Ailiñ Eo An Anij—Eutiej jen Ailiñ Ko Jet ilo Wãwen Otemjej

JESUS CHRIST ear katakin ri kalor ro an: “Inem en wãwen drein ami jar. Jememuij i lõñ, En kwojarjar Etõm. En itok Am ailiñ. Ren kõmõnmõn ankil Am einwõt i lõñ, bareinwõt ion lõl.” (Matu 6:9, 10) Jar in, me elõñ rej naetan Jemeduij, ak Jar eo an Iroij, ej kamelele kin karõk eo an Ailiñ in Anij.

Ikijen Ailiñ eo, enaj kokwojarjar etan Anij. Enaj jolok aolep nan in kinaak ko rar walok kin jumae eo an Satan im armij. Men in eaorõk. Mõnõnõ eo an armij im jitõb ro otemjej ej wawa ion air kokwojarjar etan Anij im kõttãik ir ñan iroij eo an ilo mõnõnõ.​—Reveles̃õn 4:11.

Bareinwõt, jerbal eo an Ailiñ eo ej ñan “kõmõnmõn ankil [an Anij] einwõt i lõñ, bareinwõt ion lõl.” Ta in ankil an? Ej kõnan eo an ñan bar ejaak juõn kõtan emõn ikõtan Anij im armij, eo me Adam ear luji. Ailiñ eo enaj kajejjet kitien karõk eo an Iroij Bõtata eo, Jehovah, ñan kajutak juõn paradise ion lal ñan indio. Aet, Ailiñ eo an Anij enaj kajimwe aolep jorrãn ko jerawiwi eo moktata ear bõktok. Enaj bareinwõt kõmman bwe karõk eo Anij ear kõmmane kin lal in en jejjet kitien. (1 Jon 3:8) Emol, Ailiñ in im men eo enaj kõtõbrake, ej ennan eo elap ilo Bible eo.

Ilo Wãwen Et ko Eutiejlok?

Ailiñ eo an Anij ej juõn kien emol im elap an kajur. Ri kanan eo Daniel ear kameleleik kij jidik kin joñan kajur eo an. Ilo ien eo etto, ear kanan im ba: “Anij in lõñ enaj kajutak juõn ailiñ . . . enaj kajeebeplok aolepen ailiñ ko jet [an armij].” Bareinwõt, ñe jej keidi ibben kien ko an armij, me rej jutak im jako ilo aolepen bwebwenato in armij, Ailiñ eo an Anij “ejamin jebeblok.” (Daniel 2:44) Ebar wõr men ko jet. Ilo wãwen otemjej, Ailiñ in ej utiej jen jabdewõt kien an armij.

Ailiñ eo an Anij ewõr juõn King Eutiej. Lemnak kin wõn eo ej King. Ilo “ettõnak im . . . juõn vision” Daniel ear loi, ear lo Iroij eo an Ailiñ an Anij einwõt “juõn men eo einwõt nememin armij” im rar ãñinlok e iman Anij eo Ekajurtata im lelok “utiej im kajur an iroij.” (Daniel 7:1, 13, 14) Nejin armij in ej Jesus Christ—Messiah eo. (Matu 16:13-17) Jehovah Anij ear kãlet Nejin, eo ej Jesus, bwe en King ilo Ailiñ eo An. Ke ear bed ion lal, Jesus ear ba ñan Ri Pharisee ro renana: “Ailiñ in Anij ej iolapemi,” melelen bwe eo enaj King ilo Ailiñ eo ear bed ibwiljiir.​—Luk 17:21.

Wõn ian armij ro emaroñ Iroij joñan wõt Jesus? Emwij an Jesus kamol bwe ej juõn Ri Tel elet an wãnik im tiriamo, im jemaroñ lukkun liki. Book in gospel ko rej kwalok kin e einwõt juõn emaan eberan im joij im ewõr eñjake ko remũlal ibben. (Matu 4:23; Mark 1:40, 41; 6:31-34; Luk 7:11-17) Bareinwõt, Jesus eo emwij an jerkakbiji ejjab bed iumin kajur eo an mij ak jabdewõt likjap eo an armij.—Aiseia 9:6, 7.

