Debij Wõt Buñten Nee Eo Ibben Dolul Eo An Jehovah
“Im Anij in ainemõn . . . en kowãppen kom ilo men ko remõn otemjej ñõn kõmõnmõn ankil An.”—DRI HIBRU 13:20, 21.
1. Jete oran armij in lal in, im jete ro rej bwine ir einwõt ro uan jet kabuñ?
ILO yiõ eo 1999, oran armij in lal in ear tõbar jiljino billion! Book eo The World Almanac ej kwalok bwe jen oran in 1,165,000,000 rej Muslim; 1,030,000,000 rej Roman Catholic; 762,000,000 rej Hindu; 354,000,000 rej Buddhist; 316,000,000 rej Protestant; im 214,000,000 rej Orthodox.
2. Ta eo jemaroñ ba kake kin wãwen eo an kabuñ ko rej bed rainin?
2 Kin jebelbel im lakabwokbwok eo an kabuñ ej bed rainin, aolep million armij rein remaroñ ke jerbal ekkar ñan ankil an Anij? Jab, “bwe Anij e jab Anij in airwaro, a in ainemõn.” (1 Dri Korint 14:33) Ilo wãwen eo juõn, ta kin jimjãn jimjatin ri karejar ro an Jehovah ibelakin lal? (1 Piter 2:17) Etale eo ilo tibdikin ej kamol bwe ‘Anij in ainemõn eo ej keboj ir ilo men ko remõn otemjej ñan kõmanmõn ankil an.’—Dri Hibru 13:20, 21.
3. Ta eo ear walok ilo Jerusalem ilo Pentecost 33 C.E. eo, im etke?
3 Bwebõta, oran ro rej kobalok ibben Ri Kennan ro an Jehovah ejjab juõn menin beek ñan etale elañe rej lañliñ kin kõnan eo ekwojarjar; ak elañe oran eo ej kalikar an laplok ej kabwilõñ Anij. Ear jab kãlet ri Israel ro kinke rar “lõñ tata” ian ailiñ otemjej. Ilo mol rar “eiet tata” iair. (Deuteronomy 7:7, New World Translation) Ak kinke Israel ear kamol an jab tiljek, ilo Pentecost eo ilo 33 C.E., Jehovah ear lelok kõnan eo an ñan congregation eo ekãl eo ear ejaak in ri kalor ro an Jesus Christ. Jitõb kwojarjar eo an Jehovah ear kãlet ir im ilo kijejeto rar etal wõt im keañ kin mol eo kin Anij im Christ ñan ro jet.—Jerbal 2:41, 42.
Emakijkij An Emmakit Manlok
4. Etke kwonaj kar ba bwe congregation eo an Christian jinoin ear emakijkij an emmakit manlok?
4 Ilo ebeben eo kein kajuõn, Christian congregation eo ear emakijkij an emmakit manlok, kabellok territory ko rekãl, kõmman ri kalor, im bõk elaplok jelã kin karõk ko an Anij. Christian ro jinoin rar debij wõt buñten nee eo ibben melele eo ilo jitõb kar letok ikijen letter in kakõrmol ko rekwojarjar. Ilo air bõk lujur jen lolok ko an ri jilek ro im ro jet, rar kõtõbrak jerbal in kwalok nan eo air. Emõn air kar likit menin ilo Jeje in Christian Greek ko.—Jerbal 10:21, 22; 13:46, 47; 2 Timote 1:13; 4:5; Dri Hibru 6:1-3; 2 Piter 3:17, 18.
