Rej Kijirãte Kij Meñe Ejelok Unin

“Rej kijirãte Iõ im ejelok unin.”​—JON 15:25.

1, 2. (a) Etke jet armij rej bwok ñe armij ro rej kananaik Ri Christian ro, ak etke jejjab aikwij bwilõñ kin kijirãt rot in? (b) Kain “kijirãt” rot eo jenaj katak kake ilo katak in? (Lale footnote.)

RI KENNAN RO AN JEHOVAH rej kate ir bwe ren mour ekkar ñan kien ko ilo Nan in Anij. Kin men in, rej bõk juõn ãt emõn ilo elõñ ailiñ ko. Bõtab, ilo ejja ien eo wõt, rar kananaik ir. Ñan wanjoñok, juõn ri kien ilo jikin kwelok eo St. Petersburg, Russia, ear kememej im ba: “Rar reporte ñan kim bwe Ri Kennan ro an Jehovah rar juõn kain kabuñ ej jerbal ilo ittino im rar mõn ajiri ro im ir make.” Ak elikin aõ jerbal ibben Ri Kennan ro an Jehovah ilo juõn kwelok elap me ri kwelok ro rar itok jen elõñ ailiñ ko ibelakin lal, ejja ri kien eo wõt ear ba: “Kiõ ij lo juõn jar in armij emõn mwiliir, im ettõñdikdik . . . Rejjab lej im eainemõn burueir, im elap air yokwe don.” Ear kobaik im ba: “Ijjab melele kin ta unin an armij ro riap kin ir.”​—1 Piter 3:​16.

² Ri karejar ro an Anij rejjab mõnõnõ ñe armij ro rej naetair ri nana, ak rejjab ilbõk ñe armij ro rej kananaik ir. Jesus ear kakkõl ri kalor ro an ilo ien lok iman: “Elañe lõl ej kijirãte kom, komij jela bwe e ar kijirãte Iõ mokta jen kom. . . . A men in, bwe en jejit nan eo jeje ilo kieir, r’ar kijirãte Iõ im ejelok unin.”a (Jon 15:18-​20, 25; Sam 35:19; 69:4) Mokta ear jiroñ ri kalor ro an: “Elañe r’ar naetan iroij in im Beelzebub, e naj laplok air naetan ro dron im einwõt!” (Matu 10:25) Ri Christian ro rej melele bwe kijenmij iumin kain nan in riap rot in ej mõttan “alal in eñtan eo” rar bõke ke rar erom ri kalor ro an Christ.​—Matu 16:24.

3. Ñan joñan et eo ri kabuñ ro remol rar bõk matõrtõr?

³ Matõrtõr eo nae ri kabuñ ro remol ear walok jen ien etto, jen ien eo an “Abel ewãnik” liktak. (Matu 23:34, 35) Ear jab walok iumin jidik wõt ien. Jesus ear ba bwe “armij otemjej re naj kijirãte” ri kalor ro an kin etan. (Matu 10:22) Bareinwõt, ri jilek Paul ear je bwe aolep ri karejar ro an Anij​—ekoba kij kajjojo​—jej aikwij kõtmene bwe jenaj bõk matõrtõr. (2 Timote 3:​12) Ta unin?

Unjen Kijirãt Eo Ejelok Bedbedin

4. Ewi wãwen an Bible eo kwalok kin wõn eo ej bõktok kijirãt in ejelok unin?

⁴ Nan in Anij ej kwalok bwe jen jinoin, ear wõr juõn ri kijirãt eo jejjab maroñ loe. Lemnak kin ien eo kar urõt Abel, ri tõmak eo etiljek kein kajuõn. Bible eo ej ba bwe Cain, ri uror eo, “an ri nana eo,” Satan Devil eo. (1 Jon 3:​12) Cain ear kõnak kadkadin Satan, im Devil eo ear kajerbal e bwe en kajejjet kitien karõk ko an renana. Bareinwõt Bible eo ej kalikar jerbal eo an Satan ke ear melejoñe Job im Jesus Christ. (Job 1:​12; 2:​6, 7; Jon 8:​37, 44; 13:27) Book in Reveles̃õn ej kalikar wõn eo ear matõrtõre ri kalor ro an Jesus, ilo an ba: “Devil e naj jolok jet iami na iloan prisõn bwe en melejoñ kom.” (Reveles̃õn 2:​10) Aet, Satan ej unjen kijirãt eo ejjab wãnik nae armij ro an Anij.

