Utiej Bõtata Eo An Jehovah Jejjab Maroñ Loe
“Elaplap Jeova, im ren kanuij nebar E; im An laplap re ban bukot im jelakajen.”—SAM 145:3.
1, 2. Kain armij rot eo kar David, im kar ewi lemnak eo an kin kõtan eo an ibben Anij?
RI KINE al in Sam 145 ej juõn ian armij ro rebuñbuñ ilo bwebwenato eo an lal ilo ien eo etto. Ke ear juõn ladik, ear wõnmae juõn ri inea ri tarinae im ear mõne. Ke ear juõn king, ri tarinae ri kine al in ear anjo ion elõñ ri kijirãt ro. Ãt eo etan kar David, im ear king eo kein karuo ilo ailiñ in Israel eo etto. Buñbuñ eo an David ear wõnmanlok wõt elikin mij eo an, im meñe ilo ran kein elõñ armij rejelã jet men ko kin e.
2 Meñe ear lõñ men ko David ear kõtõbraki, ear ettã wõt buru. Ilo juõn al ñan Jehovah, ear al: “Ke ij lale lõñ ko Am, jerbal an arrim; aliñ im iju ko Kw’ar kõmõnmõni; Ta armij bwe Kwon kememej e? Im nejin armij bwe Kwon itok ñõn iben?” (Sam 8:3, 4) Jen an lemnak bwe ear make wõt utiej bõtata, David ear kamolol Jehovah kin an kanemkwoj e jen ri kijirãt ro an im ear ba ñan Anij: “Kwar bareinwõt letok likipijñõk eo an Am lomor, im Am joij e ar koutiej iõ.” (2 Samuel 22:1, 2, 36) Jehovah ej kwalok ettã buru ilo an tiriamokake ro rar jerawiwi, im David ear kamolol Anij kin joij im yokwe eo An.
‘I Naj Kautiej Anij Eo Ej King’
3. (a) Kar ewi lemnak eo an David kin jerbal in king ñan ailiñ in Israel? (b) Kar ewi joñan an David kõnan nebar Jehovah?
3 Meñe Anij ear kãlet David bwe en king, David ear watõk Jehovah einwõt lukkun King eo an Israel. David ear ba: “Am ailiñ eo, O Jeova, im Kwoj utiej im einwõt bõran men otemjej.” (1 Kronikel 29:11) Ear lap an David kaorõk Anij einwõt Iroij! “I naj koutiej Yuk, aõ Anij, aõ Kiñ,” ear al “im I naj kamõnõnõik etõm ñõn in drio im in drio. Ran otemjej I naj kamõnõnõik Yuk; im I naj nebar etõm ñõn in drio im in drio.” (Sam 145:1, 2) David ear kõnan nebar Jehovah Anij ran otemjej im ñan indio.
4. Sam 145 ej kajerwawaik ta nan in riap ko?
4 Sam 145 ej juõn uak ekajur ñan nan in kinaak eo an Satan bwe Anij ej juõn iroij ekibbon im ejjab kanemkwoj ri karejar ro an. (Jenesis 3:1-5) Bareinwõt ri jeje sam in ej kajerwawaik riap eo an Satan bwe armij ro rej bokake Anij kinke rekõnan bõk juõn men jen e, im ejjab kinke rej yokwe Anij. (Job 1:9-11; 2:4, 5) Einwõt David, Ri Christian ro remol rej lelok juõn uak ñan nan in kinaak ko an Satan. Rej kaorõk kejatdikdik eo air ñan bõk mour indio iumin kajur eo an Ailiñ eo kinke rekõnan nebar Jehovah ñan indio. Kiõ, elõñ million armij ro rej kõmmane men in ilo air jerbale tõmak ilo binmour eo an Jesus emwij katok kake im ilo air bokake Jehovah ilo yokwe einwõt ri kabuñ ro emwij air wujleplok air mour im baptais.—Ri Rom 5:8; 1 Jon 5:3.
