“Komin Yokwe Dron”
“Ilo men in armij otemjej re naj jela bwe komij dri kalora, elañe komij yokwe dron.”—JON 13:35.
1. Ta kadkad eo Jesus ear kalikare mokta wõt jen an mij?
“AJIRI redrik.” (Jon 13:33) Kin nan kein rejoij, Jesus ear konono ñan ri jilek ro an ilo boñin eo mokta jen an kar mij. Ejañin kar wõr ilo bwebwenato ko an Gospel bwe Jesus ear kajerbal kain nan rot kein rejoij ñan konono ibbeir. Bõtab, ilo boñin eo einjuõn, buruen ear kamakit e bwe en kajerbal nan kein rejoij ñan kwalok yokwe eo an emũlal kin ri kalor ro an. Emol, Jesus ear konono kin yokwe tarrin 30 alen ilo boñin eo. Etke ear lap an konono kin kadkadin?
2. Etke kwalok yokwe elap an aorõk ibben Ri Christian ro?
2 Jesus ear kamelele kin etke yokwe ej juõn kadkad eo eaorõk. “Ilo men in,” ear ba, “armij otemjej re naj jela bwe komij dri kalora, elañe komij yokwe dron.” (Jon 13:35; 15:12, 17) Bed einwõt juõn ri kaloran Christ ej ekkeijaklok ibben yokwe jimjãn jimjatin. Jej jelã wõn Ri Christian ro remol, jab ikijen ballir ak ikijen manit ko ejej uair, ak ilo air kwalok yokwe eo emãnãn im joij ñan don. Bõk kain yokwe rot in ejej uan ej kein ka ruo ian kien ko jilu an juõn ri kaloran Christ katak in itujinoin ear konono kake. Ta eo enaj jibañ kij ñan wõnmanlok im tõbar aikwij in?
“Lõñlok Wõt ilo Men In”
3. Ta nan in rejañ eo kin yokwe ri jilek Paul ear letok?
3 Einwõt ear walok ibwiljin ri kalor ro an Christ ilo ebeben eo kein kajuõn, yokwe in ejej uan ej alikar ilo ran kein ibwiljin ri kalor ro remol an Christ. Ñan Ri Christian ro ilo ebeben eo kein kajuõn, ri jilek Paul ear je: “A kin yokwe dron ejelok unin am jejewoj ñõn kom; bwe Anij e ar katakin kom bwe komin yokwe dron.” Meñe eindein, Paul ear kobaik: “komin lõñlok wõt ilo men in.” (1 Dri Tessalonika 3:12; 4:9, 10) Jej aikwij likit nan in kakabilek eo an Paul ilo buruõd im kate wõt kij im kõmman bwe yokwe eo ad kin don en “lõñlok” wõt.
4. Ekkar ñan Paul im Jesus, wõn ro jej aikwij lukkun lemnak kaki?
4 Ilo ejja letter eo wõt emwij kakõrmole, Paul ear rejañ ri tõmak ro mõttan bwe ren “kaberan ro rej kũmkũm,” im jibõñ ro re mõjno.” (1 Dri Tessalonika 5:14) Bar juõn ien, ear kakememej Ri Christian ro rej kajur bwe ren “bõk mõjino ko an ro re jab kajur, im jab mõke kabuñburueir.” (Dri Rom 15:1) Bareinwõt Jesus ear lelok nan in jiroñ ko ñan jibañ ro remõjno. Elikin an kanan ilo boñin eo renaj ketak e bwe Peter enaj kar ilok jen e, Jesus ear jiroñ Peter: “Ñe emwij am bar oktõk, kwon kakajur ro jeõm im jãtõm.” Etke? Kinke renaj kar ilok jen Jesus inem rar aikwiji jibañ bareinwõt. (Luke 22:32; Jon 21:15-17) Inem, Nan in Anij ej tel kij bwe jen kwalok yokwe ñan ro remõjno ilo jitõb im bõjrak ilo air kamao ibben congregation eo an Christian. (Dri Hibru 12:12) Etke jej aikwij kõmman eindein? Ruo wanjoñok ko Jesus ear kwaloki rej uak.
Juõn Sheep Ejako im juõn Mõttan Silver Ejako
5, 6. (a) Ta wanjoñok ko ruo itukaduiir Jesus ear konono kaki? (b) Ta eo wanjoñok kein ruo rej kalikar kake kin Jehovah?
