Roñjake Kin Ta Eo Jitõb Ej Ba!

“Eo lojiliñin iben, en roñjake men ko Jitõb ej ba ñõn eklisia ko.”​—REVELES̃ÕN 3:​22.

1, 2. Ta nan in kakabilek eo rar eliji ikijen ennan ko an Jesus ñan congregation ko jiljilimjuõn ilo book in Reveles̃õn?

RI KAREJAR ro an Jehovah rej aikwij roñjake nan ko emwij kakõrmoli an Jesus Christ ñan eklisia ak congregation ko jiljilimjuõn book in Reveles̃õn ilo Bible eo ej kwalok kaki. Emol, kajjojo ian ennan kein rej kwalok nan in: “Eo lojiliñin iben en roñjake men ko Jitõb ej ba ñõn eklisia [ak congregation] ko.”​—Reveles̃õn 2:​7, 11, 17, 29; 3:​6, 13, 22.

² Emwij ad etale ennan ko an Jesus ñan enjel ro, ak overseer ro, ilo Ephesus, Smyrna, im Pergamum. Ewi wãwen ad maroñ bõk tokjen jen ta eo jitõb kwojarjar ear ba ñan bar congregation ko jiljilimjuõn?

Ñan Enjel ro ilo Thyatira

3. Thyatira ear bed ia, im ear buñbuñ kin kain mweiuk rot eo?

³ “Nejin Anij” ej nebar im kauweik congregation eo ilo Thyatira. (Konono Reveles̃õn 2:​18-​29.) Rar kalek Thyatira (kiõ Akhisar) iturin juõn river edik eo ear torlok iloan juõn river ekileplok Gediz (Hermus eo etto) River iturilik in Asia Minor. Jikin kwelok in ear buñbuñ kin elõñ kain jerbal ko. Ri kaunoik nuknuk ro rar kajerbale okran madder ñan kõmman uno in ekilmir, ak purple juõn uno emejaja ibben elõñ armij. Lydia, eo ear erom juõn kõrã in Christian ilo ien lolok eo an Paul ñan Pilippai ilo Greece, ear “juõn dru wia kin nuknuk eõij, jen jikin kwelok Taietaira.”​—Jerbal 16:12-​15.

4. Kin ta men ko rar nebar congregation eo ilo Thyatira?

⁴ Jesus ej nebar congregation eo ilo Thyatira kin kõmman ko an remõn, yokwe, tõmak, kijenmij, im jerbal ko air ilo jerbal in kwalok nan. Emol, ‘jerbal ko air eliktata kar lõñlok jen ko mokta.’ Bõtab, meñe ewõr juõn lokbook kin kõmman ko ad remõn mokta, jejjab kõnan kajettokjen mour erreo eo ad.

5-7. (a) Kar wõn “kõra eo, Jezebel,” im ta eo enaj kar walok ñan wãwen kareelel eo an? (b) Ennan eo an Christ ñan congregation eo ilo Thyatira ej jibañ kõrã ro ilo congregation ko bwe ren kõmman ta?

⁵ Congregation eo ilo Thyatira ear kõtlok kabuñ ñan ekjap ko, katak ko rewan, im mour in ejej. “Kõra eo Jezebel” ear bed ibwiljiir​—bõlen juõn jar in kõrã ro rar kwalok kadkad ko einlok wõt kadkadin Leroij eo Jezebel in bwij ko joñoul an Ailiñ in Israel. Jet ri meletlet ro rej ba bwe ‘ri kanan kõrã’ eo ilo Thyatira ear kajeoñ in kabo Ri Christian ro ñan kabuñ ñan anij im anij ko an dolul in wia ko im ñan bõk kunair ilo kwojkwoj ko rej kitibuj katok kin mõñã ko ñan ekjap ko. Jab kõtlok bwe jabdewõt ri kanan kõrã eo emwij an jitõñ emake ñan kareel im mone armij ro jet ilo congregation eo an Christian ilo ran kein!