5. Etke dolul eo an Anij ej kõmman wõnmanlok rainin, im etke jej aikwij debij wõt buñten nee eo ibben?
5 Einwõt Christian ro jinoin, Ri Kennan ro an Jehovah ran kein rar ejaak jen ijjino ko redik. (Zechariah 4:8-10, NW) Jen jemlokinlok ebeben eo kein ka 19, ear wõr menin kamol eo ealikar bwe jitõb eo an Anij ej bed ion dolul eo an. Kinke jaar atartar, jab ion kajur eo an armij, ak ion ial in tel eo an jitõb kwojarjar, jaar etal wõt im kõmman wõnmanlok ilo melele eo ad kin Jeje ko im ilo ad kõmanmõn ankil an Anij. (Zechariah 4:6, NW) Kiõ ke jej bed ilo “ran ko eliktata,” elap tokjen bwe jen debij wõt buñten nee eo ibben dolul eo ej kõmman wõnmanlok an Jehovah. (2 Timote 3:1-5) Ad kõmman eindein ej kamaroñ kij ñan debij wõt kejatdikdik eo ad bwe en mour im bõk kunad ilo lelok juõn kennan kin Ailiñ eo emwij an jutak an Anij mokta jen an jemlok eo eliktata bõk jukjuk im bed in.—Matu 24:3-14.
6, 7. Ta men ko jilu jenaj etali ijo dolul eo an Jehovah ear emmakit manlok ie?
6 Iloan lajrak ko ad ej ro rar jino air kobatok ibben dolul eo an Jehovah ilo 1920 ko, ’30 ko, im ’40 ko. Ilo yiõ kein jinoin, wõn iad emaroñ kar kalmenlokjen kin eddeklok eo ekabwilõñlõñ in dolul eo tok ñan rainin? Lemnak kin kabwilõñlõñ ko emwij tõbari ilo bwebwenato in ien kein ad! Emol ej menin jinekjej ilo jitõb, ñan lale ta eo Jehovah ear kõtõbrake ikijen armij ro an emwij karõk ir ikijen theocracy.
7 David eo etto ear lukkun bwilõñ ke ear kalmenlokjen kin jerbal ko remõn an Jehovah. “Elañe I naj kõnan kwalok im konono kaki”, ear ba “relõñ jen aõ maroñ in bwini.” (Psalm 40:5, NW) Jej jelmae ejja joñan maroñ in wõt ewõr joñan, ilo ad jab maroñ kwalok elõñ men ko relap im jerbal ko an Jehovah tellokin nebari ilo ran kein ad. Mekarta, jen lale jilu men ko dolul eo an Jehovah ear emmakit manlok ie: (1) wõnmanlok ilo melele ilo jitõb, (2) juõn jerbal in kwalok nan eo ej emõnlok im eraklok, im (3) kajimwe ko ilo ien ejejjet ilo karõk ko an dolul eo.
Kamolol kin Melele ilo Jitõb
8. Ilo an errã ibben Jabõn Kennan Ko 4:18, ta jelã eo ilo jitõb ear kamaroñ kij ñan melele kin Ailiñ eo?
8 Ikijen wõnmanlok ilo melele ilo jitõb, Jabõn Kennan Ko 4:18 ear kamole. Ej ba: “A ial an ro dru wãnik ej einwõt maram ilo ien rantak, eo ej maramlok wõt ñõn ran e wãppen.” Jej kamolol kin wõnmanlok eo ilo melele ilo jitõb emwij ad tõbare! Ilo convention eo ilo Cedar Point, Ohio, ilo 1919, Ailiñ in Anij rar kalikare. Jehovah ej kajerbal Ailiñ eo ñan kokwojarjar etan im kamol kajur bõtata eo an. Ilo mol, melele ilo jitõb ear kamaroñ kij ñan ad melele bwe jen Jenesis ñan Reveles̃õn, Bible ej kamole karõk eo an Jehovah ñan kokwojarjar etan ikijen Ailiñ eo Nejin ej iroij ion. Ijin ebed kejatdikdik eo elap an ro otemjej rej yokwe wãnik.—Matu 12:18, 21.
9, 10. Ilo 1920 ko, ta eo kar katak kake kin Ailiñ eo im kin dolul ko ruo rej jumae don, im ewi wãwen an menin jibañ kij?
