Kwon Kejbãrok Nan In Katakin Ko Am

“Kwon kejbãrok yuk, im men in katakin ko am. Kwon berwõt, ilo men kein; bwe ilo am kõmõn ein drein, kwo naj mõke lomoren yuk, kab ro rej roñjake yuk.”—1 TIMOTE 4:16.

1, 2. Etke elap ad aikwij ri katakin ro rekijejeto ilo ran kein?

“ILOK . . . im kõmõn dri ailiñ ko otemjej bwe ren dri kalora, . . . katakin ir bwe ren bokake nan ko otemjej I ar jiroñ kom.” (Matu 28:19, 20) Kin kien in an Jesus Christ, Christian ro otemjej rej aikwij kate ir bwe ren ri katakin ro an armij. Jej aikwij ri katakin ro rekijejeto ñan jibañ ro emol burueir ñan jelã kin Anij ke ej wõr wõt ien. (Dri Rom 13:11) Ri jilek Paul ear rejañ: “Kwon kwalok nan, kwon kate yuk ilo ien emõn im enana.” (2 Timote 4:2) Men in ej aikwij bwe jen katakin iloan im ilikin congregation eo. Emol, jerbal in kwalok nan ej kitibuj juõn men elaplok jen ad baj kejelã wõt kin ennan eo an Anij. Katakin ilo juõn wãwen ewõr tokjen ej juõn men in aikwij elañe ro rej itoklimo renaj erom ri kalor ro.

² Jej mour ilo “ien ko renana [rej] waloktok.” (2 Timote 3:1) Lemnak ko an lal im katak in kabuñ ko rewan rar kokkure lemnak ko an armij. Elõñ iair rej “marok ilo air lolãtãt” im “elã jen iñjake.” (Dri Epesõs 4:18, 19) Jet iair rej eñtan ilo eñjake. Aet, armij ro rej lukkun “barõk, im jibliklik einwõt s̃ip ko ejelok air s̃eperd.” (Matu 9:36) Mekarta, ilo ad wejepedik in katakin armij, jemaroñ jibañ ro emol burueir ñan kõmman oktak ko rej aikwiji ilo mour ko air.

Ri Katakin Ro Ilo Congregation eo

3. (a) Nan in kaiñi eo an Jesus ñan katakin ej koba ta? (b) Eddo eo elaptata ñan katakin ilo congregation eo ej bed ibben wõn?

³ Ikijen karõk in katak Bible ilo jikin jokwe ko an armij, elõñ million armij ro rej bõk katak ko. Bõtab, elikin air baptais, ro rekãl rej bar aikwij jibañ bwe ren “bin im elle [okrair] ilo yokwe.” (Dri Epesõs 3:17) Ñe jej kajejjet kitien nan in kaiñi eo an Jesus ilo Matu 28:19, 20 im tel armij ro rekãl ñan dolul eo an Jehovah, rej bõk tokjen jen air katak ilo congregation eo. Ekkar ñan Ephesians 4:11-13 (New World Translation), rar jitõñ maan ro ñan jerbal einwõt “shepherd im ri katakin armij ro, ñan bar kakõmõnmõnlok ro rekwojarjar, ñan karejar, ñan kalek enbwinin.” Jet ien, wejepedik in katakin eo air eo ej kitibuj aikwij eo ñan “kajime, im enoik, im kowe kin meamwõr otemjej im katakin.” (2 Timote 4:2) Joñan an lap jerbal eo an ri katakin ro bwe, ke ear jejelok ñan Dri Korint ro, Paul ear kõlajrak ri katakin ro elikin wõt ri jilek im ri kanan ro.​—1 Korint 12:28, NW.

4. Ewi wãwen maroñ eo ñan katakin ej jibañ kij ñan bokake nan in rejañ eo an Paul ilo Dri Hibru 10:24, 25?

⁴ Emol, jab aolep ri Christian ro rej jerbal einwõt elder ro ak overseer ro. Ijoke, rar rejañ aolep bwe ren kõkãtok dron ñan “yokwe im jerbal ko remõn.” (Dri Hibru 10:24, 25) Kõmman men in ilo kwelok ko ej kitibuj ad kwalok uak ko relukkun bojak im jen buruõd ñan kalek im rejañ ro jet. Ri kwalok ro rekabel an Ailiñ eo remaroñ rejañ armij ñan kõmman ‘jerbal ko remõn’ ilo air kwalok jelãlokjen im iminene eo air ibben ro rekãl ñe rej jerbal ibbeir ilo jerbal in kwalok nan. Ien rot kein im ien ko remõntok, jemaroñ lelok nan in jiroñ ko remõn. Ñan wanjoñok, kõrã ro reritto ilo jitõb rar rejañ ir bwe ren “dri katakin kin men ko remõn.”—Taitõs 2:3.

