Añkõ Kin Kejatdikdik, Emmakit Kin Yokwe

“A kiõ e berwõt tõmak, kejatrikrik, im yokwe, men kein jilu; im eo elap iair yokwe.”​—1 DRI KORINT 13:13.

1. Ta nanin kakkõl eo ri jilek Paul ej letok ñan kij?

RI jilek Paul ej kakkõl kij bwe, einwõt juõn tima, tõmak eo ad emaroñ eotõk. Ej konono kin “kejbãrok tõmak im bõklikit emõn, eo jet, kin air jolok e, r’ar rup im mejõljõllok jen tõmak.” (1 Timote 1:19) Ilo ebeben eo kein kajuõn C.E., tima ko rej ejerakrõk ilojet rar kaleki kin alal. Air keie ñan lojet ear wawa ion emõn in wijkinen im ion kabel in jek wa eo.

2. Etke wa in tõmak eo ad ej aikwij emõn jeke, im ta eo menin ej aikwiji kin kij?

² Men eo remaroñ naetan tima in tõmak eo ad ej aikwij bed wõt in ebbebe iolaplap in lojet eo ebwoktak in bed eo an armij. (Aiseia 57:20; Reveles̃õn 17:15) Inem ej aikwij emõn jeke, im menin ej atartar iod. Ke “lojet ko” in lal ko an ri Jew ro im ri Rom ro rar oktak im lap air limajnono ñan Christian ro jinoin, Jude ear je: “A komeo, ro jitenburu, komin mõke kalek kom ion ami tõmak ekwojarjar otem kwojarjar, komin jar ilo Jitõb Kwojarjar. Im kejbãrok kom ilo yokwe an Anij, im komin kõtõmene kin tiriamokake an ar Iroij Jisõs Kraist ñõn mour in drio.” (Jud 20, 21) Ke Jude ear bareinwõt konono kin tarinae kin ‘tõmak emwij lelok ñõn ro rokwojarjar,’ kajin in “tõmak ekwojarjar otem kwojarjar” emaroñ kar jitõñlok ñan aolepen katak ko an Christian, ekoba news eo emõn kin lomor. (Jud 3) Christ ej foundation eo kin tõmak in. Tõmak eo ekajur ej menin aikwij ñan ad maroñ eddeb wõt ñan tõmak in Christian eo emol.

Kijenmij ilo “Kamijak in Kumi in Kabuñ ko”

3. Ewi wãwen an jet kajerbal “kamijak in kumi in kabuñ ko”?

³ Ilo yiõ ko kiõ, ear wõr elõñ wãwen ko rekamijak ikijen an jar in armij ro mõn ir make, uror ko, im mõnmõn ko an ri nana ro jen kumi in kabuñ ko. Ilo melele kake, elõñ kajjojo armij ro ekoba ri tel ro an kien emol burueir, rej kwalok air lemnak kin kejbãrok armij ro ejelok rueir, elaptata jodikdik ro, jen kain kumi rot kein an kabuñ ko rekauwatata. Ejelok bere “anij in lõl in,” e eo ej bed ilikin jorrãn in kowadoñ kein renana, im kin menin ear kõmmane men eo jet rej naetan kamijak in kumi in kabuñ ko, im ej kajerbale nae armij ro an Jehovah. (2 Dri Korint 4:4; Reveles̃õn 12:12) Jet rar kõmmane wãwen in ñan an wõr jumae ñan jerbal eo ad. Ilo jet ailiñ ko, rar leliñtak juõn kareelel eo kõtõbar eo an ñan kejbãrok armij ro jen “kumi kein rekauwatata” ak rar bwid im naetan Ri Kennan ro an Jehovah im ilo wãwen in naruõd ikijen enoiki. Menin ear kõmman an bin kwalok nan jen em-ñan-em ilo jet ailiñ in Europe kan im kõmman bwe jet armij ro rar katak Bible ibbed ren kabõjrak air katak. Menin ear kõmman bwe jet ian ro jeid im jatid ren ebwer.

