Kwon Lor Joñok Eo Jesus Ear Likiti
“Bwe I ar lewoj ñõn kom juõn joñok, bwe komin bareinwõt kõmõn einwõt I ar kõmõn ñõn kom.”—JON 13:15.
1. Etke Jesus ej juõn joñok emõn me Ri Christian ro rej aikwij anõke?
ILO aolepen bwebwenato in armij, juõn wõt armij ear mour im ear jab jerawiwi. Armij in ej Jesus. Ijellokin Jesus, “ejelok armij e jab bwir.” (1 Kiñ Ro 8:46; Dri Rom 3:23) Kin un in, Ri Christian ro remol rej watõk Jesus einwõt joñok eo ewãppen jej aikwij anõke. Ilo Nisan 14, 33 C.E., mokta lok jidik jen an kar mij, Jesus make ear jiroñ ri kalor ro an bwe ren anõk e. Ear ba: “Bwe I ar lewoj ñõn kom juõn joñok, bwe komin bareinwõt kõmõn einwõt I ar kõmõn ñõn kom.” (Jon 13:15) Ilo boñin eo eliktata, Jesus ear kwalok elõñ wãwen ko me Ri Christian ro rej aikwij kate ir bwe ren einwõt e. Ilo katak in, jenaj etale jet iair.
Aikwij eo Ñan Kwalok Ettã Buru
2, 3. Ilo wãwen et ko Jesus ear juõn joñok ewãppen kin kwalok ettã buru?
2 Ke Jesus ear rejañ ri kalor ro an bwe ren lor joñok eo ear likiti, ear konono elaptata kin ettã buru. Elõñ alen, ear kakabileke ri kalor ro an bwe ren kwalok ettã buru, im ilo boñin Nisan 14, ear kwalok ettã buru eo an make ilo an kwal neen ri jilek ro an. Inem Jesus ear ba: “Inem elañe Ña, ami Iroij im Dri Kaki, I ar kwoli neõmi; emõn komin kwoli neen dron.” (Jon 13:14) Tokelik, ear jiroñ ri jilek ro an ñan lor joñok eo ear likiti. Im ear juõn joñok elap an emõn kin ettã buru!
3 Ri jilek Paul ej jiroñ kij bwe mokta jen an kar itok ñan lal, Jesus ear “ilo wãwen Anij.” Mekarta, ear make kajeramel E im erom juõn armij ettã. Elaplok jen men in, “E ar mõke kõtãik E, im E ar bokake ñõn mij, aet, mij eo ion [alal in eñtan eo].” (Dri Pilippai 2:6-8) Baj lemnak mõk kin men in. Jesus, armij eo kein karuo ilo an utiej ijoko otemjej ilañ im lal, ear errã ñan an ettã lok jidik jen enjel ro, ñan an lotak einwõt juõn niñniñ eo ejelok an maroñ ñan kõmman jabdewõt, ñan an rittolok im aikwij bokake jemen im jinen ro rejjab wãppen, im eliktata ñan mij einwõt juõn ri kowadoñ. (Dri Kolosse 1:15, 16; Dri Hibru 2:6, 7) Ear juõn wanjoñok ekabwilõñlõñ kin ettã buru! Jemaroñ ke anõk “lemnok in” im kaddeklok “ettã [buru]” rot in? (Dri Pilippai 2:3-5) Aet, ak ejjab bidodo kõmmane.
4. Ta men ko rej kõmmani bwe armij ren utiej burueir, im etke utiej buru ekauwatata?
4 Oktan ettã buru ej utiej buru. (Jabõn Kennan Ko 6:16-19) Utiej buru ear tellok ñan buñ eo an Satan. (1 Timote 3:6) Ebidodo an eddeklok ilo buruen armij, im ñe ej bed, ebin joloke. Armij rej utiej buru kin ailiñ eo air, jowi eo air, men ko mweieir, jelãlokjen eo air, tõbrak ko air ilo lal in, utiejiir, baotokiir, maroñ eo air ñan ikkure, im elõñ men ko jet. Ak, ejelok ian men kein raorõk ibben Jehovah. (1 Dri Korint 4:7) Im elañe rej kõmman bwe jen utiej buru, rej kokkure kõtan eo ad ibben. “Bwe meñe Jeova eutiej, Ej lale ro retã: ro dri jua E jela kajeir jen etolok.”—Sam 138:6; Jabõn Kennan Ko 8:13.
