Kwalok Nan Ñan Kõmman Ri Kalor Ro

“Ke emwij an Akula im Prisilla roñjake; rejro bõk e [Apollos] ñõn ir, im kemeleleik im kalikarlok ial in Anij ñõn e.”​—JERBAL 18:26.

1. (a) Meñe ear “bõplolin ilo jitõb,” ta eo Apollos ear likjap kake? (b) Ta men eo Apollos ear aikwiji ñan kabwe men eo ilo jitõb ear likjap kake?

PRISILLA im Akula, ruo Christian ri belele emwij air mare ilo ebeben eo kein kajuõn, rar lo Apollos ke ear kwalok nan ilo juõn imõn kwelok eo ilo jikin kwelok in Ephesus. Kin nan ko an remelak im kajur in karel buruen armij, Apollos ear karel buruen armij ro rar roñjake e. Ear “bõplolin,” im ear “katakin men ko an Iroij.” Bõtab, ear alikar bwe Apollos ear “jela [kin] baptais an Jon wõt.” Katak ko Apollos ear kwalok nan kake kin Christ rar mol. Ak ear jabwe. Apollos ear aikwij kalaplok an jelã kin jerbal eo an Jesus ilo karõk eo an Jehovah.​—Jerbal 18:24-​26.

2. Ta jerbal eo Prisilla im Akula rar bõke?

² Ilo mõkaj, Prisilla im Akula rar lelok ir make ñan jibañ Apollos bwe en erom juõn eo ear kõmman “men otemjej’ Christ ear kakien bwe en kõmmani. (Matu 28:19, 20) Bwebwenato eo ej ba bwe rar bõk Apollos “ñõn ir, im kemeleleik im kalikarlok ial in Anij ñõn e.” Bõtab, jet Ri Christian ro rar ãliklik in katakin e kinke ekar wõr jet men ko rar jelã kaki kin Apollos. Ta men ko remol? Im ta eo jemaroñ katak jen Prisilla im Akula ke rar kate wõt ir ñan kamelele kin Jeje ko ibben Apollos? Ilo ad elij bwebwenato in, ewi wãwen emaroñ jibañ kij kõmman Bible study ko rekãl ibben armij ro ilo moko imwiir?

Lale im Kabwe Aikwij ko an Armij ro

3. Etke wãwen ko rekabel an Apollos rar jab kabõjrak Prisilla im Akula jen air katakin e?

³ Kinke ear lotak einwõt juõn Ri Jew, Apollos ear rittolok ilo jikin kwelok in Alexandria. Alexandria ear jikin kwelok eo elap ilo ailiñ in Egypt im juõn jikin iolaplap ñan bõk jelãlokjen ko relap ijo, kinke ear buñbuñ kin juõn library elap ear bed ie. Jikin kwelok eo ear wõr juõn jar elap in Ri Jew ro, ekoba ri meletlet ro. Kin men in, Jeje ko ilo Hebrew rar ukõti ñan kajin Greek im rar naetan Septuagint rar kõmmane ijo. Ejelok bwilõñ bwe Apollos ear lukkun juõn “dri meletlet, im e kajur ilo nan in Jeje ko!” Akula im Prisilla rar kõmman em nuknuk ko. Kin an Apollos melak ilo konono, men in ear kõmman ke bwe ren ãliklik in jibañ e? Jaab. Ilo yokwe rar lemnak kin armij eo, aikwij ko an, im ewi wãwen rar maroñ jibañ e.

4. Jen ia eo im ewi wãwen an kar Apollos bõk jibañ eo ear aikwiji?

⁴ Jekdon ewi joñan an kar Apollos melak ilo konono, ear aikwiji jibañ ñan katak. Jibañ eo ear aikwiji ear jab bõke jen jabdewõt school eutiej an lal ak ear itok jen ro uan congregation eo an Christian. Apollos ear aikwij bojak in bõk tokjen jen katak ko renaj kar waloktok jen juõn melele elaplok an jimwe im jejjet kin karõk in lomor eo an Anij. Prisilla im Akula rar bõk e “ñõn ir, im kemeleleik im kalikarlok ial in Anij ñõn e.”