5 Ñan katakin ri roñjake ro an kin lemnak eo an Jehovah kin ro rar jebwãbwe, Jesus ear letok ruo wanjoñok ko ilo tukaduiir. Juõn kar ikijen juõn ri lale sheep. Jesus ear ba: “Armij õt iami jibuki s̃ip iben, elañe juõn iair ejoko, e jab likit druatimjuõn-ñoul im druatimjuõn ilo ene jemaren, im ilok ilokõnlok eo ejoko, ñõn ter eo e naj lo e? Im ñe ej lo e, ej likit e ion aieran, im lõñliñ. Im ke ej itok ñõn mweo imõn, ej kirtok ro jeran im ro dri turin im ba ñõn ir, Komin lõñliñ iba bwe I ar lo s̃ip eo aõ e kar joko. Ij ba ñõn kom, bwe ein drein e naj or lõñliñ ilõñ kin juõn dri jerawiwi eo ej ukwelok iben, elap jen kin druatimjuõn-ñoul im druatimjuõn ro dru wãnik, im ejelok air aikwij im ukwelok.”—Luk 15:4-7.
6 Wanjoñok eo kein karuo ikijen juõn kõrã. Jesus ear ba: “Kõra õt, joñoul mõtõn silver iben, elañe ejoko juõn mõtõn, e jab tili lamp, im bioke mweo, im elap an bukõte ñõn ien eo ej lo e? Im ke ej lo e, ej kirtok kõra ro jeran im dri turin, im ba, Komin lõñliñ iba; bwe I ar lo mõtõn eo kar joko. Ein drein, Ij ba ñõn kom, eor lõñliñ iman mejen enjel ro an Anij kin juõn dri jerawiwi eo ej ukwelok iben.”—Luk 15:8-10.
7. Ta men ko ruo jej katak kaki jen wanjoñok ko kin juõn sheep ejako im mõttan silver eo ear jako?
7 Ta eo jemaroñ katak jen wanjoñok kein ruo rekadu? Rej kwalok (1) ewi wãwen ad eñjake kin ro rej mõjnolok im (2) ta eo jej aikwij kõmmane ñan jibañ ir. Jen bwebwenato kin wãwen kein ruo.
Ejako ak Eaorõk
8. (a) Ewi wãwen an ri lale sheep eo im kõrã eo emmakit ke rar lo men ko rar luji? (b) Lemnak ko air kin men ko rar luji rej kalikar ta ñan kij?
8 Ilo wanjoñok kein ruo jimor ar luji juõn men, ak lale mõk kin lemnak ko an armij ro rar luji men kein. Eo ej lale sheep ear jab ba: ‘Ta tokjen juõn wõt sheep ke ewõr wõt 99? Ijjab aikwiji sheep eo ejako.’ Kõrã eo ear jab ba: ‘Etke ij aikwij buromõj kin juõn wõt mõttan silver? Ebwe mõttan ratimjuõn ibba.’ Jen men in, ri lale sheep eo ear bukõt sheep eo nejin eo ear jako einwõt ñe kar juõn wõt sheep eo nejin. Im eñjake eo an kõrã eo ear luji juõn mõttan silver kar einwõt juõn eo ear wõr juõn wõt mõttan silver ibben. Ilo wanjoñok kein ruo armij ro ruo rar lukkun kaorõk men ko rar luji. Ta melelen wanjoñok kein?
9. Ta eo ear alikar kin an ri lale sheep eo im kõrã eo kwalok air itoklimo kin men eo rar luji?
9 Lale mõk kin nan in kajemlok ko an Jesus ilo wanjoñok kein ruo: “Ein drein e naj or lõñliñ ilõñ kin juõn dri jerawiwi eo ej ukwelok iben” im “ein drein, ij ba ñõn kom, eor lõñliñ iman mejen enjel ro an Anij kin juõn dri jerawiwi eo ej ukwelok iben.” Inem, lemnak eo an ri lale sheep eo im kõrã eo ej kalikar, ilo juõn joñan edik, kin eñjake eo an Jehovah im enjel ro an ilañ. Einwõt an kar ri lale sheep eo im kõrã eo kaorõk wõt men ko rar luji, eindein an Jehovah kaorõk ro rar belok im jebwãbwe jen armij ro an. (Jeremiah 31:3, NW) Armij rein remaroñ mõjno ilo jitõb, ak rejjab jumae. Meñe rej mõjno wõt, ilo juõn joñan edik, rej lor wõt kien ko an Jehovah. (Sam 119:176; Jerbal 15:29) Kin men in, einwõt kar walok ilo ien ko mokta, Jehovah ej rumij ilo an “jolok ir jen iman mejen.”—2 Kiñ Ro 13:23.
