Ekkõl Wõt Kin “Ainikien Ruwamaejet Ro”

“Rejamin lor juõn ruwamaejet ñan jidik ak renaj ko jen e, kinke rejaje ainikien ruwamaejet ro.”​—JOHN 10:​5, NW.

1, 2. (a) Ewi wãwen an Mary uak ke Jesus ej kir etan, im men in ear walok ej juõn wanjoñok kin ta nan ko an Jesus moktalok iman? (b) Ta eo ej kamaroñ kij ñan ad bed ebak ñan Jesus?

JESUS eo emwij an jerkakbiji ej lo juõn kõrã ej jutak iturin roñ eo enbwinin ear bed ie mokta. Elukkun jelã kajjen. Ej Mary Magdalene. Enañin ruo yiõ ko lok iman, ear kajutaklok dimon ro jene. Jen ien eo kõrã in ear etal ibben im ri jilek ro an, im ear kabwe aikwij ko air ilo kanniek ran otemjej. (Luk 8:​1-3) Bõtab, rainin, Mary ej jañ kinke ear lo Jesus ke ear mij, im kiõ ejako enbwinin! Inem Jesus ej kajitõk ibben: “Kõra, etke kwoj jõñ? wõn eo kwoj bukot e?” Ear lemnak bwe ej juõn ri kallip, inem ear uak: “Leyõ, elañe kw’ar bõklok E jen ijin, kwon kwalok ñõn iõ ijo kw’ar likit E ie, im I naj bõklok.” Inem Jesus ej ba: “Meri.” Emõkaj an kile ainikien. Ilo lañliñ ej lamõj im ba ñan e “Rabbonai!” Im ej atbõkwõje.​—Jon 20:11-​18.

² Bwebwenato in ej kwalok ilo juõn wãwen emãnãn kin ta eo Jesus ear ba lok iman. Ke ear keidi emake ibben juõn shepherd im ri kalor ro an einwõt sheep, ej ba bwe shepherd eo ej kir sheep ro an kin etair im rejelã ainikien. (Jon 10:​3, 4, 14, 27, 28) Emol, einwõt juõn sheep jelã kajjen shepherd eo an, eindein Mary ear jelã kajjen Shepherd eo an, Christ. Men in ej mol bareinwõt ñan ri kalor ro an Jesus ilo ran kein. (Jon 10:16) Einwõt ñe lojilñin sheep ej kamakit e bwe en bed ebak ñan shepherd eo an, eindein lolokjen eo ad ilo jitõb ej kamaroñ kij ñan etetal ilo jenkwon ne ko neen Shepherd eo ad emõn, Jesus Christ.​—Jon 13:15; 1 Jon 2:6; 5:​20.

3. Ta jet ian kajitõk ko kin wanjoñok eo an Jesus kin bwijin sheep eo ej bõkmantak?

³ Bõtab, ekkar ñan ejja wanjoñok in wõt, maroñ eo an juõn sheep ñan kile ainikien armij ej kamaroñ e ñan jab jelã kajjen wõn eo ej jeran ak bareinwõt wõn eo ej ri kijirãt eo an. Maroñ in elap an aorõk kinke elõñ ri kijirãt ro ad. Wõn ir? Ewi wãwen air jerbal? Ewi wãwen ad maroñ kejbãrok kij jen ir? Ñan uaki kajitõk kein, jen lale bar ta eo Jesus ear ba ilo wanjoñok eo an kin bwijin sheep eo.

‘Eo Ejjab Deloñ Ilo Aor eo’

4. Ekkar ñan wanjoñok eo kin shepherd eo, sheep ko rar lor wõn, im wõn eo rar jab lore?

⁴ Jesus ej ba: “Eo ej deloñ ilo aor ej shepherd eo an sheep ko. Ri lale aor eo ej kabellok ñan e, im sheep ko rej roñjake ainikien, im ej kir sheep ko an kin etair im tel ir. Ñe emwij air diojlok, ej etal imair, im sheep ko an rej lore, kinke rejelã ainikien. Rejamin lor juõn ruwamaejet ñan jidik ak renaj ko jen e, kinke rejaje ainikien ruwamaejet ro.” (John 10:​2-5, NW) Lale mõk, Jesus ej kajerbal nan eo “ainikien” jilu alen. Ruo alen ej konono kin ainikien shepherd eo, ak alen eo kein kajilu, ej jitõñlok ñan “ainikien ruwamaejet ro.” Kain armij rot eo rejaje kajjen Jesus ear konono kake?

