News Eo Emõn Ñan Ri Ailiñ Ko Otemjej
“Kom naj Aõ dri kennan . . . ñõn eneo etolok tata i lõl.”—JERBAL 1:8.
1. Einwõt ri katakin ro kin Bible, ta eo jej lale, im etke?
RI KAKI ro rekabel rejjab lale wõt ta eo rej jiroñ ri school ro air ak rej bareinwõt lale ewi wãwen remaroñ ba ñan ir. Einwõt ri katakin ro kin katak ko remol ilo Bible, jej kõmman eindein. Jej lale ennan eo jej kwaloke im wãwen ko jej kajerbali. Ennan eo ad kin news eo emõn kin Ailiñ eo, ejjab oktak, ak jej ukõt wãwen ko jej kwaloke. Etke? Ñan jibadõk elõñ armij ro joñan wõt ad maroñ.
2. Ñe jej ukukõt wãwen ad kwalok nan, jej kajeoñe wõn?
2 Ñe jej ukõt wãwen ad kwalok nan, jej kajeoñe ri karejar ro an Anij ilo ien etto. Ñan wanjoñok, lemnak kin ri jilek Paul. Ear ba: “I ar einwõt dri Ju ñõn dri Ju ro . . . Ñõn ro ejelok kien ibeir, einwõt ejelok kien iba . . . Ñõn ro remõjino ña ij mõjino, bwe in jibarek ro re mõjino. Ña men otemjej ñõn armij otemjej bwe kin otemjej in lomoren jet.” (1 Dri Korint 9:19-23) Wãwen an Paul ukoktak ilo bwebwenato eo an ear kõmman bwe en bolemen. Kij bareinwõt jemaroñ bolemed elañe jej ukõt ennan ko ad ekkar ñan aikwij ko an armij ro kajjojo jej konono ibbeir.
Ñan “Jabõn Otemjej Jabõn Lõl”
3. (a) Ta aitwerõk eo jej jelmae ilo ad jerbal in kwalok nan? (b) Ewi wãwen nan ko ilo Aiseia 45:22 rej jejjet kitieir ilo ran kein?
3 Juõn aitwerõk elap ro rej kwalok kin news eo emõn rej jelmae ej ikijen joñan jikin ko rej aikwij kwalok nan ie—“i aolepen lõl.” (Matu 24:14) Iumin jibuki yiõ ko remotlok, elõñ ri karejar ro an Jehovah rar kate ir ñan kwalok nan kin news eo emõn ilo ailiñ ko rekãl. Ta tõbrak eo rar loe? Rar lo juõn tõbrak elap ibelakin lal. Ilo tujinoin ebeben eo kein ka 20, rar kwalok nan ilo jejjo wõt ailiñ ko, ak kiõ, Ri Kennan ro an Jehovah rej kwalok nan ilo kijejeto ilo 235 ailiñ ko! Emol, rej kwalok kin news eo emõn kin Ailiñ eo ilo “jabõn otemjej jabõn lõl.”—Aiseia 45:22.
4, 5. (a) Wõn ro ear lap ijo kunair ilo air kwalok kin news eo emõn? (b) Ta eo jet ri tel ro an dolul in ilo ailiñ ko jet rar ba kin ro rar emmakit ñan kwalok nan ilo jikin ko iumin tel eo air?
4 Ta un ko unin an walok wõnmanlok rot in? Elõñ un ko. Kar katakin elõñ missionary ro ilo school eo etan Watchtower Bible School in Gilead im, ilo ran kein, elõñlok jen 20,000 brother ro rar kadiojlok jen school eo etan Ministerial Training School. Bareinwõt elõñ Ri Kennan ro rar make kõllã kin air emmakit ñan ailiñ ko elaplok air aikwiji jibañ ie. Ri Christian rein—maan im kõrã ro redik im ritto, ro rej jañin mare im ro emwij air mare—elap air jibañ ilo jerbal in kwalok nan kin Ailiñ eo ibelakin lal. (Sam Ko 110:3; Dri Rom 10:18) Elap air kaorõk ir. Lale mõk ta eo jet ri tel ro an dolul in ilo ailiñ ko jet rar jeje kake kin ro rej jokwe ilo ailiñ ko retolok me rej jerbal ilo jikin ko elaplok air aikwij jibañ ie.
