Kõtlok Bwe Nan in Anij En Tel Ial Ko Am
“Am in nan e lamp ñõn neiõ, im maram ñõn aõ ial.”—SAM 119:105.
1, 2. Etke elõñ armij rejjab lo tõbrak ilo air bukõt ainemõn im mõnõnõ eo emol?
KWOJ kememej ke juõn ien kwar aikwij kajitõk ibben juõn kin ial in tel ko? Bõlen kwar ebaklok ijo kwoj kõtõbarlok ak kwojjab lukkun jelã ial et eo kwon etal ielok. Ak bõlen kwo lukkun jaje ia eo kwoj bed ie im kwoj aikwij ukõt ial eo am. Ilo wãwen kein ruo, ejjab naj menin meletlet ke ñan lor ial in tel eo an juõn eo me ejelã kin jikin eo? Armij in emaroñ jibañ yuk ñan am tõbar ijo kwoj jibadõklok.
2 Iumin elõñ thousand yiõ ko, armij rar kajeoñ in make tel mour ko air ilo air jab bukõt ial in tel jen Ri Kõmanman eo, Jehovah Anij. Bõtab, ilo air kajenolok ir make jen Anij, armij ro rejjab wãppen ejelok air kejatdikdik. Rejjab maroñ lo ial eo ñan ainemõn im mõnõnõ eo emol. Etke? Elõñlok jen 2,500 yiõ ko remotlok, ri kanan eo Jeremiah ear ba: “Ejjelok en emaroñ beek men otemjej ilo mour eo an.” (Jeremiah 10:23) Jabdewõt eo ej kajeoñ ñan tel ial eo an make ilo an jab bõk jibañ enaj ion inebata im buromõj. Emol, armij ej aikwij ial in tel!
3. Etke ewõr an Jehovah Anij maroñ ñan letok ial in tel ñan armij, im ta eo ej kallimur kake?
3 Jehovah Anij ewõr an maroñ ñan letok ial in tel in. Etke? Kinke elaplok an melele kin wãwen ejaakin armij ro jen jabdewõt. Im elukkun jelã kin ewi wãwen armij rar mad im oktak im jebwãbwe. E bareinwõt jelã ta eo ren kõmmane bwe ren maroñ bar lor ial eo ejimwe. Bareinwõt, einwõt Ri Kõmanman eo, Jehovah ien otemjej ej jelã ta eo emõntata ñan kij. (Aiseia 48:17) Kin menin, jemaroñ lukkun liki kallimur eo an kar jeje kake ilo Sam 32:8: “I naj kajelaik yuk im katakin yuk ilo ial eo kwo naj etal ie. I naj bebeik yuk ke meja ej lo yuk.” Jemaroñ lukkun liki bwe: Jehovah ej letok ial in tel eo emõntata. Ak ewi wãwen ej tel kij?
4, 5. Ewi wãwen nan ko an Anij remaroñ tel kij?
4 Ri jeje sam ear ba ilo jar eo an ñan Jehovah: “Am in nan e lamp ñõn neiõ, im maram ñõn aõ ial.” (Sam 119:105) Ennan im nan in kakememej ko an Anij jemaroñ loi ilo Bible eo, im remaroñ jibañ kij ñan anjo ion abañ ko me jej iioni ilo mour eo ad. Aet, ñe jej readi Bible eo im kõtlok bwe en tel kij, jej make lo ta eo ej ba ilo Aiseia 30:21 “Im lojiliñõm re naj roñjake juõn nan elikõm, ej ba, Eñin ial eo, komin etetal iloan.”
