Jehovah Elap An Tiljek Ilo An Kwalok Yokwe
“Jehovah elap an tiljek ilo an kwalok yokwe.”—PSALM 145:8, NW.
1. Ewi joñan an lap yokwe eo an Anij?
“ANIJ yokwe.” (1 Jon 4:8) Ennan in ekamãnãn buruõd ej kamol bwe wãwen iroij eo an Jehovah ej bedbed ion yokwe. Ak, armij ro rekiblia bareinwõt rej bõk tokjen jen al im ut eo ej letok ilo yokwe! (Matu 5:44, 45) Kin an Anij yokwe armij ro ion lal, ri kijirãt ro an bareinwõt remaroñ ukwelok, oktak, im bõk mour indio. (Jon 3:16) Bõtab, mõttan jidik, Jehovah enaj kokkure ri nana ro bwe ro rej yokwe e remaroñ mour indio ilo juõn lal ekãl im wãnik.—Sam 37:9-11, 29; 2 Piter 3:13.
2. Ta wãwen eo ejej uan kin yokwe Jehovah ej kwalok ñan ro rar wujleplok air mour ñan e?
2 Jehovah ej yokwe ri kabuñ ro an remol ilo juõn wãwen ejej uan im ñan indio. Yokwe rot in ej alikar ilo juõn nan in Hibru im rar ukõte “yokwe joij,” ak “tiljek ilo an kwalok yokwe.” King David ilo Israel eo etto ear lukkun kamolol kin an Anij yokwe joij. Kinke ear lo kin mejen im kalmenlokjen kin wãwen an Anij jibañ ro jet, David ear maroñ al ilo tiljek: “Jehovah e joij, im E obrak kin tiriamo [ak, tiljek ilo an kwalok yokwe.]”—Sam 145:8.
Kile Kajjen Ro Rej Tiljek ñan Anij
3, 4. (a) Ewi wãwen Sam 145 ej jibañ kij ñan kile ro rej tiljek ñan Jehovah? (b) Ewi wãwen ro retiljek ñan Anij rej “kajerammõn” e?
3 Ikijen Jehovah Anij, Hannah, jinen ri kanan Samuel, ear ba: “E naj kejbãrok neen An ro re kwojarjar [ro retiljek, NW].” (1 Samuel 2:9) Wõn rein “retiljek”? King David ear uak. Elikin an kaibujuij kadkad ko rekabwilõñlõñ an Jehovah, ej ba: “ro remõn [ak ro retiljek, NW] Am re naj kamõnõnõik [ak kajerammõn, NW] Yuk.” (Sam 145:10) Ewi wãwen juõn armij emaroñ kajerammõn Anij? Rej kõmman men in elaptata ilo air nebar e ak kaibujuij e.
4 Armij rein rej tiljek ñan Jehovah kinke rej kajerbal loñiir ñan kaibujuij e. Ilo ien air kamao ibben don im ilo kwelok ko an Christian, ta eo elap air bwebwenato kake? Eokwe, ej Ailiñ eo an Jehovah! Ri karejar ro retiljek an Anij rej errã ibben lemnak ko an David, eo ear al: “Re naj ba kin aibujuij im ailiñ eo An, im naj konono kin Am kajur.”—Sam 145:11.
5. Ewi wãwen ad jelã bwe Jehovah ejelã ñe ro retiljek ñan e rej kautiej e ilo konono ko air?
5 Jehovah ej roñjake ke ñe ri tiljek ro an rej nebar e? Aet, ej roñjake kin ta eo rej ba. Ilo juõn kanan ikijen kabuñ eo emol ilo ran kein ad, Malachi ear je: “Ilo ien eo ro rej mijak Jehovah rar konono ibben don, ibben ro mõttair, im Jehovah ear roñjake im liñõri nan ko air. Im ear jei ilo juõn book in kememej eo etan ro rej mijak Jehovah im ro rej lemnak kin etan.” (Malachi 3:16, NW) Elap an kabuñburuen Jehovah ñe ri tiljek ro an rej kaibujuij e, im ej kememej ir.