5, 6. Ta ien ko remõn ibbed ñan kautiej im nebar Jehovah?
5 Baj lemnak mõk kin elõñ ien ko jemaroñ kajerammõn im nebar Jehovah einwõt ri karejar ro an. Jemaroñ kõmman eindein ilo jar ñe nan ko jej konono kaki ilo Nan eo an, Bible eo rej tõbar buruõd. Jemaroñ kwalok nebar im kamolol ñe jej lo wãwen an Anij jibañ armij ro an ak ñe jej bwilõñ kin juõn wãwen jej loe ilo men in kõmanman ko an rekabwilõñlõñ. Bareinwõt jej kautiej Jehovah Anij ñe jej bwebwenato ibben ri tõmak ro mõttad kin karõk ko an ilo kwelok ko an Christian ak ikõtan don. Emol, “jerbal ko remõn” otemjej jej kõmmani ñan Ailiñ eo an Anij rej nebar Jehovah.—Matu 5:16.
6 Wanjoñok ko kin kain jerbal rot kein remõn rej koba jerbal in kalek mõn kwelok in kabuñ ko rej kaleki ilo elõñ jikin ko ilo ene ko rejeramel. Elõñ ian jerbal rot kein rar bõk jibañ jen money ko an ri tõmak ro mõttair ilo ailiñ ko jet. Jet Ri Christian ro rar lelok jibañ ilo air bõk kunair im etal ñan jikin kein im kalek imõn kwelok kein ak Kingdom Hall ko. Im jerbal eo eaorõktata ian jerbal kein remõn ej ñan nebar Jehovah ilo jerbal in kwalok nan kin news eo emõn kin Ailiñ eo an. (Matu 24:14) Einwõt, eon ko jet ilo Sam 145 rej kwalok, David ear kamolol kin wãwen an Anij iroij im ear kautiej iroij eo An. (Sam 145:11, 12) Ebar wõr ke kain kamolol rot in ibbam kin wãwen an Anij iroij ilo yokwe? Kwoj ekkeini ke konono ibben ro jet ilo Ailiñ eo an?
Wanjoñok ko kin Utiej Bõtata eo an Anij
7. Kwalok juõn un emõn unin ad aikwij nebar Jehovah.
7 Sam 145:3 ej letok un eo elaptata unin ad nebar Jehovah. David ej al: “Elaplap Jeova, im ren kanuij nebar E; im An laplap re ban bukot im jelakajen.” Utiej bõtata eo an Jehovah ejelok joñan. Ejelok juõn emaroñ lukkun jelã kajjen. Ak jemaroñ bõk tokjen kiõ ilo ad kalmenlokjen kin jet wanjoñok ko kin utiej bõtata eo an Jehovah.
8. Ta eo ijoko otemjej ilañ im lal rej kalikar kin utiej im kajur bõtata eo an Jehovah?
8 Baj kajeoñ mõk im kememej kin juõn ian men ko ke kwar bed etolok jen juõn jikin kwelok eo emeram im reiliñlok ñan lañ ko ilo boñ. Kwar jab bwilõñ ke kin aolep iju ko ilo lañ eo emarok? Ear jab kamakit yuk ke ñan nebar Jehovah kin kajur bõtata eo an ñan kõmanman aolep men kein ilañ? Bõtab, men ko kwar loi kin mejem rar jidik in wõt mõttan iju ko ilo juõn galaxy eo me lal in ej juõn mõttan iloan. Koba ibben men in, rar antonelok bwe elõñlok jibuki million galaxy kein rej bed ilañ, im jilu wõt iair jemaroñ lo kin mejed meñe jejjab kajerbal telescope. Emol, iju im galaxy ko jejjab maroñ bwiniir ijoko otemjej ilañ rej kamol kin kajur im utiej bõtata eo an Jehovah einwõt Ri Kõmanman eo.—Aiseia 40:26.
