Katakin Ta Eo Bible Ej Lukkun Katakin
“Kõmõn dri ailiñ ko otemjej bwe ren dri kalora, . . . katakin ir.”—MATU 28:19, 20.
1. Ta eo jemaroñ ba kin joñan an bidodo an armij ro maroñ bõk air Bible?
NAN eo an Jehovah, Bible eo, ej juõn ian book ko ettotata air bed im elaptata air kajededloki ilo lal in. Rar ukõte ilo eyu ak ilo mõttan in ilo elõñlok jen 2,300 kajin ko. Elõñlok jen 90 percent in armij ro ilo lal in ewõr Bible eo ilo kajin eo air make.
2, 3. (a) Etke ewõr bwok kin katak ko ilo Bible? (b) Ta kajitõk ko jenaj etali?
2 Elõñ million armij ro rej read jet chapter ko ilo Bible eo kajjojo ran. Jet armij elõñ alen emwij air kar read aolepen Bible eo. Elõñ thousand kumi in kabuñ ko rej ba bwe katak ko air rej bedbed ion Bible eo, ak rejjab errã ibben kumi in kabuñ ko jet kin ta ko rej katakin kake. Men eo me ej kalaplok bwok ej lemnak ko reoktak jen don ikõtan ro uan ejja kabuñ eo wõt. Jet ewõr air bere kin Bible eo, wõn eo ear kõmmane, im tokjen eo. Elõñ rej watõke einwõt juõn book ekwojarjar rej kajerbale wõt ñe rej kallimur kin juõn men ak ilo imõn ekajet eo ñe rej kanejnej ñan kwalok mol eo.
3 Ilo mol, ewõr ilo Bible eo nan, ak ennan, eo ekajur an Anij ñan armij. (Dri Hibru 4:12) Einwõt Ri Kennan ro an Jehovah, jekõnan bwe armij ren katak kin ta eo Bible ej katakin. Jej mõnõnõ in kajejjet jerbal eo Jesus Christ ear lelok ñan ri kalor ro an ke ear ba: “Komin ilok, im kõmõn dri ailiñ ko otemjej bwe ren dri kalora, . . . katakin ir.” (Matu 28:19, 20) Ilo jerbal in kwalok nan eo ad, jej lo armij ro emol burueir me rej buromõj im inebata kin bwok ko ilo kabuñ me rej jededlok ilo lal. Rekõnan jelã mol eo kin Ri Kõmanman eo ad im ñan katak kin ta eo Bible ej ba kin unin mour. Jen etale jilu kajitõk ko me elõñ armij ro rej itoklimo kaki. Ilo kajjojo kajitõk, jenaj lale ta eo ri tel in kabuñ ko rej ba ilo bwid, inem jenaj elij kin ta eo Bible ej lukkun katakin. Kajitõk kein rej: (1) Anij ej kea kake kij ke? (2) Etke jej bed ijin ion lal? (3) Ta eo ej walok ñan kij ñe jej mij?
Anij Ej Kea Ke?
4, 5. Etke armij rej lemnak bwe Anij ejjab kea kake kij?
4 Jen jino kin kajitõk eo, Anij ej kea kake kij ke? Ekaburomõjmõj bwe, elõñ armij rej lemnak bwe uak eo ej jaab. Etke ej eindein lemnak eo air? Juõn un ej kinke rej jokwe ilo juõn lal eobrak kin kijirãt, tarinae, im eñtan. ‘Elañe emol an Anij lukkun kea,’ rej lemnak, ‘enaj kar bõprae jorrãn kein jen air walok.’
5 Bar juõn unin armij rej lemnak bwe Anij ejjab kea kake kij ej kinke ri tel in kabuñ ko rar kõmman bwe en eindein eñjake ko air. Ta eo ekkã an ri tel in kabuñ ko ba ñe ej walok juõn jorrãn? Ke ajiri ro ruo nejin juõn kõrã rar mij ilo juõn lanwõtwõt, ri tel in kabuñ eo an ear ba: “Kar ankil an Anij. Anij ear aikwij mõttan ruo bar enjel ro.” Ñe ri tel in kabuñ ko rej ba nan rot kein, ilo mol rej naruõn Anij kin men ko renana rej walok. Ak, ri kalor eo James ear je: “Elañe eor en ebo ilo menin melejjoñ kein, en jab ba, ‘Menin kabo kein rej itok jen Anij.’ Bwe nana eban kabo Anij, im ejjelok en Anij ej kabo e.” (James 1:13) Jehovah Anij ejjab kõmman men ko renana. Emol, “en etolok jen Anij, bwe En kõmõn nana.”—Job 34:10.