⁶ Christ ‘ear bojak in jolok kõrã eo Jezebel ilo jikin babu in ri nañinmij eo, im ro rar lũñ ibben ilo eñtan eo elap, elañe rar jab ukwelok ibbeir jen jerbal ko an.’ Overseer ro ren jab lorak ilo kain katak im kareelel rot in enana, im ejelok juõn Ri Christian ej aikwij lũñ ilo jitõb im ilo kanniek ibben ak kabuñ ñan ekjap ñan an kile bwe “men ko remũlal an Satan” relukkun nana. Elañe jej bokake nan in kakkõl eo an Jesus, ‘jenaj debij wõt men ko ad,’ im jerawiwi ejamin anjo iod. Kinke rar karmijeteik manit ko rejõkkar, kõnan ko retton, im mejenkajjik ko rejõkkar, ri kabit ro emwij air jerkakbiji rej bõk “kajur ion ailiñ ko” im renaj kobalok ibben Christ ñan kokkure ir. Congregation ko ilo ran kein ewõr iju in kõkkar ko ibbeir, im ri kabit ro renaj bõk “iju ran erabõlbõl,” Leo Belele, Jesus Christ, ñe renaj jerkakbiji ñan lañ.​—Reveles̃õn 22:16.

⁷ Congregation in Thyatira ear bõk nan in kakkõl eo bwe ren jab kõtlok lemnak ko renana an kõrã ro rebukwelok. Ennan eo ekakõrmol an Christ ñan congregation eo ej jibañ limaro retiljek ilo kabuñ ñan kejbãrok ijo jikiir ekkar ñan lajrak eo an Anij ilo ran kein. Rejjab kajeoñ in iroij ion maan ro im kabo jabdewõt lõmaro ñan lũñ ilo jitõb ak kanniek ibbeir. (1 Timote 2:​12) Jen men in, kõrã rein rej likit juõn joñok emõn ilo jerbal ko ñan wijtake Anij. (Sam 68:11; 1 Piter 3:​1-6) Elañe congregation eo ej kejbãrok men ko an​—einwõt katak ko rerreo im mwil im jerbal ko raorõk an Ailiñ eo​—Christ enaj bõktok ãjinkij ko raibujuij, jab ekajet.

Ñan Enjel eo ilo Sardis

8. (a) Sardis ear bed ia, im ta jet ian kamelele ko kin jikin in? (b) Etke congregation eo ilo Sardis ear aikwij i jibañ?

⁸ Congregation eo ilo Sardis ear aikwiji jibañ kinke ear mij ilo jitõb. (Konono Reveles̃õn 3:​1-6.) Ear bed enañin 30 mile ko iturõk in Thyatira, Sardis ear juõn jikin kwelok emweie. Jerbal in wia, tõbrak ko ilo jerbal in kallip ilo jikin eo, im kõmman nuknuk im carpet wool rar kamweie jikin kwelok ear wõr tarrin 50,000 armij ro ijo mokta. Ekkar ñan ri bwebwenato eo Josephus, Sardis ear wõr juõn bukwon elap in Ri Jew ro ilo ebeben eo kein kajuõn B.C.E. Ibwiljin jikin kwelok eo ejorrãn ekar wõr juõn imõn jar im juõn temple ñan anij eo Artemis.

9. Ta eo jej aikwij kõmmane elañe jerbal eo ad ñan Anij enaj juõn jerbal bajjek im ejelok ad itoklimo kake?

⁹ Christ ear jiroñ congregation eo ilo Sardis: “I jela jerbal ko am, bwe ebuñbuñ bwe kwoj mour, im kwoj mij.” Ta elañe ewõr ibbed juõn ãt ebuñbuñ bwe jej ruj ilo jitõb ak jejjab itoklimo in bõk jerbal ak jerammõn ko an Christian im jerbal eo ad ñan kwalok nan im jej “bojak in mij” ilo jitõb? Inem jej aikwij ‘kememej wõt kin ekijkan ad maroñ bõk im roñjake’ ennan eo an Ailiñ eo, im kakajurlok ad kate wõt kij ilo jerbal eo ekwojarjar. Emol jej aikwij bõk kunad ilo kwelok ko an Christian kin aolepen buruõd. (Dri Hibru 10:24, 25) Christ ear kakkõl congregation eo ilo Sardis: “Elañe kwo jamin ekil, I naj iwij einwõt dri kwot, im kwo jamin jela jete auõ I naj iwij iom.” Ta kin ran kein ad? Mõttan jidik jenaj aikwij uak kin ia eo jej jutak ie.