Emwij Reel ñan Tõmak

5, 6. (a) Ewi wãwen an kabuñ in Christian eo emol oktak jen kabuñ wan? (b) Ewi wãwen elder ro rej jibañ ro rekãl ñan kõmman bebe ko remeletlet?

⁵ Kabuñ in Christian eo emol ej lukkun oktak jen kabuñ ko rewan, im elõñ iair rar kajur ion lemnak ko an ro uair. Ke Jesus ear bed ion lal, ri tel ro an kabuñ rar kajeoñ in iroij ion enañin aolep wãwen mour an armij ikijen manit ko renana an armij. (Luk 11:46) Ri tel ro an Christendom ekkã air kõmman eindein.

⁶ Bõtab, kabuñ eo emol ej “jerbal eo ekwojarjar” jej lelok ibben “maroñ in kõmmanwa.” (Romans 12:1, NW) Ri karejar ro an Jehovah rar “rel burueir ñan tõmak kake.” (2 Timothy 3:14, NW) Jet ien, ro rej bõk eddo rej aikwij likit jet nan in tel ko im kilen jerbal bwe en emõn makitkit ko an congregation eo. Bõtab, jen air kõmman bebe ko ñan ri Christian ro mõttad, elder ro rej katakin ir bwe ren “jela kajen emõn im nana.” (Dri Hibru 5:14) Elder ro rej kõmmane men in moktata ilo air najidik congregation eo kin “nan in tõmak ko im katak ejime.”​—1 Timote 4:6.

Kejbãrok Katakin Eo Am

7, 8. (a) Ewi wãwen ro rejjab kanuij kabel ilo maroñ ko air maroñ jerbal einwõt ri katakin ro? (b) Ta eo ej kalikar bwe jej aikwij kate kij ñan erom juõn ri katakin ekabel?

⁷ Bõtab, jen jeblak ñan jerbal eo ad ñan katakin armij. Ej aikwij wõr ke kabel ko, jelãlokjen, ak maroñ ko ñan bõk kunad ilo jerbal in? Jaab. Enañin aolep ien, armij ro ejjab kanuij lap air maroñ rej bõk kunair ilo jerbal in katakin armij ibelakin lal. (1 Dri Korint 1:26-29) Paul ej kamelele: “Men in aurõk in [jerbal in kwalok nan] ibem ej ilo jãbi brij ko [enbwinin armij ejjab wãppen], bwe maroñ eo e kanuij lap en jen Anij, im jab jen kim.” (2 Dri Korint 4:7) Tõbrak eo elap in jerbal in kwalok nan kin Ailiñ eo ibelakin lal ej juõn men in kamol kin kajur eo an jitõb in Jehovah!

⁸ Mekarta, jej aikwij kate kij ñan erom juõn “dri jerbal e jamin jok im ejimewõt an katakin kin nan in mol.” (2 Timote 2:15) Paul ear rejañ Timote: “Kwon kejbãrok yuk, im men in katakin ko am. Kwon berwõt ilo men kein; bwe ilo am kõmõn ein drein, kwo naj mõke lomoren yuk kab ro rej roñjake yuk.” (1 Timote 4:16) Ak ewi wãwen juõn armij ej kejbãrok men in katakin ko an, iloan ak ilikin congregation eo? Ñan kõmmane men in jej aikwij ke kakõmõnmõnlok kil ko rekabel kilen katakin armij?

9. Ta eo elaplok an aorõk jen maroñ ko ad make?

⁹ Alikar Jesus ear kwalok kabel eo an ikijen wãwen ko ear katakin armij ilo Katak eo an ebuñbuñ ion Tol eo. Ke ededelok an kennan, “jar ko rej bwilõñ kin An katak.” (Matu 7:28) Emol, ejelok juõn iad im jemaroñ katakin armij einwõt Jesus. Bõtab, jejjab aikwij wejepedik ilo kennan ñan jerbal einwõt ri katakin ro remõn. Bwe, ekkar ñan Job 12:7, “kiru ko” im “bao ko” remaroñ katakin kij ilo ejelok nan! Ijellokin maroñ ko ak kabel ko ad make, men eo elaptata ej “kain armij rot kij”​—ta kadkad ko kadkadid im ewõr ta manit ko ilo jitõb ibbed im ri katak ro remaroñ anõki​—2 Peter 3:11, NW; Luk 6:40.

