Bwebwenato
Meñe Ear Jab Pidodo ñan Katakin Ro Nejũ kõn Jeova, Bõtab Iar M̦õn̦õn̦õ
BWEBWENATO EO AN JOYCELYN VALENTINE
Ilo kar iiõ eo 1989, l̦eo ippa ear ilo̦k ñan bar juon aelõñ bwe en jerbal. Ear kallim̦ur bwe enaaj jilkintok jããn bwe in maroñ lale im kabwe aikuj ko an ajri ro rualitõk nejũm̦ro. Emootl̦o̦k elõñ wiik im allõñ ak kõmar jab roñ jãne. Aolep iien ij ba ñan ña make, ‘M̦õttan jidik aolep men renaaj em̦m̦an im enaaj roltok.’
IAR jino inepata im jaje in ta kõn an ejjel̦o̦k jããn bwe in maroñ lale im kabwe aikuj ko an ajri ro nejũ. Iar jaje kiki in boñ im iar jab tõmak bwe men in ej wal̦o̦k ñan kõm. Aolepen iien kein ij kajjitõk, ‘Etke en maroñ in kõm̦m̦ane men in ñan ña im ajri rã nejin?’ Bõtab, tokãlik ij kab tõmak im kile bwe em̦õj an jol̦o̦k kõm. El̦ak 16 iiõ kiiõ ak ejañin jepl̦aaktok. Eñin unin iar make aikuj lale im katakin ajri ro nejũ. Men in ear lukkuun pen, bõtab elukkuun l̦ap aõ m̦õn̦õn̦õ kõnke aolep ajri ro nejũ rej kiiõ karejar ñan Jeova. Bõtab m̦okta jãn aõ kwal̦o̦k kõn wãween am kar mour, em̦m̦anl̦o̦k ñe in kwal̦o̦k ñan kom̦ kõn wãween aõ kar dik im rũttol̦o̦k.
Iar Pukot Mel̦el̦e ko Rem̦ool jãn Baibõl̦ Eo
Iaar l̦otak ilo iiõ eo 1938 ilo aelõñ in Jamaica. Meñe Baba ear jab kobal̦o̦k im jar ippãn kabuñ ko wõj, ak ear tõmak ilo Anij. Ñe ej jota, ekõn kajjitõk ippa bwe in riiti l̦o̦k bok in Sam ñan e. Kõn wõt men in, iar kiili elõñ eoon ko jãn bok in Sam. M̦am̦a ear kobal̦o̦k ippãn juon iaan kabuñ ko ilo bukwõn eo, im jet iien ej bõk ña bwe in etal ippãn im jar.
Ke iar etal im jar ippãn M̦am̦a, rar ba bwe Anij ej bõk armej ro rem̦m̦an ñan lañ, bõtab ej tile ro renana ilo kijeek ñan indeeo. Rar bar ba bwe Jijej ej Anij im ej yokwe ajri ro. Katak kein aer ear lukkuun kapok eõ im kõm̦m̦an aõ mijak Anij. Aolep iien ij kajjitõk, ‘Etke juon Anij eo ej yokwe emaroñ tile armej ro ilo kijeek?’
Jet iien ijaje kiki kõn aõ lukkuun kar abwinmake kõn katak eo bwe Anij ej tile armej ro ilo kijeek. Juon iien, iar bõk juon kilaaj in Baibõl̦ an kabuñ in Seventh-Day. Rar katakin kõm bwe Anij eban kaeñtaan armej ro renana ñan indeeo ak renaaj mej ilo aer naaj bwil ilo kijeek. Katak in ear em̦m̦anl̦o̦k ippa jãn kar katak ko jet, im iar jino kobal̦o̦k ippãn kabuñ in. Bõtab iar pok wõt, im men ko iar katak ippãer rar jab jipañ ukot mour eo aõ bwe en erreo im̦aan mejen Anij.
Ilo kar tõre kein, armej ro rar errã bwe l̦õñ ear juon men ebõd im nana. Kõmar l̦õmn̦ak bwe l̦õñ ej ñe juon armej ej babu ak pãd ippãn elõñl̦o̦k jãn juon armej. Kõn men in, iar l̦õmn̦ak bwe ejjel̦o̦k jorrããn ñe ruo ri pãlele rej pãd ippãn doon meñe rejañin m̦are. (1 Korint 6:9, 10; Hibru 13:4) Eñin unin ear wõr jiljino nejũ ajri meñe ijañin kar m̦are.