5. Etke Satan ej kijirãte ri kabuñ ro remol?

⁵ Ta unin an Satan kijirãte ri kabuñ ro remol? Ilo juõn karõk ear kõmmane ilo ittino ej kwalok utiej buru eo elap, Satan ear jumae “Kiñ eo Ej mour wõt jen indrio im indrio,” Jehovah Anij. (1 Timote 1:​17; 3:6) Ej akwel im ba bwe Anij ejelok an kõmmanwa ilo wãwen an iroij ion men in kõmanman ko an im bwe ejelok juõn ej karejar ñan Jehovah kin juõn buru emol, im bwe armij ro rej kõmman eindein kin juõn un ekibbon. Satan ej ba bwe elañe enaj melejoñe armij ro, emaroñ bidodo an kajeorlok buruen armij otemjej jen air karejar ñan Anij. (Jenesis 3:​1-6; Job 1:​6-​12; 2:​1-7) Ilo an riap im ba bwe Jehovah ear jibede armij ñan kabuñ ñan e, ak juõn ri riap, im ej likjap ilo men otemjej, Satan ear kõnan kautiej emake einwõt juõn iroij ej kajur in wõt Jehovah einwõt iroij bõtata ijoko otemjej. Inem, kõnan eo an bwe armij ro ren kabuñ ñan e ej kane illu eo an nae ri karejar ro an Anij.​—Matu 4:​8, 9.

6. (a) Ewi wãwen aitwerõk eo kin Iroij Bõtata eo an Jehovah ej kitibuj kij? (b) Ewi wãwen melele eo ad kin aitwerõk in emaroñ jibañ kij ñan jutak bin ilo tõmak? (Lale box eo, page 10.)

⁶ Kwonañin lo ke kin ewi wãwen an aitwerõk in jelet mour eo am? Einwõt juõn ri karejaran Jehovah, bõlen kwar lo bwe meñe kwoj aikwij kate yuk ñan kõmanman ankil an Anij, ilo am kõmmane men in kwonaj bõk elap jerammõn. Bõtab, ta eo kwonaj kõmmane elañe wãwen ko ilo mour eo am rej kabañ ak kaeñtan yuk, im kõmman bwe en bin am wõnmanlok im lor kien ko an Jehovah? Im ta elañe kwojañin lo tokjen am karejar ñan Jehovah? Kwonaj lemnak ke bwe ejelok tokjen karejar ñan Jehovah? Ak kin am yokwe Jehovah im kamolol eo am emũlal kin kadkad ko an rekabwilõñlõñ men kein renaj kamakit yuk ñan am wõnmanlok im etetal ilo ial ko an otemjej? (Duteronomi 10:12, 13) Ilo an kõtlok bwe Satan en bõktok jet eñtan ko iod, Jehovah ear letok ñan kij juõn ien emõn ñan uake aitwerõk eo an Satan.​—Jabõn Kennan Ko 27:11.

“Ñe Armij Re Naj Kajirere Kake Kom

7. Ta juõn ian wãwen ko Devil eo ej kajerbale ñan kajeorlok kij jen Jehovah?

⁷ Kiõ jen etale ilo tibdikin wãwen an Satan kajerbal juõn ian jerbal in etao ko an ñan kamol nan in kinaak ko an nae Jehovah​—wãwen an riap im blasphem. Jesus ear naetan Satan “jemen riõp.” (Jon 8:​44) Ãt in Devil, ej melelen “Ri Ruruwe,” im ej kalikar bwe ej ri ruruwe eo elaptata nae Anij, nan eo an emõn, im ãt eo ekwojarjar etan. Devil eo ej kajerbal kajirere, nan in kinaak ko, im riap ñan aitwerõke iroij bõtata eo an Jehovah, im ej kajerbal ejja jerbal rot kein wõt ñan kananaik ri karejar ro an Anij. Ilo an kananaik Ri Kennan rein, emaroñ kõmman bwe en binlok ñan air kijenmij iumin juõn melejoñ elap.