Ri Katak kin Nan in Anij Ro

10. Ewi wãwen Jesus ear likit juõn joñok emõn einwõt juõn ri katak kin Nan in Anij?

¹⁰ Juõn ri katakin ebolemen kin katak ko remol an Bible ej aikwij einwõt juõn ri katak kin Nan in Anij. (Dri Rom 2:21) Jesus Christ ear likit juõn joñok ekanuij emõn kin men in. Ilo jerbal eo an, Jesus ear jitõñlok ñan ak kwalok lemnak ko im rej errã ibben enañin jimettan ian book ko ilo Jeje ko ilo kajin Hibru.a Joñan jela eo an kin Nan in Anij ear alikar ke ear 12 an yiõ, ke rar loe ear “jijõt iolapin ro dri kaki, Ej roñjake ir, im kajitõk ibeir.” (Luk 2:46) Einwõt juõn ritto, ekar juõn manit ibben Jesus bwe en etal ñan mõn kwelok eo, ijo rar readi Nan in Anij ie.​—Luk 4:16.

11. Ta manit ko remõn mantin katak jemaroñ kaddek ilo buruõd?

¹¹ Kwoj tiljek ke einwõt juõn ri konono Nan in Anij? Ilo am lukkun etale “kwo naj meletlet kake mijõk Jeova, im lo jelalokjen kin Anij.” (Jabõn Kennan Ko 2:4, 5) Inem kwon kõmman manit ko remõn ñan katak. Kwon beek in read Nan in Anij ran otemjej. (Sam 1:2) Kõmman juõn manit ñan read kajjojo ian magazine in Watchtower im Awake! ilo mõkaj ñe kwoj bõki. Liñõri katak ko ilo kwelok ko an congregation. Katakin yuk ñan etale tumũlalin katak ko. Ilo am ‘jela men otemjej jen jinoin,’ kwomaroñ bõpraek yuk jen am kwalok burolap im katak ko rejjab jimwe ñe kwoj katakin armij.​—Luk 1:3.

Yokwe im Kautiej Ñan Ro Rej Katak

12. Kar ta lemnak eo an Jesus kin ri kalor ro an?

¹² Bar juõn kadkad eo eaorõk ej juõn lemnak ejimwe ñan ro kwoj katakin ir. Ri Pharisee ro rar kijirãte aolep ro Jesus ear katakin ir. Rar ba, “jar in re jaje kien, rej menukol.” (Jon 7:49) Ak Jesus ear lukkun yokwe im kautiej ri kalor ro an. Ear ba: “I jamin naetõmi dri korijer; bwe dri korijer e jaje men eo iroij eo an ej kõmõn: a I ar naetõmi ro jera; bwe men otemjej I ar roñ jen Jema I ar kwalok ñõn kom.” (Jon 15:15) Men in ej kalikar kin ewi wãwen ri kalor ro an Jesus rej aikwij kõmman jerbal eo air ñan katakin armij.

13. Kar ewi wãwen eñjake eo an Paul kin ro ear katakin?

¹³ Ñan wanjoñok, Paul ear jab debij juõn kõtan einwõt ri business ikõtan im ri katak ro an. Ear jiroñ ri Korint ro: “Bwe meñe e naj joñoul tausan ami dri kaki ilo Kraist, e jab elõñ jememi: bwe ilo Kraist Jisõs I ar keutak kom kin gospel.” (1 Dri Korint 4:15) Jet ien, Paul ear jañ ke ear kakkõl ro ear katakin ir! (Jerbal 20:31) Ear lukkun kwalok meanwõd im joij. Kin men in ear maroñ ba ñan Dri Tessalonika ro: “Kim ar joij iolapemi einwõt ke lio dri kõkajiriri ej lale ro nejin.”​—1 Dri Tessalonika 2:7.

14. Etke elaplok an aorõk bwe jen kwalok itoklimo kin ri katak Bible ro ad? Kwalok wanjoñok.

¹⁴ Kwoj kajeoñe Jesus im Paul? Yokwe jen buruõd ri katak ro ad emaroñ kabwe aolep men ko jej likjap kake ilo maroñ ko ad make. Ri katak Bible ro ad rej eñjake ke bwe jej lukkun itoklimo kin ir? Jej bõk ien ñan lukkun jelã kajjiir? Ke juõn Christian kõrã ear kile an bin jibañ juõn ri katak ñan wõnmanlok ilo jitõb, ilo joij ear kajitõk ibben: “Ewõr ke juõn abañ ibbem?” Kõrã eo ear kwalok tumũlalin buruen ñan e, kwalok aolep abañ im inebata ko. Bwebwenato in eyokwe ear ukõte wãwen mour eo an kõrã eo. Ilo ien kein jemaroñ kwalok lemnak ko ilo Bible im nan in kainemõn im rejañ ko. (Dri Rom 15:4) Bõtab, juõn nan in kakkõl: Juõn ri katak Bible emaroñ mõkaj an wõnmanlok ilo jitõb ak ej aikwij wõt jolok jet manit ko an rejjab Christian. Inem emen in meletlet bwe jen jab kanuij kobalok ibben. Jej aikwij likit joñan ñan ad maroñ kobalok ibbeir ekkar ñan wãwen Christian.​—1 Dri Korint 15:33.