10, 11. (a) En kar ewi wãwen ad lemnak kin ro rar belok im jebwãbwe jen congregation eo? (b) Ekkar ñan wanjoñok ko ruo an Jesus, ewi wãwen ad maroñ kwalok ad itoklimo kin ir?
10 Einwõt Jehovah im Jesus, kij bareinwõt elap ad kaorõk ro remõjno im rejako jen congregation eo an Christian. (Ezekiel 34:16, NW; Luk 19:10) Jej watõk juõn eo emõjno ilo jitõb einwõt juõn sheep ejako—jab einwõt juõn eo ejelok tokjen ñan jibañe. Jejjab lemnak: ‘Etke jej buromõj kin juõn wõt eo emõjno? Congregation in ejjab aikwiji.’ Ijoke, einwõt Jehovah jej watõk ro rar belok ak rekõnan jeblaktok einwõt ro raorõk.
11 Bõtab, ewi wãwen ad maroñ kwalok eñjake in itoklimo ko ad kin men in? Wanjoñok ko ruo an Jesus rej kwalok bwe jemaroñ kõmman men in (1) ilo ad bõk eddo eo mokta ñan lelok jibañ, (2) ilo ad kwalok bwe ewõr ad kea kin ir, im (3) ilo ad kate wõt in kõmmane. Jen etale wãwen kein kajjojo.
Bõk Eddo Eo
12. Ta eo nan ko “ilok ilokõnlok eo ejoko” rej jiroñ kij kin lemnak eo an ri lale sheep eo?
12 Ilo wanjoñok kein kajuõn ian wanjoñok ko ruo, Jesus ej ba bwe ri lale sheep eo enaj “ilok ilokõnlok eo ejoko.” Ri lale sheep eo ej bõk eddo eo im kate wõt e ñan bukõt sheep eo ejebwãbwe. Meñe ebin, ewõr kauwatata, im jekdon joñan an etolok ejjab bõpraek e jen an bukõte. Jen men in, ri lale sheep eo ej kate wõt “ñõn ter eo e naj lo e.”—Luk 15:4.
13. Ewi wãwen armij ro retiljek ilo ien etto rar jibañ ro remõjno, im ewi wãwen ad maroñ kajeoñe joñok kein remõn ilo Bible?
13 Eindein lok wõt, jibañ juõn eo ej aikwiji nan in rejañ ekkã an aikwij bwe eo ekajur en bõk eddo eo mokta ñan lelok jibañ. Lõmaro retiljek ilo ien eo etto rar melele kin men in. Ñan wanjoñok, ke Jonathan, nejin King Saul, ear lo bwe David eo jeran ear aikwij bõk rejañ, Jonathan ear “jutõk, im ilok ñõn iben Devid ilo bukwon wijki ko, im e ar kakajur pein kin Anij.” (1 Samuel 23:15, 16) Elõñ ebeben ko tokelik, ke Governor eo Nehemiah ear lo bwe jet ian Ri Jew ro rar mõjnolok, e bareinwõt ear “jutõk” im rejañ ir bwe ren ‘kememej Jehovah.’ (Nihimaia 4:14) Ilo ran kein kij bareinwõt jekõnan ‘jutak’—bõk eddo eo mokta—ñan kakajur ro rej mõjno. Ak wõn eo ilo congregation eo rej aikwij bõk eddo in?
14. Wõn ro ilo congregation eo an Christian rej aikwij bõk eddo eo ñan jibañ ro remõjno?
14 Christian elder ro, elaptata, rej aikwij bõk eddo eo ñan “kakajur pã ko re mõjino, im kabin bukwe ko re banban” im “ba ñõn ro burueir e arrimij, Komin kajur, komin jab mijõk.” (Aiseia 35:3, 4; 1 Piter 5:1, 2) Bõtab, nan in kakabilek eo an Paul ñan “kaberan ro re kũmkũm” im “jibõñ ro re mõjino” ear jab ñan elder ro wõt. Ak, nan ko an Paul rar ñan aolep ro uan “[congregation] an ro dri Tessalonika.” (1 Dri Tessalonika 1:1; 5:14) Inem lelok jibañ ñan aolep ro remõjno ej juõn jerbal ñan aolep Ri Christian ro. Einwõt ri lale sheep eo ilo wanjoñok eo, kajjojo Ri Christian ej aikwij mõnõnõ in “ilok ilokõnlok eo ejoko.” Emol, rej kõmman men in ilo bolemen ñe rej jerbal ibben elder ro. Kwomaroñ ke bõk kunam im jibañ juõn eo emõjno ilo congregation eo am?