8. Ewi wãwen an kar Satan kananaik Job, im kin tokjen et eo?

⁸ Lemnak kin ta eo ear walok ñan Job, eo me etan ear melelen “Unin air Illu.” Ijellokin an Job luji mweiuk ko an, ajiri ro nejin, im ejmour eo an emõn, Satan ear kõmman bwe Job en kar einwõt juõn ri jerawiwi me Anij ear kajeik e. Meñe rar kautiej Job mokta, armij ro, ekoba ro nukin im jeran rar kijirãte. (Job 19:13-​19; 29:​1, 2, 7-​11) Bareinwõt, ikijen ri kainemõn ro rewan, moktata Satan ear kajerbal ‘nan ko ñan kabwer Job,’ ilo an ba bwe ear kõmman juõn bwid elap im kiõ ear bõk kaje einwõt juõn ri kõmman nana. (Job 4:​6-9; 19:2; 22:​5-​10) Enaj kar juõn men in kabwer elap ñan Job!

9. Ta eo rar kõmmane ñan Jesus bwe armij ro ren watõke juõn ri jerawiwi?

⁹ Einwõt ri rejetak eo elaptata ñan iroij bõtata eo an Jehovah, Nejin Anij ear erom un eo elaptata unin an Satan illu. Ke Jesus ear itok ñan lal, Satan ear kate wõt e ñan kokkure ãt eo emõn etan ilo jitõb, einwõt ear kajeoñ in kõmmane ñan Job, ilo an kwalok Jesus einwõt juõn ri jerawiwi. (Aiseia 53:​2-4; Jon 9:​24) Armij ro rar naetan juõn ri kadõk im mattiia im ba bwe ‘juõn dimon ear bed ibben.’ (Matu 11:18, 19; Jon 7:​20; 8:​48; 10:20) Meñe kar ejelok ruõn rar naruõn kin blasphem. (Matu 9:​2, 3; 26:63-​66; Jon 10:33-​36) Men in ear kaburomõj Jesus, kinke ear jelã bwe ear jelet ilo jab jimwe ãt eo etan Jemen. (Luk 22:41-​44) Eliktata, rar dilaik Jesus ion alal eo einwõt juõn ri kõtõrãi kien. (Matu 27:38-​44) Ilo an bin wõt ilo tiljek, Jesus ear kijenmij ilo “nan in kinaak ko an ri jerawiwi ro.”​—Hebrews 12:​2, 3, New World Translation.

10. Ewi wãwen an Satan kõjjeroru kake bwen ri kabit ro ilo ran kein ad?

¹⁰ Ilo ran kein ad, bwen ri kabit ro an Christ rar einwõt unin an Devil illu. Emwij kalikar bwe Satan ej einwõt “dri kinaklok ro [jein im jãtin Christ], eo ej kinaklok ir iman am Anij ran im boñ.” (Reveles̃õn 12:​9, 10) Jen ien eo ear wanlaltak jen lañ im kalbuj ion lal, Satan ear kalaplok kate ko an ñan kananaik ro jãtin Christ einwõt ri nana ro. (1 Dri Korint 4:​13) Ilo jet ailiñ ko, rar narueir im naetair juõn kabuñ ekauwatata, einwõt armij ro rar kõmmane ñan Ri Christian ro ilo ebeben eo kein juõn. (Jerbal 24:​5, 14; 28:22) Einwõt kar kwaloke ilo jinoin katak in, rar kajerbal bwebwenato ko rewan ñan kananaik ir. Ak, “kin aibujuij im buijinarmij, kin buñbuñ enana im buñbuñ emõn,” ri kabit ro jãtin Christ, im “s̃ip ro jet” ri jerbal ro mõttair, ilo ettã buru rar kate wõt ir ñan ‘kejbãrok kien ko an Anij, im kennan kin Jesus.’​—2 Dri Korint 6:8; Jon 10:16; Reveles̃õn 12:17.

11, 12. (a) Ta eo emaroñ un eo unin an armij ro kajirere kin jet Ri Christian ro? (b) Ilo wãwen et ko juõn Ri Christian emaroñ eñtan meñe ejelok ruõn kin tõmak eo an?

