“Auõ An E Jañin Mottok”

“Ejelok armij ej likit pein na ion, bwe auõ eo An e jañin mottok.”​—JON 7:​30.

1. Ta men ko ruo rar tel makitkit ko an Jesus?

“NEJIN armij e ar jab itok bwe armij ren jerbal ñõn E, a bwe En jerbal ñõn ir, im lelok An mour bwe En binmour ñõn ro relõñ,” Jesus Christ ear jiroñ ri jilek ro an. (Matu 20:28) Ñan governor eo an Rome Pontius Pilate, ear ba: “Kin men in I ar lotak, im kin men in I ar itok ñõn lõl, bwe In kennan kin mol.” (Jon 18:37) Jesus ear jelã kin unin an kar mij im ta jerbal eo ear aikwij kõmmane mokta jen an mij. Bareinwõt ear jelã kin ewi joñan ien eo ear aikwiji ñan kajejjet kitien jerbal eo an. Jerbal eo an ion lal einwõt Messiah eo enaj kar jilu im jimettan wõt yiõ aetokin. Ear jinoe kin baptais eo an ilo River Jordan (ilo 29 C.E.) ilo jinoin week in kõkkar eo ej week eo kein ka 70 emwij kanan kake im ear jemlok ilo ien mij eo an ion alal in kaeñtan eo ilo jimettan in ejja week eo wõt (ilo 33 C.E.). (Daniel 9:​24-​27, New World Translation; Matu 3:​16, 17; 20:17-​19) Kin men in, aolepen jerbal eo an Jesus ion lal ear bedbed ion ruo un ko: un eo unin an itok im maroñ eo ñan kõmman men ko ekkar ñan ien.

2. Ewi wãwen Gospel ko rej kwalok kin Jesus Christ, im ewi wãwen ear kwalok an jelã kin jerbal eo an?

² Bwebwenato in Gospel ko rej kwalok bwe Jesus Christ ear juõn emaan eniknik in jerbal eo ear itoitak ilo aolepen enen Palestine, im ear kwalok nan kin news eo emõn kin Ailiñ eo an Anij im kõmman elõñ jerbal ko rekabwilõñlõñ. Ilo tu jinoin jerbal eo elap an Jesus, kar ba kin e: “Auõ eo An e jañin mottok.” Jesus make ear ba: “Ien eo Aõ e jañin jejit.” Itu jemlokin ien jerbal eo an, ear kajerbal nan in “auõ e mottok.” (Jon 7:​8, 30; 12:23) Jelã eo an Jesus kin awa eo, ak ien eo kar karõke ñan an kõmmane jerbal eo an, ekoba katok kin mour eo an ilo mij, alikar ear jelet ta eo ear ba im kõmmane. Ilo ad melele kin men in emaroñ letok ñan kij juõn melele kin kadkad ko kadkadin im wãwen lemnak eo an, im jibañ kij ñan “anõke jenkwõn ne ko neen.”​—1 Piter 2:​21.

Jek ilo Buruõd ñan Kõmanmõn Ankil an Anij

3, 4. (a) Ta eo ear walok ilo juõn kwojkwoj in belele ilo Cana? (b) Etke Nejin Anij ear jumae nan in rejañ eo an Mary bwe en kamadmõde likjap eo kin wine, im ta eo jemaroñ katak jen men in?

³ Yiõ eo ej 29 C.E. Jejjo wõt ran ko rej kab motlok jen ke Jesus ear kãlet jet ian ri kalor ro an. Ir aolep rar itok ñan bukwon in Cana ilo jikin eo an Galilee bwe ren bed ilo juõn kwojkwoj in belele. Jinen Jesus, Mary, ear bed ijo bareinwõt. Emaat den in wine eo. Ñan kamakit e bwe en kamadmõde abañ in, Mary ej jiroñ likao eo nejin: “Ejelok wain ibeir.” Ak Jesus ej uak: “Kõra, ta eo iba im ibõm? auõ eo Aõ e jañin itok.”​—Jon 1:​35-​51; 2:​1-4.