6. Wõn eo ej ilikin nana im eñtan ko ilo lal in?
6 Inem, etke elap an wõr nana im eñtan? Juõn un ej kinke armij rar karmijeteik Anij einwõt Iroij, kin air jab kõnan kõttãik ir ñan kien ko im nan in kaiñi ko an rewãnik. Armij ilo air jaje kake rar kõttãik ir ñan Ri Kijirãt eo an Anij, Satan, kinke “aolepen lõl ej berwõt ilo dri nana eo.” (1 Jon 5:19) Air jelã kin men in ej kõmman bwe en bidodolok air melele kin etke wãwen ko renana rej walok. Satan ej nana, etao, im lej. Inem jej aikwij kõtmene bwe lal eo enaj kwalok kadkadin iroij eo an. Eñin unin elap an wõr nana!
7. Ta jet un ko unin ad iion jorrãn im eñtan ko?
7 Jab wãppen an armij ej bar juõn unin jej iion eñtan. Armij ro rejerawiwi ekkã air kate ir bwe ren utiej ak en wõr air maroñ ion ro jet, im men in ekkã an walok ilo tarinae, ijjibed, im eñtan ko. Ekklisiastis 8:9 ej ba ilo ekkar: “Eor ien ñe juõn armij eor an maroñ ion bar juõn bwe en kejorran e.” Bar juõn unin ej walok eñtan ej kinke “ien im men in walok rej itok ñõn ir otemjej.” (Ekklisiastis 9:11) Armij ro ekkã air iion jorrãn kinke rej bed ilo juõn jikin ejejjet ien eo ej walok juõn jorrãn ie.
8, 9. Ewi wãwen ad jelã bwe Jehovah elukkun kea kake kij?
8 Ej kainemõn kij ñan jelã bwe Jehovah ejjab unjen eñtan ko. Ak Anij emol ke an kea kin ta eo ej walok ilo mour ko ad? Uak eo ekalañliñ buru ej aet! Jejelã bwe Jehovah ej kea kake kij kinke Nan in kakõrmol eo an ej jiroñ kij kin unin ear kõtlok bwe armij ro ren jibadõk juõn ial ebwid. Un kein an Anij rej kitibuj ruo aitwerõk ko: iroij bõtata eo an im tiljek eo an armij ro. Kinke ej Ri Kõmanman eo ekajur bõtata, Jehovah ejjab aikwij jiroñ kij kin etke ej kõtlok eñtan. Ak, ej jiroñ kij kin men in kinke ej kea kake kij.
9 Lemnak kin kein kamol ko jet me rej kalikar bwe Anij ej kea kake kij. Ear “buromõj buruen” ke nana ear kobrak lal ilo ran ko an Noah. (Jenesis 6:5, 6) Eoktak ke eñjake eo an Anij rainin? Jaab, kinke ejjab oktak. (Malachi 3:6) Ej kitõtõkake ekajet jab jimwe im ejjab kõnan lo an armij eñtan. Bible eo ej katakin bwe mõttan jidik Anij enaj jolok aolep jorrãn ko rar walok jen an armij iroij im jen kilan Devil eo. Ejjab kein kamol eo emõn ke bwe Anij ej kea kake kij?
10.Ewi lemnak eo an Jehovah kin eñtan ko an armij?
10 Ri tel in kabuñ ko rej kariap Anij ñe rej ba bwe jorrãn ko jej iioni rej mõttan ankil an. Ilo oktan, Jehovah ej kijoror wõt in bõktok jemlokin eñtan ko an armij. “Ej ierki kom,” 1 Piter 5:7 ej ba. Eñin men eo Bible ej lukkun katakin!
Etke Jej Bed Ijin Ion Lal?
11.Ta eo ekkã an kabuñ ko ilo lal in ba kin mour eo an armij ro ijin ion lal?