Jesus im iroij ro mõttan rej iroij jen juõn jikin eutiej. Ilo juõn vision eo an, Daniel ear lo bareinwõt bwe “ailiñ otemjej ion lõl renaj ilok ñõn ibben ro dron Anij Lablab. Air kajur ejamin jemlok, im aoleb iroij ion lõl in renaj jerbal ñõn ir im bokake ir.” (Daniel 7:27) Jesus ejjab iroij make ian. Ebar wõr ro rej iroij einwõt king im priest ibben. (Reveles̃õn 5:9, 10; 20:6) Kin rein, ri jilek Jon ear je: “Im I ar lale, im lo, Lam ej jutõk ion tol Zaiõn, im iben jibuki eñoul im emen tausan, . . . ro emwij wiaik ir jen lõl.”—Reveles̃õn 14:1-3.

Lamb eo ej Jesus Christ elikin an jutak einwõt King ilo Ailiñ eo. (Jon 1:29; Reveles̃õn 22:3) Tol Zion ej jitõñlok ñan lañ.a (Dri Hibru 12:22) Jesus im 144,000 ri kabit ro mõttan rej iroij jen lañ. Ej juõn jikin elap an utiej me rej iroij jen e! Kinke rej bed ilañ, elõñlok men ko remaroñ lale. Kinke “ailiñ in Anij” ej bed ilañ, ej naetan bareinwõt “ailiñ in lõñ.” (Luk 8:10; Matu 13:11) Ejelok jabdewõt kein tarinae, elaptata kein tarinae in nuclear, emaroñ kokkure kien in ilañ. Ailiñ in enaj kajejjet kitien karõk eo an Jehovah.​—Dri Hibru 12:28.

Ailiñ eo an Anij ewõr ro retiljek rej jutak ikijen ion lal. Ewi wãwen ad jelã men in? Sam Ko 45:16 ej ba: “Kwo naj likit ir iroij i aolepen lõl.” Nan eo “Kwo” ilo kanan in ej jitõñlok ñan eo Nejin Anij. (Sam Ko 45:6, 7; Dri Hibru 1:7, 8) Kin men in, Jesus Christ make enaj kãlet iroij ro. Jemaroñ liki bwe renaj tiljek ilo air bokake nan in tel ko an. Ilo ran kein bareinwõt, elõñ maan ro rej jerbal einwõt elder ro ilo Christian congregation eo rej bõk katak, bwe ren jab “iroij wõt” ion ri tõmak ro mõttair, ak ren kejbãrok, kaemololo, im kainemõn ir.​—Matu 20:25-28; Aiseia 32:2.

Ewõr ro rewãnik rej kõttãik ir ñan Ailiñ eo. Rej wãppen im jimwe iman mejen Anij. (Jabõn Kennan Ko 2:21, 22) “A ro etã burueir re naj jolit ene eo,” Bible eo ej ba, “im re naj kalõñliñ ir mõke kin ainemõn elõñlok.” (Sam Ko 37:11) Ri karejar ro an Ailiñ eo rej inemõn—kinke ebidodo air katakin ir im etta burueir, im rejoij. Men ko ilo jitõb rej men ko elap air itoklimo kaki. (Matu 5:3) Rekõnan kõmman men eo ejimwe im rej lore nan in tel eo jen Anij.

Ailiñ eo an Anij ej wawa ion kien ko reutiej. Kien im nan in kaiñi ko ilikin kien ko relap me Ailiñ eo ej wawa ion rej itok jen Jehovah Anij. Jen air jibed kij, ilo mol, jej bõk tokjen ko remõn jen e. (Sam Ko 19:7-11) Elõñ armij ro rej bõk elap tokjen kin air mour ekkar ñan kien ko rewãnik an Jehovah. Ñan wanjoñok, ñe jej bokake nan in kakabilek ko ilo Bible ñan lõmaro im limaro ri belele im ajiri ro, men in ej kakõmõnmõnlok mour in family eo ad. (Dri Epesõs 5:33–6:3) Ñe jej bokake kien eo ñan “kõnõk yokwe,” jenaj kakõmõnmõnlok kõtan eo ad ibben ro jet. (Dri Kolosse 3:13, 14) Ñe jej mour ekkar ñan kien ko ilo Bible, jej kaddeklok manit ko remõn kin jerbal im juõn lemnak ejokkin wõt juõn kin money. (Jabõn Kennan Ko 13:4; 1 Timote 6:9, 10) Kejbãrok kij jen kadõk, mour in lũñ, kõbatat jikka, im jab bõk uno ko rekajur remaroñ kejbãrok ejmour eo ad.​—Jabõn Kennan Ko 7:21-23; 23:29, 30; 2 Dri Korint 7:1.