10. Einwõt wãwen eo ear walok ilo Sardis, ta eo maroñ walok ibben jet Ri Christian ro ilo ran kein?

¹⁰ Meñe jej bed ilo juõn wãwen einlok wõt Sardis, emaroñ wõr jet armij ro rejjab ‘kabrijrij nuknuk ko air im re naj etetal ibben Christ ilo nuknuk remouj, bwe rej tellokõn.’ Ien otemjej, armij ro jet rej kile kajjiir einwõt Ri Christian ro, rej kejbãrok air erreo, ilo mour erreo im kabuñ ejelok lipjinjin jen lal in ibbeir. (Jemes 1:​27) Inem, Jesus ‘ejamin jeorlok etair jen book in mour, ak enaj kwalok ir ñan Jemen im enjel ro.’ Kinke ej tellokiir etetal ibben Christ, ri kabit ro rej einwõt juõn kõra ebojak in belele im renaj naballir kin nuknuk linen erabõlbõl, erreo, im emõn eo ej kõkkar kin jerbal ko rewãnik an ro rekwojarjar an Anij. (Reveles̃õn 19:8) Jerammõn in jerbal ko raibujuij rej kõttar ir ilañ rej lujur ir ñan bõk anjo ion lal in. Jerammõn ko rej bed iman ro renaj mour ion lal bareinwõt. Etair emwij jeje ilo book in mour bareinwõt.

11. Ta eo jej aikwij kõmmane elañe jej mejki ilo jitõb?

¹¹ Ejelok juõn iad ekõnan bed ilo ejja wãwen eo wõt ilo jitõb einwõt congregation eo ilo Sardis. Ak ta elañe jej kile bwe jej mejki ilo jitõb? Jej aikwij emmakit ilo mõkaj bwe jen lo tokjen ko remõn. Ta elañe jej lorak ilo wãwen ko rejjab kwojarjar ak jej jino jakkeini ad bed ilo kwelok ko ak kwalok nan. Jen jar kin aolepen buruõd im bukõt jibañ jen Jehovah. (Dri Pilippai 4:​6, 7, 13) Keini konono Bible im katak kin Jeje ko im book ko an “ri kõmñe eo etiljek” enaj jibañ kij bwe jen ekkõl wõt ilo jitõb. (Luk 12:42-​44) Inem jenaj einwõt ro ilo Sardis rar bõk buñburu eo an Christ, im jenaj juõn jerammõn ñan ri tõmak ro mõttad.

Ñan Enjel eo ilo Philadelphia

12. Ewi wãwen am naj kar kamelele kin wãwen kabuñ eo ilo Philadelphia eo?

¹² Jesus ear nebar congregation eo ilo Philadelphia. (Konono Reveles̃õn 3:​7-​13.) Philadelphia (Alasehir kiõ) kar juõn jikin kwelok eo emweie ilo juõn ene rar kõmman wine ie iturilik in Asia Minor. Emol, anij eo an elap kar Dionysus, anij in wine. Alikar, Ri Jew ro ilo Philadelphia rar jab lo tõbrak ilo air kareel Ri Jew ro rej Christian bwe ren debij wõt jet manit ko an Kien eo an Moses ak ñan jeblak im lori.

13. Ewi wãwen an kar Christ kajerbal “ki eo an David”?

¹³ Christ “Eo ki an Devid [ej bed] iben,” im ear bõk maroñ eo ñan inek aolep men ko an Ailiñ eo im tel mweo imõn ri tõmak ro. (Aiseia 22:22; Luk 1:​32) Jesus ear kajerbal ki eo ñan kabellok ien ko remõn an Ailiñ eo im jerammõn ko ñan Ri Christian ro ilo Philadelphia eo etto im jikin ko jet. Jen yiõ eo 1919 ear likit iman “dri kõmñe eo etiljek” “juõn kejem elap” eo ej tellok ñan kwalok nan kin Ailiñ eo im ejelok jabdewõt ri jumae eo emaroñ kili. (1 Dri Korint 16:9; Dri Kolosse 4:​2-4) Emol, kejem eo ñan jerammõn ko an Ailiñ eo ear kiilek ñan ro rej jen “imõn kwelok an Setan,” kinke rejjab Ri Israel ro ilo jitõb.