5. Ta eo kwomaroñ ba kin mour in jitõb eo an Prisilla im Akula?

⁵ Prisilla im Akula rar kajur ilo jitõb im jutak bin ilo tõmak. Alikar bwe, erro rar ‘bojak ien otemjej bwe ren uak ñan jabdewõt armij ej kajitõk ibbeir kin unin kejatdikdik eo ear bed iloair,’ jekdon ro remweie, ak jeramel, ro remeletlet, ak ri kamakoko. (1 Piter 3:​15) Akula im lio belen rar kajerbal ‘nan in mol eo ilo jimwe.’ (2 Timote 2:​15) Emol, rar ri katak ro remol kin Bible eo. Apollos ear lukkun kamolol kin kamelele eo ear bedbed ion ‘nan in Anij, eo emour im kajur,’ im ej jelet buruen armij.​—Dri Hibru 4:​12.

6. Ewi wãwen ad jelã bwe Apollos ear kamolol kin jibañ eo ear bõke?

⁶ Apollos ear kamolol kin joñok eo an ri kaki ro an im kakõmanmanlok kabel eo an ñan kõmman ri kalor ro. Ear kajerbal jelãlokjen eo an ellãlokjen joñan ilo jerbal in kwalok nan kin news eo emõn, elaptata ibwiljin jarlepju in Ri Jew ro. Apollos ear lukkun bolemen ilo an karel Ri Jew ro kin Jesus Christ. ‘Kin an lukkun kabel in kajerbal Jeje ko,’ ear maroñ kamol ñan ir bwe aolep ri kanan ro ilo ien etto rar reimanlok ñan ien eo Christ enaj kar itok. (Jerbal 18:​24, Kingdom Interlinear Translation) Bwebwenato eo ear wõnmanlok im ba bwe Apollos ear etal ñan Achaia tokelik, im “elap an jibõñ ro r’ar tõmak kin joij; bwe elap an kaikõñ dri Ju ro, ilo bwilij, im ej kwalok kin Jeje ko bwe Jisõs e dri Kraist.”​—Jerbal 18:27, 28.

Katak Jen Joñok eo an Ri Kaki Ro Jet

7. Ewi wãwen an kar Akula im Prisilla erom ri kaki ro rekabel?

⁷ Ewi wãwen Akula im Prisilla rar erom ri kaki ro rekabel kin Nan in Anij? Ijellokin air niknik in katak Bible ibbeir make im bed ilo kwelok ko, air kamao ibben ri jilek Paul ear lap an jibañ ir. Iumin 18 alliñ ko Paul ear jokwe ilo mweo imõn Prisilla im Akula ilo Korint. Rar jerbal ibben don ñan kõmman im kõkãl em nuknuk ko. (Jerbal 18:​2, 3) Baj lemnak kin bwebwenato ko remũlal kin Bible rar bwebwenato kaki ibben don. Im ear juõn men in kakajur ñan mour eo air ilo jitõb ke rar kamao ibben Paul! “Kwon etetal iben ro dri meletlet, inem kwo naj meletlet,” Jabõn Kennan Ko 13:20 ej ba. Kamao ko remõn rar jelet manit ko air ilo jitõb ilo juõn wãwen ejimwe.​—1 Dri Korint 15:33.

8. Ta eo Prisilla im Akula rar katak kake jen air kalimjek jerbal in kwalok nan eo an Paul?

⁸ Ke Prisilla im Akula rar kalimjek Paul einwõt juõn ri keañ eo an Ailiñ eo, rar lo juõn ri katakin armij emõn ilo jerbal. Bwebwenato eo ilo Jerbal ej ba bwe Paul ear “kemelele iloan imõn kwelok Sabat otemjej, im karel dri Ju ro im ro dri Grik.” Tokelik, ke Sailas im Timote rar kobalok ibben, ear lap an Paul “itoklimon kin nan, im kennanek dri Ju ro bwe Jisõs e dri Kraist.” Ke eiet ro uan imõn kwelok eo rar itoklimo, Prisilla im Akula rar lo bwe Paul ear kamakit jikin jerbal in kwalok nan eo an ñan bar juõn emõnlok, juõn em iturin imõn kwelok eo. Ijo Paul ear maroñ jibañ Krispõs, “iroij eo an imõn kwelok,” bwe en erom juõn ri kalor. Emaroñ bwe, Prisilla im Akula rar kile bwe kinke ear erom juõn ri kalor tõbrak in ear jelet territory eo ilo juõn wãwen emõn im jebar leen. Bwebwenato eo ej ba: “Krispõs . . . kab ro nukin otemjej; im elõñ ian dri Korint, ke rej roñjake, rej tõmak im baptais.”​—Jerbal 18:​4-8.

