Christian Limaro Retiljek​—Ri Kabuñ Ro Raorõk An Anij

“Ellejkõnkõn emaroñ mone armij; ak kõrã eo ej mijak Jehovah enaj bõk nebar.”​—PROVERBS 31:​30, NW.

1. Ewi lemnak eo an Jehovah kin aibujuij in armij ñe jej keidi ibben lemnak eo an lal in?

LAL IN elap an kaorõk armij eo ilikin, elaptata deeo an kõrã ro. Bõtab, men eo eaorõktata ibben Jehovah, ej armij eo iloa, eo emaroñ laplok an aibujuij ñe ej rittolok. (Jabõn Kennan Ko 16:31) Inem, Bible eo ej rejañ kõrã ro: “Komin jab mõke kalitlit kom kin kalitlit eo elikemi, kin birõk kolan bõrõmi, kin inõk gold, ak kin kõnõk nuknuk ko. A komin mõke kalitlit kom ilo buruemi, kin men eo e jamin ijurwewe, kin jitõb e inimõn im joij wõt, eo e kanuij aurõk iman mejen Anij.”​—1 Piter 3:​3, 4.

2, 3. Ewi wãwen kõrã ro rar bõk kunair ilo jerbal in kowõnmanlok news eo emõn ilo ebeben eo kein kajuõn, im ewi wãwen rar kanan kin jerbal in?

² Kain jitõb rot in emõn elõñ kõrã ro ilo Bible rar kwaloki. Ilo ebeben eo kein kajuõn, jet iair rar bõk jerammõn eo ñan karejar ñan Jesus im ri jilek ro an. (Luk 8:​1-3) Tokelik, Christian limaro rar erom ri evanjel ro rekijejeto; ro jet rar lukkun rejetake Christian maan ro rar tel congregation ko, ekoba ri jilek Paul; im jet iair rar kanuij kwalok jitõb in karuwainene, elaptata rar kabellok moko imwiir bwe ren kõmman kwelok ko an congregation ko ijo.

³ Kinke Jehovah enaj kar kajerbal kõrã ro ilo juõn wãwen ekajur im kajejjet kitien karõk eo an ilo Jeje ko. Ñan wanjoñok, Joel 2:​28, 29 (New World Translation) ear kanan bwe maan im kõrã ro, ro redik im ritto, renaj kar bõk jitõb kwojarjar im bõk kunair ilo jerbal in kajededlok news eo emõn kin Ailiñ eo. Kanan in ear jino jejjet kitien ilo Pentecost 33 C.E. (Jerbal 2:​1-4, 16-18) Jet kõrã ro emwij an jitõb eo kabit ir rar bõk maroñ ko rekabwilõñlõñ, einwõt maroñ in kanan. (Jerbal 21:​8, 9) Ilo kijejeto eo air ilo jerbal in kwalok nan, limarein retiljek im rej einwõt juõn jar in tarinae elap ilo jitõb, rar bõk kunair ñan kajededlok mour in Christian ilo mõkaj ilo ebeben eo kein kajuõn. Ilo mol, enañin ebak ñan 60 C.E., ri jilek Paul ear jeje bwe ikijen news eo emõn emwij “kwalok e ñõn ro otemjej rej ber iomin lõñ.”​—Dri Kolosse 1:​23.

Nebar Ir kin Beran, Kijejeto im Karuwainene eo Air

4. Etke ear wõr juõn un emõn ibben Paul ñan nebar elõñ kõrã ro ilo congregation eo an Christian ilo ebeben eo kein kajuõn?