Ailiñ eo an Anij ej juõn kien Anij ear kajutake. King eo an​—Messiah eo, Jesus Christ—im aolep iroij ro mõttan rej aikwij uak ñan Anij im rejetak im kautiej kien ko im nan in kakabilek ko an rewãnik im joij. Ro rej kõttãik ir ñan Ailiñ eo, ekoba ri karejar ro an ion lal, rej lañliñ ilo air mour ekkar ñan kien ko an Anij. Anij ej e eo moktata ilo mour eo an iroij ro im ri karejar ro an Ailiñ eo. Kin men in, Ailiñ eo emol an juõn kien me Anij ej iroij ie. Emol an naj kõtõbrak un eo unin Anij ear kajutake. Ak ñããt eo Ailiñ eo an Anij, eo jej naetan bareinwõt Ailiñ in Messiah eo, enaj ijjino an iroij?

Ailiñ Eo Ej Jino an Jerbal

Juõn wãwen eaorõk ñan ad melele kin ñããt eo Ailiñ eo enaj ijjino an iroij jemaroñ loe ilo nan ko an Jesus. Ear ba, “Dri ailiñ ko re naj juri Jerusalem, ñõn ien ko an dri ailiñ ko rejejit.” (Luk 21:24) Ilo aolepen lal jikin kwelok in Jerusalem wõt ear bõk etan Anij. (1 Kiñ Ro 11:36; Matu 5:35) Kar jikin kwelok eo an ailiñ eo ion lal me Anij ear buñburuen kake. Ailiñ ko an lal renaj kar juri jikin kwelok in, melelen bwe kien ko an lal renaj iroij ion armij ro an Anij. Ñããt eo men in enaj kar ijjino?

King eo eliktata me ear jijet ion jikin iroij eo ilo Jerusalem ear bõk juõn nan in jiroñ: “Kwon utik crown ne am im nuknuk ne koran bõram. . . . Bõtab men in eban kijer in walok ñõn ñe eo iar kãlete bwe en kaje jikin kwelok eo ej itok. Inaj lelok jikin kwelok in ñõne.” (Ezekiel 21:25-27) Naj kar wutik crown eo jen bõran king eo, im iroij eo an Anij ion armij ro An enaj kar bõjrak. Men in ear walok ilo 607 B.C.E. ke Ri Babylon ro rar kokkure Jerusalem. Ilo “ien ko an dri ailiñ ko” me ear walok elikin, Anij ear jab kãlet juõn ailiñ bwe en jutak ikijen. Ilo jemlokin ien kein wõt Jehovah enaj kar lelok kajurin iroij eo ñan eo ear “kãlete”—Jesus Christ. Enaj kar ewi aetokin ien in?

Juõn kanan ilo book in Daniel ear ba: “Juoke wijki ne im joloke, ak drore wõt drãbdreb ne ilo bũdrej. Lukoj lukõn kin aen im bronze, . . . iumin jiljilimjuõn yiõ.” (Daniel 4:23) Einwõt jenaj loe, “jiljilimjuõn yiõ” ear joñan aetokin wõt “ien ko an dri ailiñ ko.”

Ilo Bible eo, jet ien wijki ko rar kõkkar kin armij ro kajjojo, iroij ro, im ailiñ ko. (Sam Ko 1:3; Jeremiah 17:7, 8, Ezekiel, chapter 31) “Aoleb ri lõl . . . remaroñ loe” wijki in kõkkar eo ilo alikar. (Daniel 4:11) Inem, wãwen iroij eo me wijki eo ear juoke im lukwõje ear kõkkar kake, ear jededlok ñan “aoleben lõl,” im ear kitibuj aolepen ailiñ ko an armij. (Daniel 4:17, 20, 22) Inem wijki eo ej kõkkar kin iroij bõtata eo an Anij, elaptata ikijen kõtan eo ñan lal in. Iumin jejjo ebeben ko, Jehovah ear kajutak ailiñ in Israel ñan kalikar kin wãwen iroij in. Wijki in kõkkar eo kar juoke, im lukwõj dãbdep eo kin iron im jinibõrõrõ ak bronze bwe en jab eddeklok. Men in ear kalikar bwe iroij eo an Anij ion lal enaj kar bõjrak, einwõt ear walok ilo 607 B.C.E.​—ak ejamin kar ñan indio. Wijki eo enaj kar lukluk wõt mae ien “jiljilimjuõn yiõ” in kõkkar eo enaj kar jemlok. Ilo jemlokin ien eo, Jehovah enaj kairoij ri jolet eo, Jesus Christ. Alikar, “jiljilimjuõn yiõ” in kõkkar eo im “ien ko an dri ailiñ ko” rej jitõñlok ñan ejja ien eo wõt.

