Liki Jehovah Kin Aolepen Buruõm
“Ro re jela etõm re naj liki yuk.”—SAM 9:10.
1, 2. Ta jet ian men ko ejelok tokjeir armij ro rej liki ñan kainemõn ir?
RAN KEIN, ñe elõñ men ko rej kabañ mour eo ad, ekkã ad reilok ñan juõn armij ak juõn men ñan kejbãrok kij. Jet armij rej lemnak bwe korlok money emaroñ bõktok juõn eo ejokane, ak ilo mol, money ejjab juõn likepijñak ebin. Bible eo ej ba: “Eo ej liki mweiuk ko an, e naj buñ.” (Jabõn Kennan Ko 11:28) Ro jet rej reilok ñan ri tel ro an armij, ak meñe rej tel ilo wãwen ko remõntata rej kõmman bwid. Im tokelik, ir otemjej rej mij. Ilo meletlet, Bible eo ej ba: “Komin jab liki bwirõk rõn, ak nejin armij eo ejelok jibõñ iben.” (Sam 146:3) Nan kein rekakõrmol rej kakkõl kij bareinwõt nae ad atartar iod make. Jej ‘nejin armij’ bareinwõt.
2 Ri kanan Isaiah ear naruõn ri tel ro an ailiñ in Israel ilo ran ko an kinke rar liki ilo “riap einwõt juõn likepijñak.” (Isaiah 28:15-17, NW) Ilo air kate wõt ir ñan bukõt jokane, rar kobalok ibben ailiñ ko ituriir. Koba rot kein ibben don rar jab maroñ atartar ion—juõn riap. Ilo ejja wãwen in lok wõt, ilo ran kein elõñ ri tel ro an kabuñ rej kalaplok kõtair ibben ri tel ro an kien. Koba rot kein rar einwõt “juõn riap.” (Reveles̃õn 17:16, 17) Rejamin maroñ lo jokane eo ej ñan indio.
Joñok ko Remõn an Joshua im Caleb
3, 4. Ewi wãwen report eo an Joshua im Caleb ear oktak jen lõmaro joñoul?
3 Inem, ia eo jemaroñ reilok ñan lo jokane ie? Ñan ijo Joshua im Caleb rar reilok ñan e ilo ran eo an Moses. Ejjabto elikin an Israel anemkwoj jen Egypt, ailiñ eo ear bojak in deloñlok ilo Canaan, Enen Kallimur eo. Joñoul-ruo maan ro rar etal im kajaade ene eo, im itujemlokin 40 ran ko, rar jeblak im kejelã kin ta eo rar loi. Ruo wõt, Joshua im Caleb, rar kejelã ilo jimwe kin wãwen ko remaroñ kar anjo ion Canaan. Ro jet rar errã bwe ene eo ear emõn ak rar ba: “Ijoke, armij ro rej jokwe ie re kajur, im eor worwor in jikin kwelok ko, im re kanuij lap . . . Je ban ilen jumae armij ro, bwe re kajur jen kij.”—Bwinbwin 13:27, 28, 31.
4 Ri Israel ro rar roñjake lõmaro joñoul im lelñoñ, im rar jino ãlñũrñũr nae Moses. Eliktata, Joshua im Caleb, rar konono kin aolepen burueir: “Eneo kim ar driblok in wate, e juõn ene e kanuij emõn. Elañe Jeova ej yokwe kij, inem E naj kadreloñ kij iloan enen, im letok ñõn kij; eneo e bwijliplip kin milk im hõnni. Men in wõt, komin jab kabuñbata nae Jeova; im komin bareinwõt jab mijõk ro dri eneo.” (Bwinbwin 14:6-9) Meñe rar bõk elap nan in rejañ rot in, Ri Israel ro rar jab kõnan bokake, im kin men in, rar jab maroñ deloñ iloan Enen Kallimur ilo ien eo.
