Kobaik Jatõr Ñan Jelãlokjen Eo Am

“Ilo ami jelalokjen, jadõr.”​—2 PITER 1:​5-8.

1. Elõñ abañ ko rej waloktok kinke armij ro rejjab maroñ ta?

ILO JUÕN ien kareelel elap nae uno ko rekajur, jodikdik ro ilo United States rar bõk juõn nan in kakabilek: “Komin ba jaab.” Elaplok an emõn elañe armij otemjej remaroñ ba jaab ñan bõk uno ko rejõkkar, ñan idak den in kadõk le jen joñan, ñan mour ilo juõn wãwen ejõkkar ak etton, ñan riap ak kwot ilo jikin business ko air, im ñan “jurjurmelea ko an”! (Dri Rom 13:14) Ak, wõn enaj ba bwe ebidodo in ba jab?

2. (a) Ta wanjoñok ko ilo Bible rej kwalok bwe abañ in ear jab juõn men ekãl? (b) Wanjoñok kein ren kar kamakit kij bwe jen kõmman ta?

² Kinke ebin an aolep armij ro rejjab wãppen jerbale jatõr, jej aikwij itoklimo in jelã kin ewi wãwen ad maroñ anjo ion jabdewõt men jej jelmae. Bible eo ej jiroñ kij kin armij ro etto rar karejar ñan Anij ak jet ien ej bin air ba jab. Kememej David kin jerawiwi im lũñ eo an ibben Bath-sheba. Men in ear tellok ñan mij eo an ajiri eo nejiiro me ear walok jen lũñ eo air im mij eo an leo ibben Bath-sheba, ro kar ejelok rueir. (2 Samuel 11:​1-​27; 12:​15-​18) Ak lemnak kin ri jilek Paul, eo ear kwalok bwid eo an im ba: “Bwe men eo emõn I kõnan, I jab kõmõne; a nana eo I jab kõnan, eñin Ij kõmõne.” (Dri Rom 7:​19) Jet ien kwokõnan ke ebwer? Paul ear wõnmanlok im ba: “Bwe Ij lõñliñ ilo kien Anij ekar ñõn armij eo iloan: a ij lo bar juõn kien ilo raõ, ej tõrinaek kien aõ lolãtãt, im kajibokweik iõ ñõn kien jerawiwi eo ej ber ilo raõ. O ña armij iñtan! Wõn e naj kõtlok iõ jen enbwinin mij in?” (Dri Rom 7:​22-​24) Wanjoñok kein ilo Bible ren kabin bebe eo ad ñan jab ebwer ilo ad kalaplok jatõr eo ad.

Jatõr, juõn Kadkad eo Jej Aikwij Katak Kake

3. Kamelele kin unin ad ba bwe ejjab bidodo ñan kwalok jatõr.

³ Jatõr, eo ej koba maroñ eo ñan ba jab, 2 Piter 1:​5-7 ej konono kake im ej koba tõmak, erreo, jelãlokjen, kijenmij, kabuñ ñan Anij, tiriamo kake jeid im jatid, im yokwe. Ejelok juõn ian kadkad kein remõn rar bed ibbed jen ien lotak. Jej aikwij kaddeki ilo buruõd. Jej aikwij lukkun kate kij ñan kalikar kadkad kein ilo juõn joñan emõn im alikar. Inem enaj kar bidodolok ke ad kaddek jatõr?

4. Etke elõñ rej ba ejelok abañ in jerbale jatõr, ak kain lemnak in ej kalikar ta?

⁴ Emol, bwe elõñ armij remaroñ ba bwe ejelok abañ in jerbale jatõr. Rej etal wõt im mour ekkar ñan kõnan ko air, im ilo jelã kake ak jaje kake emmakit ekkar ñan mõm in kanniek ko air rejjab wãppen im jidik wõt air lemnak kin jorrãn ko renaj walok​—ñan ir im ro jet. (Jud 10) Likjap eo ñan mõnõnõ in ba jaab elaplok an alikar jen mokta. Men in ej kalikar bareinwõt bwe jej mour ilo “ran ko eliktata” Paul ear konono kake ke ear ba: “Ien ko renana renaj waloktok. Bwe armij ro renaj yokwe ir make, im renaj ri arõk mweiuk, im ri jualõñlõñ, im ri jua, im ri blaspem, . . . im ro rej tõr.”​—2 Timote 3:​1-3.