14. (a) Ta kallimur eo Jesus ear lelok ñan congregation eo ilo Philadelphia? (b) Ewi wãwen ad maroñ kejbãrok kij jen ad buñ ilo “auõ in kabo eo”?

¹⁴ Jesus ear lelok ñan Ri Christian ro ilo Philadelphia eo etto kallimur in: “Bwe kw’ar drebij nan in kijenmij eo Aõ, inem I naj bareinwõt drebij yuk jen auõ in kabo eo e naj itok ion aolepen lõl, im naj melejoñ ro otemjej rej jokwe ion lõl.” Kwalok nan ej aikwij wõr kijenmij rot eo Jesus ear kwalok e. Ear jab kõtlok ri kijirãt eo bwe en anjo ion ak ear wõnmanlok im kõmanman ankil an Anij. Kin men in, Christ ear jerkakbiji ñan bõk mour eo ejjab wabanban ilañ. Elañe jej tiljek wõt ñan bebe eo ad ñan kabuñ ñan Jehovah im rejetak Ailiñ eo ilo ad bõk kunad ilo jerbal in kwalok nan kin news eo emõn, jejamin buñ ilo ien melejoñ eo, “auõ in kabo eo.” Jenaj ‘drebij men eo ibed’ jen Christ ilo ad kate kij ñan kalaplok men ko an Ailiñ eo. Ilo ad kõmmane men in enaj jemlok ilo an ri kabit ro bõk belin eo ejej wõnãn ilañ im mour indio ilo lal ñan ri jerbal ro mõttair retiljek.

15. Ta men in aikwij eo ro renaj erom ‘jur ko an tempel eo an Anij’ rej aikwiji?

¹⁵ Christ ej kobaiklok: “Eo ej bõk anjo I naj kamaroñ e bwe en juõn jur ilo tempel an Aõ Anij, . . . im I naj jeje ion etan Aõ Anij, im etan jikin kwelok eo an Aõ Anij, Jerusalem ekãl, eo ej wõnlõltak jen lõñ jen Aõ Anij, im eta ekãl.” Ri kabit ro rej overseer rej aikwij tiljek ñan kabuñ eo emol. Rej aikwij jutak bin einwõt ro uan “Jerusalem ekãl” ilo air kwalok nan kin Ailiñ eo an Anij im kejbãrok air erreo ilo jitõb. Men in ej juõn men in aikwij elañe rekõnan einwõt jur ko ilo temple eo eaibujuij ilañ im elañe rekõnan bõk etan jikin kwelok eo an Anij einwõt ri jokwe ro an ilañ im bõk etan Christ einwõt lio belen. Im, lojilñiir rej aikwij “roñjake men ko Jitõb ej ba ñõn eklisia ko.”

Ñan Enjel eo ilo Laodicea

16. Ta jet ian mol ko kin Laodicea?

¹⁶ Christ ear kauweik congregation eo ejowan ilo Laodicea. (Konono Reveles̃õn 3:​14-​22.) Tarrin 90 mile ko iturear in Ephesus im ear bed ilo jabõn ial eo elaptata ri wia ro rar itoitak ie ilo komlal eo ekouwa iturin River Lycus, Laodicea ear juõn jikin kwelok eo emweie kin mweiuk im money. Nuknuk ko rebuñbuñ rar kõmmani jen kilen sheep ekilmej rar itok jen ijo. Einwõt juõn jikin kwelok eo juõn school in doctor ebuñbuñ ear bed ie, bõlen Laodicea ear kõmmane uno in mejen armij eo kar naetan Phrygian powder. Asclepius, juõn anij in uno in doctor, ear juõn ian anij ko relap ilo jikin kwelok eo. Ear lõñ Ri Jew ro ilo Laodicea, im jet iair rar mweie.