Kwon Joij
15. Etke ri lale sheep eo ear emmakit ilo wãwen dein?
15 Ta eo ri lale sheep eo ej kõmmane ke ej lo sheep eo ejebwãbwe? “Ej likit e ion aieran.” (Luk 15:5) Juõn tibdik ealikar im jelet buruõd! Bõlen sheep eo ear jebwãbwe iumin elõñ ran im boñ ilo jikin ko ejejineti, bõlen ear ko jen kidu lion ko rar bukõte im loe. (Job 38:39, 40) Ejelok bere bwe sheep in ear mõjno kin an jabwe an mõñã. Kin an mõjno im mõk ejjab maroñ atartar ion kajur eo an make ñan anjo ion melejoñ ko enaj jelmaiki ilo ien eo ej jeblak ñan bwij eo bwijin. Inem, ri lale sheep eo ej jillok, im ilo joij ej kwotak sheep eo, im bõklok e im kijone aolep melejoñ ko lok ñan bwij eo. Ewi wãwen ad maroñ kwalok kea rot eo ri lale sheep eo ear kwaloke?
16. Etke jej aikwij kwalok ejja joij eo wõt ri lale sheep eo ear kwalok ñan sheep eo ear jebwãbwe?
16 Juõn armij eo ear ilok jen congregation eo emaroñ mõk ilo jitõb. Einwõt kidu sheep eo ear jenolok jen ri lale sheep eo, juõn armij emaroñ kar jebwãbwe ilo lal in elej. Elañe ejako jen kejbãrok eo an bwij eo, congregation eo an Christian, ej jerwawa ñan jumae ko an Devil eo, einwõt laion e rorror, ej etetal im bukot eo ej maroñ in kõñi.” (1 Piter 5:8) Bareinwõt, ej mõjnolok kin an jabwe ekan ko lor jitõb. Kin men in, elap an mõjno im ejjab maroñ anjo ion melejoñ ko ej jelmae ñe ej kõnan jeblaktok ñan congregation eo. Inem, jej aikwij jillok, im einwõt ba, ilo joij kwotak eo emõjno, im karoltok e. (Dri Galetia 6:2) Ewi wãwen ad maroñ kõmmane men in?
17. Ewi wãwen ad maroñ kajeoñe ri jilek Paul ñe jej lolok juõn eo emõjno?
17 Ri jilek Paul ear ba: “Elañe jabdewõt ej mõjno, ijjab ke mõjno bareinwõt?” (2 Corinthians 11:29, The New English Bible; 1 Dri Korint 9:22) Paul ear yokwe armij, ekoba ro remõjno. Jekõnan kwalok ejja kain yokwe rot in ñan ro remõjno. Ñe jej lolok juõn Ri Christian emõjno ilo jitõb, kwomaroñ kalikar ñan e bwe ej juõn eo eaorõk iman mejen Jehovah im Ri Kennan ro mõttan relukkun yokwe e. (1 Dri Tessalonika 2:17) Kejelãik e bwe rej bojak wõt ñan jibañ e im rej mõnõnõ in bed ibben einwõt “juõn jein im jãtin, e ar lotak bwe en dri jibõñ ilo ien jorran.” (Jabõn Kennan 17:17; Sam 34:18) Nan ko jen buruõd remaroñ kakajur e jidik kin jidik mae ien ewõr an maroñ ñan jeblak ñan bwij eo. Inem ta eo jenaj kõmmane jeltokin? Wanjoñok eo kin kõrã eo im mõttan silver eo ejako remaroñ tel kij.
Jen Kate Wõt
18. (a) Etke kõrã eo ilo wanjoñok eo ear jab ebwer? (b) Ilo wãwen et ko kõrã eo ear kate wõt in bukõte, im ta tokjen ko rar walok?
18 Kõrã eo ej luji mõttan silver eo ej jelã bwe ejadin bin loe bõtab ejañin jako otem jako. Elañe money eo ear wõtlok ilo juõn melaj elap ak juõn lwe ekilep, mũlal, im bedkat, bõlen enaj kar bõjrak an bukõte bwe ejelok tokjen. Bõtab, kin an jelã bwe money eo ej bedwõt ilo mweo imõn, emaroñ lo e, inem ej kate wõt im bukõte. (Luk 15:8) Moktata, ej tili juõn lamp ñan kameram mweo imõn eo emarok. Jeltokin, ej broomi lowan mweo imõn, im kejatdikdik in roñ ainikien. Eliktata, ej lukkun etale aolep jikin ko ilo tibdikin mae ien lamp eo ej kameram mõttan silver eo. Kin an kõrã eo kate wõt e ej lo tõbrak!