5 “Ri Kennan rein retiljek rej tel jerbal in kwalok nan ilo jikin ko ejañin wõr ri kwalok ro ie, rej jibañ ñan kajutak congregation ko rekãl, im jibañ ri tõmak ro mõttair bwe ren rittolok ilo jitõb.” (Ecuador) “Elañe ri kwalok rein relõñ jen ailiñ ko jet rar emmakit jen ijin, men in enaj jelet kajur in congregation ko. Kimij lukkun mõnõnõ bwe rej bed ibbam.” (Dominican Republic) “Ilo elõñ ian congregation ko ad, elukkun lõñ kõrã ro rej bed ie, jet ien ej tõbar 70 percent. (Sam Ko 68:11) Elõñ iair rej kab jelã mol eo, ak kõrã ro rejañin mare im rej kwalok nan full-time me rar itok jen ailiñ ko jet rej lukkun jibañ congregation ko ilo air katakin rein rekãl. Kõrã rein jen ailiñ ko jet retolok rej juõn men in letok emol ñan kij!” (Juõn ailiñ ilo Europe) Kwonañin lemnak ke in kwalok nan ilo bar juõn ailiñ?—Jerbal 16:9, 10.
“Joñoul Ri Ailiñ Ko” Jen Kajin Ko Otemjej
6. Ewi wãwen an Zechariah 8:23 kwalok bwe ewõr juõn abañ kin kajin ko ilo jerbal in kwalok nan?
6 Bar juõn abañ elap ej ikijen an lõñ kajin ko rej konono ion lal. Nan in Anij ear kanan: “Enaj walok ilo ran ko ñe joñoul maan ro jen aolep kajin ko an ailiñ ko renaj debij nuknuk ko an juõn ri Jew im ba, ‘Kim kõnan iwõj ibbemi kinke kimar roñ bwe Anij ej bed ibbemi.’” (Zechariah 8:23, NW) Ilo jejjet in kitien kanan in ilo ran kein, maan ro joñoul rej kõkkar kin jar eo elap, eo Reveles̃õn 7:9 ear kanan kake ir. Bõtab, lale bwe ekkar ñan kanan eo an Zechariah, “joñoul maan ro” renaj kar itok jab jen ailiñ ko otemjej wõt ak bareinwõt jen “aolep kajin ko an ailiñ ko.” Emwij ke ad lo an kanan in jejjet kitien? Aet.
7. Ta report ko rej kwalok bwe armij ro jen “aolep kajin ko an ailiñ ko” emwij air roñ kin news eo emõn?
7 Lemnak kin report ko. Lemñoul yiõ ko remotlok kar kõmmani book im magazine ko ad ilo 90 kajin ko. Rainin, oran in ear laplok ñan 400 kajin ko. “Dri korijer e tiljek im meletlet” ear kamaat an maroñ ñan lelok book im magazine ko ñan ailiñ ko me eiet ri ailiñ ro rej konono kajin eo ie. (Matu 24:45) Ñan wanjoñok, ewõr book im magazine ko jen Bible ilo kajin eo an Ri Greenland ro (47,000 orair), kajin Palau (15,000 rej konono kajin in), im kajin Yap (eietlok jen 7,000 armij ro rej konono kajin in).
“Juõn Aur Elap” Ej Tellok ñan Ien Ko Remõn
8, 9. Ta eo ear walok im ear kabellok “juõn aur elap” ñan kij, im ilo wãwen et eo elõñ Ri Kennan ro rar uak?