5. Etke Joshua im Caleb rar kwalok juõn report emõn?
5 Etke Joshua im Caleb rar kwalok juõn report emõn, ak lõmaro joñoul rar kwalok juõn eo enana? Joñoul im ruo aolep rar lo ejja jikin kwelok ko rekajur im ailiñ ko. Im joñoul iair rar jimwe ilo air ba bwe Israel ear jab kajur ñan anjo ion ene eo. Joshua im Caleb rar jelã kake men in bareinwõt. Bõtab, joñoul iair rar lo men ko ilo juõn wãwen ilo kanniek. Iturãjet, Joshua im Caleb, rar liki Jehovah. Rar lo jerbal ko an rekajur ilo Egypt, iturin Lomalo Ekilmir, im itulalin Tol Sinai. Eñin unin, elikin elõñ yiõ ko tokelik bwebwenato ko kin kõmman kein rar bwe ñan kamakit Rehab jen Jericho ñan bed ilo kauwatata kin armij ro an Jehovah! (Joshua 2:1-24; 6:22-25) Joshua im Caleb, ro rar lo kin mejeir kõmman ko an Jehovah, rar liki kin aolepen burueir bwe Anij enaj kar wõnmanlok im tarinae kin armij ro an. Eñoul yiõ ko tokelik, liki eo air ear lo tõbrak ke juõn ebeben ekãl in Ri Israel ro, iumin tel eo an Joshua, rar maaj manlok ñan loan Canaan im anjo ion ene eo.
Etke Jej Aikwij Liki Jehovah kin Aolepen Buruõd
6. Etke Ri Christian ro ilo ran kein rej bed iumin melejoñ ko, im rej aikwij liki wõn?
6 Ilo ien kein rej “ran ko eliktata,” kij, einwõt Ri Israel ro, jej jelmae ri kijirãt ro rej kajurlok jen kij. (2 Timote 3:1) Jej bed ilo melejoñ ko ilo mour erreo, ilo jitõb, im jet ien, ilo kanniek. Elañe jejjab bõk jibañ, jejjab maroñ kijenmij iumin aolep melejoñ kein, kinke rej itok jen juõn jitõb ekajur jen kij, Satan Devil eo. (Dri Epesõs 6:12; 1 Jon 5:19) Inem, jemaroñ bõk jibañ jen ia? Ilo jar ñan Jehovah, juõn emaan etiljek ilo ien etto ear ba: “Ro re jela etõm re naj liki Yuk.” (Sam 9:10) Elañe jej lukkun jelã kajjen Jehovah im melele kin ta melelen etan, jenaj liki e einwõt Joshua im Caleb rar kõmmane.—Jon 17:3.
7, 8. (a) Ewi wãwen an men in kõmanman ko kalikar unin ad aikwij liki Jehovah? (b) Ta un ko Bible ej letok ñan kij kin unin ad aikwij liki Jehovah?
7 Etke jej aikwij liki Jehovah? Joshua im Caleb rar kõmman eindein kinke rar lo men in kamol ko kin kajur eo an. Kij bareinwõt. Ñan wanjoñok, kalmenlokjen kin jerbal ko an Jehovah kin kõmanman, ekoba ijoko otemjej ilañ im ion lal, ibben elõñ billion galaxy ko. Kajur ko jet jej loi rej kamol ilo alikar bwe Jehovah ej Kajur Bõtata. Ñe jej kalmenlokjen kin aolep men in bwilõñ ko kin kõmanman, jej aikwij errã ibben Job, eo ear ba kin Jehovah: “Wõn e maroñ in bõprae e? Wõn e naj ba ñõn E, Kwoj it?” (Job 9:12) Emol, elañe Jehovah ej jutak iturid, jejjab aikwij mijak jabdewõt armij iaolepen lañ im lal.—Dri Rom 8:31.
8 Lemnak, bareinwõt, kin Nan eo an Jehovah, Bible eo. Jikin in eban maat kin meletlet eo ekwojarjar elap an kajur ñan jibañ kij ñan anjo ion manit ko renana im ukõt mour eo ad ñan kõmman ankil an Jehovah. (Dri Hibru 4:12) Jen Bible eo jej jelã kin etan Jehovah im kile aorõkin melelen etan. (Exodus 3:14) Jej kile bwe Jehovah emaroñ erom jabdewõt men ekõnan—juõn Jemen ej yokwe, juõn Ri Ekajet ewãnik, juõn Ri Tarinae ej bõk anjo—ñan kajejjet kitien karõk ko an. Im jej lo wãwen eo nan eo an ej jejjet kitien ien otemjej. Ñe jej katak Nan in Anij, jemaroñ ba, einwõt an ri jeje sam ba: “Ij liki Am in nan.”—Sam 119:42; Aiseia 40:8.
9. Ewi wãwen binmour eo im jerkakbiji eo an Jesus rej kakajur liki eo ad ilo Jehovah?
9 Karõk in binmour eo ej bar juõn unin ad aikwij liki Jehovah. (Matu 20:28) Elap ad mõnõnõ bwe Anij ear jilkintok Nejin bwe en mij einwõt juõn binmour ñan kij! Im binmour eo ej juõn men ebolemen. Ej jolok jerawiwi ko an aolep armij ro rej ukwelok im jeorlok ñan Jehovah kin juõn buru emol. (Jon 3:16; Dri Hibru 6:10; 1 Jon 4:16, 19) Mõttan wãwen kõllã kin binmour eo kar ikijen jerkakbiji eo an Jesus. Men in bwilõñ in, elõñ buki ri kamol ro rar loe, ej bar juõn unin ad aikwij liki Jehovah. Ej juõn men ej kamol bwe kejatdikdik eo ad jenaj lo tõbrak ie.—Jerbal 17:31; Dri Rom 5:5; 1 Dri Korint 15:3-8.
