Juõn “Ri Korijer” Eo Etiljek Im Meletlet

“Wõn dri korijer e tiljek im meletlet, eo an iroij e ar likit e bwe en dri kõmñe ion ro dron, bwe en najirik ir ilo ein emõn?”​—MATU 24:45.

1, 2. Etke ej aorõk bwe jen keini ad bõk ekan ko lor jitõb ilo ran kein?

ILO elikin raelep in Tuesday, Nisan 11, 33 C.E., ri kalor ro an Jesus rar jomantak juõn kajitõk ewõr juõn melele ejej uan ñan kij ilo ran kein. Rar kajitõk ibben: “Ta kakõlõn Am naj itok im lokõn lõl?” Ilo uak, Jesus ear kanan kin juõn men ekabwilõñlõñ. Ear konono kin juõn ien elõñ tarinae ko relap, ñitta, makitkit lal, im nañinmij ko renaj walok ie. Im men kein renaj kar “jinoin [wõt] iñtan ko.” Men kein renaj kar nanalok. Ej juõn ien ekalelñoñ elap!​—Matu 24:​3, 7, 8, 15-​22; Luk 21:10, 11.

² Jen 1914 liktak, enañin aolep men ko Jesus ear kanan kake rar jejjet kitieir. “Iñtan” kein rej buñõt armij ñan joñan eo eyu. Bõtab, Ri Christian ro remol rejjab aikwij mijak. Jesus ear kallimur bwe enaj najidik ir kin ekañ ko lor jitõb. Kinke Jesus ej bed ilañ, ewi wãwen an kar karõk bwe jen bõk ekan ko lor jitõb ijin ion lal?

3. Ta karõk ko Jesus ear karõki ñan najidik kij ilo “ien emõn”?

³ Jesus ear make uake kajitõk in. Ke ear kwalok kanan in elap, ear kajitõk: “Wõn eo dri korijer e tiljek im meletlet, eo an iroij e ar likit e bwe en dri kõmñe ion ro dron, bwe en najirik ir ilo ien emõn?” Inem ear ba: “Emõnõnõ dri korijeran eo an iroij e naj itok im lo an kõmõnmõn ein drein.” (Matu 24:45-​47) Aet, enaj wõr juõn “dri korijer” eo enaj tiljek im meletlet. Ri karejar in ear juõn wõt armij ke, ak armij ro kajjojo jen ebeben ñan ebeben ke, ak bar juõn men? Kinke ri karejar eo etiljek ej letok ekan ko ilo ien jelukkun aikwiji, ej juõn men ekaitoktoklimo ñan jelã uak eo an kajitõk in.

Juõn Wõt Armij ke ak juõn Jar in Armij?

4. Ewi wãwen ad jelã bwe “dri korijer eo e tiljek im meletlet” ejjab juõn wõt armij?

⁴ “Ri korijer eo e tiljek im meletlet” ejjab maroñ juõn wõt armij. Etke? Kinke ri karejar in ear jino lelok ekañ ko lor jitõb ilo ebeben eo kein kajuõn, im ekkar ñan Jesus, ri karejar in enaj kar jerbal mae ien eo Master eo ear itok ilo 1914. Ej tarrin 1900 yiõ ko juõn armij ej aikwij mour im jerbal ilo tiljek. Mour eo an Methuselah ear jab maroñ tõbar joñan dettan armij in!​—Jenesis 5:​27.

5. Kamelele kin etke nan eo “dri korijer eo e tiljek im meletlet” ejjab jerbale ñan Ri Christian ri kabit ro kajjojo.

⁵ Eokwe, nan eo “dri korijer e tiljek im meletlet” ej jerbale ke ñan Ri Christian ro kajjojo? Emol bwe Ri Christian ro aolep rej aikwij kwalok air tiljek im meletlet; bõtab, Jesus ear kalikar juõn melele elaplok ke ear konono kin “dri korijer e tiljek im meletlet.” Ewi wãwen ad jelã kin men in? Kinke ear ba bwe ñe “iroij [master] e naj [ka]r itok” enaj kamaroñ ri karejar eo bwe en iroij “ion men ko otemjelok an.” Ewi wãwen an Ri Christian ro kajjojo iroij ion men ko aolep​—men ko “otemjelok” an Iroij? Eban!

