Kwotak Pã Ko Retiljek Ilo Jar

“Ij kõnan bwe maan ro ren jar ijo ko otemjej im kwotak pã ko retiljek peiir im ejelok illu im iakwelel.”​—1 TIMOTHY 2:8, New World Translation.

1, 2. (a) Ewi wãwen 1 Timote 2:8 ej jerbal ñan jar eo ej kitibuj armij ro an Jehovah? (b) Ta eo jenaj katak kake kiõ?

JEHOVAH ekõnan bwe armij ro an ren tiljek ñan e im ñan don. Ri jilek Paul ear kejel tiljek ibben jar ke ear je: “Ij kõnan bwe maan ro ren jar ijo ko otemjej im kwotak pã ko retiljek peiir im ejelok illu im iakwelel.” (1 Timothy 2:8, NW) Alikar, Paul ear konono kin jar iman mejen armij “ijo ko otemjej” Christian ro rar kweloklok ibben don. Wõn ro rar jutak kin armij ro an Anij ilo jar ilo kwelok ko an congregation? Maan ro wõt retiljek, wãnik, kwojarjar rar lukkun bokake aolepen kien Bible ko ñan Anij. (Ekklisiastis 12:13, 14) Rar aikwij kabuñ ñan Jehovah Anij ilo jitõb im mour erreo.

² Elaptata elder ro an congregation eo rej aikwij ‘kwotak pã ko retiljek peiir ilo jar.’ Jar ko air jen burueir ilo etan Jesus Christ rej kalikar tiljek ñan Anij im ej jibañ ir ñan jab akwel im illu. Emol, jabdewõt maan eo ej bõk jerammõn eo ñan jutak im jar kin congregation in Christian eo iman mejen armij en jab lej, kajorrãn armij, kiblia. (Jemes 1:19, 20) Ebar wõr ta nan in jiroñ ko ñan ro rej jar iman mejen armij kin ro jet? Im ta jet ian kien Bible ko jej aikwij jerbali ilo jar ko ad kin family im kin kij make?

Lemnak Lok Iman Kin Jar

3, 4. (a) Etke elap tokjen ñan lemnak lok iman mokta jen ad jar iman mejen armij? (b)  Ta eo Jeje ko rej kalikar ikijen joñan aetokin jar ko?

³ Elañe rej kajitõk ibbed ñan jar iman mejen armij, jej aikwij lemnak lok iman kin jar. Men in enaj kamaroñ kij ñan jar kin men ko rekkar im aorõk im jab kwalok jar ko raetok. Emol, jemaroñ kwalok ainikied ilo jar ko ibbed make. Remaroñ jabdewõt joñan aetokin. Jesus ear jar aolepen juõn boñ mokta jen an kar kãlet 12 ri jilek ro an. Bõtab, ke ear kajutak Kwojkwoj eo kin mij eo an, ilo tukaduin ear jar ion bread im wine. (Mark 14:22-24; Luk 6:12-16) Im jej jelã bwe jar ko rekadu an Jesus Anij ear buñburuen kake.

⁴ Ta elañe jej bõk jerammõn eo ñan jutak kin juõn family im jar kin mõñã eo. Kain jar rot in emaroñ kadu​—ak jekdon ta eo jej ba ej aikwij koba ad kamolol kin mõñã ko kijed. Elañe jej jar iman mejen armij jinoin an ak jemlokin juõn kwelok in Christian, jejjab aikwij kwalok juõn jar eaetok im konono kin elõñ point ko. Jesus ear notaik scribe ro rar kwalok ‘jar ko raetok kin juõn un enana.’ (Luke 20:46, 47, NW) Juõn armij ekwojarjar en jab kõmman eindein. Bõtab, jet ien, juõn jar aetok emaroñ ekkar. Ñan wanjoñok, juõn elder emwij kãlet ñan jar ilo jemlokin juõn kwelok elap emaroñ lemnak lok iman im kõnan konono kin jet point ko. Ak, meñe eindein jar eo ejjab aikwij lukkun aetok.

Kebak Anij Ilo Wãwen Kautiej

5. (a) Ta eo jej aikwij kememeje ñe jej jar iman mejen armij? (b) Etke jej aikwij jar ilo juõn wãwen nebar im kautiej?