9 Ilo Cedar Point convention eo ilo 1922, ri konono eo elap, J. F. Rutherford, ear kõketak armij ro an Anij ñan “kareelel, kareelel, kareelel, King eo im ailiñ eo an.” Ilo ennan eo rar je kin “Lotak eo an Ailiñ eo,” jeje in The Watch Tower in March 1, 1925, ear kareellok ñan jelã eo ilo jitõb ikijen kanan ko rar jitõñlok ñan jutak eo an Ailiñ in Anij ilo 1914. Ear bareinwõt melele ilo 1920 ko bwe ewõr ruo dolul ko rej jumae don—eo an Jehovah im eo an Satan. Tarinae eo ej ikõtair, im jenaj bed ilo tujo ej win ilo ad debij wõt buñten nee eo ibben dolul eo an Jehovah.
10 Ewi wãwen an melele in ilo jitõb jibañ kij? Kinke Ailiñ in Anij im King eo Jesus Christ rejjab jen lal, kij bareinwõt jejjab kõnan mõttan lal in. Ilo ad kajenolok wõt kij jen lal, jej kwalok bwe jej jutak kin mol eo. (Jon 17:16; 18:37) Ñe jej lo abañ ko rej lakabwokbwok rej kabañ jukjuk im bed in enana, elap ad kamolol bwe jejjab mõttan lal in an Satan! Im elap jerammõn ibbed kinke jej jokane ilo jitõb iloan dolul eo an Jehovah!
11. Ta ãt eo ilo Jeje ko armij ro an Anij rar bõke ilo 1931?
11 Ilo Columbus, Ohio, convention eo ilo 1931, ear jejjet kajerbale ennan eo ilo Aiseia 43:10-12. Ri school in Bible ro rar bõk ãt in ejenolok Ri Kennan ro an Jehovah. Juõn jerammõn elap ñan kejelã kin etan Anij bwe ro jet ren maroñ kir etan ñan bõk lomor!—Sam 83:18; Dri Rom 10:13.
12. Ta jelã eo ilo jitõb kin jar eo elap kar letok ilo 1935?
12 Mokta jen yiõ 1930 ko, elõñ ian armij ro an Anij rar jab lukkun jelã kin kejatdikdik eo air kin mour eo ilo ran ko rej itok. Jet rar lemnak kin mour ilañ ak rar bed wõt im jab makitkit kin katak ko ilo Bible kin juõn paradise ilal. Ilo Washington, D.C., convention eo ilo 1935, ear menin bwilõñ in jelã bwe jarlepju eo, ak jar eo elap, ilo Reveles̃õn chapter 7 ej juõn class kin juõn kejatdikdik ñan lal in. Jen ien eo, aintok eo an jar eo elap ear emmakit manlok wõt kin juõn mõkaj eo elaplok. Jejjab kamolol ke bwe kile jar in elap ejjab juõn menin nojak ñan kij? Mol eo ilo aintok eo an armij ilo oran eo elaplok jen ailiñ otemjej, bwij, im konono rej lujur kij ñan boub ilo jerbal eo ke jej debij wõt buñten nee eo ibben dolul eo an Jehovah.
13. Ta menin konono eo elap kar kalikare ilo St. Louis convention eo ilo 1941?
13 Menin konono eo elap im jukjuk im bed eo an armij ej aikwij lemnak kake kar kalikare ilo St. Louis, Missouri, convention eo ilo 1941. Ej kajur eo ijoko otemjelok, ak kajur bõtata eo. Eñin men eo elap rej aitwerõk kake im aikwij wõr jemlokin ilo mõkaj, im ran in kakõrmol eo elap im kalelñoñ ñan an menin walok ej itok ilo joñan mõkaj! Bareinwõt kar bõkmantak ilo 1941 kar menin konono eo einlok wõt kin tiljek, eo ej itok ilokad tok ñan kwalok ia eo kajjojo iad ej jutak ie ikijen kajur bõtata eo an Anij.
