Kajañjañ im Al eo Ej Kamõnõnõik Anij

Kajañjañ rej kamelele kake einwõt “men eo etto an bed im ej make wõt eindein ian aolep menin kabel ko remõn.” Einwõt kajin, ej juõn menin letok eo emõn eo ej kajenolok armij jen menin mour ko. Kajañjañ ej lujur eñjake ko. Emaroñ kamõnõnõik lojilñiõ im etto an bed ilo lemnak. Ilañin men otemjej, kajañjañ emaroñ kamõnõnõik Anij.

EINWÕT an Bible kwalok, ri Israel ro rar armij in kajañjañ. Kajañjañ kar “juõn jerbal in kabel eo ebuñbuñ ilo ien Bible ko etto,” book eo Unger’s Bible Dictionary ej kamelele. Einwõt juõn mõttan mour eo ran otemjej, men kein jimor ainikien im kein kajañjañ rar alikar im jenolok ilo kabuñ eo air. Ak kar ainikien armij men eo rar kajerbale im elap an buñbuñ.

King David ear kãlet jet ibwiljin ri Livai ro “ñan tel ilo al” ilo imõn kabbed eo, mokta jen air kar aje temple eo leo nejin, Solomon ear kaleke. (1 Kronikel 6:​31, 32) Ke tebtebin kallimur eo, eo ej jutak ikijen an Jehovah bed, ear tõbraklok ilo Jerusalem, David ear karõk jet ri Livai ro “bwe ren kabuñbuñ, im kamolol, im nebar Jeova.” Rar kobaiklok ainikien nebar eo air “ibben kein kajañjañ ko ewõr toiir im kin harp ko, . . . ibben kein kajañjañ ko jet rej kajañi im ellaj ainikeir, . . . ibben jilel ko.” Maan rein rar “kalikar ir kin etair ñan air kamolol Jehovah, kinke ‘yokwe im joij eo an ej ñan indio.’ ”​—1 Chronicles 16:​4-6, 41; 25:​1, NW.

Nan eo “yokwe im joij eo an [Jehovah] ej ñan indio” ej walok elõñ alen ilo Sam Ko, Bible book eo elõñ kajañjañ ko rekoba ie. Ñan wanjoñok, ej ejaake mõttan eo kein karuo in kajjojo eon ko 26 in Sam Ko 136. “An kadu ej kõmman an emõn ñan tien armij,” juõn eo ej etale Bible ej loe. “Jabdewõt armij, eo ear roñjake, emaroñ kememeje.”

Kamelele ko emwij jei ñan Sam ko rej kalikar an jeded kajerbal kein kajañjañ ko. Sam Ko 150 ej kwalok kin kajañjañ ko einwõt horn, harp, tambourine, pipe, im cymbal ko, koba to in kajañjañ ko. Mekarta, kareelel eo moktata ej ñan ainikien armij. Eon 6 (New World Translation) ej kõketak: “Men otemjej ej menono​—en nebar Jah. Nebar Jah, kom armij ro!”

Ke kajañjañ ej kalikar eñjake ko ad, lemnak in buromõj ko ilo ien ko an Bible ko rar kamõkaj al in buromõj ko kin ro remij ak ainikien ko jet. Bõtab, wãwen al rot in ear wõr joñan ilo lajrak in al ak kajañjañ ko ilo Israel. “Ilo juõn al in buromõj wõt ak liãjlol ton in al eo enaj emõnlok ñan ton in al eo ak kajañjañ eo ak ainikien eo elamwan im ennan ko remõn,” book eo Bible encyclopedia Insight on the Scriptures, ej kamelele.a

Jesus im ri jilek ro an retiljek rar al in nebar ñan Jehovah ilo joten eo mokta jen mij eo an Jesus, ejelok bere rar bõk ton in nan in nebar ko ilo Sam Ko . (Sam Ko 113-​118) Menin emaroñ kar kakajurlok ri kalor ro an Jesus ñan air jelmae air kar luji Master eo air! Elaplok jen menin, air kar beek ñan air bed wõt einwõt ri karejar ro retiljek an Kajur Bõtata eo ijoko otemjelok, Jehovah, ej aikwij kar mũlallok ke rar al lalem alen “kin yokwe im joij eo an ñan indio.”​—Sam Ko 118:​1-4, 29.