5. Etke jejjab kwalok juõn jitõb in karuwainene ñan ruwamaejet eo Jon chapter 10 ear konono kake?

⁵ Jesus ejjab bwebwenato kin armij rot eo jekõnan karuwainene​—juõn nan ilo kajin Bible eo ilo jinoin im ej melelen “yokwe ro jejaje kajjiir.” (Dri Hibru 13:2) Ilo wanjoñok eo an Jesus, ruwamaejet eo ejjab juõn ri lotok rar kir e. Ear “jab dreloñ ilo kejem iloan worwor in s̃ip, a ej uweliñlok ilo bar juõn ial.” Ej juõn “dri kwot im dri rakimi.” (Jon 10:1) Wõn eo moktata Nan in Anij ear kalikar bwe ear erom juõn ri kwot im ri rakim? Satan Devil eo. Jej lo men in kamol eo ilo book in Jenesis.

Ien eo Moktata Rar Roñ Ainikien Ruwamaejet Eo

6, 7. Etke ejimwe ñan ad naetan Satan juõn ruwamaejet im juõn ri kwot?

⁶ Jenesis 3:​1-5 ej kwalok kin ewi wãwen air kar roñ ainikien ruwamaejet eo. Bwebwenato eo ear kwalok bwe Satan ear kebak kõrã eo moktata, Eve, ikijen juõn serpent im konono ñan e ilo juõn wãwen ej mone. Emol, ilo bwebwenato in ear jab naetan Satan einwõt “juõn ruwamaejet.” Mekarta, makitkit ko an rej kalikar ilo elõñ wãwen ko bwe ear einwõt ruwamaejet eo kar kamelele kake ilo wanjoñok eo an Jesus ilo Jon chapter 10. Jen etale jet ian wãwen ko rej einlok wõt juõn.

⁷ Jesus ear ba bwe ruwamaejet eo ej kebak worwor in sheep ilo juõn wãwen ittino. Eindein, Satan ear kebak eo ekabo e ilo juõn wãwen ejjab alikar, ilo an kajerbal juõn serpent. Wãwen makitkit in etao ear kalikar kain jitõb rot eo kar Satan​—juõn ri rakim etao. Bareinwõt, ruwamaejet eo iloan worwor in sheep eo ej beek in kwote sheep ko an shepherd eo. Emol, enanalok jen juõn ri kwot, kinke mejenkajjik eo an ej ñan “mõn im kokkure.” (Jon 10:10) Einlok wõt in, Satan ej juõn ri kwot. Ilo an mone Eve, ear kwote tiljek eo an jen Anij. Bareinwõt, Satan ear bõktok mij ion armij ro. Kin men in, ej juõn ri uror.

8. Ewi wãwen an kar Satan ikiri nan ko im mejenkajjik ko an Jehovah?

⁸ Satan ear kalikar bwe ear jab mol ilo an ikiri nan ko im mejenkajjik ko an Jehovah. “Emol ke Anij e ar ba, Komin jab mõña jen wijki otemjej ilo jikin kallip eo?” ear kajitõkin Eve. Ilo etao Satan ear einwõt ñe ear bwilõñ, einwõt ñe ear ba: ‘Ewi wãwen an Anij maroñ emmakit ilo juõn wãwen ejelok kõmmanwa ie?’ Ear bareinwõt ba: “Anij e jela bwe ilo ran eo komij mõña jen e, inem mejemiro re naj bellok.” Lale nan ko an: “Anij e jela.” Satan ear einwõt ñe ear ba: ‘Ijelã ta eo Anij ejelã. Ijelã ta kõtõbrak ko an, im renana wõt.’ (Jenesis 2:​16, 17; 3:​1, 5) Ekaburomõjmõj bwe, Eve im Adam rar jab illok jen ainikien ruwamaejet eo. Jen men in, rar bokake e im bõktok jorrãn ñan ir make im ro nejiir.​—Dri Rom 5:​12, 14.

