‘Komin Illok Im Kõmman Ri Kalor Ro’

“Emwij letok ñõn Iõ kajur otemjej i lõñ im i lõl. Inem komin ilok, im kõmõn dri ailiñ ko otemjej bwe ren dri kalora.”​—MATU 28:18, 19.

1, 2. (a) Ta jerbal eo Jesus ear lelok ñan ri kalor ro an? (b) Ta kajitõk ko ikijen kien ko an Jesus jenaj uaki?

KAR juõn ran ilo ien man rak ilo Israel ilo 33 C.E., im ri kalor ro an Jesus rar bed ibben don ion juõn tol ilo Galilee. Iroij eo air, Jesus ear bojak in jeblak ñan lañ, ak ear wõr juõn men eaorõk ear aikwij in kõmmane mokta. Jesus ear aikwij in lelok ñan ir juõn jerbal. Ta jerbal eo? Ewi wãwen air naj kar uak? Im ewi wãwen jerbal in air ej jelet kij rainin?

² Nan ko an Jesus rej bed ilo Matu 28:18-​20: “Emwij letok ñõn Iõ kajur otemjej i lõñ im i lõl. Inem komin ilok, im kõmõn dri ailiñ ko otemjej bwe ren dri kalora, im baptais ir ilo etan Jema im Nejin im Jitõb Kwojarjar; im katakin ir bwe ren bokake nan ko otemjej I ar jiroñ kom; im lo, Ij ber ibemi ien otemjej ñõn jemlokõn lõl.” Jesus ear konono kin “kajur otemjej,” “dri ailiñ ko otemjej,” “nan ko otemjej,” im “ien otemjej.” Nan in kaiñi ko an rar kitibuj emen wãwen ko rar bõkliñtak jet kajitõk ko raorõk, im jemaroñ kakobabaiki ilo kajitõk kein emen etke? ia? ta? im ñããt? Jen etale kajitõk kein rekajjojo.a

“Emwij Letok ñõn Iõ Kajur Otemjej”

3. Etke jej aikwij bokake kien eo ñan kõmman ri kalor ro?

³ Moktata, etke jej aikwij bokake kien eo ñan kõmman ri kalor ro? Jesus ear ba: “Emwij letok ñõn Iõ kajur otemjej i lõñ im i lõl. Inem komin ilok, im kõmõn dri ailiñ ko otemjej bwe ren dri kalora.” Nan eo “Inem” ej jitõñlok ñan un eo elap unin ad aikwij bokake kien in. Ej kinke Jesus, eo ear kwalok kien in, ear bõk “kajur otemjej.” Ewi joñan kajur eo an?

4. (a) Ewi joñan kajur eo an Jesus? (b) Ewi wãwen an melele eo ad kin kajur eo an Jesus maroñ jelet lemnak eo ad kin kien eo ñan kõmman ri kalor ro?

⁴ Jesus ewõr an maroñ ion congregation eo an, im jen 1914 mantak ear kajur ion Ailiñ eo ekãl Anij ear kajutake. (Dri Kolosse 1:​13; Reveles̃õn 11:15) Ej archenjel eo im kin men in ej kajur ion elõñ buki million enjel ro ilañ. (1 Dri Tessalonika 4:​16; 1 Piter 3:​22; Reveles̃õn 19:14-​16) Jemen ear kamaroñ e bwe en kokkure “kajur otemjej an iroij rõn kab kieir im air maroñ otemjej” rej jumae kien ko rewãnik. (1 Dri Korint 15:24-​26; Dri Epesõs 1:​20-​23) Kajur eo an Jesus ejjab jelet ro remour wõt. Ej Dri Ekajet ro remour im ro remij” bareinwõt ewõr kajur eo me Anij ear leloke ñan kajerkakbijeik ro rar mij. (Jerbal 10:42; Jon 5:​26-​28) Emol bwe jej aikwij watõk juõn kien jen Eo ewõr kain kajur rot in einwõt juõn kien elap an aorõk. Eñin unin, jej mõnõnõ in kautiej im bokake kien eo an Christ ñan ‘illok im kõmman dri kalor ro.’

