“Komin Druaklok Ñõn Anij”

“Komin druaklok ñõn Anij, im E naj druakwoj ñõn kom.”​—Jemes 4:8.

1, 2. (a) Ta eo ekkã an armij ro ba kake? (b) Ta eo Jemes ej kakabilek kij kake, im etke jej aikwiji men in?

“ANIJ ej bed ibbed.” Nan kein rej bed ilo kakõlle ko an ailiñ ko im nuknuk ko an ri tarinae ro. “Ilo Anij Jej Liki” nan kein emwij jeje ilo money ko ilo ran kein. Ekkã an armij ro ba bwe ewõr air jimjera ebak ibben Anij. Bõtab, kwojjab errã ke bwe ñan bõk juõn jimjera ibben Anij ej aikwij wõr men ko relaplok jen ad baj konono wõt kake ak kõmmane im likit ilo jeje?

² Bible eo ej kwalok bwe emaroñ wõr juõn jimjera ebak ibben Anij. Bõtab ej aikwiji ad kate kij. Jet Christian ri kabit ro ilo ebeben eo kein ka juõn rar aikwij kakajurlok jimjera eo air ibben Jehovah Anij. Christian overseer eo Jemes ear aikwij kakkõl jet iair kij mõm in kanniek ko im air luji air mour erreo ilo jitõb. Ilo nan in kakabilek in, ear letok juõn nan in rejañ ekajur: “Komin druaklok ñõn Anij, im E naj druakwoj ñõn kom.” (Jemes 4:​1-​12) Kar ta melelen nan eo an Jemes “druaklok”?

3, 4. (a) Kin ta eo jet ian ri konono ro an Jemes ilo ebeben eo kein kajuõn kar kememej ir kake kin nan eo “druaklok ñõn Anij”? (b) Etke jemaroñ tõmak bwe jemaroñ kebak Anij?

³ Jemes ear kajerbal juõn nan eo me elõñ ian ri konono ro an rar melele kake. Kien eo an Moses ear lelok ñan priest ro nan in jiroñ ko rejejjet kin ewi wãwen air maroñ kar “itok ebak ñan,” ak kebak, Jehovah ikijen armij ro an. (Exodus 19:22) Ri konono ro an Jemes rar bõk nan in kakememej eo bwe kebak Jehovah ejjab juõn men bajjek. Jehovah ej e eo eutiejtata ijoko otemjej ilañ im ion lal.

⁴ Ilo wãwen eo juõn, einwõt an kar juõn ri meletlet ear ba, “nan in rejañ in ej kalikar juõn lemnak emõn im kajur.” Jemes ear jelã bwe Jehovah aolep ien ej kir ilo yokwe armij ro rejjab wãppen ñan ruaklok ñan E. (2 Kronikel 15:2) Katok eo an Jesus ear kabellok ial eo ñan kebak Jehovah ilo juõn wãwen eyu. (Dri Epesõs 3:​11, 12) Ran kein, ial eo ñan kebak Anij emwij an bellok ñan elõñ million armij ro! Ak, ewi wãwen ad maroñ bõk ien in elukkun emõn? Jenaj etale ilo tukaduin jilu wãwen ko jemaroñ kebak Jehovah Anij.

Wõnmanlok im “Bõk Jelãlokjen” kin Anij

5, 6. Ewi wãwen an wanjoñok eo an Samuel ke ear jodikdik maroñ kalikar kin ta eo ej kitibuji ilo ad “bõk jelalokjen” eo kin Anij?

⁵ Ekkar ñan John 17:​3 (NW), Jesus ear ba: “Eñin men in mour indio, bwe ren bõk jelalokjen kin Kwe einwõt juõn wõt Anij emol, im Jesus Christ, eo kw’ar jilkinlok.” Elõñ ukok in Bible ko kin eon in remaroñ oktak jidik jen ukok in New World Translation. Jen air ba “bõk jelãlokjen” kin Anij, rej baj ba wõt “jela” kin Anij. Bõtab, elõñ ri meletlet ro rar lo bwe nan eo rar kajerbale ilo kajin Greek ear kitibuj juõn melele elaplok​—juõn wãwen ej wõnmanlok, im emaroñ tellok ñan juõn kõtan ebak ñan don.