⁴ Uak eo an Jesus, “Kõra, ta eo iba im ibõm?” ej juõn wãwen kajitõk ilo ien etto im ej kalikar bwe ejjab errã ibben men eo kar kajitõk kake. Etke Jesus ejjab errã ibben nan ko an Mary? Eokwe, ej 30 an yiõ kiõ. Jejjo week ko mokta, ear baptais, bõk jitõb kwojarjar, im John ri Baptais eo ear kwalok kajjen einwõt “Lam an Anij, Eo ej bõklok an lõl jerawiwi!” (Jon 1:​29-​34; Luk 3:​21-​23) Kiõ ej aikwij bõk nan in tel ko jen Anij eo Eutiejtata eo ear jilkintok e. (1 Dri Korint 11:3) Ejelok juõn, meñe juõn uan family eo an ak nukin, emaroñ jumae jerbal eo Jesus ear itok in kõmmane ijin ion lal. Uak eo an Jesus ñan Mary ej kwalok joñan an bin buruen ñan kõmanmõn ankil an Jemen! Kij bareinwõt jej aikwij jek ilo buruõd ñan kajejjet kitien “aolepen kõmõn emõn” ñan Anij.​—Ekklisiastis 12:13.

5. Ta men in bwilõñ eo Jesus Christ ear kõmmane ilo Cana, im men in ear jelet ro jet ilo wãwen et?

⁵ Ke ear melele kin nan ko an nejin, ilo mõkaj Mary ear kõtlok e im jiroñ ri karejar ro: “Men eo jabrewõt ej ba ñõn kom, komin kõmõnmõne.” Im Jesus ej kamadmõde abañ eo. Ej jiroñ ri karejar ro bwe ren etteñ jãbi dekã ko kin den, im ej ukõt den eo ñan wine eo ennotata. Men in ej walok einwõt juõn men in kajiniet armij ñan kajur eo ej kõmman jerbal ko rekabwilõñlõñ an Jesus, im ear lelok juõn kakõlle bwe jitõbõn Anij ear bed ion. Ke ri kalor ro rekãl rej lo men in kabwilõñlõñ in, ej kakajurlok tõmak eo air.​—Jon 2:​5-​11.

Kijejeto kin Mweo Imõn Jehovah

6. Etke Jesus ear illu kin ta eo ear loe ilo temple eo ilo Jerusalem, im ta eo ear emmakit in kõmmane?

⁶ Ejjabto im ej ien manrak ilo 30 C.E., im Jesus kab ri jerbal ro mõttan rej etetal lok ñan Jerusalem ñan bed ilo Kwojkwoj in Kijone eo. Ke rar bed ijo, ri kalor ro an rej lo ri Tel eo air emmakit ilo juõn wãwen einjuõn jen mokta. Ri Jew ro me rekibbon rej wiakaki men in mour ko im bao ko ñan katok kaki iloan wõt temple eo. Im rej wiakaki men kein kin elap wõnãir ñan ri kabuñ in Ri Jew ro retiljek. Kin an Jesus illu, ej emmakit. Ej kõmman juõn kein deñdeñ in ekwol im kadiojlok ri wia ro. Ej ukõje table ko, im lutõkelok money ko an ro rej wia kake money. “Komin bõklok men kã jen iji!” ej kakien ro rej wiakake bao muli ko. Ke ri kalor ro an Jesus rej lo wãwen an Jesus emmakit ilo kijejeto, rej kememej kin nan in kanan eo kin Nejin Anij: “Aõ kijejeto kin mweo imõm e ar kãñiõ.” (Jon 2:​13-​17; Sam 69:9) Kij bareinwõt jej aikwij kejbãrok kij jen ad kõtlok bwe jitõbõn lal in en katton kabuñ eo ad.

7. (a) Ta eo ej kamakit Nicodemus ñan lolok Messiah eo? (b) Jemaroñ katak ta jen an Jesus kwalok nan ñan juõn kõrã in Samaria?