9, 10. (a) Ta wãwen ko kin utiej bõtata eo an Jehovah emwij ad loi ikijen Jesus Christ? (b) Ewi wãwen an jerkakbiji eo an Jesus jelet tõmak eo ad?
9 Lemnak kin wãwen ko jet kin utiej bõtata eo an Jehovah—wãwen ko rej kitibuj Jesus Christ. Utiej bõtata eo an Anij ear alikar ke ear kõmanman Nejin im kajerbal e iumin elõñ million yiõ ko einwõt “dri mejerik” eo An. (Jabõn Kennan Ko 8:22-31) Yokwe eo elap an Jehovah ear alikar ke ear lelok Nejin eo Manjen einwõt juõn binmour ñan lomoren armij. (Matu 20:28; Jon 3:16; 1 Jon 2:1, 2) Juõn men ellã jen melele eo an armij ej enbwin eo eaibujuij im jab wabanban ilo jitõb ear kõmanmane im lelok ñan Jesus elikin jerkakbiji eo an.—1 Piter 3:18.
10 Jerkakbiji eo an Jesus ear kitibuj elõñ wãwen ko rekabwilõñlõñ kin utiej bõtata eo an Jehovah. Ejelok bere bwe Anij ear kamaroñ Jesus bwe en kememej kin jerbal in kõmanman men ko jejjab maroñ loi im men ko jej loi. (Dri Kolosse 1:15, 16) Men kein jejjab loi im jej loi rej kitibuj jitõb ro jet, ijoko otemjej ilañ, lal in ekouwa, im aolep wãwen ko kin wãwen mour ilo kanniek ijin ion lal in ad. Ijellokin an kajeblak lok ñan Nejin jelãlokjen eo kin juõn bwebwenato eyu kin mour ilañ im ion lal ilo ien eo lok iman jen an Nejin lotak ion lal, Jehovah ear kakememej Jesus kin aolep men ko ear kõmmani einwõt juõn armij ewãppen. Aet, utiej bõtata eo an Jehovah jejjab maroñ melele kake ear alikar ilo ien eo Jesus ear jerkakbiji. Bareinwõt, men in elap ear kõmmane ej kamol bwe emaroñ wõr juõn ien kajerkakbijeik armij ro jet. Men in en kar kakajur tõmak eo ad bwe Anij enaj bar kemour elõñ million armij ro remij ej bedwõt ilo lemnak eo an ewãppen.—Jon 5:28, 29; Jerbal 17:31.
Jerbal ko Raibujuij im Kajur
11. Ta jerbal eo elap an Jehovah ear jinoe ilo Pentecost 33 C.E.?
11 Jen ien eo Jesus ear jerkakbiji, Jehovah ear kõmman elõñ jerbal ko jet relap im aibujuij. (Sam 40:5) Ilo Pentecost 33 C.E., Jehovah ear kajutak juõn ailiñ ekãl, “Israel an Anij,” ejaakin ri kalor ro an Christ jitõb kwojarjar eo ear kabit ir. (Dri Galetia 6:16) Ilo juõn wãwen ekajur, ailiñ in ekãl ilo jitõb ear jededlok ibelakin lal ilo ien eo etto. Meñe juõn jumae elap ear walok im ear tellok ñan ejaakin kabuñ ko an Christendom elikin mij eo an ri jilek ro an Jesus, Jehovah ear wõnmanlok im kõmman jerbal ko raibujuij ñan kabin an kajejjet kitien karõk eo an.
12. Kinke Bible eo rar ukõte ñan aolep kajin ko relap ion lal men in ej kamol ta?
12 Ñan wanjoñok, rar kejbãrok Bible eo ilo likieo im tokelik rar ukõte ñan elõñ kajin ko jet ion lal ilo ran kein. Ekkã an walok bwe rar aikwij ukõt Bible eo ilo ien ko rekauwatata im bojak in mij jen ri jerbal ro an Satan. Emol, jerbal in ukõt Bible ñan elõñlok jen 2,000 kajin ko ear jab maroñ lo tõbrak elañe ear jab ankil an Anij eo Eutiej Bõtata, Jehovah!