8 Bõtab, ilo ran kein, jejjab aikwij itoitak ñan juõn jikin etolok ñan kwalok nan kin news eo emõn ibben armij ro rej konono kajin ko jet. Ilo yiõ ko lok, kin an lõñlok ri ailiñ ko rej emmakit ñan ailiñ ko remweie ear kõmman bwe ilo bukwon ko armij ro rej konono elõñ kajin ko. Ñan wanjoñok, ilo Paris, France, ewõr enañin 100 kajin ko rekajju jen don. Ilo Toronto, Canada, oran in ej 125 kajin ko; im ilo London, England, rej konono elõñlok jen 300 kajin ko ijo! Kinke armij rein jen ailiñ ko jet rej bed ilo jikin ko elõñ congregation ko ie, men in ej “kebellok juõn aur elap” eo ej tellok ñan ien ko jet remõn ñan kwalok nan kin news eo emõn ibben armij ro jen ailiñ ko otemjej.—1 Dri Korint 16:9.
9 Elõñ thousand Ri Kennan ro rej mõnõnõ in katak bar juõn kajin. Ñan elõñ iair, ebin air kõmmane men in; ak ñe rej jibañ armij ro jen ailiñ ko jet ñan air katak kin mol eo ilo Bible, men in ej bõktok elap lañliñ ñan ir. Ilo juõn yiõ, enañin 40 percent in aolep armij ro rar baptais ilo kwelok ko relap ilo juõn ailiñ ilo Europe rar itok jen bar juõn ailiñ.
10. Ewi wãwen am kar kajerbal booklet eo Good News for People of All Nations? (Lale box eo “Mõttan ko Relap ilo Booklet eo Good News for People of All Nations,” ilo page 18.)
10 Emol, elõñ iad ejelok ad maroñ ñan katak kin bar juõn kajin. Meñe eindein, jemaroñ jibañ armij ro jen ailiñ ko jet ilo ad kajerbal booklet eo Good News for People of All Nations,a eo ewõr juõn ennan kin Bible eaibujuij ilo elõñ kajin ko rekajju jen don. (Jon 4:37) Kwoj kajerbal ke booklet in ilo jerbal in kwalok nan?
Ñe Armij Ro Rejjab Itoklimo
11. Bar ta aitwerõk eo jej jelmae ilo jet jikin ko jej kwalok nan ie?
11 Ñe kareelel eo an Satan ej laplok wõt ilo lal in, ekkã ad jelmae bar juõn aitwerõk—eiet armij ro rej itoklimo ilo jikin ko jej kwalok nan ie. Emol, jejjab bwilõñ kin aitwerõk in, kinke Jesus ear kanan bwe men in enaj kar walok. Ikijen ran kein ad, ear ba: “Im kin an nana lõñlok, yokwe an elõñ e naj mololok.” (Matu 24:12) Emol, bwe tõmak eo an elõñ armij ilo Anij im air kautiej Bible eo ear diklok. (2 Piter 3:3, 4) Tokjen men in, ilo jet jikin ko ilo lal in, eiet armij rej erom ri kalor ro an Christ. Bõtab, ejjab melelen bwe jerbal ko an Ri Christian ro jeid im jatid retiljek ilo jikin ko rejjab mõnõnõ in roñjake, ejelok tokjeir. (Dri Hibru 6:10) Etke? Jen lale.
12. Ta mejenkajjik ko ruo jej jibadõki ilo jerbal in kwalok nan eo ad?
12 Book in Matu ej kalikar ruo mejenkajjik ko ñan jerbal in kwalok nan eo ad. Juõn ej bwe jen “kõmõn dri ailiñ ko otemjej bwe ren [dri kalor ro].” (Matu 28:19) Mejenkajjik eo juõn ej bwe ennan eo an Ailiñ eo ej juõn “men in kennan.” (Matu 24:14) Mejenkajjik kein jimor rej aorõk, ak eo kein karuo elaplok an aorõk. Etke?
13, 14. (a) Ta juõn ian men ko relap ej kakõllan bed eo an Christ? (b) Ta eo jej aikwij kememej kake, elaptata ñe jej kwalok nan ilo jikin ko eiet ro rej itoklimo ie?