⁴  Ñan wanjoñok, Ri jilek Paul, ear wõr an kamolol kin jerbal eo an jet kõrã ro​—einwõt Christian overseer ro ran kein rej kamolol kin jerbal eo kõrã ro rekijejeto rej kõmmani. Ibwiljin kõrã ro Paul ear konono kake “Traipina im Traiposa, ro rej jerbal ilo Iroij,” im “Persis e jitenburu, eo elap an jerbal ilo Iroij.” (Dri Rom 16:12) Paul ear je bwe Euodia im Syntyche, rar “jerbal [ibben] ilo gospel.” (Dri Pilippai 4:​2, 3) Priscilla, ekoba Aquila leo ibben, rar jerbal ibben Paul bareinwõt. Priscilla im Aquila, “r’ar janilik kin kenwair” kin Paul, im men in ear kamakit e bwe en jei: “Jab ña wõt ij kamolol ir, a bareinwõt eklisia otemjej an dri ailiñ ko.”​—Dri Rom 16:​3, 4; Jerbal 18:2.

5, 6. Ilo wãwen et ko Priscilla ear likit juõn joñok emõn ñan Christian kõrã ro ran kein?

⁵ Ta unin an kar Priscilla kijejeto im beran? Juõn bwebwenato ilo Jerbal 18:​24-26, emaroñ kwalok kin unin an kar kijejeto im beran, ijo ear ba bwe liin ear rejetak leo belen bwe en jibañ Apollos, juõn ri konono wejepedik, bwe en jelã kin katak ko remõn im kãl. Alikar, Priscilla ear juõn ri katak emõn kin Nan in Anij im katak ko an ri jilek ro. Ear kaddek kadkad ko remõn im ear erom juõn armij eaorõk ñan Anij im leo belen im juõn uan eaorõk ñan congregation eo ilo jinoin. Christian kõrã ro reowõn ran kein rej bareinwõt joñan wõt aorõkiir kin air niknik in katak Bible im bõk ekan ko lor jitõb jen “ri kõmñe eo etiljek.”​—Luk 12:42.

⁶ Aquila im Priscilla rar lukkun joij im karuwainene armij. Paul ear bedwõt ilo mweo imwiiro ke ear jerbal ibbeir ilo business eo air kin keke em nuknuk ko ilo Corinth. (Jerbal 18:​1-3) Ke erro rar emmakit ñan jikin kwelok in Ephesus im tokelik ñan Rome, rar wõnmanlok im kwalok jitõb in karuwainene eo an Christian, im elaptata rar kõmman kwelok ko an congregation ilo mweo imwiir. (Jerbal 18:18, 19; 1 Dri Korint 16:​8, 19) Nympha im Mary jinen John Mark rar bareinwõt kõmman kwelok ko an congregation ilo mweo imwiir.​—Jerbal 12:12; Dri Kolosse 4:​15.

Juõn Men Eaorõk Rainin

7, 8. Ta lokbook in nebar kin jerbal eo ekwojarjar ewõr ibben elõñ Christian kõrã ro ran kein, im ta eo remaroñ liki kake?

⁷ Einwõt ilo ebeben eo kein kajuõn, kunan Christian kõrã ro retiljek ilo ran kein ekanuij lap tokjen ñan kõtõbrak karõk eo an Anij, elaptata ilo jerbal in evanjel. Im ej juõn lokbook in nebar elap ñan limarein! Lemnak kin joñok eo an Gwen, eo ear jerbal ñan Jehovah elõñlok jen 50 yiõ ko mae ien ear mij ilo 2002. “Kijejeto eo an Gwen einwõt juõn ri evanjel kar juõn men ebuñbuñ ilo jikin kwelok in amro,” leo belen ear ba, “Ñan e, armij otemjej kar tellokin air bõk yokwe im kallimur ko an Jehovah. Tiljek eo an ñan Anij, dolul eo an, im family eo amro​—ekoba nan in rejañ eo an ej yokwe kimar buromõj​—ear kõketak ña im ajiri ro nejiõ ilo juõn mour eobrak kin tõbrak im ãjinkij. Kimij lukkun buromõj kin an jako.” Gwen im leo ibben rar mare iumin 61 yiõ ko.