5. (a) Ewi wãwen an kar Peter bokake nan ko an Jesus? (b) Kin an Peter bokake nan in jiroñ ko an Jesus ear tellok ñan jerammõn et eo?

⁵ Ilo jinoin jerbal in kwalok nan eo an ion lal, Jesus ear katakin ri kalor ro an ilo juõn wãwen ekabwilõñlõñ bwe elañe armij ro rar kile maroñ eo an im bokake kien ko an enaj kar tellok ñan air bõk jerammõn ko. Juõn ien ear jiroñ Peter, ri eñwõd eo: “Kwon wõnmetolok im drorlol ok ko im añwõr.” Emol bwe Peter ear jelã bwe ekar ejelok ek, inem ear jiroñ Jesus: “Dri Kaki, kim ar añwõr aolepen boñ, im ejelok kwonam.” Bõtab, Peter ear ba ilo eta buruen: “a kin Am in nan I naj drorlol ok ko.” Elikin an Peter bokake nan in kaiñi eo an Christ, ear eñwõd “elõñ iik.” Ilo bwilõñ, Peter ear “buñ na i buken Jisõs, im ba, Kwon ilok jen Iõ; bwe ña armij enana, O Iroij.” Ak Jesus ear uak: “Kwon jab mijõk, jen ien in kwonaj druok armij.” (Luk 5:​1-10; Matu 4:​18) Ta eo jej katak jen bwebwenato in?

6. (a) Ta eo bwebwenato eo kin eñwõd ek ko ilo kabwilõñlõñ ej wanjoñok kake kin bokake rot eo Jesus ej aikwiji? (b) Ewi wãwen ad maroñ kajeoñe Jesus?

⁶ Jesus ear lelok ñan Piter, Andrew, im ri jilek ro jet jerbal eo einwõt “dri añwõr armij,” jab mokta, ak elikin air eñwõd elõñ ek ko. (Mark 1:​16, 17) Alikar, Jesus ear jab kõnan bwe ren bokake ilo jajelokjen. Ear kamelele ilo kõmmanwa kin unin an lõmaro kar aikwij bokake e. Einwõt ke rar lo tokjen bokake Jesus ke rar drorlol ok ko air im eñwõd elõñ ek ko, eindein ilo air bokake kien ko an Jesus ñan ‘eñwõd armij’ enaj kar tellok ñan elõñ jerammõn ko relap. Ilo air tõmak kin aolepen burueir, ri jilek ro rar uak ilo jimwe. Ilo jemlokin bwebwenato eo ej ba: “Ke emwij air tartok wa ko ñõn ene, rej likit men otemjej im lor E.” (Luk 5:​11) Rainin, ñe jej rejañ ro jet bwe ren bõk kunair ilo jerbal in kõmman ri kalor ro, jej kajeoñe Jesus. Jejjab kõnan bwe armij ro ren baj kõmmane wõt men eo jej jiroñ ir bwe ren kõmmane, ak , jej kamelele ilo kõmmanwa kin unin air aikwij bokake kien ko an Christ.

Un ko Rejimwe im Karel Buruen Armij

7, 8. (a) Ta jet ian un ko ilo Bible unin ad aikwij kwalok nan kin Ailiñ eo im kõmman ri kalor ro? (b) Ta eon eo ilo Bible eo elap an kamakit buruõm ñan wõnmanlok wõt ilo jerbal in kwalok nan? (Lale footnote eo.)

⁷ Kinke jej kile maroñ eo an Christ, jej bõk kunad ilo jerbal in kwalok nan kin Ailiñ eo im kõmman ri kalor ro. Bar ta un ko rej bedbed ion Bible unin ad kõmman jerbal in im jemaroñ kwalok ñan ro rej mõnõnõ in kõmman jerbal ko remõn? Lale lemnak ko an jejjo Ri Kennan ro retiljek an Jehovah ilo ene ko rekajjo jen don, im lale kin wãwen an eon ko ilo paragraph ko rejetak uak ko air.