¹¹ Emol bwe, jab aolep nan in kajirere ko ro ri karejaran Anij rej jelmae rej itok jen air kõmman jerbal ko “[re]kwojarjar.” (Matu 5:​10) Jet abañ ko rej waloktok kin jab wãppen eo ad. Ejjab juõn men ebuñbuñ ñe jej “kijenmij ilo iñtan ko, ke rej kaiñtan [kij] ilo [ad] jab wãnik.” Bõtab, ej juõn men in kabuñburuen Anij elañe juõn Ri Christian “kin bõklikõt ñõn Anij, . . . ej kijenmij ilo iñtan ko.” (1 Piter 2:​19, 20) Ilo ien et ko Ri Christian ro rej aikwij kijenmij?

¹² Jet rar aikwij kijenmij iumin kijirãte ko jen armij ro jet kin air jab bõk kunair ilo manit ko rejõkkar kin ilomij. (Duteronomi 14:1) Ri Kennan jodikdik ro rar aikwij kijenmij wõt iumin kajirere kinke rar tiljek ñan kien ko an Jehovah kin ta eo emõn im ta eo enana. (1 Piter 4:4) Jet armij rej watõk ilo jab jimwe bwe jet Christian jemen im jinen ro rar einwõt “ro rej jerwane ajiri” ak “ri nana ro” kinke rar bukõt bar juõn wãwen kamadmõde nañinmij eo an ajiri ro nejiir eo im jab kajerbal bõtõktõk ilo jabdewõt wãwen. (Jerbal 15:29) Ro nukin Ri Christian ro im ro ri turiir rar kijirãte ir kin rar erom ri karejar ro an Jehovah. (Matu 10:34-​37) Rein aolep re tiljek rej lor joñok eo an ri kanan ro im Jesus ilo air kijenmij meñe ejelok rueir.​—Matu 5:​11, 12; Jemes 5:​10; 1 Piter 2:​21.

Kijenmij ilo Mõnõnõ Iumin Kajirere

13. Ta eo emaroñ jibañ kij ñan jokkin wõt juõn ilo jitõb ñe elap an armij ro kijirãte kij?

¹³ Ñe elap an armij ro kajook kij kin tõmak eo ad, jemaroñ ebwer, einwõt ear walok ñan ri kanan Jeremiah, im lemnak bwe jejjab maroñ wõnmanlok im karejar ñan Anij. (Jeremiah 20:​7-9, NW) Ta eo emaroñ jibañ kij bwe mour in jitõb eo ad en jokkin wõt juõn? Jej aikwij bõk lemnak eo an Jehovah kin men in. Ej watõk ro rej tiljek iumin melejoñ ko einwõt ro rej bõk anjo, im jab einwõt ro rej jorrãn. (Dri Rom 8:​37) Kwon kajeoñ in kalmenlokjen kin ro rar tiljek ñan iroij bõtata eo an Jehovah meñe rar jelmae melejoñ ko otemjej Devil eo ear likit imair​—maan im kõrã ro einwõt Abel, Job, Mary jinen Jesus, im ri tiljek ro jet ilo ien eo etto, ekoba ri karejar ro mõttad ilo ran kein. (Dri Hibru 11:35-​37; 12:1) Kwon kalmenlokjen kin tiljek eo air. Kõdo eo elap in rein retiljek rej rejañ kij ñan kobalok ibbeir im bõk anjo ion lal kin tõmak eo ad.​—1 Jon 5:4.

14. Ewi wãwen jar jen buruõd ej kakajur kij ñan debij ad tiljek?

¹⁴ Elañe ‘jeobrak kin inebata ko,’ jemaroñ reilok ñan Jehovah im jar kin aolepen buruõd, im enaj kakajur im kainemõn kij. (Sam 50:15; 94:19) Enaj letok ñan kij meletlet eo jej aikwiji ñan kijenmij ilo melejoñ eo im jibañ kij ñan kalimjek wõt aitwerõk eo elap, iroij bõtata eo an Jehovah, eo ej lukkun unin an armij ro kijirãte ri karejar ro an. (Jemes 1:5) Bareinwõt Jehovah emaroñ letok “ainemõn jen Anij, eo ej elã jen jela otemjej.” (Dri Pilippai 4:​6, 7) Ainemõn in jen Anij ej kamaroñ kij ñan debij juõn buru eainemõn im jutak bin ilo tõmak meñe jej jelmae melejoñ ko relap, im jab bere ak lelñoñ ñan jidik. Ilo an kajerbal jitõb eo an, Jehovah emaroñ kejbãrok kij iumin jabdewõt melejoñ ej kõtlok bwe ren itok iod.​—1 Dri Korint 10:13.