⁸ Elõñ thousand Christian kõrã ro, rej single im ro emwij air mare, rej jerbal einwõt pioneer im missionary ro, im rej juburueir kin aikwij ko an mour ñe rej kajededlok ennan eo an Ailiñ eo ilo jikin ko jen jikin kwelok ko robrak kin armij ro reboub ñan jikin ko rej make iair jen bukwon ko jet. (Jerbal 1:8) Elõñ rar jab wia moko imwiir ak jab kõmman ajiri bwe ren kalaplok air jerbal ñan Jehovah. Rej rejetak ro mõttair rej jerbal einwõt traveling overseer ro, ke elõñ thousand kõrã ro rej jerbal ilo Bethel ibelakin lal. Ejelok bere bwe, kõrã rein rej karmijeteik kõnan ko air rej mõttan “men ko remõn ilo ailiñ ko otemjelok” rej kaibujuij mweo imõn Jehovah.​—Haggai 2:​7, NW.

9, 10. Ewi wãwen jet ian uan family ko rar kamolol kin joñok eo emõn an Christian kõrã ro rej belele im jinen ro?

⁹ Emol, elõñ Christian kõrã ro ewõr eddo ko an family; ak, rej likit wõt mokta aikwij ko an Ailiñ eo. (Matu 6:​33) Juõn kõrã ej pioneer eo ej single ear jei: “Jinõ, kin an jutak bin ilo tõmak im likit juõn joñok emõn, kar juõn ian un ko relap unin aõ erom juõn regular pioneer. Ilo mol, ear juõn ian pioneer ro remõntata mõtta.” Juõn emaan ri belele ej konono kin lio belen, eo ej jinen ledik ro lalem: “Mweo imõm ej erreo im karbõb ien otemjej. Bonnie, ear kõmman bwe en melak inem family eo am rar boub wõt ilo men ko lor jitõb. Wãwen an lale joñan am kajerbal money ko am ear kamaroñ iõ bwe in jerbal part-time iumin 32 yiõ ko, im kin men in Iar kalaplok ien ñan bed ibben family eo aõ im kõmman men ko ilo jitõb. Lio ibba ear katakin ajiri ro nejõm kin tokjen niknik ilo jerbal. Ij kañiãjoik e wõt.” Rainin leo im lio rej jerbal ilo jikin headquarter ko relap an Ri Kennan ro an Jehovah.

¹⁰ Juõn emaan ej jeje kin lio belen, eo ej jinen ajiri ro rej ritto kiõ: “Kadkad ko kadkadin Susan relukkun emõn rej yokwe eo eurur kin Anij im armij, melele, eñjake, im mol eo an. Aolep ien ear tõmak bwe Jehovah ej tellokin bõk men ko remõntata jen kij​—juõn kien ej jerbal ñan emake einwõt juõn ri karejaran Anij im jinen jimor.” Kin jibañ eo jen rejetan, leo ear maroñ in bõk elõñ jerammõn ko ilo jitõb, ekoba jerbal einwõt juõn elder, pioneer, substitute circuit overseer, im juõn uan Hospital Liaison Committee. Elap an aorõk limarein ñan lõmaro beleir, Ri Christian ro mõttair, im elaptata, ñan Jehovah!​—Jabõn Kennan Ko 31:28, 30.

Kõrã ro Ejelok Beleir

11. (a) Ewi wãwen an Jehovah kar kwalok an itoklimo kin kõrã ro retiljek, im elaptata kõrã ro ejako beleir? (b)Ta eo Christian kõrã ro ejako beleir im kõrã ro jet retiljek ejañin wõr ibbeir remaroñ liki kake?