⁸ Roy, ear baptais ilo 1951: “Ke I ar wujleplok mour eo aõ ñan Jehovah, I ar kallimur bwe In karejar ñan e toan wõt aõ mour. Ikõnan kajejjet kitien kallimur eo aõ.” (Sam 50:14; Matu 5:​37) Heather, ear baptais ilo 1962: “Ñe ij lemnak kin aolep men Jehovah ear kõmmane ñan iõ, Ikõnan kwalok aõ kamolol ñan e ilo aõ karejar ñan e ilo tiljek.” (Sam 9:​1, 9-​11; Dri Kolosse 3:​15) Hannelore, ear baptais ilo 1954: “Ñe jej kwalok nan kajjojo ien, enjel ro rej jurake kij​—juõn jerammõn elap!” (Jerbal 10:30-​33; Reveles̃õn 14:​6, 7) Honor, ear baptais ilo 1969: “Ñe ien ekajet eo an Jehovah ej itok, Ijjab kõnan bwe jabdewõt ri turuõ en naruõn Jehovah im Ri Kennan ro an kin air jerwane ir im ba, “Ijañin roñ kin nan in kakkõl in.” (Ezekiel 2:5; 3:​17-​19, NW; Dri Rom 10:16, 18) Claudio, ear baptais ilo 1974: “Ñe jej kwalok nan, jej bed ‘iman mejen Anij’ im ‘ibben Christ.’ Ej juõn men ekabwilõñlõñ! Ñe jej kwalok nan, jej bed ibben ro Jerad remõntata.”​—2 Dri Korint 2:​17.b

9. (a) Ta eo bwebwenato eo kin an Peter im ri jilek ro jet eñwõd ek ej kalikar kin un ko remõn unin air bokake Christ? (b) Ta un eo ejimwe unin ad bokake Anij im Christ ilo ran kein, im etke?

⁹ Bwebwenato eo kin juõn tõbrak elap in eñwõd ej kwalok bareinwõt kin aorõkin ad bõk juõn lemnak ejimwe ñan bokake Christ​—ej yokwe. Ke Peter ear ba, “Kwon ilok jen iõ bwe ña armij enana,” Jesus ear jab illok, im ear jab ekajete Peter kin jabdewõt bwid. (Luk 5:8) Jesus ear jab notaik Peter kin an akwelap bwe Jesus en illok jen e. Jen men in, ilo joij, Jesus ear uak: “Kwon jab mijõk.” Mijak eo ejõkkar enaj kar juõn un ejjab jimwe unin an bokake Christ. Ak, Jesus ear jiroñ Peter bwe e im ri jerbal ro mõttan renaj kar jerbal einwõt ri eñwõd armij. Ran kein, kij bareinwõt jejjab kamijak armij, kaburomõj ir, kajook ir, ak jibed ir bwe ren bokake Christ. Bokake eo eyu ej bedbed ion yokwe ñan Anij im Christ wõt enaj kamõnõnõik buruen Jehovah.​—Matu 22:37.

“Kõmõn bwe Dri Ailiñ ko Otemjej Ren Dri Kalor ro”

10. (a) Ta tibdikin kien eo an Jesus ñan kõmman ri kalor kar juõn abañ elap ñan ri kalor ro an? (b) Ewi wãwen an kar ri kalor ro uake nan in kaiñi eo an Jesus?

¹⁰ Kajitõk eo kein karuo kien eo an Christ ear bõkliñtak ej, Ia eo ren kõmmane jerbal in kõmman ri kalor ro ie? Jesus ear jiroñ ri kalor ro an: “Komin kõmõn bwe dri ailiñ ko otemjej ren dri kalora.” Mokta jen ien an Jesus jino kwalok nan, rar karuwaineneik ri ailiñ ko otemjej elañe rar itok ñan Israel ñan karejar ñan Jehovah. (1 Kiñ Ro 8:​41-​43) Elaplok an Jesus kar kwalok nan ibben Ri Jew ro jen ro jet, ak kiõ ear jiroñ ri kalor ro an bwe ren illok ñan ri ailiñ ro otemjej. Emol bwe, jikin eñwõd armij, ak jikin kwalok nan, eo an ri kalor ro ekar einwõt juõn “lwe” edik​—ñan Ri Jew ro wõt​—ak mõttan jidik enaj kar koba aolepen “lometo” in armij. Meñe oktak in ear juõn aitwerõk elap ñan ri kalor ro an, rar bokake ilo mõnõnõ nan in kaiñi ko an Jesus. Diklok jen 30 yiõ elikin an Jesus mij, ri jilek Paul ear maroñ je bwe rar kwalok nan kin news eo emõn jab ñan Ri Jew ro wõt ak bareinwõt “ro otemjej rej ber iomin lõñ.”​—Dri Kolosse 1:​23.

