Kwon Kaorõk Men In Lewõj Eo Am Kin Mour
“Bõtõktõkin Kraist, [enaj] karreo ami bõklikõt jen kõmõn ko remij bwe komin jerbal ñõn Anij ejmour.”—DRI HIBRU 9:14.
1. Ta eo ej kamol bwe elap ad kaorõk mour?
ELAÑE armij ro rar kajitõk ibbem kin jete wõnãn mour eo am, ta eo kwonaj uak? Elap ad kaorõk mour—eo ad make im an ro jet. Ñan kamole men in, jemaroñ kebak juõn doctor ñan jibañ kij ñe jej nañinmij ak ñe jej kakilen kij jen ien ñan ien. Jekõnan ejmour wõt. Enañin aolep ro rebwijwõlã ak emij rãjetair rejjab kõnan mij bareinwõt; rekõnan mour manlok.
2, 3. (a) Ta eddo eo Jabõn Kennan Ko 23:22 ej kalikar kake? (b) Ewi wãwen an eddo eo ilo Jabõn Kennan Ko 23:22 kitibuj Anij?
2 Joñan an aorõk mour kwoj watõke ej jelet bed eo am ibben armij ro jet. Ñan wanjoñok, Nan in Anij ej tel kij ilo an ba: “Kwon eoroñ jemõm, eo e ar keutak yuk, im kwon jab kejekron jinõm ñe e lilap.” (Jabõn Kennan Ko 23:22) Ñan “eoroñ” ej melelen elaplok jen ad baj roñ wõt nan ko; jabõn kennan in ej melelen ñan roñjake im bokake. (Exodus 15:26; Duteronomi 7:12; 13:18; 15:5; Joshua 22:2; Sam 81:13) Ta unin an Nan in Anij ba bwe jen eoroñ? Ejjab kinke jemem im jinim rej rittolok jen kwe im elaplok air iminene kin mour wõt. Un eo in bwe rar “keutak yuk.” Jet ukok in Bible eo ej ukõt eon in im ba: “Eoroñ jemem eo ear lewõj mour eo am.” Alikar bwe, elañe kwoj kaorõk mour eo am, kwoj eñjake bwe kwoj muri ñan eo ej unjen mour eo am.
3 Emol bwe, elañe kwoj juõn Christian emol, kwoj kile Jehovah einwõt Unleplep in mour eo am. Kin e kwoj “mour;” kwomaroñ “emmakit,” jerbal einwõt juõn men in kõmanman eo ewõr an eñjake; im kwoj “bed” kiõ im maroñ lemnak ak karõk kin ta eo kwonaj kõmmane ilju im jeklaj, ekoba mour ñan indio. (Jerbal 17:28; Sam 36:9; Ekklisiastis 3:11) Ekkar ñan Jabõn Kennan Ko 23:22, ej juõn men ejimwe ñan “eoroñ” Anij im bokake e, bõk juõn kõnan ñan melele im kõtlok bwe lemnak eo an kin mour en tel e jen an atartar ion kamelele ko jet kin wãwen mour.
Kwon Kautiej Mour
4. Ilo jinoin bwebwenato eo an armij, ewi wãwen kautiej mour ear erom juõn kajitõk elap an aorõk?
4 Ilo jinoin bwebwenato an armij, Jehovah ear kalikar bwe ear jab kõtlok an armij ro kajerbal (ak kokkure) mour ilo jabdewõt wãwen. Kin an lap an kamo im illu, Cain ear kokkure mour eo ejelok ruõn an Abel, jatin. Kwoj lemnak ke bwe ear wõr an Cain maroñ ñan kõmman bebe rot in kin mour? Ilo lemnak eo an Anij ejelok. Ear kajitõk ibben Cain: “Ta eo kwar kõmõne? Ainiken bõtõktõkin jãtõm ej lamij jen ene” eo. (Jenesis 4:10) Lale bwe bõtõktõkin Abel ion bũdej ear kõkkar kin mour eo an, eo me ear jemlok ilo mõkaj, im ear lamijlok ñan Anij bwe en idenwõne.—Dri Hibru 12:24.
5. (a) Ta kien eo emo Anij ear likit ilo ran ko an Noah, im ear jerbal ñan wõn ro? (b) Ilo wãwen et eo kien in ear juõn buñten ne eo eaorõk?