15. Ta eo emaroñ kejbãrok kij jen ad debij juõn buru emeoeo ñe jej eñtan?

¹⁵ Ta eo emaroñ jibañ kij bwe jen jab illu ibben ro rej kijirãte kij meñe ejelok ruõd? Kememej bwe ri kijirãt ro ad relap rej Satan im dimon ro an. (Dri Epesõs 6:​12) Ñe jet armij ilo jelã kake rej matõrtõre kij, elõñ ian ro rej jumae armij ro an Anij rej kõmmane men in ilo jaje kake ak armij ro jet rar mone ir. (Daniel 6:​4-​16, NW; 1 Timote 1:​12, 13) Jehovah ekõnan lelok ien ñan “armij otemjej” bwe ren bõk lomor im “jelã mol” eo ejimwe. (1 Timote 2:4) Emol, jet armij ro rar jumae mokta rej Christian ro jeid im jatid kiõ kinke rar lo mwil eo emõn mwilid. (1 Piter 2:​12) Bareinwõt, jemaroñ katak jen joñok eo an Joseph, leo nejin Jacob. Meñe Joseph ear bed ilo eñtan eo elap kin ta eo ro jein im jatin rar kõmmane ñan e, ear jab illu ibbeir. Etke ear jab? Kinke ear kile bwe men in ear kitibuj Jehovah, im kõmman men ko bwe ren walok im kajejjet kitien karõk eo An. (Jenesis 45:​4-8) Ilo ejja wãwen in wõt Jehovah emaroñ kõmman bwe jabdewõt eñtan jej bõke emaroñ kajerbale ñan kaibujuij etan.​—1 Piter 4:​16.

16, 17. Etke jejjab aikwij lukkun inebata ñe ri jumae ro rej kabañ jerbal in kwalok nan eo?

¹⁶ Jejjab aikwij inebata elañe ri jumae ro rej kabañ jerbal eo ad ñan kwalok nan iumin jidik wõt ien. Kiõ Jehovah ej kamakit ri ailiñ ko ikijen jerbal in kwalok nan ibelakin lal, im men ko remõn rej deloñtok. (Haggai 2:​7, NW) Christ Jesus, Shepherd eo Emõn, ear ba: “Aõ s̃ip rej roñjake ainikiõ, im I jela ir, im rej lor Iõ. Im ij lelok ñõn ir mour in drio . . . im ejelok en e naj kwotak ir jen peiõ.” (Jon 10:27-​29) Enjel ro rekwojarjar rej bõk kunair ilo jerbal in jonikõn eo elap ilo jitõb. (Matu 13:39, 41; Reveles̃õn 14:​6, 7) Kin men in, ejelok jabdewõt men ri jumae ro remaroñ ba ak kõmmane ñan kokkure karõk eo an Anij.​—Aiseia 54:17; Jerbal 5:​38, 39.

¹⁷ Ekkã an walok bwe, makitkit ko renana an ri jumae ro rar jeblaklok ñan ir. Ilo juõn bukwon ilo Africa, elõñ bwebwenato ko reriap rar walok nae Ri Kennan ro an Jehovah, ekoba nan in bwe rar kabuñ ñan Devil eo. Kin men in, ñe Ri Kennan ro rej kwalok nan ijo, Grace ear ettõr ñan itulikin mweo imõn im tilekek jen ir mae ien rar ilok jen ijo. Juõn ran pastor eo an kabuñ eo an ear kwotak juõn ian book ko ad im jiroñ aolep armij ro ijo bwe ren jab readi kinke enaj kar kamakit ir bwe ren illok jen tõmak eo air. Men in ear kaitoklimoen Grace. Inem tokelik ke Ri Kennan ro rar kebak e, ear jab tilekek jen ir ak ear bwebwenato ibbeir im ear bõk juõn an book. Ear jino katak Bible eo ibbeir, im ilo 1996 ear baptais. Kiõ Grace ej kajerbal ien eo an ñan bukõt armij ro jet me rar roñ kin bwebwenato ko reriap kin Ri Kennan ro an Jehovah.