⁷ Ke ear bed ilo Jerusalem, Jesus ear kõmman elõñ men ko rekabwilõñlõñ, im elõñ armij rar tõmak ilo e. Nicodemus, juõn uan ro ilo Sanhedrin eo, ak mõn ekajet eo elap an ri Jew ro, ear bareinwõt bwilõñ kin Jesus im ear itok ñan e ilo boñ bwe en kalaplok an katak kin e. Inem, Jesus im ri kalor ro an rar bedwõt ilo “ene Judia” iumin ralitõk alliñ ko, bwe ren kwalok nan im kõmman ri kalor ro. Bõtab, elikin an Jon ri Baptais bed ilo kalbuj, rar etal jen Judea ñan Galilee. Ke rar toloñe Samaria, Jesus ear bõk ien eo emõntok ñan kwalok nan ibben juõn kõrã in Samaria. Men in ej kabellok juõn ial bwe elõñ ri Samaria ro ren ukwelok im tõmak. Kij bareinwõt jen ekkõl wõt kin ien ko remõn ñan konono kin Ailiñ eo.​—Jon 2:​23; 3:​1-​22; 4:​1-​42; Mark 1:​14.

Kalaplok Jerbal in Katakin ilo Galilee

8. Jerbal ta eo Jesus ear jinoe ilo Galilee?

⁸ Mokta jen “auõ” in mij eo an Jesus, elõñ men ko ej aikwij kõmmani ilo jerbal eo an Jemen ilañ. Ilo Galilee, Jesus ej jinoe juõn jerbal elaplok jen eo ear kõmmane ilo Judea im Jerusalem. Ej etal “ilo aolepen Galili im katakin ilo imõn kwelok ko air, im kwalok gospel an ailiñ in lõñ, im kemour nañinmij otemjej im mõjino otemjej iben armij rõn.” (Matu 4:​23) Nan in aitwerõk ko an: “Komin ukwelok ibemi; bwe ailiñ in lõñ ebak,” ej walok ilo aolepen jikin eo. (Matu 4:​17) Ilo jejjo wõt alliñ ko, ñe ruo ri kalor ro an John ri Baptais rej itok ñan lo kin mejeir make kin jerbal ko an Jesus bwe ren maroñ bõklok juõn report kin e, ej jiroñ ir: “Komin ilok, im kennanek Jon men ko kom ar loi im roñjaki; ro rebilo rej lolokjen, kirro ro rej etetal, leper ro karreoik ir, ro re jaroñroñ rej roñlokjen, ro remij rej jerkakbiji, im kwalok gospel ñõn ro dri jeramel. Im emõnõnõ jabrewõt eo e jamin lo men in latibñil ilo Iõ.”​—Luk 7:​22, 23.

9. Etke jar ko rej kobalok ibben Christ Jesus, im ta eo jemaroñ katak jen men in?

⁹ ‘Bwebwenato ko remõn kin Jesus rej jededlok ibelakin ailiñ eo,’ im elõñ armij rej kobalok ibben​—jen Galilee, Decapolis, Jerusalem, Judea, im ijo rãjet in River Jordan. (Luk 4:​14, 15; Matu 4:​24, 25) Rej itok ñan e jab kin an kamadmõde elõñ nañinmij ko ilo kabwilõñlõñ wõt ak kin nan in katakin ko an rekaitoktoklimo. Ennan eo an ej tõbar buruen armij im rejañ ir. (Matu 5:1–​7:​27) Nan ko an Jesus rej aibujuij. (Luk 4:​22) Jar ko rej “bwilõñ kin An nan in katak,” bwe ej konono kin nan ko rekajur jen Jeje ko . (Matu 7:​28, 29; Luk 4:​32) Wõn eo ejjab kõnan ruaktok ñan kain armij rot in? Kij bareinwõt jekõnan kaddeklok kilen katakin armij bwe armij ro emol burueir ren reel ñan mol eo.

10. Etke ro ilo bukwon in Nazareth rej kajeoñ in mõn Jesus, im etke rejjab lo tõbrak?

¹⁰ Bõtab, ejjab aolep ro rej roñjake Jesus rej mõnõnõ in bõk katak ko. Ilo tu jinoin jerbal eo an, ke ear katakin armij ro ilo mõn kwelok eo ilo bukwon eo an ilo Nazareth, rar kajeoñ in mõn e. Meñe armij ro ilo bukwon eo an rej bwilõñ kin “nan in joij,” ko an rekõnan lo men in bwilõñ ko. Bõtab, jen an kõmman elõñ men in bwilõñ ko ijo, Jesus ej kajerwawaik ir einwõt ro rekibbon im ejelok air tõmak. Kin air obrak kin illu, ro rej bed ilo imõn kwelok eo rej jutak, jibwe Jesus, im añinlok e ñan juõn tol ijo ej jirimle bwe ren kalõre kin tubõran. Ak ej ko jen ir. “Auõ” in mij eo an ejañin mottok.​—Luk 4:​16-​30.