6. Ta jerbal eo ej jibañ kij ñan jelã kajjen ro retiljek ñan Anij?
6 Ej alikar kin wõn ri karejar ro retiljek an Jehovah kinke rej beran im bõk eddo eo ñan kwalok nan ibben armij ro rejjab kabuñ ñan Anij eo emol. Emol, ri tiljek ro an Anij rej “kwalok ñõn nejin armij, men ko rekajur E ar kõmõnmõni, im aibujuij in utiej eo An.” (Sam 145:12) Kwoj bukõt ien ko remõn ke ñan konono ibben ro rejjab tõmak kin wãwen iroij eo an Jehovah? Jab einwõt kien ko an armij, ko me mõttan jidik renaj jako, wãwen iroij eo an ej bed ñan indio. (1 Timote 1:17) Ej juõn men eaorõk kiõ bwe armij ro ren katak kin wãwen iroij eo an Jehovah eo enaj bed ñan indio im jutak bin einwõt ro rej rejetak e. “Ailiñ eo Am juõn ailiñ ej ñõn indio, David ear al, bwe “Am iroij e berwõt iomin ebeben ko otemjej.”—Sam 145:13.
7, 8. Ta eo ear walok ilo 1914, im ta eo ej kamol bwe Anij ej iroij kiõ ikijen Ailiñ eo an Nejin?
7 Jen 1914, ear laplok unin ad konono kin jerbal in iroij eo an Jehovah. Ilo yiõ eo, Anij ear kajutak Ailiñ eo ilañ, im jitõñ Jesus Christ, Nejin David, einwõt King. Ilo wãwen in Jehovah ear kajejjet kitien kallimur eo an bwe iroij eo an David enaj kar jutak bin ñan indio.—2 Samuel 7:12, 13; Luk 1:32, 33.
8 Kinke kakõllan bed eo an Jesus ej wõnmanlok wõt ñan kiõ, men in ej kamol bwe Jehovah ej iroij ikijen Ailiñ eo an Nejin, Jesus Christ. Juõn mõttan kakõlle eo ejej uan ej ikijen jerbal eo Jesus ear kanan bwe aolep ro retiljek an Anij renaj kar kõmmane ke ear ba: “Im naj kwalok gospel in an ailiñ in lõñ i aolepen lõl kin men in kennan ñõn ailiñ otemjelok ilo ien eo e naj itok jemlokõn.” (Matu 24:3-14) Kinke ro rej tiljek ñan Anij rej kijejeto ilo air kajejjet kitien kanan in, elõñlok jen jiljino million maan, kõrã, im ajiri ro rej bõk kunair ilo jerbal in elaptata, im ejej uan. Mõttan jidik aolep ro rej jumae Ailiñ eo an Jehovah renaj jako.—Reveles̃õn 11:15, 18.
Bõk Tokjen Jen Iroij Bõtata eo an Jehovah
9, 10. Ta oktak eo ikõtan Jehovah im iroij ro an lal?
9 Elañe jej Ri Christian ro emwij wujleplok mour eo ad, kõtan eo ad ibben Iroij Bõtata eo Jehovah ej bõktok elõñ jerammõn ko ñan kij. (Sam 71:5; 116:12) Ñan wanjoñok, kinke jej mijak Anij im jerbale wãnik, jej kabuñburuen im bed ilo juõn kõtan ebak ilo jitõb ñan e. (Jerbal 10:34, 35; Jemes 4:8) Ilo oktan, ekkã ad lo an iroij ro an lal kamao ibben ro rebuñbuñ, einwõt ri tel ro an tarinae, ri wia ro remweie, ak ri ikkure im armij ro eirlok wõt. Ekkar ñan juõn news ilo Africa etan Sowetan, juõn ri kien ebuñbuñ ear ba nan kein kin jikin ko rejeramel ilo ailiñ eo an: “Ijelã kin unin an nañin aolep iam kim jab kõnan etal ñan jikin ko rejeramel. Ej kinke kim kõnan meloklok bwe kain abañ kein rej bed ak walok. Ej kainebata bõklikit eo am im kimij jook kin wa ko waam elap wõnãir kimij kattõri ijo.”
10 Emol, jet iroij ro an lal emol burueir kin air itoklimo kin armij ro rej iroij ioir. Ak elukkun mol buruen ri utiej ro ibwiljiir ak rejjab lukkun jelã buruen ro rej iroij ioir. Emol, jemaroñ kajitõk: Ewõr ke juõn iroij eo ej lukkun itoklimo kin aolep ro rej bed iumin tel eo an im emõkaj an jibañ kajjojo iair ilo ien ko ewõr abañ ibbeir? Aet, ewõr. David ear je: “Jeova ej kajerkak im drebij ro otemjej re buñ; im kajutõk ro otemjej re kumliklik.”—Sam 145:14.