Ettã Buru Ibwiljin Ro Jeid im Jatid
5. Etke elder ro rej aikwij kwalok ettã buru?
5 Jerbal im tõbrak ko ad ilo jerbal eo an Jehovah ren jab kõmman bwe jen utiej buru; im bareinwõt eddo ko ad ilo congregation eo. (1 Kronikel 29:14; 1 Timote 6:17, 18) Emol, ñe elap an aorõk eddo ko ad, elaplok ad aikwij kwalok ettã buru. Ri jilek Peter ear rejañ elder ro, bwe ren jab “iroij ion men eo emwij likite na ibemi, a komin mõke joñok ñõn bwij eo.” (1 Piter 5:3) Kar jitõñ elder ro bwe ren ri karejar ro im joñok ko, jab iroij ro.—Luk 22:24-26; 2 Dri Korint 1:24.
6. Ilo ta wãwen ko ilo mour an Ri Christian ro jej aikwij kwalok ettã buru?
6 Ejjab elder ro wõt rej aikwij kwalok ettã buru. Ñan likao ro, me rej utiej buru kin an emõn lemnak ko air im ekajur enbwiniir ñe keidi ibben ro reritto, Peter ear je: “Komin kõtãik kom ñõn ridto rõn. Aet, kom otemjej komin etã buruemi, im korijer ñõn dron: bwe Anij ej jumae ro dri jua, a Ej lelok joij ñõn ro dri etã burueir.” (1 Piter 5:5) Aet, ettã buru einwõt Christ eaorõk ñan kij aolep. Jej aikwij ettã buru ñan kwalok kin news eo emõn, elaptata ñe jej jelmae ro rejjab kea ak relej. Jej aikwij ettã buru ñan bõk kakabilek ak ñan kabidodo lok wãwen mour eo ad bwe jen maroñ kalaplok ijo kunad ilo jerbal in kwalok nan. Bareinwõt, jej aikwij ettã buru, beran im tõmak ñe jej kijenmij kin news ko rej kananaik kij, men in kajorrãn kin kien, ak matõrtõr ko relej.—1 Piter 5:6.
7, 8. Ta jet ian wãwen ko jemaroñ kaddeklok ettã buru?
7 Ewi wãwen an juõn armij maroñ anjo ion utiej buru im kõmman bwe “kin etã [buru] jabrewõt en lemnok ro jet remõn jen e”? (Dri Pilippai 2:3) Ej aikwij watõk e make einwõt Jehovah ej watõk e. Jesus ear kamelele kin lemnak eo ejimwe ke ear ba: “Ein drein bareinwõt kom, ñe komij kõmõn men ko otemjej jiroñ kom, komin ba, Kim ro dri korijer bãt: kim ar kõmõn kwonam wõt.” (Luk 17:10) Kememej, ejelok juõn men jemaroñ kõmmane me jemaroñ keidi ibben ta ko Jesus ear kõtõbraki. Ak, Jesus ear kwalok ettã buru.
8 Bareinwõt, jemaroñ kajitõk ibben Jehovah kin jibañ ñan kaddek juõn lemnak ejimwe kin kij make. Einwõt ri jeje sam, jemaroñ jar: “Kwon katakin iõ ekajet emõn kab jelalokjen; bwe I ar tõmak nan in kaiñi ko Am.” (Sam 119:66) Jehovah enaj jibañ kij kaddek juõn lemnak ejokkin wõt juõn kin kij make, im enaj kajerammõn kij kin an ettã buruõd. (Jabõn Kennan Ko 18:12) Jesus ear ba: “Jabrewõt eo e naj mõke koutiej e, naj kõtaik e; im eo e naj kõtaik e, naj koutiej e.”—Matu 23:12.
Juõn Lemnak Ekkar kin Jimwe im Bwid
9. Ewi wãwen an kar Jesus lemnak kin jimwe im bwid?
9 Meñe ear mour iumin 33 yiõ ko ibwiljin armij ro rejjab wãppen, Jesus ear kejbãrok bwe en “ejelok jerawiwi iben.” (Dri Hibru 4:15) Ilo mol, ke ear kanan kin Messiah eo, ri jeje sam ear ba: “Kw’ar yokwe wãnik im drike jerawiwi.” (Sam 45:7; Dri Hibru 1:9) Ilo wãwen in bareinwõt Ri Christian ro rej kate ir ñan anõk Jesus. Rejjab baj jelã wõt jimwe jen bwid; rej dike ta eo ebwid im yokwe jimwe. (Amos 5:15, NW) Men in ej jibañ ir ñan tarinaik kõnan ko rejerawiwi rar joleti.—Jenesis 8:21; Dri Rom 7:21-25.