11. (a) Etke jet ri tel in kabuñ ko rej itok ñan roñjake Jesus? (b) Etke rej naruõn Jesus kin an kokkure ran in Sabbath eo?

¹¹ Ri tel ro an kabuñ ko​—scribe ro, Pharisee ro, Sadducee ro im ro jet​—ekkã air bed ijo Jesus ear kwalok nan ie. Elõñ iair rej bed ie, jab ñan roñjake im katak jen e, ak ñan kabuk ruõn im kajeoñ in jibwe kin An in nan. (Matu 12:38; 16:1; Luk 5:​17; 6:​1, 2) Ñan wanjoñok, ke ear bed ilo Jerusalem kin Kwojkwoj in Kijone eo ilo 31 C.E., Jesus ear kejmour juõn emaan eo ear nañinmij iumin 38 yiõ ko. Ri tel in kabuñ ko an ri Jew ro rar naruõn Jesus kin an kokkure ran in Sabbath eo. Ej uak: “Jema ej jerbal ñõn ien in, im Ña Ij jerbal.” Kiõ ri Jew ro rej naruõn kin an blaspheme kin an kar ba bwe ear Nejin Anij ke ear naetan Anij Jemen. Rej kabukõt juõn kilen ñan air mõn Jesus, ak e im ri kalor ro an rej etal jen Jerusalem lok ñan Galilee. Eindein, ej juõn men in meletlet bwe jen bõprae ad jumae ri kijirãt ro elañe ejjab juõn men in aikwij ke jej niknik wõt ilo jerbal in kwalok kin Ailiñ eo im kõmman ri kalor ro.​—Jon 5:​1-​18; 6:1.

12. Ewi joñan an kar Jesus jerbale territory eo ilo Galilee?

¹² Iumin juõn im jimettan yiõ ko, Jesus ej kõmman jerbal in kwalok nan eo an ilo Galilee wõt, im lolok wõt Jerusalem ñan bed ilo kwojkwoj ko jilu an Ri Jew ro ilo yiõ ko otemjej. Ikijen men ko ear kõmmani, ear kõmman jilu trip in kwalok nan ko ilo Galilee: eo mokta ibben ri kalor ro emen rekãl, kein karuo ibben ri jilek ro 12, im juõn eo elaplok ke ear jilkinlok ri jilek ro emwij kar kamineneik ir. Elukkun lap air kar kwalok kin mol eo ilo Galilee!​—Matu 4:​18-​25; Luk 8:​1-3; 9:​1-6.

Kwalok Nan ilo Beran ilo Judea im Perea

13, 14. (a) Ien et eo Ri Jew ro rej bukõt ñan air jibwe Jesus? (b) Etke ri jilek ro an Ri Pharisee ro rej likjap in jibwe Jesus?

¹³ Ej kiõ ien añõneañ ilo 32 C.E., im “auõ” eo an Jesus ej bed wõt iman. Kwojkwoj in Imõn Kabbed eo ej ebak. Ro jatin Jesus rej rejañ e: “Kwon ilok jen ijin, im ilok ñõn Judia.” Rekõnan bwe Jesus en kwalok kajur ko an rekabwilõñlõñ ñan ro otemjej rej bed ilo Jerusalem kin kwojkwoj eo. Ak, Jesus ej jelã kin uwõta eo. Inem ej ba ñan ro jatin: “I jab ilok ñõn kwojkwoj in kiõ: bwe ien eo Aõ e jañin jejit.”​—Jon 7:​1-8.

¹⁴ Elikin an kaetoklok an bed ilo Galilee, Jesus ej etal ñan Jerusalem “jab alikar, a einwõt ilo etino.” Ri Jew ro emol air bukõte ilo kwojkwoj eo, im ba: Ewi Leo?” Ke enañin ilukwõn kwojkwoj eo, Jesus ej wanliñ iloan temple eo im ilo beran ej jino an katakin armij. Rej bukõt kilen jibwe e, bõlen ñan kalbuj e ak ñan mõn e. Ak, rejjab lo tõbrak kinke ‘auõ eo an e jañin mottok.’ Elõñ kiõ rej tõmak e. Ri jilek ro me Pharisee ro rar jilkinlok ir ñan jibwe Jesus rar jeblak ilo ejelok tõbrak, im ba: “Ejelok armij e ar konono einwõt armij in.”​—Jon 7:​9-​14, 30-​46.