6. Ewi wãwen an ailiñ in Israel kar jerbal einwõt “dri korijer” eo an Anij?

⁶ Inem, ewõr juõn wõt uak ejimwe im kõmmanwa, bwe Jesus ear jitõñlok ñan juõn kumi in Ri Christian ro kar naetair “dri korijer e tiljek im meletlet.” Emaroñ melelen ke bwe men in ej jitõñlok ñan juõn ri karejar im elõñ mõttanin? Aet. Jiljilimjuõn buki yiõ ko mokta jen ien lotak eo an Christ, Jehovah ear naetan aolepen ailiñ in Israel einwõt “dri kennan ro aõ” im “dri korijera I ar kãlete.” (Aiseia 43:10) Aolep ro uan ailiñ in Israel jen 1513 B.C.E., ke rar bõk Kien eo an Moses, laltak ñan Pentecost 33 C.E. rar mõttan kumi in ri karejar eo. Enañin aolep Ri Israel ro rar jab bed ilo jerbal in tel ak karõk program eo ñan najidik armij kin ekañ ko lor jitõb. Jehovah ear kajerbal king, ri ekajet, ri kanan, ri priest, im Ri Livai ro ñan inek eddo kein. Mekarta, einwõt juõn ailiñ, Ri Israel ro rar jutak kin iroij bõtata eo an Jehovah im nebar e ibelakin ailiñ ko. Ri Israel ro kajjojo ren kar einwõt juõn ri kennan eo an Jehovah.​—Duteronomi 26:19; Aiseia 43:21; Malachi 2:​7, NW; Dri Rom 3:​1, 2.

Juõn “Dri Korijer” Emwij Kadioje

7. Etke kar jolok ailiñ in Israel eo etto einwõt “dri korijer” eo an Anij?

⁷ Kinke Israel ear “dri korijer” eo an Anij elõñ ebeben ko mokta, eñin ke ri karejar eo Jesus ear ba kake? Jaab, kin Israel eo etto ear jab tiljek im meletlet ñan jemlokin. Paul ear kakobabaik makitkit ko an ke ear kwalok nan ko an Jehovah ñan ailiñ eo: “Rej blaspim etan Anij iben dri ailiñ ko kin kom, einwõt emwij je.” (Dri Rom 2:​24) Emol, ailiñ in Israel eo ear kajemlok juõn bwebwenato eaetok kin jumae ilo an karmijeteik Jesus, inem Jehovah ear karmijeteik ir.​—Matu 21:42, 43.

8. Ñããt eo bar juõn “dri korijer” ear bõk jikin Israel eo etto, im ilo wãwen et ko?

⁸ Jab tiljek eo an Israel, “dri korijeran,” ear jab melelen bwe ri kabuñ ro retiljek rejamin bõk ekan ko lor jitõb ñan indio. Ilo Pentecost 33 C.E., 50 ran ko elikin an Jesus jerkakbiji, ear lutoktok jitõb kwojarjar eo an ion 120 ri kalor ro an ilo boõn juõn em ilo Jerusalem. Ilo ien eo juõn ailiñ ekãl ear lotak. Ilo ekkar, rar kejelã kin ien lotak in an ke ro uan rar kwalok ilo beran ñan ro rar jokwe ilo Jerusalem kin “men ko re lap an Anij.” (Jerbal 2:​11) Inem, ailiñ in ekãl, juõn ailiñ ilo jitõb, ear erom “dri korijer” eo enaj kar kwalok nan kin aibujuij eo an Jehovah ñan ailiñ ko im najidik ir ilo ien eo emõn. (1 Piter 2:9) Ilo ekkar, rar naetan “Israel an Anij” tokelik.​—Dri Galetia 6:​16.

9. (a) Wõn eo ej “dri korijer eo e tiljek im meletlet”? (b) Wõn “ro dron”?

⁹ Aolep ro uan “Israel an Anij” rej Ri Christian ro emwij air wujleplok im baptais im emwij an jitõb kwojarjar eo kabit ir im ewõr air kejatdikdik ilañ. Kin men in, nan eo “ri korijer e tiljek im meletlet” ej jitõñlok ñan aolep ro uan ailiñ in ilo jitõb emwij an kabiti einwõt juõn kumi ak class ion lal ilo jabdewõt ien jen 33 C.E. liktak ñan kiõ, einlok wõt Ri Israel ro otemjej rar mour ilo jabdewõt ien jen 1513 B.C.E. ñan Pentecost 33 C.E. rar mõttan jar in ri karejar eo lok iman Ri Christian ro. Bõtab, wõn ro rej naetan “ro dron,” me rej bõk ekan ko lor jitõb jen ri karejar eo? Ilo ebeben eo kein kajuõn C.E., Ri Christian ro otemjej rar kaorõk kejatdikdik eo air ilañ. Kin men in, ro rar naetair einwõt ro dron rar Ri Christian ri kabit ro bareinwõt, jab einwõt juõn class ak kumi in armij, ak rej kajjojo ro uan ri karejar eo. Ir aolep, ekoba ro rar tel congregation ko einwõt ri jilek ro im ro uan governing body eo, rar aikwij bõk ekan ko lor jitõb jen kumi in ri karejar eo.​—1 Dri Korint 12:12, 19-​27; Dri Hibru 5:​11-​13; 2 Piter 3:​15, 16.