Kakajur Tõmak eo Am Kiõ

18. Etke jej aikwij kakajur tõmak eo ad mokta jen an melejoñ ko waloktok, im ewi wãwen ad maroñ kõmmane men in?

¹⁸ Kinke Satan emaroñ ilo idiñ kijirãte kij jabdewõt ien, eaorõk bwe jen kakajur tõmak eo ad kiõ. Ewi wãwen ad maroñ kõmmane men in? Juõn report jen juõn ailiñ eo me armij ro an Jehovah rar bõk matõrtõr ie ear ba: “Juõn men ear lukkun alikar: Ro rar keini in katak Bible ibbeir make ekkar ñan juõn lajrak im ewõr juõn kamolol emũlal kin katak ko remol ilo Bible rar maroñ in jutak bin ilo tõmak ilo ien melejoñ eo. Ak ro me ilo ‘ien emõn’ rej jakkeini air kwelok, im jakkeini air kwalok nan, im rej ebbururu ilo melejoñ ko redik ekkã air buñ ñe rej bed ilo melejoñ eo ‘eurur.’” (2 Timote 4:2) Elañe kwoj lo jet wãwen ko kwoj aikwij kakõmanmanlok ilo mour eo am, kwon kate yuk im kõmmane ilo mõkaj.​—Sam 119:60.

19. Ta eo tiljek eo an ri karejar ro an Anij ej kõtõbrake meñe rej jelmae kijirãt eo ilo ejelok unin?

¹⁹ Ñe ri kabuñ ro rej mol im tiljek wõt iumin kijirãt eo relap an Satan rej einwõt ri kamol ro ñan iroij bõtata eo ejimwe, im wãnik an Jehovah. Tiljek eo air ej kamõnõnõik buruen Anij. Meñe armij ro remaroñ kajirere kake ir, eo ej bed ilõñin lal im lañ “e jab jok kin ir, kin naetan air Anij.” Emol, ikijen ri tiljek rein, emaroñ ba ilo jimwe: “Lõl ej betkake ir.”​—Dri Hibru 11:16, 38.

[Kamelele eo itulal]

Kwomaroñ Ke Kamelele?

• Ta eo ej bed ilikin kijirãte eo nae ri kabuñ ro remol?

• Ewi wãwen an kar Satan kajerbal kijirãt ñan kajeoñ in kokkure tiljek eo an Job im Jesus?

• Ewi wãwen an Jehovah kakajur kij bwe jen jutak bin ilo tõmak meñe jej jelmae kijirãt eo an Satan?

[Bo̦o̦k/Pija eo ilo peij 10]

Rar Lo Aitwerõk eo Emol

Juõn ian Ri Kennan ro an Jehovah ilo Ukraine, ijo rar kabõjrak jerbal in kwalok nan kin Ailiñ eo ie iumin 50 yiõ ko, ear ba: “Jejjab aikwij watõk melejoñ eo Ri Kennan ro an Jehovah rar bed iloan ekkar ñan ta eo armij ro rar kõmmane ñan ir . . . Enañin aolep ri utiej ro ijo rar baj kõmmane wõt men eo rar jiroñ ir bwe ren kõmmane. Ke kien eo ear oktak, ri utiej ro rar ukõt tiljek eo air, ak kimar bedwõt ilo ejja kabuñ eo wõt. Kimar kile bwe mejelan abañ ko aolep ear bed ilo Bible eo.

“Kimar jab watõk kim make einwõt ro me ri nana ro rar kajorrãn ir meñe ejelok rueir. Men eo ear jibañ kim ñan kijenmij kar juõn melele ealikar kin aitwerõk eo ear walok ilo jikin kallip in Eden​—aitwerõk eo kin maroñ eo an Anij ñan iroij. . . . Kimar jutak bin im rejetak juõn aitwerõk eo ear jab ekkejel wõt ñan juõn men armij ro rar kõnan ak bareinwõt ñan men ko Iroij Bõtata eo ijoko otemjej ilañ im ion lal ear kõnan kaki. Men in ear kakajur kim im kamaroñ kim ñan tiljek wõt meñe iumin melejoñ ko relap.”

[Pija]

Victor Popovych, rar kalbuj e ilo 1970

[Pija eo ilo peij 7]

Wõn eo elaptata eo kijirãte Jesus?

[Pija ko ilo peij 9]

Job, Mary, im ri karejar ro an Anij ilo ran kein ad, einwõt Stanley Jones, rar rejetak iroij bõtata eo an Jehovah