“Yokwe Jimjãn Jimjãten”
“Kin yokwe jimjãn jimjãten, komin menoan dron.” —DRI ROM 12:10.
1, 2. Ta kõtan eo ikõtan ro jeiir im jatiir juõn missionary ilo ran kein im ri jilek Paul rar mõnõnõ kake?
IUMIN 43 yiõ ko in an jerbal einwõt missionary ilo ailiñ ko iturear, Don ear buñbuñ kin an kwalok jitõb eo emãnãn ñan ro ear karejar ñan ir. Ke ear babu im kijenmij wõt ilo nañinmij eo an mae ien an mij, jet ian armij ro rar katak Bible ibben rar etal iumin elõñ thousand mile ñan bed ibben im ba, “Kamsahamnida, kamsahamnida!”—“Kommol, kommol!” ilo kajin Korea. Yokwe eo emãnãn an Don ear tõbar burueir.
2 Wanjoñok in kin Don ejjab juõn men ekãl. Ilo ebeben eo kein kajuõn, ri jilek Paul ear kwalok yokwe eo emũlal ñan ro ear karejar ñan ir. Paul ear lelok mour eo an. Meñe ear juõn armij eberan, ear bareinwõt juõn eo elap an joij im yokwe, “einwõt ke lio dri kõkajiriri ej lale ro nejin.” Ear jejelok ñan congregation eo ilo Tessalonika: “Ein drein kin an lap am yokwe kom, kim ar kõnan lewoj ñõn kom jab gospel eo wõt, a bareinwõt am mour, bwe kom jitenburu ibem.” (1 Dri Tessalonika 2:7, 8) Tokelik ke Paul ear jiroñ ri tõmak ro jein im jatin ilo Ephesus bwe rejamin bar lo e, “ir otemjej elap air jõñ, im buñ ion kenwan Paul, im mejenmaike.” (Jerbal 20:25, 37) Alikar, kõtan eo ikõtan Paul im ro jein im jatin ilo tõmak ear ebak jen air baj bed ilo juõn wõt tõmak. Rar lukkun yokwe don.
Menoan Don im Yokwe
3. Ewi kõtan eo ikõtan nan kein ilo Bible menoan don im yokwe?
3 Ilo Jeje ko ilo Bible, menoan don im tiriamo rej ekkejel ibben kadkad eo emõntata kadkad Christian—yokwe. (1 Dri Tessalonika 2:8; 2 Piter 1:7) Einwõt juõn diamond eaibujuij im elõñ jekjekin, eindein aolep kadkad ko kadkadin Christian rej jerbal ibben don ñan bõktok tokjen ko raibujuij. Rejjab ebake Ri Christian ro mõttair wõt ak bareinwõt ñan Jemeir ilañ. Kin men in, ri jilek Paul ear rejañ ri tõmak ro mõttad: “Yokwe en jab ankiliriõp. . . . Kin yokwe jimjãn jimjãten, komin menoan dron.”—Dri Rom 12:9, 10.
4. Ta melelen nan eo “menoan don”?
4 Nan in Greek eo Paul ear kajerbale “menoan dron” ewõr ruo Mõttan ko ie, juõn ej melelen jimjãn jimjatin im eo juõn ej melelen yokwe eo emãnãn. Ekkar ñan kamelele eo an juõn ri meletlet in Bible, ej melelen bwe jej “kile Ri Christian ro ilo air bed ibben don ilo tiljek einwõt juõn family eo ej rejetak im ebake don.” Ej eindein ke eñjake eo am kin Ri Christian maan im kõrã ro mõttam? Juõn mejatoto emãnãn—juõn eñjake in nukin don—en kobrak congregation eo an Christian. (Dri Galetia 6:10) Inem, book eo The New Testament in Modern English, J. B. Phillips ear je, ej ukõt eon eo ilo Romans 12:10: “En wõr juõn kõttan elukkun mãnãn ikõtad im ro jeid im jatid.” Im ukok eo The Jerusalem Bible ej ba: “Yokwe don einwõt an ri tõmak ro aikwij kõmmane ñan don.” Aet, yokwe ikõtan Ri Christian ro ej kitibuj elaplok jen air baj kõmmane wõt kinke ilo kõmmanwa ej juõn men rej aikwij kõmmane ak kinke rej aikwij kõmmane ekkar ñan kien. “Yokwe jimjãn jimjãten e jaje mon,” jej aikwij “kanuij yokwe dron kin buru[õd].”—1 Piter 1:22.