5 Elikin Ibwijleplep eo, armij ro ralitõk rar jino ilo juõn wãwen ekãl. Ilo juõn kejelã eo ear jerbal ñan armij otemjej, Anij ear kalikarlok lemnak eo an kin ewi joñan aorõkin mour im bõtõktõk. Ear ba bwe armij ro remaroñ mõñã kanniekin men in mour, ak ear likit kien in: “Men in mour otemjej rej makitkit ion lal kwomaroñ kañi. Mãr ko remaroro otemjej, ij lewõj ñan yuk. Ak kanniek ñe ekoba an—bõtõktõkin—kwojjab maroñ kañi.” (Genesis 9:3, 4, New World Translation) Jet Ri Jew ro rar lemnak bwe eon in ear kalikar bwe armij ro rar jab maroñ mõñã kanniek ak bõtõktõkin men in mour eo ej mour wõt. Ak ekar alikar tokelik bwe Anij ear bõprae armij jen air mõñã bõtõktõk ñan mour. Bareinwõt, kien eo an Anij me Noah ear kwaloke ear juõn buñten ne eaorõk ñan kõtõbrak karõk eo an eutiej kin bõtõktõk—juõn karõk enaj kar kõtlok bwe armij ro ren bõk mour indio.
6. Ikijen Noah, ewi wãwen an kar Anij kalikar lemnak eo an kin aorõkin mour?
6 Anij ear wõnmanlok: “Im emol I naj kajitõkin ir kin bõtõktõkin ami mour jen pein kiru otemjej I naj kajitõkin e im jen pein armij, aet jen pein jein im jãtin armij otemjej I naj kajitõkin mour an armij. Jabrewõt eo ej katorlok bõtõktõkin armij, armij e naj katorlok bõtõktõkin bwe ilo wãwen Anij, E ar kõmõn armij.” (Jenesis 9:5, 6) Kwomaroñ lo jen kejelã in ñan armij otemjej bwe Anij ej watõk bõtõktõkin armij einwõt mour eo an. Ri Kõmanman eo ej lelok mour ñan armij, im ejelok an jabdewõt armij maroñ ñan jolok mour eo, me bõtõktõkin ej jutak ikijen. Elañe, einwõt Cain, juõn armij emaroñ urõt armij, ewõr an Ri Kõmanman eo maroñ ñan “kajitõkin” kin mour eo an ri uror eo.
7. Etke jej aikwij itoklimo kin nan in kaiñi eo an Anij ñan Noah kin bõtõktõk?
7 Ilo kejelã eo an, Anij ear kaiñi armij ro bwe ren jab kajerbal bõtõktõk ilo juõn wãwen ejõkkar. Kwonañin kar lemnak ke kin ta unin an kar Anij ba eindein? Aet, ta eo ear bed ilo lemnak eo an Anij kin bõtõktõk? Emol bwe uak eo ej kitibuj juõn ian katak ko raorõk ilo Bible eo. Katak in ej juõn bedbed eaorõk ñan ennan eo an Christian, meñe elõñ dolul in kabuñ ko rar beek in karmijeteiki. Ta katak eo, im ewi wãwen ej kitibuj mour, bebe, im makitkit ko am?
Bõtõktõk—Ewi Wãwen Ad Kajerbale ilo Jimwe?
8. Ilo Kien eo, ta kien eo Jehovah ear likite kin wãwen kajerbal bõtõktõk?
8 Jehovah ear kalaplok kamelele ko an ilo tibdikin kin mour im bõtõktõk ke ear lelok Kien ko an ñan Moses. Ilo ien eo ear kõmmane men in, ear bar bõk juõn buñten ne ñan kajejjet kitien karõk eo an. Bõlen kwoj jelã bwe Kien eo ear kwalok aikwij eo ñan katok ñan Anij, kin men ko einwõt ine ko, oil, im wain. (Livitikõs 2:1-4; 23:13; Bwinbwin 15:1-5) Rar katok kin men in mour ko bareinwõt. Kin men in katok kein Anij ear ba: “Mour in kõniek ej ilo bõtõktõkin im I ar lewoj ñõn kom ion lokatok eo bwe en kõmõn kilajrõk ñõn ami bwe bõtõktõk men eo ej kõmõn kilajrõk kin mour. Kin men in I ar ba ñõn ro nejin Israel, ejelok juõn iami en mõña bõtõktõk.” Jehovah ear kakobaiktok im ba bwe elañe jabdewõt armij, ej einwõt juõn ri kakkidudu ak ri kallip, ear mõn juõn men in mour ñan mõñã, ear aikwij katorlok bõtõktõkin ion lal im kalibubuik e kin bũdej. Lal in ej eran neen, im ilo an lutõklok bõtõktõk eo ion lal, armij eo ej kile bwe mour ej jeblaklok ñan Ri Letok-Mour eo.—Livitikõs 17:11-13; Aiseia 66:1.