13. Jen 1914, ewi wãwen utiej bõtata eo an Jehovah ear alikar ilo karõk ko an Ailiñ eo?
13 Utiej bõtata eo an Jehovah ear alikar ilo karõk ko an Ailiñ eo an. Ñan wanjoñok, ilo yiõ eo 1914, ear jitõñ Nejin, Jesus Christ, einwõt King eo ilañ. Ejjabto tokelik, Jesus ear tarinaik Satan im dimon ro an. Ear jollaltak ir jen lañ ñan lal in, im kõttar ien eo enaj kalbuj ir ilo roñ eo. (Reveles̃õn 12:9-12; 20:1-3) Jen ien eo liñtak, ri kabit ri kalor ro an Jesus rar bõk elaplok matõrtõr. Bõtab, Jehovah ear kakajur ir ilo ien in Christ ej bed ak iroij.—Matu 24:3; Reveles̃õn 12:17.
14. Ta jerbal eo eaibujuij Jehovah ear kõmmane ilo 1919, im kar ewi tõbrakin?
14 Ilo yiõ eo 1919, Jehovah ear kõmman bar juõn jerbal eaibujuij eo ear kalikar utiej bõtata eo an. Ri kabit ri kalor ro an Jesus, ro rar mõjno im enañin bõjrak jerbal eo air ilo jitõb, rar bar jutak. (Reveles̃õn 11:3-11) Jen yiõ ko liñtak, ri kabit ro rar kwalok nan ilo kijejeto kin news eo emõn kin Ailiñ eo emwij an jutak ilañ. Rar aini ri kabit ro jet bwe en uñ orair 144,000. (Reveles̃õn 14:1-3) Im ikijen ri kabit ri kalor ro an Christ, Jehovah ear likit juõn bedbed ñan “juõn lõl ekãl,” juõn jukjuk im bed eo ewãnik an armij. (Reveles̃õn 21:1) Ak ta eo enaj walok ñan “lõl [eo] ekãl” elikin an ri kabit ro retiljek aolep wanliñlok ñan lañ?
15. Ta jerbal eo Christian ri kabit ro rar tel, im kar ewi tõbrakin?
15 Ilo 1935, magazine in Imõniaroñroñ ko ilo August 1 im August 15 kar wõr katak ko ikijen “jar eo elap,” eo me Reveles̃õn chapter 7 ear konono kake. Ilo kijejeto Christian ri kabit ro rar jino bukõt im kobalok ibben ri kabuñ ro mõttair jen ailiñ otemjej, bwij otemjej, armij otemjej, im driloabjen otemjej. “Jar [in] elap” enaj ellã im mour jen “iñtan [eo] elap” ej ebak, im bojak ñan bõk mour indio ilo Paradise eo einwõt ro uan “lal [eo] ekãl” ñan indio. (Reveles̃õn 7:9-14) Kin jerbal in kwalok nan im kõmman ri kalor ro, eo me Christian ri kabit ro rej bed iman ñan kõmmane, elõñlok jen jiljino million armij ro kiõ rej bõk kejatdikdik eo ñan mour indio ilo juõn paradise ion lal. Jej aikwij kamolol wõn kin laplok rot in meñe ewõr jumae jen Satan im lal eo an enana? (1 Jon 5:19) Jehovah wõt ear kõtõbrak men kein otemjej, ilo an kajerbale jitõb kwojarjar eo an.—Aiseia 60:22; Zechariah 4:6, NW.