⁶ Ñan jelã kajjen Anij im bed ebak ñan e ear jab juõn lemnak ekãl ilo ran ko an Jesus. Ñan wanjoñok, ilo jeje ko ilo kajin Hebrew jej konono bwe ke Samuel ear juõn ladik, “e jañin jela Anij.” (1 Samuel 3:⁠7) Melelen men in ke bwe Samuel ear jelã jidik wõt kin Anij? Jaab. Emol bwe jemen im jinen im priest ro rar lukkun katakin e. Bõtab, ekkar ñan juõn ri kabel, eon in ilo nan in kajin Hebrew emaroñ “kajerbale ñan juõn kõtan ebak.” Samuel ejañin kar lukkun ebake im jelã Jehovah, ejjab einwõt an kar bed ilo juõn jerbal einwõt ri konono eo an. Ke Samuel ear rittolok wõt, ear wõnmanlok im jelã kajjen Jehovah, im bed ilo juõn kõtan ebak ibben.​—1 Samuel 3:​19, 20.

7, 8. (a) Etke jejjab aikwij mijak im ebwer kin nan in katak ko remũlal an Bible? (b) Ta jet ian katak ko remũlal an Nan in Anij jej aikwij katak kaki?

⁷ Kwoj bõk ke jelãlokjen eo an Jehovah im kõmman juõn kõtan ebak ñõn e? Ñan kõmman eindein, kwoj aikwij “mako” ekan ko lor jitõb ko me Anij ej litoki. (1 Piter 2:2) Kwon jab juburu kin irinekatak ko wõt. Kwon kate yuk im bukõt jet ian katak ko remũlal an Bible. (Dri Hibru 5:​12-​14) Kwoj ebwer ke kin katak rot kein, im ba bwe elukkun bin melele kake ir? Elañe aet, kememej wõt bwe Jehovah ej “Ri Kaki eo Elaptata.” (Isaiah 30:​20, NW) Ej jelã ewi wãwen an maroñ kwalok mol ko remũlal ñan lolãtãt an armij ro rejjab wãppen. Im emaroñ kajerammõn kate eo am ñan melele kin ta eo ej katakin yuk.​—Sam 25:4.

⁸ Etke kwojjab etale kwe make ikijen “men ko remũlal an Anij? (1 Dri Korint 2:​10) Katak kein rejjab katak ko rejalimo im ko me ri meletlet im ri tel ro an kabuñ ko rekin aitwerõki. Katak kein rekeie ñan ad katak kin elõñ men ko kin lolãtãt im buruen Jemed eo ej yokwe. Ñan wanjoñok, binmour eo, “men in ittino eo ekwojarjar”, im elõñ kain bujen ko Jehovah ear kajerbali ñan kajerammõn armij ro an im kajejjet kitien kanan ko an​—katak kein im katak ko eirlok wõt rej kalañliñ kij im wõr tokjeir ñan etale im katak ibbed make.​—1 Dri Korint 2:7.

9, 10. (a) Etke ekauwatata utiej buru, im ta eo enaj jibañ ñan kejbãrok kij jen e? (b) Ñe jej jelãlokjen eo an Jehovah, etke jej aikwij ettã buru?

