Emmakit Manlok Ñan Anjo Eo Eliktata!
“Lo, ors emouj im iben Eo ej jijõt ion libon, im ar lelok ñõn E belin: im Ej bõk anjo im wõnmanlok bwe En bõk anjo.”—REVELES̃ÕN 6:2.
1. Ta men ko renaj walok ilo ran ko renaj itok John ear loi ilo juõn vision?
IKIJEN kakõrmol jen Anij ri jilek John ear maroñ lo enañin 1,800 yiõ ko manlok ilo ilju im jeklaj im kamelele kin kairoij eo an Christ einwõt King. John ear aikwij tõmak bwe men eo ear loe ilo vision eo enaj jejjet kitien. Ewõr kein kamol ealikar ibbed bwe kairoij in kar kanan kake ear walok ilo 1914. Kin mejen tõmak, jej lo an Jesus Christ “bõk anjo im wõnmanlok bwe En bõk anjo.”
2. Ewi wãwen Devil eo ear emmakit ñan lotak eo an Ailiñ eo, im men in ear kein kamol kin ta?
2 Elikin jutak eo an Ailiñ eo, kar jolok Satan jen lañ, im kõmman an kate ilo tarinae eo an im kin illu eo elaplok ak ear jab kakõmõnmõnlok maroñ eo an ñan lo tõbrak. (Reveles̃õn 12:7-12) Illu eo an ear kõmman bwe wãwen ko ilo lal in ren nana lok. Jukjuk im bed in armij ej jorrãnlok. Ñan Ri Kennan ro an Jehovah men in ej kein kamol eo ealikar bwe King eo air ej etal manlok “bwe En bõk anjo.”
Ejaak in juõn Jukjuk im Bed ilo Lal eo Ekãl
3, 4. (a) Ta oktak ko ikijen dolul eo rar kõmmani ilo congregation in Christian elikin lotak eo an Ailiñ eo, im etke rar men in aikwij ko? (b) Oktak kein rar bõktok tokjen et eo, einwõt Isaiah ear kanan kake?
3 Ke kar kajutak Ailiñ eo, ear ien eo ñan kõmman bwe congregation in Christian eo emwij kõkãle—im kiõ kin eddo ko relaplok an Ailiñ eo—bwe en laplok an ekkar ñan wãwen congregation in Christian eo ilo ebeben eo kein kajuõn. Kin men in, ilo magazine in The Watchtower, an June 1 im 15, 1938, ear etale kin wãwen eo dolul in Christian ej aikwij jerbal. Tokelik, ilo copy in December 15, 1971, ear kameleleik lok kin Governing Body eo ilo ran kein ilo katak eo “A Governing Body as Different From a Legal Corporation (Governing Body eo Eoktak Jen juõn Legal Corporation).” Ilo 1972, kar jitõñ kumi in elder ro ñan lelok jibañ im nan in tel ñan congregation ko ilo bukwon eo.
4 Wãwen lolorjake eo ejimwe kar kajeblaktok ear lap an kakajurlok congregation in Christian eo. Men eo me ear bar koba ñan men in kar karõk ko me Governing Body eo ear kõmmani ñan lelok nan in tel ko ñan elder ro kin eddo ko air, ekoba kamineneik ir kin men ko kin jerbal in ekajet. Eddeklok eo jidik ilok jidik kin karõk ko kin dolul eo an Anij ion lal im tokjen ko remõn kar kanan kaki ilo Aiseia 60:17: “Kin jinibõrõrõ I naj bõktok gold, im kin mãl I naj bõktok silver, im kin alal ko, jinibõrõrõ, im kin dreka ko, mãl. I naj kõmõn dri kabwijrõk ro am, ainemõn; im iroij ro am, wãnik.” Oktak kein remõn rar kein kamol kin kajerammõn an Anij im kin an Anij buñburuen kake ro rar rejetak Ailiñ eo an ilo alikar im kijejeto.
5. (a) Ewi wãwen Satan ear emmakit ñan an Jehovah kajerammõn armij ro An? (b) Ilo errã ibben Dri Pilippai 1:7, ewi wãwen armij ro an Jehovah rar emmakit ñan illu eo an Satan?