10. Elañe jej kõmanman “nana” ilo jab ukwelok, ta lemnak eo jej kwaloke?
10 Jesus ear ba ñan Ri Pharisee eo Nicodemus: “Bwe jabrewõt eo ej kõmõnmõn nana ej kijirãte maram, im e jab itok ñõn maram ñe ab kowe jerbal ko an. A eo ej kõmõnmõn mol, ej itok ñõn maram, bwe en alikar jerbal ko an, bwe ar kõmõni ilo Anij.” (Jon 3:20, 21) Lemnak: John ear kile Jesus einwõt “Eo Maram emol, ej kamaram armij otemjej.” (Jon 1:9, 10) Ak, Jesus ear ba bwe elañe jej “kõmõnmõn nana”—men ko rebwid, me Anij ejjab buñburuen kaki—jej dike meram. Baj lemnak mõk, kwomaroñ ke dike Jesus im kien ko an? Ak, eñin men eo armij rej kõmmane ñe rej jerawiwi ilo jab ukwelok. Bõlen ejjab eindein wãwen air watõk men ko, ak ealikar, ej eindein lemnak eo an Jesus.
Ewi Wãwen Jemaroñ Kaddek Lemnak eo an Jesus kin Jimwe im Bwid
11. Ta eo eaorõk elañe jekõnan kaddeklok lemnak eo an Jesus kin jimwe im bwid?
11 Jej aikwij juõn melele ealikar kin ta eo ejimwe im ta eo ebwid ekkar ñan lemnak eo an Jehovah. Wãwen eo wõt jej maroñ bõk melele in ej ikijen ad katak Nan eo an Anij, Bible eo. Ñe jej katak, jej aikwij jar einwõt an kar ri jeje sam jar: “Kwon kwalok ñõn iõ ial ko Am, O Jeova, kwon katakin iõ kin ial ko Am.” (Sam 25:4) Bõtab, kememej bwe Satan elap an etao. (2 Dri Korint 11:14) Emaroñ ukõt men eo ebwid im kõmmane bwe en einwõt emõn ñan juõn Ri Christian ejjab ekkõl. Kin men in, ej aikwij mũlal ad kalmenlokjen kin ta eo jej katak im bokake kakabilek eo an “dri korijer e tiljek im meletlet.” (Matu 24:45-47) Katak, jar, im kalmenlokjen kin ta eo jej katak renaj jibañ kij ñan rittolok ilo lemnak im bed ibwiljin ro “kin air minene rej maroñ in jela kajen emõn im nana.” (Dri Hibru 5:14) Inem jenaj dike ta eo enana im yokwe ta eo ejimwe.
12. Ta nan in kakabilek eo ilo Bible ej jibañ kij bwe jen jab kõmman nana?
12 Elañe jej dike ta eo enana, jejamin kõtlok bwe juõn kõnan kin men ko renana en eddeklok ilo buruõd. Elõñ yiõ ko elikin an kar Jesus mij, ri jilek John ear je: “Komin jab yokwe lõl ak men ko ilo lõl. Elañe jabrewõt armij ej yokwe lõl, yokwe Jemer e jab ilo e. Bwe men ko otemjej ilo lõl, mõm an kõniek, mõm an mej ko, im wuj wan an mour in, re jab an Jemer a rej an lõl.”—1 Jon 2:15, 16.
13, 14. (a) Etke yokwe men ko an lal in ekauwatata ñan Ri Christian ro? (b) Ewi wãwen jemaroñ bõprae ad kaddeklok juõn yokwe kin men ko an lal in?
13 Jet remaroñ lemnak bwe ejjab aolep men ko ilo lal in renana. Meñe eindein, lal in im men in kareelel ko an remaroñ kamad kij jen ad karejar ñan Jehovah. Im ejelok jabdewõt men me lal in ej letoke emaroñ karuaklok kij ñan Anij. Kin men in, elañe jej jino yokwe men ko ilo lal in, meñe men kein rejjab nana, jej bed ilo juõn ial ekauwatata. (1 Timote 6:9, 10) Bareinwõt, elõñ men ko ilo lal in renana im remaroñ kokkure kij. Elañe jej aluij movie ko ak television program ko me rej kwalok kin lej, arõk mweiuk, im mour in lũñ, men kein remaroñ oktak im emõn—inem erom juõn men in kabo ñan kij. Elañe elap ad tel ad ibben ro elap air itoklimo ñan kakõmanmanlok wãwen mour ko air ak ñan kalaplok business ko air, men kein remaroñ oktak im aorõk ibbed bareinwõt.—Matu 6:24; 1 Dri Korint 15:33.