14. Ilo international convention eo ilo 1950, ta eo kar katak kake kin iroij ro rej kwalok kake ir ilo Sam 45:16?
14 Ilo 1950 international convention eo ilo New York City, iroij ro ilo Aiseia 32:1, 2 rar lukkun kile ir. Ear juõn ien iruj ke Brother Frederick ear konono kin unintel im kamelele bwe iroij ro an lal eo ekãl rar bed ibwiljid. Ilo convention eo im ko tok ilokan, ear lõñ ejjaromrom in maram ko ilo jitõb. (Sam 97:11) Jej kamolol bwe ial eo ad “ej einwõt maram ilo ien rantak, eo ej maramlok wõt”!
Emmakit Manlok ilo Jerbal in Kwalok Nan eo Ad
15, 16. (a) Ewi wãwen ad kar emmakit manlok ilo jerbal in kwalok nan eo ad ilo 1920 ko im 1930 ko? (b) Ta book ko rar lelok kajur ñan jerbal in kwalok nan eo an Christian ilo ebeben ko ilo ien kein?
15 Wãwen eo kein karuo im dolul eo an Jehovah ej emmakit manlok ie ej ikijen jerbal eo ad elap—kwalok nan kin Ailiñ eo im kõmman ri kalor. (Matu 28:19, 20; Mark 13:10) Ñan kõtõbrak jerbal in, dolul eo ej etal wõt im kalikar ñan kij aorõk in erakelok jerbal in kwalok nan eo ad. Ilo 1922 Christian ro otemjej kar kõketak ir ñan bõk kunair ilo jerbal in kwalok nan eo. Kajjojo ian ri Christian ro rar aikwij kile eddo eo air ñan lelok maram eo an bwe en romak im ilo wãwen in wõr kunan ilo kennan kin mol eo. (Matu 5:14-16) Ilo 1927 kar bõk buñten nee ko ñan kajenolok ran in Sunday einwõt juõn ran ñan kwalok nan jen jikin ñan jikin. Jino ilo February 1940, ear oktak im ekkã lo Ri Kennan ro ilo ial ko ilo jikin business ko lelok magazine kein Imõniaroñroñ im Consolation (eo ej kiõ Awake!).
16 Yiõ eo 1937 rar kwalok booklet eo Model Study, (Joñok in Katak), eo ear kalikar aikwij eo ñan kõmman bar jeblak ko ñan katakin ro jet mol eo ilo Bible. Ilo yiõ ko tok ilokan, jerbal in katak Bible ear lap kalikar aorõkin. Aorõkin mõttan jerbal in kwalok nan in ear alikar ke rar kõmman book eo “Let God Be True” (Anij En Mol) ilo 1946 im Mol eo Ej Tellok ñan Mour Indio ilo 1968. Ilo ien kein kiõ, jej kajerbal book eo Knowledge That Leads to Everlasting Life (Jelãlokjen Eo Ej Tellok ñan Mour Indio). Ad katak jen book kein aolep ej ejaake bedbed eo ebin ilo jitõb ñan kõmman ri kalor.
Emmakit Manlok Ibben Kajimwe ko ilo Karõk ko An Dolul eo
17. Ekkar ñan Aiseia 60:17, ewi wãwen an kar dolul eo an Jehovah emmakit manlok?
17 Wãwen eo kein kajilu dolul eo an Jehovah ear emmakit manlok ie ej ikijen kajimwe ko an dolul eo. Ekkar ñan Aiseia 60:17, Jehovah ear kallimur: “Kin jinibõrõrõ I naj bõktok gold, im kin mãl I naj bõktok silver, im kin alal ko, jinibõrõrõ, im kin dreka ko, mãl. I naj kõmõn dri kabwijrõk ro am, ainemõn, im iroij ro am, wãnik.” Ilo debdeb ibben kanan in, emwij bõk buñten nee ko ñan kõmanmanlok wãwen air lale jerbal in kwalok nan eo an Ailiñ eo im shepherd e bwij eo.
18, 19. Ta kajimwe ko an dolul eo ear wõr ilo yiõ ko mantak?