5 Satan ear jab bilo kin wãwen an Anij lale im tel ilo yokwe armij ro an elikin jutak in Ailiñ eo. Ñan wanjoñok, ilo 1931 kumi edik in Ri Christian ro rar keañ ilobwilij bwe rar jab baj Ri Katak Bible ro wõt. Ilo errã ibben Aiseia 43:10, rar Ri Kennan ro an Jehovah! Elañe ear baj jirullok im walok ak jab, Devil eo ear kõmman an walok elap matõrtõr ibelakin lal. Meñe ilo ene ko rej jelã kaki kin air anemkwoj in kabuñ, einwõt United States, Canada, im Germany, elõñ alen kar jibed Ri Kennan ro ñan tarinae ilo mõn ekajet ko ñan debij wõt air anemkwoj in kabuñ. Tok ñan 1988, U.S. Supreme Court eo ear etale 71 case ko rar kitibuj Ri Kennan ro an Jehovah, ruo mõttan jilu in bebe ko air rar errã ibbeir. Rainin, ibelakin lal, tarinae ko ilo mõn ekajet rej wõnmanlok wõt bwe, einwõt ilo ebeben eo kein kajuõn, ren maroñ “kejbãrok im kamol gospel eo.”—Dri Pilippai 1:7.
6. Kabinbin ko im kabañbañ ko rar bõprae ke armij ro an Jehovah jen air etal manlok? Kwalok juõn wanjoñok.
6 Ilo yiõ ko ilo 1930, ilo ran ko mokta lok jidik jen an kar walok Bata in Lal eo Kein Karuo, kien ko an dictator (juõn iroij elej eo ejelok joñan maroñ eo an) ro rar kemo ak kõmman joñan jerbal eo an Ri Kennan ro an Jehovah ilo Germany, Spain, im Japan, ñan kwalok jilu iair. Ak ilo yiõ 2000, ilo ailiñ kein jilu wõt kar wõr enañin 500,000 ri kwalok ro rekijejeto kin Ailiñ in Anij. Oran in kar enañin joñoul alen laplok in oran Ri Kennan ro ilo aolepen lal ilo 1936! Alikar, kabinbin ko im kabañbañ ko rejjab maroñ bõprae armij ro an Jehovah jen air etal manlok iumin Ri Tel eo air ej bõk anjo, Jesus Christ.
7. Ta men in walok eo ekabwilõñlõñ ear walok ilo 1958, im oktak ta eo elap ear walok jen ien eo?
7 Ear juõn tõbrak elap an lap kin emmakit manlok ke, ilo 1958, ear wõr kwelok eo elaptata an Ri Kennan ro an Jehovah ilo New York City, Ankil eo Ekwojarjar International Assembly, kin juõn oran eo ear laptata in 253,922 ri kwelok ro. Tok ñan 1970 jerbal eo air ear bellok ilo ailiñ ko jilu kar kwalok kaki ilõñ, ijellokin ailiñ eo jej jelã kake einwõt East Germany. Ak Soviet Union im ailiñ ko mõttan ilo Warsaw Pact eo rar kemo wõt jerbal eo an Ri Kennan ro. Rainin, ilo ailiñ kein rar Communist mokta, ewõr elõñlok jen jimettan million Ri Kennan ro rekijejeto.
8. Ta tokjen eo ear walok kin an kar Jehovah kajerammõn armij ro an, im ta eo The Watchtower ilo 1950 ear ba kin men in?
8 Ri Kennan ro an Jehovah rej bõk jerammõn kin laplok ko kinke rej wõnmanlok im “bukot mokta ailiñ in Anij, im kwojarjar eo An [Anij].” (Matu 6:33) Ilo luku in wãwen eo, kanan eo an Aiseia ededelok an jejjet kitien: “Eo erik e naj juõn tausan, im eo e niñ juõn ailiñ e kajur; Ña Jeova I naj bikbikri ilo ien eo an.” (Aiseia 60:22) Im wõnmanlok eo ejañin jemlok. Iumin joñoul yiõ ko rej kab motlok, oran ro rej niknik in jurake iroij eo an Ailiñ eo rar orlok ñan elõñlok jen 1,750,000 armij. Rein rar mõnõnõ in erom mõttan kumi eo me juõn Watchtower ilo 1950 ej kwalok kake ir: “Anij ej kebojak kiõ juõn jukjuk im bed an lal eo ekãl. . . . Kumi in enaj ellã jen Armageddon, . . . eo moktata ilo ‘lal eo ekãl’ . . . , karõke ekkar ñan wãwen iroij eo an Anij, jelã kilen kõmman karõk ko.” Katak eo ear kajemlok im ba: “Inem, jen etal manlok, bin wõt ilo ial eo, kij aolep ibben don, einwõt juõn jukjuk im bed an lal eo ekãl!”
