Bõk Lomor, Jab Kin Jerbal Ko Wõt, Ak Kin Joij Eo An Anij
“Emwij lomoremi kin tõmak . . . E jab jen jerbal ko, bwe ejelok en kimjãje.”—DRI EPESÕS 2:8, 9.
1. Ewi wãwen Ri Christian ro reoktak jen armij ro jet ikijen tõbrak ko air make, im etke?
ARMIJ ro rainin elap air utiej buru kin tõbrak ko rej kõmmani, im emõkaj air kemjãje kaki. Ri Christian ro rej oktak. Rej kejbãrok bwe ren jab kemjãje ele jen joñan kin tõbrak ko air make, meñe ikijen tõbrak ko kin kabuñ eo emol. Meñe rej lañliñ kin ta eo armij ro an Jehovah rej kõtõbrake einwõt juõn kumi, rejjab kemjãje kin ijo kunair ilo men kein. Rej kile bwe ilo jerbal eo an Jehovah, juõn un ejimwe unin kõmman ko ad elaplok an aorõk jen tõbrak ko ad make. Jabdewõt eo ej bõk men in letok eo kin mour indio ear bõke, jab kin tõbrak ko an make, ak ikijen tõmak im joij eo an Anij.—Luk 17:10; Jon 3:16.
2, 3. Ta eo Paul ear kemjãje kake, im etke?
2 Ri jilek Paul ear jelã kin men in. Elikin an kar jar jilu alen bwe en jako “kãliklik ilo [kanniekin],” ear bõk uak eo an Jehovah: “Aõ joij e bwe ñõn yuk, bwe Aõ kajur e wãppenlok ilo mõjino.” Ilo ettã buru Paul ear bõk bebe in an Jehovah, ear ba: “I naj kanuij mõnõnõ in kimjãje kin mõjino ko aõ, bwe kajur an [Christ] en ber ioõ.” Lemnak in ettã buru eo an Paul ej juõn eo jej aikwij kajeoñe.—2 Dri Korint 12:7-9.
3 Meñe Paul ear kõmman jerbal in Christian ko an ilo juõn wãwen ekabwilõñlõñ, ear kile bwe tõbrak ko rar jab walok kin kabel ko an. Ilo ettã buru, ear ba: “Ña, I rik jen eo eriktata ian ro remõn otemjej, emwij letok joij in ñõn iõ, bwe in kwalok ñõn ro dri ailiñ ko mweiuk ko an Kraist, ko je ban bukot im loi.” (Dri Epesõs 3:8) Ear jab kwalok juõn lemnak in jãjjãj ak utiej buru. “Anij ej jumae ro dri jua, a Ej lelok joij ñõn ro dri etã.” (Jemes 4:6; 1 Piter 5:5) Jej lor ke joñok eo an Paul, ilo ad watõk kij make edik jen eo ediktata ian ro jeid im jatid?
“Jabrewõt En Lemnok Ro Jet Remõn Jen E”
4. Etke ebin jet ien ñan watõk bwe ro jet reutiejlok jen kij?
4 Ri jilek Paul ear kakabileklek Ri Christian ro: “Komin jab kõmõn jabrewõt ilo wãlok ak aibujuij jekron, a kin etã buruemi jabrewõt en lemnok ro jet remõn jen e.” (Dri Pilippai 2:3) Men in emaroñ bin, elaptata elañe ewõr bwinbwinid. Bõlen abañ in ej walok kinke, ilo juõn joñan, jitõb in jiaik don eo elap an jededlok ilo lal in rainin ear jelet kij. Bõlen, ke jaar ajiri rar katakin kij bwe jen jiaik don, emaroñ ibben ro jeid im jatid ilo mweo ak ibben ri school ro mõttad. Bõlen ekkã air rejañ kij bwe jen kate jibadõk jerammõn eo bwe jen ri ikkure eo emõntata ak ri school eo eutiejtata ilo school. Emol, ñe jej kõmman joñan wõt ad maroñ ilo jabdewõt men jej kõmmane, men in ej juõn men in nebar. Bõtab, Ri Christian ro rej kõmmane men in, jab bwe armij ro ren reilok ñan ir, ak bwe ren bõk tokjen eo elap jen makitkit eo im bwe ro jet ren bõk tokjen bareinwõt. Bõtab, emaroñ kauwatata elañe ien otemjej jekõnan bõk nebar eo bwe jej emõntata. Ewi wãwen an eindein?
