Jerammõn Ko Kin News Eo Emõn
“Jeova e ar kabit Iõ bwe In kwalok nan ko remõn ñõn ro etã burueir E ar jilkintok Iõ bwe in kitimi ro erup burueir, . . . bwe In kainemõn ro otemjej rej liãjlol.”—AISEIA 61:1, 2.
1, 2. (a) Ta eo Jesus ear kwalok kin e make, im ewi wãwen? (b) Ta jerammõn ko news eo emõn Jesus ear keañ kaki enaj kar bõktoki?
JUÕN ran in Sabbath eo itujinoin jerbal eo an, Jesus ear bed ilo juõn mõn kwelok ilo Nazareth. Ekkar ñan jeje ko, “r’ar lelok ñõn E, buk in Aiseia, dri kanan. Im ke emwij An erlokwe buk, Ej lo ijo ar je, Jitõb õn Iroij ej Ioõ, bwe E ar kabit Iõ bwe In kwalok gospel.” Jesus ear wõnmanlok im konono nan in kanan eo. Inem ear jijet im ba: “Ranin nan ilo Jeje in ejejit ilo lojiliñemi.”—Luk 4:16-21.
2 Ilo wãwen in, ear kalikar bwe ear ri evanjel eo emwij kanan kake, ri keañ kin news eo emõn im ri kainemõn eo. (Matu 4:23) Ear lukkun emõn news eo Jesus ear jiroñ ir kake! Ear jiroñ ri roñjake ro an: “Ña, maram in lõl: eo ej lor Iõ e jamin etal ilo marok, a e naj an maram in mour.” (Jon 8:12) Ear ba bareinwõt: “Elañe komij berwõt ilo Aõ in nan inem kom dri kalora remol, im kom naj jela mol, im mol e naj kõmõnmõn anemkwojami.” (Jon 8:31, 32) Aet, “nan ko nan in mour in drio” kar bed ibben Jesus. (Jon 6:68, 69) Meram, mour, anemkwoj—emol men kein rej jerammõn ko jej aikwij kaorõki!
3. Ta news eo emõn ri kalor ro an Jesus rar kwaloki?
3 Elikin Pentecost 33 C.E., ri kalor ro rar wõnmanlok ilo jerbal in evanjel an Jesus. Rar kwalok nan kin “gospel in ailiñ eo” ñan ri Israel ro im ñan ri ailiñ ko jimor. (Matu 24:14; Jerbal 15:7; Dri Rom 1:16) Ro rar uak ilo mõnõnõ rar jelã kajjen Jehovah Anij. Rar anemkwoj jen kajibokwe eo an kabuñ im erom juõn mõttan ailiñ eo ekãl ilo jitõb, “Israel an Anij,” ro me kejatdikdik eo air ej ñan iroij ilañ ñan indio ibben Iroij eo air, Jesus Christ. (Dri Galetia 5:1; 6:16; Dri Epesõs 3:5-7; Dri Kolosse 1:4, 5; Reveles̃õn 22:5) Emol jerammõn kein rar lukkun aorõk!
Jerbal in Evanjel ilo Ran Kein
4. Ilo wãwen et eo jerbal in kwalok kin news eo emõn ej jejjet kitien ilo ran kein?
4 Rainin, Christian ri kabit ro, im “jar eo elap” in “sheep ro jet” me rej jurake ir, rej wõnmanlok in kajejjet kitien jerbal eo emwij kanan kake im kar lelok mokta ñan Jesus. (Revelation 7:9, NW; John 10:16, NW) Tokjen men in, rej kwalok nan kin news eo emõn ñan joñan eo jejañin loe jen mokta ñan kiõ. Ilo 235 ailiñ im ene ko, Ri Kennan ro an Jehovah rar ilok im “kwalok nan ko remõn ñõn ro etã burueir . . . , bwe in kitimi ro erup burueir, ñõn kwalok kõtlok ñõn ro mãtõn iri, im kabellok prison ñõn ro re lukjõk; bwe In kwalok yiõ in joij an Jeova, im ran in kwi an aruij Anij; bwe In kainemõn ro otemjej rej liãjlol.” (Aiseia 61:1, 2) Inem, jerbal in evanjel an Christian ej wõnmanlok im bõktok jerammõn ko ñan elõñ im kainemõn eo emol ñan ro rej bed ilo “jorran otemjej.”—2 Dri Korint 1:3, 4.