4. Etke jumae ej aikwij jab kabwer kij?

⁴ Bõtab, jen an kabwer kij, jumae eo ear kakajurlok liki eo ad bwe jej jerbale mour in Christian eo emol. (Matu 5:11, 12) Christian ro jinoin kar narueir einwõt juõn kumi in jumae kien, im rar “konono nae” ijoko otemjej. (Jerbal 24:5; 28:22) Ak ri jilek Peter ear kamol ñan ri tõmak ro mõttan, ke ear jeje: “Komeo, ro jitenburu, komin jab bwok kin kijeek eo ibwiljimi, eo ej walok ñan kom einwõt juõn melejoñ, einwõt ñe juõn men ekãl ej walok ñan kom. Ilo wãwen eo iturãjet, komin lañliñ einwõt ami bõk kunami ilo eñtan ko an Christ, bwe komin maroñ lañliñ im lap ami lañliñ bareinwõt ilo ien eo ej walok aibujuij eo an.” (1 Peter 4:12, 13, New World Translation) Ilo wãwenin lok wõt, juõn governing body eo ilo ebeben eo kein kajuõn ear jeje: “Ro jãtiõ, komin likit e men in lõñliñ otemjej ñe melejoñ kaju wãweir rej kabol kom; Bwe kom jela men in kamol ami tõmak ej jerbale kijenmij. A en wãppen an kijenmij jerbal, bwe komin wãppen wõt im eyu im enjelok ami aikwij.” (Jemes 1:2-4) Einwõt kõto ko rekajur rej melejoñe kajur in juõn tima, lañ in jumae ko renaj kwalok jabdewõt mõjno ko ilo tima in tõmak eo ad.

Eñtan eo Ej Kwalok Kijenmij

5. Ewi wãwen ad maroñ liki bwe tõmak eo ad ej bin wõt iumin melejoñ?

⁵ Christian ro remaroñ liki kin kijenmij eo air im an kajur wõt tõmak eo air elikin wõt air kijenmij im ellã jen lañ ko lañin eñtan. Enaj “wãppen an kijenmij jerbal” ilo lojet ko relimajnono ilo wõt ad “wãppen wõt im eyu im enjelok [ad] aikwij,” ekoba tõmak eo ekajur. Paul ear je: “A ilo men otemjej kim kwalok karkarim einwõt dri jerbal an Anij, ilo kijenmij elap, ilo iñtan ko, ilo aikwij ko, ilo jorran ko.”​—2 Dri Korint 6:4.

6. Etke jej aikwij “lõñliñ ilo iñtan ko ar,” im ewi wãwen an menin ej kakajur kejatdikdik eo ad?

⁶ Kõto ko rekajur in eñtan eo jej iione ilo jet ien jej aikwij watõki einwõt ien ko remõn ñan kamol bwe tima in tõmak eo ad emõn im bin. Ñan Christian ro ilo Rome, Paul ear je: “Im jab eñin wõt, a bareinwõt jej lõñliñ ilo iñtan ko ar: im je jela bwe iñtan ej jerbale kijenmij; Im kijenmij melejoñ; im melejoñ kejatrikrik; im kejatrikrik e jab kajok.” (Dri Rom 5:3-5) Bed wõt im kajur iumin melejoñ ko ej bõktok ñan kij buñburu eo an Jehovah. Im ilo wãwen in, kakajurlok kejatdikdik eo ad.

Etke Jet Rej Eñtan Kin Eotõk in Tima

7. (a) Einwõt an nan ko an Paul kwalok, ewi wãwen an jet ion eotõk in wa eo ilo jitõb? (b) Ewi wãwen an jet rainin oktaklok jen mol eo?