9. Ta wãwen eo wõt Kien eo ear kakien bwe ren kajerbal bõtõktõk, im kar ta unin air kõmman men in?
9 Kien in ear jab juõn mantin kabuñ bajjek im ejelok aorõkin ñan kij. Kwar lo ke unin an Ri Israel ro jab mõñã bõtõktõk? Anij ear ba: “Kin men in I ar ba ñõn ro nejin Israel, ejelok juõn iami en mõña bõtõktõk.” Kar ta unin? “I ar lewoj ñõn kom ion lokatok eo bwe en kõmõn kilajrõk ñõn ami bwe bõtõktõk men eo ej kõmõn kilajrõk kin mour.” Kwoj lo ke wãwen an nan kein kalikar kin unin an kar Anij jiroñ Noah bwe armij ro ren jab mõñã bõtõktõk? Ri Kõmanman eo ear beek ñan leliñlok aorõkin bõtõktõk, ilo an kajerbale ilo juõn wõt wãwen ñan lomoren elõñ armij. Ear bõk juõn jikin eaorõk ñan kalibubuik ak jeorlok jerawiwi ko. Inem iumin Kien eo, kar wãwen eo wõt Anij ear kõtlok bwe ren kajerbal bõtõktõk ej ñan kabũtũktũk lokatok eo ñan lomoren Ri Israel ro, me rar bukõt Jehovah ñan jolok bwid ko air.
10. Etke bõtõktõkin men in mour ear jab kanuij jeorlok bwid, ak katok ko ekkar ñan Kien eo ear kakememej ir kin ta?
10 Karõk in kin kajerbal bõtõktõk ñan jeorlok jerawiwi ear jab juõn karõk einjuõn jen kabuñ eo an Christian. Ke ear jitõñlok ñan karõk in ekwojarjar ilo Kien eo, Christian ri jilek Paul ear je: “Ilo kien eo, I nañin maroñ in ba, bwe rej karreo kin bõtõktõk men ko otemjelok, im elañe ejelok katorlok bõtõktõk inem ejelok jeorlok.” (Dri Hibru 9:22) Paul ear kalikar bwe men in katok ko rar aikwiji rar jab kõmman bwe Ri Israel ro ren wãppen, im ejelok air jerawiwi. Ear je: “Ilo men in katok eor kememej kin jerawiwi yiõ otemjej. Bwe bõtõktõkin kau koman im goat ko e ban jeorlok jerawiwi ko.” (Dri Hibru 10:1-4) Mekarta, men in katok rot kein ekar wõr tokjeir. Rar kakememej Ri Israel ro bwe rar jerawiwi im rar aikwij juõn men elaplok ñan jeorlok ilo likieo bwid ko air. Ak elañe bõtõktõk eo ear jutak kin mour eo an men in mour ko rar jab lukkun maroñ jeorlok bwid ko an armij ro, emaroñ kar wõr ke jabdewõt bõtõktõk emaroñ kõmman eindein?
Mejelan eo an Ri Letok-Mour
11. Ewi wãwen ad jelã bwe katak ko kin bõtõktõkin men in mour ear jitõñlok ñan juõn men?
11 Emol bwe Kien eo ear jitõñlok ñan juõn men elaplok an bolemen ñan kajejjet kitien ankil an Anij. Paul ear kajitõk: “Inem ta eo Kien?” Ear uak: “E ar koba kin jerawiwi ko, ñõn ien ine eo ej itok Eo emwij kwalok kalimur ñõn E ke ear likit e kin enjel ro ilo pein juõn dri kilajrõk [Moses].” (Dri Galetia 3:19) Ilo wãwen in lok wõt, Paul ear je: “Bwe kien eo, ke iloan anõñin men ko re naj itok, jab eirwõt, e ban kowãppen ro rej rej kebaktok ñõn e kin men in katok ko rej katok kaki yiõ otemjej.”—Dri Hibru 10:1.
