn eñjake ej jadkaju. Mokta jen emaroñ baptais, juõn armij ej aikwij juõn ri kalor kadede, im ej aikwij kate e ñan an bõk jelãlokjen. (Matu 28:19, 20) Paul ear eowor ñan ro emwij air baptais bwe ren ‘lelok enbwiniir men in jurtak emour, ekwojarjar, men in kabuñburuen Anij, juõn jerbal ekwojarjar ekkar ñan lolãtãt eo air.’ (Romans 12:1, NW) Ilo ejja wãwen in wõt jej kajerbal lolãtãt eo ad ñe jej wujleplok ad mour ñan Jehovah Anij. Elikin ad katak kin ta eo ej kitibuj im emwij ad lukkun etale men eo, ilo mõnõnõ im lañliñ jej wujleplok ad mour ñan Anij.​—Sam 110:3.

10. Ewi wãwen wujleplok ej ekkejel ñan baptais?

¹⁰ Elikin ad kebak Anij ilo jar ñan kwalok bebe eo ad ñan etetal ilo ial ko an, jej bõk buñten nee eo juõn. Jej kalikar wujleplok eo ad ilobwilij ilo ad baptais ilo den. Men in ej kalikar ilobwilij bwe emwij ad kallimur ñan kõmanmõn ankil an Anij. Ilo jinoin jerbal in kwalok nan eo an ion lal, John ear baptaisi Jesus, ilo wãwen in ej likit juõn joñok ñan kij. (Matu 3:13-17) Tokelik, Jesus ear kakien ri kalor ro an ñan kõmman ri kalor ro im baptais ir. Kin men in, wujleplok im baptais rej buñten nee ko raorõk ñan jabdewõt ro rekõnan etetal ibben Jehovah.

11, 12. (a) Ewi wãwen jemaroñ keidi baptais ñan mare? (b) Ta wanjoñok eo einlok wõt jemaroñ kõmmane kin kõtan eo ad ibben Jehovah im eo ej walok ikõtan leo im lio ri belele?

¹¹ Ad erom juõn ri kalor eo emwij wujleplok an mour im baptais ej einlok wõt mare. Ilo elõñ ailiñ ko, elõñ buñten nee ko rej kõmmani mokta jen ran in mare eo. Juõn maan im kõrã rej iion don, jelã kajjen don, im jino yokwe don. Jeltokin rej kõmman kallimur eo ñan mare. Mare eo ej kwalok ilobwilij ta eo erro rar make bebe kake​—ñan belele inem mour ibben don einwõt leo im lio ri belele. Mare eo ej kalikar ilobwilij jinoin kõtan eo ejej uan. Ran eo ej kakõlleik jinoin belele eo. Ejja wãwen in wõt, baptais ej kakõlleik jinoin juõn mour emwij ajeloke ñan etetal ilo juõn kõtan emwij wujleplok ibben Jehovah.

¹² Lemnak kin bar juõn wanjoñok einlok in wõt. Elikin ran in mare eo, yokwe eo ikõtan leo im lio ri belele ej aikwij mũlallok im wãppenlok. Ñan ebake don, ri belele ro jimor rej aikwij kate ir ilo ejelok kibbon ñan kejbãrok im kakajurlok kõtan belele eo air. Meñe jejjab deloñ ilo juõn kõtan belele ibben Anij, elikin ad baptais jej aikwij jerbal ñan kejbãrok juõn kõtan ebak ibben Jehovah. Ej lo im kamolol kin jibadbad ko ad ñan kõmanmõn ankil an im ej ruaktok ñan kij. “Komin druaklok ñõn Anij,” ri kalor eo James ear je, “im E naj druakwoj ñõn kom.”​—Jemes 4:8.

Etetal ilo Jenkwon Nee ko Neen Jesus

13. Ilo ad etetal ibben Anij, joñok eo an wõn eo jemaroñ lore?

¹³ Ñan etetal ibben Jehovah, jej aikwij lor joñok eo Jesus Christ ear likiti. Ri jilek Peter ear je: “Im emwij kir kom ñõn men in: bwe Kraist e ar iñtan kin kom, im likit joñok ñõn kom, bwe komin anõke jenkwõn ne ko neen.” (1 Piter 2:21) Kinke Jesus ear wãppen, im kij jejjab wãppen, jejjab maroñ lor wanjoñok eo ear likiti ilo ejelok jidik irlok. Mekarta, Jehovah ej kõtmene ñan ad kõmman joñan wõt ad maroñ. Jen etale lalem wãwen ko ilo mour im jerbal eo an Jesus me Christian ro emwij air wujleplok air mour rej aikwij kate ir ñan kajeoñe.