5 Bõtab, lale bwe Sam 119:105 ej kwalok kin ruo jerbal ko relap an Nan in Anij. Moktata, ej jerbal einwõt juõn lamp ñan need. Ñe jej jelmae abañ ko jen ran ñan ran, nan in kaiñi ko ilo Bible eo renaj tel ial ko ad bwe jen maroñ kõmman bebe ko remeletlet im jer jen aujid ko an lal in. Kein karuo, nan in kakememej ko an Anij rej rome ak kameram ial eo ad, im jibañ kij ñan kõmman jokãlet ko me rej ekkar ñan kejatdikdik eo ad kin mour indio ilo Paradise eo Anij ear kallimur kake. Kin an meram ial eo ej bed iman, jenaj maroñ kile wãwen ko—emõn ak nana—kin juõn ial. (Dri Rom 14:21; 1 Timote 6:9; Reveles̃õn 22:12) Jen lale kamelele ko relaplok kin wãwen nan ko an Anij einwõt ad loe ilo Bible eo remaroñ juõn lamp ñan need im meram ñan ial ko ad.
“E Lamp ñõn Neiõ”
6. Iumin wãwen et ko nan ko an Anij remaroñ mol air juõn lamp ñan need?
6 Aolep ran, jej kõmman bebe ko. Jet bebe ko jemaroñ watõki redik, bõtab ewõr jet ien ko jemaroñ jelmae juõn wãwen me ej melejoñe mwilin Christian eo ad, ad mol, ak ad jab bõk kunad ilo men ko an kien. Ñan lo tõbrak ilo ad jelmae melejoñ kein, ej aikwij wõr ibbed “maroñ in jela kajen emõn im nana.” (Dri Hibru 5:14) Ilo ad bõk jelãlokjen eo ejejjet kin Nan in Anij im kaddek ibbed juõn melele kin nan in kaiñi ko ie, jej kamineneik bõklikit eo ad bwe jen maroñ kõmman bebe ko me rej kabuñburuen Jehovah.—Jabõn Kennan Ko 3:21.
7. Kamelele kin juõn wãwen me juõn Ri Christian emaroñ kõnan kobalok ibben ri jerbal ro mõttan me rejjab ri tõmak.
7 Lale juõn wanjoñok. Kwoj ke juõn eo eritto me ej lukkun kajeoñ ñan kamõnõnõik buruen Jehovah? (Jabõn Kennan Ko 27:11) Elañe aet, kimij nebar yuk. Ak lemnak mõk jidik ñe jet mõttam ri jerbal rej lewõj juõn am ticket bwe kwon etal ibbeirlok ñan juõn ien ikkure. Rej mõnõnõ kin kõtan eo am ibbeir ilo jikin jerbal eo im rekõnan kobawõj ibbam ijoko jet ilikin jikin jerbal eo. Kwomaroñ lemnak bwe armij rein rejjab nana. Emaroñ wõr jet kadkad ko remõn ibbeir. Ta eo kwonaj kõmmane? Enaj wõr ke kauwatata elañe kwoj kobalok ibbeir? Ewi wãwen an Nan ko an Anij maroñ jibañ yuk ñan kõmman juõn bebe emõn ilo menin?
8. Ta nan in kaiñi ko jen Jeje ko ilo Bible eo rej jibañ kij ñan kõmmanwa ñe ej itok ñan kamao ko?
8 Jen lale jet nan in kaiñi ko jen Jeje ko ilo Bible eo. Men eo moktata me jemaroñ lemnak kake ej bed ilo 1 Dri Korint 15:33, eo ej ba: “Kõmao ko renana rej kakõt mõnit ko remõn.” Bokake nan in kaiñi in ej melelen ke bwe kwon kajekdon aolep ro rejjab ri tõmak? Uak eo jen Jeje ko ilo Bible eo ej jaab. Ilo mol, ri jilek Paul make ear kwalok yokwe ñan “armij otemjej,” ekoba ro rejjab ri tõmak. (1 Dri Korint 9:22) Wãwen mour in Christian ej bwe jen kwalok ad itoklimo kin ro jet—ekoba ro me rejjab bed ilo tõmak eo ad. (Dri Rom 10:13-15) Aet, ewi wãwen ad naj bokake nan in rejañ eo ñan “jerbale emõn ñõn armij otemjej” elañe jej kajenolok kij make jen armij ro me remaroñ aikwiji jibañ eo ad?—Dri Galetia 6:10.