5. Elañe jejjab lale, juõn jitõb in jiaik don emaroñ tellok kij ñan ta?
5 Elañe jejjab kejbãrok, juõn jitõb in jiaik don ak utiej buru emaroñ kõmman bwe juõn armij en oktak im jãjjãj im jab kwalok kautiej. Emaroñ jino ebanban kin maroñ ko im jerammõn ko an ro jet. Jabõn Kennan Ko 28:22 ej ba: “Eo e nana mejen ej kijorur in bõk mweiuk ko, im e jaje bwe aikwij e naj itok ion.” Ilo wãlok emaroñ jibadõk ñan an bõk jerbal ko ejjab tellokin ñan an bõke. Ñan kowãnik jerbal ko an, emaroñ jino lotan im kõrraate ro jet—kadkad ko me Ri Christian ro rej aikwij kejbãrok ir jeni. (Jemes 3:14-16) Jekdon ta, ej bed ilo kauwatata eo ñan kaddeklok juõn jitõb in ña mokta.
6. Ewi wãwen Bible eo ej kakkõl nae juõn jitõb in jiaik don?
6 Kin men in, Bible eo ej rejañ Ri Christian ro: “Jen jab dri kimjãje wan, dri kaillu dron, dri junmare dron.” (Dri Galetia 5:26) Ri jilek John ear konono kin juõn Ri Christian mõttan eo ear bõk juõn jitõb rot in. “I ar jeje jet nan ñõn eklisia ne,” John ear ba, “a Diotrepis, eo ej kõnan bwe en iroij ioir, e jab bõk kim. Kin men in, elañe ij iwij, I naj kememej jerbal ko ej kõmõnmõni, ke ej konono nae kim nan ko renana.” Juõn wãwen elap an kaburomõjmõj ñan juõn Ri Christian!—3 Jon 9, 10.
7. Ta eo juõn Ri Christian enaj kõnan bõprae ilo jikin jerbal eo rainin ijo ewõr jitõb in jiaik don ie?
7 Emol, ejjab juõn men in kõmmanwa ñan lemnak bwe juõn Ri Christian emaroñ bõprae aolep jiaik don ko. Jikin jerbal eo an, ñan wanjoñok, emaroñ kitibuj air jiaik armij ro jet ak business ko me rej kõmmane ejja men ko wõt ak ejja jerbal ko wõt rej kõmmani. Bõtab, meñe ilo wãwen rot in, juõn Ri Christian ekõnan kõmman business eo an ilo juõn jitõb in kautiej, yokwe, im lemnak kin ro jet. Enaj karmijete manit ko rejakkar ak rejjab mantin Christian im bõprae an erom juõn armij eo rej jelã kake einwõt elej im ej lemnak wõt kin e make. Ejamin bõk lemnak eo bwe an kein kajuõn—ilo jabdewõt jibadbad ko—ej men eo elaptata an aorõk ilo mour. Elañe juõn Ri Christian ej aikwij kwalok jitõb rot in ilo jibadbad ko ilo jikin jerbal eo, enaj laplok an aorõk ñan an kwalok jitõb in ikijen kabuñ!
“Jab ilo Dri Turin”
8, 9. (a) Etke ejelok unin an Christian elder ro aikwij jiaik don? (b) Etke 1 Piter 4:10 ej jerbal ñan aolep ro ri karejaran Anij?