⁹ Ñe jej kalaplok jelãlokjen eo kin mol ko remũlal ilo jitõb, jej aikwij ekkõl wõt kin men in kauwatata eo emaroñ itok ibben jelãlokjen​—utiej buru. (1 Dri Korint 8:1) Utiej buru ej men in kauwatata, kinke ej kajenolok armij jen Anij. (Jabõn Kennan 16:5; Jemes 4:⁠6) Kememej, ejelok unin ad jualõñlõñ ilo ad bõk jelãlokjen eo an. Ñan wanjoñok, lale nan kein jen nan in jino eo ñan juõn book eo ej kwalok tõbrak ko ilo ran kein ikijen science: Ñe jej kalaplok ad jelã kin men ko, jenaj jelã bareinwõt kin ewi dik in jelã eo ad. . . . Men otemjej emwij ad katak im jelã kake ej dik wõt ñe keidi ñan ta eo jejañin katak kake.” Ettã buru rot in ej juõn men in kaemololo im einjuõn. Kiõ, ñe jej konono kin jelãlokjen eo elap​—jelãlokjen eo an Jehovah Anij​—ewõr juõn unin ad aikwij ettã buru wõt. Etke?

¹⁰ Lale jet nan ko ilo Bible kin Jehovah. “Lemnak ko am remũlal.” (Psalm 92:​5, NW) “Melele ko an [Jehovah’s] jejjab maroñ bwiniir.” (Psalm 147:​5, NW) “Ejelok e maroñ kabukot jelalokjen eo an [Jehovah].” (Aiseia 40:28) “O imlõl in mweien meletlet im jela an Anij!” (Dri Rom 11:33) Alikar, jejamin jelã men otemjej kin Jehovah. (Ekklisiastis 3:​11) Ear katakin kij kin elõñ men ko raibujuij, ak ej wõr wõt imad jelãlokjen eo jenaj katak jen e. Ilo ettã buru kwojjab mõnõnõ ke kin kejatdikdik in? Inem, ñe jej katak, jen kajerbal jelãlokjen eo ad ñan kebaklok kij ñan Jehovah im jibañ ro jet bwe ren kõmman eindein​—jab kautiej kij make ion armij ro jet.​—Matu 23:12; Luk 9:​48.

Kwalok Am Yokwe Jehovah

11, 12. (a) Ewi wãwen jelãlokjen eo emwij ad bõk kin Jehovah ej aikwij jelet kij? (b) Ta eo ej kamol bwe yokwe eo an juõn armij kin Anij ej mol?

¹¹ Ilo ekkar, ri jilek Paul ear kobaik kõtan jelãlokjen im yokwe. Ear je: “Ij jare men in, bwe ami yokwe en ke im õkekelok wõt ilo jela im ilo kili otemjej.” (Dri Pilippai 1:9) Jen ad jualõñlõñ kin utiej buru, mol ko otemjej jar katak kin Jehovah im karõk ko an ren kar kalaplok yokwe eo ad ñan Jemed ilañ.

¹² Emol, elõñ ro rej ba rej yokwe Anij ak ilo mol rejjab. Emaroñ wõr eñjake eo air ekajur ilo burueir. Kain eñjake rot in ej emõn, juõn men in nebar, ñe ej ekkar ñan jelãlokjen eo ejejjet. Ak ejjab melelen emol air yokwe Anij. Etke? Lale mõk kin wãwen an Nan in Anij kamelele kin yokwe: “Eñin yokwe Anij, bwe jen kejbãrok kien ko An im kien ko An re jab erro.” (1 Jon 5:⁠3) Inem, yokwe Jehovah emaroñ mol ñe ewõr kõmman ko rekiblie ibben.

13. Ewi wãwen an mijak eo ekwojarjar jibañ kij ñan yokwe Jehovah?

¹³ Mijak Anij enaj jibañ kij ñan bokake Jehovah. Bwilõñ rot in im kautiej eo emũlal kin Jehovah ej itok jen ad bõk jelãlokjen kin e, katak kin kwojarjar eo ejelok joñan, aibujuij, kajur, ekajet jimwe, meletlet, im yokwe eo an ej ñan indio. Kain mijak in ej aorõk ñan ad ruaklok ñan e. Ilo mol lale ta eo Sam 25:14 ej ba: “Bebe etino an Jeova iben ro rej mijõk E.” Inem elañe ewõr juõn mijak emõn in jab kaillu Jemed ilañ eo jej yokwe, jemaroñ ruaklok ñan e. Mijak Anij enaj jibañ kij ñan bokake nan in kakabilek eo emeletlet ilo Jabõn Kennan 3:6: “Kwon kwalok E ilo ial ko am otemjelok, inem E naj bakajen ial ko am.” Ta melelen men in?