9. Etke jej aikwij kõtmene bwe jemaroñ roñ ainikien ro jejaje kajjiir rainin?

⁹ Satan ej kajerbal wãwen ko einlok wõt in ñan mone armij ro an Anij ilo ran kein. (Reveles̃õn 12:9) Ej “jemen dri riõp,” im ro rej einwõt e, rej kajeoñ in mone ro rej nejin Anij rej karejar ñan e. (Jon 8:​44) Jen lale jet wãwen ko jemaroñ roñ ainikien ruwamaejet ro ilo ran kein.

Wãwen Ad Roñ Ainikien Ro Jejaje Kajjiir ilo Ran Kein

10. Ta juõn ian wãwen ko jej roñ ainikien ruwamaejet ro?

¹⁰ Lemnak ko retao. Ri jilek Paul ej ba: “Katak ko re kaju wãweir im bwir; ren jab kajebwãbweik kom.” (Dri Hibru 13:9) Kain katak rot ko? Kinke rein remaroñ ‘kajebwãbweik kij,’ alikar bwe Paul ej jitõñlok ñan katak ko rej kamõjnoik jokkin wõt juõn eo ad ilo jitõb. Wõn ro rej kwalok katak kein rebwid? Paul ear jiroñ juõn jar in Christian elder ro: “Bar einwõt jet iami re naj jutõk, im konono men ko r’ankeke, bwe ren karel ro dri kalor ilokair.” (Jerbal 20:30) Emol, rainin einwõt ilo ran ko an Paul, jet armij ro rar uan Christian congregation eo kiõ rej kajeoñ mone ro rej einwõt sheep ilo air konono kin “men ko r’ankeke’​—nan ko reriap. Einwõt an kar ri jilek Peter ba, rej kajerbal “nan in etao ko”​—⁠nan ko jemaroñ watõki remol ak ejelok tokjeir einwõt riap in money ko.​—2 Piter 2:3.

11. Ewi wãwen nan ko ilo 2 Piter 2:​1, 3 rej kajerwawaik wãwen im mejenkajjik ko an ro emwij bukwelok ir rej jumae?

¹¹ Bareinwõt Peter ej wõnmanlok wõt im kajerwawaik wãwen jerbal ko an ro rar illok jen mol eo im rej jumae kiõ ilo an ba bwe renaj “kadreloñwõj ilo etino katak ko re bwir im rej kokkure.” (2 Piter 2:1, 3) Einwõt ri kwot eo ilo wanjoñok eo an Jesus kin bwijin sheep ejjab deloñ “ilo kejem in iloan worwor in s̃ip, a ej uweliñlok ilo bar juõn ial,” eindein an ri jumae ro emwij bukwelok ir kebak kij ilo etao. (Dri Galetia 2:4; Jud 4) Ewi mejenkajjik eo air? Peter ej wõnmanlok im ba: “Renaj kajerbal kom ñan kamweie ir.” (NW) Emol, jekdon ta eo ro emwij bukwelok ir im rejumae kiõ rej ba ñan kowãnik ir make, lukkun mejenkajjik eo an ri kwot ro ej ñan “kwot, im mon, im kokkure.” (Jon 10:10) Kwon ekkõl wõt im kejbãrok yuk jen rein jejaje kajjiir!

12. (a) Ewi wãwen an ri kamao ro maroñ kõmman bwe jen roñ ainikien ruwamaejet ro? (b) Ta wãwen ko rej einlok wõt juõn ikõtan etao ko an Satan im wãwen ko an ruwamaejet ro rainin?