⁷ Ke Paul ear kakkõl kin “rup im mejõljõllok,” eo jet rej iione emaroñ kar bed ilo lemnak eo an kin jet ro rar “jolok” bõklikit eo air emõn im rar luji tõmak eo air. (1 Timote 1:19) Ibwiljiir kar Hymenaeus im Alexander ro rar buñlok jen tõmak, oktaklok jen mol eo im konono nana. (1 Timote 1:20, footnote; 2 Timote 2:17, 18) Rainin, ro rej buñ jen tõmak, ro rej oktaklok jen mol eo, rej kõmman nana ilo nan nae “dri korijer e tiljek im meletlet,” im kiji pein pã eo ekin najidik ir ilo jitõb. Jet rej einlok wõt “dri korijeran eo enana,” eo ej ba ilo nojak, “Aõ iroij ej kõtar an itok.” (Matu 24:44-49; 2 Timote 4:14, 15) Rej kariap bwe jemlok in jukjuk im bed in enana ej ebaktok im rej notaiki nan in kakkõl eo ilo jitõb an jar in ri karejar eo ñan debij wõt lemnak eo kin ien ekaiuriur ibwiljin armij ro an Jehovah. (Aiseia 1:3) Rein rej buñ jen tõmak rej lo tõbrak ilo air “ukoji tõmak an jet,” im kõmman an eotõk tima eo ilo jitõb.​—2 Timote 2:18.

8. Ta eo ear kõmman bwe jet ren kajorrãn ak ñan kõmman an ettal tima in tõmak eo air?

⁸ Christian ro jet rar bar bõk jorrãn in eotõk in tima in tõmak eo air ilo air jolok bõklikit eo air emõn im reel ilo jibadõk kõnan ko an lal in rejjab ejjõm im mour in lũñ eo an. (2 Piter 2:20-22) Ak bar ro jet rar ruñloklallok ilo tima in tõmak eo air kinke ilo air lemnak jikin emmaan eo an jukjuk im bed eo ekãl einwõt ejjab alikar an ebaktok an jede lõñtak. Air jab maroñ watwate ien eo kin naj jejjet in kitien jet kanan ko, im karumijilok “ran eo an Jehovah” ilo lemnak ko air, rej ilok jen kabuñ eo emol. (2 Piter 3:10-13, NW; 1 Piter 1:9) Ejjabto rej lo ir make ilo air jeblak ñan bedkat, den ko rejorrãn ilo jukjuk im bed in kiõ. (Aiseia 17:12, 13; 57:20) Jet ro emwij air bõjrak jen air kobalok ibben congregation eo an Christian rej tõmak wõt bwe ej jerbale kabuñ eo emol. Bõtab, alikar ejabwe air inemõn im kijenmij eo ej menin aikwij ñan kõttar lal eo ekãl Jehovah Anij ear kallimur kake. Mour ilo Paradise eo ear jab bwe an mõkaj an itok ñan ir.

9. Ta eo jejjo Christian ro emwij air wujleplok rej kõmmane, im ta eo mol kein rej aikwij tel kij ñan ad lemnak kaki?

⁹ Jejjo Christian ro emwij air wujleplok ilo jet mõttan ko ilo lal in ej einwõt alikar air rujruj ak lukwõji wõjlã an tima in tõmak eo air. Tima eo ej ebbebe wõt, ak jen an jidik kake manlok ilo tõmak eo, rar bõk juõn jerakrõk eo ejjab mõkaj im rej bõk buñten nee eo rej jokõmman kake. Air emmakit kin kejatdikdik eo kin “Paradise eo ejjabto jen kiõ,” jet rar keboj ir make ñan air kate ir bwe ren tõbare​—kijejeto ilo jerbal in kwalok nan eo im ekkeini air bed ilo aolep kwelok ko, assembly ko, im convention ko. Kiõ rej lemnak bwe tõbar kejatdikdik ko air ettolok lok jen air kar kõtmene kake, ejako joñan eo elap rar mõnõnõ in kate ir ie. Menin ej alikar ilo an diklok makitkit eo ilo jerbal in kwalok nan eo, jakkeini bed ilo kwelok ko, kõnan jako jen mõttan program ko an assembly ak convention. Ro jet rej ejaake elaplok ien ñan kamõnõnõ im ñan bõk jibadbad ko ñan an boburueir kin mweiuk. Mol kein rej tel kij ñan ad lemnak kin ta eo en men eo ekajur ilo mour ko ad ñan an line ibben wujleplok eo ad ñan Jehovah. Kijejeto eo ad ilo jerbal eo an ej aikwij ke wawa ion kejatdikdik eo kin “Paradise eo ejjabto jen kiõ”?