14, 15. (a) Ta jet ian bebe ko jej aikwij beeki ran otemjej? (b) Ewi wãwen ad maroñ kõmman bebe ko ilo juõn wãwen ej kalikar mijak eo ekwojarjar?

¹⁴ Kwoj aikwij kõmman bebe ko ran otemjej, bebe ko relap im redik. Ñan wanjoñok, kain bwebwenato rot ko kwonaj bwebwenato kaki ibben ri jerbal ro mõttam, ri school ro mõttam, ak ro ri turud? (Luk 6:​45) Kwonaj niknik wõt ke ilo jerbal ko imam, ak kwonaj bukõt kilen ñan jerbal jidik wõt ñan kamwijlok jerbal eo am? (Dri Kolosse 3:​23) Kwonaj ke ruaklok ñan ro jidik wõt ak ejelok air yokwe ñan Jehovah, ak kwonaj bukõt wãwen ñan am kakajurlok kõtan eo am ibben armij ro rekajur ilo jitõb? (Jabõn Kennan 13:20) Ta eo kwonaj kõmmane, ilo wãwen ko redik bareinwõt, ñan kalaplok men ko an Ailiñ eo an Anij? (Matu 6:​33) Elañe kain nan in kaiñi rot kein ilo Bible renaj tel yuk ñan kõmman bebe ko am ran otemjej, inem emol kwoj lo Jehovah “ilo wãwen ko an otemjej.”

¹⁵ Einwõt ad ba, ñe jej kõmman bebe ko kajjojo, lemnak in en tel kij: ‘Ta eo Jehovah ekõnan bwe in kõmmane? Ta ial eo ej buñburuen kake?’ (Jabõn Kennan 27:11) Kwalok mijak eo ekwojarjar ilo wãwen in ej emõntata ñan kwalok ad yokwe Jehovah. Bareinwõt mijak eo ekwojarjar enaj kamakit kij ñan kejbãrok erreo​—ilo jitõb, ilo mour erreo, im ilo enbwin. Kememej wõt bwe, ilo ejja eon eo wõt Jemes ej rejañ Ri Christian ro ñan “druaklok ñõn Anij,” ej rejañ: “Karreo peimi, kom dri jerawiwi; im kokwojarjar buruemi kom dri buru jibil.”​—Jemes 4:8.

16. Ilo ad lelok ñan Jehovah, ta eo jejjab maroñ kõmmane, ak ta eo jenaj kõmmane?

¹⁶ Emol, kwalok yokwe ñan Jehovah ej kitibuj elõñlok men ko jen ad baj kejbãrok kij jen ta eo enana. Bareinwõt yokwe ej kamakit kij ñan kõmman emõn. Ñan wanjoñok, ewi wãwen ad uak ñan joij eo elap an Jehovah? Jemes ear je: “Men in letok emõn im wãppen otemjelok re jen lõñ, im wõnlõltak jen Jemen maram ko.” (Jemes 1:​17) Emol, ñe jej lelok men ko mweied ñan Jehovah, jejjab kamweieiklok e. Mweiuk ko otemjej rej an. (Sam 50:12) Im ñe jej lelok ñan Jehovah ien ko im kajur eo ad, jejjab kabwe juõn aikwij eo ejjab maroñ kabwe. Meñe jemaroñ jab kwalok nan kin news eo emõn kin Ailiñ eo an Anij, emaroñ kõmman bwe dekã ko ren lamõj im kwaloki! Inem, etke jej aikwij lelok ñan Jehovah men ko mweied, ien ko, im kajur eo ad? Elaptata, kinke eñin wãwen ad yokwe e kin aolepen buruõd, ad, lolãtãt, im kajur.​—Mark 12:29, 30.