9. Ewi wãwen men ko me Ri Kennan ro an Jehovah rar katak kaki iumin elõñ yiõ ko rar mol an wõr tokjeir?
9 Kõtan ien eo, jukjuk im bed in an lal eo ekãl eo ej laplok wõt ear katak ñan kõmman men ko ilo juõn wãwen ekwon im bolemen, eo emol an aorõk rainin im bõlen enaj aorõk bareinwõt ilo ien eo rej kõmman jerbal in kõkãl eo elikin Armageddon. Ñan wanjoñok, Ri Kennan ro rar katak ñan karõklok kwelok ko relap, ñan lelok jibañ ko ilo mõkaj ñan jikin ko ear walok jorrãn ko ie, im ñan kalek em ko ilo mõkaj. Jerbal kein rar kõmman bwe elõñ ren nebar im kautiej Ri Kennan ro an Jehovah.
Kajimwe Lemnak ko Rebwid
10, 11. Kwalok juõn wanjoñok kin ewi wãwen rar kajimwe lemnak ko rebwid kin Ri Kennan ro an Jehovah.
10 Bõtab, ewõr armij ro me rej kinaak Ri Kennan ro an Jehovah kin air jab burukuk ibben jukjuk im bed eo an armij. Men in ej eindein kin wõt tõmak eo an Ri Kennan ro an Jehovah me ej bedbed ion Bible ikijen men ko einwõt bõk bõtõktõk, jab bõk kunair ilo politic ak tarinae ko, kõbatat, im mwil erreo. Ak elaplok an armij kamol kiõ bwe lemnak ko an Ri Kennan ro retellokin etali. Ñan wanjoñok, juõn doctor ilo Poland ear telephone lok ñan administrative office eo an Ri Kennan ro an Jehovah im ba bwe e im ro mõttan ilo hospital eo rar kõbouwe iumin jet awa ko kin bõk bõtõktõk. Juõn katak eo ear walok ilo ran eo ilo Polish daily newspaper eo Dziennik Zachodni ear kõmman an ijjino bwebwenato eo. “Ij buromõj bwe ele jen joñan air kajerbal bõtõktõk ñan unoik armij,” doctor eo ear kamol. “Ej aikwij oktak men in, im ij mõnõnõ bwe juõn armij ear bõkmantak air etale katak in. I kõnan bõk kamelele ko jet.”
11 Ilo juõn kwelok eo ear walok ilo yiõ eo lok, ri utiej ro ikijen doctor jen Canada, Europe, Israel, im United States rar bwebwenato kin kamelele ko kar karõki ñan jibañ doctor ro ñan jerbale ri nañinmij ro ilo air jab kajerbal bõtõktõk. Kar kalikar ilo kwelok in, eo ear walok ilo Switzerland, bwe einjuõn jen lemnak ko rebuñbuñ, joñan ri nañinmij ro rar bõk bõtõktõk im rar mij ilo mol kar laplok jen ri nañinmij ro rar jab bõk bõtõktõk. Ri nañinmij Ri Kennan ro ekkã an mõkajlok air kar maroñ dioj jen hospital jen ro rar bõk bõtõktõk, im tokjen men in ekkã an kar diklok wõnãn doctor.
12. Kwalok juõn wanjoñok kin ewi wãwen armij ro rebuñbuñ rar nebar jutak eo an Ri Kennan ro an Jehovah ikijen jab bõk kunair ilo men ko an kien.