Kejatdikdik Keidi ñan Juõn Añkõ

10, 11. Ta eo Paul ej kõkkar kejatdikdik eo ad ñane, im etke menin keidi in ejejjet?

¹⁰ Paul ear kalikar bwe Jehovah ear kõmmane juõn kallimur in kajerammõn ko ñan air itok ikijen Abraham. Inem ri jilek eo ear kamelele: “Anij . . . E ar kamol e kin kanõjnij: Bwe kin ruo men ko rebin otem bin, im Anij e ban riõp kaki, kaberan ekajur en ber iber, kijeo j’ar ko bwe jen drebij kejatrikrik eo, emwij likit e imar; Im kejatrikrik in iber ej einwõt ankõr in ar, ebin im e jamin makõtkit.” (Dri Hibru 6:17-19; Jenesis 22:16-18) Kejatdikdik eo emwij likit iman Christian ri kabit ro ej juõn eo ejjab wabanban ilo mour ilañ. Rainin, jarlepju in armij ro ri karejaran Jehovah ebed ibbeir kejatdikdik eo emõn kin mour indio ion juõn paradise ilal. (Luk 23:43) Ilo an ejelok kain kejatdikdik rot in, juõn ejamin maroñ wõr an tõmak.

¹¹ Juõn añkõ ej juõn kein kejbãrok ekajur, eo ej juõn men in aikwij ñan debij juõn tima ijo ej añkõ ie im bõprae jen an belok. Ejelok ri jerakrõk enaj jerak jen jikin emmaan eo an tima eo ilo an ejelok juõn añkõ. Ke Paul elõñ alen an kin rup wa ko ekin iuwe ie, ear jelã jen iminene bwe mour ko an ri jerakrõk ak sela ro ekkã an wawa ion añkõ ko an wa eo wa ir. (Jerbal 27:29, 39, 40; 2 Dri Korint 11:25) Ilo ebeben eo kein kajuõn, juõn tima ear ejelok an engine ñan kamaroñ kapen eo ñan kejjalale einwõt an kar kõnan. Ijellokin wa ko rej le jebwe in aõnõn, wa ko elap wõt air atartar ion kõto ñan makitkit. Elañe wa eo ear bed ilo kauwatata bwe enaj ettõr ion dekã, ial eo kapen eo emaroñ kõmmane deeo jolok añkõ eo im dibuk lañ eo, im liki bwe añkõ eo ejamin luji an debdeb ion ikijet. Kin menin, Paul ear keidi kejatdikdik eo an juõn Christian ñan juõn “añkõ in ar, ebin im e jamin makõtkit.” (Dri Hibru 6:19) Ñe jej ejerakrõk ilo lañ in jumae ko ak ion melejoñ ko jet, kejatdikdik emõnmõn eo ad ej einwõt juõn añkõ eo ej debij wõt kij einwõt aan ko rej mour, bwe tima in tõmak eo ad en jab belok ñan loan ijoko rekauwatata kin bejbej in bere ak dekã in buñ jen tõmak ko rekauwatata.​—Dri Hibru 2:1; Jud 8-13.

12. Ewi wãwen ad maroñ bõprae ad ellok jen Jehovah?

¹² Paul ear kakkõl Christian ri Hebrew ro: “Komin kejbãrok kom, ro jãtiõ, im en jab ilo jabrewõt iami buru enana im jab tõmak, im eo ej illok jen Anij emour.” (Dri Hibru 3:12) Ilo eon in ilo Greek, “illok” melelen “jutaklok jen,” einwõt ba, ñan buñlok jen tõmak. Ak jemaroñ bõprae jorrãn in wa rot in. Tõmak im kejatdikdik enaj kamaroñ kij ñan ad eddeb ñan Jehovah meñe ilo ien lañ ko elap air nana in melejoñ. (Duteronomi 4:4; 30:19, 20) Tõmak eo ad ejamin einwõt juõn wa eo ej beto-betak kin kõto ko in katak ko an buñ jen tõmak. (Dri Epesõs 4:13, 14) Im kin kejatdikdik eo einwõt añkõ eo ad, jenaj maroñ kijenmij wõt ilo lañ in mour ko einwõt ro ri karejaran Jehovah.