17. Ta eo emaroñ kamakit kij ñan lelok ñan Jehovah ilo mõnõnõ?

¹⁷ Ñe jej lelok ñan Jehovah, jej aikwij kõmmane ilo mõnõnõ, kinke “Anij ej yokwe eo e mõnõnõ in lelok.” (2 Dri Korint 9:7) Nan in kaiñi eo ilo Duteronomi 16:17 emaroñ jibañ kij ñan lelok ilo mõnõnõ: “Jabrewõt eman en lelok einwõt an maroñ, ekar ñõn jerammõn an Jehovah am Anij, eo Ear lewoj.” Ñe jej kalmenlokjen kin joñan an lap an Jehovah joij ñan kij, jej kõnan lelok ñan e ilo ejelok joñan. Kain lelok in rot ej kamõnõnõik e, einlok wõt juõn men in lelok eo edik jen juõn ajiri ej kamõnõnõik jemen ak jinen. Kwalok yokwe eo ad ilo wãwen in enaj jibañ kij ruaklok ñan Jehovah.

Ejaak Juõn Kõtan Ebak ilo Jar

18. Etke ewõr tokjen ñan ad kalmenlokjen kin ewi wãwen ad maroñ kakõmõnmõnlok wãwen jar ko ad?

¹⁸ Ien ko ñe jej makelok iad ilo jar ñan Anij ej letok ñan kij juõn ien eaorõk​—ien ad konono im kwalok buruõd ñan Jemed ilañ. (Dri Pilippai 4:6) Kinke jar ej juõn wãwen eaorõk ñan konono ibben Anij, ewõr tokjen elañe jej bõjrak jidik im kalmenlokjen kin joñan emõnin jar ko ad. Ejjab melelen jej aikwij wejepedik ilo konono ñe jej jar, ak nan ko ad rej aikwij waloktok jen buruõd. Ewi wãwen jemaroñ kakõmõnmõnlok emõnin jar ko ad?

19, 20. Etke emõn kalmenlokjen mokta jen jar, im ta jet ian men ko rekkar ñan kalmenlokjen kake?

¹⁹ Jemaroñ kajeoñ in kalmenlokjen mokta jen ad jar. Elañe jej kalmenlokjen ilo ien lok iman, jemaroñ katibdik jar ko ad im kõmman bwe en wõr meleleir, inem jemaroñ kejbãrok kij jen ad elijinmen nan ko jej iminene kake. (Jabõn Kennan 15:​28, 29) Bõlen kalmenlokjen kin jet ian unin tel ko Jesus ear konono kake ilo jar eo an inem lemnak kin wãwen air maroñ jerbale ñan wãwen eo ad make emaroñ jibañ kij. (Matu 6:⁠9-​13) Ñan wanjoñok, jemaroñ kajitõkin kij make kin ta mõttan eo edik jemaroñ bõk kunad ie ilo ad kõmanman ankil an Jehovah ijin ion lal. Jemaroñ ke kwalok ñan Jehovah kõnan eo ad bwe en kajerbal kij joñan wõt an kõnan im kajitõk kin jibañ jen e ñan kõmman jabdewõt jerbal ear letok ñan kij? Elap ke ad lemnak kin aikwij ko ad ilo kanniek? Ta jerawiwi ko jej aikwij kajitõk jolok bwid kaki, im elaptata jej aikwij jolok bwid ko an wõn ro? Ta men in kabo ko rej kaeñtan kij, im jej kile ke joñan an aorõkin ad aikwiji kejbãrok eo an Jehovah jen men kein?

