Kwon Beran Einwõt Jeremiah

“Kwon kõtar Jeova; kwon kajur, im buruõm en beran wõt. Aet, kwon kõtar Jeova.”​—SAM 27:14.

1. Ta jerammõn eo emweie Ri Kennan ro an Jehovah rej lañliñ kake?

RI KENNAN RO AN JEHOVAH rej jokwe ilo juõn paradise ilo jitõb. (Aiseia 11:​6-9) Ilujen lal in eobrak kin abañ, rej bed ilo juõn wãwen ejejuan ilo jitõb ibben Ri Christian ro mõttair, ro rej ainemõn wõt ibben Jehovah Anij im ibben don. (Sam 29:11; Aiseia 54:13) Im paradise eo air ilo jitõb ej laplok wõt. Aolep ro rej ‘kõmanman ankil an Anij jen burueir’ rej bõk kunair ñan kalaplok e. (Dri Epesõs 6:6) Ewi wãwen? Ilo air mour ekkar ñan kien ko an Bible im ilo air katakin armij ro jet ñan kõmman eindein, rej kir ir ñan bõk tokjen jen jerammõn ko ilo ilo paradise eo.​—Matu 28:19, 20; Jon 15:8.

2, 3. Ta eo Ri Christian ro remol rej aikwij kijenmij kake?

² Bõtab, ad mour ilo juõn paradise ilo jitõb ejjab melelen bwe jejjab aikwij kijenmij ilo melejoñ ko. Jejjab wãppen im eñtan wõt jen nañinmij, bwijwõlã, im mij. Bareinwõt, jej lo kin mejed an jejjet kitien kanan ko kin “ran ko eliktata.” (2 Timote 3:1) Tarinae, kowadoñ, nañinmij, ñitta, im abañ ko jet relap rej kaeñtan armij otemjej, ekoba Ri Kennan ro an Jehovah.​—Mark 13:​3-​10; Luk 21:10, 11.

³ Ijellokin men kein, elap ad jelã bwe ilikin paradise eo ilo jitõb, jej jelmae jumae eo ekajur jen ro rejjab bed iloan. Jesus ear kakkõl ri kalor ro an: “A bwe kom jab an lõl, a Iar kãlet kom jen lõl, kin men in lõl ej kijirãte kom. Komin kememej nan eo I ar ba ñõn kom, Dri korijer e jab utiej jen iroij eo an. Elañe r’ar matõrtõre Iõ, re naj bareinwõt matõrtõre kom.” (Jon 15:18-​21) Ran kein rej ein dein. Enañin aolep armij ro rejjab melele ak kamolol kin kabuñ eo ad. Jet rej notaik, kajirere, ak men eo enana tata​—rej kijirãte kij​—einwõt an kar Jesus kakkõl kake. (Matu 10:22) Ekkã an walok bwe, ri kijirãt ro rekõnan kajorrãn kij ilo air kariape kij ilo jikin news ko einwõt radio im television. (Sam 109:​1-3) Aet, kij aolep jej jelmae melejoñ ko, im jet iad jemaroñ ebwer. Ewi wãwen ad maroñ kijenmij?

4. Ia eo jej bõk jibañ jen e ñan kijenmij?

⁴ Jehovah enaj jibañ kij. Ilo kakõrmol ri jeje sam ear je: “Elõñ iñtan an ro remõn, a Jeova ej lomoirir jen ir otemjej.” (Sam 34:19; 1 Dri Korint 10:13) Elõñ iad jemaroñ ba bwe ñe jej liki Jehovah, ej kakajur kij ñan kijenmij iumin jabdewõt melejoñ. Yokwe eo ad kin e im lañliñ eo ej bed imad rej jibañ kij ñan jab ebwer im lelñoñ. (Dri Hibru 12:2) Inem, meñe jej jelmae abañ ko, jemaroñ jutak bin im kate wõt.

Nan in Anij Ear Kakajur Jeremiah

5, 6. (a) Ta joñok ko ewõr ibbed kin ri kabuñ ro remol rej kijenmij? (b) Kar ewi wãwen lemnak eo an Jeremiah ke kar kir e bwe en juõn ri kanan?