5. Ikijen jerbal in kwalok kin news eo emõn, ewi wãwen an Ri Kennan ro an Jehovah einjuõn jen kabuñ ko an Christendom?
5 Emol bwe kabuñ ko an Christendom rej jurake elõñ wãwen jerbal in evanjel. Elõñ iair rej jilkinlok missionary ro ñan ailiñ ko jet bwe ren kamakit armij ñan oktaklok ñan kabuñ eo air. Ñan wanjoñok, The Orthodox Christian Mission Center Magazine ej kwalok kin jerbal ko an missionary ro ilo kabuñ in Orthodox ilo Madagascar, iturõk in Africa, Tanzania, im Zimbabwe. Bõtab, ilo Kabuñ in Orthodox, einwõt ilo kabuñ ko jet an Christendom, jarlepju in ro uair rejjab bõk kunair ilo jerbal in. Ilo keidi ibben men in, aolep Ri Kennan ro emwij wujleplok air mour ñan Jehovah rej kate ir ñan bõk kunair ilo jerbal in evanjel. Rej kile bwe kwalok nan kin news eo emõn ej kamole mol in tõmak eo air. Paul ear ba: “Bwe armij kin buruen ej tõmak ñõn wãnik; im kin loñin ej kwalok ñõn lomor.” Tõmak eo ejjab kamakit juõn ñan jerbal, ilo mol, emij.—Dri Rom 10:10; Jemes 2:17.
News Eo Emõn Ej Bõktok Jerammõn Ko Rej Ñan Indio
6. Ta news eo emõn rej kwaloki ilo ran kein?
6 Ri Kennan ro an Jehovah rej kwalok kin news eo emõntata. Rej kabellok Bible ko air im kwalok ñan ro emol burueir bwe Jesus ear katok mour eo an ñan lelok ñan armij juõn ial ñan kebak Anij, jolok bwid ko air, im kejatdikdik eo ñan mour indio. (Jon 3:16; 2 Dri Korint 5:18, 19) Rej keañ bwe Ailiñ in Anij ear jutak ilañ iumin tel eo an King eo, Jesus Christ, im mõttan jidik enaj jolok nana jen lal im lale jerbal in kajeblaktok Paradise eo. (Reveles̃õn 11:15; 21:3, 4) Ñan kajejjet kitien kanan eo an Aiseia, rej kejelãik ro ri turiir bwe kiõ ej “yiõ in joij an Jeova” ñe armij ro remaroñ uak ilo emõn ñan news eo emõn. Rej bareinwõt kakkõl bwe mõttan jidik enaj itok “ran in kwi an Anij” ñe Jehovah enaj kajemlok mour eo an ro renana me rejjab kõnan ukwelok.—Sam 37:9-11.
7. Ta bwebwenato eo ej kamole burukuk eo an Ri Kennan ro an Jehovah, im etke rej lañliñ kin burukuk rot in?
7 Ilo juõn lal eobrak kin jorrãn, news in ej make wõt emõn im ewõr tokjen ko rej indio. Ro rej bõke rej erom mõttan dolul in jimjãn jimjatin an Ri Christian ro reburukuk ibelakin lal, ro rejjab kõtlok bwe oktak ko ikõtan ailiñ ko, bwij ko, im economy ren kejebel ir jen don. Rar ‘kõnõk yokwe, eo ej kein lukwõj eo ewãppen.’ (Dri Kolosse 3:14; Jon 15:12) Kar lo men in ilo juõn ailiñ in Africa. Juõn jibboñ capital in jikin kwelok eo ear ruj kin ainikien bu ko. Armij ro rar kate wõt ir ñan nibiji kien ene eo ak kõmman juõn coup d’état. Ke unin air aitwerõk ear ukõte ñan oktak ko ikõtan kil ko kilin armij, rar notaik juõn family in Ri Kennan ro kin air noje Ri Kennan ro mõttair reinjuõn kiliir. Family eo ear ba: “Ri Kennan ro an Jehovah wõt rej jokwe ilo mwin imõm.” Ñan ir, oktak ko ikõtan kil ko kilin armij ear jab aorõk; yokwe in Christian—kainemõn ro rej aikwiji—ear aorõk. Juõn nukin eo ejjab juõn Ri Kennan ear ba: “Ro uan kabuñ ko otemjej rar ketak ri kabuñ ro mõttair. Ri Kennan ro an Jehovah wõt rar jab kõmman eindein.” Report ko jet einlok wõt jen ene ko ewõr keojaljal ko ie rej kwalok bwe Ri Kennan ro an Jehovah elap air “yokwe jimjãn jimjãten.”—1 Piter 2:17.