11. Ta melejoñ ko ro retiljek ñan Anij rej jelmaiki, im ta jibañ eo ewõr ibbeir?
11 Ro Retiljek ñan Jehovah rej jelmae elõñ melejoñ ko kin air jab wãppen im kinke rej bed ilo juõn lal ej bed iumin kajur eo an Satan, “eo e nana.” (1 Jon 5:19; Sam 34:19) Ri Christian ro rej jelmae matõrtõr. Jet rej bõk eñtan jen nañinmij ko reban kamadmõdi ak kin air buromõj kin ro nukiir remij. Jet ien, bwid ko an ro retiljek ñan Jehovah remaroñ kamakit ir bwe ren ‘kumliklik’ im ebwer. Bõtab, jekdon ta melejoñ ko jej jelmae, Jehovah ej bojak ien otemjej ñan kainemõn im kakajur ir aolep ilo jitõb. King eo Jesus Christ ej kwalok ejja itoklimo in wõt ilo yokwe ñan ro ej iroij ioir.—Sam 72:12-14.
Mõñã ko Renno ilo Ien Ekkar
12, 13. Ewi joñan an emõn wãwen an Jehovah kabwe aikwij ko an “men otemjej remour”?
12 Kinke elap an joij, Jehovah ej letok aolep men ko ri karejar ro an rej aikwiji. Men in ekoba kabwe aikwij eo air kin mõñã ko reũn. King David ear je: “Mejeir otemjej rej kõtar Yuk [Jehovah], im Kwoj lelok ñõn ir kijeir ilo ien ekar. Kwoj erlokwe peiõm im kamãt air kõnan ñõn men otemjej remour.” (Sam 145:15, 16) Elaptata ilo ien jorrãn ko, Jehovah emaroñ ukõt wãwen ko bwe ro retiljek ñan e remaroñ bõk “[bread, NW] ekar ñõn ran eo.”—Luk 11:3; 12:29, 30.
13 David ear konono bwe “men otemjej remour” renaj juburueir. Rej koba men in mour ko. Elañe lal in ear jab obrak kin men in eddek ko ilo ene im lojet, ek, bao, im men in mour ko ion lal ren kar jab menono ak mõñã. (Sam 104:14) Bõtab, Jehovah ej bõk eddo eo ñan kabwe aolep aikwij ko air.
14, 15. Ewi wãwen ad bõk mõñã ko kijed ilo jitõb rainin?
14 Jab einwõt men in mour ko, armij ro rej aikwij men ko ilo jitõb. (Matu 5:3) Emenin kabwilõñlõñ bwe Jehovah ej kabwe men kein ilo jitõb ñan ro retiljek ñan e! Mokta jen an kar mij, Jesus ear kallimur bwe “ri korijer eo e tiljek im meletlet” enaj lelok ñan ri kalor ro an Jesus mõñã ko kijir “ilo ien emõn.” (Matu 24:45) Bwen 144,000 ri kabit ro rej pijaik kumi in ri karejar eo ilo ran kein. Jehovah ear kajerbal ir ñan letok elap mõñã ilo jitõb.
15 Ñan wanjoñok, enañin aolep armij ro an Jehovah ilo ran kein rej bõk tokjen jen juõn ukok ekãl im jejjet in Bible eo ilo kajin eo air. Ukok in Bible eo etan New World Translation of the Holy Scriptures ear juõn jerammõn elap kin men in! Bareinwõt, elõñ million book in Bible ko rar kõmmani ilo elõñlok jen 300 kajin ko. Aolep mõñã kein ilo jitõb rar einwõt juõn jerammõn elap ñan ri kabuñ ro remol ibelakin lal. Nebar kin men in ej tellokin wõn? Jehovah Anij. Ilo joij im yokwe eo elap an, ear kamaroñ ri karejar eo bwe en “najirik [kij] ilo ien emõn.” Ikijen men in letok kein, enaj kajejjet kitien “kõnan [eo] ñõn men otemjej remour” ilo paradise eo ilo jitõb ilo ran kein. Im elap an ri karejar ro an Jehovah lañliñ wõt ilo kejatdikdik eo bwe mõttan jidik jenaj lo kin mejed bwe lal in enaj oktak im erom juõn lukkun paradise!—Luk 23:42, 43.
16, 17. (a) Ta wanjoñok ko kin mõñã ilo jitõb ear itok ilo ien emõñ? (b) Ewi wãwen an Sam 145 kwalok eñjake ko an ro retiljek an Anij ikijen aitwerõk eo elaptata Satan ear aitwerõke?