Bible eo ej jibañ kij ñan lale ewi aetokin “jiljilimjuõn yiõ” in kõkkar eo. Ej watõk 1,260 ran ko ej joñan wõt “ien [juõn ien], ien ko [ruo ien ko, kajin elõñlok jen juõn], im jibilkwon ien”—koba aolep ej jilu im jimettan “ien ko.” (Reveles̃õn 12:6, 14) Melelen men in bwe elañe jej kalaplok ien kein ruo alen, renaj jiljilimjuõn ien ko, ak 2,520 ran ko.

Ñe jej bwine liktak 2,520 ran ko jen 607 B.C.E., jenaj tõbar 600 B.C.E. Bõtab, jiljilimjuõn ien ko ear wõnmanlok wõt elõñ yiõ ko tokelik. Rar wõnmanlok wõt ilo ien eo ke Jesus ear konono kin “ien ko an ailiñ ko.” Inem, jiljilimjuõn ien ak yiõ ko rej juõn men in kõkkar. Kin men in, jej aikwij jerbale kien eo: “Juõn ran ej einwõt juõn yiõ.” (Bwinbwin 14:34; Ezekiel 4:6) Ñe eindein, inem jiljilimjuõn ien ko me Anij enaj kõtlok bwe kien ko rekajur iaolepen lal renaj iroij ej iumin 2,520 yiõ ko. Ñe jej bwine 2,520 yiõ ko liktak jen 607 B.C.E. jej itok ñan yiõ eo 1914 C.E. Eñin yiõ eo ke “ien ko an dri ailiñ ko” ak jiljilimjuõn ien ko, ear jemlok. Men in ear melelen bwe Jesus Christ ear jino jerbal eo an einwõt King ilo Ailiñ eo an Anij ilo 1914.

“En Itok Am Ailiñ”

Kinke emwij an Ailiñ in Messiah eo jutak ilañ, jej aikwij wõnmanlok im jar ke bwe en itok wõt, einwõt an kar Jesus katakin kij kake ilo jar eo an? (Matu 6:9, 10) Aet. Jar kin men in ej juõn men ekkar. Mõttan jidik Ailiñ eo an Anij enaj kwalok aolepen kajur eo an ion lal.

Ñe men in enaj walok armij ro retiljek renaj lo jerammõn ko relap! Bible eo ej ba bwe “Anij e naj ber ibeir, im naj air Anij: Im E naj kõmõraik jen mejeir dren in kemjãlãl otemjej, im e naj ejelok bar mij, im re jamin bar liãjlol, ak jõñ, ak iñtan; bwe men ko mokta re joko.” (Reveles̃õn 21:3, 4) Ilo ien eo, “dri jokwe ie e jamin ba, I nañinmij.” (Aiseia 33:24) Aolep ro rej kabuñburuen Anij renaj bõk mour indio. (Jon 17:3) Ñe jej kõttar im kijoror wõt kin ien eo nan in kanan kein rekalañliñ ilo Bible renaj jejjet kitieir, jenaj “bukot mokta ailiñ in Anij, im kwojarjar eo An.”​—Matu 6:33.

[Kamelele eo itulal]

[Naan ko ilo peij 3]

Jehovah ear karõk bwe Jesus Christ en King ilo Ailiñ eo An

[Pija eo ilo peij 4]

2,520 yiõ ko

October 607 ◀ B.C.E. C.E. ▸ October 1914

606 1/4 yiõ ko 1,913 3/4 yiõ ko

“Ien ko an ailiñ ko” rar jino ilo 607 B.C.E. im rar jemlok ilo 1914 C.E.

[Pija eo ilo peij 6]

Ri karejar ro an Ailiñ eo an Anij ion lal renaj bõk elõñ jerammõn ko