News Eo Emõn Ej Ukõt Armij
8, 9. (a) Ta oktak ko ro rej mõnõnõ in bõk news eo emõn rej kõmmani? (b) Ta bwebwenato ko rej kalikar kin kajur in news eo emõn?
8 News eo emõn ej jitõñlok ñan ta eo Paul ear naetan “mour in, kab mour eo e naj itok.” (1 Timote 4:8) Ejjab letok juõn kejatdikdik eaibujuij im mol wõt ak ej bareinwõt kakõmõnmõnlok “mour in.” Einwõt armij ro kajjojo, Nan in Anij, Bible eo, ej tel Ri Kennan ro an Jehovah, ñan kaburukuk mour ko air ekkar ñan ankil an Anij. (Sam 119:101) Rar kõkãle kadkad ko kadkadiir ke rej kaddeklok kadkad ko einwõt wãnik im tiljek.—Dri Epesõs 4:24.
9 Kalmenlokjen kin wanjoñok eo an Franco. Abañ eo an kar ikijen an illulu. Ke juõn abañ ear walok, ear lukkun illu im rupe men ko. Lio belen ear katak Bible ibben Ri Kennan ro an Jehovah, im jidik kin jidik wanjoñok eo air ear jibañ Franco ñan kile bwe ear aikwij ukõt mour eo an. Ear katak Bible ibbeir im eliktata ear maroñ kalikar leen jitõb kwojarjar eo ej ainemõn im jatõr. (Dri Galetia 5:22, 23) E eo ear juõn ian 492 armij ro rar baptais ilo Belgium ilo yiõ in jerbal eo 2001. Lemnak, bareinwõt, kin Alejandro. Joñan an lap an likao in añuri uno kan rejõkkar ear ruñlok im mour ilo jikin jokobij eo, im kabuk jabdewõt men ear loe ñan wiakake im bõk wõnãn uno kan rejõkkar. Ke ear 22 an yiõ, Ri Kennan ro an Jehovah ear kajitõkin Alejandro ñan katak Bible ibbeir, im ear errã. Ear read Bible ran otemjej im bed ilo kwelok ko an Christian. Joñan an mõkaj in karreoik mour eo an bwe iumin jiljino wõt alliñ, ear bõk maroñ ñan bõk kunan ilo jerbal in evanjel—juõn ian ro 10,115 me rar kõmman men in ilo Panama yiõ eo lok.
News Eo Emõn —Juõn Jerammõn ñan Ro Ettã Burueir
10. Wõn ro rej mõnõnõ in bõk news eo emõn, im ewi wãwen an men in ukõt lemnak eo air?
10 Isaiah ear kanan bwe renaj kar kwalok news eo emõn ñan ro ettã burueir. Wõn rein ettã burueir? Book in Jerbal ej naetair “ro jabrewõt ar likit ir bwe ren mour in drio.” (Jerbal 13:48) Rej ro ettã burueir kar lo ir ijoko otemjej ilo jukjuk im bed in, ro rej kabellok burueir ñan ennan in mol eo. Armij rein rej katak bwe ilo air kõmanmõn ankil an Anij men in ej bõktok jerammõn ko relaplok jen jabdewõt men lal in emaroñ letoke. (1 Jon 2:15-17) Bõtab, ewi wãwen an Ri Kennan ro an Jehovah tõbar buruen armij ilo jerbal in evanjel eo air?
