Jehovah Ej juõn Anij in Kamolol
“Bwe Anij e wãnik wõt, im E jamin meloklok ami jerbal im yokwe, eo kom ar kwalok kin etan.”—DRI HIBRU 6:10.
1. Ewi wãwen an kar Jehovah kwalok an kamolol kin Ri Moab eo Ruth?
JEHOVAH elap an kamolol kin wãwen an ro emol burueir kate ir ñan kõmanman ankil an, im elap an kajerammõn ir. (Dri Hibru 11:6) Leo etiljek Boaz ear jelã kin kadkad in eaibujuij an Anij, kinke ear ba ñan Ri Moab eo Rut, eo ilo yokwe ear lale lio jinen ejako belen: “Jeova en nawõnam kin am jerbal, im en lap wõnam jen Jeova.” (Rut 2:12) Anij ear kajerammõn ke Ruth? Aet! Eñin unin bwebwenato eo kin e ej bed ilo Bible eo! Bareinwõt, ear belek Boaz im erom nukin King David im Jesus Christ jimor. (Rut 4:13, 17; Matu 1:5, 6, 16) Wanjoñok in ej juõn ian wanjoñok ko remõn ilo Bible eo me rej kwalok kin kamolol eo an Jehovah kin ro ri karejaran.
2, 3. (a) Ta eo ej kõmman bwe nan in kamolol ko an Jehovah en juõn men ekabwilõñlõñ? (b) Etke Jehovah emaroñ kwalok kamolol eo emol? Kwalok juõn wanjoñok.
2 Jehovah enaj kar watõk bwe ej juõn men enana elañe ej jab kwalok an kamolol. Dri Hibru 6:10 ej ba: “Bwe Anij e wãnik wõt, im E jamin meloklok ami jerbal im yokwe, eo kom ar kwalok kin etan, kin ami jibõñ ro remõn mokta im kiõ.” Nan kein rekabwilõñlõñ kinke Anij ej kwalok an kamolol kin armij ro retiljek meñe rej jerawiwi im likjap jen aibujuij an Anij.—Dri Rom 3:23.
3 Kinke jejjab wãppen, jemaroñ lemnak bwe kõmman ko ad ñan Anij edik tokjeir im rejjab tellokin bõk kajerammõn jen Anij. Bõtab, Jehovah elukkun jelã kin unin ad kõmmani men ko im wãwen ko ibbed, im elukkun kaorõk jerbal ko ad jej kõmmani kin aolepen buruõd. (Matu 22:37) Ñan wanjoñok: Juõn jinen ej lo juõn men in lelok ñan e—juõn marmar im ejjab lap wõnãn—ion table eo an. Emaroñ kar watõk men in letok in edik tokjen im kajekdone. Bõtab, peba eo ej itok ibben men in letok eo ej kalikar bwe ledik eo nejin eo ear leloke im ear kajerbal aolep money ko an ñan an wiaiki. Kiõ jinen ej bõk juõn lemnak einjuõn jen eo mokta kin men in lelok eo. Kin den in kemjalal ilo mejen, ej atbokwõje eo nejin im kwalok an kamolol.
4, 5. Ewi wãwen an kar Jesus kajeoñe Jehovah ilo an kwalok kamolol?
4 Kinke ejelã kin unin ad kõmmani men ko im joñan maroñ ko ad, Jehovah ej kamolol ñe jej jerbal ñan e kin aolepen buruõd, meñe elap ak edik joñan. Ikijen men in, Jesus ear kwalok ilo wãppen ejja kadkad ko wõt kadkadin Jemen. Kememej bwebwenato eo ilo Bible kin kõrã eo ejako belen im jabawõt eo an. “Im [Jesus] Ej reilõñ im lo dri mweie rej likit jurtak ko air na ilo dipdip in mõnni. Im bareinwõt Ej lo juõn kõra ejeramel im ejoko belen, ej likit iloan ruo mõnni jiniñ. Im E ba, Emol Ij ba ñõn kom, bwe kõra in ejeramel im ejoko belen e ar likit iloan elap jen ir otemjej: Bwe rein otemjej jen elõñ mweieir r’ar likit na iloan ñõn jurtak ko: a e jen an jeramel e ar likit iloan an mour otemjej iben.”—Luk 21:1-4.