“Ñan Armij Otemjej Air Jerbal”

10, 11. Ewi wãwen ad jelã bwe aolep ro uan class in ri karejar eo rejjab bed ilo ejja jerbal eo wõt?

¹⁰ Meñe “Israel an Anij” ej kumi in ri karejar eo etiljek im meletlet im ewõr an jerbal, kajjojo uan ebar wõr jerbal ko air. Nan ko an Jesus ilo Mark 13:34 ej kalikar men in. Ear ba: “Ej einwõt ke juõn armij ej ilok ñõn ene etolok, ej likit mweo imõn, im ej lelok nan in kalimur ñõn ro dri korijeran im ñõn armij otemjej air jerbal, im bareinwõt juõn dri bar kejem bwe en ekil.” Inem kajjojo uan kumi in ri karejar in emwij air bõk air jerbal​—ñan korlok men ko an Christ ion lal. Ej inek eddo eo an joñan wõt an maroñ im ien ko remõn.​—Matu 25:14, 15.

¹¹ Bareinwõt, ri jilel Peter ear jiroñ Christian ri kabit ro ilo ran ko an: “Einwõt jabrewõt iami e ar bõk men in lewoj, en jibõñ dron kake, einwõt dri kõmñe remõn an joij an Anij, elõñ wãwen.” (1 Piter 4:​10) Inem, ri kabit ro rej bõk eddo eo ñan kajerbal men in lelok ko Anij ear lelok ñan ir ñan jibañ don. Bareinwõt, nan ko an Peter rej kalikar bwe jab aolep Ri Christian ro joñair wõt juõn ilo maroñ, eddo, ak jerammõn ko. Bõtab, kajjojo uan class in ri karejar eo rej jibañ ilo jabdewõt wãwen ñan bõk kunair ilo jerbal in kalek ailiñ eo ilo jitõb. Ewi wãwen?

12. Ewi wãwen kajjojo ian ro uan kumi in ri karejar eo, jekdon elañe rej emaan ak kõrã, rej bõk kunair ñan korlok oran ri karejar eo?

¹² Moktata, kajjojo iair rar aikwij erom juõn ri kennan eo an Jehovah, im kwalok nan kin news eo emõn kin Ailiñ eo. (Aiseia 43:10-​12; Matu 24:14) Mokta wõt jen an kar wanliñlok ñan lañ, Jesus ear kaiñi aolep ri kalor ro an retiljek, maan im kõrã, bwe ren ri katakin armij ro. Ear ba: “Inem komin ilok, im kõmõn dri ailiñ ko otemjej bwe ren dri kalora, im baptais ir ilo etan Jema im Nejin im Jitõb Kwojarjar. Im katakin ir bwe ren bokake nan ko otemjej I ar jiroñ kom im lo Ij ber ibemi ien otemjej ñõn jemlokõn lõl.”​—Matu 28:19, 20.

13. Ta jerammõn eo ri kabit ro otemjej rar lañliñ kake?

¹³ Ke rar lo ri kalor ro rekãl, rar aikwij lukkun katakin ir kin men ko otemjej Christ ear kaiñi ri kalor ro an kaki. Tokelik, ro emol burueir rar maroñ bõk eddo eo ñan katakin ro jet. Mõñã ko lor jitõb rar jededlok ñan ro rar bojak in erom ro uan class in ri karejar eo ilo elõñ ailiñ ko. Aolep Christian ri kabit ro, maan im kõrã, rej bõk kunair ilo jerbal in kõmman ri kalor ro. (Jerbal 2:​17, 18) Jerbal in ear aikwij wõnmanlok jen ien an kar ri karejar in jino jerbal mae jemlokin jukjuk im bed in.

