Men in Bwilõñ ko Mol ke ak Inoñ Bajjek?

EMÕKAJ an kar juõn emaan itoklimo in kalimjek peba eo kar kaddebe ion juõn wa, “Men in Bwilõñ ko Rej Lukkun Walok​—Baj Kajitõk Wõt Mõk Ibben Enjel Ro.” Meñe leo ear elap an tõmak ilo kabuñ, ear jab lukkun jelã ta melelen. Peba eo ear melelen ke bwe ri kattõr eo ear tõmak ilo men in bwilõñ ko? Ak, ear ke ilo mol, juõn wãwen kõmman kejak ñan kwalok bwe ejjab tõmak ilo men in bwilõñ ko im enjel jimor?

Kwomaroñ itoklimo kin ta eo juõn ri jeje book ilo Germany Manfred Barthel ear ba: “Men in bwilõñ ko ej juõn nan me emõkaj an kejebel armij ro ilo ruo kumi ko rej tarinaik don.” Ro rej tõmak ilo men in bwilõñ ko rej tõmak bwe rej walok im bõlen emakijkij air walok.a Ñan wanjoñok, rej kwalok bwe ilo Greece ilo yiõ ko rej kab motlok, ri tõmak ro rar ba bwe juõn alen ilo juõn alliñ men in bwilõñ ko rej walok. Men in ear kõmman bwe juõn bishop ilo Greek Orthodox Church en kakkõl: “Ri tõmak eo ekkã an watõk Anij, Mary, im ri kwojarjar ro ekkar ñan kadkad ko kadkadin armij. Ri tõmak ro ren kar jab kalaplap kin men kein.”

Tõmak ilo men in bwilõñ ko ejjab lap ilo jet ailiñ ko. Ekkar ñan juõn ekkatak kar je ilo Germany ilo 2002, 71 percent in armij ro ie rej watõk men in bwilõñ ko einwõt inoñ bajjek, im jab juõn men emol an kar walok. Bõtab, ibwiljin ro ediklok jen juõn mõttan jilu in ro rej tõmak ilo men in bwilõñ ko rej kõrã ro jilu me rej ba bwe rar bõk juõn ennan jen Virgin Mary. Jet alliñ ko elikin an kar Mary walok ñan ir​—ibben enjel ro im juõn dove⁠—newspaper eo ilo Germany Westfalenpost ear ba: “Ñan kiõ enañin 50,000 armij ro jen ailiñ ko jet, armij ro me rekõnan bõk kejmour, im ro rekõnan jelã bajjek rar kwalok air itoklimo ilo vision ko kõrã rein rar loi.” Rej kõtmene bwe bar 10,000 armij renaj itok ñan bukwon eo ñan lale Mary elañe enaj bar weaktok. Rej ba bwe Virgin Mary ear bar walok ilo Lourdes, France, ilo 1858, im ilo Fátima, Portugal, ilo 1917.

Ta Kin Kabuñ ko Rejjab Christian?

Tõmak ilo men in bwilõñ ko jej lo ilo enañin aolep kabuñ ko. The Encyclopedia of Religion ej kamelele bwe ear oktak lemnak ko an ro rar kajutak kabuñ ko an Buddhism, Christian, im Islam kin men in bwilõñ ko, ak ej ba: “Bwebwenato eo an kabuñ kein ej lukkun kwalok bwe men in bwilõñ ko im bwebwenato ko kin men in bwilõñ ko kar mõttan tõmak in kabuñ eo an armij.” Book in ej ba bwe “jet ien Buddha make ear kõmman men in bwilõñ ko.” Tokelik, ke “kabuñ in Buddhism ear emmakit ñan China, missionary ro air ekkã air kwalok kajur ko air ñan kõmman men in bwilõñ ko.”

Elikin an jitõñlok ñan jet men in bwilõñ ko, encyclopedia eo ej kajemlok: “Juõn armij emaroñ jabojak in bõk aolep bwebwenato kein kin men in bwilõñ ko me ri jeje bwebwenato kin armij rar konono kaki, ak ejelok bere bwe rar kõmmane men in kin air kõnan kaibujuij Buddha, eo ear maroñ kamaroñ ri kalor ro an rekijejeto kin kajur kein rekabwilõñlõñ.” Ejja encyclopedia eo wõt ej ba kin Islam: “Jarlepju in ro ilo jukjuk im bed eo an Islam ejañin bõjrak air kõtmene ñan an walok men in bwilõñ ko. Manit ko (hadīths) rej kwalok bwe elõñ alen Muhammad ear kõmman men in bwilõñ ko ilobwilij. . . . Meñe elikin air kar mij, ri kwojarjar ro rar maroñ kõmman men in bwilõñ ko ilo wuliej ko air make ñan tokjen eo an ro retiljek, im armij ro rej akwelap bwe ri kwojarjar ro ren jibañ ir.”