11. Ekkar ñan Paul, ewi wãwen ren kar aikwij kwalok kin news eo emõn?
11 Eokwe, kalmenlokjen kin joñok eo an ri jilek Paul, eo ear jejelok ñan Dri Korint ro: “Ke iar iwõj ñan kom, ro jãtiõ, Iar jab itok, kin konono im meletlet ekanuij emõn, ke Iar kwalok ñan kom men eo ittino an Anij. Bwe Iar bebe in jab jelã jabdewõt ibbemi, ak Jesus Christ, im E emwij dilaike ion alal eo.” (1 Corinthians 2:1, 2, NW) Paul ear jab kajeoñ in kabwilõñ ri roñjake e kin meletlet eo an. Ear katakin wõt kin katak ko remol im kwojarjar, mol ko emwij jeje ilo Bible ilo ran kein. Lale, bareinwõt, nan in rejañ ko an Paul ñan ri evanjel eo mõttan Timothy: “Kwon kwalok nan, kwon kate yuk.” (2 Timote 4:2) Timothy ear aikwij kwalok kin “nan” eo, ennan in Anij. Bareinwõt Paul ear jejelok ñan Timothy: “Kwon kate yuk bwe Anij en lo kwo mõn, dri jerbal e jamin jok im ejimewõt an katakin kin nan in mol.”—2 Timote 2:15.
12. Ewi wãwen an Ri Kennan ro an Jehovah ilo ran kein bokake nan ko im joñok eo an Paul?
12 Ri Kennan ro an Jehovah rej lore joñok eo an Paul, im nan ko an ñan Timothy bareinwõt. Rej kile kajurin Nan in Anij im kajerbale ñe rej kate ir ñan kwalok ñan ro ri turiir nan in kejatdikdik im kainemõn ko rekkar. (Sam 119:52; 2 Timote 3:16, 17; Dri Hibru 4:12) Emol, rej kortokjen book in Bible ko bwe ro rej itoklimo en maroñ laplok air bõk jelãlokjen kin Bible eo ekkar ñan ien eo air. Ak ien otemjej rej kabuk kilen air kwalok ñan armij ro nan ko ilo Jeje ko. Rej jelã bwe Nan in kakõrmol an Anij enaj kamakit ro ettã burueir. Im ilo air kajerbale ilo wãwen in men in enaj kakajur tõmak eo air make bareinwõt.
“Kainemõn Ro Otemjej Rej Liãjlol”
13. Ilo yiõ eo 2001, ta men ko rar walok im bõktok aikwij eo ibelakin lal ñan kainemõn ro rej liãjlol?
13 Yiõ eo 2001 kar wõr jorrãn ko relap, im tokjen men in, elõñ armij rar aikwij bõk kainemõn. September eo lok kar lo juõn wanjoñok kin men in ilo United States, ke terrorist ro (ri kamijak ro) rar kokkure World Trade Center eo ilo New York im Pentagon eo ebake Washington, D.C. Nitbwili kein kar juõn men in kailbõk ñan ri ailiñ eo aolep! Ilo jelmaik men kein aolep, Ri Kennan ro an Jehovah rej kate wõt ilo jerbal eo air ñan ‘kainemõn ro rej liãjlol.’ Jejjo bwebwenato ko renaj kalikar wãwen air kõmman men in.
14, 15. Ilo ruo ien ko reinjuõn jen don ewi wãwen an Ri Kennan ro an Jehovah kajerbal Jeje ko an Bible ilo bolemen ñan kainemõn ro rej liãjlol?
14 Juõn Ri Kennan eo ej juõn ri evanjel full-time ear kebak juõn kõrã iturin jikin etetal eo im kajitõk ibben kin lemnak eo an kin nitbwil eo an ri kamijak ro. Kõrã eo ear jino mõtato. Ear ba bwe ear buromõj im e kar kõnan jibañ ilo jabdewõt wãwen an maroñ. Ri Kennan eo ear jiroñ e bwe Anij elap an itoklimo kin kij aolep, im ear read Aiseia 61:1, 2. Kõrã eo ear watõk nan kein emwij kakõrmoli im kwojarjar kõrã eo ear watõki einwõt remõn, im ear ba bwe armij otemjej rej buromõj. Ear mõnõnõ in bõk tract eo im kajitõkin Ri Kennan eo bwe en lolok ibben ilo mweo imõn.
15 Ruo Ri Kennan ro rej bed ilo jerbal in evanjel rar kebak juõn emaan eo ear jerbal ilo pelak eo an. Rar kajitõkin e elañe rar maroñ kwalok nan in kainemõn ko jen Jeje ko kin an jorrãn eo an World Trade Center walok. Elikin an kamelim ir rar konono 2 Dri Korint 1:3-7, im ear kajemlok kin nan kein: “Am ainemõn . . . ej bar lõñlok kin Kraist.” Emaan in ear kamolol kin an Ri Kennan ri turin ro lelok nan in kainemõn ko ñan ro jet im ba: “Anij en kajerammõn jerbal eo eaibujuij komij kõmmani.”