Utiejen im Ñiãjo eo Ewulio an Jehovah
16. Etke armij ro rejjab maroñ lo ‘men ko rewulio an Jehovah’?
16 Jekdon ta jerbal im kõmman ko, “men [ak jerbal] ko rekajur” im “men in bwilõñ [ak kõmman] ko” an Jehovah jejamin melokloki. David ear jei: “Juõn ebeben e naj nebar jerbal ko Am ñõn bar juõn, im naj kwalok men ko rekajur Kw’ar kõmõnmõni. I naj kalomonlokjen kin wõlio in kõñiajoik an utiej eo Am, im kin men in bwilõñ ko Kw’ar jerbali. Im armij re naj konono kin kajur potata im men in lelñoñ ko Kw’ar kõmõni; im I naj kwalok Am laptata.” (Sam 145:4-6) Ak, ewi joñan an kar David maroñ jelã kin men ko rewulio an Jehovah, kinke “Anij ej Jitõb” im kin men in armij ro rejjab maroñ loe kin mejeir?—Jon 1:18; 4:24.
17, 18. Ewi wãwen an kar David kalaplok kamolol eo an kin men ko rewulio an Jehovah’?
17 Meñe ear jab maroñ lo Anij kin mejen, ear wõr wãwen ko David emaroñ kar kaddek ilo buruen juõn kamolol kin men ko rewulio im kañiãjoik Jehovah. Ñan wanjoñok, emaroñ kar read kin jerbal ko rekajur an Anij ilo Jeje ko rekwojarjar, einwõt ien jeebeplok eo an juõn lal enana ikijen juõn ibwijleplep ibelakin lal. Emaroñ bwe, David ear jelã kin wãwen an kar anij ko rewan an Egypt rar jook ke Anij ear kanemkwoj Ri Israel ro jen kamakoko im kajur eo an Egypt. Men rot kein rewalok rej kamole utiejen im wulio in kañiãjo ko an Anij.
18 Ejelok bere bwe David ear kalaplok an kamolol kin utiejen Anij ilo an jab baj read Jeje ko wõt ak bareinwõt ilo an kalmenlokjen kaki. Ñan wanjoñok, emaroñ kar kalmenlokjen kin ta eo ear walok ke Jehovah ear lelok Kien eo ñan Israel. Kar wõr jorur, jorom, kõto elap, im juõn ainikien elaj. Tol Sinai ear makitkit im batat. Ke rar kweloklok iturin tol eo, Ri Israel ro rar eoroñ “Nan ko Joñoul” rej waloktok jen kijeek im kõto eo ke Jehovah ikijen juõn enjel ear konono ñan ir. (Duteronomi 4:32-36; 5:22-24; 10:4; Exodus 19:16-20; Jerbal 7:38, 53) Men kein rekabwilõñlõñ rar kañiãjoik Jehovah! Ejelok bere bwe ‘wulio in kañiãjoik utiej an Jehovah’ en kar lujur ro rej kaorõk Nan in Anij im kalmenlokjen kin bwebwenato kein. Emol, ilo ran kein likieo in Bible eo ej bed ibbed, im eobrak kin elõñ vision ko raibujuij rej kabwilõñ kij kin utiej bõtata eo an Jehovah.—Ezekiel 1:26-28, NW; Daniel 7:9, 10, NW; Reveles̃õn, chapter 4.
19. Ta eo enaj kalaplok ad kamolol kin men ko rewulio an Jehovah?
19 Bar juõn wãwen ear maroñ kabwilõñ David kin utiej eo an Anij ear walok jen an katak kin kien ko Anij ear lelok ñan Ri Israel ro. (Duteronomi 17:18-20; Sam 19:7-11) Bokake kien ko an Jehovah ear kautiej ailiñ in Israel im likit ir ilo juõn wãwen einjuõn jen armij ro jet. (Duteronomi 4:6-8) Einwõt ibben David, ekkeini ad konono Bible eo, kalmenlokjen kake, im katak jen e enaj kalaplok ad kamolol kin utiej bõtata eo an Jehovah.