¹¹ Ekkã an Jehovah lemnak kin mour eo an kõrã ro ejako beleir. (Duteronomi 27:19; Sam 68:5; Aiseia 10:​1, 2) Ejañin ukõt lemnak eo an. Ej wõnmanlok im itoklimo wõt kin jab kõrã ro ejako beleir wõt ak bareinwõt kin kõrã ro rej single bõlen kinke rejjab kõnan ak rejañin lo juõn Christian emaan emõn ibbeir. (Malachi 3:​6, New World Translation; Jemes 1:​27) Elañe kwoj juõn ian ro rej jerbal ilo tiljek ñan Jehovah im ejañin wõr Christian ri belele eo mõttam, kwomaroñ liki bwe kwo aorõk iman mejen Anij.

12. (a) Ewi wãwen jet Christian kõrã ro rej kwalok air tiljek ñan Jehovah? (b) Jet Christian kõrã ro mõttad rej aikwij kijenmij iumin kain eñjake rot ko?

¹² Einwõt juõn wanjoñok, lemnak kin Christian kõrã ro mõttad rejañin mare kinke rej tiljek ilo air bokake nan in kakabilek eo an Jehovah ñan mare “ilo Iroij wõt.” (1 Dri Korint 7:​39; Jabõn Kennan Ko 3:1) Nan in Anij ej kallimur: “Kwonaj [Jehovah] tiljek ñan eo ej tiljek ñan Yuk.” (2 Samuel 22:​26, NW) Ak, ñan elõñ ian ro rej single, wãwen in ebwe an bin. Juõn Christian kõrã ej ba: “Iar bebe in mare ilo Iroij wõt, ak elõñ alen ij jañ ke iar lo ro jera mare Christian maan ro remõn, im ij make iaõ wõt.” Bar juõn Christian kõrã ej ba: “Iar jerbal ñan Jehovah iumin 25 yiõ ko. Emwij aõ beek ilo buruõ bwe In tiljek ñan e, ak eñjake in make iaõ ekkã an kaburomõj iõ.” Ej bar ba: “Kõrã ro einwõt ña kimij lukkun kõnan bõk rejañ.” Ewi wãwen ad maroñ jibañ kõrã rein retiljek?

13. (a) Ta eo jemaroñ katak jen joñok eo an ro rar lolok jiroñ eo nejin Jephthah? (b) Ilo wãwen et ko jet jemaroñ kwalok ad itoklimo kin Christian kõrã ro rejañin mare ilo congregation in ad?

¹³ Juõn wãwen jej loe ilo juõn wanjoñok etto. Ke jiroñ eo nejin Jephthah ear jolok maroñ eo an ñan bõk leo belen, armij ro rar kile bwe ear karmijeteik juõn kõnan elap ibben. Ta eo rar kõmmane ñan rejañ e? “[Kõra ro] nejin Israel rar ilok yiõ otemjej, bwe ren kememej lio nejin Jepta dri Giliad, iomin emen ran ilo juõn yiõ.” (Dri Ekajet Ro 11:30-40) Eindein, jej aikwij kwalok jen buruõd ad kamolol im nebar kõrã ro rekiblie kien Anij im ro rej single.a Bar ta wãwen eo jemaroñ kwalok ad itoklimo kin ir? Ilo jar ko ad jej aikwij kajitõk ibben Jehovah bwe en jibañ kõrã rein retiljek bwe ren wõnmanlok ilo tiljek kin jerbal eo air. Rej tellokin bõk juõn nan jen kij bwe Jehovah im aolep ro uan Christian congregation ren yokwe im lukkun kamolol ir.​—Sam 37:28.

Ewi Wãwen Jemen ak Jinen Ro Rej Bõk Anjo

14, 15. (a) Etke Christian jinen ro ejelok beleir rej aikwij kir Jehovah ñan bõk jibañ? (b) Ewi wãwen jemen ak jinen ro rej single maroñ jerbal ekkar ñan jar ko air?