11 Jen etale kiõ kajitõk eo kein karuo me elõñ rej lemnak kake, Etke jej bed ijin ion lal? Ekkã an kabuñ ko ilo lal in uak im ba bwe bed eo an juõn armij ion lal ejedkaju. Rej watõk lal in einwõt juõn jikin bõjrak jidik, ak jikin uwe, ilo ial eo ñan bar juõn wãwen mour. Jet ri tel in kabuñ ko rej bwid im katakin bwe juõn ien Anij enaj kokkure lal in. Tokjen katak rot kein, elõñ armij rar bõk lemnak eo bwe emõnlok air kõmman jabdewõt men rekõnan ñe remaroñ kinke ilju wõt eo air ej mij. Ta eo Bible ej lukkun katakin kake kin etke jej bed ijin ion lal?
12-14. Ta eo Bible eo ej katakin ikijen karõk eo an Anij kin lal in im armij ro?
12 Ewõr juõn karõk emõn an Anij kin lal in im armij ro. Ear “kõmõnmõn lõl im jab kõmõne wan” ak ear “nawãwen bwe ren jokwe ie.” (Aiseia 45:18) Bareinwõt, Jehovah “E ar likit loñtak ko an lõl, bwe en jab makõtkit ñõn in drio.” (Sam Ko 104:5) Ñe jej katak kin karõk kein an Anij kin lal in im armij ro emaroñ jibañ kij melele kin etke jej bed ijin ion lal.
13 Jenesis chapter 1 im 2 rej kwalok bwe Jehovah ear lukkun tiljek ke ear keboj lal in ñan armij. Ilo tu-jemlokin ien kõmanman lal eo ad, aolep men rar “kanuij emõn.” (Jenesis 1:31) Anij ear likit maan im kõrã eo moktata, Adam im Eve, ilo jikin kallip eo eaibujuij in Eden im lelok ñan ir elõñ mõñã ko renno. Kar jiroñ armij ro ruo moktata: “Komin timon im orlok, im kobrõk lõl, im kajur jen e.” En kar wõr ro nejiir rewãppen, ñan kalaplok jikin kallip eo ñan an kitibuj aolepen belakin lal, im ñan iroij ilo yokwe ion menin mour ko.—Jenesis 1:26-28.
14 Ej karõk eo an Jehovah bwe juõn jukjuk im bed in armij ro rewãppen ren jokwe ion lal ñan indio. Nan in Anij ej ba: “Ro remõn re naj jolit ene eo, im jokwe iloan ñõn in drio.” (Sam Ko 37:29) Aet, kar karõk bwe armij ren mõnõnõ kin mour indio ilo Paradise ion lal. Eñin karõk eo an Anij, im ej men eo Bible ej lukkun katakin kake!
Ta eo Ej Walok ñan Kij Ñe Jej Mij?
15.Ta eo enañin aolep kabuñ ko ilo lal in rej katakin kin ta eo ej walok ñan kij ñe jej mij?
15 Jen etale kiõ kajitõk eo kein kajilu me elõñ rej lemnak kake: Ta eo ej walok ñan kij ñe jej mij? Enañin aolep kabuñ ko ilo lal in rej katakin bwe ewõr juõn men iloan armij eo me ej mour manlok elikin an mij enbwin eo. Jet kabuñ ko rej tõmak wõt bwe Anij ej kajeik ro renana ilo an kaeñtan ir ñan indio ilo hades ak juõn jikin eurur. Ak eñin ke mol eo? Ta eo Bible ej lukkun katakin kin mij?
16, 17.Ekkar ñan Bible eo, ta wãwen ro remij?
16 Nan in Anij ej ba: “Bwe ro re mour re jela bwe re naj mij: a ro re mij ejelok air jela, im e bar ejelok men in lelok ñõn ir.” Kinke ro remij “ejelok air jela,” rejjab maroñ roñjake, lo, konono, eñjake, ak lemnak. Rejjab maroñ bõk wõnãn, kinke rejjab maroñ jerbal! Eindein, “air yokwe, im bareinwõt air kijirãt im junmar, re joko eto,” bwe rejjab maroñ kwalok jabdewõt eñjake.—Ekklisiastis 9:5, 6, 10.