10. Ta un ko ibbed make unin ad aikwij liki Jehovah?
10 Men kein rej jet ian un ko unin ad maroñ im aikwij liki kin aolepen buruõd ilo Jehovah. Ebar wõr un ko, jet rej jelet kij make. Ñan wanjoñok, kij aolep jej jelmae melejoñ ko ilo mour eo ad. Ñe jej bukõt jibañ jen Jehovah ñan tel kij, jej lo joñan an keie nan in tel ko an ñan kij. (Jemes 1:5-8) An laplok ad atartar ion Jehovah ilo mour eo ad jen ran ñan ran im lo tokjen ko remõn ilo ad kõmman men in, enaj kajurlok ad liki e.
David Ear Liki Jehovah
11. David ear liki Jehovah meñe ear wõnmae ta melejoñ ko?
11 David ilo Israel eo etto ear juõn eo ear liki Jehovah. David ear wõnmae King Saul, eo ear lej im ear kõnan man e ñan mij, im jar in tarinae eo ekajur an Philistia ro, rar kajeoñ in anjo ion Israel. Ak, ear ellã in mour wõt im lo anjo. Etke? David ear make kamelele: “Jeova aõ maram im aõ lomor, wõn eo in mijõk e? Jeova kajur an aõ mour, wõn eo in lelñoñ kake?” (Sam 27:1) Kij bareinwõt jemaroñ lo tõbrak einlok wõt e elañe jej liki Jehovah.
12, 13. Ewi wãwen an kar David kwalok bwe jej aikwij liki Jehovah meñe ri jumae ro rej kajerbal loir einwõt kein tarinae eo ñan konono nae kij?
12 Juõn ien David ear jar: “Kwon roñjake ainikiõ ilo aõ lotan; Kwon kejbãrok aõ mour jen mijõk dri kijirãt eo. Kwon noj iõ jen bebe etino an ro rej kõmõn nana, jen iruij an ro enana air jerbal. Ro r’ar jeme loir einwõt jãji im r’ar alej mõri ko air, nan ko remeo. Bwe ren libon, ilo jikin ko retino, ñõn ro rewappen; emõkõj air libon e im jab mijõk.” (Sam 64:1-4) Jejjab kanuij jelã kin ta eo ear kamakit David bwe en jeje nan kein. Ak jej jelã bwe ilo ran kein, ri jumae ro rej kõmman einlok wõt in im ‘jeme loir,’ ilo air kajerbale einwõt juõn kein tarinae ilo tarinae eo. Rej “libon” Ri Christian ro ejelok rueir, kajerbal nan ko ilo konono ak jeje einwõt “mõri ko” rej kariap kij. Elañe jej liki ilo ejelok bere ilo Jehovah, ta tokjen eo enaj walok?
13 David ej etal wõt im ba: “A Anij e naj libon ir, kin juõn mõri re naj lil mõkõj. Ein drein naj lõkatipe ir, loir re naj jumae ir; . . . Ro remõn re naj mõnõnõ ilo Jeova, im naj liki E.” (Sam 64:7-10) Aet, meñe ri kijirãt ro renaj jeme loir nae kij, ilo jemlokin ‘loir renaj konono nae ir make.’ Jehovah enaj ukõt wãwen ko bwe en wõr tõbrak ie, inem ro rej liki e renaj lañliñ ilo e.
Liki eo an Hezekiah Ear Lo Tõbrak
14. (a) Hezekiah ear liki Jehovah meñe ear jelmae melejoñ et eo ekauwatata? (b) Ewi wãwen an kar Hezekiah kwalok bwe ear jab tõmak ilo nan in riap ko an Ri Assyria eo?