15. Ewi wãwen jemaroñ kautiej ri katak Bible ro ad?

¹⁵ Kautiej ri katak ro ad ej kitibuj ad jab beek wãwen mour eo air. (1 Dri Tessalonika 4:11) Ñan wanjoñok, jemaroñ katak ibben juõn kõrã eo ej belele wan. Bõlen ewõr nejiir. Elikin an katak im jelã mol eo an Anij, kõrã in ej kõnan kajimwe kõtan eo an ibben Jehovah. (Dri Hibru 13:4) Ej aikwij mareik leo ke ak ilok jen e? Bõlen jemaroñ lemnak bwe mareik juõn armij eo jidik wõt an itoklimo ak ejelok an itoklimo ilo men ko lor jitõb emaroñ kabõjrak an wõnmanlok. Ijo turãjet, lio emaroñ lemnak kin mour eo an ajiri ro nejin im beek bwe emõnlok en mareik leo. Jekdon ta bebe eo an, ejjab men in kautiej im yokwe ñan iuni ri katak eo bwe en lor lemnak ko ad. Kinke, ej e eo enaj aikwij bõk tokjen jen bebe ko an im mour kake. Inem, ejjab men eo emõntata in ke, ñan katakin ri katak eo bwe en kajerbal “maroñ in jela” eo an make im beek kin ta eo ej aikwij kõmmane?​—Dri Hibru 5:14.

16. Ewi wãwen elder ro remaroñ yokwe im kautiej bwij eo bwijjin Anij?

¹⁶ E menin aorõk bwe elder ro ilo congregation eo ren yokwe im kautiej bwij eo. Ke ear jejelok ñan Philemon, Paul ear ba: “Meñe ij maroñ mõkarkar ilo Kraist im jiroñ yuk kin men ko rej ekar, ijoke kin yokwe ij akwelap ñõn kwe.” (Pailimõn 8, 9) Jet ien, wãwen ko rekabwerer remaroñ walok ilo congregation eo. Emaroñ aikwij bwe ren bin bareinwõt. Paul ear rejañ Taitõs ñan “en bin [an] enoik ir bwe ren jimewõt ilo tõmak.” (Taitõs 1:13) Meñe eindein, overseer ro rej aikwij lukkun lale bwe ren jab lej im konono nana ilo congregation. “Dri korijeran Iroij, en jab akwail, a en joij ñõn armij otemjej im pojõk in katakin armij, en meanwõr.”​—2 Timote 2:24; Sam 141:3.

17. Ta bwid eo Moses ear kõmmane, im ta eo elder ro remaroñ katak jen e?

¹⁷ Overseer ro rej aikwij aolep ien kakememej ir make bwe rej lale “bwijin Anij.” (1 Piter 5:2) Moses, meñe ear ettã buruen, iumin jidik wõt ien ear tab ilo lemnak. Ri Israel ro rar “kameoik jitõb eo an im ear konono ilo ejelok kammanwa kin tien.” (Psalm 106:33, NW) Anij ear jab buñburuen kin wãwen eo ear lale bwij eo An, meñe ear wõr notair bareinwõt. (Bwinbwin 20:2-12) Ñe jej jelmae aitwerõk ko einlok wõt ilo ran kein, elder ro rej aikwij kate wõt ir ñan katakin kin lolokjen im joij. Ro jeid im jatid elaplok air uak ñe jej joij ñan ir im watõk ir einwõt ro rej aikwij jibañ, jab einwõt ro ejelok tokjen ñan jibañ. Elder ro rej aikwij debij lemnak eo ejimwe an Paul ke ear ba: “Kimij liki wõt Iroij kin kom bwe komij kõmõn im naj kõmõn men ko kimij jiroñ kom kake.”​—2 Dri Tessalonika 3:4.

Bojak ñan Uake Aikwij Ko Air

18, 19. (a) Ewi wãwen jemaroñ kabwe aikwij ko an ri katak Bible ro rejjab kanuij kabel? (b) Ewi wãwen jemaroñ jibañ ri katak ro ebin air melele kin katak ko?