5 Aet, ilo an jelã bwe ejako leo belen kõrã eo im ejeramel, Jesus ear melele bwe men in lelok eo an ear lukkun aorõk, im men in ear kamakit e bwe en kwalok an kamolol. Jemaroñ ba eindein kin Jehovah. (Jon 14:9) Ej juõn men in kõketak ñan am jelã bwe jekdon ta wãwen ko kwoj jelmaiki, jemaroñ kabuñburuen Anij in kamolol eo ad im Nejin.
Jehovah Ej Nawõnãn Ri Itiopia Eo Ej Mijak Anij
6, 7. Etke im ewi wãwen an kar Jehovah kwalok kamolol eo an ñan Ebed-melech?
6 Bible eo ej kalikar elõñ alen bwe Jehovah ej kwalok kamolol eo an kin ro rej kõmanman ankil an. Lemnak kin wãwen an kar jerbal ibben Ebed-melech, Ri Itiopia eo e mijak Anij, eo ear mour ilo ran ko an Jeremiah im ear juõn ian ri karejar ro an King Zedekiah ilo Judah eo ear jab tiljek ñan Anij. Ebed-melech ear roñ bwe bwirak ro an Judah rar naruõn Jeremiah ilo jab jimwe im ba bwe ear jumae kien eo im tokelik jolallok e ilo aebõjlõl eo, mae ien emij kin kwuli. (Jeremiah 38:1-7) Kinke ejelã bwe armij ro rar kijirãte Jeremiah kin ennan eo ear kwalok, Ebed-melech ear eowore king eo meñe ear jelã bwe emaroñ kar mij kin men in. Ilo beran, Ri Itiopia in ear konono im ba: “O King, men eo lõma rein rar kõmmõne ebwid. Rar drorlõllok Jeremiah iloan aibwijlõl eo, im mol enaj mij na ie kin kwule.” Elikin an king eo kaiñi ir, Ebed-melech ear bõk 30 emaan im kanemkwoj ri kanan eo an Anij.—Jeremiah 38:8-13.
7 Jehovah ear lo bwe Ebed-melech ear jerbal kin tõmak, im men in ear jibañ e bwe en anjo ion jabdewõt mijak ear itok ion. Kin men in, Jehovah ear kwalok an kamolol im ba ñan Ebed-melech ikijen Jeremiah: “Inaj kejebeblok jikin kwelok in einwõt aõ kar ba, im ijamin kejerammõne. . . . Ak ña, Iroij, inaj kejbarok yuk im ejelok en enaj liakelok yuk ñõn ro kwoj mijak ir. Inaj lomoren yuk im rejamin mõn yuk. Kwonaj mour wõt kin am kar liki iõ.” (Jeremiah 39:16-18) Aet, Jehovah ear lomoren Ebed-melech im Jeremiah, jen bwirak ro renana an Judah im tokelik jen Babylon, eo ear kokkure Jerusalem. “[Jehovah] ej kejbãrok an ro remõn An. Ej kõtlok ir jen pein ro dri jerawiwi,” Sam 97:10 ej ba.
“Jemõm Ej Lo Ilo Etino, E Naj Nawõnãm”
8, 9. Einwõt Jesus ear kwalok, kain jar rot ko Jehovah ej buñburuen kaki?
8 Bar juõn men ej kamol bwe ewõr an Jehovah kamolol im ej kaorõk wãwen ad kabuñ ñan e jemaroñ loe ilo Bible kin ta eo ej ba kin jar. Juõn ri meletlet ear ba, “Jar an eo dru wãnik, men in mõnõnõ iben.” (Jabõn Kennan Ko 15:8) Ilo ran ko ke Jesus ear bed ion lal elõñ ri tel ro an kabuñ rar jar iman mejen armij, jab kin juõn buru emol, ak kin air kõnan kabuñburuen armij. “Emol Ij ba ñõn kom, Emwij air bõk wõnair,” Jesus ear ba. “A kwe, ñe kwoj jar,” ear ba ñan ro ri kaloran, “kwon dreloñ iloan jikõm etino im ñe emwij kil am aur, kwon jar ñõn Jemõm ej ber ijo etino; im Jemõm ej lo ijo etino, E naj nawõnãm.”—Matu 6:5, 6.