15. Etke Ri Jew ro rej jibwe dekã ko ñan kade Jesus, im jerbal in kwalok nan ta eo ej ijjino kiõ?

¹⁵ Aitwerõk eo ikõtan Jesus im ri jumae Ri Jew ro kar wõnmanlok ke ej katakin armij kin Jemen ilo temple eo ilo ien kwojkwoj eo. Ilo ran eo eliktata in kwojkwoj eo, ilo air illu kin nan ko an Jesus kin mour eo an ilañ mokta jen an kar itok einwõt juõn armij, Ri Jew ro rar jibwe dekã ko ñan kade. Ak ej kũttiliek im ko ilo ejelok jorrãn ear walok ñan e. (Jon 8:​12-​59) Ke ear bed ilikin Jerusalem, Jesus ear kõmman juõn jerbal in kwalok nan elap ilo Judea. Ej kãlet 70 ri kalor ro im, elikin an lelok jet nan in jiroñ ko, ej jilkinlok ir karuolok ñan jerbal ilo territory eo. Rej etal imanlok ilo aolep bukwon im jikin kwelok ko ijo Jesus, ibben ri jilek ro, rar karõk ñan air etal ie.​—Luk 10:​1-​24.

16. Jen men in uwõta ta eo Jesus ej ko jen e ilo Kwojkwoj in Lelok eo, im ilo jerbal ta eo ej bar boub kake?

¹⁶ Ilo ien bio ilo 32 C.E., “auõ” eo an Jesus ear ebaktok. Ej itok ñan Jerusalem kin Kwojkwoj in Lelok. Ri Jew ro rej bukõt wõt ñan mõn e. Ke Jesus ej etetal ikõtan jur ko ilo temple eo, rej kabole. Rej bar naruõn e kin blaspheme, im rej bõk dekã ko ñan mõn e. Ak einwõt ear kõmmane mokta, Jesus ear ko. Ejjabto ej bed ion ial eo im katakin, ilo ien in jen jikin kwelok ñan jikin kwelok im bukwon ñan bukwon ilo Perea, ijo tu-rãjet in Jordon jen Judea. Im elõñ rej tõmak e. Ak juõn kejelã kin Lazarus jeran jitenburu ibben ej bar karoltok e ñan Judea.​—Luk 13:33; Jon 10:20-​42.

17. (a) Ennan ta eo eaorõk Jesus ej bõke ke ear kwalok nan ilo Perea? (b) Ta eo ej kwalok bwe Jesus ej kile unin men eo ej aikwij kõmmane im kin ien an walok men ko?

¹⁷ Ennan eo eaorõk ej jen Martha im Mary, limaro jein im jatin Lazarus, ro rar jokwe ilo Bethany ilo Judea. “Iroij, lo, eo Kwoj yokwe e nañinmij,” ennan eo ej ba. “Nañinmij in e jab bwe en mij,” Jesus ej uak, “a kin an Anij aibujuij, bwe Nejin Anij en aibujuij kake.” Ñan kajejjet kitien karõk in, Jesus ej bedwõt ijo jikin eo ej bed ie iumin ruo ran ko. Inem ej ba ñan ri kalor ro an: “Jen bar ilok ñõn Judia.” Ilo jab mõnõnõ rej ba: “Rabbi, ekeinlok dri Ju ro r’ar bukot bwe ren kare Yuk; im Kwoj bar ilok ñõn ijo ke?” Ak Jesus ej jelã bwe “auõ ilo ran,” ak ien eo Anij ear kõtlok bwe en kõmman jerbal eo an ion lal, e kadu. Elukkun jejjet an jelã kin ta eo ej aikwij kõmmane im etke.—Jon 11:​1-​10.

