Etke Jej Aikwij Kile Ri Jumae Christ Eo?

“Kom ar roñ bwe dri jumae Kraist ej itok,” kar kakõrmole ri jilek eo bwe en jeje etto. (1 Jon 2:18) Nan kein elap air kaitoktoklimo! Iumin elõñ buki yiõ ko, armij ro rar lemnak kaki im kõnan jelã kin ta melelen nan kein. Wõn eo ej ri jumae Christ? Ñããt eo enaj itok? Ta eo enaj kõmmane ñe enaj itok?

LAJRAK in armij ro kar narueir bwe rej ri jumae Christ elukkun aetok. Ilo ien ko etto, ro im kar naetair “dri jumae Kraist” ear koba Ri Jew ro, lajrak in pope ak Bata ro relaptata an Catholic, im iroij ro an Rome. Ñan wanjoñok, ke iroij in Rome eo etan Frederick II (1194-1250) ear kãlet bwe en jab kobalok ilo juõn makitkit ak tarinae an kabuñ in Catholic, Bata eo etan Gregory IX ear naetan iroij in ri jumae Christ im ear jolok etan jen kabuñ eo. Leo ear bõk jikin Gregory, etan Innocent IV, ear bar jolok etan Frederick jen kabuñ eo. Im ilo an uak, Frederick ear ba bwe Bata eo etan Innocent e eo ear ri jumae Christ.

Ri jilek John wõt jen ian ri jeje Bible ro ej kajerbal nan in “dri jumae Kraist.” Ilo ruo ian book ko rej etnake etan, nan in ej walok lalem alen, ilo an kajerbale ñan jitõñlok ñan juõn armij ak ñan elõñ. Eon ko me nan in ej walok ie rej kõlajraki ilo box eo ilo alen eo tok juõn. Jen eon kein, jemaroñ lo bwe ri jumae Christ ej juõn ri riap im ri mon, im jibadbad eo an ej ñan an kokkure kõtan eo an juõn armij ibben Christ im ibben Anij. Eñin unin, ri jilek eo ear rejañ Ri Christian ro mõttan: “Ro jitenburu, komin jab tõmak jitõb otemjej, a melejoñ jitõb rõn elañe rej jen Anij ke jab ke: bwe elõñ dri kanan riõp r’ar drioijlok na ilo lõl.”​—1 Jon 4:⁠1.

Jesus bareinwõt ear kakkõl nae ri jelã mon ro, ak ri kanan wan ro, ke ear ba: “Rej itok ñõn ibemi kin wãwen s̃ip, a ilo burueir einwõt wulp ko relej. Kom naj jela kajeir kin leir [ak, jerbal ko air].” (Matu 7:​15, 16) Jesus ear kakkõl ke ri kalor ro an bareinwõt nae ri jumae Christ ilo kõkkar eo? Jen lale ewi wãwen jemaroñ kile ri jelã mon in elej.