9 Emol, Jesus ear jab kamoik an armij ro jar iman mejen armij, kinke ewõr jet ien ko e bareinwõt ear jar iman mejen armij ro. (Luk 9:16) Elap an Jehovah kamolol ñe jej jar ñan e kin juõn buru emol, ejjab kinke jekõnan kamõnõnõik armij ro. Emol, ñe jej jar ilo ittino, ej kalikar kin joñan mũlalin yokwe im liki eo ad ilo Anij. Inem, ejjab men in bwilõñ bwe ekkã an kar Jesus makelok ian ke ear jar. Juõn ien, ear kõmmane men in ke ear “jerkak eto jen rantak.” Bar juõn ien ear, “mõkeliñlok ñõn tol ko bwe En jar.” Im mokta jen an kar kãlet ri jilek ro joñoul ruo, Jesus ear make ian aolepen boñin eo ilo jar.—Mark 1:35; Matu 14:23; Luk 6:12, 13.
10. Ñe jar ko ad rej kwalok juõn buru emol im eñjake ko ad remũlal, kin ta eo jemaroñ liki?
10 Baj lemnak mõk kin ewi joñan an kar Jehovah lukkun roñjake nan ko an Nejin! Emol, jet ien Jesus ear jar im “elap An lamij im jõñ ñõn Eo e ar maroñ in lomor E jen mij, im emwij eoroñ E kin an ujõke.” (Dri Hibru 5:7; Luk 22:41-44) Ñe jej jar kin juõn buru emol im jen mũlalin eñjake eo ad, jemaroñ liki bwe Jemed ilañ ej lukkun roñjake kij ilo kamolol. Aet, “Jeova ej ebak . . . ñõn ro otemjej rej kir ñõn E ilo mol.”—Sam Ko 145:18.
11. Ewi wãwen an Jehovah lemnak kin ta eo jej kõmmane ilo ittino?
11 Elañe ewõr an Jehovah kamolol ñe jej jar ñan e ilo ittino, enaj laplok an kamolol ñe jej bokake e ilo ittino! Aet, Jehovah ejelã kin ta eo jej kõmmane ilo ittino. (1 Piter 3:12) Emol, ñe jej tiljek im kiblie ñe jejjab bed ibwiljin armij ro jet ej kalikar bwe buruõd “e wãppen” ibben Jehovah, juõn buru emol im etiljek ñan kõmman men eo ejimwe. (1 Kronikel 28:9) Kain mwil rot in ej kamõnõnõik buruen Jehovah!—Jabõn Kennan Ko 27:11; 1 Jon 3:22.
12, 13. Ewi wãwen jemaroñ kejbãrok lemnak eo ad im buruõd im bwe jen einwõt ri kalor eo etiljek Nathanael?
12 Eñin unin, Christian ro retiljek rej kejbãrok ir nae bwid ko rittino rej kokkure lemnak im buruen armij, einwõt aluij pija in kelwan im kowadoñ. Meñe jet bwid ko remaroñ nojak jen mejen armij ro, jejelã bwe “men otemjej re kelwan im bellok iman mejen Eo ej bebek kij.” (Dri Hibru 4:13; Luk 8:17) Ilo ad kate wõt im kejbãrok kij jen men ko Jehovah ejjab buñburuen kaki, jej debij juõn bõklikit erreo im jej mõnõnõ in jelã bwe jej kabuñburuen Anij. Aet, ejelok bere bwe Jehovah elap an kamolol kin armij eo “ejime an etetal, ej kõmõn wãnik, im e konono mol ilo buruen.”—Sam Ko 15:1, 2.
13 Bõtab, ewi wãwen ad maroñ kejbãrok lemnak eo ad im buruõd ilo juõn lal eobrak kin nana? (Jabõn Kennan Ko 4:23; Dri Epesõs 2:2) Ijellokin ad bõk tokjen jen aolep men in letok ko ilo jitõb, jej aikwij kamaat ad maroñ im kate kij ñan ad karmijeteik ta eo enana im kõmman men eo emõn, jerbal ilo mõkaj bwe kõnan ko renana ren jab eddek im keotak jerawiwi. (Jemes 1:14, 15) Kwon kalmenlokjen kin ewi joñan am naj mõnõnõ elañe Jesus ear ba kin kwe einwõt ear ba kin Nathanael: “Lo, [juõn emaan] emol, ejelok mon iben!” (Jon 1:47) Nathanael, ãt eo juõn Bartholomew, ear bõk jerammõn eo tokelik ñan an erom juõn ian ri jilek ro 12 an Jesus.—Mark 3:16-19.