“Anij e ar Katakin Kom bwe Komin Yokwe Dron”
5, 6. (a) Ewi wãwen an kar Jehovah kajerbal international convention ko ñan katakin armij ro an kin yokwe eo an Christian? (b) Ewi wãwen kõtan eo ikõtan ro jeid im jatid enaj laplok iumin juõn ien eaetok?
5 Meñe ilo lal in “yokwe an elõñ e naj mololok,” Jehovah ej katakin armij ro an ilo ran kein bwe ren “yokwe dron.” (Matu 24:12; 1 Dri Tessalonika 4:9) International convention ko an Ri Kennan ro an Jehovah rej letok ien ko remõn ñan katakin armij kin men in. Ilo kwelok kein relap, Ri Kennan ro ilo ene eo jemaroñ lo ro jeiir im jatiir ilo tõmak jen ailiñ ko retolok, im elõñ rar kabellok moko imwiir ñan jo ri tõmak ro mõttair jen ailiñ ko ilikin. Ilo juõn convention ej kab walok ekkein, jet ri kwelok ro rar itok jen ailiñ ko me armij ro ie ejeja air kwalok eñjake ko air iman mejen armij ro jet. “Ke ri lotok ro rar mottok mokta, rar lukkun ikkũmkũm im immijakjak,” juõn Ri Christian eo ear jibañ kin jikin kiki ear ba. “Ak jiljino ran ko tokelik ke rar bojak in etal jen kim, ri lotok ro im ri mweo rar kiki ibbeir rar atbõkwõje don im jañ.” Yokwe rot in an Christian ear kabole ir im rejamin meloklok kake.” Kwalok jitõb in karuwainene ñan ro jeid im jatid ilo tõmak, jekdon ailiñ ta eo an, emaroñ bõkmantak kadkad ko remõntata jen ri lotok ro im ro ri mweo.—Dri Rom 12:13.
6 Meñe bwebwenato kein ilo convention ko rar kamõnõnõ kij, ak juõn kõtan elaplok ej eddek ñe Ri Christian ro rej jerbal ñan Jehovah ibben don iumin juõn ien eaetok. Ñe jej lukkun jelã kajjen ro jeid im jatid, jemaroñ kalaplok ad kamolol kin kadkad ko remõn kadkadiir—air mol, liki, tiljek, joij, tiriamo, im jab kibbon. (Sam 15:3-5; Jabõn Kennan Ko 19:22) Mark, eo ear jerbal einwõt juõn missionary ilo Africa, ear ba, “Jerbal aera ñan aera ibben ro jeid im jatid ej ejaak juõn kõtan ebak im eban rup.”
7. Ta eo jej aikwij kõmmane ñan bõk yokwe eo an Christian ilo congregation eo?
7 Ñan kõtõbrak im debij kain kõtan rot in ilo juõn congregation, ro uan rej aikwij bed ebake don. Ilo ad keini in bed ilo kwelok ko an Christian, jej kakajur kõtan eo ad ibben ro jeid im jatid ilo tõmak. Ilo ad bed im bõk kunad mokta, ilo ien eo, im elikin ien kwelok ko, jej kõketak im kamakit don “ñõn yokwe im jerbal ko remõn.” (Dri Hibru 10:24, 25) “Ij kememejlok wõt,” juõn elder ilo United States ej ba, “bwe ke I ar ajiri, family eo aõ kar juõn ian family ko eliktata rej etal jen Kingdom Hall eo, kinke kimar mõnõnõ in bwebwenato ibben don toan wõt am maroñ bed ijo.”
Komij Aikwij Ke ‘Kalaplok Buruemi’?
8. (a) Kar ta melelen Paul ke ear rejañ Ri Korint ro bwe ren ‘kalaplok burueir’? (b) Ta eo jemaroñ kõmmane ñan kowõnmanlok yokwe eo emãnãn iloan congregation eo?