16 Lemnak kin juõn wanjoñok emõn kin ewi wãwen rar bõk ekan ko lor jitõb ilo ien emõn. Ilo 1939, Tarinae eo Kein Ka Ruo an Lal ear jinoe ilo Europe. Ilo ejja yiõ eo wõt, magazine in Imõniaroñroñ ilo November 1 kar wõr katak eo “Neutrality (Bed Iolaplap).” Kin an kwalok juõn melele ealikar kin katak in, Ri Kennan ro an Jehovah ibelakin lal rar lo aikwij eo ñan jab bõk kunair ilo makitkit ko an ailiñ ko rej bed ilo tarinae. Bebe in ear kaillu kien ko an ailiñ ko aolep rar bed ilo tarinae eo jiljino yiõ ko aetokin. Bõtab, meñe rar bed ilo ijjibed im matõrtõr, ro retiljek ñan Anij rar wõnmanlok ilo jerbal in kwalok nan kin news eo emõn kin Ailiñ eo. Jen 1939 ñan 1946, rar bõk jerammõn kin juõn laplok ejej uan 157 percent. Bareinwõt, jerbal ko air rar kõmmani ilo tiljek iumin ien tarinae eo rej wõnmanlok im jibañ armij ro ñan kile ta kabuñ eo emol.—Aiseia 2:2-4.
17 Ekan ko lor jitõb Jehovah ej lelok ejjab leloke ilo ien emõn wõt ak bareinwõt ilo juõn wãwen ekamweie im kajuburueir. Ke ri ailiñ ro rar boub wõt ilo tarinae ilo Tarinae eo kein karuo an Lal, armij ro an Jehovah rar bõk jibañ ñan boub wõt kin juõn men elaplok an aorõk jen air lomoren ir make. Jehovah ear jibañ ir bwe ren melele kin aitwerõk eo elaptata, im ej kitibuj aolepen lañ im lal, im ej jelet maroñ eo an Jehovah einwõt iroij bõtata ilañ im ion lal. Emol ej juõn men ekamõnõnõ ñan jelã bwe ilo air debij air tiljek kajjojo Ri Kennan ro an Jehovah rar bõk juõn kunan edik ñan kautiej iroij bõtata eo an Jehovah im kamol bwe Devil ej juõn ri riap! (Jabõn Kennan Ko 27:11) Ejjab einwõt Satan, eo ej kinaak Jehovah im wãwen iroij eo an, ri tiljek ro an Jehovah rej wõnmanlok im kwalok nan iman mejen armij: “Jehovah e wãnik ilo ial ko An otemjej.”—Sam 145:17.
18. Ta wanjoñok eo emwij kwalok kake kin mõñã ilo jitõb ear walok ilo ien eo emõn im kajuburu?
18 Bar juõn wanjoñok kin ekan ko lor jitõb ilo ien eo emõn ej book eo Draw Close to Jehovah, eo rar leloke ilo elõñ buki kwelok ko relap “Ri Keañ ro Rekijejeto an Ailiñ eo” rar kõmmani ibelakin lal ilo yiõ eo 2002/03. Book in, eo me “ri korijer eo e tiljek im meletlet” ear jeje im Ri Kennan ro an Jehovah rar kõmmane im leloke, ear kamelele kin kadkad ko rekabwilõñlõñ kadkadin Jehovah Anij, ekoba kadkad ko ilo Sam 145. Emol bwe book in emõn enaj juõn men eaorõk ñan jibañ ro retiljek ñan Anij bwe ren ruaklok ñan e.
Juõn Ien ñan Ruaklok ñan Jehovah
19. Ta ien eo ekauwatata ej ruaktok im bed ebak kiõ, im ewi wãwen ad maroñ kajimwe men in?
19 Juõn ian men ko ñan uake aitwerõk eo elap kin iroij bõtata eo an Jehovah ijoko otemjej ilañ im ion lal ej ebak. Einwõt emwij kanan kake ilo Ezekiel chapter 38, ejjabto Satan enaj kamwijlok jerbal eo an einwõt “Gog jen enen Magog.” Men in enaj kitibuj juõn ien enaj kabol im tarinaik armij ro an Jehovah Ibelakin lal. Enaj ien eo Satan enaj kamaat an maroñ ñan kokkure tiljek eo an ri karejar ro retiljek an Anij. Ejjab einwõt mokta, ri kabuñ ro an Jehovah renaj aikwij eowore, kir e bwe en jibañ ir. Air kautiej, yokwe im mijake Anij e enaj ke juõn men ejelok tokjen ibbeir? Emol, jaab, kinke Sam 145 ej ba: “Jeova ej ebak ñõn ir otemjej rej kir ñõn E, ñõn ro otemjej rej kir ñõn E ilo mol. E naj kamol kõnan an ro remijõk E; e naj bareinwõt roñjake air lamij im lomorir. Jeova ej kejbãrok ir otemjej rej yokwe E; a ro renana otemjej E naj kokkure ir.”—Sam 145:18-20.