9. Kar ewi lemnak ko an Prisilla im Akula kin joñok eo an Paul?

⁹ Ri keañ ro jet an Ailiñ eo rar anõk joñok eo an Paul ilo jerbal in kwalok nan, einwõt Prisilla im Akula rar kõmmane. Ri jilek eo ear rejañ Ri Christian ro jet: “Komin dri kajeoñwe ña, einwõt ña ij bareinwõt kajeoñwe Kraist.” (1 Dri Korint 11:1) Ekkar ñan joñok eo an Paul, Prisilla im Akula rar jibañ Apollos bwe en melele kin katak ko an Christian ilo jimwe. Tokelik, ear jibañ ro jet. Ejelok bere Prisilla im Akula rar jibañ in kõmman ri kalor ro ilo Rome, Korint, im Epesõs.​—Jerbal 18:​1, 2, 18, 19; Dri Rom 16:​3-5.

10. Ta eo kwar katak kake jen Jerbal chapter 18 im emaroñ jibañ yuk ilo jerbal in kõmman ri kalor ro?

¹⁰ Ta eo jemaroñ katak jen ad etale Jerbal chapter 18? Inem, einwõt Akula im Prisilla rar katak jen Paul, kij bareinwõt jemaroñ kakõmõnmõnlok maroñ ko ad ñan kõmman ri kalor ro ilo ad lor joñok ko an ri katakin ro an Nan in Anij. Jemaroñ kobalok ibben ro rej “[itoklimoir] kin nan” im “kennanek” armij ro jet. (Acts 18:5, Kingdom Interlinear Translation) Jemaroñ kalimjek wãwen air jibadõk buruen armij ilo kilen katakin ko air rekabel im kareelel. Kain kabel rot kein remaroñ jibañ kij kõmman ri kalor ro. Ñe juõn armij ej katak Bible ibbed, jemaroñ kakabilek e bwe en kirtok armij ro jet uan family eo an ak ri turin bwe ren itok ñan katak eo. Ak jemaroñ kajitõk ibben bwe en kwalok kin bar wõn ro jemaroñ kajitõk ibbeir im lale elañe rekõnan katak Bible ibbed.​—Jerbal 18:​6-8.

Kwon Karõk Ien Ko Remõn ñan Kõmman Ri Kalor ro

11. Jemaroñ lo ri kalor ro rekãl ia?

¹¹ Paul im Ri Christian ro mõttan rar kate ir ñan kõmman ri kalor ro ilo air kwalok nan jen em ñan em, ilo jikin mõn wia ko, im ke rar itoitak​—emol, ilo jikin otemjej. Einwõt juõn ri jerbal an Ailiñ eo kwoj kate yuk ñan kõmman ri kalor ro, kwomaroñ ke kalaplok am jerbal in kwalok nan? Kwomaroñ ke kajerbal ien ko remõn ilo juõn wãwen ebolemen ñan bukõt ro emol burueir im kwalok nan ñan ir? Ta jet ian wãwen ko ri kwalok ro mõttad rej kwalok nan kin news eo emõn rar lo ri kalor ro? Moktata jen etale kilen kajerbal telephone ilo jerbal in kwalok nan.

12-14. Ñan kwalok wanjoñok eo kin tokjen jerbal in kwalok nan ikijen telephone, kwalok bwebwenato eo am make, ak juõn ian bwebwenato ko ilo paragraph kein.

¹² Ke ear kwalok nan jen em ñan em ilo Brazil, juõn Ri Christian jej naetan Maria ear lelok juõn tract ak juõn peba ewõr juõn ennan ilo tukaduin kin Ailiñ eo, ñan juõn kõrã eo ej kab diojlok jen apartment eo an. Ilo an kajerbal unin tel in katak eo an tract eo ñan kabellok juõn bwebwenato, Maria ear kajitõk, “Kwokõnan ke kalaplok am jelã kin Bible eo?” Kõrã eo ear uak: “ Aet Ij lukkun kõnan. Abañ eo ibba in bwe ña ij juõn ri kaki in school, im katakin ajiri ro ej kamaat aolep ien ko aõ.” Maria ear kamelele bwe erro maroñ kajerbal telephone ñan bwebwenato ibben don kin Bible eo. Kõrã eo ear lelok number in telephone eo an ñan Maria, im ilo ejja ran eo wõt ilo jota, rar jino kajerbal telephone im katak Bible ilo air kajerbal brochure eo Ta Eo Anij Ekõnan bwe Jen Kõmmane?a