17. Etke Ri Laodicea ro rar bõk nan in kauwe?

¹⁷ Ke ear konono ñan congregation eo ilo Laodicea ikijen “enjel” eo an, Jesus ear konono einwõt “dri kennan etiljek im emol, im Jinoin kõmõnmõn an Anij.” (Dri Kolosse 1:​13-​16) Ear kauweik Ri Laodicea ro kinke rar jab “bio im jab bwil” ilo jitõb. Kinke rar mãnãn jidik, Christ enaj kar emõjraki jen loñin. En kar jab bin ñan air melele kin wanjoñok in. Hierapolis jikin kwelok eo ebak ekar wõr lwe ko rebwil, im Colossae ear wõr den molo ie. Bõtab, kinke rar aikwij katorlok den ko ñan Laodicea jen juõn jikin etolok, ke ear tõbarlok jikin kwelok eo den eo ear mãnãn. Rar kajerbal juõn tããñ ekilep ñan katorlok den ko bareinwõt. Ebak ñan Laodicea, den ko rar torlok ilo juõn roñ in dekã ko.

18, 19. Ewi wãwen Ri Christian ro ilo ran kein remaroñ bõk jibañ einwõt ro rar bed ilo Laodicea?

¹⁸ Armij ro kajjojo ilo ran kein rej einlok wõt Ri Laodicea ro kinke rejjab bwil eo elujur ak molo eo ekaemololo. Einwõt den eo emãnãn, ej emõjrake! Jesus ejjab kõnan ir einwõt ri konono ro an, einwõt ri kabit “ri keañ kin Kraist.” (2 Dri Korint 5:​20) Inem elañe rejjab ukwelok, renaj luji jerammõn eo air einwõt ri keañ ro an Ailiñ eo. Ri Laodicea ro rar korlok mweiuk ko ilo kanniek im rar ‘nanatõmmõm im dri ememlokjen, im jeramel, im bilo im kelwan.’ Ñan jolok air jeramel, bilo, im kelwan ilo jitõb, jabdewõt armij ilo ran kein ej einlok wõt ir ej aikwij wiaik jen Christ ‘gold emwij karreoik e’ ilo tõmak emwij melejoñe, “nuknuk ko remouj” ilo wãnik, im “uno in bilo” ej kakõmõnmõnlok lolokjen ilo jitõb. Christian overseer ro rej mõnõnõ in jibañ ir ñan kabwe aikwij eo air ilo jitõb bwe ren “mweie kin tõmak.” (Jemes 2:5; Matu 5:3) Bareinwõt, overseer ro rej aikwij jibañ ir ñan kajerbal “uno in bilo” eo ilo jitõb​—ñan bõk im jerbal ekkar ñan katakin, joñok, im lemnak eo an Jesus. Men in ej juõn wãwen kamadmõd eo nae “mõm an kõniek im mõm an mej im wuj wan an mour in.”​—1 Jon 2:​15-​17.

¹⁹ Jesus ej kauweik im kajimweik aolep ro ej yokwe ir. Overseer ro iumin kajur eo an rej aikwij kwalok ejja joij rot in wõt. (Jerbal 20:28, 29) Ri Laodicea ro rar aikwij in “kate im ukwelok,” im oktaklok ilo lemnak im mour eo air. Eokwe, jet iad emwij ke ad kamineneik kij ñan mour ilo wãwen ad kadiklok jerbal eo ekwojarjar ñan Anij ñan juõn jikin ettãlok ilo mour eo ad? Inem jen ‘wiaik uno in bilo eo jen Jesus bwe jen lo aorõkin jerbal in bukõt mokta Ailiñ eo ilo kijejeto.​—Matu 6:​33.

20, 21. Wõn ro rej uak ilo jimwe ñan kallallal eo an Jesus ilo ran kein, im ta kejatdikdik ko rej bed ibbeir?