5. Etke jen jemaan Ri Kennan ro an Jehovah rar itoklimo kin kadkadin jatõr, im ta nan in kakabilek eo ej jerbale wõt ñan kiõ?

⁵ Ri Kennan ro an Jehovah elap air jelã kin aikwij eo ñan jerbale jatõr. Einwõt Paul, rej jelã kin tarinae eo ikõtan juõn kõnan ñan kabuñburuen Anij ilo air mour ekkar ñan kien ko an im ial eo mour in kanniek eo air ejjab wãppen ej rejañ ir bwe ren bõke. Kin men in jen jemaan rar itoklimo in jelã kin wãwen air maroñ anjo ion tarinae in. Ilo yiõ eo 1916, copy eo moktata in magazine in kwoj readi kiõ ear konono kin “ial eo ejimwe jej aikwij bõke ñan kwalok jatõr ilo lemnak im nan ko ad, im mwilid.” Ear rejañ bwe jen kememej wõt kin ta eo Dri Pilippai 4:8 ej ba. Nan in kakabilek eo ekwojarjar ilo eon ko ej jerbal wõt, meñe ear walok 2,000 jima yiõ ko remotlok im elaplok an bin lore kiõ jen ien ko mokta ak ilo 1916. Mekarta, Ri Christian ro rej kate wõt ir im ba jaab ñan mõm ko an lal, kinke rej jelã bwe ilo air ba eindein ej einwõt air ba aet ñan Ri Kõmanman eo air.

6. Etke jejjab aikwij ebwer ñe jej kaddek kadkadin jatõr?

⁶ Dri Galetia 5:​22, 23 ej konono kin jatõr einwõt mõttan “leen jitõb [kwojarjar].” Elañe rej kwalok kadkadin ekoba “yokwe, lõñliñ, ainemõn, meanwõr, joij, lejokmen, tiljek, [im] inimõn, enaj lap tokjed. Ilo ad kõmman eindein enaj kejbãrok kij, einwõt an Peter kamelele, jen ad “jab jowõn ak jowa” ilo jerbal eo ad ñan Anij. (2 Piter 1:8) Ak jejjab ebwer ak ekajete kij make elañe jej likjap in kwalok kadkad kein ilo mõkaj im ekkar ñan joñan eo jekõnan kwaloke. Bõlen kwar lo ilo jikin school eo juõn ri school emõkajlok an jelã jen eo juõn. Ak ilo jikin jerbal eo juõn ri jerbal emõkajlok an jelã katak jerbal jen ri jerbal ro mõttan. Ilo ejja wãwen in lok wõt, jet emaroñ mõkajlok air kõnak im kalikar kadkad ko kadkadin Christian jen ro jet. Men eo eaorõk ej bwe jej wõnmanlok im kaddeklok kadkad ko rekwojarjar joñan wõt ad maroñ. Jemaroñ kõmman men in ilo ad bõk jibañ eo Jehovah ej letok ilo Nan eo an im congregation eo. Joñan mõkaj in ad tõbar mejenkajjik eo ad ediklok an aorõk jen ad kate kij ñan wõnmanlok ilo jitõb.

7. Ta ej kamol bwe jatõr ej juõn kadkad eaorõk?

⁷ Meñe emwij kilajrak e einwõt kadkad eo eliktata jitõb eo ear ejaak, jatõr ej joñan wõt im jab diklok aorõkin jen ko jet. Jej aikwij kememej bwe jemaroñ kejbãrok kij jen aolep “jerbal in kõniek ko” elañe jatõr eo ewãppen ear bed ibbed. Ak, armij ro rejjab wãppen rekin bo ilo juõn ian kain “jerbal in kõniek ko . . . , lũñ, etton, ejej, kabuñ ñõn ekjõp, marmir, kijirãt ko, akwail ko, ban ko, illu ko, wãlok ko, limõjnonu ko, kiõjaljal ko. Junmar ko, karek ko, airwaro ko.” (Dri Galetia 5:​19, 20) Inem jej aikwij keini ad tarinaik tarinae im bebe ilo buruõd ñan jolok lemnak ko renana jen buruõd im lemnak eo ad.