14 Ijo tu-rãjet, elañe jej lo lañliñ kin Nan eo an Jehovah, “mõm an kõniek, mõm an mej ko, im wuj wan an mour in” rejamin kareel kij. Bareinwõt, elañe jej kamao ibben ro rej likit mokta Ailiñ in Anij, jenaj einwõt ir, ilo ad yokwe ta eo rej yokwe im bõprae men ko rej bõprae.—Sam 15:4; Jabõn Kennan Ko 13:20.
15. Einwõt kar eindein ibben Jesus, ewi wãwen yokwe wãnik im kijirãte nana enaj kakajur kij?
15 Kijirãte nana im yokwe wãnik ear jibañ Jesus ñan reilok ñan “lõñliñ ar likit e iman.” (Dri Hibru 12:2) Men in emaroñ mol ibbed bareinwõt. Jej jelã bwe “lõl e jokolok im mõm ko an.” Jabdewõt mõnõnõ me lal in ej letoke ej ñan jidik wõt ien. Bõtab “eo ej kõmõnmõn ankil an Anij ej berwõt in drio.” (1 Jon 2:17) Kin an kar Jesus kõmanman ankil an Anij, ear kabellok ial eo bwe armij ren bõk mour indio. (1 Jon 5:13) Jen anõk e im bõk tokjen jen ial in tiljek eo an.
Kijenmij Iumin Matõrtõr
16. Etke eaorõk bwe Ri Christian ro ren yokwe don?
16 Jesus ear kwalok bar juõn wãwen me ri kalor ro an renaj kar anõk e, ilo an ba: “Eñin kien eo Aõ, Bwe komin yokwe dron, einwõt I ar yokwe kom.” (Jon 15:12, 13, 17) Elõñ un ko unin an Ri Christian ro yokwe ro jeiir im jatiir. Ilo ien in, Jesus ear lap an lemnak kin kijirãt eo renaj jelmaiki jen lal in. Ear ba: “Elañe lõl ej kijirãte kom, komij jela bwe e ar kijirãte Iõ mokta jen kom. . . . Dri korijer e jab utiej jen iroij eo an. Elañe r’ar matõrtõr Iõ, re naj bareinwõt matõrtõre kom.” (Jon 15:18, 20) Aet, meñe ilo ien eo rej bõk matõrtõr, Ri Christian ro rej einwõt Jesus. Rej aikwij kaddek juõn lukluk ewõr yokwe im ekajur ñan jibañ ir kijenmij kin kijirãt in.
17. Etke lal in ej kijirãte Ri Christian ro remol?
17 Etke lal in enaj kijirãte Ri Christian ro? Kinke, einwõt Jesus, “re jab jen lõl.” (Jon 17:14, 16) Rejjab bõk kunair ilo makitkit ko kin tarinae im kien, im rej bokake kakabilek ko ilo Bible, ikijen kwojarjarin mour im kejbãrok kien mwil eutiej. (Jerbal 15:28, 29; 1 Dri Korint 6:9-11) Mejenkajjik ko air relap rej kin men ko lor jitõb, jab men ko lor kanniek. Rej jokwe ilo lal, ak einwõt Paul ear je, ‘rejjab kanuij jerbale.’ (1 Dri Korint 7:31) Emol, jet rar nebar Ri Kennan ro an Jehovah kin mwiliir eutiej. Ak Ri Kennan ro an Jehovah rejjab ebbururu kin air kõnan bukõt bwe ro jet ren nebar ak bõk ir. Tokjen men in, elõñ ilo lal in rejjab melele kake ir, im elõñ rej dike ir.
18, 19. Ilo air lor joñok eo an Jesus, ewi wãwen Ri Christian ro rej kijenmij iumin jumae im matõrtõr?
18 Ri jilek ro an Jesus rar lo kijirãt eo elap an lal in ke rar jibwe im mõn Jesus, im rar lo ewi wãwen Jesus ear kijenmij iumin kijirãt in. Ilo jikin kallip in Gethsemane, ri jumae ro an kabuñ ko rar itok im jibwe Jesus. Peter ear kajeoñ in kejbãrok e ilo an kajerbal juõn jãje, ak Jesus ear ba ñan Peter: “Kwon bar likit am jãji na ilo nien: bwe ro otemjej rej bõk jãji, re naj mij kin jãji.” (Matu 26:52; Luk 22:50, 51) Ilo ien ko remotlok, Ri Israel ro rar tarinaik ri kijirãt ro air kin jãje. Ak, kiõ, eoktak. Ailiñ in Anij ear jab “jen lõl” im kar ejelok line ko rej kajenolok Ailiñ eo ñan kejbãroke. (Jon 18:36) Ejjabto Peter enaj mõttan juõn ailiñ ilo jitõb, me ro uan renaj mour ilañ. (Dri Galetia 6:16; Dri Pilippai 3:20, 21) Kin men in, jen ien eo, ri kalor ro an Jesus renaj kijenmij iumin jumae im matõrtõr ilo wãwen eo Jesus ear kõmmane—ilo beran ak ilo ainemõn. Ilo liki rej likit men otemjej ilo pein Jehovah im atartar ion ñan bõk kajur ñan kijenmij.—Luk 22:42.