9. Kamelele kin oktak eo ikõtan kwalok joij ñan juõn mõttam ri jerbal im ñe ej juõn jeram ebak.
9 Bõtab, ewõr juõn oktak ealikar ikõtan kwalok joij ñan juõn mõttam ri jerbal im ñe ej juõn jeram ebak. Bar juõn nan in kaiñi jen Jeje ko ilo Bible eo ej kitibuj menin. Ri jilek Paul ear kakkõl Ri Christian ro: “Ren jab kadrebijik kom ilo jakkar iben ro re jab tõmak.” (2 Dri Korint 6:14) Ta melelen nan kein “ren jab kadrebijik kom ilo jakkar”? Jet ukok in Bible ko rej ukõt nan kein einwõt “jab koba ibben don,” “jab jerbal ibben don einwõt komij joñan wõt juõn,” ak “jab kõmman kõtan ko rejõkkar.” Ñããt eo kõtan eo ibben ri jerbal eo mõttam ej oktak im jõkkar? Ñããt eo ej ellã jen joñan im oktak im juõn kõtan ejõkkar? Nan in Anij, Bible eo, emaroñ tel ial eo am ilo menin.
10. (a) Ewi wãwen an kar Jesus kãlet ro jeran? (b) Ta kajitõk ko remaroñ jibañ juõn armij ñan an kõmman bebe ko remeletlet kin ro mõttan?
10 Lemnak kin joñok eo an Jesus, eo jen jinoin ien kõmanman ear yokwe armij ro. (Jabõn Kennan Ko 8:31) Ke ear bed ion lal, ear ejaake juõn kõtan ebak ibben ri kalor ro an. (Jon 13:1) Ear “yokwe” juõn emaan me ear bwid wãwen an kabuñ. (Mark 10:17-22) Ak Jesus ear bareinwõt kalikar kin oktak ko ikijen jokãlet eo an kin ro jeran rebake. Ear jab kõmman juõn kõtan ebak ibben armij ro me rar jab lukkun itoklimo in kõmanman ankilan Jemen. Juõn ien, Jesus ear ba: “Kom ro jera, elañe komij kõmõn men ko Ij jiroñ kom.” (Jon 15:14) Emol, kwomaroñ joij ñan juõn mõttam ri jerbal. Bõtab kwon kajitõkin yuk make: ‘Armij in enaj ke mõnõnõ in kõmmani ak bokake nan in kakien ko an Jesus? Ekõnan ke katak kin Jehovah, eo me Jesus ear jiroñ kij bwe jen kabuñ ñane? Ej ke jerbale kien eo kin mour erreo me ij kõmmane einwõt juõn Ri Christian?’ (Matu 4:10) Ke kwoj bwebwenato ibben ri jerbal ro mõttam im kwoj bin wõt ilo am jerbale kien ko ilo Bible, uak ko ñan kajitõk kein renaj alikar.
11. Kwalok wanjoñok ko kin wãwen nan ko an Anij remaroñ tel ial ko ad.
11 Elõñ wãwen ko jet me nan ko an Anij remaroñ einwõt juõn lamp ñan need. Ñan wanjoñok, remaroñ kar lelok juõn jerbal ñan juõn Ri Christian ejelok an jerbal bwe en bõke ilo mõkaj. Bõtab, awa in jerbal ko elap air naj bõk ien im kajur ko an, im elañe ej bõk jerbal eo, enaj jako jen jet ian kwelok ko an Christian im ejamin naj maroñ bõk kunan ilo makitkit ko jet rej ekkejellok ñan kabuñ eo emol. (Sam 37:25) Bar juõn Ri Christian emaroñ bo ilo kabo eo ñan lale men in kamõnõnõ ko me nan in kaiñi ko ilo Bible eo ej jumae. (Dri Epesõs 4:17-19) Bar juõn emaroñ bidodo an lõkatip kin bwid ko an ri tõmak ro mõttan. (Dri Kolosse 3:13) Ilo aolep wãwen kein, jej aikwij kõtlok bwe Nan in Anij en lamp ñan need. Emol, ilo ad lor nan in kaiñi ko ilo Bible, jemaroñ lo tõbrak ñe jej jelmae jabdewõt abañ ilo mour. Nan in Anij ewõr “[tokjen] kin katakin, im kowe, im kajime, im kajelaik armij ilo kwojarjar.”—2 Timote 3:16.
