Etke Jidik Wõt Ien?

IEN. Emaroñ bin ad kamelele kin nan in ilo wãwen ejejjet, ak jej jelã bwe Ejabwe ien ibbed aolep ien. Bareinwõt jej jelã bwe emõkaj an jakolok. Emol, ekkã ad ba, “Ejelok ien.”

Mekarta, ealikar bwe juõn poet in England Austin Dobson ear laplok an jejjet ilo melele eo an ke ear ba ilo 1877: “Kwoj ba ke, Ien ejakolok? Jaab! Ien ej bedwõt, jej jakolok.” Jen ien eo ear mij ilo 1921, Dobson ear jako iumin elõñlok jen 80 yiõ ko; ien ej wõnmanlok wõt.

Elap Ien

Ikijen Ri Kõmanmõn eo an armij, Bible ej jiroñ kij: “Mokta jen an tol ko walok, ak Kw’ar kõmõnmõn lõl im ene, jen in drio ñõn in drio, Kwe Anij laplap.” (Sam Ko 90:2) Ak einwõt an kar The New Jerusalem Bible ba, “jen indio ñan indio Kwe Anij.” Inem ien enaj bedwõt toan an Anij bed​—ñan indio!

Ilo keidi ibben Anij, eo ej mour ñan indio, jej konono kin armij: “Bwe ran ko otemjej re jokolok ilo Am libõpne: kim kejemlok yiõ ko am einwõt juõn bwebwenato ñe emwij konono kake. Bwe ran ko in yiõ ko am jiljilimjuõnñoul yiõ, ak kin kajur re drualitokñoul yiõ, a air jua ej jerbal wõt im buromõj, bwe emõkõj bukweloke, inem kin kãlok.”​—Sam Ko 90:9, 10.

Etke ekadu ien mour ilo ran kein, ñe Bible ej katakin bwe karõk eo an Anij ej ñan an armij ro mour ñan indio? (Jenesis 1:27, 28; Sam Ko 37:29) Meñe Anij ear karõk bwe mour in armij en bed ñan indio, etke joñan an armij mour, elaptata ej diklok jen 30,000 ran ko? Etke jidik wõt ien ibben armij ro? Wõn ak ta eo ej bõk eddo eo kin abañ in ekaburomõjmõj? Bible ej letok uak ko ralikar im kajuburoõd.a

Ekadulok Ien

Ritto ro renaj kamol bwe joñan mõkaj an armij makitkit ilo ran kein ear mõkajlok. Juõn ri jeje, Dr. Sybille Fritsch, ear kalikar bwe iumin 200 yiõ ko remotlok, joñan awa in jerbal ilo jikin jerbal ko kar diklok jen 80 ñan 38 awa ko, “ak menin ear jab kabõjrak ad abõnõnõ.” Ear kalikar: “Ejabwe ien; elap an aorõk ien; joñan ad aikwiji ien ej einwõt ad jabjenmenowan ak jekõnan menono; juõn ien mour eboub.”

Men in kõmman ko rekãl rej kabellok ien ko im maroñ ko remõn armij ro mokta rejañin kar lemnak kake. Ak joñan an laplok maroñ eo ñan kõmman elõñ men ko, ejja joñan eo wõt inebata ibben armij ro kin jidik wõt ien ñan kõmman eindein. Ilo ran kein, ilo elõñ jikin ko an lal in, armij rej mour ekkar ñan juõn schedule, im kaiurlok jen juõn jerbal ñan eo juõn. Jema ej ilen jerbal 7:00 a.m., Jinõ ej kakaiurlok ro nejin bwe ren school ilo 8:30 a.m., Jimma ej etal ñan doctor 9:40 a.m., im kij aolep jej aikwij kebojak kin juõn kwelok eaorõk ilo 7:30 p.m. Ke jej kaiurlok jen juõn men in kõtõbrak ñan eo juõn, enañin maat ien ñan kakije jidik. Im jej abõnõnõ kin men ko jej aikwij kõmmani jen ran ñan ran, einwõt jej ettõrto-ettõrtak im jeban kakije.