8 Ñan kwalok yokwe in eyu, jemaroñ aikwij ‘kalaplok’ buruõd. Ñan congregation eo ilo Korint, ri jilek Paul ear je: “Buruem elaplok. Kom jab obrõk ilo kim.” Paul ear rejañ ir bwe ren uak ilo air ‘kalaplok burueir.’ (2 Dri Korint 6:11-13) Kwe bareinwõt kwomaroñ ke ‘kalaplok buruem’? Kwojjab aikwij kõttar mae ien an armij ro jet kõmmane men in. Ilo letter eo an ñan Ri Rom ro, Paul ear kobaik aikwij eo ñan kwalok yokwe ibben nan in kakabilek in an: “Kin konimarmij, komin koutiej dron.” (Dri Rom 12:10) Ñan kautiej ro jet, kwomaroñ bõk eddo eo im kebak ir ilo kwelok ko. Bareinwõt kwomaroñ rejañ ir ñan kwalok nan ibbam ak ñe kwoj kebojak kin kwelok ko. Ilo am kõmmane men in enaj kabellok juõn ial ñan kalaplok am yokwe.
9. Ta buñten ne ko jet armij rar kõmmani ñan kalaplok jimjera eo air ibben Ri Christian ro mõttair? (Kobaik jabdewõt joñok ko ilo congregation eo.)
9 Family im armij ro kajjojo ilo congregation eo remaroñ ‘kalaplok burueir’ ilo ad lolok ibbeir, bõlen ilo air mõñã don, im ilo air bõk kunair ilo ikkure ko remõn im rerreo ibben don. (Luk 10:42; 14:12-14) Jen ien ñan ien Hakop ej karõk ien ibben kumi ko redik ñan picnic ibben don. “Ro redik im ritto rej bed, ekoba jemen im jinen ajiri ro rej single,” ej ba. “Aolep rej rol ñan moko imwiir kin lemnak ko remõn, im rej eñjake bwe elaplok air ebake don jen mokta.” Einwõt Ri Christian ro, jej aikwij kate kij ñan jab jerbal ibben don einwõt jeid im jatid ilo tõmak wõt, ak einwõt jimjera ro remol.—3 Jon 14.
10. Ta eo jemaroñ kõmmane ñe ewõr abañ ko ikõtan ro jeid im jatid?
10 Bõtab, jet ien, kin ad jab wãppen men in emaroñ kabañ kij jen ad kate kij ñan kaddek jimjera im yokwe eo ad ibben ro jet. Ta eo jemaroñ kõmmane? Moktata, jemaroñ jar ñan Anij bwe jen kaddek juõn kõtan emõn ibben ro jeid im jatid ilo tõmak. Ej ankil an Anij bwe ri karejar ro an ren mõnõnõ in kamao ibben don, im enaj uake jar ko ad jen buruõd. (1 Jon 4:20, 21; 5:14, 15) Bareinwõt jej aikwij jerbal ekkar ñan jar ko ad. Ric, juõn ri kwalok eo ej itoitak Itueañ in Africa, ear kememej kin juõn jein ak jatin ri tõmak ebin an armij ro bed ilo juõn kõtan ebak ibben kin an jaje konono ilo joij im jelã kilen. “Jen aõ jab kebake brother eo, I ar beek in lukkun jelã kajjen,” Ric ear kamelele. “Ilo jemlokin ear alikar bwe jemen brother in ear lukkun bin ilo an katakin leo. Ke I ar melele kin ewi joñan an bin an ri tõmak in aikwij kar kate e ñan anjo im kakõmanmanlok mour eo an, I ar nebar e. Kimro kar lukkun jimjeran don.”—1 Piter 4:8.
Kabellok Buruõm!
11. (a) Ta eo jej aikwiji ñan kaddek yokwe eo emãnãn ilo congregation eo? (b) Etke ekauwatata ilo jitõb elañe jejjab kõnan kwalok eñjake ko ad ñan ro jet?