14. Wõn ro wõt ilo congregation eo rar bõk eddon katakin armij, im kar ewi wãwen an kõrã ri kabit ro lemnak kin men in?

¹⁴ Ri kabit ro rekãl rej kab baptais rar erom ro uan class in ri karejar eo, im jekdon wõn ro rar katakin ir, rar bõk nan in jiroñ ko jen ro uan congregation eo me rar jerbale men in aikwij ko rej tellokin bõk jerbal in elder. (1 Timote 3:​1-​7; Taitõs 1:​6-9) Lõmarein rej tellokin bõk jerbal in elder rar bõk kunair ilo jerbal in korlok ailiñ eo ilo juõn wãwen ejej uan. Christian kõrã ro emwij kabit ir rar jab ellotan kin an Christian maan ro wõt bõk eddo eo ñan katakin ilo congregation eo. (1 Dri Korint 14:34, 35) Ak, rar mõnõnõ in bõk tokjen jen an maan ro uan congregation eo boub wõt ilo jerbal eo air im rar kamolol kin jerammõn ko rar bellok ñan kõrã, ekoba bõkto-bõktak news eo emõn ñan ro jet. Kõrã ri kabit ro rekijejeto rej kwalok ettã buru bareinwõt, jekdon elañe elder ro rej ri kabit ro ak jab.

15. Kar ta juõn ian jikin ko relap ñan bõk ekan ko lor jitõb ilo ebeben eo kein kajuõn, im wõn eo ear bõk eddo eo ñan najidik armij?

¹⁵ Mõñã ko lor jitõb ilo ebeben eo kein kajuõn rar waloklok ilo kajju jen kein jeje ko an ri jilek ro im ri kalor ro jet rar tel ir. Letter ko rar jei​—elaptata jeje ko rej mõttan book ko 27 emwij air kakõrmoli rar erom Christian Greek Scriptures (ak Kallimur eo Ekãl)​—rar jilkinloki ibwiljin congregation ko im ejelok bere elder ro ilo congregation ko rar likiti einwõt juõn bedbed ñan katakin armij. Ilo wãwen in, class in ri karejar eo rar jerbal ilo tiljek ñan bõkto-bõktak mõñã ko ilo jitõb ñan Ri Christian ro ettã burueir. Class in ri karejar eo ilo ebeben eo kein kajuõn rar tiljek ilo air kamwijlok jerbal eo air ilo tiljek.

“Dri Korijer” eo 19 Buki Yiõ ko Tokelik

16, 17. Ewi wãwen an kar kumi in ri karejar eo kamol tiljek eo an ilo jerbal eo an ilo yiõ ko liktak ñan 1914?

¹⁶ Ta kin ran kein? Ke bed eo an Jesus ear jinoe ilo 1914, ear loe ke juõn kumi in Christian ri kabit ro rej tiljek wõt ilo air lelok mõñã ko ilo jitõb ilo ien eo emõn? Aet ear loe. Jemaroñ lo kumi in ilo alikar kinke rej jebar elõñ leen ko remõn. (Matu 7:​20) Bwebwenato ko an lal rej kamole men in.

¹⁷ Ilo ien an kar Jesus itok, tarrin 5,000 ro don ak kajjojo uan class in ri karejar eo rar boub in kajededlok katak ko remol an Bible. Ri jerbal ro reiet, ak ri karejar eo ear kajerbal elõñ wãwen ko ejej uair ñan kajededlok news eo emõn. (Matu 9:​38) Ñan wanjoñok, rar karõk in kõmman katak ko rej bedbed ion Bible im likiti ilo 2,000 newspaper ko. Ilo wãwen in, katak ko remol jen Nan in Anij rar tõbar elõñ thousand armij ro rej readi newspaper kein ilo ejja ien eo wõt. Ekoba ibben men in, rar keboje juõn program ralitõk awa aetokin im ear kobaik pija ko ibben movie ko. Tokjen wãwen kwalok nan in, rar kwalok ennan eo an Bible, jen jinoin ien Kõmanman ñan jemlokin Juõn Thousand Yiõ Iroij eo an Christ, ñan elõñlok jen ratimjuõn million armij ilo jilu ailiñ ko relap. Bar juõn wãwen rar kajerbale kar ikijen book im magazine ko rar kõmmani. Ñan wanjoñok, ilo 1914, rar kõmmane enañin 50,000 copy in magazine in Imõniaroñroñ eo.

18. Ñããt eo Jesus ear lelok men ko otemjelok an ñan ri karejar eo, im etke?