Jejjab Make Iad kin An Wõr Jidik Ien Ibbed

Ri Kijirãt eo an Anij, Satan Devil eo, eo ear mone armij im men in ear tellok ñan an kadulok ien air mour, kiõ ear juõn eo ej jerata kin nana ko an make. (Keidi Dri Galetia 6:7, 8.) Ñan konono kin ien jutak eo an Ailiñ in Messiah eo ilañ, Reveles̃õn 12:12 ej letok ñan kij juõn kejatdikdik ñe ej ba: “Kin men in komin lõñliñ, O lõñ ko, im komeo komij jokwe ilo ir. Wo ñõn ene im lometo; bwe devil e ar wõnlõlwoj ñõn kom, im elap an illu, bwe e jela jirik wõt ien iben.”

Ekkar ñan juõn lajrak in men ko rar walok ilo Bible im kanan ko an Bible emwij jejjet kitieir, jej mour ilo tujemlokin ien eo ej ba “jidik wõt ien.” Elap ad lañliñ bwe mõttan jidik ien eo an Satan enaj jemlok! Ñe enaj kalbuji e ilo roñ eo, armij ro rekiblie renaj jeblak ñan wãppen, im remaroñ bõk mour indio Jehovah ear karõk ñan ir ilo jinoin. (Reveles̃õn 21:1-4) Jabwe ien ejamin juõn abañ ilo ien eo.

Kwomaroñ ke melele kin ta melelen am bõk mour indio​—ñan mour indio? Kwoj jamin bar obrak kin men ko kwojañin mwij kõmmani. Elañe jej aikwij laplok ien, ewõr ilju, ak week in lal, ak yiõ in lal​—emol, ien indio ej bed imaam!

Kajerbal Ien eo Ewõr Ibbed Kiõ ilo Meletlet

Ilo an kile bwe ekadu ien ibben ñan kareel armij, Satan ej kate wõt ñan kaboub armij bwe ejelok ien ñan roñjake news eo emõn kin Ailiñ eo and Anij emwij an jutak. Kin menin, jej aikwij bokake nan in kakabilek eo an Anij: “Inem komin lale ekijkan ami etetal, jab einwõt dri jaje, a einwõt dri meletlet; im wiaik ien, bwe ran ko renana. Kin men in komin jab bwebwe, a komin jelalokjen ta eo ankil an Iroij.”​—Dri Epesõs 5:15-17.

Elap an aorõk bwe jen kajerbal ien eo ad ilo meletlet kin men ko raorõktata jen ad kajjetokjeir kin men in jibadbad ko ejelok tokjeir ñan indio! Jej aikwij bõk ejja lemnak eo wõt einwõt Moses ke ear jar ñan Jehovah ilo nan kein jen buruen: “Ein drein Kwon katakin kim in bwini yiõ ko am, bwe kimin bõk ñõn kim buruen meletlet.”​—Sam Ko 90:12.

Emol, ilo lal in ran kein armij otemjej rej boub. Mekarta, Ri Kennan ro an Jehovah rej rejañ yuk ñan kajerbal ien eo am eaorõk ñan katak kin kien ko an Anij ñan bõk mour indio iumin iroij eo an Ailiñ eo an. Juõn awa juõn week ñan katak Bible eo ilo wãwen eo ejimwe, im melele “ta ankil an Jehovah,” emaroñ kamaroñ yuk ñan lo ien an nan kein jejjet kitieir: “Komin illok jen nana im kõmõn emõn, im ber ñõn in drio. Ro remõn re naj jolit ene eo, im jokwe iloan ñõn in drio.”​—Sam Ko 37:27, 29.

[Kõmel̦el̦e eo itulal̦]