Ewi Wãwen An Kar Jet Armij Bõk Uak ko

ELÕÑ million armij ro rej jar. Jet rej tõmak bwe emwij uaki jar ko air. Ro jet rej lemnak wõt elañe emwij an kar Anij roñjake jar ko air ak jab. Bar ro jet rej bukõt uak ko ak rejjab lemnak in kwalok kajitõk ko air ilo jar ñan Anij.

Bible eo ej kalikar bwe Anij eo emol ej Eo ej “Roñjake jar.” (Sam ko 65:2) Elañe kwoj jar, jar ko am rej kajju ke ñan Anij eo emol? Jar ko am rej kain jar ko ke Anij enaj uaki?

Ibben elõñ armij ro ibelakin lal, uak eo ear aet! Ewi wãwen rar bõk uak ko? Ta eo rar katak kake?

Anij​—Wõn E?

Juõn ri kaki in school ilo Portugal eo me nun im priest ro rar katakin e ear kijejeto ilo kabuñ eo an. Ke kabuñ eo an ear ukõt im ilok jen manit ko raorõk, ear bwok wõt. Ke ear ito-itak ñan bar juõn ailiñ ear lo elõñ wãwen kabuñ ilo ailiñ ko ilo Orient, im ear jino lemnak elañe ear wõr juõn wõt Anij emol. Ewi wãwen eo ej aikwij kabuñ? Ke ear kajitõk ibben priest eo an kin men ko ilo Bible eo, ear kajettokjen kajitõk ko an, im ear buromõj.

Kabuñ in Catholic eo ear leto-letak juõn book jidikdik ilo jikin kwelok eo an ri kaki eo im kakkõl ro uan bwe ren jab bwebwenato ibben Ri Kennan ro an Jehovah. Ak kajitõk ko an rar bedwõt. Juõn ran ke Ri Kennan ro rar kebake ilo mweo imõn, ear roñjake im itoklimo kin ta eo ear roñjake. Ej kab juõn alen ear konono ibbeir.

Ñan bõk uak ko ñan kajitõk ko an, kõrã in ear jino katak Bible ibben Ri Kennan ro an Jehovah. Ilo kajjojo week, ear wõr ibben juõn lajrak eaetok kin kajitõk ko an ear keboji ñan ir. Ear kõnan jelã kin ta ãt eo etan Anij, elañe ear wõr juõn wõt Anij emol, elañe ear kõnan bwe armij ren kajerbal ekjap ko ñan kabuñ ñan e, im elõñlok men ko eirlok wõt. Ear kile bwe aolep uak ko ear bõki rar itok jen Bible eo, jab jen lemnak ko air make, inem ear bwilõñ im mõnõnõ kin men ko ear katak kaki. Jidik kin jidik, ear bõk uak ko ñan elõñ kajitõk ko. Rainin, ej kabuñ ñan Jehovah ilo jitõb im mol, einwõt an kar Jesus Christ ba bwe “dri kabuñ ro re mol” renaj kõmmane.​—Jon 4:​23.

Eñtan​—Etke?

Emaan eo Job ear lap an eñtan. Aolep ajiri ro nejin rar mij kin juõn lañ, im ear erom juõn ri jeramel. Bareinwõt ear bõk juõn nañinmij elap an metak im ear aikwij kijenmij jen melejoñ ko jen ro jeran rewan. Ibwiljin men kein aolep, Job ear mõkaj an konono mokta jen an lemnak. (Job 6:3) Ak Anij ear lemnak kin ta wãwen ko an ilo ien eo. (Job 35:15) Ear jelã kin ta eo ear bed ilo buruen Job im lelok jet nan in kakabilek ko Job ear aikwiji. Ej kõmman eindein ibben armij ro ilo ran kein bareinwõt.

Ilo Mozambique, Castro ear joñoul wõt an yiõ ke jinen ear mij. Ear lukkun buromõj. Etke ear aikwij mij im ilok jen kij?” ear kajitõk. Meñe jemen im jinen rar tõmak ilo Anij rar katakin e, ear bwok kiõ. Ta eo enaj kar kainemõn lemnak eo an im buruen? Ear lo ainemõn ilo an konono juõn Bible edik im bwebwenato kake ibben likao ro jein.

Jidik kin jidik, Castro ear jino melele kin unin an kar jinen mij, ear jab kin an Anij ekajete ilo jab jimwe, ak kinke ear jolet jab wãppen. (Dri Rom 5:​12; 6:​23) Kallimur eo an Bible kin jerkakbiji eo ear kainemõn e ñan juõn joñan elap kinke ear lo juõn bedbed ñan liki bwe enaj bar lo jinen. (Jon 5:​28, 29; Jerbal 24:15) Ekaburomõj bwe, emen wõt yiõ ko tokelik, jemen ear mij. Ak kiõ Castro ear laplok an maroñ kijenmij kin mij eo an. Rainin, ej yokwe Jehovah im ilo tiljek ej kajerbal mour eo an ilo jerbal eo an Anij. Lañliñ eo ear loe ej alikar ñan aolep ro rej jelã kajjen.