14 King Hezekiah ear bar juõn eo ear lo tõbrak kin an liki Jehovah. Ilo ien iroij eo an Hezekiah, jar in tarinae eo an Assyria ear iten kokkure Jerusalem. Jar in tarinae in ear kokkure elõñ aliñ ko jet. Ear bareinwõt bõk anjo ion jikin kwelok ko an Judah mae ien eo Jerusalem wõt ear jutak ilo anemkwoj, im ilo jua Sennacherib ear ba bwe enaj kar bõk anjo ion jikin kwelok in bareinwõt. Ikijen Rabshakeh, Sennacherib ear kalikar—ilo jimwe— bwe liki ilo Egypt ñan bõk jibañ jen e enaj ejelok tokjen. Bõtab, ear ba: “Anij, eo komij liki E, En jab mone yuk, im ba, Jamin lelok Jerusalem na ilo pein kiñ in Assyria.” (Aiseia 37:10) Bõtab, Hezekiah ear jelã bwe Jehovah ejjab mone armij. Inem ear jar im ba: “O Jeova amuij Anij, kwon lomorem jen pein, bwe dri ailiñ otemjej ren jela bwe Kwe Jeova, aet Kwe wõt.” (Aiseia 37:20) Jehovah ear roñjake jar eo an Hezekiah. Iumin juõn wõt boñ, juõn enjel ear man 185,000 ri tarinae ro an Assyria. Jerusalem ear ellã jen jorrãn, im Sennacherib ear ilok jen enen Judah. Aolep ro rar roñ kin tõbrak in rar kile joñan an Jehovah kajur bõtata.
15. Ta men eo wõt enaj jibañ kij ñan bojak wõt iumin jabdewõt melejoñ jej loe ilo lal in?
15 Ilo ran kein, einlok wõt Hezekiah, jej bed ilo juõn tarinae. Ikijen kij, jej bed ilo juõn tarinae ilo jitõb. Bõtab, einwõt ri tarinae ro ilo jitõb, jej aikwij kalaplok kabel ko ad ñan ellã im mour ilo jitõb. Jej aikwij kõtmene wõt kin tarinae ko im bojak wõt bwe jen jumae ro rej tarinaik kij. (Dri Epesõs 6:11, 12, 17) Ilo lal in ejjab jokane, wãwen ko remaroñ oktak ilo jidimkij. Keojaljal ko ikõtan ri ailiñ ko remaroñ waloktok ilo mõkaj. Ailiñ ko rej kõtlok bwe armij ro air ren kabuñ ñan Anij ilo anemkwoj remaroñ oktak im jab kõtlok ir. Men in wõt, bwe einlok wõt Hezekiah, elañe jej kebojak im kalaplok liki eo ad ilo Jehovah jenaj bojak in jelmae jabdewõt men renaj waloktok.
Ta Melelen Liki Jehovah?
16, 17. Ewi wãwen ad maroñ kwalok bwe jej liki Jehovah?
16 Liki Jehovah ejjab juõn men jej ba kake ilo nan wõt. Ej kitibuj buruõd im kamole ilo kõmman ko ad. Elañe jej liki Jehovah, jenaj liki kin aolepen buruõd ilo Nan eo an, Bible eo. Jenaj keini ad konono jen e, kalmenlokjen kake, im kõtlok bwe en jelet mour eo ad. (Sam 119:105) Liki Jehovah ej bareinwõt kitibuj ad liki ilo kajur eo an jitõb kwojarjar. Ilo ad bõk jibañ jen jitõb kwojarjar eo, jemaroñ kalaplok leen ko Jehovah ej buñburuen kake im jolok manit ko renana. (1 Dri Korint 6:11; Dri Galetia 5:22-24) Inem, ikijen jibañ jen jitõb kwojarjar, elõñ rar jolok jikka ak uno ko rejõkkar. Ro jet rar bõjrak jen air bed ilo mour in ejej. Aet, elañe jej liki Jehovah, jej jerbal ilo kajur eo an, jab ad make.—Dri Epesõs 3:14-18.
17 Bareinwõt, liki Jehovah ej melelen ad liki ro ej liki. Ñan wanjoñok, Jehovah ear karõk bwe “ri kõrijer e tiljek im meletlet” en lale men ko an Ailiñ eo ijin ion lal. (Matu 24:45-47) Jejjab kamakelok iad, im jejjab kajettokjen kumi in, kinke jej liki ilo karõk eo an Jehovah. Bareinwõt, elder ro rej karejar ñan congregation eo an Christian ilo kajjojo bukwon im, ekkar ñan ri jilek Paul, jitõb kwojarjar ear kãlet ir. (Jerbal 20:28) Ilo ad jerbal ilo mõnõnõ ibben elder ro ilo congregation eo, jej kwalok bareinwõt bwe jej liki Jehovah.—Dri Hibru 13:17.
