Kajitõk ko Jen Ro Rej Read
Ilo Dri Rom 12:19, ri jilek Paul ear kwalok ke bwe Christian ro rej aikwij jab oktak im pul air illu, ke ear ba: “Kom jitenburu, komin jab irenwõne kin kom, a lelok jikin ñõn illu eo”?
Ilo mol in konono, jab. Ijin ri jilek Paul ear jitõñlok ñan illu eo an Anij. Bwebõta, ejjab ñan ba bwe menin wãwen ko ie ejjab elañe Christian ro rej lelok ir ñan illu. Bible eo ilo alikar ej kakabilek kij nae ad oktak im pul ad illu. Lemnak kin juõn wanjoñok in kakabilek kwojarjar.
“En jokwõr am illu, im kwon illok jen e; im kwon jab allñõrñõr in kõmõn nana wõt.” (Sam 37:8) “A Ij ba ñõn kom, Jabrewõt eo ej illu ñõn jein im jãtin e naj uõta kin ekajet eo.” (Matu 5:22) “Kiõ jerbal in kõniek ko re alikar, im men kein: lũñ, etton, ejej, kabuñ ñõn ekjõp, marmir kijirãt ko, akwail ko, ban ko, illu ko, wãlok ko, limõjnonu ko, kiõjaljal ko.” (Dri Galetia 5:19, 20) “En jako jen kom meo otemjej, im libõpne, im illu, im airwaro, im konono nae, kab kakitõtõ otemjej.” (Dri Epesõs 4:31) “A jabrewõt armij en mõkaj an roñjake, en rumij an konono, en rumij an illu.” (Jemes 1:19) Bareinwõt, book in Jabõn Kennan ej elijinmen an kakabilek kij nae kõtlok ad illu ak itok wõt in illu kin men dikdik ko ak bwid ko an armij.—Jabõn Kennan Ko 12:16; 14:17, 29; 15:1; 16:32; 17:14; 19:11, 19; 22:24; 25:28; 29:22.
Kobban Dri Rom 12:19 ej kwon ibben kakabilek rot in. Paul ej ba bwe yokwe en jab ankil in riap, bwe jej kajerammõn ro rej matõrtõre kij, bwe jej kajeoñ bwe en emõn ad lemnak kin ro jet, bwe jejjab ukõt nana kin nana, im bwe jej kate kij ainemõn ibben aolep. Inem ear kõketak: “Kom jitenburu, komin jab irenwõne kin kom, a lelok jikin ñõn illu eo: bwe emwij je, Kwonaõ irenwõne, I naj nawõnan. Iroij e ba.’ ”—Dri Rom 12:9, 14, 16-19.
Aet, jej aikwij jab kõtlok illu bwe en kamakit kij ñan ukõt nana kin kõmman in idenwõne. Jelãlokjen eo ad kin wãwen ko im eñjake eo ad kin ekajet rejjab wãppen. Elañe jej kõtlok bwe illu en kamakit kij ñan ad idenwõne, enaj ekkã ad kõmman bwid. Menin enaj jerbal ñan jemlok ko an ri Jumae eo an Anij, Devil eo. Paul ijoko jet ear je: “Komin illu im jab jerawiwi: al en jab tulok ion ami illu, im komin jab najikin devil eo.”—Dri Epesõs 4:26, 27.
Ial eo emõnlok, ial eo emeletletlok, ej ñan kõtlok bwe Anij en beek ñããt im wõn eo en bõktok idenwõne ion. E maroñ kõmman eindein kin jelãlokjen eo eyu in mol ko, im jabdewõt wõnãn eo ej bõke enaj jelet ekajet wãppen eo an. Jemaroñ lo bwe eñin melele eo an Paul ilo Dri Rom 12:19 ke ej lo men eo ej jitõñlok ñane ñan Duteronomi 32:35, 41, eo ekoba nan kein: “Irenwõne Aõ, im wõnan.” (Keidi Dri Hibru 10:30.) Kin menin, meñe nan ko “an Anij” rejjab loi ilo eon eo ilo Greek, juõn oran ri ukok ro ilo ran kein emwij air likiti ilo Dri Rom 12:19. Menin ej tellok ñan read ko einwõt “lelok bwe Anij en idenwõne” (The Contemporary English Version); “lelok jikin ñan illu eo an Anij” (American Standard Version); “lelok bwe Anij en kaje elañe enaj” (The New Testament in Modern English); “likit juõn jikin ñan wõnãn eo ekwojarjar.”—The New English Bible.
Meñe jej bõk nana ak matõrtõr jen ro rej ri kijirãte mol eo, jej kalikar ad tõmak ilo jeje ko an Jehovah Anij ko Moses ear roñjaki: “Jeova, Jeova, juõn Anij ej tiriamokake, im E joij, e rumij an illu, im elap an tiriamokake im mol, ej kejbãrok an tiriamo ñõn tausan ko, Ej jeorlok bwir im jerawiwi jen ro eor rueir: im e jamin kõtlok ir jen air bõk kaje.”—Exodus 34:6, 7, NW.