8 Lemnak eo ej aikwij wõr ibben Ri Christian ro ilo kabuñ eo air rej kwalok kake ilo nan in kakõrmol kein: “A jabrewõt armij en mõke melejoñ jerbal eo an, inem e naj or unin kimjãje ilo e mõke, im jab ilo dri turin.” (Dri Galetia 6:4) Elder ro ilo congregation eo, kin air jelã bwe rejjab jiaik don, rej jerbal ibben don einwõt juõn enbwin. Rej lañliñ kin ijo kunair kajjojo rej maroñ kõmmane ñan emõn eo an congregation eo. Ilo wãwen in rej bõprae jitõb in jiaik don eo ej kokkure im rej likit juõn joñok emõn kin burukuk ñan ro jet ilo congregation eo.
9 Kinke jet elder ro, reritto, elap iminene ko ibbeir, ak maroñ ko air, elaplok air kabel jen ro jet, ak emaroñ wõr lolokjen elap ibbeir. Kin men in, eoktak eddo ko an elder ro ilo dolul eo an Jehovah. Ijellokin keidi ir ñan don, rej kememej nan in kakabilek in: “Einwõt jabrewõt iami e ar bõk men in lewoj, en jibõñ dron kake, einwõt dri kõmñe remõn an joij an Anij, elõñ wãwen.” (1 Piter 4:10) Ilo mol, eon in ej jerbal ñan aolep ri karejar ro an Jehovah, kinke ilo juõn joñan kij aolep jaar bõk men in letok eo kin jelãlokjen eo ejimwe im aolep rej lañliñ kin jerammõn eo kin jerbal in Christian.
10. Ilo wãwen et eo wõt Jehovah enaj buñburuen kake jerbal eo ad ekwojarjar?
10 Jehovah ej buñburuen kin jerbal eo ad ekwojarjar ñe jej kõmmane ilo yokwe im tiljek, jab ñan kautiej kij make ilõñin ro jet. Kin men in eaorõk bwe en wõr juõn lemnak ejokkin wõt juõn kin makitkit ko ad ñan jurake kabuñ eo emol. Meñe ejelok juõn emaroñ ekajet ilo jejjet unin kõmman ko an juõn armij, Jehovah “e jela joñõn buru ko.” (Jabõn Kennan Ko 24:12; 1 Samuel 16:7) Kin men in, jen ien ñan ien jej aikwij kajitõkin kij make, ‘Ta unin aõ kõmmane jerbal eo an Jehovah?’—Sam 24:3, 4; Matu 5:8.
Lemnak eo Ejimwe kin Jerbal eo Ad
11. Ta kajitõk ko jenaj etale kin jerbal in kwalok nan eo ad?
11 Elañe jerbal ko rej kein karuo ilo aorõkiir ñan kabuñburuen Jehovah, inem ñan joñan et eo jej aikwij lemnak kin jerbal in tõmak ko ad? Elañe jej kõmmane jerbal eo ad kin juõn un emõn, ej juõn men in aikwij ke bwe jen kõmman juõn lokbook kin ta eo jej kõmmane ak ilo joñan et eo? Kajitõk kein rekkar, kinke jejjab kõnan likit oran ko ilõñin jerbal in tõmak ko ad ak kõmman bwe juõn report emõn en men eo elaptata ilo jerbal in Christian ko ad.
12, 13. (a) Ta jet un ko unin jej kejbãrok juõn lokbook kin jerbal in Christian eo ad? (b) Ta un ko ewõr ibbed ñan ad lañliñ ñe jej lale report eo jen belakin lal kin jerbal in kwalok nan eo ad?