11. Ta laplok eo kin ‘jikin eñwõd ko’ ear walok jen tujinoin ebeben eo kein ka 20?

¹¹ Ilo ran kein, emwij ad lo juõn laplok kin jikin kwalok nan einlok wõt in. Ilo jinoin ebeben eo kein ka 20, ‘jikin eñwõd armij’ ear walok ilo jejjo ene ko. Ak, ilo ien eo ri kalor ro an Christ rar kajeoñe joñok eo an Ri Christian ro ilo ebeben eo kein ka-juõn im ilo kijejeto rar kalaplok jikin kwalok nan ko air. (Dri Rom 15:20) Ilo jinoin yiõ ko 1930, rar kõmman ri kalor ro ilo enañin jibuki ailiñ ko. Rainin, jikin ‘eñwõd armij’ ear laplok ñan 235 ailiñ ko.​—Mark 13:10.

“Jen Konono ko Otemjej”

12. Ta abañ eo kanan eo ilo Zechariah 8:​23 ear kalikar kake?

¹² Kõmman ri kalor ro ilo ailiñ ko otemjej ej juõn aitwerõk jab kinke elõñ territory ko wõt ijo ak kinke elõñ kajin ko rej konono ilo ailiñ kein. Ikijen ri kanan eo Zechariah, Jehovah ear kanan: “Joñoul armij jen konono in ailiñ ko otemjej renaj jibwe nuknuk eo an juõn Ri Jew, im ba: ‘Kimnaj etal ibbemi, bwe kimar roñ bwe Anij ej ibbemi.” (Zechariah 8:​23, NW) Ilo juõn joñan elap an jejjet kitien kanan in, “Ri Jew” eo ej kõkkar kin bwen Christian ri kabit ro, ak “joñoul armij” ro rej kõkkar kin “jar eo elap.”c (Reveles̃õn 7:​9, 10; Dri Galetia 6:​16) Jemaroñ lo jar in elap an ri kalor ro an Christ ilo elõñ ailiñ ko, im einwõt an kar Zechariah kejelã kake, renaj konono elõñ kajin ko. Bwebwenato eo an armij ro an Anij ilo ran kein ej kalikar ke wãwen in ñan kõmman ri kalor ro? Aet.

13. (a) Ta karõk ko ikijen kajin ko rar walok ibwiljin armij ro an Anij ilo ran kein? (b) Ewi wãwen an kumi in ri karejar eo etiljek kar emmakit eo ñan kabwe aikwij eo kin ekan ko lor jitõb ilo elõñ kajin ko? (Kobaike box eo “Book ko ñan Ro Rebilo.”)

¹³ Ilo 1950 kajin eo moktata an 3 ian 5 Ri Kennan ro an Jehovah ibelakin lal kar English. Ilo 1980 joñan in ear oktaklok ñan 2 ian 5, im ilo ran kein kajin eo elap 1 ian 5 Ri Kennan ro rej konono ej kajin English. Ewi wãwen kumi in ri karejar eo etiljek im meletlet ear anjo ion oktak in konono bar juõn kajin ijellokin kajin English? Rar anjo ion oktak in ilo air lelok ekan ko lor jitõb ilo elõñlok kajin ko. (Matu 24:45) Ñan wanjoñok, ilo 1950 rar kõmmani book im magazine ko ilo 90 kajin ko, ak ran kein oran kajin kein ear laplok ñan enañin 400 kajin ko. Laplok in ñan jibañ armij ro rej konono ilo elõñ kajin ko ear ke lo tõbrak? Aet! Enañin 5,000 armij ro ‘jen konono otemjej’ rej erom ri kalor ro an Christ ilo kajjojo week ilo yiõ eo! (Reveles̃õn 7:9) Im laplok in ej wõnmanlok wõt. Ilo jet ailiñ ko “ok” ko rej obrak kin ek ko!​—Luk 5:6; Jon 21:6.