Juõn Men in Kabwilõñlõñ Ejelok Juõn Ear Maroñ Kajekdone

18. Ke Jesus ej tõkeãktok ilo Bethany, ta eo ej walok ie, im ta eo ej walok elikin an tõbar ijo?

¹⁸ Ilo Bethany, Martha ej eo moktata ear wõnmaik Jesus, ear ba: “Iroij, elañe Kwo kw’ar ber ijin, jeiõ im jãtiõ man e jamin kar mij.” Mary im ro rar itok ñan mweo imwiir rej itok ilokan tok. Aolepeir rej jañ. “Ewi ijo kom ar likit e? Jesus ej kajitõk. Rej uak: “Iroij, kwon itok im loe.” Ke rej tõkeãktok ñan imõn wuliej eo​—juõn roñ im juõn ejman ej bed ion​—Jesus ej ba: “Komin jolok ejman eo.” Ilo air jaje ta eo Jesus ej bojak in kõmmane, Martha ej jumae: “Iroij, ilo ien in e buõl: bwe emen ran e ar mij.” Ak Jesus ej kajitõk: “I ar jab ba ñõn yuk ke, Elañe kwoj tõmak, kwo naj lo aibujuij an Anij?”​—Jon 11:17-​40.

19. Etke Jesus ej jar ilobwilij mokta jen an kar kajerkakbijeik Lazarus?

¹⁹ Ke rar jolok ejman eo ear kalibubu imõn wuliej eo an Lazarus, Jesus ej jar ilo juõn ainikien elaj bwe armij ren jelã bwe men eo ej iten kõmmane ear kõtõbrake ikijen kajur eo an Anij. Inem ej lamõj: “Lazerõs, kwon itok!” Lazarus ej itok neen im pein rej bed wõt ilo an mwij kitimi kin nuknuk in mij im turin mejen lukwoje kin bwinin mij. “Komin kõtlok e bwe en ilok,” Jesus ej ba.​—Jon 11:41-​44.

20. Ro rej lo an Jesus kajerkakbijeik Lazarus ewi wãwen air kar emmakit?

²⁰ Ilo air lo men in kabwilõñlõñ in, elõñ ian Ri Jew ro rar itok in kainemõn Martha im Mary rej kiõ tõmak ilo Jesus. Ro jet rej ilok ñan kennanik Pharisee ro kin ta eo ear walok. Ewi wãwen rar emmakit? Ilo mõkaj, ir im priest ro relap rej kokweloklok ro uan Sanhedrin eo. Ilo air mijak, rej aol: “Ta eo jej kõmõne? bwe armij in Ej kõmõnmõn elõñ kakõle. Elañe jej likit E einwõt, armij otemjej re naj tõmak E; im dri Rom re naj itok im kokkure jiker im bwijer.” Ak Caiaphas priest eo elap ej ba ñan ir: “Kom jab jela ñõn jirik; Im kom jab lemnok bwe emõn ñõn kij bwe juõn armij en mij kin armij rõn, im bwij otemjej ren jab joko.” Kin men in, jen ran eo im elikin rej bebe ibben don bwe ren mõn Jesus.​—Jon 11:45-​53.

21. Men in kabwilõñlõñ eo kin jerkakbiji eo an Lazarus ear jinoin ta eo?

²¹ Inem kar ikijen an karumij an itok ñan Bethany, Jesus ear maroñ kõmman juõn men in bwilõñ me ejelok juõn ear maroñ kajekdone. Ilo an Anij kamaroñ e, Jesus ear kajerkakbijeik juõn emaan eo ear mij iumin emen ran ko. Ri utiej ro ilo Sanhedrin rar bareinwõt aikwij kile im ekajete Ri Kõmman Men in Bwilõñ eo im liakelok e ñan mij! Men in bwilõñ in ear jerbal einwõt jinoin juõn oktak elap ilo jerbal in kwalok nan eo an Jesus​—juõn oktak jen ien eo ke “auõ eo An e jañin mottok” ñan ien eo ke “auõ e mottok.”

Ewi Wãwen Kwonaj Kar Uak?

• Ewi wãwen Jesus ear kwalok bwe ear jelã kin jerbal eo an letok in Anij?

• Etke Jesus ej jumae nan in rejañ eo an jinen kin wine eo?

• Ta eo jemaroñ katak jen wãwen eo Jesus ear jerbal ibben ri jumae ro an?

• Etke Jesus ej karumijlok an emmakit ñan nañinmij eo an Lazarus?

[Pija]

Jesus ear kajerbal kajur eo an ñan kajejjet eddo eo an letok in Anij