¹³ Ke ear kajerbal telephone eo ñan kwalok nan, juõn ri kwalok eo ej kwalok nan full-time ilo Ethiopia ear ilbõk ke ear konono ibben juõn emaan ak ear roñ juõn ainikien ilikin. Emaan eo ear jiroñ e bwe en bar jeblak tokelik. Ke ear roltok, leo ear kajitõk kin jolok an bwid im ba bwe ke ear konono ibben mokta, e im lio ibben rar akwel. Ri kwalok kõrã in ear kajerbal bwebwenato eo an einwõt juõn ial ñan jitõñlok ñan nan in tel eo emeletlet ilo Bible im wãwen an kamadmõdi abañ ko an family. Ear jiroñ leo bwe elõñ family ko rar bõk jibañ jen book in The Secret of Family Happiness, juõn book eo me Ri Kennan ro an Jehovah rar jeje im printi. Jejjo wõt ran elikin an lelok book in ñan e, ri kwalok kõrã in ear bar telephone lok ñan leo. Leo ear ba ilo bwilõñ: “Book in ear lomoren mour in belele eo aõ!” Emol, ear kwelok ibben ro uan family eo an im kwalok point ko remõn jen book eo ear reade. Ear jino katak Bible ilo mweo imõn im leo ear keini in bed ilo kwelok ko an Ri Kennan ro an Jehovah.

¹⁴ Juõn ri kwalok nan eo an Ailiñ eo ilo ailiñ in Denmark ear jino katak Bible ibben juõn armij ilo an kajerbal telephone ilo an ba: “Service overseer eo aõ ear rejañ iõ bwe in kajerbal telephone eo ñan kwalok nan. Ilo jinoin iar jenliklik, im ba: “‘Ear jab juõn wãwen kwalok nan iar mõnõnõ in kõmmane.’ Bõtab, juõn ran iar kaberan iõ im telephone lok ñan ri mweo eo kein kajuõn. Sonja ear uak im elikin juõn bwebwenato ilo tukaduin, ear errã in bõk book ko rej bedbed ion Bible eo. Juõn jota kimro ar bwebwenato kin ien kõmanman, im ear kõnan reade book eo Life​—How Did It Get Here? By Evolution or by Creation.b Iar ba bwe ej juõn men emõn elañe kimro maroñ ion don im bwebwenato kin katak in. Ear errã. Sonja ear bojak ñan katak ibba ke iar itok, im kimar katak week otemjej jen ien eo.” Ri Christian kõrã in ear kajemlok im ba: “Iumin elõñ yiõ ko iar jar bwe in lo juõn armij ekõnan katak Bible, ak iar jab lemnak ñan jidik bwe imaroñ lo tõbrak kin men in ilo aõ kajerbal telephone ñan kwalok nan.”

15, 16. Ta bwebwenato ko kwomaroñ kwaloki ñan kalikar tokjen ad bojak wõt ilo elõñ wãwen ko ñan jinoe katak ko rekãl ilo Bible?

¹⁵ Elõñ rej lo tõbrak kinke rej jerbale nan in kakabilek ko ñan kwalok nan ibben armij ro jabrewõt jikin rej bed ie. Juõn kõrã in Christian ilo United States ear kabõjrak wa eo waan iturin ilo van eo ilo jikin parking lot. Ke kõrã eo ilo van eo ear loe, sister in ear jino kameleleik e kin jerbal eo ad ñan katakin Armij kin Bible eo. Kõrã eo ear diojlok jen wa eo waan, im jutak iturin wa eo waan sister eo. Ear ba: “Ij lukkun mõnõnõ bwe kwar bwebwenato ibba. Etto aõ jab bar lo book in Bible ko am. Bareinwõt, iar kõnan bar katak Bible eo. Kwokõnan ke katak ibba?” Kõrã in Christian in mõttad ear ejaak juõn ien emõn ñan kwalok nan kin news eo emõn.

