Ilo Ettã Buru Jen Kõttãik kij ñan Shepherd Ro Elap Air Yokwe
“Komin bokake im kõtãik kom ñõn ro rej tel kom.”—DRI HIBRU 13:17.
1, 2. Ta eon ko rej kwalok bwe Jehovah im Jesus rej Shepherd ro elap air yokwe?
JEHOVAH ANIJ im Nejin, Jesus Christ, rej Shepherd ro elap air yokwe. Isaiah ear kanan: “Lo, Iroij, Jeova e naj itok einwõt juõn e kajur potata, im pein e naj iroij kin E. . . . E naj najirik bwij eo An einwõt juõn dri lale sip, E naj atbokwoji lam ko kin pein, im jiburlipi, im E naj ailili kõrai ro.”—Aiseia 40:10, 11.
2 Kanan in kin bar jeblak eo ear mokta jejjet kitien ke bwen Ri Jew ro rar jeblak ñan Judah ilo 537 B.C.E. (2 Kronikel 36:22, 23) Ear bar jejjet kitien ke Cyrus eo Elaplok, Jesus Christ, ear lomoren bwen ri kabit ro jen “Babylon Elap” ilo 1919. (Reveles̃õn 18:2; Aiseia 44:28) E ej “pein” Jehovah ilo an iroij, aintok sheep ro, im shepherd ir ilo yokwe. Jesus make ear ba: “Ña s̃eperd emõn, im I jela ro Aõ, im ro Aõ re jela Ña.”—Jon 10:14.
3. Ewi wãwen Jehovah ej kwalok yokwe kin wãwen air kõmman ñan sheep ro an?
3 Kanan eo ilo Aiseia 40:10, 11 ej kalikar kin yokwe eo me Jehovah ej kwalok ilo an shepherd e armij ro an. (Sam 23:1-6) Ke ear kõmmane jerbal in kwalok nan eo an ion lal, Jesus ear bareinwõt kwalok yokwe kin ri kalor ro an im kin armij otemjej. (Matu 11:28-30; Mark 6:34) Jehovah im Jesus jimor rar kananaik shepherd ro, ak ri tel ro relej, an Israel, me rar kajekdon im kokkure bwij ko air. (Ezekiel 34:2-10; Matu 23:3, 4, 15) Jehovah ear kallimur: “Ak inaj lomoren sheep ko aõ, im ijamin kõtlok bwe komin bar kokkure ir. Inaj ekajete kajjojo iair im kejibil ko renana jen ko remmõn. Inaj lelok ñõn ir juõn king, einwõt ri karejara David, bwe en air shepherd im enaj kejbarok ir.” (Ezekiel 34:22, 23) Ilo ien jemlokin, Jesus Christ, David eo Elaplok, ej “juõn s̃eperd” eo Jehovah ear kãlete bwe en kejbãrok aolep ri karejar ro An ion lal, Christian ri kabit ro im ‘sheep ko jet’ jimor.—Jon 10:16.
Menin Letok ko Jen Lañ ñan Congregation Eo
4, 5. (a) Ta menin letok eo eaorõk Jehovah ear letok ñan armij ro an ion lal? (b) Ta menin letok eo Jesus ear lelok ñan congregation eo an?
4 Ilo an kajutak ion ri karejar ro An ion lal “juõn s̃eperd,” Jesus Christ, Jehovah ear letok juõn men eaorõk ñan Christian congregation eo. Men in letok in kin juõn Ri tel jen lañ kar kanan kake ilo Aiseia 55:4: “Lo, I ar lelok E juõn Dri Kennan ñõn ro dri ailiñ ko, juõn Dri Tel im Iroij ñõn dri ailiñ ko.” Christian ri kabit ro im ro uan “jar elap” rej jimor itok jen ibwiljin ailiñ ko otemjej, bwij otemjej, driloabjen otemjej, im konono otemjej. (Reveles̃õn 5:9, 10; 7:9) Rej ejaakin juõn congregation ibelakin lal, “juõn bwij,” iumin tel eo an “juõn s̃eperd,” Christ Jesus.