19 Elõñ yiõ ko tokelik, Peter ear je: “Bwe Kraist e ar iñtan kin kom, im likit joñok ñõn kom, bwe komin anõke jenkwõn ne ko neen. . . . Eo ke ar konono nae E, e ar jab bar konono nae; ke E ar iñtan E ar jab kalelñoñ, a E ar mõke likit E ñõn Eo ej ekajet jime.” (1 Piter 2:21-23) Einwõt Jesus ear kakkõl, Ri Christian ro rar iion matõrtõr ko relej iumin elõñ yiõ ko. Ilo ebeben eo kein kajuõn im ilo ran kein jimor, Ri Christian ro rar lor joñok eo an Jesus im ewõr juõn lokbook eaibujuij kin kijenmij ilo tiljek, me ej kwalok bwe rej kejbãrok air tiljek ilo ainemõn. (Reveles̃õn 2:9, 10) Kij kajjojo jen kõmman eindein ñe jej jelmae ejja wãwen kein wõt.—2 Timote 3:12.
“Komin Kõnõk Iroij Jisõs Kraist”
20-22. Ilo wãwen et eo Ri Christian ro rej “kõnõk Iroij Jisõs Kraist”?
20 Paul ear jeje ñan congregation eo ilo Rome: “A komin kõnõk Iroij Jisõs Kraist, im jab kapojõk kin kõniek, ñõn jujurmelea ko an.” (Dri Rom 13:14) Ri Christian ro rej kõnak Jesus, ilo kõkkar, einwõt juõn nuknuk. Rej kate ir ñan kajeoñe kadkad ko kadkadin im makitkit ko an Master eo air, meñe ilo juõn joñan me armij ro rejjab wãppen rej kõmmane.—1 Dri Tessalonika 1:6.
21 Jemaroñ lo tõbrak in “kõnõk Iroij Jisõs Kraist” elañe jej jelã kin mour eo an im kate kij ñan mour einwõt ear mour. Jej anõk ettã buru eo an, yokwe eo an kin wãnik, an kijirãte nana, yokwe eo an kin ro jein im jatin, an jab mõttan lal, im an kijenmij ilo meanwõd kin eñtan ko. Jejjab ‘kapojõk kin kõniek, ñõn jujurmelea ko an’—melelen, jejjab kõmmane bwe en mejenkajjik eo ad elap ñan jibadõk tokjen ko an lal in ak ñan bukõt men in kamõnõnõ ko an kanniek. Jen an eindein, ñe jej kõmmane juõn bebe ak kamadmõde juõn abañ, jej kajitõk: ‘Ta eo Jesus enaj kar kõmmane elañe ear iion wãwen in? Ta eo enaj kar kõnan bwe in kõmmane?’
22 Eliktata, jej anõk Jesus ilo ad boub in “kwalok gospel” eo. (Matu 4:23; 1 Dri Korint 15:58) Ilo wãwen in bareinwõt, Ri Christian ro rej lor joñok eo Jesus ear likiti, im katak in tok juõn enaj bwebwenato kin ewi wãwen jemaroñ kõmmane men in.
Kwomaroñ ke Kamelele?
• Etke eaorõk bwe juõn Ri Christian en kwalok ettã buru?
• Ewi wãwen jemaroñ kaddeklok juõn lemnak ekkar kin jimwe im bwid?
• Ilo wãwen et eo Ri Christian ro rej anõk Jesus ilo air kijenmij iumin jumae im matõrtõr?
• Ewi wãwen jemaroñ “kõnõk Iroij Jisõs Kraist”?
[Pija eo ilo peij 17]
Jesus ear likit joñok eo ewãppen kin kwalok ettã buru
[Pija eo ilo peij 18]
Aolep wãwen ko in mour an juõn Ri Christian, ekoba an kwalok nan, ej aikwij kwalok ettã buru
[Pija eo ilo peij 19]
Satan emaroñ kõmman bwe men in kamõnõnõ ko rejakkar ren einwõt emõn ñan juõn Ri Christian
[Pija eo ilo peij 20]
Yokwe eo an ro jeid im jatid enaj kakajur kij nae jumae