14. Ta eo ej koba ilo ad jelã Nan in Anij?

¹⁴ Ear wõr ibben Jesus jelãlokjen eo ejimwe im eyu kin Nan in Anij. Ilo jerbal in kwalok nan eo an, emakijkij an Jesus elij nan ko jen Jeje ko ilo Hebrew. (Luk 4:4, 8) Emol, ri tel in kabuñ ko renana ilo ien eo rar bareinwõt elij nan ko jen Jeje ko. (Matu 22:23, 24) Oktak eo kar bwe Jesus ear melele ta melelen Jeje ko, im ear jerbali ilo mour eo an. Ear jelã jab rule ko wõt kin Kien eo ak bareinwõt jitõb ak kajur eo ear bed ilikin (wãwen eo ñan jerbale). Ñe jej lor wanjoñok eo an Christ, kij bareinwõt jej aikwij kate kij ñan melele Nan eo an Anij, jelã aorõkin, ak jitõb eo, ilikin. Ilo ad kõmmane, jemaroñ erom ri jerbal ro Anij ej buñburuen kake ro im ‘ejimewõt [air] katakin kin nan in mol.’​—2 Timote 2:15.

15. Ewi wãwen Jesus ear likit juõn joñok emõn ikijen konono kin Anij?

¹⁵ Christ Jesus ear konono ibben ro jet kin Jemen ilañ. Jesus ear jab debij jelãlokjen eo an kin Nan in Anij ñan e wõt. Meñe ri kijirãt ro an rar ãñiñin e einwõt “Dri Kaki,” kinke ilo aolep jikin ko ear etal ie ear konono ibben ro jet kin Jehovah im karõk ko An. (Matu 12:38) Jesus ear kwalok nan ilobwilij ilo jikin ko iturin temple eo, ilo jikin kabuñ ko, ilo jikin kwelok ko, im ilo bukwon ko. (Mark 1:39; Luk 8:1; Jon 18:20) Ear katakin ilo tiriamokake im joij, im kwalok yokwe ñan ro ear jibañ ir. (Matu 4:23) Ro rar lor wanjoñok eo an Jesus rar bareinwõt lo elõñ jikin ko im wãwen ko ñan katakin ro jet kin Jehovah Anij im karõk ko an raibujuij.

16. Ewi joñan an kar Jesus ebake ro mõttan in ri kabuñ ro an Jehovah?

¹⁶ Jesus ear eñjake juõn bed ebak ibben ro jet rar kabuñ ñan Jehovah. Juõn ien ke Jesus ear konono ibben jar ko, jinen im lõmaro jatin rejjab tõmak rar itok in konono ibben. Bwebwenato eo ilo Bible ej ba: “Im juõn ej ba ñõn E, Lo, jinõm im ro jãtõm rej jutõk inabij, im rej bukot bwe ren konono ñõn Yuk. A E uak im ba ñõn eo ej konono, Wõn e jino? im wõn ro jãtiõ? Im Ej erlokwe pein ñõn ro dri kaloran, im ba, Lo jinõ im ro jãtiõ! Bwe jabrewõt eo e naj kõmõnmõn ankil an Jema ej ber i lõñ, e in ej jãtiõ man, im jãtiõ kõra, im jinõ.” (Matu 12:47-50) Men in ejjab melelen bwe Jesus ear karmijete family eo an, bwe men ko rar walok tokelik rej kamol bwe ear jab. (Jon 19:25-27) Ak, bwebwenato in ej kalikar yokwe eo ear bed ibben Jesus kin ri tõmak ro mõttan. Eindein lok wõt rainin, ro rej etetal ibben Anij rej bukõt air koba ibben ri karejar ro jet an Jehovah im kalaplok air yokwe ir.​—1 Piter 4:8.

17. Ewi kar eñjake eo an Jesus ikijen an kõmanmõn ankil an Jemen ilañ, im ewi wãwen men in en kar jelet kij?

¹⁷ Ilo an kõmanmõn ankil an Anij, Jesus ear kwalok yokwe ñan Jemen ilañ. Jesus ear bokake Jehovah ilo men otemjej. Ear ba: “Kijiõ bwe In kõmõnmõn ankil an Eo e ar jilkintok Iõ, im bwe In kamwijlok jerbal eo An.” (Jon 4:34) Christ ear bareinwõt ba: “Ien otemjej Ij kõmõn men ko rej kabuñburuen [Anij].” (Jon 8:29) Joñan an Jesus yokwe Jemen ilañ “Ear make kõtãik E, im Ear bokake ñan mij, aet, mij eo ion juõn alal in eñtan.” (Philippians 2:8, NW) Inem, Jehovah ej kajerammõn Jesus, im kautiej e ñan juõn jikin ej bõk maroñ im nebar im ej kein karuo jen Jehovah wõt. (Dri Pilippai 2:9-11) Einwõt Jesus, jej kwalok ad yokwe Anij ilo ad kejbãrok kien ko an im ilo ad kõmanmõn ankil an.​—1 Jon 5:3.