Elõñ armij ro rar luji ro rejitenburu ibbeir ilo mij rar lo ainemõn jen ejja katak ko remol wõt ilo Bible ko rar kainemõn Castro. Jet armij ro rar bed ilo abañ ko relap jen men ko ri nana ro rar kõmmani rar kajitõk, einwõt Job ear kõmmane: “Etke ro re jab wãnik rej mour?” (Job 21:⁠7) Ñe armij ro rej lukkun roñjake kin ta eo Anij ej ba ñe ej uak jen Nan eo an, rej katak bwe wãwen an Anij kõmman men ko rej bõk tokjen jeni.​—2 Piter 3:⁠9.

Barbara, eo ear rittolok ilo United States, ear jab bed ilo men ko rekalelñoñ an tarinae eo. Ak ear rittolok ilo juõn lal elõñ ailiñ ko rar tarinaik don ie. Rar kwalok report ko kin jorrãn ko an tarinae ran otemjej. Ilo ien katak ko an ilo school, ear bwok kin ta eo ear katak kin men ko rej walok ilo bwebwenato ko an armij im rar waloktok ilo wãwen ko ear jab kõtõmene kaki. Ta unin? Anij ear kea ke kin ta eo ear walok? Lio ear tõmak bwe Anij ej bed, ak eñjake eo an ear bwok wõt kin e.

Bõtab, lemnak eo an Barbara kin mour ear oktak jidik kin jidik kin an kamao ibben Ri Kennan ro an Jehovah. Ear roñjake im katak Bible ibbeir. Ear bed ilo kwelok ko ilo Kingdom Hall eo. Bareinwõt ear bed ilo juõn ian kwelok ko air relap. Inem, ke ear wõr kajitõk ko an, ear lo bwe ear jab bõk lemnak ko reinjuõn jen don jen Ri Kennan ro. Jen men in, Ri Kennan ro rar burukuk ilo air konono kinke lemnak ko air rar bedbed ion Bible eo.

Ri Kennan ro rar jitõñlok ñan Bible eo ñan kamol bwe Satan Devil eo, iroij in lal in, ear kabo lal im ej romak jitõb eo an. (Jon 14:30; 2 Dri Korint 4:4; Dri Epesõs 2:​1-3; 1 Jon 5:​19) Rar kamelele bwe men ko Barbara ear bwok kaki Bible eo ear kanan kaki. (Daniel, chapter 2, 7, im 8, New World Translation) Anij ear kanan kaki kinke ewõr maroñ ibben ñan reimanlok ñan ilju elañe ekõnan. Jet ian men ko rar walok kinke Anij ear kõmanmani. Men ko jet ear kõtlok bwe ren baj walok wõt. Ri Kennan ro rar kamelele ñan Barbara Bible eo ej kanan kin juõn lal ekãl im ijo wãnik enaj bõk anjo ie im eñtan enaj jako.​—2 Piter 3:​13; Reveles̃õn 21:​3, 4.

Jidik kin jidik, Barbara, ear jino melele bwe meñe Jehovah Anij ejjab kaeñtan armij, ejjab bõprae eñtan ilo an iun armij bwe ren bokake kien ko an elañe rejjab kõnan. (Duteronomi 30:​19, 20) Barbara ear beek ilo buruen bwe en katak kin kien ko an Anij im mour ekkar ñan i. Bareinwõt ear lo ibwiljin Ri Kennan ro an Jehovah kain yokwe rot eo Jesus ear ba bwe ri kalor ro remol rar aikwij kwaloki.​—Jon 13:​34, 35.

Kwe bareinwõt kwomaroñ lo tokjen jen men in letok ko rar jibañ e.

Ear jab juõn men ear karõk lok iman bwe armij ro ilo katak in ren kar lo juõn wãwen mour ekajuburuen. Mekarta, rar katak bwe Jehovah Anij ear kõmman juõn karõk ilo yokwe im ej kakobaik aolep ro remõnõnõ in bokake kien ko an. (Jerbal 10:34, 35) Karõk in ej koba air bõk mour indio ilo juõn lal ejelok tarinae, nañinmij im kwuli ie​—ejelok mij bareinwõt. (Aiseia 2:4; 25:​6-8; 33:24; Jon 3:​16) Kwokõnan ke men in? Elañe aet, kwomaroñ kalaplok am katak ilo am bukõt key eo ñan juõn wãwen mour elemõnõnõ ilo am bed ilo ilo kwelok ko rej bedbed ion Bible ilo juõn ian imõn Kingdom Hall ko an Ri Kennan ro an an Jehovah.

[Etan eo ear kõmman pija ilo page 4]

Hiker: Chad Ehlers/Index Stock Photography