12. Ikijen bõtõktõk, ewi wãwen ad maroñ melele kin wãwen an kalikarlok karõk eo an Anij??
12 Einwõt emwij ad jelã jen katak in bwe, ilo ran ko an Noah Anij ear kejelã bwe armij ro remaroñ kar mõñã kanniek, ak rar jab maroñ mõñã bõtõktõk. Tokelik, Anij ear ba bwe “mour in kõniek ej ilo bõtõktõkin.” Aet, ear watõk bwe bõtõktõk ear jutak kin mour im ba: “I ar lewoj ñõn kom [bõtõktõk] ion lokatok eo bwe en kõmõn kilajrõk ñõn ami.” Bõtab, enaj kar wõr bar juõn men elaplok an aibujuij ilo karõk eo an Anij eo ej alikarlok. Kien eo ear annañelok men ko remõn rej itok. Ta men ko?
13. Etke mij eo an Jesus ej aorõk?
13 Mol eo ear bedbed ion mij eo an Jesus Christ. Kwoj jelã bwe armij ro rar kaeñtan Jesus im totoik e ion alal eo. Ear mij einwõt juõn ri kowadoñ. Paul ear je: “Bwe ke j’ar mõjino, ilo ien ekar, Kraist e ar mij kin ro renana. . . . Anij ej kwalok karkarin An yokwe ñõn kij, ilo men in ke j’ar dri jerawiwi, Kraist e ar mij kin kij.” (Dri Rom 5:6, 8) Ilo an mij kin kij, Christ ear lelok juõn binmour ñan kalibubuik bwid ko ad. Binmour in ej unleplep in ennan eo an Christian. (Matu 20:28; Jon 3:16; 1 Dri Korint 15:3; 1 Timote 2:6) Ta kõtan eo ikõtan bõtõktõk im mour, im ewi wãwen ej jelet mour eo am?
14, 15. (a) Ewi wãwen an jet ukok ko ilo Dri Epesõs 1:7 kalikar kin mij eo an Jesus? (b) Ta mol eo ilo Dri Epesõs 1:7 jet armij remaroñ kajekdone?
14 Jet kabuñ ko elaplok air kwalok nan kin mij eo an Jesus, im ri kalor ro air rej ba bwe “Jesus ear mij kin ña.” Lale wãwen an jet ukok in Bible ko ukõt Dri Epesõs 1:7 “Ilo e im kin mij eo an jej mour, melelen men in bwe, ear jeorlok bwid ko ad.” (The American Bible, by Frank Scheil Ballentine, 1902) “Kin mij eo an Christ, jej bõk anemkwoj, im jolok bwid ko ad.” (Today’s English Version, 1966) “Ej ilo Christ im ilo an katok mour eo an bwe jej bõk anemkwoj, juõn anemkwoj jen jerawiwi ko ad.” (The New Testament, by William Barclay, 1969) “Ikijen mij eo an Christ emwij an jeorlok jerawiwi ko ad im bed ilo anemkwoj.” (The Translator’s New Testament, 1973) Kwomaroñ lo jen ukok kein bwe elap air kwalok kin mij eo an Jesus. ‘Ak,’ jet armij remaroñ ba bwe, ‘mij eo an Jesus ej lukkun aorõk. Inem, ta likjap eo jen ukok kein?’
15 Emol bwe, elañe jaar atartar ion ukok kein, kwomaroñ jab lo juõn men in aikwij eo elap an aorõk, im likjap in emaroñ kadiklok am melele kin ennan eo an Bible. Ukok rot kein rej noje juõn nan in kajin Greek ilo Epesõs 1:7 ej melelen “bõtõktõk.” Inem, elõñ ukok in Bible ko, einwõt New World Translation, rej ebak ñan ukok eo moktata jen ukok ko jet ñe ej ba: “Ikijen bõtõktõkin binmour eo an ear kanemkwoj kij, aet, ear jeorlok bwid ko ad, ekkar ñõn mweiuk ko in joij eo an.”
16. Nan eo “bõtõktõkin” en kar kalikar ta ilo lemnak eo ad?
16 Nan eo “bõtõktõkin” elap an wõr melelen im en kar jibañ kij ñan lukkun kalmenlokjen kake. Elõñlok men ko kar aikwiji jen mij eo an juõn armij, meñe ewãppen einwõt kar Jesus. Ear kajejjet kitien men eo ear annañelok ilo Kien eo, elaptata men eo ear walok ilo Ran in Kilajrak eo. Ilo ran eo ejejuan, men in mour ko rar karõk lok iman rar katok kaki. Inem priest eo elap ear bõk jet bõtõktõkiir ke ear deloñlok ilo jikin Kwojarjar Otem Kwojarjar ilo imõn kabbed ak temple eo, im ear kwaloke iman mejen Anij.—Exodus 25:22; Livitikõs 16:2-19.