5 Jesus ear bareinwõt lelok juõn men eaorõk ñan congregation eo an ion lal. Ear letok shepherd ro retiljek me, rej kajeoñe Jehovah im Jesus, ilo air kejbãrok bwijjin sheep ko air ilo yokwe. Ri jilek Paul ear konono kin men in letok in eaorõk ilo letter eo an ñan Ri Christian ro ilo Ephesus. Ear jeje: “ ‘Ke E ar wõnliñlok ñõn lõñ, E ar kejebokweik jebokwe, im lelok men in yokwe ñõn armij rõn [men in lelok ilo armij, NW].’ . . . E ar letok jet bwe ren dri jilik; im jet, dri kanan; im jet, dri evanjel; im jet, pastor im dri kaki; Bwe En kowãppenlok ro remõn, kin jerbal in jibõñ, kin kalek enbwinin Kraist.”—Dri Epesõs 4:8, 11, 12.
6. Ekkar ñan Reveles̃õn 1:16, 20 ewi wãwen ej kõkkar kin ri kabit overseer ro me rar jerbal ilo kumi in elder ro, im ta eo jemaroñ ba kin elder ro kar kãlet ir me rej jen sheep ro jet?
6 Rein ‘men in letok ilo armij’ rej overseer ro, ak elder ro, me Jehovah im Nejin rar kãlet ir, ikijen jitõb kwojarjar, ñan shepherd ak kejbãrok sheep ro ilo yokwe. (Jerbal 20:28, 29) Ilo jinoin, aolep overseer rein rar Christian ri kabit maan ro. Ro rar jerbal ilo kumi in elder ro iloan congregation eo rar kõkkar kin ir ilo Reveles̃õn 1:16, 20 einwõt “iju ko” ak “enjel ro” ilo anbwijmaroñin pein Christ, ak, iumin kajur eo an. Bõtab, ilo ien in ien jemlokin, kin an diklok wõt oran ri kabit overseer ro rej mour ion lal kiõ, jarlepju in Christian elder ro ilo congregation ko rej itok jen sheep ro jet. Kinke ro uan Governing Body eo rar kãlet rein ikijen jitõb kwojarjar eo, jemaroñ ba bwe rein rej bareinwõt bed iumin anbwijmaroñin pein (ak, iumin tel eo) an Shepherd eo Emõn, Jesus Christ. (Aiseia 61:5, 6) Kinke elder ro ilo congregation eo ad rej kõttãik ir ñan Christ, eo ej Bõran congregation eo, jej aikwij mõnõnõ in karejar ñan ir ilo eyu.—Dri Kolosse 1:18.
Bokake im Kõttãik Kom ñan Shepherd Ro Jet
7. Ta nan in kakabilek eo ri jilek Paul ear letok ikijen lemnak eo ad kin Christian overseer ro?
7 Shepherd ro ad ilañ, Jehovah im Jesus Christ, rej kõtmene bwe jen bokake im kõttãik kij ñan shepherd ro me rar likit ir bwe ren bõk eddon makitkit ko ilo congregation eo. (1 Piter 5:5) Iumin kakõrmol an Anij, ri jilek Paul ear jeje: “Komin kememej ro r’ar ami dri tel, im r’ar ba ñõn kom nan in Anij; im komin kajeoñwe air tõmak, ke komij kalomõnlokjen kin tokjen air ber im kõmõn. Komin bokake im kõtãik kom ñõn ro rej tel kom, bwe rej lale ami, einwõt ro re naj kwalok kin air kõmõn, bwe ren kwalok im lõñliñ im jab buromõj. Bwe men in e jab men in kakajuror kom.”—Dri Hibru 13:7, 17.