13 Ri jeje Bible eo Matu ear je bwe ri jilek ro rar kajitõk ibben Jesus: “Ñãt men kein re naj walok? im ta eo kakõlõn Am naj itok im lokõn lõl?” (Matu 24:3) Ke ear uak, Jesus ear ba bwe juõn ian men ko relap ilo kakõlle eo kar ikijen jerbal in kwalok nan ibelakin lal. Ear konono ke kin jerbal in kõmman ri kalor ro? Jaab. Ear ba: “Im naj kwalok gospel in an ailiñ in lõñ i aolepen lõl kin men in kennan ñõn ailiñ otemjelok: ilo ien eo e naj itok jemlokõn.” (Matu 24:14) Inem Jesus ear kwalok bwe jerbal in kwalok nan kin Ailiñ eo enaj kar juõn kakõlle eaorõk.
14 Kin men in, ñe jej kwalok kin news eo emõn kin Ailiñ eo, jej kememej bwe meñe jejjab lo tõbrak ilo jerbal in kõmman ri kalor ro, jej lo tõbrak ilo ad “kennan” kin mol eo. Jekdon ewi wãwen an armij ro naj uak, rejelã kin ta eo jej kõmmane, im ilo wãwen in jej bõk kunad ñan kajejjet kitien kanan eo an Jesus. (Aiseia 52:7; Reveles̃õn 14:6, 7) Jordy, juõn jodikdik ilo Europe, ear ba: “Ij mõnõnõ in jelã bwe Jehovah ej kajerbal iõ ñan bõk kunaõ ñan kajejjet kitien Matu 24:14.” (2 Dri Korint 2:15-17) Ejelok bere bwe eindein am lemnak bareinwõt.
Ñe Rej Jumae Ennan Eo Ad
15. (a) Jesus ear kakkõl ri kalor ro an kin ta? (b) Ta eo ej kamaroñ kij ñan kwalok nan meñe jej iion jumae?
15 Jumae ej bar juõn aitwerõk nae jerbal in kwalok kin news eo emõn kin Ailiñ eo. Jesus ear kakkõl ri kalor ro an: “Ien eo re naj ketõk kom ñõn iñtan, im re naj mõn kom: im dri ailiñ otemjelok re naj kijirãte kom kin eta.” (Matu 24:9) Einwõt Ri Christian ro mokta, armij ro ilo ran kein rej kijirãte, jumae, im matõrtõre ri kalor ro an Jesus. (Jerbal 5:17, 18, 40; 2 Timote 3:12; Reveles̃õn 12:12, 17) Ilo jet ailiñ ko, kien ko rej kabõjrak jerbal eo air. Ak, kin air bokake Anij, Ri Christian ro remol ilo ailiñ kein rej wõnmanlok ilo air kwalok news eo emõn kin Ailiñ eo. (Amos 3:8; Jerbal 5:29; 1 Piter 2:21) Ta eo ej kamaroñ rein, im Ri Kennan ro jet bareinwõt, bwe ren kõmman eindein? Jehovah ikijen jitõb kwojarjar eo an ej kamaroñ ir.—Zechariah 4:6, NW; Dri Epesõs 3:16; 2 Timote 4:17.
16. Ewi wãwen an kar Jesus kwalok bwe jerbal in kwalok nan ekkeijaklok ibben jitõb eo an Anij?
16 Jesus ear kalikar kin wãwen an Jitõb eo an Anij ekkeijaklok ibben jerbal in kwalok nan ke ear jiroñ ri kalor ro an: “A kom naj bõk maroñ ñe emwij an Jitõb Kwojarjar itok iomi: im kom naj Aõ dri kennan ... ñõn eneo etolok tata i lõl.” (Jerbal 1:8; Reveles̃õn 22:17) Karõk in wãwen kein rar walok ilo eon in raorõk. Mokta, ri kalor ro rar bõk jitõb kwojarjar eo, inem rar jino jerbal in kwalok nan ibelakin lal. Jitõb kwojarjar eo an Anij wõt ear maroñ jibañ ir bwe ren bõk kajur ñan air kijenmij im “kennan ñõn ailiñ otemjelok.” (Matu 24:13, 14; Aiseia 61:1, 2) Inem, Jesus ear jitõñlok ñan jitõb kwojarjar eo einwõt “Dri Kainemõn” eo. (Jon 15:26) Ear ba bwe jitõb eo an Anij enaj kar katakin im tel ri kalor ro an.—Jon 14:16, 26; 16:13.