⁵ Ñe jej jar iman mejen armij jej aikwij kememej bwe jejjab konono ñan armij. Jen men in, einwõt ri jerawiwi jej eowore Iroij eo Eutiejtata Jehovah. (Sam 8:3-5, 9; 73:28) Inem jej aikwij kwalok mijak eo ejimwe im jab kaburomõj e ilo men eo jej ba im ilo wãwen eo jej jar. (Jabõn Kennan Ko 1:7) Ri kine sam eo David ear al: “A ña, I naj dreloñ iloan mweo imõm ilo joij ko Am relõñ; im ilo aõ mijõk Yuk I naj kabuñ iman Am tempel ekwojarjar.” (Sam 5:7) Elañe ewõr kain lemnak rot in ibbed, ewi wãwen jenaj kwalok buruõd ñe jej jar iman mejen armij ilo juõn kwelok an Ri Kennan ro an Jehovah? Eokwe, elañe jar konono ñan juõn king, jenaj kõmman men in ilo wãwen kautiej im nebar. En jab ke kar eindein bwe jar ko ad ren laplok ilo kautiej im nebar, kinke jej jar ñan Jehovah, eo ej “King jen indio ñan indio”? (Revelation 15:3, NW) Inem ñe jej jar jej aikwij kejbãrok kij jen ad kwalok nan ko einwõt, “Yokwe Yuk, Jehovah,” “Kimij jilkinwõj am yokwe,” ak, “En emõn ran ibbem rainin (ak bar yokwe yuk).” Jeje ko rej kwalok bwe Nejin eo ej manjen Anij, ear jab kir Jemen ilañ ilo wãwen in.

6. Ta eo jej aikwij kememej ñe jej ‘kebak ñõn tron in joij’?

⁶ Paul ear ba: “Jen . . . kebak throne in joij im konono ilo alikar.” (Hebrews 4:16, NW) Jemaroñ kebak Jehovah im “konono ilo alikar” kin ad tõmak kin binmour in katok eo an Jesus Christ meñe jej ri jerawiwi. (Jerbal 10:42, 43; 20:20, 21) Ak, kain “konono ilo alikar” rot in ejjab melelen bwe jen konono bajjek ibben Anij; ak jen jab konono kin men ko rejjab kautiej e. Elañe jej jar iman mejen armij ñan kabuñburuen Jehovah, jej aikwij konono ilo wãwen kautiej im nebar, im jab kajerbali ñan kwalok nan in kejelã ko, kakabilek armij, ak kajimwe ri kwelok ro.

Jar Kin juõn Jitõb in Ettã Buru

7. Ewi wãwen Solomon ear kwalok ettã buru ke ear jar ilo ien ajelok temple eo an Jehovah?

⁷ Jekdon elañe jej jar iman mejen armij ak ibbed make, juõn kien Bible jej aikwij kememej e ej bwe jen kwalok ettã buru ilo jar ko ad. (2 Kronikel 7:13, 14) King Solomon ear kwalok ettã buruen ilo jar eo an iman mejen armij ilo ien eo ear ajelok temple eo an Jehovah ilo Jerusalem. Solomon ej kab kalek juõn ian moko raibujuij rar kaleki ion lal. Ak, ear jar ilo ettã buru: “A emol otem mol bwe Anij e naj jokwe ion lõl ke? Lo, lõñin lõñ ko re jab bwe ñõn Am bed; e nañin riklok mwin emwij aõ kaleke!”​—1 Kiñ Ro 8:27.

8. Ta jet ian wãwen ko jemaroñ kwalok ettã buru ilo jar ko iman mejen armij?

⁸ Einwõt Solomon, jej aikwij kwalok ettã buru ñe jej jar iman mejen armij. Meñe jejjab kõnan kwalok kwojarjar wan, jemaroñ kwalok ettã buruõd ilo ainikied. Jar ko ilo ettã buru rejjab burolap. Rej jitõñlok armij jab ñan eo ej jar, ak ñan Eo jej jar ñan e. (Matu 6:5) Ettã buru ej alikar ilo ta eo jej jar kake bareinwõt. Elañe jej jar ilo ettã buruõd, jejamin konono ilo wãwen eo jej iun Anij bwe en kõmman men ko ekkar ñan kõnan eo ad. Jen men in, jenaj eowore Jehovah bwe en emmakit ekkar ñan ankil an ekwojarjar. Ri kine sam ear juõn joñok emõn kin men in ke ear akwelap im ba: “O Jeova kimuij akwelap ñõn Yuk, kwon jilkintok jerammõn kiõ.”​—Sam 118:25; Luk 18:9-14.