18 Ilo 1919 juõn service director kar kãlete ilo kajjojo congregation eo ear kajitõk ñan air karõke ñan jerbal in kwalok nan eo jen jikin ñan jikin. Menin ear lelok kajur ñan jerbal in kwalok nan eo ad jen jikin ñan jikin. Ekãlel eo an elder ro im deacon ro ear jemlok ilo 1932, im kakõlleik etal eo ad jen kilen democrat ak vote ilo kien ko an lal. Bar juõn joñan kõtan rar tõbare ilo 1938 ke ri karejar ro otemjej ilo congregation eo rar jino kãlet ir ekkar ñan karõk ko an Anij ak theocracy ilo jinoin lok congregation eo an Christian. (Jerbal 14:23; 1 Timote 4:14) Ilo 1972 overseer ro im ministerial servant ro kar kãlet ñan jerbal, einwõt an kar emaan rot in jerbal ibwiljin Christian ro jinoin. Jen an juõn wõt emaan jerbal einwõt overseer an juõn congregation, Dri Pilippai 1:1 im jeje ko jet rej kwalok bwe ro rar tõbar menin aikwij ko ekkar ñan Jeje ko ñan air overseer rej ejaake juõn jar in elder ro.—Jerbal 20:28; Dri Epesõs 4:11, 12.
19 Ilo 1975 juõn karõk rar kõmmane ñan committee ko an Governing Body eo an Ri Kennan ro an Jehovah ñan lale makitkit ko ibelakin lal an dolul eo an Anij. Branch Committee ko rar kãlet ir ñan air lale jerbal eo ilo territory ko air. Jen ien eo, rar lale im kabidodoik jerbal eo ilo headquarter ko im ilo ra ko an Watch Tower Society bwe ren “melejoñ men ko re lijiklok.” (Dri Pilippai 1:9, 10) Eddo ko rej bed ion aeran shepherd ro ri jibañ an Christ ekoba tel ilo jerbal in evanjel, katakin armij ro ilo congregation eo, im jimwe air shepherd e bwij eo an Anij.—1 Timote 4:16; Dri Hibru 13:7, 17; 1 Piter 5:2, 3.
Jerbal in Tel eo an Jesus
20. Debdeb wõt ilo buñten ne eo ibben dolul eo an Jehovah ej aikwiji ad kile ta eo kin ijo Jesus ej bed ie?
20 Debij wõt buñten nee eo ibben dolul eo ej emmakit manlok wõt an Jehovah ej aikwiji ad kile jerbal eo Anij ear kabbeik Jesus kake einwõt “bõran congregation eo.” (Ephesians 5:22, 23, NW) Ej bareinwõt, aorõk lale Aiseia 55:4, ijo rej jiroñ kij: “Lo! I ar lelok E juõn Dri Kennan ñõn ro dri ailiñ ko, juõn Dri Tel im Iroij ñõn dri ailiñ ko.” Emol Jesus ejelã wãwen tel. Bareinwõt ejelã kin sheep ro an im jerbal ko air. Ilo mol, ke ear etale congregation ko jiljilimjuõn ilo Asia Minor, lalem alen ear ba: “I jela kõmõn ko am.” (Reveles̃õn 2:2, 19; 3:1, 8, 15) Jesus ebareinwõt jelã jerbal ko ad, einwõt Jemen, Jehovah. Mokta jen an kar lelok joñok eo kin Jar, Jesus ear ba: “Jememiuij e jela men ko komij aikwij mokta jen ami kajitõk iben.”—Matu 6:8-13.
21. Ewi wãwen kar kalikar jerbal in tel eo an Jesus ilo congregation eo an Christian?
21 Ewi wãwen an alikar jerbal in tel eo an Jesus? Juõn wãwen ej ikijen Christian overseer ro, “menin letok ko ilo armij.” (Dri Epesõs 4:8) Reveles̃õn 1:16 ej kwalok kin overseer ro emwij kãlet ir einwõt ro ianbwijmaroñin Christ, im ej beek ir. Rainin, Jesus ej tel ilo karõk eo ñan elder ro, meñe maan rein kejatdikdik eo air ej juõn eo ñan lañ ak juõn eo ñan lal. Einwõt kar kameleleiki ilo katak eo lok iman, jitõb kwojarjar eo ej jitõñ ir ekkar ñan menin aikwij ko ilo Jeje ko. (1 Timote 3:1-7; Taitõs 1:5-9) Ilo ebeben eo kein kajuõn, juõn kumi in maan ro reritto ilo Jerusalem rar ejaake juõn governing body eo ear lale congregation ko im makitkit in kwalok nan eo an Ailiñ eo. Ejja joñok in wõt rej lore iloan dolul eo an Jehovah rainin.