Emmakit kin Yokwe im Jitõb Kwojarjar

13, 14. (a) Etke añkõ in kejatdikdik eo ad make ejjab bwe? (b) Ta eo ej aikwij kajur eo ej makitkit ilo kõmmane jerbal eo ekwojarjar ñan Jehovah, im etke?

¹³ Juõn ejamin kõmman wõnmanlok ñan bed eo ekãl elañe emmakit eo an dein ñan Jehovah ej kejatdikdik eo kin mour indio ion juõn paradise eo ilal. Ke ej kejbãrok añkõ in kejatdikdik eo an einwõt juõn menin kabin eo emol ilo mour eo an, ej aikwij kobaiklok ñane im ñan tõmak eo an kajur in yokwe eo ej makitkit. Paul ear kalikar mol in ke ear je: “A kiõ e berwõt tõmak, kejatrikrik, im yokwe, men kein jilu; im eo elap iair yokwe.”​—1 Dri Korint 13:13.

¹⁴ Kajur in makitkit eo ad ilo kõmmane jerbal eo ekwojarjar ej aikwij jen eñjake in buruõd yokwe eo ñan Jehovah, ilo uak ñan yokwe eo an ejelok joñan ñan kij. Ri jilek John ear je: “Eo e jab yokwe e jab jela Anij; bwe Anij yokwe. Ilo men in emwij kwalok ilo kij an Anij yokwe, bwe E ar jilkintok ilo lõl juõn wõt E ar keutak, bwe jen mour kin E. Jej yokwe bwe E ar yokwe kij mokta.” (1 Jon 4:8, 9, 19) Ikijen kamolol eo ad ñan Jehovah, men eo jej aikwij lemnak kake moktata ej aikwij, jab lomor eo ad, ak ñan kennan kin kwojarjar eo an ãt eo etan ekwojarjar im kalikar kajur bõtata eo an ewãnik.

15. Ewi wãwen an yokwe eo ad ñan Jehovah wõr kõtan ñan kajitõk eo kin kajur bõtata eo an?

¹⁵ Jehovah ej kõnan bwe jen karejar ñan e kinke jej yokwe e, ejjab Paradise wõt. Book eo Bible encyclopedia Insight on the Scripturesa ej ba: “Jehovah ej aibujuij ilo mol in bwe kajur bõtata eo an im menin kõmanmõn ko an rej rejetake ej bedbed moktata ion yokwe. E ej kõnan wõt ro rej yokwe kajur bõtata eo an kin kadkad ko kadkadin remõn im kinke rewãnik, ro me rej kõnan kajur bõtata eo an jen jabdewõt men ko jet. (1 Kor. 2:9) Rar kãlet ñan air karejar iumin kajur bõtata eo an jen air kajeoñ jenolok lok iair​—menin ej kin jelãlokjen eo air kin e im kin yokwe, ekajet jimwe, im meletlet eo an, ko rej kili bwe elap air ellãlok jen ko air make. (Sam 84:10, 11)”​—Volume 2, peij 275.

16. Ewi wãwen yokwe eo ñan Jesus ej juõn kajur ej makitkit ilo mour ko ad?

¹⁶ Einwõt Christian ro, jej bareinwõt kwalok yokwe ñan Jesus ilo ad uak ñan yokwe eo an ñan kij. Paul ear kõmmanwa: “Bwe yokwe an Kraist e relel ilo buruem: bwe ein drein am lemnok, Juõn e ar mij kin otemjej, inem ro otemjej r’ar mij. Im E ar mij kin otemjej bwe ro rej mour ren jab bar mour ñõn ir mõke, a ñõn Eo e ar mij im jerkakbiji kin ir.” (2 Dri Korint 5:14, 15) Christ ej bedbed eo me mour in jitõb eo ad, tõmak eo ad, im kejatdikdik eo ad rej ekkal ion. Yokwe eo ad ñan Christ Jesus ej jurake kejatdikdik eo ad im kabin tõmak eo ad, elaptata ilo ien lañ in melejoñ.​—1 Dri Korint 3:11; Dri Kolosse 1:23; 2:6, 7.