¹² Ri kamao ro renana. Ainikien ruwamaejet ro remaroñ waloktok ikijen ro jej kamao ibbeir. Ri kamao ro renana rej kauwatata elaptata ñan jodikdik ro. (1 Dri Korint 15:33) Kememej, Satan ear kõtõbare Eve​—eo edik im jab kanuij lap iminene ko ibben ian armij ro ruo moktata. Ear karel buruen bwe en lemnak bwe Jehovah ear debij anemkwoj jen e, meñe ilo mol ear jab. Jehovah ear yokwe armij ro ear kõmanmane im kaorõk wãwen mour eo air. (Aiseia 48:17) Eindein wõt rainin, ruwamaejet ro rej kajeoñ in karel buruemi jodikdik ro ñan ami lemnak bwe Ri Christian ro jememi im jinemi rej debij anemkwoj jen kom ellã jen joñan. Ewi wãwen ruwamaejet rein remaroñ jelet yuk? Juõn Ri Christian ledik ear ba: “Iumin jidik wõt ien ri school ro mõtta rar kamõjnoik tõmak eo aõ. Rar ba bwe kabuñ eo aõ ebin kien ko an im ejelok kõmmanwa ie.” Ak, ilo mol jemem im jinim rej yokwe yuk. Ñe ri school ro mõttam rej kajeoñ in karel buruõm bwe kwon jab liki jemem im jinim, kwon jab bo einwõt Eve.

13. Ta ial eo emeletlet David ear lore, im ta juõn ian wãwen ko jemaroñ kajeoñe e?

¹³ Ikijen ri kamao ro renana, ri jeje sam David ear ba: “I ar jab jijõt iben armij dri riõp; im I jamin etal iben ro dri jela mon.” (Sam 26:4) Bar juõn, Kwoj kile ke kadkadin ruwamaejet ro? Rej noje wõn ir​—einwõt Satan ear tilekek ilikin serpent eo. Rainin, jet armij ro renana rej noje wõn lukkun ir im kõtõbar ko air ilo air kajerbal Internet eo. Ñe rej konono ibben armij ro ikijen air kajerbal computer, armij rein renana remaroñ mone yuk bwe kwon lemnak kwoj bwebwenato ibben juõn jodikdik bwe kwoj lorak ilo juõn aujid. Kom jodikdik ro, komin lukkun ekkõl wõt im kejbãrok kom bwe komin jab jorrãn ilo jitõb.​—Sam 119:101; Jabõn Kennan Ko 22:3.

14. Jet ien, ewi wãwen an jikin news ko kwalok ainikien ruwamaejet ro?

¹⁴ Nan in kinaak ko reriap. Meñe ewõr jet news ko rejjab nana kin Ri Kennan ro an Jehovah, jet ien jikin kõmman news ko remaroñ kwalok ainikien “ruwamaejet ro” ilo kalijeklok. Ñan wanjoñok, ilo juõn ailiñ kar kwalok juõn report ejjab mol bwe Ri Kennan ro an Jehovah rar rejetak Hitler ilo Bata eo kein karuo an Lal. Ilo bar juõn ailiñ juõn report ear naruõn Ri Kennan ro an Jehovah im ba bwe rar kokkure imõn jar ko. Ilo jejjo ailiñ ko jikin news ko rar naruõn Ri Kennan ro an Jehovah im ba bwe rar makoko in bõk jibañ jen doctor ro ñan jibañ ajiri ro nejiir im bareinwõt rar kõtlok ro uair bwe ren kõmman bwid ko relap. (Matu 10:22) Meñe eindein, armij ro emol burueir im rejelã kajjiir rej jelã bwe aolep nan in kinaak kein reriap.

15. Etke ejjab men in meletlet ñan tõmak ilo men otemjej rej waloktok jen jikin news ko?

¹⁵ Ta eo jenaj kõmmane elañe jej jelmae kain nan in kinaaklok rot kain me ainikien ruwamaejet ro rej kajededlok? Jej aikwij roñjake nan in kakabilek eo ilo Jabõn Kennan Ko 14:15: “Dri bwebwe eo, ej tõmak nan otemjej; a armij dri jelalokjen, ej kanuij lale an etetal. Ejjab men in meletlet ñan ad tõmak men otemjej jen jikin news ko im watõki bwe remol. Meñe jej kile bwe ewõr jet ennan ko remol jen jikin news ko, jej kile bareinwõt bwe “aolepen lõl ej berwõt ilo ri nana eo.”​—1 Jon 5:​19.

“Melejoñ Jitõb rõn”

16. (a) Ewi wãwen makitkit ko an juõn lukkun sheep kamole nan ko an Jesus ilo Jon 10:4? (b) Ta eo Bible ej rejañ kij bwe jen kõmmane?