12 Lale ta eo book eo Organized to Do Jehovah’s Will (Burukuk ñan Kõmanman Ankil an Jehovah) ej ba: “Ri kalor ro jinoin an Jesus Christ rar itoklimo kin report in wõnmanlok ko kin jerbal in kwalok nan. (Mark 6:30) Ilo Bible eo ilo book in Jerbal ej jiroñ kij bwe ear wõr enañin 120 armij ro rar bed ke kar lutõklok jitõb kwojarjar ion ri kalor ro ilo ien Pentecost. Ejjabto oran ri kalor ro ear laplok ñan 3,000 inem ñan 5,000. . . . (Jerbal 1:15; 2:5-11, 41, 47; 4:4; 6:7) News kin laplok kein emol an kar lap an kõketak ri kalor ro!” Kin ejja un eo wõt, Ri Kennan ro an Jehovah rainin rej kate ir ñan kejbãrok juõn lokbook ejimwe kin ta eo kar kõtõbrake ibelakin lal ilo jejjet in kitien nan ko an Jesus: “Im naj kwalok gospel in an ailiñ in lõñ i aolepen lõl kin men in kennan ñõn ailiñ otemjelok: ilo ien eo e naj itok jemlokõn.” (Matu 24:14) Report rot kein rej kalikar kin ta eo rej kõtõbrake ibelakin lal. Rej kwalok kin ia eo rej aikwiji jibañ ie im kain book rot ko im joñan eo rej aikwiji ñan kowõnmanlok jerbal in kwalok nan.
13 Kin men in, ñe jej reporte jerbal in kwalok nan eo ad men in ej kamaroñ kij ñan kajejjet jerbal eo ad ñan kwalok kin news eo emõn kin Ailiñ eo ilo juõn wãwen elaplok an bolemen. Ijellokin men in, ejjab juõn men in kõketak ñan kij ke ñe jej roñ kin ta eo ro jeid im jatid rej kõmmane ilo jikin ko jet ilo lal in? News kin laplok ko ibelakin lal rej kobrak kij kin lañliñ, kamakit ñan kalaplok jerbal eo ad, im ej kamol ñan kij kin kajerammõn eo an Jehovah. Im elap an kamõnõnõik kij ñan jelã bwe report eo ad make ej koba ibben report eo ibelakin lal! Report eo an kajjojo armij ej dik ñe keidi ibben oran eo ibelakin lal, ak Jehovah ej lo ta eo jej kõmmane. (Mark 12:42, 43) Kememej, elañe ejelok am report, report eo ibelakin lal ejamin eyu.
14. Ijellokin jerbal in kwalok nan im katakin, bar ta eo ej koba ilo kabuñ eo ad ñan Jehovah?
14 Emol, elõñ men ko me kajjojo Ri Kennan ro rej kõmmani ñan kajejjet eddo eo an einwõt juõn ri karejaran Jehovah emwij an wujleplok an mour rejjab walok ilo report eo an. Ñan wanjoñok, report eo ejjab koba an keini katak Bible ibben make, an bed im bõk kunan ilo kwelok ko an Christian, eddo ko ilo congregation eo, jibañ ri tõmak ro mõttan ñe ewõr juõn aikwij, lelok jabawõt ñan jerbal eo kin Ailiñ eo ibelakin lal, im men ko eierlok wõt. Kin men in, meñe report in kwalok nan eo ad eaorõk, ilo an jibañ kij kejbãrok ad kijejeto ilo jerbal in kwalok nan im ñan bõprae ad jowan, jej aikwij bõk juõn lemnak ejimwe kake. Jen jab watõke einwõt juõn men me enaj kamaroñ kij ñan bõk mour indio.
“Kijejeto ilo Jerbal ko Remõn”
15. Meñe jerbal ko wõt rejjab maroñ lomoren kij, etke rej juõn men in aikwij?
15 Alikar, meñe jerbal ko wõt rejjab maroñ lomoren kij, rej juõn men in aikwij. Eñin unin rej naetan Ri Christian ro “ro rej kijejeto ilo jerbal ko remõn” im unin kar rejañ ir ñan “lale dron, im kõkãtok dron ñõn yokwe im jerbal ko remõn.” (Taitõs 2:14; Dri Hibru 10:24) Elaplok an alikar, bar juõn ri jeje Bible, James, ear ba: “Bwe einwõt enbwin e jibil jen an, e mij, ein drein tõmak e jibil jen jerbal emij.”—Jemes 2:26.