17. Ewi wãwen an kar Jesus kajejjet kitien men eo Ran in Kilajrak eo ej kõkkar kake?
17 Jesus ear kajejjet kitien men eo Ran in Kilajrak eo ear annañeloke, ekkar ñan kamelele eo an Paul. Moktata, ear ba bwe priest eo elap ilo Israel ear bõklok bõtõktõk ibben na iloan jikin Kwojarjar Otem Kwojarjar juõn alen ilo juõn yiõ im “katok kake kin e im kin bwir ko an armij” ro. (Dri Hibru 9:6, 7) Ñan kajejjet kitien men eo ear kõkkar kake ilo Ran in Kilajrak eo, elikin an kar jerkakbiji einwõt juõn jitõb, Jesus ear wanliñlok ñan lañ. Einwõt juõn jitõb, eo ejelok kanniek im bõtõktõk ilo enbwinin, ear “walok iman mejen Anij kin kij.” Ta eo ear lelok ñan Anij? Ear jab juõn men ilo kanniek ak ear juõn men elukkun aorõk. Paul ear kamelele: Ke “Kraist e ar itok [einwõt] pris elap . . . jab kin bõtõktõkin mõke emwij An dreloñ iloan jikin kwojarjar eo, im jibarek lomor in drio. Bwe elañe bõtõktõkin kau koman ko im goat ko . . . r’ar kokwojarjar ñõn karreoik kõniek. Bõtõktõkin Kraist, eo E kwojarjar wõt im E ar mõke katok kin E ñõn Anij ilo Jitõb Kwojarjar ej in drio, ejamin kanuij laplok an karreo ami bõklikõt jen kõmõn ko remij bwe komin jerbal ñõn Anij ejmour ke?” Aet, Jesus ear lelok ñan Anij tokjen bõtõktõkin eo ewõr kajur in mour ie.—Dri Hibru 9:11-14, 24, 28; 10:11-14; 1 Piter 3:18.
18. Etke nan ko ilo Bible eo kin bõtõktõk ren aorõk ñan Ri Christian ro rainin?
18 Mol in jen Anij ej kõtlok bwe jen melele ñan juõn joñan elap kin ta eo Bible ej ba kin bõtõktõk—etke Anij ej lemnak ilo wãwen dein, en kar ta lemnak eo ad kin bõtõktõk, im etke jej aikwij kautiej kien ko Anij ear likiti kin wãwen kajerbal bõtõktõk eo. Ñe kwoj konono Jeje ko an Christian ilo kajin Greek, kwonaj lo elõñ jeje ko kin bõtõktõkin Christ. (Lale box eo.) Jeje kein rej kalikar bwe Ri Christian ro kajjojo rej aikwij tõmak ilo “bõtõktõkin [Jesus].” (Dri Rom 3:25) Jeorlok bwid im bed ilo ainemõn ibben Anij rej wawa ion “bõtõktõkin [Jesus]” wõt eo emwij an katorlok. (Dri Kolosse 1:20) Men in emaroñ mol ñan ro me Jesus ear kõmman juõn bujen ejejuan ibbeir bwe ren iroij ibben ilo lañ. (Luk 22:20, 28-30; 1 Dri Korint 11:25; Dri Hibru 13:20) Men in ej mol bareinwõt ibben “jar eo elap” rainin, ro me renaj le im mour jen “iñtan eo elap” eo ej itok wõt im bõk mour indio ilo juõn paradise ion lal. Ilo kõkkar, rej ‘kwoli nuknuk ko air ilo bõtõktõkin Lam eo.’—Reveles̃õn 7:9, 14.
19, 20. (a) Etke Anij ear kãlet ñan kadiklok wãwen kajerbal bõtõktõk, im en kar ewi wãwen lemnak eo ad kin men in? (b) Ta eo jej aikwij itoklimo in jelã kake?