Wõnm̦aanl̦o̦k Ko
Ilo kar iiõ eo 1965, Vaslyn Goodison im Ethel Chambers rar em̦m̦akũttok im jokwe ilo juon bukwõn epaak etan Bath. Rein rar Ri Kõnnaan ro an Jeova, im juon raan rar itok im bwebwenato ippãn jema. Ear m̦õn̦õn̦õ in katak Baibõl̦ ippãer. Rar bar bwebwenato ippa el̦aññe ij pãd m̦weo ilo iien aer lotok. Meñe iar jab itoklimo kõn katak kein aer, iar pepe ñan katak Baibõl̦ ippãer kõnke in maroñ kam̦ool bwe eriab katak ko aer.
Iar kwal̦o̦k elõñ kajjitõk ko ñe kõmij katak, im rar uwaaki aolepeir jãn Baibõl̦ eo. Rar jipañ eõ ñan kile bwe ro remij ejjel̦o̦k aer jel̦ã im rejjab eñtaan ilo Hell ak bwil ilo kijeek. (Ekklisiastis 9:5, 10) Iar bar katak kõn kallim̦ur eo an Anij bwe armej ro remaroñ mour ñan indeeo ilo pedetaij ijin iion lal̦. (Sam 37:11, 29; Revelesõn 21:3, 4) Iar jino ilo̦k ñan iien kweilo̦k ko an Ri Kõnnaan ro an Jeova meñe jema ear bõjrak jãn an katak. Elukkuun mel̦ak im kon̦ wãween aer kõm̦m̦ane kweilo̦k ko aer im iar maroñ katak elõñ men ko rem̦m̦an kõn Jeova. Iar bareinwõt ilo̦k ñan kweilo̦k ko aer rel̦ap. Bõtab, ear wõr juon men me ear bõbraik eõ jãn aõ kõm̦m̦an wõnm̦aanl̦o̦k.
Ilo tõrein, ijañin m̦are bõtab iar koba ippãn juon em̦m̦aan me ewõr jilu nejũ ajri n̦a ippãn. Ke iar katak Baibõl̦ eo, iar kile bwe Anij ejjab m̦õn̦õn̦õ ñe armej ro rej pãd ippãn doon ak rejañin m̦are. Iar jino abn̦õn̦õ kõn wãween pãd in am̦ro. Iar kõnnaanek e bwe kom̦ro ej aikuj m̦are, ñe eab ej aikuj jem̦l̦o̦k ijo ikõtaamro. Meñe l̦eo ear jab errã ilo tõmak eo aõ, kõmro ar wõnm̦aanl̦o̦k im m̦are ilo Okõj 15, 1970, l̦alem iiõ ãlikin an kar ri kwal̦o̦k naan ro jino katak ippa. Ilo Tijemba ilo ejja iiõ eo wõt, iar ajel̦o̦k mour eo aõ ñan Jeova im peptaij.
Iban mel̦o̦kl̦o̦k jinoin aõ kar ilo̦k im kwal̦o̦k naan. Iar lukkuun jook im mijak im ijaje in ba ta. Iar lukkuun m̦õn̦õn̦õ ke armej eo m̦oktata iar kõnnaan ippãn ear kajju kabõjrak aõ kwal̦o̦k naan ñan e. Bõtab ãlikin jidik iien, ear jako aõ mijak. Ke ear jem̦l̦o̦k raan eo, iar lukkuun m̦õn̦õn̦õ kõnke iar maroñ bwebwenato ippãn jejjo armej im lel̦o̦k aer bok.
Jipañ Ajri Ro Nejũ
Ilo iiõ eo 1977, ear kiiõ wõr rualitõk nejũ ajri. Iar lukkuun kate eõ ñan jipañ aolep ajri rein nejũ bwe ren jerbal ñan Jeova. (Joshua 24:15) Kõn men in, iar niknik im katak ippãer kõn Baibõl̦ eo. Im ñe kõmij katak joñan aõ m̦õk jet iien ij kiki ñe juon iaan ajri ro rej riiti juon pãrokõrããp. Ñe rej lo bwe ij kiki rej karuj eõ bwe kõmin wõnm̦aanl̦o̦k im katak. Bõtab meñe iar m̦õk, iar jab kõtl̦o̦k bwe men in en bõbrae aõ katak Baibõl̦ ippãn ajri ro nejũ.