“Maram ñõn Aõ Ial”
12. Ewi wãwen an nan ko an Anij meram ñan ial eo ad?
12 Sam 119:105 ej bareinwõt ba bwe nan ko an Anij remaroñ rome ial eo ad, kameramlok iman in ial eo ad. Jej jab bed ilo marok ak jajelokjen kin ran ko renaj itok, kinke Bible eo ej kamelele kin wãwen ko rekaburomõjmõj ilo lal in im ta eo enaj walok tokelik. Aet, jej kile bwe jej mour ilo “ran ko eliktata” an jukjuk im bed in enana. (2 Timote 3:1-5) Ilo ad jelã kin ta eo ebed iman en kar lap an jelet wãwen jej mour kiõ. Ri jilek Peter ear jeje: “Inem, bwe naj ein drein an men kein otemjej unlok, ta men eo komin wõjake ilo kõmõn wãnik im kabuñ rokwojarjar, ke komij kõtõmene im lipjerjer an ran in Iroij itok!”—2 Piter 3:11, 12.
13. Ewi wãwen aorõkin ien kein ad en kar jelet lemnak im wãwen ad mour?
13 Wãwen lemnak im mour eo ad ej aikwij kalikar tõmak eo ad ebin bwe “lõl e jokolok im mõm ko an.” (1 Jon 2:17) Jerbale nan in tel ko ilo Bible enaj jibañ kij ñan ad kõmman bebe ko remeletlet kin mejenkajjik ko ad ilo ran ko rej bedotok. Ñan wanjoñok, Jesus ear ba: “A komin bukot mokta ailiñ in Anij, im kwojarjar eo An; im naj koorlok men kein otemjej ñõn kom.” (Matu 6:33) Ej menin kõketak ñan ad lo elõñ jodikdik ro rej kwalok air tõmak ilo nan ko an Jesus ikijen air jibadõk jerbal in kwalok nan full-time! Ro jet—ekoba aolep ro uan family ko—rar mõnõnõ in emmakit ñan ailiñ ko jet me elap aikwij kin ri kwalok ro kin Ailiñ eo.
14. Ewi wãwen juõn Christian family ear kalaplok jerbal in kwalok nan eo air?
14 Lemnak kin juõn Christian family emen uair me rar emmakit jen United States ñan Dominican Republic ñan jerbal ibben juõn congregation ilo juõn bukwon 50,000 oran armij ro ie. Ewõr tarrin 130 ri kwalok ro kin Ailiñ eo ilo congregation eo. Bõtab, ilo April 12, 2006, ear wõr joñan in 1,300 armij ro rar bed ilo Kwojkwoj in Kememej Mij eo an Christ! Jikin jerbal in kwalok nan eo ijo elap an ‘kalo ilo ien marmir’ bwe elikin kar lalem wõt alliñ ko, jemeir, jineir, ladik eo, im ledik eo nejiir rar kõmman Bible study ko tarrin in 30. (Jon 4:35) Leo jemeir ear kamelele: “Ewõr 30 maan im kõrã ro jeid im jatid ilo congregation eo rar emmakittok ñan ijin ñan air jibañ. Ewõr 20 jen United States, ro jet rar itok jen Bahamas, Canada, Italy, New Zealand, im Spain. Rar kijoror in tõbartok ijo ñan bõk kunair ilo jerbal in kwalok nan im men in ear lap an jelet kijejeto eo an ro jeid im jatid ijo.