16, 17. Ta bwebwenato ko ruo rej kalikar kin kajur in Bible eo ñan jibañ armij ro rej buromõj ak inebata kin jorrãn ko?
16 Ke juõn Ri Kennan ear bar jeblak ibben armij ro reitoklimo ear lo likao eo nejin juõn kõrã eo ear itoklimo im kamelele bwe ear itoklimo in jelã wãwen mour eo an ro ri turin elikin jorrãn eo ear walok ilo ran ko rej kab motlok. Likao eo ear bwilõñ bwe Ri Kennan eo ear kajerbal ien eo an ñan lolok armij im lale ewi wãwen air mour. Ear ba bwe ear jerbal ebak ñan World Trade Center eo ke jorrãn eo ear walok im ear lo wãwen an walok jorrãn eo jen jinoin ñan jemlokin. Ke ear kajitõk etke Anij ear kõtlok kain eñtan rot in, Ri Kennan eo ear konono eon ko ilo Bible eo, ekoba Sam 37:39, eo ej ba: “A lomor an ro remõn jen Jeova, E air me ekajur ilo ien jorran.” Ilo joij lein ear kajitõk kin ewi wãwen mour eo an Ri Kennan eo im family eo an, kir e bwe en bar jeblak, im kwalok an kamolol kin lotok eo an.
17 Bar juõn ian elõñ thousand ri liãjlol ro rar bõk kainemõn jen Ri Kennan ro an Jehovah ilo ran ko ilokantok nitbwil eo an ri kamijak ro kar juõn kõrã eo me Ri Kennan ro rar iion e ke rar lolok ibben ri turiir. Ear lukkun inebata kin ta eo ear walok im roñjake ke rar konono Sam 72:12-14: “Bwe e naj kõtlok ro dri aikwij ke rej lamij, im ro dri jeramel, ro ejelok air dri jibõñ. E naj tiriamokake ro dri jeramel im ro dri aikwij, im e naj lomoren mour an ro dri aikwij. E naj wiaik air jen matõrtõr kim kokkure, im e naj aurõk botõktõkir iman mejen.” Nan kein elap an wõr meleleir! Kõrã in ear kajitõkin Ri Kennan ro ñan bar reade eon ko im kadeloñ ir ilo imweo imõn bwe ren wõnmanlok ilo bwebwenato eo air. Ilo tujemlokin bwebwenato eo air, rar jino katak Bible ibben.
18. Ewi wãwen an juõn Ri Kennan jibañ ro ri turin ke rar kir e bwe en jar ilo etair?
18 Juõn Ri Kennan ej jerbal ilo juõn mõn mõñã ilo juõn bukwon eo elõñ ri mweie ro rej bed ie im armij ro ie rar jab itoklimo mokta kin news eo emõn kin Ailiñ eo. Elikin nitbwil ko an ri kamijak ro, armij ro ilo bukwon eo rar inebata. Ilo joten Friday eo elikin nitbwil eo, manager in mõn mõñã eo ear kir aolep bwe ren diojlok im jibwe candle ko, im iumin jejjo minute ko kememej ilo ikõñ ro rar mij ilo nitbwil eo. Ñan kautiej eñjake ko air, Ri Kennan eo ear dioj im jutak ilo ikõñ ilo jikin etetal eo. Manager eo ear kile kajjen einwõt juõn ian Ri Kennan ro an Jehovah, inem elikin ien air kalmenlokjen, ear kajitõkin e bwe en jar kin aolep ro rar bed ijo. Ri Kennan eo ear kõmman men in. Ilo jar eo an, ear kwalok kin liãjlol eo ej jededlok ibelakin lal ak ear ba bwe ri liãjlol ro rar jab aikwij buromõj ilo ejelok kejatdikdik. Ear konono kin ien eo ke men kein renana rejamin bar walok im ba bwe aolep armij remaroñ kebak Anij in kainemõn eo ikijen jelãlokjen eo ejimwe jen Bible. Elikin an ba, “Amen,” manager eo—im elikin e elõñlok jen 60 armij ro ilikin mõn mõñã eo—rar itok ñan Ri Kennan eo, kamolol e, im atbõkwõje, im ba bwe jar eo an kar jar eo emõntata rar roñjake.