Juõn Jerbal Ekamõnõnõ—​Kwomaroñ Ke Bõk Kunam Ie?

14. Ewi wãwen ad maroñ jibañ armij ro rej konono bar juõn kajin ilo bukwon eo ad? (Kobaike box eo “Kajin Ro Rejaroñroñ im Kõmman Ri Kalor.”)

¹⁴ Ilo elõñ ailiñ ko, ke armij ro jen ailiñ ko jet rar emmakit ñan ijo, ear bõktok ñan ro rej jokwe ijo juõn aikwij elap ñan kõmman bwe armij rein jen ‘konono otemjej’ ren ri kalor ro. (Reveles̃õn 14:6) Ewi wãwen ad maroñ jibañ ro ilo bukwon eo ad rej konono bar juõn kajin jen kajin eo ad? (1 Timote 2:4) Jemaroñ kajerbal kein eñwõd ko remõn, ilo kõkkar. Jemaroñ lelok magazine im book ko ilo kajin eo rej konono. Elañe emaroñ, jen karõk bwe juõn ri kwalok Ri Kennan eo ej konono ilo kajin eo an en lolok ir. (Jerbal 22:2) Kiõ ebidodolok ad kõmmane karõk kein jen mokta, kinke elõñ Ri Kennan ro an Jehovah rar jino katak bwe ren konono ilo bar juõn kajin ijellokin kajin eo air bwe ren jibañ ro ruwamaejet bwe ren erom di kalor ro an Christ. Report ko rej kwalok bwe jibañ rot in ej juõn jerbal ekamõnõnõ.

15, 16. (a) Ta wanjoñok ko rej kalikar bwe elap tokjen jibañ ro rej konono bar juõn kajin? (b) Ta kajitõk ko ikijen kwalok nan ilo juõn jikin rej konono bar juõn kajin ie jemaroñ lemnak kake?

¹⁵ Lemnak kin ruo wanjoñok ko jen ailiñ in Netherlands, ijo rej kwalok nan kin Ailiñ eo ilo 34 kajin ko. Juõn leo im lio ri belele rej Ri Kennan ro an Jehovah rar mõnõnõ in etal im kennan ibben armij ro rej konono kajin Poland bwe ren ri kalor ro. Joñan an lap tõbrak kin jerbal eo air leo Ri Kennan eo ear kadiklok joñan awa ko ilo jikin jerbal eo an bwe en bõk bar juõn ran ilo kajjojo week ñan katak Bible ibben ro rar itoklimo. Ejjabto tokelik, leo im lio ri belele rar katak ibben elõñlok jen 20 ri katak Bible ro ilo kajjojo week. Rar ba: “Jerbal in kwalok nan eo am ej kamõnõnõik kim.” Ro rej kõmman ri kalor ro an Christ elaplok air mõnõnõ ñe ro rej roñjake mol ko an Bible ilo kajin eo air make rej kwalok air kamolol kin men in. Ñan wanjoñok, ilo juõn kwelok ilo kajin Vietnam, juõn lõllab ear jutak im kajitõk elañe emaroñ konono. Den in kemjalal ear toor jen mejen, ke ear jiroñ Ri Kennan ro: “Kom kanuij emol kin ami kate wõt in katak kajin eo aõ meñe ebin katak kake. Elap aõ kamolol kin elõñ men ko rekabwilõñlõñ I ar katak kaki ilo Bible eo ilo aõ bwijwõlã.”