¹⁶ Juõn kõrã in ri tõmak eo ilo United States ear kwalok bwebwenato in tok ilal kin ien eo ear etal ñan mweo imõn ri nañinmij eo: Ear kebak juõn ri jerbal eo ear bõk eddon jet men in kõmman ko ilo mweo im jiroñ e bwe ear kõnan lelok jibañ ñan kabwe aikwij ko an ri mweo kin men ko lor jitõb. Kõrã ri tõmak in ear ba bareinwõt bwe enaj mõnõnõ in katak Bible kin ejelok wõnãn ibben jabdewõt eo emõnõnõ in katak ibben. Ri tel eo ear kamelim e bwe en kar lolok aolep ri mweo. Ejjabto tokelik, ear katak Bible ibben 26 ri mweo 3 alen ilo kajjojo week, im juõn iair ej keini an bed ilo kwelok ko.

17. Ta wãwen eo ekkã an bolemen ñan jinoe katak ko rekãl ilo Bible?

¹⁷ Ñan jet ri keañ ro an Ailiñ eo, rej kajitõk ilo kajju ñan katak Bible ibben ro ri mweo im rar lo tõbrak ilo wãwen in. Juõn jibboñ juõn congregation ibben 105 ri kwalok ro rar kõmman juõn karõk ejej uan ñan kajitõk ibben kajjojo ri mweo rar loi elañe rar kõnan katak Bible ibbeir. Ralitõkñoul-jiljino ri kwalok ro rar bõk kunair ilo jerbal in kwalok nan, im elikin ruo awa ko ilo jerbal in kwalok nan, rar lo bwe 15 armij ro rekãl rar kõnan katak Bible ibbeir.

Etal Wõt im Bukõt Ro Emol Burueir

18, 19. Ta nan in kakabilek eo eaorõk an Jesus jej aikwij kememej kake, im ñan lo tõbrakin ta eo jej aikwij bebe kake ilo buruõd bwe jen kõmmane?

¹⁸ Einwõt juõn ri keañ eo an Ailiñ eo, kwomaroñ kajeoñ in jerbali nan in kakabilek kein ilo katak in. Emol, enaj juõn men in emõn bwe kwon lemnak kin mantin ro rej jokwe ilo bukwon eo ñe kwoj kajerbal wãwen kein ñan kwalok nan. Elaptata, jej aikwij kememej wõt kin nan in tel eo an Jesus ñan bukõt ro emol burueir im jibañ armij rein kajjojo bwe ren ri kalor ro.​—Matu 10:11; 28:19.

¹⁹ Ñan kõtõbrak men in, jej aikwij ‘kajerbal nan in mol eo ilo jimwe.’ Jemaroñ kõmman men in ilo ad karel buruen armij ekkar ñan Jeje ko. Men in enaj jibañ kij ñan jibadõk buruen armij ro remol im kamakit ir bwe ren emmakit. Ñe jej atartar ion Jehovah ilo jar, jemaroñ bõk kunad im jibañ jet armij bwe ren erom ri kalor ro an Jesus Christ. Im jerbal in ej juõn men in kajerammõn elap ñan kij! Inem jen “kate wõt im kabuñburuen Anij,’ ilo ad kebak Jehovah einwõt ri keañ ro an Ailiñ eo, ro rej kwalok nan kinke jekõnan kõmman ri kalor ro.​—2 Timote 2:​15.

[Kamelele ko itulal]

Kwoj Kememej Ke?

• Etke Apollos ear aikwij kalaplok an melele kin ial eo an Anij?

• Ilo wãwen et ko Prisilla im Akula rar katak jen ri jilek Paul?

• Jen Jerbal chapter 18, ta eo kwar katak kin jerbal in kõmman ri kalor ro?

• Ewi wãwen am maroñ ejaak ien ko remõn ñan kõmman ri kalor ro?

[Pija eo ilo peij 14]

Prisilla im Akula rar “kemeleleik im kalikarlok ial in Anij” ñan Apollos

[Pija eo ilo peij 16]

Apollos ear kabel ilo an kõmman ri kalor ro

[Pija eo ilo peij 17]

Paul ear kwalok nan ilo jabdewõt jikin ear bed ie

[Pija ko ilo peij 19]

Ejaak ien ko remõn ñan kwalok nan