¹⁸ Juõn ri katakin ekabel ej mõnõnõ in ukoktak ekkar ñan maroñ ko im joñan meletlet eo an ri katak ro an. (Keidi Jon 16:12.) Ilo parable eo an Jesus kin talent ko, master eo ear lelok jerammõn in jerbal “ñan kaju iair einwõt air maroñ.” (Matu 25:15) Jemaroñ lor ejja joñok eo wõt ñe jej katak Bible ibben armij ro. Emol, ej juõn men emõn bwe jen katak im kajemlok juõn book iumin juõn ien ekadu. Bõtab, jej aikwij kememej bwe jab aolep armij ej emõn air read ak emõn air maroñ ñan melele katak ko ilo mõkaj. Kin men in, jej aikwij jelã ñããt eo jej wõnmanlok jen juõn katak ñan eo juõn elañe ebin an juõn ri katak melele kin katak eo lok iman. Elaplok jen an katak elõñ katak ko ilo mõkaj ej ñan jibañ ri katak ro bwe ren melele kin ta eo rej katak kake.​—Matu 13:51.

¹⁹ Jemaroñ ba eindein kin ri katak Bible ro me ebin air melele kin tibdikin katak ko, einwõt Trinity ak jilu anij ilo juõn ak holiday ko an kabuñ ko. Meñe ejjab men in aikwij bwe jen kakobaik kamelele ko jet rej bedbed ion Bible ilo katak ko ad, jet ien jemaroñ kõmman men in elañe enaj wõr tokjen. Jej lale elañe kõmmane men in ej juõn men in aikwij ke ak jab bwe jen jab karumijlok an ri katak eo wõnmanlok ilo men ko lor jitõb.

En Bõplolõm!

20. Ewi wãwen Paul ear likit juõn joñok ilo kijejeto im tõmak kin katakin eo an?

²⁰ “Komin bõplolin ilo ami,” Paul ear ba. (Dri Rom 12:11) Aet, jekdon elañe jej katakin juõn ri katak Bible ilo mweo imõn ak jej kwalok juõn katak ilo juõn kwelok ibben congregation eo, jej aikwij kijejeto im bõplolid. Paul ear jiroñ ri Tessalonika ro: “Gospel eo am e ar jab iwij ñõn kom ilo nan wõt, a bareinwõt ilo kajur im ilo Jitõb kwojarjar, im lap an rel buruemi.” (1 Dri Tessalonika 1:5) Paul im ri jerbal ro mõttan rar lelok “jab gospel eo wõt, a bareinwõt [air] mour.”​—1 Dri Tessalonika 2:8.

21. Ewi wãwen jemaroñ debij juõn lemnak ekijejeto kin jerbal in katakin eo ad?

²¹ Bõplolin im kijejeto eo emol ej itok jen ad lukkun tõmak bwe ri katak Bible ro ad rej aikwij roñjake men eo jej aikwij konono kake. Jen jab watõk jabdewõt jerbal in katakin einwõt jerbal bajjek. Ri jeje eo Ezra ear madjake kin wãwen katakin eo an kin men in. Ear “kabin buruen in kabukot kien Jeova, im bwe en kõmõne, im bwe en katakin Israel.” (Ezra 7:10) Jej aikwij kõmman eindein ilo ad lukkun keboj kij im kalmenlokjen kin aorõkin katak eo. Jej aikwij jar ñan Jehovah bwe en kobrak kij kin tõmak im kabin buruõd. (Luk 17:5) Kijejeto eo ad emaroñ jibañ ri katak Bible ro ñan kaddek yokwe eo emol kin mol eo. Emol, kejbãrok wãwen katakin eo ad emaroñ kitibuj kilen katakin ko rejejjet. Katak eo ad tok juõn enaj bwebwenato kin jet ian men kein.

[Kamelele eo itulal]

Kwoj Kememej Ke?

◻ Etke jej aikwij Christian ri katakin ro rekabel ilo ran kein?

◻ Ta manit ko remõn mantin katak jemaroñ kaddek ilo buruõd?

◻ Etke yokwe im kautiej ñan ro jej katakin ej men in aorõk?

◻ Ewi wãwen jemaroñ kabwe aikwij ko an ri katak Bible ro ad?

◻ Etke kijejeto im tõmak rej men in aikwij ñe jej katakin ro jet?

[Pija eo ilo peij 8]

Ri katakin ro remõn rej ri katak ro an Nan in Anij bareinwõt

[Pija eo ilo peij 11]

Jej aikwij kwalok itoklimo kin ri katak Bible ro