15. Ta jerammõn ko kwar lañliñ kaki kin am likit mokta men ko an Ailiñ eo ilo mour eo am?
15 Alikar, elõñ rejjab maroñ emmakit ñan bar juõn ailiñ ñan jerbal ijo elaplok aikwij ie. Ro me rej—ak ro remaroñ ukõt wãwen ko ibbeir ñan make lelok ir—emol renaj lo elõñ jerammõn ko ikijen air bõk kunair ilo wãwen jerbal in kwalok nan in. Im jekdon ia eo kwoj jerbal ie, jab likjap jen am bõk tokjen jen lañliñ eo me emaroñ am elañe kwoj jerbal ñan Jehovah kin aolepen kajur eo am. Elañe kwoj likit mokta men ko an Ailiñ eo ilo mour eo am, Jehovah ej kallimur ñan “lutõkwõj men ko otemjej remmõn iomi.”—Malachi 3:10.
Bõk Tokjen Jen Nan in Tel eo an Jehovah
16. Ewi wãwen ad naj bõk tokjen jen ad kõtlok bwe nan ko an Anij ren tel kij?
16 Einwõt emwij ad etale, nan ko an Jehovah rej tel kij ilo ruo wãwen ko. Juõn, rej jerbal einwõt juõn lamp ñan need. Rej jibañ kij ñan wõnmanlok ilo ial eo ejimwe im tel kij ñe jej aikwij kõmman bebe ko. Ruo, Nan eo an Anij ej kameram ial eo ad, im kamaroñ kij ñan lo ilo alikar ta eo ej bed iman. Ej bareinwõt jibañ kij ñan lor nan in kakkõl eo an Peter: “Kin men in komin kapojõk buruemi, komin jadõr im kejatrikrik kom wõt kin joij eo naj bõktok ñõn kom ilo weaktok an Jisõs Kraist.”—1 Piter 1:13.
17. Ewi wãwen katak Bible enaj jibañ kij ñan lor tel eo an Anij?
17 Ejelok bere bwe Jehovah ej letok nan in tel. Kajitõk eo in, Kwonaj ke mour ekkar ñane? Ñan melele ial in tel eo Jehovah ej letok, kwon kõmman bwe en am manit ñan readi jet chapter ko ilo Bible eo kajjojo ran. Kalmenlokjen kin ta eo kwoj readi, kajeoñ in melele kin ta ankilan Jehovah kin men ko, im lemnak kin wãwen ko jet katak eo emaroñ jerbal ilo mour eo am. (1 Timote 4:15) Inem, kajerbal lemnak eo am ekõmmanwa ñe kwoj kõmman bebe ko am.—Dri Rom 12:1.
18. Ñe jej kõtlok bwe Nan eo an Anij en tel kij, ta jerammõn ko jenaj bõki?
18 Elañe jej kõtloke, nan in kaiñi ko rej bed ilo Nan eo an Anij renaj katakin im letok ñan kij ial in tel eo jej aikwiji ñe jej kõmman bebe ko kin ial eo ejimwe ñan lore. Jemaroñ liki bwe nan ko an Jehovah emwij jei “ej kameletlet ro re jaje.” (Sam 19:7) Ñe jej kõtlok bwe Bible eo en tel kij, jenaj jerammõn kin juõn bõklikit erreo im juburu eo me ej itok jen ad kabuñburuen Jehovah. (1 Timote 1:18, 19) Elañe jej kõtlok bwe nan ko an Anij ren tel ial ko ad kajjojo ran, Jehovah enaj nawõnãd kin jerammõn eo emõntata kin mour indio.—Jon 17:3.
Kwoj Kememej Ke?
• Etke eaorõk ñan kõtlok bwe Jehovah Anij en tel ial ko ad?
• Ilo wãwen et eo nan ko an Anij remaroñ lamp ñan need?
• Ewi wãwen an nan ko an Anij maroñ meram ñan ial eo ad?
• Ewi wãwen katak Bible enaj jibañ kij ñan lor nan in tel eo an Anij?