Juõn “Pris Elap E Tiriamo im Etiljek”
14. Ewi wãwen an kar Jesus emmakit ñan men eo Mary ear kõmmane ñe keidi ibben eo an ro jet?
14 Kinke ej “ilo nememen Anij eo je ban lo E,” Jehovah, ien otemjej Jesus ej wãppen an kajeoñe Jemen ilo an kwalok kamolol kin ro rej karejar ñan Anij kin juõn buru erreo. (Dri Kolosse 1:15) Ñan wanjoñok, lalem ran ko mokta jen an kar mij, Jesus im jet ian ri kalor ro an rar bed ilo mweo imõn Simon ilo Bethany. Ilo joten eo, Mary, lio jein im jatin Lazarus im Martha, ear “bõk juõn paun nard erreo, men in kabit, elap wõnan” (wõnãn ej tarrin wõt an juõn jerbal iumin juõn yiõ), im ear lutõke ion bõran im neen Jesus. (Jon 12:3) “Ewi tokjen jeroane in?” jet rar ba. Bõtab, Jesus ear lo men eo Mary ear kõmmane ilo juõn wãwen eoktak. Ear watõke einwõt juõn kõmman elap an kwalok joij im elap aorõkin ilo lemnak kin mij im ien kallip eo an ebojak in walok. Kin men in, jen an notaik Mary, Jesus ear nebar e. “Ijo jabrewõt re naj kwalok gospel in i aolepen lõl otemjej,” ear ba, “men eo kõra in e ar kõmõne, re naj konono kake bwe ren kememej e.”—Matu 26:6-13.
15, 16. Ewi wãwen ad bõk tokjen jen an kar Jesus mour im jerbal ñan Anij einwõt juõn armij?
15 Elap ad jerammõn bwe ewõr juõn ad Ri Tel, Jesus, eo elap an kwalok an kamolol! Ilo mol, mour eo an Jesus einwõt juõn armij ear keboj e ñan jerbal eo me Jehovah ear karõk ñan e—jerbal einwõt Priest Elap im King, mokta an congregation eo an ri kabit ro im tokelik an lal in.—Dri Kolosse 1:13; Dri Hibru 7:26; Reveles̃õn 11:15.
16 Mokta jen an kar itok ñan lal, ear wõr ibben Jesus juõn itoklimo emũlal im yokwe kin armij. (Jabõn Kennan Ko 8:31) Ilo an kar mour einwõt juõn armij, men in ear jibañ e ñan an bõk juõn melele elaplok kin melejoñ ko jej iioni ilo jerbal eo ad ñan Anij. “Inem ej ekar ñõn E [Jesus] bwe En einwõt ro jãtin ilo men otemjej,” ri jilek Paul ear je, “bwe En pris elap e tiriamo im etiljek . . . Bwe kin An iñtan ke ar kabo E, ej maroñ in jibõñ ro kabo ir.” Jesus emaroñ “tiriamokake mõjino ko ar” kinke “emwij kabo E kin men ko otemjej, einwõt kij, ijoke ejelok jerawiwi iben.”—Dri Hibru 2:17, 18; 4:15, 16.
17, 18. (a) Ta eo letter ko ñan congregation ko jiljilimjuõn ilo Asia Minor rej kwalok kin mũlalin kamolol eo an Jesus? (b) Christian ri kabit ro kar keboj ir ñan ta?
17 Melele eo elaplok an Jesus kin melejoñ ko an ri kalor ro an ear alikar elikin an kar jerkakbiji. Lemnak kin letter ko an ñan congregation ko jiljilimjuõn ilo Asia Minor (jikin eo rej jelã kajjen einwõt Turkey ilo ran kein), einwõt ri jilek John ear jeje kaki. Ñan congregation eo ilo Smyrna, Jesus ear ba: “I jela am jorran im jeramel.” Ijin, Jesus ear ba, ilo juõn wãwen, ‘I lukkun melele kin abañ ko ami; I jelã kin men ko komij iioni.’ Inem, kinke e bareinwõt ear eñtan ñan mij, kin tiriamokake im liki ekajur ear kobaik nan kein: “Kwon tiljek ñõn mij im I naj lewoj ñõn kwe belin eo belin mour.”—Reveles̃õn 2:8-10.