⁵ Ilo aolepen bwebwenato eo an lal, ri karejar ro retiljek an Jehovah ear lo lañliñ meñe iumin melejoñ ko. Jet iair rar jokwe ilo ien ekajet ko ke Jehovah ear katorlok kwi eo an ion ro rar jab tiljek. Ibwiljin ro retiljek kar Jeremiah im jejjo ri kabuñ ro mõttan rar tiljek, im Ri Christian ro ilo ebeben eo kein kajuõn. Wanjoñok ko ilo ien eo etto jemaroñ loi ilo Bible eo ñan rejañ kij, im jemaroñ bõk elap tokjen ne jej katak jen e. (Dri Rom 15:4) Ñan wanjoñok, baj lemnak mõk kin Jeremiah.

⁶ Ke ear likao wõt, Jeremiah ear jino jerbal einwõt juõn ri kanan ilo Judah. Ear jab bidodo jerbal in. Elõñ rar kabuñ ñan anij ko rewan. Meñe Josiah, eo ear king ke Jeremiah ear jino jerbal eo an, ear tiljek, aolep king ro elikin rar jab tiljek, im enañin aolep ro rar bõk eddo eo ñan katakin armij ro​—ri kanan im priest ro​—rar jab kautiej mol eo. (Jeremiah 1:​1, 2; 6:​13; 23:​11, NW) Inem, kar ewi lemnak eo an Jeremiah ke Jehovah ear kãlet e bwe en juõn ri kanan? Ear lap an lelñoñ! (Jeremiah 1:​8, 17, NW) Jeremiah ear kememej wõt kin ta eo ear ba ilo jinoin: “Ak Iar ba: “O Jehovah Ekajur Bõtata! Ijaje konono, bwe ña juõn ladik wõt.”​—Jeremiah 1:​6, NW.

7. Kar ewi wãwen lemnak ko an armij ilo territory eo an Jeremiah, im ewi wãwen ear uak?

⁷ Armij ro ilo jikin eo Jeremiah ear jerbal ie rar jab itoklimo, im ekkã an kar jelmae elap jumae. Juõn ien Pashhur, juõn priest, ear jeptake im liãbe im kalbuji. Jeremiah ear kwalok eñjake eo an ilo ien eo ke ear ba: “Im Iar ba: ‘I jamin konono kin e, im I jamin konono ilo etan. Im men in ear einwõt kijeek ilo di ko diiõ; im Iar jab maroñ debij iloa, im Iar jab maroñ kijenmij kake.’” Bõlen jet ien emaroñ kar eindein lemnak ne am​—kwar iten ebwer. Lale kin ta eo ear jibañ Jeremiah bwe en kate wõt im jab ebwer. Ear ba: “Men in [Nan in Anij, ak ennan eo] ear einwõt kijeek ilo di ko diiõ; im Iar jab maroñ debij iloa, im Iar jab maroñ kijenmij kake.” (Jeremiah 20:​9, NW) Nan ko an Anij rej jelet yuk ke ilo ejja wãwen dein?

Ri Kamao ro an Jeremiah

8, 9. (a) Ta likjap eo ri kanan eo Urijah ear kwalok, im ta ear walok ilo jemlokin? (b) Etke Baruch ear buromõj, im ta eo ear jibañ e?

⁸ Jeremiah ear jab make ian ilo jerbal in kanan eo an. Ebar wõr ri jerbal ro mõttan, im men in en kar rejañ e. Bõtab, ro mõttan rar jab jerbal ilo meletlet aolep ien. Ñan wanjoñok, Urijah ri kanan eo mõttan ear boub in kakkõl armij ro ilo Jerusalem im Judah “ekkar ñan nan ko otemjej an Jeremiah.” Bõtab, ke King Jehoiakim ear kaiñi bwe Urijah en mij, ri kanan eo ear ko ilo lelñoñ ñan Egypt. Ear jab lomoren e. Ri tarinae ro an king eo rar kõple, im kajibokweik e, im bõklok e ñan Jerusalem, ijo rar mõn e ie. Men in ear kailbõk Jeremiah!​—Jeremiah 26:20-​23, NW.

⁹ Bar juõn ri jerbal mõttan Jeremiah kar secretary eo an, Baruch. Baruch ear juõn ri jibañ eo emõn ñan Jeremiah, ak juõn ien ear bareinwõt jebwãbwe jidik jen an debij wõt juõn lemnak ilo jitõb. Ear jino abõnõnõ, im ba: “Wo ñan iõ, bwe Jehovah ear kalaplok buromõj im eñtan eo aõ! Iar mõk kin aõ buromõj, im I jañin lo jikin kakije eo aõ.” Baruch, ear ebwer, im jino luji kamolol eo an kin men ko lor jitõb. Ak, ilo joij im meletlet Jehovah ear kakabilek Baruch, im ear kajimwe lemnak eo an. Inem ilo ien eo ear bõk kallimur eo bwe enaj ellã im mour jen jeebeplok eo an Jerusalem. (Jeremiah 45:​1-5, NW) Men in ear rejañ Jeremiah ke Baruch ear bar jokkin wõt juõn ilo jitõb!