8. Ta eo Paul ej rejañ kij ñan ad “kalomõnlokjen” kake, im ta melelen an kar ba bwe jej aikwij “bokake” elder ro?
8 Lale bwe Paul ej rejañ kij ñan “kalomõnlokjen,” ak lukkun lale, mwil eo etiljek an elder ro im ñan anõk joñok kein air retiljek. Bareinwõt, ear kakabilek kij ñan ad bokake im ñan kõttãik kij ñan tel eo an lõmarein kar kãlet ir. Ri meletlet in etale Bible eo R. T. France ej kamelele bwe ilo kajin Greek eo jinoin, nan eo ijin kar ukõte “komin bokake” ejjab “nan eo ekkã kajerbale kin bokake, ak lukkun melelen ‘rel burueir,’ im ej kalikar kõnan eo air ñan bõk im kõttãik ir ñan tel eo an rein rej tel ir.” Jej bokake elder ro kinke Nan in Anij ej kaiñ kij bwe jen kõmmane menin im kinke e rel burued bwe rein rej kõnan men eo emõntata kin men ko rej ekkejellok ñan Ailiñ eo an Anij im bareinwõt kin ejmour eo ad ilo kanniek im mour in jitõb eo ad kajjojo. Jenaj lukkun mõnõnõ elañe jej bõk im kõttãik kij ñan tel eo air.
9. Etke ej menin aikwij ñan ad “kõtãik” kij ekoba ad aikwij in bokake?
9 Bõtab, ewi wãwen jej aikwij emmakit elañe jejjab liki bwe, ikijen juõn abañ ear walok, nan in tel eo an elder ro ej wãwen eo emõntata ñan kõmmani men ko? Eñin ien eo jej aikwij kõttãik kij. Ebidodo ñan bokake ñe aolep men ej alikar im jej errã kin bebe ko kar kõmmani, bõtab jenaj kwalok bwe jej lukkun kõttãik kij elañe jej bokake meñe jejjab lukkun melele kin nan in tel eo kar letok. Peter, eo ear oktak im juõn ri jilek, ear kwalok an kõttãik e make.—Luk 5:4, 5.
Emen Un ko ñan Ad Mõnõnõ in Jerbal Ibben Christian Overseer Ro
10, 11. Ilo wãwen et overseer ro “r’ar ba. . . nan in Anij” ñan Ri Christian ro mõttair ilo ebeben eo kein kajuõn im rainin?
10 Ilo Dri Hibru 13:7, 17, eo kar kwalok kake ilõñ, ri jilek Paul ej letok emen un ko unin ad aikwij bokake im kõttãik kij ñan Christian overseer ro. Un eo kein kajuõn ej bwe “r’ar ba ñõn [kij] nan in Anij.” Kememej bwe ‘men in letok ilo armij’ rein me Jesus ej letok ñan congregation eo rej ñan “kowãppenlok ro remõn.” (Dri Epesõs 4:11, 12) Ear kajimwe lemnak im mwilin Ri Christian ro ilo ebeben eo kein kajuõn ikijen shepherd ro jet retiljek, ro me jet iair kar kakõrmole ir ñan jeje letter ko ñan congregation ko. Ear kajerbal overseer ro me jitõb eo ear kãlet ir ñan tel im kakajur Ri Christian ro jinoin.—1 Dri Korint 16:15-18; 2 Timote 2:2; Taitõs 1:5.
11 Rainin, Jesus ej tel kij ikijen ‘ri karejar eo etiljek im meletlet,’ eo me ej jutak kin Governing Body (Kumi Eo Ej Tel) eo im elder ro kar kãlet ir. (Matu 24:45) Kinke jej kautiej “S̃eperd [eo] elap,” Jesus Christ, jej bokake nan in kakabilek eo an Paul: “Komin kili ro rej jerbal ibemi, im lale kom ilo Iroij, im kowe kom.”—1 Piter 5:4; 1 Dri Tessalonika 5:12; 1 Timote 5:17.