Ear emmakijkij aõ jar ippãn ajri ro nejũ. Ilo aer kar rũttol̦o̦k, iar katakin er bwe ren jel̦ã jar ñan Jeova ippãer make. Iar bareinwõt lale bwe kajjojo iaaer ren jar ippãer make m̦okta jãn aer kiki. Ak ajri ro nejũ me reddik iar jar ippãer.
L̦eo ippa ekõn kar jab kõn̦aan bwe in bõk ajri ro ippal̦o̦k ñan iien kweilo̦k ko. Bõtab kõnke ear jab kõn̦aan make iaan im lale ajri ro ñe ij ilen kweilo̦k, ear jino kõtl̦o̦k bwe ren itok ippatok. Aolep jota ekõn etal ippãn ro m̦õttan bõtab ejjab kõn̦aan ãñin aolepeir ippãnl̦o̦k. Kõn wõt men in, ear jino kiiõ jipañ eõ kapoj ajri ro bwe ren itok ippa im kweilo̦k.
Ejjabto, ajri ro rar jino imminene in ilo̦k ñan aolep kweilo̦k ko im bareinwõt bõk kun̦aaer ilo jerbal in kwal̦o̦k naan. Ñe ej iien jem̦ar, ekkã aer ilo̦k im kwal̦o̦k naan ippãn ri kwal̦o̦k naan ro rekijejeto ilo congregation eo kõmij pãd ie. Men in ear lukkuun jipañ ajri rein nejũ bwe ren lukkuun yokwe ro ilo congregation eo im jerbal in kwal̦o̦k naan.—Matu 24:14.
Mãlejjoñ Ko
L̦eo pãleeõ ear etal ñan bar juon aelõñ bwe en jerbal ñan an wõr jããn bwe kõmin maroñ mour. Etto an jako jãn kõm im ejjab ikutkut an lotok. Ilo iiõ eo 1989, ear bar jepl̦aak ñan ijo ej jerbal ie im ear jab bar roltok. Ãinwõt aõ kar kwal̦o̦k m̦oktal̦o̦k, kõn an kar jako jãn kõm, iar lukkuun inepata im jaje in ta. Aolep boñ iar jañ im jar ñan Jeova bwe en kaenõm̦m̦an eõ im jipañ eõ bwe in kijenmej. Iar eñjake an Jeova uwaaki jar ko aõ. Bok in 1 Korint 7:15 ear lukkuun kaenõm̦m̦an im kakajoor eõ bwe in jab ebbeer ak in wõnm̦aanl̦o̦k wõt. Ro nukũ im ro m̦õtta im ro jeiõ im jatũ ilo tõmak rar jipañ eõ ilo elõñ wãween ko. El̦ap aõ kam̦m̦oolol Jeova im ro doon kõn aer jipañ eõ.
Ear bar wõr apañ ko jet kõmar iioni. Juon iaan lim̦aro nejũ ear bukwel̦o̦k ak jako jãn an juon iaan Ri Kõnnaan ro an Jeova. Elukkuun l̦ap aõ yokwe aolep ajri ro nejũ, bõtab el̦apl̦o̦k aõ kaorõk aõ tiljek wõt ñan Jeova Anij. Innem, ilo iien eo ear bukwel̦o̦k, ña im ajri ro jet nejũ, kõmar l̦oore wõt naan in kakapilõk eo ilo Baibõl̦ kõn ta ko jej aikuj kõm̦m̦ane ñe juon ej bukwel̦o̦k. (1 Korint 5:11, 13) Elukkuun l̦ap an kar ro jet me rar jab mel̦el̦e kõn tõmak eo am kõrraat im kajjirere kake kõm. Bõtab, ãlikin an kar lio nejũ bar jepl̦aaktok, l̦eo pãleen ear jiroñtok eõ bwe el̦ap an nõbare kõm kõn am kar l̦oore wõt naan in kakapilõk ko jãn Baibõl̦ eo. Kiiõ, erro ej jim̦or karejar ñan Jeova.