¹⁶ Bõtab, ewi wãwen ad jelã wõn eo jerad ak ri kijirãt eo ad? Eokwe, Jesus ej ba bwe sheep ko rej lor shepherd eo kinke “re jela ainiken.” (Jon 10:4) Ejjab baotokin shepherd eo ej kamakit sheep ko bwe ren lore; ej ainikien. Juõn book kin ene ko enen Bible ear kwalok bwe juõn ien juõn ri lolok ear ba bwe sheep ko rej kile shepherd eo air kin nuknuk ko an, jab ainikien. Juõn shepherd ear uak im ba bwe rar jelã kajjen kin ainikien. Ñan kamol men in, ear jeniji nuknuk ko an ibben ri lolok eo. Elikin an kõnak nuknuk ko an shepherd eo, ri lolok eo ear kir sheep ko, ak rar jab uak. Rar jaje kajjen ainikien. Ak, ke shepherd eo ear kir ir, meñe ear jab nuknuk einwõt juõn shepherd, sheep ko rar ettõrlok ñan e ilo mõkaj. Inem, baotokin juõn armij emaroñ einlok wõt juõn shepherd, ak ñan sheep ko, ejjab melelen ej shepherd eo. Einwõt ba bwe, sheep ko rej melejoñe ainikien armij eo, im keidi ibben ainikien shepherd eo. Nan in Anij ej jiroñ kij bwe jen kõmman eindein​—“melejoñ jitõb rõn elañe rej jen Anij.” (1 Jon 4:1; 2 Timote 1:​13) Ta eo enaj jibañ kij ñan kõmmane men in?

17. (a) Ewi wãwen ad maroñ lukkun jelã ainikien Jehovah? (b) Jelãlokjen eo kin Jehovah ej kamaroñ kij ñan kõmman ta?

¹⁷ Alikar bwe, joñan an laplok ad jelã ainikien Jehovah, ak ennan, enaj bidodolok ad kile ainikien juõn ruwamaejet. Bible eo ej kwalok kin ewi wãwen ad maroñ bõk jelãlokjen einwõt in. Ej ba: “Lojiliñõm re naj roñjake juõn nan elikõm, ej ba, Eñin ial eo, komin etetal iloan.” (Aiseia 30:21) “Nan” in ilikid ej itok jen Nan in Anij. Ien otemjej jej konono Nan in Anij, jej roñ, ilo kõkkar, ainikien Shepherd eo ad Elap, Jehovah. (Sam 23:1) Kin men in, ñe jej kalaplok ad katak Bible eo, enaj laplok ad jelã ainikien Anij. Jelãlokjen in enaj kamaroñ kij ñan kile ainikien ro jejaje kajjiir.​—Dri Galetia 1:8.

18. (a) Ad jelã ainikien Jehovah ej kitibuj ta? (b) Ekkar ñan Matu 17:5, etke jej aikwij bokake ainikien Jesus?

¹⁸ Ad jelã ainikien Jehovah ej kitibuj bar ta? Ijellokin ad roñjake, ej kitibuj ad bokake. Bar lale mõk Aiseia 30:21. Nan in Anij ej ba: “Eñin ial eo.” Aet, ilo ad katak kin Bible eo, jej roñjake nan in jiroñ ko an Jehovah. Jeltokin, ej kakien: “Komin etetal iloan.” Jehovah ekõnan bwe jen jerbale men ko jej roñjaki. Inem, ilo ad jerbale men ko jej katak kake, jej kwalok bwe jejjab baj roñ wõt ainikien Jehovah ak jej bokake ainikien Jehovah. (Duteronomi 28:1) Bokake ainikien Jehovah ej melelen bareinwõt bwe jen bokake ainikien Jesus, kinke Jehovah make ear jiroñ kij ñan kõmman eindein. (Matu 17:5) Ta eo Jesus, Shepherd eo Emõn, ej jiroñ kij bwe jen kõmmane? Ej katakin kij ñan kõmman ri kalor ro im liki “dri korijer e tiljek im meletlet.” (Matu 24:45; 28:18-⁠20) Bokake ainikien ej melelen mour indio.​—Jerbal 3:​23.