Ta kin Men in Bwilõñ ko ilo Kabuñ ko an Christian?

Eoktak jen don lemnak ko an elõñ ilo kabuñ ko an Christian. Jet rej tõmak bwebwenato ko ilo Bible kin men in bwilõñ ko me Jesus Christ im ri karejar ro an Anij ilo ien ko mokta jen ien Christian rar kõmmani. Ak, elõñ rej errã ibben Protestant Reformer eo Martin Luther. The Encyclopedia of Religion ej ba kake: “Luther im Calvin jimor rar je bwe ien ko kin men in bwilõñ ko ejemlok im armij ren kar jab kõtmene bwe renaj walok.” Catholic Church eo ej wõnmanlok im tõmak ilo men in bwilõñ ko “ilo an jab kajeoñ in kamelele kin ewi wãwen rar walok,” encyclopedia in ej ba. Bõtab, “ro remeletlet ilo jukjuk im bed eo an Protestant rar tõmak bwe mour in Christian ear lap an ikijen mwil emõn im bwe ear jab lap an Anij ak lal in jitõb ro konono ak jelet mour in armij.”

Ro jet me rej ba rej Ri Christian, ekoba jet ri tel in kabuñ ko, rej bere bwe men in bwilõñ ko me Bible ej konono kaki rar mol air walok. Lale, ñan wanjoñok, bwebwenato eo kin wijki eo ej urur kin kijeek ak ear jab bwil me Bible ej konono kake ilo Exodus 3:​1-5. Book eo What the Bible Really Says (Ta eo Bible eo Ej Lukkun Ba) ej kamelele bwe elõñ ri meletlet ro kin kabuñ rejjab watõk men in einwõt emol an kar juõn men in bwilõñ. Jen an eindein, rej ba bwe ear “annañelok inebata ko iloa an Moses kin an kar abõnõnõ bõklikit eo an.” Book eo ej wõnmanlok im ba: “Kijeek urur eo remaroñ melele kake einwõt wũt ko rej ebbõl ilo idiñ ilo meram eo ej itok jen bed eo an Anij.”

Kwomaroñ lo bwe juõn kamelele rot in ejjab kajuburu. Inem, ta eo kwon kar tõmak? Ej men in kõmmanwa ke ñan tõmak bwe men in bwilõñ ko rar walok? Ta kin men in bwilõñ ko ilo ran kein? Kinke jejjab maroñ kajitõk ibben enjel ro, wõn eo jemaroñ kajitõk ibben?

Lemnak eo an Bible eo

Ejelok juõn emaroñ kariap an Bible eo kwalok bwe jet ien ilo ien ko remotlok Anij ear kõmman men ko me armij reban kõmmani. Kin e, jej konono: “Kwar ãñintok Ri Israel ro dom jen enen Egypt, kin kakõlle ko im men in bwilõñ ko im kin juõn pã ekajur im juõn pã erlokwe im kin men in kalelñoñ ko.” (Jeremiah 32:⁠21, New World Translation) Lemnak mõk, ailiñ eo ekajurtata ilo ran eo kar kajook e ikijen joñoul men in kaeñtan ko jen Anij, ekoba mij eo an manje ro. Emol rar men in bwilõñ ko!​—Exodus, chapter 7 to 14.

Elõñ ebeben ko tokelik, ri jeje ro kin Gospel ko emen rar kwalok kin enañin 35 men in bwilõñ ko me Jesus ear kõmmani. Ilo mol, nan ko air rej kwalok bwe ear kõmman elõñlok men in bwilõñ ko jen ko rar kwalok kaki. Bwebwenato kein remol ke ak inoñ ko bajjek?b​—Matu 9:​35; Luk 9:​11.

Elañe emol bwe Bible ej men eo ej ba​—Nan in mol eo an Anij​—inem ewõr ibbam un eo ebin ñan tõmak ilo men in bwilõñ ko me ej konono kaki. Bible eo ej ba ilo alikar bwe men in bwilõñ ko rar walok ilo ien ko remotlok​—kejmour ko ilo kabwilõñlõñ, kajerkakbiji ko, im men ko eierlok wõt​—ak ej bareinwõt alikar an kamelele bwe men in bwilõñ rot kein ejako air walok.

[Kamelele ko itulal]