19 Alikar, ewõr juõn melele ejejuan kin bõtõktõk iman mejen Anij. Ej aikwij wõr ibbed bareinwõt. Ri Kõmanman eo, me ej itoklimo kin mour, ej tellokin bõk maroñ eo ñan kaiñi armij ro kin ta eo emaroñ kõmmane kin bõtõktõk. Kin an itoklimo kin mour eo ad, ear beek in kajerbal bõtõktõk ilo juõn wãwen elap an aorõk, im ej lelok mour indio. Wãwen eo ear kitibuj bõtõktõkin Jesus eo eaorõk. Jemaroñ lukkun kamolol bwe Jehovah Anij ear emmakit ilo juõn wãwen emõn ñan jibañ kij ilo an kajerbal bõtõktõk—bõtõktõkin Jesus—ñan lomoren armij! Im en kar lap ad kamolol Jesus kin an katorlok bõtõktõkin im katok mour eo an kin kij! Emol, jemaroñ melele kin nan ko an ri jilek Jon: “Ñõn Eo e ar yokwe kij, im kõtlok kij jen jerawiwi ko ad kin bõtõktõkin; Im E ar kõmõn bwe jen kiñ im pris ro ñõn An Anij im Jemen; ñõn E en aibujuij im kajur potata in drio im in drio. Amen.”—Reveles̃õn 1:5, 6.
20 Anij eo ad emeletlet otem meletlet im Ri Letok Mour ear lemnak kin wãwen lomor rot in jen etto. Kin men in, jemaroñ kajitõk, ‘Ewi wãwen men in emaroñ jelet bebe im makitkit ko ad?’ Katak eo tok ilal enaj uake kajitõk in.
Ewi Wãwen Am Naj Kar Uak?
• Ta eo jemaroñ katak kin lemnak eo an Anij kin bõtõktõk jen bwebwenato ko rej kitibuj Abel im Noah?
• Ilo Kien eo, ta eo ear kakien kake kin wãwen kajerbal bõtõktõk, im etke?
• Ewi wãwen an kar Jesus kajejjet kitien men eo Ran in Kilajrak eo ear kõkkar kake?
• Ewi wãwen an bõtõktõkin Jesus maroñ lomoren kij?
[Bo̦o̦k eo ilo peij 12]
BÕTÕKTÕKIN WÕN EJ LOMOREN ARMIJ?
“Komin kejbãrok kom im lale aolepen bwij eo Jitõb Kwojarjar e ar kãlet kom einwõt overseer ro, bwe komin shepherde congregation eo an Anij, eo E ar wiaik kin bõtõktõkin Nejin.”—Acts 20:28, NW.
“Inem en laplok, ien in ke emwij kowãnik kij ilo bõtõktõkin, naj lomoren kij jen illu kin E.”—Dri Rom 5:9.
Kar “ejelok kejatdrikrik ibemi, im kom [ar] jibil jen Anij ilo lõl. A kiõ, ilo Kraist Jisõs, kom ro re kin etolok emwij kebake kom ilo bõtõktõkin Kraist.”—Dri Epesõs 2:12, 13.
“Bwe ebuñburuen Anij bwe ilo E men otemjej remõn potata ren ber im bwe, ke emwij An kõmõn ainemõn kin bõtõktõkin alal in eñtan eo An.”—Dri Kolosse 1:19, 20.
“Inem, ro jãtiõ, . . . jej beran in dreloñ iloan jikin kwojarjar eo kin bõtõktõk in Jisõs.”—Dri Hibru 10:19.
“Ar jab binmour ñõn kom kin men in ijurwewe ko . . . jen ami mour bata emwij likite ñõn kom jen ro jimami; a kin bõtõktõk e aurõk, einwõt an lam ejelok notan im ekwojarjar, aet eo an Kraist.”—1 Piter 1:18, 19.
“Elañe jej etetal ilo maram, einwõt Ej ilo maram, jej kõmao iben dron, im bõtõktõkin Jisõs Nejin ej karreoik kij jen jerawiwi otemjej.”—1 Jon 1:7.
“Ekar ñõn Kwe bwe kwon bõk buk eo, im kebellok sil ko an, bwe emwij mõn Yuk, im Kw’ar wiaik ñõn Anij ilo bõtõktõkõm armij jen bwij otemjej im konono otemjej, im driloabjen otemjej, im ailiñ otemjej.”—Reveles̃õn 5:9.
“Eo ej kinaklok ir iman an Anij ran im boñ. Im r’ar bõk anjo ion kin bõtõktõkin Lam, im kin nan in air kennan.”—Reveles̃õn 12:10, 11.
[Pija eo ilo peij 10]
Ikijen Kien eo, Anij ear kalikar bwe bõtõktõk ear kein jeorlok bwid
[Pija eo ilo peij 11]
Ikijen bõtõktõkin Jesus, ear lomoren elõñ armij