²⁰ Kobatok ibben men in, jemaroñ jelã kin wõn armij ro elaplok air aikwiji jibañ eo an Jehovah. (2 Dri Korint 1:​11) Bõtab, jejjab kõnan meloklok in kwalok ad kamolol. Elañe jej kalmenlokjen kake, jemaroñ lo un ko unin ad kamolol Jehovah im nebar e ran otemjej kin elõñ men ko remõn an. (Duteronomi 8:​10; Luk 10:21) Ad kõmman men in emaroñ wõr bar juõn tokjen​—emaroñ jibañ kij bõk juõn lemnak emõn im ewõr kamolol ie kin mour.

21. Katak kin ta wanjoñok ko ilo Bible remaroñ jibañ kij ñe jej kebak Jehovah ilo jar?

²¹ Ekkatak emaroñ kakõmõnmõnlok jar ko ad bareinwõt. Elõñ jar ko rewejepedik jen lõmaro im limaro ro retiljek ilo Nan in Anij. Ñan wanjoñok, elañe jej wõnmae juõn abañ elap, im ej kaburomõj kij im kamijak kij kin mour eo ad im an ro jej yokwe ir, jemaroñ konono kin jar eo an Jacob ilo ien eo ear aikwij wõnmae leo jein eo eirenwone, Esau. (Jenesis 32:​9-​12) Ak jemaroñ katak kin jar eo an King Asa ke enañin juõn million Ri Ethiopia ro rar kabañ armij ro an Anij. (2 Kronikel 14:​11, 12) Elañe jej inebata kin juõn abañ eo emaroñ katton ãt eo emõn etan Jehovah, inem kwomaroñ lemnak kin jar eo an Elijah iman mejen ri kabuñ ro an Baal ion Tol Carmel, im bareinwõt jar eo an Nehemiah ikijen joñan jorrãn eo an Jerusalem. (1 Kings 18:​36, 37; Nihimaia 1:​4-​11) Konono im kalmenlokjen kin jar kein remaroñ kakajurlok tõmak eo ad im letok ñan kij wãwen ko remõntata ñan kebak Jehovah kin eddo ko ad jej ineki.

22. Ta eo unin tel in yiõ eo ñan 2003, im ta eo jej aikwij kajitõkin kij kake jen ien ñan ien ilo aolepen yiõ eo?

²² Alikar, ejelok bar juõn wãwen kautiej, ejelok bar juõn mejenkajjik elaplok, ijellokin jen ad bokake nan in kakabilek eo an Jemes ñan “druaklok ñan Anij.” (Jemes 4:⁠8) Jej aikwij kõmman eindein ilo ad wõnmanlok im bõk jelãlokjen eo an Anij, bukõt kilen kalaplok ad kwalok yokwe ñan e, im kalaplok ad bed ebak ñan e ilo jar ko ad. Iaolepen yiõ eo 2003, ñe jej kememej wõt kin Jemes 4:8 einwõt unin tel in yiõ eo, jej aikwij wõnmanlok im etale kij make im lale elañe jej bed kadede ilo juõn kõtan ebak ñan Jehovah. Bõtab, ta kin mõttan eo eliktata in eon in? Ilo wãwen et eo Jehovah enaj “druakwoj ñõn kom,” im bõktok jerammõn et ko? Katak in tok ilal enaj bwebwenato kake.

Kwoj Kememej Ke?

• Etke druaklok ñan Jehovah ej juõn men elap an aorõk?

• Ta jet ian mejenkajjik ko jej aikwij likiti ñan bõk jelãlokjen kin Jehovah?

• Ewi wãwen ad maroñ kamole yokwe eo ad emol ñan Jehovah?

• Ilo wãwen et ko jemaroñ ejaak juõn kõtan elaplok ibben Jehovah ilo jar?

[Naan ko ilo peij 8]

Unin tel in yiõ eo ñan 2003 enaj: “Komin druaklok ñõn Anij, im E naj druakwoj ñõn kom.”​—Jemes 4:8.

[Pija eo ilo peij 8]

Jar eo an Elijah ion Tol Carmel ej juõn wanjoñok emõn ñan kij