Elaplok an Bin Jerbale Jatõr Ibben Jet Armij

8. Ta jet ian un ko unin an bin ibben jet Ri Christian ro ñan jerbale jatõr jen ro jet?

⁸ Elaplok an bin ibben jet Ri Christian ro ñan jerbale jatõr jen ro jet. Etke? Wãwen an jemeir im jineir katakin ir ak men ko rar walok ñan ir mokta remaroñ kar kõmman bwe en bin an jerbale jatõr. Elañe ear jab juõn abañ ibbed ñan kaddek im kwalok jatõr, men in ej juõn unin ad lañliñ kake. Ak jej aikwij kwalok tiriamo im meletlet ñe jej jerbal ibben ro elaplok an bin air jerbale jatõr, elaptata ñe rej kabañ kij kinke ejelok jatõr ibbeir. Kinke jejjab wãppen, wõn iad ewõr jabdewõt unin ad maroñ kowãnik kij?​—Dri Rom 3:​23; Dri Epesõs 4:2.

9. Ta men in kamõjno ko ibben jet armij, im ñããt men in kamõjno kein renaj jako ñan indio?

⁹ Ñan wanjoñok: Jej jelã bwe jet Ri Christian ro mõttad rar jolok jikka ak jab kajerbal uno kan rekajur ñan “kamõnõnõik” ir remaroñ añuri wõt. Ak jet rej lo bwe ebwe an bin air kõmman joñan ñan mõñã ak idak den in kadõk. Ibben ro jet ebwe an bin air debij loñiir, inem ekkã air kalõkatip armij kin nan ko. Ñan anjo ion likjap kein rej aikwij kate ir im kaddek jatõr. Etke? Ilo mol Jemes 3:2 ej ba: “Ilo elõñ men ko jej otemjej tibñil. Elañe jabrewõt e jab tibñil ilo nan, e im armij ewãppen im ej maroñ in drebrijbije aolepen enbwiniir.” Ak ibben ro jet relukkun kõnan gamble. Ak remaroñ lo bwe ebwe an bin jab buru kadu. Emaroñ aikwij ien ñan kijenmij im anjo ion men in kamõjno kein. Meñe jemaroñ wõnmanlok wõt ilo jitõb kiõ, mõm in kanniek kein renaj lukkun jako ñan indio elikin wõt ad wãppen einwõt juõn armij. Mae ien eo, ilo ad jerbale jatõr enaj kejbãrok kij jen ad jeblaklok ñan juõn wãwen mour ejerawiwi. Ñe aitwerõk in ej wõnmanlok, jej aikwij jibañ don im jab ebwer.​—Jerbal 14:​21, 22.

10. (a) Etke jerbale jatõr ilo mour in belele ebwe an bin ibben jet ri belele ro? (b) Ta oktak eo elap juõn brother ear kõmmane? (Lale box eo ilo page 22.)

¹⁰ Bar juõn wãwen ebwe an bin ibben jet armij ñan jerbale jatõr ej ilo mour in belele. Emol, mour in belele ej mõttan wãwen an kar Jehovah Anij kõmanman kij. Ak, ekanuij bin ibben jet armij ñan jatõr ñe leo im lio rej babu ibben don, ekkar ñan kien ko an Anij. Abañ in emaroñ laplok an bin ñe ekajur eñjake eo ñan babu ibben don. Jej mour ilo juõn lal ej tõr kin belele im kakajurlok jitõb in mijkaie ilo elõñ wãwen ko. Men in emaroñ kabañ Ri Christian ro rekõnan make iair im jab mare​—iumin jet ien​—bwe ren jerbal ñan Anij im jab aikwij madjake mour in belele. (1 Dri Korint 7:​32, 33, 37, 38) Ak ekkar ñan kien eo ilo Bible bwe “emõn ñe rej belele jen ñe rej urur,” remaroñ beek in mare, im enaj emõn. Ilo ejja ien eo wõt, rej beek in mare “ilo Iroij wõt,” einwõt an Bible eo kakabilek. (1 Dri Korint 7:​9, 39) Jemaroñ liki bwe Jehovah ej lañliñ kin air itoklimo in kejbãrok kien ko an rewãnik. Ri Christian ro mõttair rej watõke einwõt juõn men in kalañliñ ñan kobalok ibben ri kabuñ ro remol rej lor kien mour erreo im tiljek.