Kadkad ko an Anij kin Mour Erreo Rej Kañiãjoik E
20, 21. (a) Sam 145:7-9 ej kaibujuij utiej bõtata eo an Jehovah ibben ta kadkad ko? (b) Ilo wãwen et eo kadkad ko kadkadin Anij rej jelet aolep ro rej yokwe e?
20 Einwõt emwij ad jelã, eon ko jiljino ilo tujinoin Sam 145 rej letok un ko remol unin ad nebar Jehovah kin men ko rej jelet utiej bõtata eo an ellã jen melele eo ad. Jen 7 ñan 9 eon rej kautiej utiej bõtata eo an Anij ilo an jitõñlok ñan kadkad ko an kin mour erreo. David ej al: “Re naj ba kin air kememej Am emõn elap, im naj al kin Am wãnik. Jeova e joij, im E obrõk kin tiriamo; erumij An illu, im elap An tiriamokake. Jeova emõn ñõn ro otemjej im men in joij ko An ilõñin men ko otemjej E ar kõmõnmõni.”
21 Ijin David ej kalikar mokta kin emõn im wãnik eo an Jehovah—kadkad ko Satan Devil eo ear bere kaki. Ewi wãwen kadkad kein rej jelet aolep ro rej yokwe Anij im kõttãik ir ñan iroij eo an? Ijoke, joñan an ri kabuñ ro an lañliñ kin emõn im wãnik eo an Jehovah rejjab maroñ bõjrak jen air nebar e. Bareinwõt, emõn eo an Jehovah ej “ñõn ro otemjej.”—Jerbal 14:15-17.
22. Ewi wãwen an Jehovah jerbal ibben ri karejar ro an?
22 Bareinwõt David ear kamolol kin kadkad ko Anij ear kalikar kaki ke “E ar elã iman mejen [Moses] im E ar kwalok men in, Jeova, Jeova, juõn Anij ej tiriamokake, im E joij, e rumij an illu, im elap an tiriamokake im mol.” (Exodus 34:6) Inem, David ear kwalok: “Jeova, juõn Anij ej tiriamokake, im E joij.” Meñe Jehovah ej utiej bõtata, ej kaibujuij armij ro ri karejaran ilo an tiriamokake ir. Ej obrak kin tiriamo, im ebojak im jeorlok bwid ko an armij eo ej bedbed ion binmour eo an Jesus. Jehovah erumij an illu bareinwõt, kinke ej lelok ien bwe ri karejar ro an ren anjo ion likjap ko air me remaroñ kejbãrok ir jen air deloñ ilo lal eo ekãl im wãnik.—2 Piter 3:9, 13, 14.
23. Ta kadkad eo eaorõk jenaj katak kake ilo katak eo tok ilal?
23 David ej kaibujuij joij, ak tiljek ilo yokwe an Anij. Emol, eon ko jet ilo Sam 145 rej kwalok kin ewi wãwen an Jehovah kwalok kadkadin im ewi wãwen ri karejar ro an retiljek rej uak ñan joij eo an. Jenaj bwebwenato kin men kein ilo katak in tok ilal.
Ewi Wãwen Am Naj Kar Uak?
• Ta ien ko remõn ewõr ibbed ñan nebar Jehovah “aolep ran”?
• Ta wanjoñok ko rej kwalok bwe jejjab maroñ lukkun melele kin utiej bõtata eo an Jehovah?
• Ewi wãwen ad maroñ kalaplok ad kamolol kin men ko rewulio an Jehovah?
[Pija eo ilo peij 8]
Galaxy ko ibelakin lañ rej kamol kin utiej bõtata eo an Jehovah
[Etan eo ear kõmman pija ilo page 8]
Ilo joij eo an Anglo-Australian Observatory, David Malin ear pijaike
[Pija eo ilo peij 10]
Ewi wãwen an kar utiej bõtata eo an Jehovah alikar ikijen Jesus Christ?