²⁰ “Lo!” Christ ej ba, “Ij jutõk iman aur im kalõlõl. Elañe jabrewõt armij e naj roñ ainikiõ im kabellok aur eo, I naj dreloñlok ñõn e, im maj kejota iben im e iba.” Ekkã an Jesus kar kwalok nan in jiroñ ko ilo jitõb ke ear mõñã. (Luk 5:​29-​39; 7:​36-​50; 14:​1-​24) Ej kallallal kiõ ion aor eo an congregation eo ej einlok wõt kain congregation eo ilo Laodicea. Ro uan congregation eo renaj ke uak, kõkãl yokwe eo air ñan e, karuwaineneik e ibwiljiir, im kõtlok bwe en katakin ir. Elañe aet, Christ enaj mõñã ibbeir im renaj bõk elap tokjen.

²¹ Class in “Bar Jet Aõ S̃ip” ilo ran kein rej kadeloñ Jesus ilo juõn wãwen kõkkar, im men in ej tellok ñan mour indio. (Jon 10:16; Matu 25:34-​40, 46) Ñan kajjojo ri kabit eo ej bõk anjo, Christ enaj lelok jerammõn eo ñan ‘jijet ibben ion throne eo an, einwõt ke ear bõk anjo im jijet ibben Jemen ion throne eo An.’ Aet, ñan ri kabit ro emwij air bõk anjo, Jesus ej kallimur bwe enaj lelok ãjinkij eo elap bwe ren bõk throne eo ibben ituanbwijmaroñin Jemen ilañ. Im sheep ro jet emwij air bõk anjo rej reimanlok ñan juõn jikin eaibujuij ion lal iumin iroij eo an Ailiñ eo.

Katak ko ñan Kij Aolep

22, 23. (a) Ewi wãwen Christian ro otemjej remaroñ bõk tokjen jen nan ko an Jesus ñan congregation ko jiljilimjuõn? (b) Ta eo jej aikwij beek ilo buruõd?

²² Ejelok bere bwe Christian ro aolep remaroñ bõk elap tokjen jen nan ko an Jesus ñan congregation ko jiljilimjuõn ilo Asia Minor. Ñan wanjoñok, elikin air lale nan in nebar ko rekkar jen Christ, Christian elder ro rej yokwe rej emmakit ñan nebar kajjojo armij im congregation ko rekajur wõt ilo jitõb. Ñe ewõr likjap ak mõjno ko, elder ro rej jibañ ri tõmak ro mõttair ñan jerbali Jeje ko jen Bible ñan kamadmõdi. Kij aolep jemaroñ lo tokjen jen elõñ wãwen kakabilek ko Christ ear lilok ñan congregation ko jiljilimjuõn, toan wõt ad jerbali ilo jar im ilo mõkaj.a

²³ Ran kein eliktata ejjab juõn ien ñan ad bed bajjek, arõk mweiuk, ak jibadõk jabdewõt men ej kadiklok jerbal eo ad ñan Anij. Inem congregation ko aolep ren romaklok einwõt lamp ko me Jesus ej likiti ilo jikiir. Einwõt Christian ro retiljek, jej aikwij beek ilo buruõd ien otemjej bwe jen liñõre ñe Christ ej konono im roñjake ta eo jitõb eo ej ba. Inem jenaj lo lañliñ toan wõt ad bed einwõt ro rej kotak meram ñan kaibujuij Jehovah.

[Kamelele ko itulal]

Ewi Wãwen Am Naj Uak?

• Kar wõn “kõra eo, Jezebel,” im etke kõrã ro rekwojarjar rejjab kajeoñe e?

• Ta wãwen eo ear walok ilo congregation eo ilo Sardis, im ta eo jemaroñ kõmmane ñan kejbãrok kij jen ad einwõt elõñ Ri Christian ro rar jokwe ijo?

• Ta kallimur ko Jesus ear lelok ñan congregation eo ilo Philadelphia, im ewi wãwen rej jerbali ilo ran kein?

• Etke Ri Laodicea ro rar bõk nan in kauwe ko, ak ta kejatdikdik ko rej bed iman Ri Christian ro rekijejeto?

[Pija eo ilo peij 14]

Jej aikwij kejbãrok kij jen wãwen ko renana an “kõra eo, Jezebel”

[Pija ko ilo peij 16]

Jesus ear likit iman ri kalor ro an juõn “aur” elap im ej tellok ñan jerammõn ko an Ailiñ eo

[Pija eo ilo peij 18]

Kwoj karuwaineneik ke Jesus im roñjake?