¹⁶ Inem, ejelok bwilõñ bwe, ro rej bed ilo congregation ko rej konono bar juõn kajin elap air eñjake bwe rar bõk juõn ãjinkij elap. Juõn leo im lio ri belele jen Britain rar ba: “Kwalok nan ilo bar juõn kajin ej juõn ian jerbal ko rekamõnõnõ kimar bõke iumin 40 yiõ ko in kwalok nan kin Ailiñ eo.” Kwomaroñ ke ukõt wãwen mour eo am ke bwe kwon bõk kunam ilo jerbal in ekamõnõnõ? Elañe kwoj ri school wõt, kwomaroñ ke katak kin bar juõn kajin ilo school ñan keboj yuk ñan bõk kunam ilo jerbal rot in? Ilo am kõmman eindein emaroñ tel yuk ñan bõk juõn wãwen mour ekamõnõnõ im eobrak kin jerammõn ko relap. (Jabõn Kennan Ko 10:22) Etke kwojjab bwebwenato ibben jemem im jinim kin aikwij in?

Ukukõte Kilen Jerbal ko Ad

17. Ewi wãwen ad maroñ jibadõk elõñlok armij ilo jikin ko congregation eo ad ej kwalok nan ie?

¹⁷ Alikar bwe, wãwen ko rej jelet mour ko ad rejjab kõtlok elõñ bwe ren drorlol “ok” in kõkkar ko air ilo jikin ko rej konono ilo bar juõn kajin. Bõtab, jemaroñ lo elõñlok armij ro jen mokta ilo jikin eo congregation eo ad ej kwalok nan ie. Ekijkan? Ilo ad ukukõt, jab ennan eo ad, ak kilen jerbal ko ad. Ilo elõñ jikin ko elõñlok armij ro rej jokwe ilo jikin ko emo am deloñ ie elañe rejjab kõtlok yuk. Elõñ armij ro jet rejjab bed ilo moko imwiir air ñe jej kwalok nan jen em-ñan-em ijo. Inem jej aikwij drorlol “ok” in kõkkar ko ad ilo ien ko jet im ilo jikin ko jet. Ilo wãwen in jej kajeoñe Jesus. Ear lo wãwen ko jet ñan konono ibben armij ro ilo elõñ wãwen ko reinjuõn jen don.​—Matu 9:9; Luk 19:​1-​10; Jon 4:​6-​15.

18. Ewi wãwen an kwalok nan ilo elõñ jikin ko rekajjo kar bolemen? (Kobaike box eo “Kõmman Ri Kalor ro ilo Jikin Business ko.”)

¹⁸ Ilo jet jikin ko an lal, kwalok nan ilo jikin ko jemaroñ lo armij ro ie ej juõn wãwen eaorõk ñan kõmman ri kalor ro. Ro rekabel ilo kõmman ri kalor ro rar kalaplok air jerbal in kwalok nan ilo elõñ jikin ko rekajjo jen don. Ijellokin air kwalok nan jen em ñan em, kiõ ri kwalok ro rej kwalok nan ilo jikin balun, office, mõn wia, parking lot, bus stop, iturin ial, iturin barijet, im jikin ko eirlok wõt. Elõñ ian Ri Kennan ro rej kab baptais ilo Hawaii rar bõk mol eo ilo jikin kein. Ilo ad ukukõt kilen jerbal ko ad emaroñ jibañ kij ñan lukkun kajejjet kitien nan in kaiñi eo an Jesus ñan kõmman ri kalor ro.​—1 Dri Korint 9:​22, 23.

19. Ta kajitõk ko kin jerbal eo an Jesus ñan kij jenaj etale ilo katak eo tok ilal?

¹⁹ Jerbal eo an Jesus ñan kõmman ri kalor ro ear koba tibdik ko jab kin etke im ia eo jej aikwij kõmman jerbal in ie ak bareinwõt ear koba ta eo jej aikwij konono kake im mae ñããt jej aikwij wõnmanlok ilo jerbal in. Kajitõk kein ruo eliktata kin jerbal eo Jesus ear jiroñ kij bwe jen kõmmane jenaj katak kake ilo katak eo tok ilal.

[Kamelele ko itulal]

Kwoj Kememej Ke?

• Kin un et ko im kõnan et eo jej bõk kunad ilo jerbal in kwalok nan kin Ailiñ eo im kõmman ri kalor ro?

• Ñan joñan et eo ri karejar ro an Jehovah ilo ran kein rar bõk kunair ilo jerbal eo an Jesus ñan kõmman ri kalor ro ilo ailiñ ko otemjej?