¹⁴ Christian kõrã ro rej single ak rejañin mare im ewõr nejiir rej jelmae elõñ aitwerõk ko. Bõtab, remaroñ reilok ñan Jehovah im bõk jibañ ñan katakin ajiri ro nejiir ekkar ñan kien ko an Bible. Emol, elañe kwe juõn kõrã ej single im ewõr nejim, kwojjab maroñ bõk jerbal in jinen im jemen jimor ilo wãwen otemjej. Mekarta, Jehovah enaj jibañ yuk bwe kwon inek elõñ eddo ko elañe kwoj kajitõk ilo tõmak. Ñan wanjoñok: Baj lemnak mõk ñe kwoj inek ieb eo eddo kin mõñã ko im kwoj aikwij bõklok ñan apartment eo am jejjo floor ko ilõñ. Kwonaj kar kajerbal ke jikin uwe eo elañe apartment eo am ear wõr juõn elevator ebak? Emol jaab! Eindein lok wõt, kwon jab make inek eddo ko an armij ak kwomaroñ kajitõk ibben Jehovah ñan jibañ yuk. Emol, ej rejañ yuk bwe kwon kir e. Sam 68:19 ej ba: “Emõnõnõ Iroij eo Ej ineke inek eo am, ran ñan ran. Aet Anij eo Ej am lomor.” Eindein, 1 Piter 5:7 ej kir yuk bwe kwon jolok inebata ko am ion Jehovah “bwe Ej ierki [yuk].” Inem ñe ewõr abañ im inebata ko am, kwon jolok eddo ko am ion Jeova, eo Jemed, im “jab jokwor” kake.​—1 Tessalonika 5:​17; Sam 18:6; 55:22.

¹⁵ Ñan wanjoñok, elañe kwe juõn jinen, kwoj inebata kin wãwen an jodikdik ro jet jelet ajiri ro nejim ilo school ak kin melejoñ ko jet remaroñ jelmae. (1 Dri Korint 15:33) Ewõr un ko remõn unin an inebata. Ak kwomaroñ jar kin men kein. Emol, etke kwojjab jar kin men kein ibben ajiri ro nejim mokta jen air etal ñan school, bõlen elikin ami etale unin tel in ran? Jar ko ilo tibdikiir im jen buruõm, remaroñ kamakit lemnak ko an ajiri ro nejim. Ilõñin men otemjej, kwoj kir Jehovah bwe en kajerammõn yuk ñe kwoj kate yuk ilo meanwõd im kõmman bwe Nan eo an en tõbar buruen ajiri ro nejim. (Duteronomi 6:​6, 7; Jabõn Kennan Ko 22:6) Kememej, bwe “mejen Iroij rej lale ro remõn, im lojiliñin rej ñõn jar ko air.”​—1 Piter 3:​12; Dri Pilippai 4:​6, 7.

16, 17. (a) Ta eo juõn likao ear ba kin yokwe eo jinen ear kwalok ñan e? (b) Ewi wãwen mour in jitõb eo an juõn jinen jelet ajiri ro nejin?

¹⁶ Lemnak kin Olivia, juõn jinen ewõr jiljino nejin. Leo belen ejjab tõmak ear illok jen e elikin wõt an ajiri eo eliktata nejin lotak, ak liin ear inek eddo eo ñan katakin ajiri ro ilo ial ko an Anij. Darren, ladik eo nejin Olivia, eo ej 31 an yiõ kiõ im jerbal einwõt juõn Christian elder im juõn pioneer, ear 5 an yiõ ilo ien eo. Kobalok ibben inebata ko an Olivia, Darren ear bõk juõn nañinmij ekauwatata ejañin jako ñan kiõ. Ilo an kalmenlokjen kin ien eo ke ear juõn ajiri, Darren ear jei: “Ij kememej wõt ke iar jijet ilo jikin babu eo ilo hospital eo im kijoror in lo jinõ. Ear naj kar jijet ituruõ im konono Bible ibba ran otemjej. Inem ear al al in Ailiñ eo “Kimij Kamolol Yuk, Jehovah.’b Ñan rainin, ej al in Ailiñ eo emõntata ibba.”

