Jar Ewõr Ke Emõnin?

ILO jet ien, enañin aolep kajjojo armij ej eñjake aikwij eo ñan jar. Ilo mol, armij ro ilo enañin aolep kabuñ ko rej kaorõk jar. Ñan wanjoñok, thousand alen ilo juõn ran, juõn Buddhist emaroñ elij an jar “Ij likit aõ tõmak ilo Amida Buddha.”

Ilo lemnak abañ ko rej waloktok wõt ilo belakin lal, ej menin kõmmanwa ñan kajitõk: Ta eo armij rej kõtmene ñan air tõbare ilo jar? Aolep jar kein ewõr ke emõniir?

Etke Armij Rej Jar?

Elõñ armij in Asia kan rej jar ñan armij ro bwijiir im ñan anij wan ko an Shinto ak Tao. Rej kõmman eindein ilo air kejatdikdik ñan ellã ilo katak ko ilo school, kamadmõd ilo jonikõn ko remõn, ak bõprae nañinmij ko. Ikijen jibadbad ko air, Ri Buddhist ro rej kejatdikdik ñan air bõk melele. Ri Hindu ro rej jar ñan anij im anij kõrã ro emõn ibbeir ñan bõk jelãlokjen, mweie, im kejbãrok.

Jet Catholic rej kejatdikdik ñan kajerammõn armij ikijen air wujlepelok mour ko air einwõt monk ro ak nun (virgin) ro im bed ilo imõn monk ak imõn nun ko, im rejjab bõjrak jen air jar. Million Catholic ro rej bukõt emõn jen Mary ilo air jar im ba nan ko rej kili, bõlen kin jibañ eo an marmar ko rej marõki im kajerbali ñan jar. Ilo ailiñ in Asia kan, elõñ armij rej kajerbal wheel in jar ko. Protestant ro rej elij nan ko ilo Jar eo an Iroij, meñe rej maroñ bar kwalok eñjake ko air ñan Anij ilo nan ko air make. Elõñ Ri Jew rej etal ilo kõtan ko raetok ñan air jar ilo Turilik in Worwor eo ilo Jerusalem, kin kejatdikdik eo ñan bar kajeblaktok temple eo im juõn ebeben eo ekãl in jerammõn im ainemõn.

Meñe million rej niknik ilo air jar, jukjuk im bed eo an armij ej laplok wõt an jorrãn kin abañ ko in jeramel, añuri juõn men, family ko rej jebel, kõtõrãik kien, im tarinae. Emaroñ ke eindein kinke aolep armij rein rejjab jar ilo wãwen eo ejimwe? Ilo mol, ewõr ke en ej lukkun roñjake jar ko?

Ewõr Ke En Ej Roñjake Jar Ko?

Jar ko rejjab maroñ kõmman jabdewõt emõn mae ien ewõr en ej roñjaki. Ñe juõn armij ej jar, alikar ej tõmak bwe ewõr juõn eo ilo wãwen jitõb jejjab loe ej roñjake. Bõtab, jar ko rejjab etal ikijen ainikien ko. Elõñ armij rej tõmak bwe juõn emaroñ read i lemnak ko an eo ej jar. Emaroñ wõn in?

Ikijen wãwen eo lemnak ko rej ejaak ilo billion kij ko ilo enbwinin armij me rej ejaak itulik in kamelij eo ad menin ej juõn men elap an ittino ñan ro rej etale im katak men kein. Ak, ej menin kõmmanwa, bwe Eo ear jõknalemen kamelij eo emaroñ read i kain lemnak rot kein. Eo ear kõmman menin ejelok bar juõn ijellokin Ri Kõmanman eo ad, Jehovah Anij. (Sam 83:18; Reveles̃õn 4:​11) Jar ko rej aikwij kajju ñan e. Ak Jehovah ej eoroñ ke aolepen kain jar rot kein?

Aolep Jar ko Rej Roñjaki Ke?

King David in Israel eo etto kar juõn emaan in jar. Einwõt juõn ri jeje Sam eo ear kakõrmol ilo kwojarjar, ear al: “O Kwe kwoj roñjake jar, ñõn Kwe kõniek otemjej e naj itok.” (Sam 65:2) Jehovah ej maroñ melele jar ko ej walok ainikeir ilo jabdewõt thousand kajin ko armij rej konono. Ke mol eo in bwe ejelok lemnak an armij emaroñ jerbale elap melele ejjab melelen menin bwe Anij ejjab maroñ roñjake aolep ro otemjej rej jar ñan e ilo juõn wãwen eo emõn.

Ak, Jesus Christ​—juõn armij in jar bareinwõt​—ear kwalok bwe ejjab aolep jar rej kamõnõnõik Anij. Lale ta eo Jesus ear ba kake kin manit eo ear buñbuñ ilo ien ko mantin elijinmen jar ko rej kili. Ekkar ñan Catholic Jerusalem Bible eo, ear ba: “Ilo jar ko ami komin jab elij bata einwõt dri pegan: bwe rej lemnok naj roñjake ir kin an lõñ air konono.” (Matthew 6:7) Jejjab maroñ watõk an Jehovah roñjake jar ko rejjab kwalok mol in eñjake ko ad.

Ilo an kalikar unin an jet jar jab kamõnõnõik Anij, juõn jabõn kennan ilo Bible eo ej ba: “Eo ej jebollok lojilñen jen eoroñ kien eo​—jar eo an ej men in jõjõik wõt.” (Jabõn Kennan Ko 28:9) Bar juõn jabõn kennan ej ba: “Jeova ej etolok jen dri nana; a Ej eoroñ jar an dru wãnik.” (Jabõn Kennan Ko 15:29) Ilo juõn ien ke ri tel ro an Judah eo etto rar inek bwid eo eddo, Jehovah ear keañ: “Im ñe komij erlokwe peõmi, I naj binej meja jen kom; aet, ñe komij kõmõn elõñ jar, I jamin eoroñ: peõmi re lõñ kin bõtõktõk.”​—Aiseia 1:​1, 15.

Ri jilek Peter ear kwalok bar juõn men me emaroñ kõmman bwe Anij en jab buñburuen kake jar ko. Peter ear je: “Ein drein, lõmaro, komin jokwe iben belemi kin jelalokjen, im koutiej kõra rõn, einwõt jãbi remõjino jen kom, im ro dri jolit ibemi kin joij in mour: bwe en ejelok men in boprae jar ko ami.” (1 Piter 3:7) Jar ko an emaan eo ear kajekdon nan in kakabilek rot in emaroñ jab wanliñ ellã lok jen tõrak in mweo imõn!

Alikar, ewõr jet men in aikwij ko rej aikwij kajejjeti elañe Anij enaj roñjake jar ko. Bõtab, elõñ ro rej jar rejjab lemnak in kõmmane men eo Anij ej aikwij ad kõmmane. Eñin unin meñe rej kate ir im kõmman elõñ jar ko men in ejjab walok ilo juõn lal emõnlok.

Inem, bwe Anij en roñjake jar ko ad, ta eo ej aikwiji jen kij? Uak eo ej atartar ion un eo unin ad jar. Ilo mol, elañe jekõnan jelã ewi tokjen jar ko, jej aikwij jelã kin meleleir. Etke Jehovah ear kabellok ial eo bwe jen maroñ konono ibben?

[Etan eo ear kõmman pija ilo page 3]

G.P.O., Jerusalem