17. Ñe jej jelmae jumae, ewi wãwen an jitõb kwojarjar eo jibañ kij?
17 Ilo wãwen et ko jitõb eo an Anij ej jibañ kij ilo ran kein ñe jej jelmae jumae ilo jerbal in kwalok news eo emõn? Jitõb eo an Anij ej kakajur kij, im ej jumae ro rej matõrtõre kij. Ñan wanjoñok, jen lemnak kin juõn men ear walok ilo mour eo an King Saul.
Jitõb eo an Anij Ej Jumae
18. (a) Ta wãwen eo enana ear walok ñan Saul? (b) Ta wãwen ko Saul ear kajerbali ñan kaeñtan David?
18 Saul ear king eo moktata an Israel im ear emõn ilo jinoin, ak tokelik ear jab bokake Jehovah. (1 Samuel 10:1, 24; 11:14, 15; 15:17-23) Kin men in, jitõb eo an Anij ear jab wõnmanlok im jibañ king eo. Saul ear lukkun illu ibben David, eo emwij kabiti bwe en bõk jikin einwõt king im kiõ jitõb eo an Anij ear jibañ e. (1 Samuel 16:1, 13, 14) Saul ear lemnak bwe enaj bidodo ñan mõn David. Kinke, ear jibwe juõn harp, ak Saul ear jibwe juõn mõri. Inem juõn ran ke David ear kajañjañ kin harp eo, “Saul e ar jolok mõri eo; bwe ear ba, I naj wãkari Devid ñõn turin im. Im Devid e ar okõk jen iman mejen ruo alen.” (1 Samuel 18:11) Tokelik, Saul ear eoroñ Jonathan nejin, im jeran David, im ear kallimur: “Einwõt Jeova e mour, re jamin mõn [David].” Ak, bar juõn alen Saul “e ar kajeoñ in wãkari Devid ñõn turin mweo kin mõri eo.” Bõtab, David “e ar ukõk mõkõj jen iman Saul, im e lil turin mweo im bin.” David ear ko, ak Saul ear kate wõt ñan mõn e. Ilo ien in ekauwatata, jitõb eo an Anij ear erom ri jumae eo an Saul. Ilo wãwen et eo?—1 Samuel 19:6, 10.
19. Ewi wãwen jitõb eo an Anij ear kejbãrok David?
19 David ear ko ñan ibben ri kanan Samuel, ak Saul ear kaiñi ri tarinae ro an bwe ren jibwe David. Bõtab, ke rar tõbar jikin eo David ear tilekek ie, “Jitõb õn Anij e ar itok ion ro dri jilik an Saul, im rar bareinwõt drikanij.” Joñan air lukkun bwilõñ kin jitõb eo an Anij rar meloklok kin unin an Saul jilkinlok ir. Saul ear jilkinlok ri tarinae ro an ruo alen bwe ren jibwe im kajeblaktok David ñan e, ak kajjojo alen ejja men eo wõt ear walok. Eliktata, Saul make ear etal ñan jibwe David, ear jab maroñ jutak bin nae jitõb eo an Anij. Ilo mol, jitõb kwojarjar eo ear kadebijik e “aolepen ran eo im aolepen boñin eo”—im ear lelok ien ñan David bwe en ko.—1 Samuel 19:20-24.