16. Ta eo elaplok an aorõk jen jerbal ko, ak ta eo jej aikwij kejbãrok kake?
16 Unin jej kõmman jerbal ko ej aorõkin wõt jerbal ko remõn. Kin men in ej juõn men in meletlet ñan etale jen ien ñan ien unin jej kõmmani men ko. Bõtab, kinke armij rejjab maroñ lukkun jelã unin ro jet rej kõmmani men ko, jej aikwij kejbãrok bwe jen jab ekajete ro jet. “Wõn kwe eo kwoj ekajet korijeran bar juõn?” rej kajitõkin kij, kin uak eo ealikar: “Iben iroij eo an ej jutõk, ak buñ.” (Dri Rom 14:4) Jehovah, Iroij eo an aolep, im Ri Ekajet eo ear jitõñe, Christ Jesus, renaj ekajete kij, jab kin jerbal ko ad wõt ak bareinwõt unin jej kõmmane men ko, ien ko remõn ewõr ibbed, yokwe eo ad, im tiljek eo ad. Jehovah im Christ Jesus wõt remaroñ ekajet ilo jimwe elañe jaar kõmmane ta eo kar rejañ Ri Christian ro bwe ren kõmmane, ekkar ñan nan ko an ri jilek Paul: “Kwon kate yuk bwe Anij en lo kwo mõn, dri jerbal e jamin jok im ejimewõt an katakin kin nan in mol.”—2 Timote 2:15; 2 Piter 1:10; 3:14.
17. Meñe jej kate kij ñan kõmman joñan wõt ad maroñ, etke jej aikwij lemnak wõt kin Jemes 3:17?
17 Jehovah ejoij ikijen men ko ej kõtmene bwe jen kõmmani. Ekkar ñan Jemes 3:17, “Meletlet jen lõñ ej,” ian men ko, “joij.” Ejjab ke juõn ial in meletlet, im bareinwõt juõn tõbrak emol, bwe jen kajeoñe Jehovah ikijen men in? Kin men in, jen jab likit mejenkajjik ko rele lok jen joñan maroñ im bin ñan ad make ak kin ro jeid im jatid tõbari.
18. Ta eo jemaroñ reimanlok ñane elañe ewõr ibbed juõn lemnak ejokkin wõt juõn kin jerbal ko ad im joij eo an Jehovah?
18 Elañe ej jokkin wõt juõn lemnak eo ad kin jerbal in tõmak ko ad im joij eo an Jehovah, jenaj debij lañliñ eo ej kakõllan ri karejar ro remol an Jehovah. (Aiseia 65:13, 14) Jemaroñ lañliñ kin jerammõn ko me Jehovah ej lutõklok ion armij ro an, jekdon ewi joñan eo jemaroñ kõmmane. Kin “jar im akwelap kab kamolol,” jenaj eowore Anij bwe en jibañ kij kõmman joñan wõt ad maroñ. Inem, ilo ejelok bere, “ainemõn jen Anij, eo ej elã jen jela otemjej, e naj kejbãrok [buruõd] im lemnok ko [ad] ilo Kraist Jisõs.” (Dri Pilippai 4:4-7) Aet, jemaroñ bõk kainemõn im kõketak jen ad jelã bwe jemaroñ bõk lomor, jab kin jerbal ko wõt, ak ikijen joij eo an Jehovah!
Kwomaroñ ke Kamelele kin Etke Ri Christian Ro Rej
• kejbãrok ir jen air kemjãje kin tõbrak ko air make?
• bõprae air kwalok juõn jitõb in jiaik don?
• report kin jerbal in Christian eo air kin kwalok nan?
• bõprae air ekajete Ri Christian ro mõttair?
[Pija eo ilo peij 23]
“Aõ joij e bwe ñõn yuk”
[Pija ko ilo peij 24, 25]
Elder ro rej lañliñ kin ijo kunair rej kajjojo kõmmane ñan emõn eo an congregation eo
[Pija ko ilo peij 26, 27]
Elañe ejelok am report, report eo ibelakin lal ejamin eyu