Jehovah Ear Rejetak Ri Kanan eo An

10. Ta kallimur ko Jehovah ear kwalok ñan Jeremiah ñan jurake?

¹⁰ Elaptata, Jehovah ear jab illok jen Jeremiah. Ear melele kin eñjake eo an ri kanan eo an im ear kakajur im jibañ e. Ñan wanjoñok, ilo jinoin jerbal eo an Jeremiah ke ear bere kin maroñ ko an, Jehovah ear jiroñ e: “Kwon jab mijak turin mejeir, kinke ‘Ij bed ibbam im naj kejbãrok yuk,’ Jehovah ej ba.” Inem, elikin an lelok ñan ri kanan eo an nan in jiroñ ko kin jerbal eo an, Jehovah ear ba: “Im emol bwe renaj tarinaik yuk, ak rejamin anjo iom, bwe ‘Ij bed ibbem,’ Jehovah ej ba, ‘ñan lomoren yuk.’ ” (Jeremiah 1:​8, 19, NW) Kallimur in ej juõn men in kainemõn elap! Im Jehovah ear kajejjet kitien kallimur eo an.

11. Ewi wãwen ad jelã bwe Jehovah ear kajejjet kitien kallimur eo an ñan jurake Jeremiah?

¹¹ Inem, elikin air lukwõje im kalbuji im kajirere kake iman mejen armij, Jeremiah ear ba ilo liki: “Ak Jehovah ear bed ibba einwõt juõn eo elap an kajur. Eñin unin ro rej matõrtõre iõ renaj tibñõl im jab bõk anjo. Renaj lukkun jook.” (Jeremiah 20:​11, NW) Elõñ yiõ ko tokelik ke rar kajeoñ in mõn Jeremiah elõñ alen, Jehovah ear wõnmanlok in bed ibben, im einwõt Baruch, ear ellã jen jeebeplok eo an Jerusalem im mour einwõt juõn emaan eanemkwoj, ak ro rar matõrtõr e im ro rar kajettokjen nan in kakkõl ko an elañe rar jab jako inem rar ketak ir im ãñinlok ir einwõt ri kamakoko ro ñan Babylon.

12. Meñe elõñ unin ebwer, ta eo jej aikwij kememej kake?

¹² Einwõt Jeremiah, ran kein elõñ Ri Kennan ro an Jehovah rej kijenmij iumin melejoñ ko. Einwõt emwij bwebwenato kake mokta, jet eñtan ko rej itok jen likjap ko ad make, eñtan ko jet rej itok jen makitkit ko rekabwokbwok ion lal, im bar eñtan ko rej itok jen ro rej jumae jerbal eo ad. Abañ kein remaroñ kabwer kij. Einwõt Jeremiah, jemaroñ jino lemnak elañe jemaroñ wõnmanlok ilo jerbal eo ad. Emol, jemaroñ kõtmene bwe jenaj ebwer jet ien. Buromõj im ebwer rej melejoñe joñan yokwe eo ad ñan Jehovah. Inem jen beek ilo buruõd bwe jen jab kõtlok bwe buromõj en kamakit kij bwe jen illok jen jerbal eo an Jehovah einwõt Urijah ear kõmmane. Ak, jen kajeoñe Jeremiah im liki bwe Jehovah enaj jurake kij.