11 Rainin, elõñ armij rej mour wõt ilo air jañin kaddek juõn jimjera ebak ibben jabdewõt armij. Emenin kaburomõjmõj! Ejjab aikwij—im en jab eindein—ilo congregation eo an Christian. Yokwe eo emol an Christian ejjab melelen ad baj bwebwenato wõt ilo joij im kwalok mwil ko remõn; im ejjab melelen ad kwalok juõn eñjake in mõnõnõ elap iman mejen armij. Jen men in, jej aikwij mõnõnõ in kabellok buruõd, einwõt an kar Paul kõmmane ñan Dri Korint ro, im kwalok ñan ri tõmak ro mõttan bwe ear lukkun itoklimo kin wãwen mour eo air. Meñe ejjab aolep armij rej mõnõnõ in bwebwenato ak konono, ak emaroñ kauwatata bareinwõt elañe jej jook ak kõnan kamakelok iad. “Eo ej mõkelok ian, ej kabukot kõnan eo an, im ej lej nae meletlet otemjej e keie.”—Jabõn Kennan Ko 18:1.
12. Etke communicate ilo juõn wãwen emõn ej aorõk ñan debij juõn kõtan ebak ilo congregation eo?
12 Communicate jen buruõd elap an aorõk ñan bõk juõn jimjera eo emol. (Jon 15:15) Kij aolep jej aikwij jerad ro me jemaroñ kwalok lemnak im eñjake ko ad ilo buruõd. Bareinwõt, Ne elaplok ad jelã kajjen don, enaj bidodolok ad kabwe aikwij ko an don. Ñe jej bojak wõt ñan jibañ don, jej kalaplok yokwe eo emãnãn kin don, im jenaj lo mol eo an nan ko an Jesus: “Mõnõnõ in lelok elap jen bõk.”—Jerbal 20:35; Dri Pilippai 2:1-4.
13. Ta eo jemaroñ kõmmane ñan kwalok bwe jej lukkun yokwe ro jeid im jatid?
13 Ñan kõmman bwe yokwe eo ad emãnãn en wõr tokjen im lap, jej aikwij kwalok e. (Jabõn Kennan Ko 27:5) Ñe yokwe eo ad elukkun mol, mejed enaj kwalok e, im emaroñ kamakit buruen armij ro jet bwe ren emmakit ilo jimwe. “Maram in mej, ej kamõnõnõik buru,” emaan eo emeletlet ear je. (Jabõn Kennan Ko 15:30) Kõmman ko rejoij rej bareinwõt kowõnmanlok yokwe eo emãnãn. Meñe ejelok armij emaroñ wiaik yokwe eo emãnãn, lelok juõn men in lelok eo jen buru emaroñ lukkun aorõk. Juõn card, juõn letter, im “juõn nan, ñe ekar air kwalok e,”—men kein aolep remaroñ kwalok yokwe eo emãnãn. (Jabõn Kennan Ko 25:11; 27:9) Elikin ad jimjeraik ro jet, jej aikwij kejbãrok e ilo ad kwalok yokwe eo emãnãn ilo ejelok kibbon. Elaptata ilo ien ko ewõr aikwij ie, jekõnan bojak in jibañ ro jerad. Bible eo ej ba: “Juõn jeran ej yokwe ien otemjej; im juõn jein im jãtin, e ar lotak bwe en dri jibõñ ilo ien jorran.”—Jabõn Kennan Ko 17:17.
14. Ta eo jemaroñ kõmmane elañe juõn armij ejjab kõnan bõk yokwe eo ad?
14 Emol, jejjab maroñ kõtmene ñan ebake aolep ilo congregation eo. Enaj wõr jet ro me jej ebaklok ir jen ro jet. Inem elañe juõn armij ejjab kebake yuk meñe kwo kõnan, jab mõkaj in bõk lemnak eo bwe ewõr juõn abañ ibben ak ibbem. Im jab kajeoñ in iuni armij eo bwe en ejaak juõn kõtan ebak ñan kwe. Elañe kwoj baj joij wõt ñan armij eo joñan wõt am maroñ, kwonaj kabellok wõt juõn ial in kaddek juõn jitõb in jimjera ilo ran ko tokelik.