¹⁸ Aet, ke Iroij eo ear itok, ear lo bwe ri karejar eo etiljek ear boub in najidik ro don im kwalok nan kin news eo emõn. Ri karejar in ear bojak in bõk jerammõn ko relaplok. Jesus ear ba: “Emol ij ba ñõn kom, e naj kairoij e ion men ko otemjelok an.” (Matu 24:47) Jesus ear kõmmane men in ilo 1919, elikin an ri karejar eo ellã jen ien melejoñ eo. Bõtab, etke “ri korijer eo e tiljek im meletlet” rar bõk jerammõn ko relaplok? Kinke Iroij eo ear bõk jerammõn ko relaplok bareinwõt. Jesus ear bõk jerbal in king ilo 1914.

19. Kamelele kin wãwen an “jar eo elap” kar bõk aikwij ko air ilo jitõb.

¹⁹ Ta men ko Iroij in ekãl ear lelok ñan ri karejar eo an etiljek? Aolep men ko an ilo jitõb ijin ion lal. Ñan wanjoñok, roñoul yiõ ko elikin an Christ jijet ion throne eo ilo 1914, ear alikar wõn ro rar juõn “jar elap” in ‘sheep ro jet.’ (Reveles̃õn 7:9; Jon 10:16) Rein rar, jab ri kabit ro uan “Israel an Anij,” ak rar maan in kõrã ro emol burueir rar kejatdikdik in mour indio ion lal, ro rar yokwe Jehovah im kõnan karejar ñan e joñan wõt an ri kabit ro kõmmane. Einwõt air ba ñan ri korijer eo e tiljek im meletlet: “Kimnaj etal ibbemi, bwe kimar roñ bwe Anij ej ibbemi.” (Zechariah 8:​23, NW) Ri Christian rein rej kab baptais rar mõñã ejjab mõñã eo wõt ilo jitõb einwõt ri kabit ro, im class kein ruo rar mõñã jen juõn wõt table ilo jitõb jen ien eo mantak. Men in ear juõn jerammõn elap ibben ro uan “jar eo elap”!

20. Ta eo “jar eo elap” ear kõmmane ñan korlok men ko an Iroij eo?

²⁰ Ilo mõnõnõ ro uan “jar eo elap“ rar kobalok ibben class in ri kabit ri karejar eo einwõt ro rej kwalok nan kin news eo emõn. Ke rar kwalok nan, men ko an Iroij eo ar orlok wõt, im ear kalaplok eddo ko an “dri korijer eo e tiljek im meletlet.” Ke oran armij ro emol burueir kar orlok, jikin kõmman book ko kar laplok wõt ñan kabwe aikwij ko air ikijen book im magazine ko rej bedbed ion Bible. Rar kalek branch office ko an Ri Kennan ro an Jehovah ilo elõñ ailiñ ko. Rar jilkinlok missionary ro ñan “ene etolok tata ilõl.” (Jerbal 1:8) Jen tarrin lalem thousand ri kabit ro ilo 1914, oran ri nebar ro an Anij kar orlok ñan elõñlok jen jiljino million rainin, im jarlepju in oran in rej mõttan “jar eo elap.” Emol, men ko an King eo rar orlok elõñ alen jen yiõ eo King in ear jino iroij ilo 1914!

21. Ta parable ko ruo jenaj katak kaki ilo katak in tok ilal?

²¹ Men kein aolep rej kwalok bwe ri karejar in ej “tiljek im meletlet” wõt. Elikin wõt an kar konono kin “dri korijer eo e tiljek im meletlet,” Jesus ear kwalok ruo parable ko im rar kalikare kadkad kein ruo: parable eo kin virgin ro remeletlet im bwebwe im parable eo kin talent ko. (Matu 25:​1-​30) Emen in kaitoktoklimoid kiõ! Ta melelen parable kein ñan kij rainin? Jenaj uake kajitõk in ilo katak in tok ilal.

Ta Lemnak Eo Am?

• Wõn eo ej “dri korijer eo e tiljek im meletlet”?

• Wõn “ro dron”?

• Ñããt eo ri karejar eo etiljek ear bõk aolepen men ko an Iroij, im etke ilo ien eo?

• Wõn ro rar jibañ in korlok men ko an Iroij eo iumin yiõ kein, im ewi wãwen?

[Pija ko ilo peij 18]

Ri karejar eo ilo ebeben eo kein kajuõn ej kamole tiljek eo an ilo jerbal eo an