Juõn Jerammõn ñan Bukwon eo
19. Ta bwebwenato eo ej kalikar bwe jet armij kile kien ko reutiej an Ri Kennan ro an Jehovah?
19 Elaptata ilo ran kein, bukwon ko me Ri Kennan ro an Jehovah rej jerbal ilo kijejeto ie rej bõk tokjen jen air bed ijo—einwõt emwij an lõñ armij kalikar kake. Ekijkan an juõn jar in armij eo ej kalaplok ainemõn, mol, im mour erreo jab einwõt juõn men in kareelel ñan kõmman emõn. Ilo juõn ailiñ ituiolapen Asia, Ri Kennan ro rar kebak juõn officer eo ear retire jen agency in state security. Ear ba bwe juõn ien rar assign e bwe en etale elõñ dolul in kabuñ ko. Ke ear etale Ri Kennan ro an Jehovah, ear bwilõñ kin air mol im mwiliir emõn. Ear nebar ir kin air jutak bin ilo tõmak im mol in bwe katak ko air rar bedbed ion Bible eo. Emaan in ear katak Bible ibbeir.
20. (a) Ta eo report eo an Ri Kennan ro an Jehovah yiõ eo lok ej kwaloke? (b) Ta eo ej kalikar bwe ej lap wõt jerbal jej aikwij kõmmani, im ewi wãwen ad lemnak kin jerammõn in evanjel eo?
20 Jen jejjo wõt bwebwenato ko ilo katak in, ian elõñ thousand ko jemaroñ kwaloki, ej alikar bwe Ri Kennan ro an Jehovah rar lukkun boub ilo yiõ in jerbal eo 2001.a Rar konono ibben elõñ million armij, rar kainemõn elõñ ro rar liãjlol, im jerbal in evanjel eo air kar wõr tokjen ko remõn. Kar wõr 263,431 ro rar kamole wujleplok eo air ñan Anij ilo air baptais ilo den. Ibelakin lal, oran ri evanjel ro kar laplok 1.7 percent. Im kinke 15,374,986 armij ro rar kwelok ibbed ilo kwojkwoj eo ñan Kememej mij eo an Jesus men in ej kalikar bwe elap wõt jerbal jej aikwij kõmmani. (1 Dri Korint 11:23-26) Jej aikwij wõnmanlok im bukõt ro ettã burueir im rar mõnõnõ in bõk news eo emõn. Im toan wõt an yiõ in joij an Jehovah ej wõnmanlok, jej aikwij in kainemõn wõt ro “erup burueir.” Ej juõn jerammõn elap ewõr ibbed! Emol kij aolep jej elij nan ko an Isaiah: “I naj kanuij lõñliñ ilo Jeova, aõ e naj lõñliñ ilo aõ Anij.” (Aiseia 61:10) Jej kejatdikdik bwe Anij enaj wõnmanlok im kajerbal kij ke ej kajejjet kitien nan in kanan kein: “Iroij Jeova e naj kõmõn bwe wãnik im nebar ren edreklok iman ro dri ailiñ otemjej.”—Aiseia 61:11.
[Kamelele ko itulal]
a Chart eo jen page 17 ñan 20 ej kwalok report in jerbal eo an Ri Kennan ro an Jehovah ilo yiõ in jerbal eo 2001.
Kwoj Kememej Ke?
• Ewi wãwen an ro ettã burueir bõk jerammõn kin news eo emõn Jesus ear kwaloke?
• Ta jerammõn ko rar itok ion ro rar uak ilo mõnõnõ ñan jerbal in evanjel eo an ri kalor ro an Jesus ilo ebeben eo kein kajuõn?
• Ewi wãwen an ro emol burueir ilo ran kein lo jerammõn ko kin news eo emõn?
• Ewi wãwen ad lemnak kin jerammõn in ad einwõt ri evanjel ro?
[Jaat ilo peij 17-20]
2001 SERVICE YEAR REPORT OF JEHOVAH’S WITNESSES WORLDWIDE
(Lale bok in)
[Pija eo ilo peij 13]
Ri Kennan ro an Jehovah rej kememej ien otemjej kin eddo eo air ñan kõmman jerbal in evanjel
[Pija eo ilo peij 15]
Ro rej mõnõnõ in bõk news eo emõn rej erom mõttan dolul in jimjãn jimjatin eburukuk ibelakin lal