Lor Joñok eo an Paul
18. Ewi wãwen an Ri Christian ro ilo ran kein lor joñok eo an Paul, ak ta eo rejjab likit air liki?
18 Ri jilek Paul ear wõnmae elõñ melejoñ ko ilo jerbal in kwalok nan eo an, einwõt kij. Ilo ran ko an, ri utiej ro an kien rar bõk melele ko rejjab jimwe kin mour in Christian, im ear kate wõt e im kajimwe nan in riap ko ak kabuk juõn wãwen ñan kwalok nan ilo ainemõn ekkar ñan kien. (Jerbal 28:19-22; Dri Pilippai 1:7) Ilo ran kein, Ri Christian ro rej lor joñok eo an. Ilo jabdewõt jikin jemaroñ, jej jibañ ro jet bwe ren melele kin jerbal eo ad, im kajerbal jabdewõt wãwen emõn im ekkar ñan kõmman men in. Im jej jerbal ñan jojomare news eo emõn im bukõt wãwen bwe kien eo an lal en rejetak jerbal in. Bõtab, jejjab liki ilo tõbrak in wõt, bwe tõbrak ak likjap ko kin jerbal ko ad rejjab bedbed ion ad win ilo imõn ekajet ko ak nebar eo jen armij ro an lal. Jen men in, jej liki Jehovah. Jej kememej wõt kin nan in rejañ eo an ñan Israel eo etto: “Ilo jeblak im kakije naj lomoremi; ami kajur e naj ilo tõt im ilo liki.”—Aiseia 30:15.
19. Ñe rej wõnmae matõrtõr, ewi wãwen an ro jeid im jatid lo tõbrak kin liki eo air ilo Jehovah?
19 Jet ien ilo bwebwenato eo an armij ilo ran kein, jerbal eo ad rar kabõjrake ilo ailiñ ko Iturear im Turilik in Europe, ilo jikin ko ilo Asia im Africa, im ailiñ ko ilo Iturõk im Tueañ in America. Ej melelen ke bwe liki eo ad ilo Jehovah ear jab jimwe? Jaab. Meñe jet ien emaroñ kõtlok matõrtõr ñan kajejjet kitien karõk eo an, ilo yokwe Jehovah ear kakajur ro rar bed ilo matõrtõr. Ilo matõrtõr, elõñ Ri Christian ro rar ejaak juõn ãt emõn einwõt ro rar tõmak ilo liki Anij.
20. Meñe jemaroñ lo tokjen ñan ad kabuñ ilo anemkwoj jen kien, ilo wãwen et ko jejamin ebbururu kaki?
20 Ilo turãjet, ilo enañin aolep ene ko rej kõtlok kij ñan kabuñ ilo anemkwoj, im jet ien rej kwalok juõn report emõn ilo news kin kij. Jej kamolol ir kin men in im kile bwe men in ej kõtõbrak karõk eo an Jehovah bareinwõt. Ilo ad bõk kajerammõn eo an, jej kajerbal anemkwoj eo ad, jab ñan kakõmõnmõnlok kõnan ko ad make, ak ñan kalaplok ad karejar ñan Jehovah. Bõtab, ñan kõmman bwe jen bõk juõn ãt emõn iman mejen ri utiej ro an lal, jejamin ebbururu, kadiklok jerbal in kwalok nan eo ad, ak mõjnolok ilo jabdewõt wãwen ñe jej jerbal ñan Jehovah. Jej kõttãik kij ñan Ailiñ eo an Messaia eo im jutak bin iturin Iroij Bõtata eo an Jehovah. Kejatdikdik eo ad ej, jab bed ilo jukjuk im bed in, ak ilo lal eo ekãl, ijo Ailiñ eo an Messaia eo ilañ enaj kien eo wõt enaj iroij jen lañ ion aolepen lal. Eban jako im enaj kajejjet kitien karõk ko an Jehovah.—Daniel 2:44, NW; Dri Hibru 12:28; Reveles̃õn 6:2.
21. Ta ial eo jenaj lore?
21 Paul ej ba: “A kijeo, je jab ian ro rej jenliklik ñõn kokkure, a ian ro rej tõmak ñõn lomorir.” (Dri Hibru 10:39) Inem, kij aolep jen karejar ilo tiljek ñan Jehovah ñan jemlokin. Ewõr un ko otemjej unin ad aikwij liki Jehovah kiõ im ñan indio..—Sam 37:3; 125:1.
Ta eo Kwar Katak Kake?
• Etke Joshua im Caleb rar bõktok juõn report emõn?
• Ta jet ian un ko unin ad aikwij liki Jehovah kin aolepen buruõd?
• Ta melelen liki Jehovah?
• Ilo liki Jehovah, jej bebe ilo buruõd ñan jutak ia?
[Pija eo ilo peij 28]
Etke Joshua im Caleb rar kwalok juõn report emõn?
[Pija ilo peij 30]
Liki Jehovah ej melelen liki ro ej liki