20. Ta eo jemaroñ katak jen bwebwenato eo kin an kar Saul matõrtõre David?
20 Bwebwenato in kin Saul im David ej juõn katak ñan kakajur kij: Ro rej matõrtõre ri karejar ro an Anij rejjab maroñ bõk anjo ñe rej jumae jitõb eo an Anij. (Sam Ko 46:11; 125:2) Jehovah ear karõk bwe David en king ilo Israel. Ejelok juõn armij emaroñ kar ukõt men in. Ilo ran kein, Jehovah ear beek bwe enaj “kwalok gospel kin ailiñ eo.” Ejelok jabdewõt armij emaroñ bõprae jerbal in.—Jerbal 5:40, 42.
21. (a) Ewi wãwen jet ri jumae ro ilo ran kein rej emmakit? (b) Ta eo jemaroñ liki kake?
21 Jet ri tel ro ilo kabuñ im kien rej riap im kwalok air lej ñan kajeoñ in kabõjrak kij. Bõtab, einwõt an kar Jehovah kejbãrok David ilo jitõb, Enaj bareinwõt kejbãrok armij ro An ilo ran kein. (Malachi 3:6, NW) Inem, einwõt David, ilo liki jemaroñ ba: “I ar liki Anij, I jamin mijõk; ta eo armij re maroñ in kõmõn ñõn iõ?” (Sam Ko 56:11; 121:1-8; Dri Rom 8:31) Kin jibañ jen Jehovah, jemaroñ wõnmanlok im bõk anjo ion aolep aitwerõk ko jej jelmaiki ñe jej kajejjet kitien jerbal eo Anij ear letok ñan kwalok news eo emõn kin Ailiñ eo ñan armij ro ilo ailiñ ko otemjelok.
[Kamelele ko itulal]
a Jeje in Ri Kennan ro an Jehovah.
Kwoj Kememej Ke?
• Etke jej aikwij ukukõt kilen ad kwalok nan?
• “Juõn aur elap” ear bellok ñan ien et ko remõn?
• Ta eo jerbal in kwalok nan eo ad ear kõtõbrake, meñe ilo jikin ko eiet armij rej itoklimo?
• Etke ejelok juõn ri jumae emaroñ kabõjrak ad jerbal in kwalok news eo emõn kin Ailiñ eo?
[Bo̦o̦k eo ilo peij 18]
Mõttan ko Relap ilo Booklet eo Good News for People of All Nations
Booklet eo Good News for People of All Nations ewõr juõn ennan juõn-page aetokin emwij ukõte ñan 92 kajin ko. Rar je ennan eo einwõt ñe kwoj bwebwenato ibben juõn armij. Inem ñe ri mweo ej konono ennan in, ej einwõt ñe kwoj bwebwenato ibben.
Ilo page 2 ej kwalok juõn map kin lal in. Kajerbal map in ñan kaitoklimoen ri mweo. Bõlen kwomaroñ kwalok ailiñ eo kwoj itok jen e im kalikar bwe kwo mõnõnõ in jelã ailiñ eo ej itok jen e. Ilo wãwen in, kwomaroñ kareel e ñan kwalok buruen bwe en mõnõnõ in bwebwenato ibbam.
Kamelele ko itumanin booklet in ej kwalok jet wãwen ko jej aikwij kõmmani bwe jen bolemed ñe jej jibañ ro rej konono juõn kajin jejjab melele. Joij im readi buñten nee kein im kate yuk ñan kajerbali ilo jerbal in kwalok nan.
Lajrak in ejjab kwalok kin kajin ko wõt ak ej bareinwõt kwalok alphabet letter ko rekkar ñan kajin ko. Lajrak in ej jibañ yuk ñan jelã ta melelen letter ko emwij je ilo tujemlokin tract im book ko jet ilo kajin ko rekajju jen don.
[Pija]
Kwoj kajerbale ke booklet in ilo jerbal in kwalok nan?
[Pija ko ilo peij 15]
Book ko ad rej bedbed ion Bible rej walok kiõ ilo elõñlok jen 400 kajin ko
GHANA
LAPLAND (SWEDEN)
PHILIPPINES
[Pija ko ilo peij 16, 17]
Kwomaroñ ke kwalok nan ilo jikin ko elaplok air aikwiji ri keañ ro an Ailiñ eo?
ECUADOR
DOMINICAN REPUBLIC