Apañ im Jorrããn Ko
Em̦õj an l̦eo pãleeõ ilo̦k jãn eõ, ejjel̦o̦k aõ jããn im ear jab ijjilõktok jããn in jipañ ñan kõm. Men in kõmar iione ear katakin kõm ñan jokwane wõt meñe ejjab l̦ap men ko ippem. Im bwe kõmin kaorõk jerbal ko an Jeova el̦apl̦o̦k jãn m̦weiuk ko. Ajri ro nejũ rar katak ñan yokwe im jipañ doon, kõn men in rar jino epaake doon. Ro nejũ rerũtto rar jino jerbal im jipañ eõ kabwe aikuj ko an ro redikl̦o̦k jãn er. Lio erũtto nejũ etan Marseree, ear jipañ Nicole lio jatin edikl̦o̦k ñan an kadedel̦o̦k an jikuul̦. Bareinwõt, iar maroñ jerbal im lale juon im̦õn wia jiddikdik, im men in ear maroñ jipañ kõm kõn jidik jããn ñan am maroñ kabwe aikuj ko am.
Jeova ear pãd ippem im jipañ kõm. Juon iien iar ba ñan juon jeiõ im jatũ kõrã ilo tõmak bwe kõmij jab maroñ pãd ilo juon iaan kweilo̦k ko rel̦ap an Ri Kõnnaan ro an Jeova kõnke ejabwe jããn. Kõrã in ear ba: “Valentine, ñe kwõj roñ bwe enaaj wõr juon kweilo̦k el̦ap, kwõn kapojak in ilo̦k! Jeova enaaj kõjparok eok im kabwe aikuj ko am̦.” Iar l̦oore naan in rõjañ in an. Jeova ear kabwe aikuj ko am, im ej wõnm̦aanl̦o̦k wõt im kõm̦m̦ane men in. Kõmij jañin kar kõtl̦o̦k bwe apañ kõn jããn en bõbrae kõm jãn am pãd ilo kweilo̦k ko rel̦ap.
Ilo iiõ eo 1988, ear wal̦o̦k juon taibuun el̦ap ilo Jamaica, im kõmar aikuj ko. Ke ear jino em̦m̦anl̦o̦k lañ, kõmro l̦addik eo nejũ ar etal im lale ijo m̦weo im̦õm ear pãd ie. Ke kõmro ej lale men ko rejorrãn ijo iar loe juon men im iar kõn̦aan kõjparoke. Ejjabto, ear bar l̦ap ko̦to. Jekdo̦o̦n ke ear lukkuun l̦apl̦o̦k ko̦to ak il̦ak kar baj dãpiji wõt men eo ikõn̦aan kõjparoke. L̦addik eo nejũ ear ba ñan ña, “M̦am̦a kwõn jol̦o̦k TV n̦e. Kwe lio pãleen Lot ke?” (Luk 17:31, 32, UBS) Ij roñ wõt naan kein an l̦addik eo nejũ ak im̦õkaj im jolal̦l̦o̦k TV eo, im kõmro ar jim̦or m̦õkaj im ko jãn ijo.
Rainin ñe ij keememejtok men in ilukkuun lõl̦ño̦ñ kõn aõ kar tin likũt mour eo aõ ilo kauwõtata kõn aõ kõn̦aan kõjparok TV eo. Bõtab ij lukkuun m̦õn̦õn̦õ bwe naan kein an l̦addik in nejũ rej lukkuun kalikkar ta ko el̦ap an kaorõki. Itok wõt jãn an kar katak elõñ men ko jãn congregation eo, ear maroñ jipañ eõ bwe mour eo aõ im kõtaan eo aõ ippãn Jeova en jab pãd ilo kauwõtata.
Taibuun eo ear ko̦kkure m̦weo im̦õm im aolep men ko m̦weiem. Jorrããn in ear kõm̦m̦an bwe kõmin lukkuun bũrom̦õj im inepata. Bõtab, ro jeim im jatim rar itok im jipañ kõm. Rar rõjañ kõm bwe kõmin wõnm̦aanl̦o̦k wõt im lõke Jeova im poub wõt ilo jerbal eo an. Rar bareinwõt jipañ kõm kalõk m̦weo im̦õm. Ro jeiõ im jatũ ilo tõmak jãn Jamaica im aelõñ ko jet rar itok im letok peir im jipañ kõm. Men in ear lukkuun jelõt bũrueem.