12. Ewi wãwen an overseer ro “lale [aad]”?
12 Un eo kein karuo unin jej jerbal ibben Christian overseer ro ej kinke “rej lale [aad].” Elañe rej lo ak jelã kin jabdewõt lemnak ak manit ko renana me remaroñ kajorrãn mour in jitõb eo ad, rej mõkaj in letok nan in kakabilek ko jej aikwiji im kejatdikdik bwe jenaj kajimwe wãwen ko ibbed. (Dri Galetia 6:1) Nan in Greek eo kar ukõte “rej lale” ej lukkun melelen “rejjab kiki.” Ekkar ñan juõn ri meletlet in etale Bible, ej “kalikar kin wãwen an shepherd eo ekkõl ien otemjej.” Ewõr jet ien elder ro rejjab kiki in boñ kin air inebata kin ejmour eo ad ilo jitõb, ekoba rej aikwij kejbãrok air ekkõl ilo jitõb. Jen kar jab mõnõnõ ke in jerbal ibben shepherd rein reyokwe, me rej kõmman joñan wõt air maroñ ñan anõk kejbãrok eo ejoij Jesus Christ ear letok, “S̃eperd eo elap an sip ko”?—Dri Hibru 13:20.
13. Ñan wõn im ilo wãwen et ko overseer ro im aolep Ri Christian ro renaj aikwij uak ñan e?
13 Un eo kein kajilu unin jej mõnõnõ in jerbal ibben overseer ro ej kinke rej lale kij “einwõt ro re naj kwalok kin [ad] kõmõn.” Overseer ro rej kememej bwe rej shepherd ro me, rej jerbal iumin Shepherd ro ilañ, Jehovah Anij im Jesus Christ. (Ezekiel 34:22-24) Jehovah ej Iroij in sheep ro me “E ar wiaik kin bõtõktõk eo [an Nejin],” im Ej watõk overseer ro kar kãlet ir ñan air uak kin wãwen air jerbal ibben bwij eo An, eo me ej aikwij “tiriamokake.” (Jerbal 20:28, 29) Alikar, kij aolep jenaj aikwij uak ñan Jehovah kin wãwen jej emmakit ñan ial in tel eo an. (Dri Rom 14:10-12) Ad bokake elder ro kar kãlet ir ej bareinwõt kamol bwe jej kõttãik kij ñan Christ, eo ej Bõran congregation eo.—Dri Kolosse 2:19.
14. Ta eo emaroñ tellok ñan an Christian overseer ro kõmmane jerbal eo air ilo “buromõj,” im kin ta tokjen ko?
14 Paul ear letok un eo kein kemen kin etke jej aikwij kõttãik kij ñan Christian overseer ro. Ear jeje: “Bwe ren kwalok im lõñliñ im jab buromõj. Bwe men in e jab men in kakajuror kom.” (Dri Hibru 13:17) Kin eddo ko air relap kin katakin, lale sheep ro, tel ilo jerbal in kwalok nan, lale im kejbãrok family eo air, im kamadmõdi abañ ko ilo congregation eo, Christian elder rein rej inek juõn jerbal eddo. (2 Dri Korint 11:28, 29) Elañe jej likjap in jerbal ibbeir, jej kõmman bwe en eddolok jerbal eo air. Menin enaj kõmman bwe ren buromõj. Ilo ad kwalok ad jab mõnõnõ in jerbal ibbeir menin ej kaburomõj Jehovah im emaroñ bõktok elap jorrãn ñan kij. Bõtab, ñe jej kwalok kautiej im jelã jerbal ibben don, elder ro remaroñ ineki ak jerbali eddo ko air kin mõnõnõ, im menin enaj kowõnmanlok burukuk im lañliñ eo ilo ad bõk kunad ilo jerbal in kwalok kin Ailiñ eo.—Dri Rom 15:5, 6.