“Ij Mõnõnõ Kake Yuk”
15. Ilo wãwen et eo nan in nebar im kamolol, ak likjap in kwalok e, ej jelet armij ro jet?
15 Alikar bwe ilo ien eo ear baptais, Jesus ear lañliñ ke ear roñ nan kein jen lañ: “Ij mõnõnõ kake yuk”! (Mark 1:11) Nan in kowãppen in ear kabinlok mol eo bwe Jemen ear yokwe e. (Jon 5:20) Ekaburomõjmõj bwe, jet armij rejañin roñ juõn nan in kamolol im nebar jen ro rej kautiej im yokwe ir. “Elõñ jodikdik ro einwõt ña ejelok ro uan family eo air rej bõk katak ko an Christian rej tõmak kake,” Ann ear ba. “Ilo mweo rej kananaik wõt kim jodikdik ro. Ej lukkun kaburomõj kim.” Bõtab, ñe rej erom ro uan congregation eo, rej eñjake yokwe eo emãnãn jen juõn family ilo jitõb ej rejetak im kea kin don—jemen im jinen im maan im kõrã ro ilo tõmak.—Mark 10:29, 30; Dri Galetia 6:10.
16. Etke kwalok lemnak in kananaik ro jet ejjab jibañ ir?
16 Ilo jet mantin ailiñ ko, jemen im jinen ajiri ro, ritto ro, im ri kaki ro ejeja air kamolol im nebar jodikdik ro, kinke rej lemnak bwe nebar rot kein renaj kajowan ak kautiej burueir le jen joñan. Lemnak rot kein remaroñ bareinwõt jelet family ko an Christian im congregation eo. Ñe rej kwalok air lemnak kin juõn katak ak men ko jet rar kõmmani, ritto ro remaroñ ba: “Ebwe, ak kwomaroñ kakõmõnmõnloke!” Ak ilo bar juõn wãwen, remaroñ kananaik juõn jodikdik. Ilo air kõmmane men in, elõñ rej tõmak bwe rej kamakit buruen jodikdik ro bwe ren kate ir ñan kõtõbrak mejenkajjik ko air. Ak ekkã an wãwen in jelet ir ilo juõn wãwen enana, kinke jodikdik ro remaroñ ebwer ak lemnak bwe ejelok air maroñ ñan kõmmane men ko.
17. Etke jej aikwij bukõt ien ko remõn ñan kamolol ro jet?
17 Bõtab, jejjab aikwij baj kwalok wõt nan in kamolol im nebar mokta jen ad lelok nan in kauwe ak kajimwe ñan ir. Kamolol jen buru eo ej kowõnmanlok yokwe eo emãnãn ibwiljin ro uan family eo im congregation eo, im ej rejañ jodikdik ro ñan bukõt ri tõmak ro jeiir im jatiir ñan bõk nan in kakabilek ko. Inem ijellokin ad kõtlok bwe mantin ailiñ eo en tel kij kin ewi wãwen ad maroñ jibañ ro jet, jen “kõnõk armij ekãl, eo ekar ñõn Anij emwij kõmõne ekal ilo wãnik im kwojarjar in mol.” Kamolol im nebar ir einwõt Jehovah ej kõmmane.—Dri Epesõs 4:24.
18. (a) Kom jodikdik ro, ewi wãwen am maroñ watõk nan in kakabilek ko jen ritto ro? (b) Etke ritto ro rej aikwij jar im lemnak kin ewi wãwen air maroñ kwalok nan in kakabilek ko?
18 Ak, kom, jodikdik ro, komin jab lemnak bwe elañe ritto ro rej kajeik ak kajimweik kom ej kinke rej dike kom. (Ekklisiastis 7:9) Ilo oktan! Rej kaorõk im yokwe yuk. Elañe ejjab eindein, etke renaj kar kate im kabañ ir make ñan konono ibbem kin abañ eo? Kinke rej jelã ewi joñan an nan ko maroñ jelet armij, ritto ro—elaptata elder ro an congregation—ekkã air jolok elap ien ñan kalmenlokjen im jar mokta jen air lelok nan in kakabilek ko, kinke rekõnan kõmman wõt men eo emõn.—1 Piter 5:5.