11. Ewi wãwen ad maroñ jibañ juõn ri tõmak leo ak lio ekõnan mare ak ejañin belele ñan kiõ?

¹¹ Ta elañe kwojjab lo juõn mõttam? Baj lemnak kin inebata eo an juõn armij eo ekõnan belele ak ear jab maroñ kõmman eindein! Emaroñ lo ro jeran rej mare im lo juõn joñan mõnõnõ ibbeir, ñe ej bukõt wõt juõn rejetan. Ñan jet ian ro rej bed ilo wãwen in, mantin ikkure kin enbwiniir ak kõpa rej kõmmane einwõt juõn manit. Ak, ejelok juõn Christian ekõnan kabwer eo juõn eo ej kate wõt ñan kejbãrok mour erreo eo an. Ilo jaje kake jemaroñ kabwer armij elañe jaar ba, “Ñããt kwonaj mare?” Jemaroñ ba nan kein meñe ejjab kõnan kalõkatipe, ak enaj kar emõnlok elañe bwe jen jatõr im debij loõd ak lale ta eo jej ba! (Sam 39:⁠1) Ro ibwiljid rej kejbãrok air erreo meñe rejañin mare ej tellokin air bõk nebar emãnãn jen kij. Ijellokin ad ba ta eo emaroñ kaburomõj armij, jemaroñ bukõt kilen kõketak armij. Ñan wanjoñok, jemaroñ kobaik ro rejañin mare ñan kumi ko an ro reritto ilo jitõb ñe rej kejota ak kamao ibben don.

Jatõr ilo Mour in Belele

12. Etke ro emwij air mare rej aikwij jatõr bareinwõt?

¹² Meñe emwij an juõn mare ejjab melelen bwe ejjab aikwij jatõr ñe ej babu ibben mõttan. Ñan wanjoñok, aikwij ko an leo im lio kin mour in belele rej oktak jen don. Ak jet ien wãwen ejmour eo an juõn ri belele emaroñ kõmman bwe en bin airro babu ibben don ak ren jab babu ibben don. Bõlen, kin ta ko rar walok mokta, juõn iair maroñ lo bwe ebin bokake kien in: “Leo en lelok men eo ekar ñõn lio belen: im bareinwõt lio ñõn leo belen.” Ilo wãwen in, eo mõttan ej aikwij kalaplok an jatõr. Ak erro maroñ kememeje nan in kakabilek eo Paul ear letok ilo yokwe ñan Ri Christian ro emwij air mare: “Komin jab elikinjipjip dron, elañe e jab ilo juõn ien im buruemi wõt juõn, bwe komin lelok kom ñõn jar im bar ber iben dron, bwe Setan en jab kabo kom kin ami mõjino.”​—1 Dri Korint 7:​3, 5.

13. Ta eo jemaroñ kõmmane ñan jibañ ro rej kate wõt ir ñan jerbale jatõr?

¹³ Maan im kõrã ro ri belele remaroñ kamolol elañe erro jimor rej jerbale jatõr ilo ien air babu ibben don. Ilo ejja ien eo wõt, rej aikwij melele kin ri kabuñ ro mõttair rej kate in jerbale kadkadin ilo wãwen in. Jejjab kõnan meloklok in jar bwe Jehovah en lelok ñan ro jeid im jatid ilo jitõb lolokjen, beran, im maroñ eo ñan beek ilo burueir bwe ren wõnmanlok im jatõr im bõk buñten ne ko ñan anjo ion kõnan ko rejõkkar.​—Dri Pilippai 4:​6, 7.

Wõnmanlok im Jibañ Don

14. Etke jej aikwij tiriamokake Ri Christian ro mõttad?

¹⁴ Jet ien, emaroñ bin ñan melele kin Ri Christian ro mõttad rej kate ir ñan jerbale jatõr ñan anjo ion juõn abañ elap ibbeir ak ejjab juõn eddo ibbed. Ak armij ro rej oktak jen don. Ibben jet armij ebidodo air lor eñjake ko air; ak ejjab eindein ibben ro jet. Ibben ro jet ebwe an bidodo air tel ir make, ejjab juõn abañ ñan jerbale jatõr. Ibben ro jet ebwe an bin jerbale. Ak, kememej wõt, juõn armij eo ej kate in jolok juõn manit enana jen e ejjab juõn armij enana. Ej aikwij wõr ad eñjake im tiriamo kin Ri Christian ro mõttad. Emaroñ jelet mõnõnõ eo ad ñe jej wõnmanlok im kwalok tiriamo ñan ro rej bed ilo juõn tarinae ibbeir make ñan kalaplok air jatõr. Jemaroñ lo men in jen nan ko an Jesus ilo Matu 5:7.