17. Ta kajur eo elap Jehovah ej letok ñan kij, im ewi wãwen an aorõkin walok ilo Jerbal 1:8 im Dri Epesõs 3:16?

¹⁷ Ke yokwe eo ad ñan Anij im ñan Nejin ej kajur eo elaptata ej iun manlok kij ilo mour ko ad einwõt Christian ro, Jehovah ej bar letok juõn menin letok eo ej iun kij, kemourur kij, im letok kajur ñan kij ñan ad wõnmanlok ilo jerbal eo an. Ej kajur eo an eo ej makitkit, ak jitõb kwojarjar eo. Nanin Hebrew im Greek ko rej ukõt “jitõb” rej jitõñlok ñan makitkit eo ekajur in mejatoto, einwõt kõto. Wan ejjerakrõk ko einwõt ko Paul ear iuwe ioir rar atartar ion kajur eo jejjab loe in kõto ñan air tõbraklok ijo rej ilok ñane. Ilo wãwen in lok wõt, jej aikwij yokwe im makitkit in kajur eo an Anij jejjab loe bwe wa in tõmak eo ad en kamakit manlok kij ilo jerbal eo an Jehovah.​—Jerbal 1:8; Dri Epesõs 3:16.

Manlok ñõn Jemlok in Ial eo Ad!

18. Ta eo enaj kamaroñ kij kijenmij ñan jabdewõt melejoñ ko ñan tõmak eo ad ilo ran ko rej itok?

¹⁸ Tõmak im yokwe eo ad remaroñ bõk elap melejoñ mokta jen ad tõbar jukjuk im bed eo ekãl. Ak Jehovah ear letok ñan kij juõn añkõ “ebin im e jamin makõtkit”​—kejatdikdik emõn eo ad. (Dri Hibru 6:19; Dri Rom 15:4, 13) Ñe rej deñõt kij ikijen jumae ak melejoñ ko jet, jemaroñ kijenmij elañe ej emõn ad añkõ ikijen kejatdikdik eo ad. Elikin an jakolok juõn lañ ak mokta jen an juõn bar walok, jen beek ñan ad kabin tõmak eo ad im kakajur tõmak eo ad.

19. Ewi wãwen ad maroñ kejbãrok wa in tõmak eo ad ilo ial eo lok ñan tõbar jikin emmaan eo an wa in lal eo ekãl an Anij?

¹⁹ Mokta jen an kwalok kin “añkõ in ar,” Paul ear ba: “A kim kõnan bwe komin otemjej niknikemi wõt juõn ñõn obrõk in kejatrikrik, aet, ñõn jemlokõn: Bwe komin jab jowõn, a komin dri kajeoñwe ro rej bõk air jolit men in kalimur ko, kin tõmak im kijenmij.” (Dri Hibru 6:11, 12) Ilo ad emmakit kin yokwe eo ñan Jehovah im ñan Nejin im bõk kajur jen jitõb kwojarjar eo, jen kejbãrok wõt wa in tõmak eo ad ilo ial eo an mae ien jej tõbar jikin emmaan eo an wa in kallimur eo an Anij kin lal eo ekãl.

[Kamelele eo itulal]

Ilo Wãwen Elij

◻ Ikijen tõmak eo ad, ta nanin kakkõl eo Paul ear letok ñan kij?

◻ Ewi wãwen an jet iion jorrãn in wa eo ilo jitõb, im ewi wãwen an jet kadiklok air jerbal?

◻ Ta kadkad eo ekwojarjar ej aikwij kobalok ibben tõmak eo ad?

◻ Ta eo enaj kamaroñ kij ñan ad tõbar kwojarjar in kallimur eo an Anij kin lal eo ekãl?

[Pija eo ilo peij 16]

Wa in tõmak eo ad ej aikwij emõn jeke ñan an maroñ jumae im ellã jen lañ ko lañin mour

[Pija eo ilo peij 17]

Tõmak eo ad emaroñ rup im mejõljõllok

[Pija eo ilo peij 18]

Kejatdikdik ej juõn añkõ ñan mour eo ad einwõt Christian ro