Jeova M̦oktata
Ãlikin an kar leddik eo nejũ etan Melaine jikuul̦, ear bõk kun̦aan ilo jerbal in kwal̦o̦k naan full-time. Tokãlik kar kũr e bwe en em̦m̦akũtl̦o̦k ñan bar juon congregation im kwal̦o̦k naan ie. Kõn men in, ear aikuj kam̦õje e jãn an jerbal im jipañ ñan kabwe aikuj ko am. Bõtab, kõm ear lõke Jeova bwe enaaj jipañ kõm el̦aññe kajjojo iaam kõmij likũti jerbal ko an m̦oktata ilo mour ko am. (Matu 6:33, UBS) Tokãlik, rar bar kũr Ewan bwe en bõk jerbal in kwal̦o̦k naan full-time. Ewan ekõn jerbal m̦okta ñan jipañ kabwe aikuj ko am, bõtab kõmar rõjañ e bwe en wõnm̦aanl̦o̦k im kõm̦m̦ane ijo kun̦aan ilo an jerbal ñan Jeova. Ejañin wõr juon iien iar kabbeer ajri ro nejũ bwe ren jab kal̦apl̦o̦k ijo kun̦aaer ñan Jeova. Ak ña im ro redikl̦o̦k me rar pãd wõt ippa ilo m̦weo, ejjel̦o̦k juon iien kõm ar pãd ilo aikuj. Ear l̦apl̦o̦k am m̦õn̦õn̦õ, im jet iien el̦aññe ewõr am maroñ, kõmij jipañ ro jet im rej pãd ilo aikuj.
Rainin, el̦ap aõ lañlõñ bwe aolep ro ‘nejũ rej etetal ilo m̦ool eo.’ (3 Jon 4) Melaine ej kiiõ jipañ l̦eo ippãn ilo an lol̦o̦k congregation ko. Leddik eo juon nejũ etan Andrea ej jerbal in special pioneer ippãn l̦eo ippãn, im jet iien erro ej bõk jerbal in lol̦o̦k congregation ko im jipañ er. L̦addik eo nejũ Ewan im kõrã eo ippãn rej special pioneer im ej juon elder ilo congregation eo an. Ava-Gay, leddik eo juon nejũ, ej jerbal ilo ra eo an Ri Kõnnaan ro an Jeova ilo Jamaica ippãn l̦eo pãleen. Jennifer, Genieve, im Nicole ewõr kiiõ aer baam̦le im rej aolep kijejeto im poub wõt ilo congregation ko aer. Marseree ej jokwe wõt ippa, im kõmro ej pãd ilo juon congregation etan Port Morant. Elukkuun l̦ap aõ jeraam̦m̦an kõnke aolep ajri ro rualitõk nejũ rej wõnm̦aanl̦o̦k wõt im jerbal ñan Jeova.
Kiiõ ke irũttol̦o̦k, ij jino m̦õjn̦o̦ im nañinmej l̦o̦k. Ikũrro kiiõ, bõtab ij niknik wõt ilo jerbal in kwal̦o̦k naan. Ak kõn an lukkuun tol̦tol̦e ijo ij jokwe ie, ijjab maroñ etetal im men in ear kapañ aõ kwal̦o̦k naan. Ak ke iar kajerbal bajkõl̦ ear pidodol̦o̦k aõ kwal̦o̦k naan jãn ñe ij etetal. Kõn men in, iar wiaki juon waõ bajkõl̦ im kajerbale. Ilo kar jinoin, ajri ro nejũ rar jab kõn̦aan bwe in bajkõl̦ kõnke ikũrro im emaroñ wal̦o̦k jorrããn. Bõtab, rar m̦õn̦õn̦õ in lo aõ wõnm̦aanl̦o̦k wõt im kwal̦o̦k naan joñan wõt aõ maroñ.
Ij lukkuun m̦õn̦õn̦õ ñe ij loe an ro iar katak ippãer jerbali katak ko jãn Baibõl̦ eo. Aolep iien ij jar bwe Jeova en jipañ aolep ro nejũ bwe ren wõnm̦aanl̦o̦k wõt im jerbal ñan e ilo raan kein ãliktata im ñan indeeo. Ij kam̦m̦oolol im nõbar Jeova, Ri “Roñjake jar” ko, kõn an kar jipañ eõ ñan lo tõprak ilo aõ katakin ajri ro nejũ bwe ren karejar ñan e.—Sam 65:2.
[Pija ilo peij 31]
Ña im ro nejũ kab ro pãleer im ro jibwũ
[Pija ilo peij 32]
Ij kiiõ bajkõl̦ im kwal̦o̦k naan