12 Elõñ nan in nebar ko rar kwaloki bareinwõt kin an Ri Kennan ro an Jehovah jab bõk kunair ilo tarinae mokta lok im ilo ien eo ear walok Bata eo an Lal in Kein Kajuõn ke rar aikwij kijenmij iumin matõrtõr an Nazi ro. Cassette in aluij eo etan Jehovah’s Witnesses Stand Firm Against Nazi Assault, kõmman in Ri Kennan ro an Jehovah im ilo ekkar kar kaluiji moktata ilo Ravensbrück concentration camp ilo Germany ilo November 6, 1996, ear bõk elõñ nan ko remõn. Ilo ien aluij eo moktata ilo concentration camp eo ebuñbuñ ilo nana ilo Bergen-Belsen ilo April 18, 1998, ri tel eo ilo Center for Political Education ilo Lower Saxony, Dr. Wolfgang Scheel, ear kamol: “Juõn ian mol ko rekajookok ilo bwebwenato ej bwe Ri Kennan ro an Jehovah ear laplok air karmijeteik National Socialism jen kabuñ in Christian ko jet. . . . Jekdon eñjake ko ad kin katak ko im kijejeto in kabuñ eo an Ri Kennan ro an Jehovah, jej aikwij kautiej tiljek eo air ilo ien iroij eo an Nazi ro.”
13, 14. (a) Ekajet ta eo emeletlet ilo etan Ri Christian ro jinoin ear itok jen juõn unjen rar jab kõtmene kake? (b) Kwalok jet wanjoñok ko kin nan ko remõn kar kwaloki kin armij ro an Anij rainin.
13 Ñe armij ro rebuñbuñ ak bebe ko an mõn ekajet rej rejetak Ri Kennan ro an Jehovah kin tõmak ko rej aitwerõk kaki, emaroñ kadiklok an armij kwalok kalijeklok im watõk Ri Kennan ro ilo juõn wãwen emõnlok. Ekkã an men in kabellok ial eo ñan konono ibben armij ro rar makoko in roñjake mokta. Kin men in rej mõnõnõ kin kõmman rot kein, im Ri Kennan ro an Jehovah ej mol air kamolol kaki. Men in ej kakememej kij kin ta eo ear walok ilo Jerusalem ilo ebeben eo kein kajuõn. Ke Sanhedrin eo, mõn ekajet eo eutiejtata an Ri Jew ro, rar kõnan mõn Ri Christian ro kin air kar kwalok nan ilo kijejeto, Gamaliel, “dri kaki in kien, eo armij otemjej rej nebar e,” ear kakkõl im ba: “Kom armij in Israel, komin kejbãrok kom kin men eo komij iten kõmõn e ñõn armij rein. . . . Komin ilok jen armij rein, im ren berwõt: bwe elañe bebe in, ak jerbal in jen armij rõn, e naj joko. A elañe e jen Anij, kom jab maroñ in kokkure; ñe r’ab lo kom tõrinaek Anij.”—Jerbal 5:33-39.
14 Einwõt Gamaliel, armij ro rebuñbuñ ilo ran kein rar kwalok ilo alikar bwe rar rejetak anemkwoj in kabuñ ñan Ri Kennan ro an Jehovah. Ñan wanjoñok, chairman eo mokta an International Academy for Freedom of Religion and Belief ear kwalok: “Ren kar jab karmijeteik anemkwoj in kabuñ an juõn kabuñ kinke jukjuk im bed eo ej watõk tõmak ko an einwõt ejakkar im einjuõn.” Im juõn ri kaki an scientific study of religion ilo university in Leipzig ear bõkmantak juõn kajitõk ikijen juõn dolul in kien kar kajutake ñan etale kumi in kabuñ ko, im ear kajitõk: “Etke rej etale kabuñ ko redik wõt ak jab kabuñ ko ruo relap [Roman Catholic Church im Lutheran Church]?” Emaroñ bidodo ad lo uak eo ilo nan ko an juõn ri utiej eo mokta ilo Germany, eo ear je: “Ejelok bere bwe ilo ittino, ro ele jen joñan air kijejeto iloan kabuñ ko rar jiroñ dolul in kien eo kin ial ta eo en bõke.”
Wõn Eo Jej Reilok ñan E ñan Bõk Rõlok?
15, 16. (a) Etke men eo Gamaliel ear kõmmane ear wõr joñan in an keie? (b) Ewi wãwen ear wõr joñan an jilu armij ro jet rekareelel maroñ kõmmani ilo etan Jesus?
15 Men eo Gamaliel ear ba ej kalikar mol eo bwe jerbal eo me Anij ej rejetake ejamin likjap. Ejelok bere bwe Ri Christian ro jinoin rar bõk tokjen jen nan ko an ñan Sanhedrin eo, ak rar jab meloklok bwe nan ko an Jesus rar bareinwõt mol bwe ri kalor ro an renaj bõk matõrtõr. Men eo Gamaliel ear kõmmane ear kabõjrak karõk ko an ri tel ro an kabuñ ko ñan mõn ir, bwe jej konono: “Im rej lemnok einwõt e: im ke emwij air kirtok ro dri jilik, im dreñlok ir, rej jiroñ bwe ren jab konono ilo etan Jisõs, im rej kõtlok ir.”—Jerbal 5:40.