¹⁷ Liki im yokwe eo an Olivia kin Jehovah ear kamakit e bwe en lo tõbrak einwõt juõn jinen eo ej single. (Jabõn Kennan Ko 3:​5, 6) Lemnak eo an emõn ear alikar ilo mejenkajjik ko ear likit iman ajiri ro nejin. “Jinõ ear rejañ kim ien otemjej bwe kimin jibadõk mejenkajjik in kwalok nan full-time,” Darren ear ba. “Tokjen men in, emen jen lalem kõrã ro jeiõ im jatiõ im ña kimar bõk jerbal in kwalok nan full-time. Ak, Jinõ ear jab kemjãje kin men kein ñan ro jet. Ij kate wõt in kajeoñe kadkad ko remõn kadkadin.” Emol, jab aolep ajiri ro rej jerbal ñan Anij einwõt ro nejin Olivia. Ak ñe juõn jinen ej kamaat an maroñ ñan mour ekkar ñan kien ko an Bible, emaroñ liki bwe Jehovah enaj tel im jurake ilo yokwe.​—Sam 32:8.

18. Ewi wãwen ad maroñ kwalok bwe ewõr ad kamolol kin men in letok eo an Jehovah kin congregation eo an Christian?

¹⁸ Elõñ wãwen ko Anij ej jurake kij rej itok jen congregation eo an Christian, ikijen program eo an ñan najidik kij ilo jitõb, Christian jimjãn jimjatin, im “men in letok in armij” ro rej ritto ilo jitõb. (Dri Epesõs 4:​8) Elder ro retiljek rej kate wõt ñan kalek congregation eo, kabwe aikwij ko raorõk an “atajinimjen in kõra ro ejoko beleir.” (Jemes 1:​27) Inem jen binwõt ebak ñan armij ro an Anij, im jab kamakelok iad.​—Jabõn Kennan Ko 18:1; Dri Rom 14:7.

Eaibujuij Kadkadin Ettã Buru

19. Etke ñe juõn kõrã ej kõttãik e ejjab melelen ej juõn kõrã ejelok tokjen, im ta joñok eo ilo Bible ej jurake men in?

¹⁹ Jehovah ear kõmanman kõrã eo einwõt rejetan maan. (Jenesis 2:​18) Kin men in, ñe lio ej kõttãik e ñan leo ibben ejjab melelen ej juõn kõrã ejelok tokjen. Jen men in, ej kautiej juõn kõrã, im kõtlok e bwe en kajerbal maroñ ko an ekkar ñan ankil an Anij. Jabõn Kennan chapter 31 ej kalikar kin elõñ kain jerbal juõn kõrã emõn emaroñ kõmmani ilo Israel eo etto. Ear jibañ ri jeramel ro, kallip, im wiaik weto ko. Aet, “buruen leo belen ej liki e, im e jamin aikwij orlok.​—Eon ko 11, 16, 20.

20. (a) Ewi wãwen an juõn Christian kõrã aikwij lemnak kin maroñ ko Anij ear liloki, ak men in lelok ko? (b) Ta kadkad ko remõn Esther ear kwaloki, im ewi wãwen an kar Jehovah maroñ kajerbale?

²⁰ Juõn kõrã einemõn, im mijake Anij ejjab wãlok ak kõmman bwe ej emõn jen leo belen. (Jabõn Kennan Ko 16:18) Ejjab kabukõt kõnan ko an make ilo an jibadõk jerbal ko an lal ak ej kajerbal maroñ ko Anij ear liloki ñan karejar ñan ro jet​—family eo an, Ri Christian ro mõttan, ro ri turin, im ilõñin men otemjej, Jehovah. (Dri Galetia 6:​10; Taitõs 2:​3-5) Lemnak kin joñok eo an Esther Leroij eo ilo Bible. Meñe ear deeo, ear inemõn im ettã buru. (Esther 2:​13, 15) Ke ear mare, ear kautiej King Ahasuerus, leo belen, jab einwõt Vashti, lio belen mokta. (Ester 1:​10-12; 2:​16, 17) Bareinwõt, ilo ettã buru, Esther, ear reilok ñan Mordecai, eo mañden, ikijen bebe ko rekkar​—meñe elikin an jutak einwõt leroij bareinwõt. Ak ear jab juõn kõrã emõjno! Ilo beran ear kajerwawaik Haman, einwõt juõn armij ekajur im etao eo ear beek in kajeebeplok Ri Jew ro. Jehovah ear kajerbal Ester ilo juõn wãwen ekajur ñan kejbãrok armij ro an.​—Esther 3:​8–4:​17; 7:​1-10; 9:​13.