19. Ta men ko jemaroñ katak kaki jen kõmman ko an kõrã eo ear luji mõttan silver eo ilo wanjoñok eo ñan jibañ ro remõjno?
19 Tibdikin wanjoñok in ej kakememej kij kin juõn men, eddo eo ñan jibañ juõn Ri Christian emõjno ekkar ñan Bible eo ejjab juõn jerbal eo ellãlok jen maroñ ko ad. Ilo ejja ien eo wõt, jej kile bwe jej aikwij kate wõt kij. Emol, ri jilek Paul ear ba: “Ein drein emõn komin jibõñ ro re mõjino.” (Jerbal 20:35a) Kememej wõt bwe kõrã eo ear jab lo money eo ilo an baj reito-reitak ilo mweo imõn. Jaab, ear lo tõbrak kinke ear etal ilo tibdikin “mae ien e ar lo e.” Eindein, ñe jej kate wõt kij ñan kajeblak juõn eo emõjno, kilen kõmman men in jej aikwij kate wõt kij im wõr unin. Ta eo jemaroñ kõmmane?
20. Ta eo jemaroñ kõmmane ñan jibañ ro remõjno ilo jitõb?
20 Ewi wãwen ad maroñ jibañ juõn eo emõjno bwe en kalek tõmak im kamolol eo an? Bõlen juõn en katak Bible ibben im kajerbal juõn book in Christian eo ekkar emaroñ men eo ej aikwiji. Emol, katak Bible ibben juõn eo emõjno ej kõtlok kij ñan keini in jibañ e ilo juõn wãwen eyu. Service overseer eo emaroñ lale wõn eo emaroñ lelok jibañ ñan e. Emaroñ kwalok ta katak ko emaroñ katak kake im ta book ko remõntata ñan jibañ e. Einwõt kõrã eo ilo wanjoñok eo ej kajerbal elõñ kein jerbal ko ñan kõtõbrak jerbal eo an, eindein ilo ran kein elõñ kein jerbal ko ibbed ñan jibañ kij kõtõbrak eddo eo Anij ear letok ñan jibañ ro remõjno. Ruo ian kein jerbal ko rekãl, ak book ko, remaroñ lukkun jibañ ir. Rej Worship the Only True God (Kabuñ ñan Anij eo Emol Wõt) im Draw Close to Jehovah (Duaklok ñan Jehovah).a
21. Ewi wãwen ad jibañ ro remõjno ej bõktok jerammõn ñan aolep?
21 Jibañ ro remõjno ej bõktok jerammõn ko ñan armij otemjej. Eo ej bõk jibañ ej lo mõnõnõ ilo an bar kobatok ibben ro jeran remol. Jej lañliñ kin ad lelok jibañ. (Luk 15:6, 9; Jerbal 20:35b) Congregation eo ej mãnãn lok wõt ilo jitõb ñe kajjojo ian ro uan kwalok air itoklimo ilo armij ro jet. Elaptata, ej tellokin an Shepherd ro ad rej yokwe, Jehovah im Jesus, bõk nebar ñe kõnan eo air ñan rejetak ro remõjno ej alikar ibben ri karejar ro air ion lal. (Sam 72:12-14; Matu 11:28-30; 1 Dri Korint 11:1; Dri Epesõs 5:1) Inem, Un kein rej un ko remõntata unin ad aikwij wõnmanlok wõt im ‘yokwe don’!
[Kamelele ko itulal]
a Ri Kennan ro an Jehovah rar jeje.
Kwomaroñ Ke in Kamelele?
• Etke kwalok yokwe ej juõn men eaorõk ñan kij aolep?
• Etke jej aikwij yokwe ro remõjno?
• Ta men ko jej katak kaki jen wanjoñok ko kin sheep eo ejebwãbwe im mõttan silver eo ear jako?
• Ta buñten ne ko jemaroñ bõki ñan jibañ juõn eo emõjno ilo jitõb?
[Pija ko ilo peij 14, 15]
Ilo ad jibañ ro remõjno, jej bõk eddo eo mokta im joij im kate wõt
[Pija eo ilo peij 14, 15]
Jibañ ro remõjno ej bõktok jerammõn ñan aolep