Christian ro jinoin ilo Ephesus im Colossae rar al kin “sam ko, al ko . . . ñõn Anij” (nan in, “hymn”, ej lelok nebar ñan Anij). Ñan men kein rar kobaiklok “kitoõn Jitõb ko” rar al kaki ilo burueir. (Ephesians 5:​19; Colossians 3:​16, NW) Ikijen al im konono jimor, ear kwon air kajerbal loñiir ñan kwalok nebar. Jesus ear jab keañ ke bwe “jen obrak in buru loñin armij ej konono”?​—Matthew 12:​34, NW.

Kajañjañ im Al eo Ejjab Kamõnõnõik Anij

Ejjab aolep kajañjañ im al ko rej kwalok kaki ilo Bible rar kamõnõnõik Anij. Lemnak kin wãwen eo ear walok ilo Tol Sinai, ijo Moses ear bõk Kien eo ie, ekoba Kien ko Joñoul. Ke Moses ear wanlallok ilo tol eo, ta eo ear roñjake? “Ejjab ainikien al ion jerbal eo ekajur,” “ejjab ainikien al in jab anjo,” ak “ainikien bar juõn al.” Menin kar al im kajañjañ eo ear kobalok ibben katok ñan ekjap, juõn manit eo ear kõmman menin an Anij jab mõnõnõ im ear walok tokjen ilo an mij enañin 3,000 ro rar kõmman al im kajañjañ.​—Exodus 32:​18, 25-​28, NW.

Meñe armij emaroñ ekin, ikkure, im lañliñ kin aolep wãwen kajañjañ im al, ejjab kalikar bwe aolepen wãwen in ej kamõnõnõik Anij. Etke ejjab? Christian ri jilek Paul ej kamelele: “Bwe otemjej r’ar jerawiwi, im rej likjõp jen aibujuij an Anij.” (Dri Rom 3:​23) Mantin Pagan ko ej jebar leiir, tõmak eo kin an armij bwe ejjab mij, im kautiej eo elap kin Mary einwõt “jinen Anij” men kein ekkã air kajerbali einwõt un ko ñan kine al im kajañjañ ko. Ak, tõmak kein im manit kein rejjab kautiej Anij eo emol, kinke rej jumae men eo Nan in kakõrmol eo, Bible, ej kalikare.​—Duteronomy 18:​10-​12; Ezekiel 18:​4, NW; Luk 1:​35, 38.

Kõmmane Juõn Kãlet Emeletlet kin Kajañjañ im Al

Kãlet eo ewõr kin kajañjañ im al ekabwilõñlõñ. Kilin compact disc ko rar eiki ñan an ri wia ro emmakit in wiaiki aolep wãwen kajañjañ im al ko emij kõmmani. Ak elañe eo ej kabuñ ñan Anij ekõnan kamõnõnõik E, enaj jerbale ilo kejbãrok im kãlet ilo meletlet ñan bõprae ainikien al im kajañjañ ko rej jarjar jen tõmak ko an kabuñ wan ko ak tõmak eo kin an armij bwe ejjab mij im kin dimon.

Albert, eo juõn ien ear jerbal einwõt juõn Christian missionary ilo Africa, ej kamol bwe ear dik ien ñan an kajañjañ piano ijen. Bõtab, ear roñjake im bar roñjake jejjo record ko ear bõki ibben im kajañi im eaetok air jañ. Ke ear jeblak ñan ailiñ eo an, Albert ej kiõ lolok congregation ko an Christian einwõt juõn traveling overseer. Ien ñan an roñjake kajañjañ im al ko ewõr joñan. “Rikkõn al eo emõn ibba ej Beethoven,” ej kile. “Iumin yiõ kein mantak, Iar ebbõk al im kajañjañ ko einwõt kein symphonies, concertos, sonatas, im quartets.” Roñjake men kein ear bõktok elap mõnõnõ ñan e. Bwebõta, kajjojo armij ewõr an make kõnan ilo kajañjañ im al ko, ak einwõt Christian jej likit ilo ad lemnak nan in kakabilek eo an Paul: “Inem elañe komij mõña ak irak ak kõmõn jabrewõt, komin kõmõn men otemjej ñõn aibujuij an Anij.”​—1 Dri Korint 10:31.