15. Etke nan ko ilo Sam 130:3 rej nan in kainemõn ikijen jatõr?

¹⁵ Jejjab kõnan bwid im ekajete Ri Christian eo mõttad kinke ear wõr jet ien ko ear jab kwalok kadkadin Christian. Ej juõn men in rejañ ñan jelã bareinwõt bwe meñe jemaroñ lo ad make bwid jet ien, Jehovah ej lo elõñ alen ad bwid, meñe Ri Christian ro mõttad rejjab loi. Inem ej juõn men in kainemõn ñan kij bwe jen kememeje nan ko ilo Sam 130:⁠3: “Elañe Kwe, O Jeova, kwo naj kakõle jerawiwi ko, O Iroij, wõn e naj jutõk?”

16, 17. (a) Ewi wãwen ad maroñ jerbale Dri Galetia 6:​2, 5 ikijen jatõr? (b) Ta eo jenaj katak kake tokelik kin jatõr?

¹⁶ Ñan kabuñburuen Jehovah, kij kajjojo jej aikwij kaddek jatõr, ak jemaroñ liki bwe Ri Christian ro jeid im jatid renaj jibañ kij. Meñe kij kajjojo jej aikwij inek eddo eo ad make, jelukkun aikwij jibañ don ñan kijenmij ilo likjap ko ad. (Dri Galetia 6:​2, 5) Jemaroñ kaorõk jemed im jined, mõttad, ak jerad ro rej kabõjrak kij jen ad etal ñan jikin ko enana ad etal ñani, jen ad lo men ko enana loi, jen ad kõmman men ko enana kõmmani. Rej jibañ kij ñan ad jerbale jatõr, ak maroñ eo ñan ba jaab jen buruõd!

¹⁷ Elõñ Ri Christian ro emaroñ dedelok air kõmmani men kein ej kab mwij ad bwebwenato kaki kiõ kin jatõr, ak rej lo bwe ewõr wõt wãwen air maroñ kakõmõnmõnlok kadkadin. Rekõnan kalaplok air kwalok jatõr, ñan joñan eo ebwe ekkar ñan maroñ eo an armij ro rejjab wãppen. Eñjake in ej eindein ke ibbem? Ta eo kwomaroñ kõmmane ñan kaddeklok leen jitõb in an Anij? Im ilo am kõmman eindein ewi wãwen emaroñ jibañ yuk ñan tõbar mejenkajjik eo etto an bed einwõt juõn Ri Christian? Jen lale ilo katak in tok ilal.

Kwoj Kememej Ke?

Etke Jatõr . . .

• ej juõn kadkad eo Ri Christian ro aikwij kaddeke?

• ebwe an bin ibben jet armij ñan jerbale?

• ej juõn men in aikwij ilo mour in belele?

• ej juõn kadkad eo jemaroñ jibañ don ñan kaddeke?

[Bo̦o̦k eo ilo peij 22]

Ear Katak ñan Ba Jaab

Juõn ian Ri Kennan ro an Jehovah eo ej jokwe ilo Germany ear jerbal einwõt juõn technical communications clerk. Jerbal eo an ear koba aluij im roñjake tarrin 30 program in television im radio ko rekajju jen don. Ke ear wõr abañ ilo jerbal eo an, ear aluij ak roñjake program eo mae ien ear lo abañ eo. Ej ba: “Abañ kein enañin aolep ien rar walok ilo juõn ien enana, ilo ejja ien eo wõt pija ko kin kowadoñ ak mour in belele etton rar walok. Pija ko retton rar bedwõt ilo lemnak eo aõ iumin elõñ ran ak week ko, im einwõt ñe rar eddeb ñan kamelij eo aõ.” Ear ba bwe men in ear lukkun jelet mour in jitõb eo an ilo jab jimwe: “Ijaad buru kadu, inem ebwe an bin aõ jatõr ñe ij aluij pija ko kin kowadoñ. Pija ko kin mour etton rar kabañ kõtan eo ibben lio ibba. Iar aikwij tarinaik men kein ran otemjej. Ñan bõk anjo ion tarinae in, Iar beek in kabukõt bar juõn jerbal ekãl, meñe Iar aikwij kadiklok wõnãn jerbal eo aõ. Ejjab to tokelik Iar lo bar juõn jerbal. Kõnan eo aõ ear jejjet kitien.”

[Pija ko ilo peij 21]

Jelãlokjen eo jej bõk jen katak Bible ej jibañ kij jerbale jatõr