Debdeb ilo Buñten Nee!
22. Ta jibañ eo Governing Body eo ej letok?
22 Tokjen ko an Ailiñ eo ion lal in emwij kamaroñ “ri karejar eo etiljek im meletlet” kaki, eo Governing Body eo an Ri Kennan ro an Jehovah ej jutak ikijen. (Matu 24:45-47) Governing Body eo men eo moktata ej lemnak kake ej kin lelok nan in tel ko ilo jitõb im ial in tel ñan congregation eo an Christian. (Jerbal 6:1-6) Bõtab, ñe jorrãn ko rej make walok rej jelet ri kabuñ ro mõttair, Governing Body eo ej kajitõk ibben juõn ak lõñlok legal entity ko ñan lelok jibañ im ñan karpini ak bar kaleki imõn jokwe ko im Kingdom Hall ko rar jorrãn. Elañe jet Christian rej lej ñan ir ak bõk matõrtõr, rej bõk buñten nee ko ñan kalek ir ilo jitõb. Im “ilo ien enana,” jibadbad ko otemjej rej kõmmani ñan kejbãrok an wõnmanlok wõt jerbal in kwalok nan eo.—2 Timote 4:1, 2.
23, 24. Jekdon ta eo ej itok ion armij ro an, ta eo ekkã an Jehovah letok, im ta eo ej aikwij bwe en bebe eo ad?
23 Jekdon ta eo ej itok ion armij ro an, Jehovah ej ekkeini an letok mõñã ko ilo jitõb im ial in tel eo ej menin aikwij. Anij ej bareinwõt letok melele im jelã ñan brother ro rej bõk eddo ñan keboj ir ñan wõnmanlok wõt im kõmman men ko jet ñan kajimwe ir ilo dolul in theocratic eo. (Duteronomi 34:9; Dri Epesõs 1:16, 17) Ilo ejelok likjap, Jehovah ej letok men eo jej aikwiji ñan kajejjet kitien jerbal in kõmman ri kalor eo ad im ñan kõtõbrak jerbal in kwalok nan eo ad ibelakin lal.—2 Timote 4:5.
24 Jej lukkun liki bwe Jehovah ejamin ellok jen armij ro an retiljek; enaj kõtlok ir jen “eñtan eo elap” ej itok.” (Revelation 7:9-14, NW; Sam 94:14; 2 Piter 2:9) Ebed aolep un ko ibbed ñan ad debij wõt liki eo ad jen jinoin im en ilok wõt ñan jemlokin. (Dri Hibru 3:14) Kin menin, jen beek ñan debij wõt buñten nee eo ibben dolul eo an Jehovah.
Ewi Wãwen Am Naj Kar Uak?
• Etke jemaroñ ba bwe dolul eo an Jehovah ej emmakit manlok wõt?
• Ta menin kamol eo ewõr bwe armij ro an Anij rej lañliñ kin air melelelok ilo jitõb?
• Ewi wãwen an kar wõr wõnmanlok ko ilo jerbal in kwalok nan eo an Christian?
• Ta kajimwe ko ilo ien ekkar rar kõmmani ilo wãwen ko an dolul eo ibwiljin ro ri karejaran Jehovah?
[Pija]
Einwõt David, jejjab maroñ bwini jerbal otemjej ko remõn an Jehovah
[Pija]
Bwij eo an Anij ej bõk tokjen jen kajimwe ko ilo jejjet in ien ilo karõk ko an dolul eo