17 Men eo Bible eo ej ba kin katak in elamwan im alikar—ro remij rejjab mour manlok wõt ilo bar juõn jikin. Ejelok juõn men ej illok jen enbwinid ñe jej mij im mour manlok im lotak ilo bar juõn enbwin, einwõt ro rej tõmak ilo reincarnation (bar lotak) rej ba. Jemaroñ kwalok juõn wanjoñok ilo wãwen in: Mour eo jej mõnõnõ kake jemaroñ keidi ñan kijeek eo ej urur in juõn candle. Ñe ekun kijeek eo, ejjab etal ñan bar juõn jikin. Ej baj jako wõt.
18.Ñe juõn ri katak Bible ej katak bwe ro remij rejajelokjen, kain lemnak rot emaroñ bõki?
18 Lemnak kin ta melelen mol in ekajur ak elamwan. Ñe juõn ri katak Bible ej katak bwe ro remij rejajelokjen, ebidodo an naj maroñ melele bwe jekdon ewi joñan an kar ro nukin illu ibben ke rar mour, rejjab maroñ kabõnõnõik e. Enaj mõkaj an kile bwe ro jitenburu ibben remij rejjab maroñ roñjake, lo, konono, eñjake, ak lemnak. Kin men in, rejjab maroñ iion buromõj eo elap kin air make iair ilo jikin ro remij ak eñtan ilo juõn jikin kijeek. Bõtab, Bible eo ej katakin bwe ro remij me Anij ej kememej ir renaj jerkakbiji. Ej juõn kejatdikdik elap an emõn!—Jon 5:28, 29.
Juõn Book Ekãl Jemaroñ Kajerbale
19, 20. Einwõt Ri Christian ro, ta eddo eo ewõr ibbed, im ta kein jibañ eo ñan katak Bible elaptata kar eiki ñan ad kajerbale ilo jerbal in kwalok nan eo ad?
19 Emwij ad etale jilu wõt kajitõk ko me elõñ armij rar lemnak kaki. Ilo kajjojo iair, men eo Bible eo ej katakin kake elukkun alikar im lamwan. Elap an kalañliñ kij ñan kwalok mol kein ñan ro me rekõnan jelã ta eo Bible eo ej katakin! Ak ej lõñ wõt kajitõk ko jet raorõk me ro emol burueir rej aikwij bõk uak ko rekajuburu kaki. Einwõt Ri Christian ro, ewõr eddo eo ibbed ñan jibañ ir lo uak ko ñan kajitõk rot kein.
20 Ej juõn aitwerõk elap ñan katakin mol eo jen Bible eo ilo juõn wãwen ealikar im ej kareel buruen armij. Ñan jibañ kij kamadmõde aitwerõk in, “dri korijer e tiljek im meletlet” ear keboj juõn book me kar eiki ñan ad kajerbale ilo jerbal in kwalok nan eo ad. (Matu 24:45-47) Kein jibañ in ej book eo 224-page aetokin naetan What Does the Bible Really Teach? (Ta eo Bible Ej Lukkun Katakin?)
21, 22.Ta jet ian mõttan ko elap air aorõk im ewõr tokjeir ilo book eo What Does the Bible Really Teach? (Ta eo Bible eo Ej Lukkun Katakin?)
21 Book in, me kar kwalok kake ilo 2005/06 “Bokake Anij” District Convention ko an Ri Kennan ro an Jehovah, ewõr mõttan ko elap air aorõk im wõr tokjeir. Ñan wanjoñok, ewõr juõn preface (nan in jino ko) lalem page aetokin me ej kamelele kin kobban book in im elap an jibañ ñan ijjino katak kin Bible ko. Kwonaj lo bwe ebidodo am naj bwebwenato kin pija ko im eon ko ilo preface eo. Kwomaroñ bareinwõt kajerbal mõttan jabin ñan kwalok ñan ri katak ro kilen bukõt chapter im eon ko ilo Bible.