Jar Jen Buruõd

9. Ta nan in kakabilek eo emõn Jesus ear letok ilo Matu 6:7, im ewi wãwen jemaroñ jerbale?

⁹ Elañe jej kõnan bwe jar ko iman mejen armij ak ibbed make ren kabuñburuen Jehovah, rej aikwij waloktok jen buruõd. Inem, jejamin elijinmen juõn jar im jab lemnak lok iman kin ta eo jej jar kake. Ilo Katak eo an ion Tol eo, Jesus ear kakabilek: “Ñe komij jar, komin jab elij bata einwõt ro dri pegan; bwe rej lemnok [re]naj roñjake ir kin an lõñ air konono.” Ilo bar juõn wãwen, Jesus ear ba: “Komin jab aplolo; jab elijinmen nan ko ejelok kobbair.”​—Matu 6:7; footnote.

10. Etke emaroñ juõn men ekkar ñan jar kin juõn men elõñlok jen juõn wõt alen?

¹⁰ Emol, jej aikwij jar elõñ alen kin ejja men eo wõt. Ejjab nana men in kinke Jesus ear rejañ: “Kajitõk im naj lelok ñõn kom; kabukot im kom naj lo; kalõllõl, im naj kebellok ñõn kom.” (Matu 7:7) Bõlen, ewõr juõn aikwij kin juõn mõn kwelok ekãl kinke Jehovah ej kajerammõn jerbal in kwalok nan ilo bukwon eo. (Aiseia 60:22) Emaroñ juõn men ekkar ñan jar elõñ alen ibbed make ak iman mejen armij ilo kwelok ko an armij ro an Jehovah. Ñe jej kõmman eindein ejjab melelen jej ‘elijinmen nan ko ejelok kobbair.’

Kememej Kamolol im Nebar

11. Ewi wãwen Pilippai 4:6, 7 ej jerbal ñan jar ilo ittino im iman mejen armij?

¹¹ Elõñ armij rej jar ñan kajitõk wõt kin juõn men, ak yokwe eo ad kin Jehovah Anij en kamakit kij ñan kamolol im nebar e ñe jej jar ibbed make im iman mejen armij jimor. “Komin jab inebata kin jabrewõt; a ilo men otemjej kin jar im akwelap kab kamolol, kajitõk ko ami ren walok ñõn Anij. Im ainemõn jen Anij, eo ej elã jen jela otemjej, e naj kejbãrok buruemi im lemnok ko ami ilo Kraist Jisõs.” (Dri Pilippai 4:6, 7) Aet, kobatok ibben kajitõk im nan in akwelap ko, jej aikwij kamolol Jehovah kin jerammõn ko ilo jitõb im kanniek. (Jabõn Kennan Ko 10:22) ri kine sam ear al: “Komin lelok ñõn Anij jurtak in kamolol, im kõlla ñõn Eo eutiejtata men ko kw’ar kanõjnij kaki.” (Sam 50:14) Im juõn al in jar eo an David ear kakobaik nan kein: “I naj nebar etan Anij kin juõn al; im I naj kalaplok E kin kamolol.” (Sam 69:30) Jen jab kõmman eindein ke iman mejen armij im ibbed make?

12. Ewi wãwen Sam 100:4, 5 ej jejjet kitien ran kein, im jemaroñ kamolol im nebar Anij kin ta?

¹² Ikijen Anij, ri kine sam ear al: “Komin dreloñ ñõn loan aur ko An kin kamolol, im iloan worwor ko An kin nebar; komin kamolol E im nebar etan. Bwe Jeova emõn; An tiriamo e ñõn in drio, im tiljek eo An ñõn ebeben ko otemjej.” (Sam 100:4, 5) Ran kein, armij ro ilo ailiñ ko otemjej rej deloñtok ñan loan jikin kwojarjar eo an Jehovah, im kin men in jej nebar im kamolol e. Kwoj kamolol Anij ke kin imõn kwelok eo an Ailiñ eo ilo bukwon eo am im kwalok am kamolol ilo am ekkeini in kwelok ibben ro rej yokwe e? Ñe kwoj bed ijo, kwoj kalaj ke ainikõm im al jen buruõm al in nebar im kamolol ñan eo ej yokwe kij, Jemed ilañ?