“Iroij [Jehovah] e Kanuij Joij im Tiriamokake”
19. Etke ro rej eñtan kin men in kaburomõj ko remaroñ reilok ñan Jehovah ñan bõk jibañ jen e?
19 Men ko rejjab emõn remaroñ walok elikin ad kwalok yokwe eo emãnãn im men in emaroñ kar kamakit jet armij ñan lemnak bwe ejelok tokjen kwalok yokwe eo emãnãn kinke ej bar kaburomõj kij. Ej aikwij wõr beran im tõmak eo ekajur bwe ren bar kabellok burueir im jibañ ro jet. Ak ren kar jab meloklok bwe Jehovah “E jab etolok jen kij otemjej.” Ej kir kij ñan ruaklok ñan e. (Jerbal 17:27; Jemes 4:8) Bareinwõt ej jelã bwe jejjab kõnan buromõj, im ej kallimuri kij bwe enaj jurake im jibañ kij. Ri jeje sam David ear kallimur: “Jeova ej ebak ñõn ro eruj burueir im Ej lomoren ro retã wõt ilo air.”—Sam 34:18.
20, 21. (a) Ewi wãwen ad jelã bwe jemaroñ bõk juõn kõtan ebak ibben Jehovah? (b) Ta eo jej aikwiji ñan bõk juõn kõtan ebak ñan Jehovah?
20 Juõn jimjera eo ebak ñan Jehovah ej kõtan eo eaorõktata jej aikwij kaddek. Ak jemaroñ ke kaddek kõtan rot in? Aet. Bible eo ej kalikar kin ewi joñan ebakin ri wãnik maan im kõrã ro rar bed ñan Jemed ilañ. Eñjake ko air remãnãn iman mejen armij rar kejbãroki ñan kaberan kij bwe kij bareinwõt jemaroñ ruaklok Jehovah.—Sam 23, 34, 139; Jon 16:27; Dri Rom 15:4.
21 Armij otemjej remaroñ kõtõbrak kien ko an Jehovah ñan bed ilo juõn kõtan ebak ibben. “O Jeova, wõn e naj ber ilo imõn kaber eo Am?” David ear kajitõk. “Eo ejime an etetal, ej kõmõn wãnik, im e konono mol ilo buruen.” (Sam 15:1, 2; 25:14) Ke jej lo bwe karejar ñan Anij ej jebar leen ko remõn im kõmman bwe jen wini tel im kejbãrok eo an, jenaj jelã bwe “Iroij [Jehovah] e kanuij joij im tiriamokake.”—Jemes 5:11.
22. Kain kõtan rot eo Jehovah ekõnan bwe armij ro an ren bõki?
22 Emol bwe ej juõn jerammõn elap ibbed bwe Jehovah ekõnan juõn kõtan ebak ibben armij ro rejjab wãppen! Jejjab kõnan ke kwalok yokwe eo emãnãn ibben don? Kin jibañ jen Jehovah, kij kajjojo jemaroñ lelok im bõk yokwe eo emãnãn eo ej kadkadin jimjãn jimjatin Christian eo ad. Iumin Ailiñ eo an Anij, armij otemjej ion lal renaj bõk yokwe in emãnãn ñan indio.
Kwomaroñ Ke Kamelele?
• Kain jitõb rot eo ej bed ilo congregation eo an Christian?
• Ewi wãwen kij kajjojo jemaroñ kwalok yokwe eo emãnãn ilo congregation eo?
• Ewi wãwen kwalok ad kamolol jen buruõd ej kowõnmanlok yokwe eo an Christian?
• Ewi wãwen yokwe eo emãnãn ej rejetak im kejbãrok kij?
[Pija eo ilo peij 23]
Yokwe ibwiljin Ri Christian ro rej kalikar juõn men elaplok jen baj juõn jerbal wõt
[Pija ko ilo peij 25]
Kwomaroñ ke ‘kalaplok buruem’ ilo am kwalok yokwe eo emãnãn?
[Pija eo ilo peij 26]
Kwoj kananaik ke ak rejañ armij?