‘Renaj Ko Jen E’

19. Ewi wãwen ad maroñ uake ainikien ruwamaejet ro?

¹⁹ Inem, ewi wãwen jej aikwij uake ainikien ruwamaejet ro? Ejja wãwen eo wõt sheep ko kõmmane. Jesus ej ba: “Rejamin lor juõn ruwamaejet ñan jidik ak renaj ko jen e.” (Jon 10:5) Uak eo ad ewõr ruo wãwen. Moktata, jejamin “lor” juõn ruwamaejet. Aet, jej beek ilo buruõd bwe jenaj kajekdone ruwamaejet eo. Ilo mol, nan in Greek eo ilo Bible, nan eo “jejamin” ej kalikar ilo juõn kajin ekajur im alikar bwe jej kajekdone men eo. (Matu 24:35; Dri Hibru 13:5) Kein karuo, jej “ko jene,” ak illok jene. Eñin wõt wãwen eo ejimwe ñan uake ro me katak ko air rejjab ekkar ñan ainikien Shepherd eo Emõn.

20. Ewi wãwen ad naj uak ñe jej jelmae (a) ro emwij bukwelok ir retao, (b) ri kamao ro renana, (c) report in news ko rekalijeklok?

²⁰ Kin men in, ñe jej jelmae ro me rej kwalok katak ko an ro emwij bukwelok ir im rej jumae, jekõnan kõmmane men eo Nan in Anij ej ba: “Komin kakõle ro rej kõmõn jibil ko im lõkatip ko jumae katak eo kom ar katak ie, im illok jen ir.” (Dri Rom 16:17; Taitõs 3:​10) Eindein, Christian jodikdik ro rej jelmae ri kamao ro renana rekõnan jerbale nan in kakabilek eo an Paul eo ear lelok ñan Timothy: “Kwon ko jen mõm ko an likao.” Im ñe jikin news ko rej riap nae kij, jenaj kememej nan in kakabilek ko jet an Paul ñan Timothy: “Re naj okõtõklok lojiliñiir jen mol, im naj illok ñõn bwebwenato rewan. A Kwon jadõr ilo men ko otemjej.” (2 Timote 2:​22; 4:​3-5) Jekdon ewi joñan an emejaja im emõn ainikien ruwamaejet ro, jej ko jen men ko otemjej rej kokkure tõmak eo ad.​—Sam 26:5; Jabõn Kennan Ko 7:​5, 21; Reveles̃õn 18:​2, 4.

21. Ta ãjinkij eo ej kõttar ro rej karmijeteik ainikien ruwamaejet ro?

²¹ Ilo ad kajekdone ainikien ruwamaejet ro, Christian ri kabit ro rej uake nan ko an Shepherd eo Emõn ilo Luk 12:32. Ijo Jesus ej ba ñan ir: “Bwij erik, komin jab mijõk; bwe ebuñburuen Jememuij kin An lewoj ailiñ eo ñõn kom.” Eindein, “sheep ro jet” rej kijoror in roñ nan ko an Jesus: “Komin itok kom dri mõnõnõ an Jema, komin jolit ailiñ eo e ar pojõk ñõn kom jen jinoin lõl.” (Jon 10:16; Matu 25:34) Ej juõn ãjinkij emõn ej kõttar kij elañe jej karmijeteik “ainikien ro jejaje kajjiir”!

Kwoj Kememej Ke?

• Ewi wãwen ruwamaejet eo ilo wanjoñok eo an Jesus kin bwijin sheep eo elukkun jejjet ñan Satan?

• Ewi wãwen ad roñ ainikien ruwamaejet ro rej walok ilo ran kein?

• Ewi wãwen ad maroñ kile kajjen ainikien ruwamaejet ro?

• Ewi wãwen ad maroñ uake ainikien ruwamaejet ro?

[Pija eo ilo peij 27]

Mary ear jelã kajjen Christ

[Pija eo ilo peij 28]

Armij eo rejaje kajjen ejjab kebak sheep ko ilo juõn wãwen alikar

[Pija eo ilo peij 30]

Ewi wãwen ad uake ainikien ruwamaejet ro?