20. Ewi wãwen nan ko ilo Sam 145:18-20 renaj mol ilo ran ko rej ebak?
20 Enaj juõn ien ekamõnõnõ ñan lo an Jehovah kebak kij im kajerbal kajur eo an ñan lomoren armij ñe ej kokkure aolep ro renana! Ilo ien eo ekauwatata im ebak, Jehovah enaj roñjake wõt “ro otemjej rej kir E ilo mol.” Emol ejamin roñjake ro rejelã mon. Nan in Anij ej kalikar jen mokta bwe ñe juõn ri nana ej kõttar mae ien eo eliktata ñan kir etan Anij enaj ejelok tokjen.—Jabõn Kennan Ko 1:28, 29; Micah 3:4, NW; Luk 13:24, 25.
21. Ewi wãwen ro retiljek ñan Jehovah rej kwalok bwe rej mõnõnõ in kajerbal ãt eo ekwojarjar?
21 Kiõ ej juõn ien elaplok an aorõk jen mokta bwe ro rej mijake Anij ren “kir E ilo mol.” Ro rej tiljek ñan e rej mõnõnõ in kajerbal etan ilo jar ko air im ñe rej uak ilo kwelok ko air. Rej kajerbal etan ñe rej bwebwenato ibben don. Im ilo beran rej kwalok etan ilo jerbal in kwalok nan eo air.—Dri Rom 10:10, 13-15.
22. Etke ej juõn men eaorõk ñan jumae lemnak im kõnan eo an lal?
22 Ñan wõnmanlok im bõk tokjen jen kõtan eo ad ebak ñan Jehovah Anij, ej juõn men eaorõk bareinwõt bwe jen jumae men ko rej kokkure men ko ilo jitõb einwõt arõk mweiuk, men in kamõnõnõ ko rejjab emõn, juõn jitõb in jab jeorlok bwid, ak jab itoklimo in jibañ ro rej aikwij jibañ. (1 Jon 2:15-17; 3:15-17) Elañe jejjab kajimwe lemnak eo ad, men in jibadbad im manit kein remaroñ jemlok ilo ad jerawiwi ilo juõn wãwen elap im luji buñburu eo ad ibben Jehovah. (1 Jon 2:1, 2; 3:6) Ej juõn men in meletlet ñan kememej bwe Jehovah enaj wõnmanlok im kwalok joij, ak tiljek wõt ilo yokwe, ñan kij elañe jej tiljek wõt ñan e.—2 Samuel 22:26.
23. Ta ilju im jeklaj eo elap aolep ro retiljek ñan Anij rej kõttare?
23 Inem jen bedwõt ilo juõn wõt lemnak kin juõn ilju im jeklaj elap aolep ro rej tiljek ñan Jehovah rej kõttare. Ilo ad kõmman eindein, ewõr kejatdikdik eo eaibujuij ibbed bwe jen kobalok ibben aolep ro renaj kautiej, kajerammõn, im nebar Jehovah “ñõn in drio im in drio.” (Sam 145:1, 2) Inem jen ‘bedwõt ilo yokwe eo an Anij ilo ad reimanlok ñan bõk mour indio.’ (Jud 20, 21) Ñe jej wõnmanlok im bõk tokjen jen kadkad ko raibujuij kadkadin Jemed ilañ, ekoba joij ak tiljek ilo an kwalok yokwe ñan ro rej yokwe e, jen kõmman bwe eñjake ko ad ren einlok wõt ko me David ear kwalok ilo nan ko an ilo tujemlokin Sam 145: “Loñiõ e naj konono im nebar Jeova; im kõniek otemjej en kamõnõnõik etan ekwojarjar ñõn in drio im in drio.”
Ewi Wãwen Am Naj Kar Uak?
• Ewi wãwen an Sam 145 jibañ kij ñan kile kajjen ro retiljek ñan Anij?
• Ewi wãwen an Jehovah ‘kamãt kõnan eo an men otemjej remour’?
• Etke jej aikwij ruaklok ñan Jehovah?
[Pija eo ilo peij 15]
Ilo beran ri karejar ro an Jehovah rej jibañ ro rejaje kajjiir ñan katak kin aibujuij eo an jerbal in iroij eo an
[Pija eo ilo peij 16]
Jehovah ej kakajur im tel ro retiljek ñan e, ro me rej bukõt e ilo jar