22 Kar je book in ilo juõn wãwen elamwan im alikar. Juõn jibadbad kar kõmmane ñan tõbar buruen ri katak eo ilo air kobaik e ilo bwebwenato eo ñe emaroñ. Kajjojo chapter ewõr jet kajitõk ko ilo jinoin im juõn box im jemlokin naetan “What the Bible Teaches” (Ta eo Bible Ej Katakin). Box eo ewõr uak ko rej bedbed ion Bible ñan kajitõk ko ilo jinoin. Pija ko remõn im nan ko itulal im bareinwõt wanjoñok ko rej jeje iloan book in renaj jibañ ri katak eo ñan bõk melele ko rekãl. Meñe katak ko ilo book in relamwan, ewõr juõn appendix (kamelele ko jet ilo tujemlokin book eo) me enaj kõtlok am etale 14 katak ko raorõk ilo tibdikin elañe ri katak eo ej aikwij bõk melele ko jet.
23.Ta nan in rejañ ko rej litoki ikijen kajerbal Bible Teach book eo ñe kwoj kõmman katak kin Bible ko?
23 Bible Teach book eo kar eiki ñan jibañ kij katakin armij ro me eoktak joñan jelãlokjen ko air im rej jen kabuñ ko reoktak jen don. Elañe juõn ri katak ejelok an jelãlokjen kin Bible eo, emaroñ bõk elõñlok jen juõn alen katak ñan etale juõn chapter. Kwon jab kakaiuriur in etale katak eo, ak kate yuk ñan tõbar buruen ri katak eo. Elañe ejjab melele kin juõn wanjoñok me book eo ej kajerbale, kwon kameleleik e ak kajerbal bar juõn wanjoñok. En emõn am kebojak, kwon kõmman joñan wõt am maroñ ñan kajerbal book eo ilo juõn wãwen ekeie, im jar kin jibañ jen Anij bwe kwon maroñ kõmman bwe en ‘jimewõt am katakin kin nan in mol.’—2 Timote 2:15.
Kwon Kamolol kin Jerammõn ko Am Raorõk
24, 25. Ta jerammõn eo eaorõk Jehovah ear lelok ñan armij ro an?
24 Jehovah ear lelok ñan armij ro an elõñ jerammõn ko raorõk. Ear kamaroñ kij ñan katak mol eo kin e. Jen jab jerwane jerammõn in! Ilo mol, Anij ear noje karõk ko an jen ro eutiej burueir im ear kwaloki ñan ro ettã burueir. Ikijen men in, Jesus ear ba: “Ij kamolol Yuk O Jema, Iroij in lõñ im lõl, bwe Kw’ar noj men kein jen ro dri meletlet im dri jelalokjen, im Kw’ar kwaloki ñõn niñniñ rõn.” (Matu 11:25) Ej juõn jerammõn ejej uan ñan air bwine yuk jen ian ro ettã burueir me rej karejar nan Iroij Bõtata eo ijoko otemjej, Jehovah.
25 Anij ear letok ñan kij jerammõn eo ñan katakin ro jet kin e. Kememej bwe ro rar katakin riap ko kin Anij rar kwalok kin e ilo bwid. Kin men in elõñ armij ewõr air lemnak ko rebwid kin Jehovah, ilo air lemnak bwe ejjab kea kake kij im ejjab kwalok an tiriamo kin eñtan ko an armij. Kwoj mõnõnõ ke, im kijerjer bareinwõt, ñan kajimwe lemnak in ebwid? Kwokõnan ke bwe armij ro emol burueir ijoko otemjej ren jelã mol eo kin Anij? Inem, kwalok am bokake Anij ilo am kijejeto in kwalok nan im ilo am katakin ro jet kin ta eo Bible ej ba kin katak ko raorõk. Ro rej bukõt mol eo rej aikwij katak kin ta eo Bible ej lukkun katakin kake.
Ta Uak ko Am?
• Ewi wãwen ad jelã bwe Anij ej kea kake kij?
• Etke jej bed ijin ion lal?
• Ta eo ej walok ñan kij ñe jej mij?
• Ta mõttan ko ilo Bible Teach book eo elap am kamolol kaki?
[Pija ko ilo peij 8]
Bible eo ej katakin bwe eñtan otemjej renaj jemlok
[Credit Line]
Tulõñ tuanbwijmaroñ, ledik: © Bruno Morandi/age fotostock; tuanmiñ, kõrã: AP Photo/Gemunu Amarasinghe; tulal tuanbwijmaroñ, ro ri ko: © Sven Torfinn/Panos Pictures
[Pija eo ilo peij 9]
Ro rewãnik renaj mour indio ilo Paradise