Ewi Wãwen Ad Tarinaik Ebwer

13. Ewi wãwen ad maroñ kajeoñe joñok ko an Jeremiah im David?

¹³ Jeremiah ear keini an konono ibben Jehovah Anij, im kwalok tumũlalin eñjake ko an im eowore bwe en kakajur e. Ej juõn joñok emõn bwe jen lore. David ilo Bible eo ilo ien etto, ear reilok ñan ejja Unin kajur in, ear je: “Kwon roñjake nan ko aõ, O Jeova, kwon kili aõ kalomõnlokjen. Kwon karoñjake ainiken aõ jõñ, O Jeova aõ Kiñ, im aõ Anij bwe I naj jar ñõn Yuk.” (Sam 5:​1, 2) Bwebwenato eo emwij an kakõrmole ikijen mour eo an David ej kwalok bwe elõñ alen Jehovah ear uake jar ko an David im jibañ e. (Sam 18:​1, 2; 21:​1-5) Ilo juõn wãwen einlok wõt, ñe inebata ko reddo ak abañ ko ad ebwe an bin anjo ioir, ej juõn men in kainemõn elap ñan kebak Jehovah ilo jar im kabellok buruõd. (Dri Pilippai 4:​6, 7; 1 Dri Tessalonika 5:​16-​18) Jehovah ejjab makoko in roñjake kij. Ak, ej kallimuri kij bwe ‘ej kea kin kij.’ (1 Piter 5:​6, 7) Bõtab, ejjab juõn wãwen ekõmmanwa ñan jar ñan Jehovah inem jab roñjake kin ta eo ej ba, ejimwe ke?

14. Ewi wãwen an nan ko an Jehovah jelet Jeremiah?

¹⁴ Ewi wãwen an Jehovah konono ibbed? Jen bar lemnak kin Jeremiah. Kinke Jeremiah ear juõn ri kanan, Jehovah ear konono ilo kajju ñan e. Jeremiah ej kalikar kin wãwen an nan ko an Anij jelet buruen: “I ar lo nan ko am, im I ar kañi; im nan eo am ear kalañliñ buruõ; kinke etõm ej bed ioõ, O Jehovah in inelip eo.” (Jeremiah 15:16) Aet, Jeremiah ear mõnõnõ bwe Anij ear kir e bwe en jerbal ilo etan, im nan ko An rar aorõk ñan ri kanan eo. Kin men in, einwõt ri jilek Paul, Jeremiah ear kijoror in kwalok ennan eo Anij ear lelok ñan e kin an liki e.​—Dri Rom 1:​15, 16.

15. Ewi wãwen ad maroñ likit nan ko an Jehovah ilo buruõd, im ta men ko jej lemnak kaki remaroñ kamakit buruõd bwe jen jab ikõñ wõt?

¹⁵ Jehovah ejjab konono ilo kajju ibben jabdewõt armij ilo ran kein. Bõtab, ewõr nan in Anij ibbed ej jeje ko ilo Bible eo. Kin men in, elañe jej kate kij im katak Bible ibbed make im kalmenlokjen kin ta tokjen ko jej bõk jene, nan ko an Anij renaj “kalañliñ buruõd” bareinwõt. Im jemaroñ mõnõnõ kinke jej bõkto-bõktak etan Jehovah ilo jabdewõt jikin jej etal ie im kwalok nan kein ñan ro jet. Jen jab meloklok mol eo bwe ejelok bar juõn jar in armij ion lal rainin rej kwalok nan kin etan Jehovah. Ri Kennan ro an wõt rej kwalok nan kin news eo emõn kin Ailiñ eo an Anij emwij an jutak im katakin ro etta burueir bwe ren erom ri kalor ro an Jesus Christ. (Matu 28:19, 20) Elap ad mõnõnõ im bõk kautiej kin men in! Ñe jej kalmenlokjen kin jerammõn in elap Jehovah ear letok ñan kij ilo yokwe, ekijkan ad maroñ ikõñ wõt?

Jen Lale Kain Armij Rot Ro Jej Kamao Ibbeir

16, 17. Kar ewi wãwen lemnak eo an Jeremiah kin kamao ko, im ewi wãwen ad maroñ kajeoñe e?

¹⁶ Jeremiah ej kwalok kin bar juõn men ear jibañ e bwe en beran. Ear ba: “I ar jab jijet im kamao ibben juõn kumi in armij ro rej ettõñ kin kejak ko im kautiej don. Kin peim I ar kamakelok iaõ im jijet, kinke kwar kobrak iõ kin nan in ekajet ko.” (Jeremiah 15:​17, NW) Jeremiah enaj kar kãlet bwe en make ian jen an kobalok ibben ri nana ro. Ilo ran kein lemnak in ej eindein ibbed. Jejjab meloklok kin nan in kakkõl eo an ri jilek Paul bwe “kõmao ko renana rej kakõt mõnit ko remõn,” ekoba manit ko ad remõn jen elõñ yiõ ko mokta.​—1 Dri Korint 15:33.