21. Ewi wãwen juõn Christian kõrã emaroñ kalaplok aorõkin ibben Jehovah?

²¹ Alikar, ilo ran ko mokta im rainin, kõrã ro rej kabuñ ñan Anij rej aorõk iman mejen Jehovah im kabuñ eo an Christian kõrã ro, komin kõtlok Jehovah ikijen jitõb eo an bwe en ukõt mour eo am im kakõmõnmõnlok yuk einwõt juõn “jãbi” eaibujuij, juõn eo “ebojõk ñan jerbal emõn otemjej.” (2 Timote 2:​21; Dri Rom 12:2) Ikijen kain ri kabuñ rein, Nan in Anij ej ba: “Ren lelok ñõn e leen pã ko pein; im jerbal ko an ren nebar e ilo kejem ko.” (Jabõn Kennan Ko 31:31) En eindein ibbemi aolep.

[Kamelele ko itulal]

Kwoj Kememej Ke?

• Ewi wãwen jet Christian kõrã ro ilo ebeben eo kein kajuõn rar kamol bwe rej aorõk iman mejen Jehovah?

• Ewi wãwen Christian kõrã ro ilo ien kein ad rar erom ro raorõk iman mejen Jehovah?

• Ilo wãwen et ko Jehovah ej jurake jinen ro rej single im Christian kõrã ro jet ejelok beleir?

• Ewi wãwen an juõn kõrã kwalok kautiej jen buruen kin karõk in bõr eo?

[Bo̦o̦k eo ilo peij 17]

JOÑOK KO ÑAN KALMENLOKJEN KAKI

Kwokõnan ke lemnak kin bar joñok ko an kõrã ro retiljek ilo Bible? Elañe aet, joij im konono eon ko tok ilal. Ñe kwoj kalmenlokjen kin armij ro kajjojo ilo lajrak eo itulal, kwon kajeoñ in kile kien ko kwomaroñ jerbali im kalaploki ilo mour eo am.​—Dri Rom 15:4.

◆ Sara: Jenesis 12:​1, 5; 13:18a; 21:​9-​12; 1 Piter 3:​5, 6.

◆ Ri Israel kõrã ro rejoij: Exodus 35:​5, 22, 25, 26; 36:​3-7; Luk 21:​1-4.

◆ Debora: Dri Ekajet Ro 4:1–​5:​31.

◆ Rut: Rut 1:​4, 5, 16, 17; 2:​2, 3, 11-​13; 4:​15.

◆ Kõrã in Shunem: 2 King Ro 4:​8-​37.

◆ Kõrã in Phoenicia: Matu 15:22-​28.

◆ Marta im Meri: Mark 14:​3-9; Luk 10:38-​42; Jon 11:17-​29; 12:​1-8.

◆ Tabitha: Jerbal 9:​36-​41.

◆ Emen Limaro nejin Philip: Jerbal 21:9.

◆ Pibe: Dri Rom 16:​1, 2.

[Pija eo ilo peij 15]

Kwoj nebar im kamolol ke Christian kõrã ro rej bokake ilo tiljek ñan kien ko an Anij?

[Pija eo ilo peij 16]

Ta men ko rejejjet jemaroñ kajitõk kaki ilo jar ko ad iman ajiri ro nejid mokta jen air etal ñan school?