Kajañjañ im Al im Wujleplok

Men eo moktata Susie ej yokwe kar kajañjañ im al. “I ar jino kajañjañ piano ke kar 6 aõ yiõ, violin ilo 10, im eliktata harp ilo 12,” ej kamelele. Tokelik Susie ear bed ilo Royal College of Music ilo London, England, ñan katak harp. Ear katak iumin emen yiõ ibben juõn kõrã in kajañjañ harp ri Spain eo ebuñbuñ im bar juõn yiõ ilo Paris Conservatoire eo, im bõk juõn degree in nebar ilo kajañjañ im al bareinwõt diploma ko kin kajañjañ harp im katakin kin piano.

Susie ear oktak im kobalok ibben juõn congregation an Ri Kennan ro an Jehovah ilo London. Ijin ear lo itoklimo eo emol im yokwe ibwiljin Ri Kennan ro mõttan. Yokwe eo an ñan Jehovah, ear etal im eddeklok, im kijejeto eo an ñan jerbal eo an Jehovah ear kamõkaj e ñan an karejar ñan e. Menin ear tellok ñan an wujleplok im baptais. “Ke kajañjañ im al ej einwõt juõn jerbal ej juõn wãwen ujleplok kin mour, eindein juõn mour in ujleplok ear jab juõn men eo ear ejelok aõ jelã kake,” Susie ej kile. Ien eo an ñan al im kajañjañ ear diklok ke ear bõk kunan ilo jerbal in kwalok nan eo an Christian kin news eo emõn kin Ailiñ in Anij ilo bokake nan in jiroñ ko an Jesus.​—Matu 24:14; Mark 13:10.

Kiõ ke ewõr juõn joñan ñan an kajañjañ im al, ewi wãwen eñjake eo an? “Jet ien ij lõkatip kinke edik ien ñan aõ kamelmel,” lio ej kamol, “ak ij kajañjañ wõt kin kein kajañjañ ko aõ im lañliñ kin kajañjañ. Kajañjañ im al ej juõn menin letok jen Jehovah. Elaplok aõ lañliñ kake kiõ bwe I ar likit iman mokta jerbal eo an ilo mour eo aõ.”​—Matu 6:​33.

Al im Kajañjañ eo Ej Nebar Anij

Albert im Susie koba ibben iturinlok jiljino million ro jet Ri Kennan ro an Jehovah rej ekkeini air nebar Jehovah Anij kin al im kajañjañ. Ilo kwelok ko an Christian rej kõmmani ilo Kingdom Hall ko ilo 234 ailiñ ko, rej jino im kajemlok kwelok ko air, ijoko remaroñ, ilo air al kin al ko ñan Jehovah. Ilo key eo elap im dik, aibujuij in ton in al ko rej kwalok nan ko rej bedbed ion Jeje ko ilo nebar Jehovah Anij.

Ro otemjej rej bed ilo kwelok eo rej kalaj ainikeir ñan al ilo okmãnãn bwe Jehovah ej juõn Anij ej kea (Al 44). Rej al juõn al in nebar ñan Jehovah (Al 190). Al ko air rej kile lañliñ ko im eddo ko an dolul in Christian jimjãn jimjatin eo, mour in Christian, im kadkad ko kadkadin Christian. Ilo kobaiklok ñan lañliñ eo air ej style in al im kajañjañ ko ekajjo wãweier Ri Kennan ro jen Asia, Australia, Europe, im North im South America rej kajerbali ñe rej kine ton in al ko.b

“Komin al ñõn Jeova juõn al ekãl; komin al ñõn Jeova, kom dri lõl otemjej. Komin al ñõn Jeova, komin nebar etan,” rej nan in kabellok ko an juõn al eo elap an iroij kar jei ilo ran ko an ri jeje psalm. “Komin kwalok lomor eo An jen ran ñõn ran. Komin ba kin An aibujuij iben ro dri ailiñ ko, jerbal ko An, men in bwilõñ iben ro dri ailiñ ko otemjej.” (Sam Ko 96:​1-3) Eñin men eo Ri Kennan ro an Jehovah rej kõmmane ilo bukwon eo am, im rej kir yuk ñan am kobalok ilo al in nebar in. Renaj mõnõnõ in lo yuk ilo imõn Kingdom Hall ko air, ijo kwo maroñ katak wãwen nebar Jehovah kin al im kajañjañ eo ej kamõnõnõik e.

[Kamelele ko itulal]

[Pija ilo page 20]

Al in nebar ko ñan Jehovah