18 Letter ko ñan congregation ko jiljilimjuõn reobrak kin nan ko me rej kwalok melele eo an Jesus kin abañ ko an ri kalor ro an im kamolol eo an kin mour in tiljek eo air. (Reveles̃õn 2:1–3:22) Kememej bwe ro Jesus ear konono ñan ir kar Christian ri kabit ro me ear wõr ibbeir kejatdikdik eo ñan air iroij ibben ilañ. Einwõt Iroij eo air, kar keboj ir kin jerbal eo air eutiej ñan jibañ jerbale ilo tiriamo tokjen ko kin katok in binmour eo an Jesus ñan armij ro rej eñtan.—Reveles̃õn 5:9, 10; 22:1-5.
19, 20. Ewi wãwen ro rej ejaake ‘jar eo elap’ rej kwalok air kamolol ñan Jehovah im Nejin?
19 Emol, yokwe eo an Jesus kin ri kabit ri kalor ro an ej bareinwõt jerbal ñan ‘sheep ro jet’ retiljek, me million iair rej ejaake kumi in “jar elap . . . jen ailiñ otemjej” me renaj ellã im mour jen “iñtan eo elap.” (Jon 10:16; Reveles̃õn 7:9, 14) Rein, jen kamolol eo air kin katok in binmour eo an im kin kejatdikdik eo air kin mour indio, rej koba lok ibben Jesus. Ewi wãwen rej kwalok air kamolol? Rej kõmmane men in ilo air “korijer ñõn [Anij] ran im boñ.”—Reveles̃õn 7:15-17.
20 Report eo jen belakin lal ñan yiõ in jerbal eo 2006, einwõt rej kõlajrake ilo page 23 ñan 26, ej letok men in kamol eo ealikar bwe ri karejar rein retiljek emol air karejar ñan Jehovah “ran im boñ.” Ilo mol, ilo yiõ in, rein ekoba ibben juõn kumi edik in bwen Christian ri kabit ro rar kajerbal 1,333,966,199 awa ko ilo jerbal in kwalok nan—men in ej elõñlok jen 150,000 yiõ ko!
Kwalok Wõt Kamolol!
21, 22. (a) Ikijen kwalok kamolol, etke Ri Christian ro rej aikwij ekkõl wõt rainin? (b) Ta eo jenaj etale ilo katak in tok juõn?
21 Ilo air jerbal ibben armij ro rejjab wãppen, Jehovah im Nejin rar kwalok juõn kamolol ekanuij elap. Ak ekaburomõjmõj bwe, jarlepju in armij ro elaplok air itoklimo kin men ko air make jen air lemnak kin Anij. Ilo an kwalok kin armij ro rej mour ilo “ran ko eliktata,” Paul ear je: “Armij ro e naj anij lo burueir, im re naj dri arõk mweiuk . . . Ro re jab kamolol.” (2 Timote 3:1-5) Armij rein relukkun oktak jen Ri Christian ro remol, ro me ikijen air jar jen buru, mõnõnõ in bokake, im jerbal kin aolepen burueir rej kwalok air kamolol kin aolep men ko Anij ear kõmmani kin ir!—Sam Ko 62:8; Mark 12:30; 1 Jon 5:3.
22 Ilo katak in tok juõn, jenaj elij kin jet ian men in letok ko relõñ ilo jitõb me ilo yokwe Jehovah ear letok ñan kij. Ñe jej kalmenlokjen kin ‘men in letok kein remõn,’ kimij kejatdikdik bwe enaj mũlallok kamolol eo ad.—Jemes 1:17.
Ewi Wãwen Kwonaj Uak?
• Ewi wãwen Jehovah ear kwalok bwe ej juõn Anij ewõr an kamolol?
• Ñe jej make iad, ewi wãwen jemaroñ kamõnõnõik buruen Jehovah?
• Ilo wãwen et ko Jesus ear kwalok an kamolol?
• Ewi wãwen mour einwõt juõn armij ear jibañ Jesus ñan an juõn iroij e tiriamo im wõr an kamolol?
[Pija eo ilo peij 15]
Einwõt juõn jinen ej mõnõnõ kin kõmman eo elamwan an nejin, Jehovah ej kwalok an kamolol ñe jej jerbal ñan e kin aolepen buruõd