¹⁷ Kamao ko renana remaroñ kõtlok jitõbõn lal in bwe en katton lemnak ko ad. (1 Dri Korint 2:​12; Dri Epesõs 2:2; Jemes 4:4) Inem, jen kalaplok maroñ eo ad ñan jelã ta eo emõn im nana bwe jen kile ewi kamao ko renana im jab kobalok ibbeir ñan jidik. (Dri Hibru 5:​14) Elañe Paul ear mour ion lal rainin, baj lemnak mõk kin ta eo enaj kar ba ñan juõn Ri Christian eo ear aluij movie ko ikijen mour in ejej ak ikkure ko rekauwatata? Ewi wãwen am maroñ kakabileklek juõn ri tõmak eo mõttad eo ej kobalok ibben ri ruwamaejet ro ikijen Internet eo? Ta lemnak eo am elañe juõn Ri Christian ear jolok elõñ hour ko ñan ikkure mijin in video ko ak aluij TV im ear jab debij manit ko remõn ñan katak Bible ibben make?​—2 Dri Korint 6:​14b; Dri Epesõs 5:​3-5, 15, 16.

Bedwõt ilo Paradise eo ilo Jitõb

18. Ta eo enaj jibañ kij ñan kajur wõt ilo jitõb?

¹⁸ Jej kaorõk paradise eo ad ilo jitõb. Ebar ejelok jabdewõt men ilo lal in ej einlok wõt in ñan jidik. Ro rejjab tõmak rej bareinwõt kautiej wãwen an Ri Christian ro yokwe, lale, im kwalok joij ñan don. (Dri Epesõs 4:​31, 32) Meñe eindein, elaplok kiõ jen mokta, jej aikwij tarinaik eñjake in ebwer. Kamao ko remõn, jar, im manit ko remõn ñan katak Bible remaroñ jibañ kij ñan kajur wõt ilo jitõb. Renaj kakajur kij bwe jen wõnmaik jabdewõt melejoñ kin ad liki Jehovah kin aolepen buruõd.​—2 Dri Korint 4:​7, 8.

19, 20. (a) Ta eo enaj jibañ kij ñan kijenmij? (b) Katak eo tok ilal enaj jelet wõn ro, im emaroñ kaitoklimoen wõn ro bareinwõt?

¹⁹ Jejjab kõnan kõtlok ro rej dike ennan in Bible ko ad bwe ren kalelñoñ kij im kamõjnoik tõmak eo ad. Einwõt ri kijirãt ro rar matõrtõre Jeremiah, ro rej tarinaik kij rej tarinaik Anij. Rejamin bõk anjo. Jehovah, eo ej kajurlok jen jabdewõt ri kijirãt ro ad, ej jiroñ kij: “Kwon kõtar Jeova, kwon kajur, im buruõm en beran wõt, aet, kwon kõtar Jeova.” (Sam 27:14) Kinke kejatdikdik ilo Jehovah ej bed itumũlal in buruõd, jen beek ilo buruõd bwe jen jab ebwer jen ad kõmman men eo emõn. Jen liki wõt bwe, einwõt Jeremiah im Baruch, jenaj madmõd elañe jejjab mõk im ebwer.​—Dri Galetia 6:9.

²⁰ Tarinaik eñjake in ebwer ej juõn tarinae etto an bed ibben elõñ Ri Christian ro. Bõtab, jodikdik ro rej jelmae melejoñ ko reinjuõn. Ak ebar wõr ien ko relap im remõn ibbeir. Katak eo tok ilal enaj kamelele kake ilo kajju ñan jodikdik ro ibwiljid. Enaj juõn men ekaitoktoklimo ibben jemen in jinen ajiri ro im aolep ritto ro emwij wujleplok air mour ilo congregation eo bwe remaroñ jibañ jodikdik ro ilo congregation eo air ilo nan, joñok, im rejetak joñan wõt air maroñ.

Ewi Wãwen Am Naj Kar Uak?

• Etke jemaroñ kõtmene bwe enaj wõr wãwen ko rej kabwer armij, im jej aikwij reilok ñan wõn im bõk jibañ jen e?

• Ewi wãwen an kar Jeremiah anjo ion ebwer meñe jerbal eo an ear bin kõmmane?

• Ta eo enaj ‘kalañliñ buruõd’ meñe jej bed iumin melejoñ ko?

[Pija eo ilo peij 18]

Jeremiah ear lemnak bwe ear dik wõt im jabwe an iminene jerbal einwõt juõn ri kanan

[Pija eo ilo peij 20]

Meñe rar matõrtõre e, Jeremiah ear jelã bwe Jehovah ear bed ibben einwõt “juõn eo elap an kajur”