• Ewi wãwen ad maroñ ukukõt ‘kilen eñwõd’ eo ad, im etke jej aikwij kõmman eindein?

[Bo̦o̦k/Pija ko ilo peij 22]

Book ko ñan Ro Rebilo

Albert ej juõn Ri Christian elder im full-time ri kwalok nan ilo United States. Ebilo. Ñe ej kajerbal book in Bible ko ilo Braille (kajin Ro Rebilo) ej kalaplok an bolemen ilo jerbal in kwalok nan, ekoba jerbal ko an einwõt service overseer. Ewi wãwen jerbal eo an ilo congregation eo?

“Kim jañin lo bar juõn service overseer ebolemen ilo congregation eo am einwõt Albert,” James, presiding overseer eo ear ba. Albert ej juõn ian 5,000 armij ro rebilo ilo United States, iumin elõñ yiõ ko, rar bõk book ko rej bedbed ion Bible ilo kajin English im Spanish Braille. Emol bwe, jen 1912 mantak, kumi in ri karejar eo etiljek ear letok elõñlok jen jibuki book im magazine ko ilo kajin Braille. Ilo air kajerbal elõñ wãwen ko rekãl ilo ran kein, jikin kõmman book ko an Ri Kennan ro an Jehovah rar kõmman elõñ milliilo page ko ilo kajin Braille ilo kajjojo yiõ ilo elõñlok jen 10 kajin ko im rar jaketo-jaketaki ñan elõñlok jen 70 ailiñ ko. Ewõr ke en jelã kajjen im emaroñ bõk tokjen jen book kein rej bedbed ion Bible im rar keboji ñan ro rebilo?

[Bo̦o̦k eo ilo peij 23]

Kõmman Ri Kalor ro ilo Jikin Business ko

Ke ear lolok armij ro ilo jikin business im office ko rej jerbal ie, juõn ri kwalok Ri Kennan ilo Hawaii ear kebak juõn ri utiej ilo juõn jikin business in transportation. Meñe ear boub, emaan eo ear errã in katak Bible 30 minute ilo kajjojo week ilo office eo an. Aolep jibboñnin Wednesday, ej jiroñ ri jerbal ro an bwe ren jab kabañ e elañe armij ro rekõnan telephone lok ñan e inem ej lukkun liñõre katak eo. Bar juõn ri kwalok Ri Kennan ilo Hawaii ej katak Bible ibben juõn ri wia juõn alen ilo juõn week ilo jikin business in kõmman juj eo an. Rej katak Bible iturin jikin wiakake juj eo ilo mõn wia eo. Ñe juõn ri wia ej deloñ, ri kwalok Ri Kennan eo ej ruaklok jidik. Ñe ri wia eo ej diojlok, rej wõnmanlok ilo katak eo.

Ri utiej eo im ri wia eo jimor rar katak kinke Ri Kennan ro an Jehovah rar bõk eddo eo ñan drorlol “ok” ko air ilo jikin ko jet. Kwomaroñ ke lemnak kin jet jikin ko congregation eo am rej kwalok nan ie im remaroñ lo armij ro me ejeja ad lo ir ilo moko imwiir?

[Bo̦o̦k/Pija eo ilo peij 24]

Kajin Jaroñroñ im Kõmman Ri Kalor ro

Elõñ thousand Ri Kennan ro ibelakin lal, ekoba jodikdik ro rekijejeto, rar katak kajin jaroñroñ ñan jibañ ro rejaroñroñ ñan erom ri kalor ro an Christ. Kin men in, ilo Brazil, 63 armij rejaroñroñ rar baptais iumin juõn yiõ im 35 Ri Kennan ro rejaroñroñ rej kiõ jerbal einwõt ri evanjel ro rej full-time. Ibelakin lal, elõñlok jen 1,200 congregation im kumi ko rej konono kajin jaroñroñ. Juõn wõt circuit ej konono kajin jaroñroñ ilo Russia ej, ekkar ñan joñan kilepen, circuit eo elaptata ibelakin lal, kinke ej koba aolepen ailiñ in Russia!

[Pija eo ilo peij 23]

Kwomaroñ ke jerbal ilo juõn jikin rej konono bar juõn kajin?