18. Ilo wãwen et eo Jesus ear likit juõn joñok emõn ikijen jar?

¹⁸ Emakijkij an kar Jesus jar. Ear jar ilo ien eo ear baptais. (Luk 3:21) Mokta jen an kãlet ri jilek ro 12, ear jolok aolepen juõn boñ ñan jar. (Luk 6:12, 13) Jesus ear katakin ri kalor ro an ñan jar. (Luk 11:1-4) Ilo boñin eo mokta jen ear mij, ear jar kin im ibben ri kalor ro an. (Jon 17:1-26) Jar kar juõn mõttan eaorõk ilo mour eo an Jesus, en einwõt ilo mour ko ad, ke jej ri kalor ro an. Ej juõn jerammõn elap ñan konono ibben Iroij Bõtata eo Ijoko Otemjej ilo jar! Bareinwõt, Jehovah ej uake jar ko, bwe John ear je: “Im eñin beran eo iber ñõn E, bwe elañe jej kajitõk iben kin jabrewõt men eo ekar ñõn ankil An, Ej roñjake kij. Im elañe je jela bwe Ej roñjake kij kin jabrewõt ar kajitõk iben, inem je jela bwe rej iber men in kajitõk ko, j’ar kajitõk iben kaki.”​—1 Jon 5:14, 15.

19. (a) Ta kadkad ko kadkadin Jesus jej aikwij kajeoñe? (b) Ilo wãwen et ko jej bõk tokjen jen ad katak kin mour im jerbal eo an Jesus?

¹⁹ Elap men ko jemaroñ katak jen ad etale kin mour im jerbal eo an Jesus Christ ijin ion lal! Lemnak kin kadkad ko ear kwaloki: yokwe, tiriamokake, joij, kajur, jokkin wõt juõn, kõmmanwa, ettã buru, beran, im ejelok kibbon. Ñe elaplok ad katak kin Jesus, enaj laplok kõnan eo ad ñan ad ri kalor ro an retiljek. Jelãlokjen eo kin Jesus ej bareinwõt karuaklok kij ñan Jehovah. Bwe, Jesus ear wãppen an kajeoñe Jemen ilañ. Joñan an ebake Jehovah ear maroñ ba: “Eo e ar lo Ña, e ar lo Jema.”​—Jon 14:9.

Liki Anij ñan Baur Yuk

20. Ewi wãwen jemaroñ kalaplok ad liki ilo ad etetal ibben Jehovah?

²⁰ Ñe ajiri ro rej katak kilen etetal, ejebwããlel buñten nee ko neeir. Ewi wãwen rej katak bwe ren etetal ilo liki? Ilo air kamineneik im kate ir. Eokwe, ro rej etetal ibben Jehovah rej kate ir bwe ren etetal ilo juõn wãwen ewõr liki ie. Men in ej aikwij ien im air kate ir bareinwõt. Paul ear kalikar aorõkin air kate ir ilo air etetal ibben Anij ke ear je: “Inem, bwe in kamatatilok nan kein, ro jãtim, kimij akwelap ñõn kom im kowe kom ilo Iroij Jisõs, bwe, einwõt kom ar bõk jen kim ekijkan an emõn ami etetal im kabuñburuen Anij, einwõt komij etetal, komin bareinwõt lõñlok wõt.”​—1 Dri Tessalonika 4:1.

21. Ñe jej etetal ibben Jehovah, ta jerammõn ko jemaroñ lañliñ kaki?

²¹ Elañe jej tiljek ñan Anij kin aolepen buruõd, enaj jibañ kij ñan wõnmanlok im etetal ibben. (Aiseia 40:29-31) Ejelok juõn men me lal in ej letok ñan kij emaroñ keidi ibben jerammõn ko enaj lelok ñan ro rej etetal ilo ial ko an. Ej ‘Eo eor tokjen An katakin yuk, Eo ej tel yuk ilo ial eo emõn kwon etal ie. O elañe kwar eoroñ kien ko Aõ! inem am ainemõn e naj kar einwõt juõn river, im am wãnik einwõt no ko in lometo.’ (Aiseia 48:17, 18) Ilo ad bõk nan in kir eo ñan etetal ibben Anij im ilo ad tiljek in kõmmane, jenaj maroñ lañliñ kin ainemõn ibben ñan indio.

Ewi Wãwen Kwonaj Kar Uak?

◻ Etke ej juõn jerammõn elap ñan etetal ibben Anij eo emol?

◻ Etke katak, wujleplok ad mour, im baptais rej buñten nee ko jinoin ilo ad etetal ibben Jehovah?

◻ Ewi wãwen jemaroñ anõk jenkwon nee ko neen Jesus?

◻ Ewi wãwen ad jelã bwe Jehovah enaj baur kij ñe jej etetal ibben?

[Pija ko ilo peij 5]

Katak, wujleplok ad mour, im baptais rej buñten nee ko jinoin ilo ad etetal ibben Anij