Kwalok Ad Kõttãik Kij
15. Ewi wãwen jemaroñ kwalok ad bokake im kõttãik kij?
15 Elõñ wãwen ko remõn me jemaroñ jerbal ibben overseer ro kar jitõñ ir. Ñan jerbal ekkar ñan wãwen ko rekãl ilo territory eo, emwij ke am kõmman oktak ko ilo makitkit ko am ekkar ñan ran im awa ko emwij an elder ro karõki kin kwelok eo ñan jerbal in kwalok nan? Jen kate kij ñan jurake karõk kein rekãl. Jemaroñ bõk jerammõn ko jaar jab kõtmene kaki. Service overseer eo ej lotok ke Congregation Book Study eo ad? Jen bõk kunad joñan wõt ad maroñ ilo jerbal in kwalok nan eo ilo week eo. Ewõr ke juõn katak jej aikwij kõmmane ilo Theocratic Ministry School (School in Kwalok Nan eo an Christian) eo? Jej aikwij kajeoñ im kate kij ñan ad bed im kwalok katak eo ad. Emwij ke an Congregation Book Study overseer eo kejelã bwe kumi eo ad ej bõk eddo in karreoik Kingdom Hall eo? Jen jurake joñan wõt ad maroñ, ekkar ñan joñan ejmour im kajur eo ad. Ilo men kein im elõñ wãwen ko jet, jemaroñ kwalok ad kõttãik kij ñan maan ro Jehovah im Nejin rar jitõñ ir ñan air lale im kejbãrok bwij eo.
16. Elañe juõn elder ejjab kõmmani men ko einwõt kar keañ kake, etke menin ejamin letok ñan kij juõn un ñan ad jumae?
16 Jet ien, juõn elder emaroñ jab kõmmani men ko ekkar ñan tel eo an class in ri karejar eo etiljek im Governing Body eo an. Elañe ej wõnmanlok wõt im kõmman eindein, enaj aikwij in uak ñan Jehovah, “S̃eperd eo im Dri lale [aad].” (1 Piter 2:25) Bõtab jabdewõt likjap ak bwid ko jet ian elder rein rej kõmmani ejjab kamelim kij ñan ad kwalok jitõb in jab bokake. Jehovah ejjab kajerammõn im jurake ro rejjab bokake im rej jumae.—Bwinbwin 12:1, 2, 9-11.
Jehovah ej Kajerammõn Burukuk eo Ad
17. En ewi wãwen lemnak eo ad ikijen overseer ro ad?
17 Jehovah Anij ejelã bwe maan ro ear jitõñ ir einwõt overseer ro rejjab wãppen. Meñe eindein, ej kajerbal ir, im ikijen jitõb kwojarjar eo an, ej shepherd e ak lale armij ro an ijin ion lal. Emol menin kin elder ro—im kin kij aolep—bwe “maroñ eo e kanuij lap en jen Anij, im jab jen kim.” (2 Dri Korint 4:7) Kin menin, jej aikwij kamolol Jehovah kin men ko ej kõtõbraki ikijen overseer ro ad retiljek, im jej aikwij kwalok ñan ir bwe jej mõnõnõ in jerbal ibbeir.
18. Ikijen ad kõttãik kij ñan overseer ro ad, ilo mol, ta eo jej kõmmane?
18 Overseer ro rej kate ir joñan wõt air maroñ ñan mour ekkar ñan kamelele eo an Jehovah kin shepherd ro kar jitõñ ir ion bwij eo an ilo ran kein eliktata, einwõt ad loe ilo Jeremiah 3:15: “Inaj lewõj ami iroij, ro renaj bokake iõ, im renaj iroij iomi kin meletlet im jelãlokjen.” Emol elder ro rej bed ibwiljid rej kõmmane juõn jerbal emõn ikijen air katakin im kejbãrok sheep ro an Jehovah. Jen wõnmanlok ilo ad kwalok ad kamolol kin jerbal ko air remõn ikijen ad mõnõnõ in jerbal ibbeir, bokake, im kõttãik kij ñan tel eo air. Ilo ad kõmmane menin, jenaj kwalok ad kamolol kin Shepherd ro ad ilañ, Jehovah Anij im Jesus Christ.
Ilo Elij
• Ewi wãwen Jehovah im Jesus Christ rar kamol bwe rej Shepherd ro reyokwe?
• Ijellokin bokake, etke jej aikwij kõttãik kij?
• Ilo wãwen et ko rekeie jemaroñ kwalok ad kõttãik kij?