Jab Jook Ñe Kwoj Jar

13. Ta wanjoñok eo ilo Jeje ko ej kwalok bwe jej aikwij eowore Jehovah meñe jej jook kin ad buromõj kin likjap ko ad?

¹³ Meñe jej eñjake bwe ejjab tellokid ñan jar kinke enana bõklikit ko ad, jej aikwij jeorlok ñan Anij im kate kij ñan kajitõkin e ilo jar. Ke ri Jew ro rar jerawiwi ilo air mare kõrã ro rejjab ri Jew, Ezra ear bukwelõlõ, erlokwe pã ko retiljek pein ñan Anij, im ilo ettã buruen ear jar: “O aõ Anij, ña I jok im banliklik im reiliñwõj ñõn Kwe aõ Anij; bwe bwir ko am re utiejlok jen bõram, im ruem e ar edreklok ñõn lõñ ko. Jen ran ko an ro jimam e kanuij lap ruem ñõn rainin; . . . Im elikin aolepen men ko rej itok iom kin kõmõn ko am re nana, im kin ruem elap, bwe Kwe am Anij kwar kejorran kim erik jen ruõn bwir ko am, im Kwar letok ñõn kim mõtõn einwõt in, kimin bar kokkure kien ko Am, im belele iben dri ailiñ ro rej kõmõn men in jõjõik kein ke? Kwo jamin illu ñõn kim, ñõn ter eo Kwar kokkure kim, inem e naj ejelok mõtõn berwõt, ak ro dri ko ke? O Jeova, Anij in Israel, Kwe kwo wãnik wõt; bwe emwij likit kim juõn mõtõn dri ko, einwõt ranin; lo kimij imam ilo am bwir: bwe ejelok e maroñ im jutõk imam kin men in.”​—Ezra 9:1-15; Duteronomi 7:3, 4.

14. Einwõt kar walok ilo ran eo an Ezra, ta eo jej aikwij kõmmane ñan an Anij jolok bwid ko ad?

¹⁴ Elañe jej kõnan bwe Anij en jolok bwid ko ar, jej aikwij kwalok bwid ko ad ñan e im “leen ekar ñõn ukwelok” jimor. (Luk 3:8; Job 42:1-6; Aiseia 66:2) Ilo ran eo an Ezra, rar kwalok juõn lemnak eukwelok ke rar kajimwe bwid eo air ke rar jebel jen kõrã ruwamaejet ro beleir. (Ezra 10:44; keidi 2 Dri Korint 7:8-13.) Elañe jej kõnan bwe Anij en jolok bwid ko ad relap, kwalok e ilo jar jen buruõd im kwalok leen ko ekkar ñan ukwelok. Juõn jitõb in ukwelok im kõnan eo ñan kajimwe bwid eo renaj kamakit kij bwe jen bukõt jibañ ilo jitõb jen Christian elder ro.​—Jemes 5:13-15.

Bõk Kainemõn Jen Jar

15. Ewi wãwen bwebwenato eo an Hannah ear kwalok bwe jemaroñ bõk kainemõn ilo jar?

¹⁵ Ñe jej inebata kin juõn men, jemaroñ bõk kainemõn ilo jar. (Sam 51:17; Jabõn Kennan Ko 15:13) Hannah eo etiljek ear kõmman eindein. Ear mour ilo ien eo ekkã an kar wõr family ko relap ilo Israel, ak ejañin kar wõr nejin. Elkanah, leo ibben, kar wõr nejin ladik im ledik ro ikijen lio juõn ibben, Peninnah, eo ear kakitõtõik Hannah kinke ejañin kar wõr nejin. Hannah ear eowor ilo jar im kallimur bwe elañe ear Anij enaj kar lelok juõn nejin ladik ñan e, inem enaj kar ‘[lelok e] ñõn Jeova ran otemjej in an mour.’ Elikin an bõk kainemõn jen jar eo an im nan ko an Priest eo eutiej Eli, Hannah “e ar jab bar buromoj.” Ear keotak juõn ladik im naetan Samuel. Tokelik, ear lelok e bwe en jerbal ilo temple eo an Jehovah. (1 Samuel 1:9-28) Kin an kamolol kin an Anij joij ñan e, ear kamolol e ilo jar​—im kautiej Jehovah einwõt juõn eo ejelok bar juõn ijellokin. (1 Samuel 2:1-10) Einwõt Hannah, jemaroñ bõk kainemõn ilo jar, im liki bwe Anij ej uake kajitõk ko otemjej rej ekkar ñan ankil an. Ñe jej kwalok buruõd ñan e, jejjab aikwij “bar buromoj,” kinke enaj jolok eddo eo ad ak kamaroñ kij bwe jen kijenmij kake.​—Sam 55:22.