16 Ke kar ekajete Jesus, Pontius Pilate, ilo an lo bwe ejelok ruõn, ear kajeoñ in kõtlok Jesus. Ak ear jab lo tõbrak. (Jon 18:38, 39; 19:4, 6, 12-16) Ro ruo uan Sanhedrin bareinwõt, Nicodemus im Joseph ilo Arimathea, ro me rar errã ibben Jesus, kar jab lap maroñ ibbeir ñan air bõprae mõn ekajet eo jen an ekajete Jesus. (Luk 23:50-52; Jon 7:45-52; 19:38-40) Rõlok eo me armij rej kõtõbrake ñe rej jojomare armij ro an Jehovah—kin jabdewõt un—ej wõr joñan. Lal in enaj wõnmanlok im kijirãte ri kalor ro remol an Christ, einwõt rar kijirãte e. Rõlok eo emol enaj itok wõt jen Jehovah.—Jerbal 2:24.
17. Lemnak ta eo emol ej bed ibben Ri Kennan ro an Jehovah, ak etke ear jab kamõjnolok bebe eo air ñan wõnmanlok im kwalok kin news eo emõn?
17 Ilo air bõk juõn lemnak emol, Ri Kennan ro an Jehovah rej kõtmene bwe matõrtõr enaj wõnmanlok. Jumae enaj bõjrak ilo ien eo wõt ñe enaj jako jukjuk im bed eo an Satan. Ak, matõrtõr in, meñe enana, ejjab kabõjrak Ri Kennan ro jen air kajejjet jerbal eo air ñan kwalok kin Ailiñ eo. Etke en kõmmane, ke Anij ej rejetake ir? Rej reilok ñan Ri Tel eo air eberan, Jesus Christ, einwõt joñok eo ekkar.—Jerbal 5:17-21, 27-32.
18. Jorrãn ta eo ej bed wõt iman in armij ro an Jehovah, ak tokjen ta eo ewõr air liki kake?
18 Jen jinoin, kabuñ eo emol ear jelmae elap jumae. Mõttan jidik, enaj men eo Gog, Satan ilo wãwen eo ettã ke kar jolallok e jen lañ, enaj nitbwili. Ak kabuñ eo emol enaj deor. (Ezekiel 38:14-16, New World Translation) “Kiñ ro an aolepen lõl,” iumin tel eo an Satan, “re naj tõrinaek Lam eo, im Lam e naj bõk anjo ioir, bwe Ej Iroij in iroij ro, im Kiñ an kiñ ro, im ro iben re naj bareinwõt bõk anjo.” (Reveles̃õn 16:14; 17:14) Aet, King eo ad ej etal manlok ñan bõk anjo im mõttan wõt jidik “wõnmanlok bwe En bõk anjo.” Ej juõn jerammõn elap ñan etal manlok ibben, ilo ad jelã bwe mõttan jidik ejelok juõn enaj bar jumae ri kabuñ ro an Jehovah ñe rej ba: “Anij ej ber iber”!—Dri Rom 8:31; Dri Pilippai 1:27, 28.
Kwomaroñ ke Kamelele?
• Ta eo Jehovah ear kõmmane ñan kakajurlok congregation in Christian eo jen ien lotak in Ailiñ eo?
• Ta eo Satan ear kõmmane ñan kajeoñ in kabõjrak Christ jen an kamwijlok an bõk anjo, im kin tokjen ta ko?
• Ej aikwij wõr ibbed lemnak ta eo ejokkin wõt juõn kin makitkit ko remõn an ro rejjab Ri Kennan ro?
• Mõttan jidik Satan enaj kõmman ta, im kin tokjen ta eo?
[Pija]
Kwelok ko relap rej kalikar emmakit manlok eo an armij ro an Jehovah
[Pija]
Jutak eo an Ri Kennan ro ñan jab bõk kunair ilo tarinae ilo Bata in Lal eo Kein Kajuõn ej bõktok wõt nebar ñan Jehovah