16. Einwõt ear walok ibben Jacob, etke jej aikwij jar ñe jej lelñoñ ak kũmkũm?

¹⁶ Elañe juõn men ej kamijak yuk, kaburomõj buruem, jen jab likjap in ruaklok ñan Anij ilo jar ñan kainemõn kij. (Sam 55:1-4) Jacob ear lelñoñ ke ear iten jelmae Esau leo jein. Ak, Jacob ear jar: “O Anij an jema Ebream, im Anij an jema Aisak, Jeova, kweo kwar ba ñõn iõ, Kwon jeblak ñõn eneõm, im ñõn am jowi, im I naj kõmõn emõn ñõn yuk: ña I betkake men eo eriktata ian joij ko otemjej im mol otemjej Kwar kwalok ñõn iõ korijerõm; bwe kin jokwunaõ I ar elã jen Jordan in; im kiõ ruo aõ jar. Kwon lomoren iõ, ij akwelap ñõn Yuk, jen pein jeiõ, jen pein Iso: bwe I mijõk e, ñe ab iten mõn iõ, im jineir kab ro nejir. Im Kwar ba, Emol I naj kõmõn ro ineõm einwõt bok i lojit, eo re ban bwini kin an lõñ.” (Jenesis 32:9-12) Esau ear jab mõn Jacob im ri jerbal ro an. Inem Jehovah ear “joij” ñan Jacob ilo ien eo.

17. Ekkar ñan Sam 119:52, ewi wãwen jar emaroñ kainemõn kij ñe jej lukkun inebata?

¹⁷ Ilo jar ko ad, jemaroñ kainemõn kij ilo ad kalmenlokjen kin men ko ilo Nan in Anij. Ilo Sam eo aetoktata​—juõn jar eaibujuij ear ukõte ñan juõn al​—bõlen Bwirõk eo Hezekiah ear al: “I ar kememej ekajet ko Am jen ien ko mokta O Jeova, im I ar mõke kainemõn iõ.” (Sam 119:52) Ñe jej jar ilo ettã buru ilo ien melejoñ eo elap, jemaroñ kakememej kij kin juõn nan in kaiñi ilo Bible ak juõn kien ñan jibañ kij jibadõk juõn ial enaj jemlok ilo ad kainemõn kij bwe jej kabuñburuen Jemed ilañ.

Ro Retiljek Rar Niknik ilo Jar

18. Etke jemaroñ ba bwe ‘ri tiljek ro otemjej renaj jar ñan Anij’?

¹⁸ Aolep ro rej tiljek ñan Jehovah Anij renaj “niknik ilo jar.” (Dri Rom 12:12) Ilo Sam 32, eo bõlen David ear kine elikin an jerawiwi ibben Bath-sheba, ear kalikar inebata eo an kin an jab kajitõk kin jolok bwid eo an im ainemõn eo ear waloktok jen an ukwelok im kwalok bwid eo an ñan Anij. Inem David ear al: “Kin men in ro drom otemjej ren jar ñõn Kwe ilo ien eo ñe re maroñ in lo Yuk. Emol, ñe dren ko relap relõñlok re jamin tõbar e.”​—Sam 32:6.

19. Etke jej aikwij kwotak pã ko retiljek ilo jar?

¹⁹ Elañe jej kaorõk kõtan eo ad ibben Jehovah Anij, jenaj jar kin tiriamokake eo an eo ej bedbed ion katok in binmour eo an Jesus. Ilo tõmak, jemaroñ kebak throne in joij eo im konono ilo ejelok mijak im bõk tiriamo im jibañ ilo ien eo ejejjet. (Dri Hibru 4:16) Ak elõñ un ko unin jar! Inem jen “jab jokwõr [ad] jar”​—im ilo makijkij kajerbal nan in nebar im kamolol jen buruõd ñan Anij. (1 Dri Tessalonika 5:17) Ran im boñ, jen kwotak pã ko retiljek ilo jar.

Ewi Wãwen Kwomaroñ Uak?

◻ Kin tokjen et eo jej aikwij lemnak lok iman mokta jen ad jar iman mejen armij?

◻ Etke jej aikwij jar ilo juõn wãwen kautiej im nebar?

◻ Jitõb et eo jej aikwij kwalok ñe jej jar?

◻ Ñe jej jar, etke jej aikwij kememej kin kamolol im nebar?

◻ Ewi wãwen Bible eo ej kwalok bwe jemaroñ bõk kainemõn jen jar?

[Pija eo ilo peij 21]

King Solomon ear kwalok ettã buru ilo jar eo an iman mejen armij ilo ien ajelok temple eo an Jehovah

[Pija eo ilo peij 22]

Einwõt Hannah, kwomaroñ bõk kainemõn jen jar